Sa Sèrie A est totu un antru mundu, is diletantis no ant a podi sighiri is règulas chi imoi serbint po torrai a giogai

Sa bidea de su presidenti de sa Lega Natzionali de is Diletantis, Cosimo Sibilia, de torrai a fai partiri, totu in pari, su mundu de sa bòcia, est a nai de sa Sèrie A fintzas a sa Terza Categoria, est sciusciendusindi drabessi meda.
De una parti, difatis, nci funt is primus sotziedadis chi funt giai atziendi sa boxi: in d-unu primu tempus funt stetius is de su Tortolì, scuadra chi giogat in su campionau de Promozione, cun d-una litera oberta pròpriu po sa LND; agoa funt arribadas is fosiladas, dda sa tzerriaus diaici, de su presidenti de su Castelsardo (chi, tra is atras cosas, est secundu in sa lista de su campionau de Eccellenza), Pierpaolo Piu, chi at incarau su cèrtidu. Is cosas, de su restu, funt benendi a pillu e parint sempri prus craras: po is dilentatis at a essi traballosu meda, naraus diaici, sighiri totus is règulas chi ant a serbiri po torrai a incumentzai, a su mancu cun is allenamentus.

Po cumprendi mellus su chi seus narendi, iat a bastai a ligi cumenti funt andadas is fainas in Germània po is scuadras de sa Bundesliga (chi est sa nosta Sèrie A) e de sa Zweite Liga (chi ballit po sa nosta Sèrie B), chi pròpriu lunis passau funt torradas in campu, a pustis de bintises diis de corantena. S'allenamentu de is de su Norimberga, po nd'arremonai unu, est sighiu po prus de seti oras. Is giogadoris si funt atobiaus in trumixeddas de cuatru personas, ses trumas in totu: is primus ant incumentzau a is dexi de su mengianu, is urtimus ndi funt bessius a faciora de is tres. Agoa est arribau su turnu de is portieris. A totu custu si aciungit puru sa règula de abarrai atesu, s'unu cun s'atru, a su mancu de unu metru e mesu.
Ddu scieus, fait arriri feti a ddu pentzai ca is de su Bayern Monaco, po nd'arremonai un antru, ant depiu cuncodrai tres campus, prus un antru feti po is strupiaus. Funt totus cosas, est craru, chi funt foras de conca po is scuadras piticas. A totu custu s'iant a depi aciungi puru totus is esamis chi is giogadoris iant a depi fai ainnantis de torrai a giogai.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020