Scarèscias is festas, is scuadras sardas torrant a atacai cun is partidas de is campionaus

E duncas, atacu a scriri is rigas po cust'artìculu, chi at a essi su primu chi nd'at a bessiri aforas po su chi pertocat su duamilla e binticincu (e no mi parit nemmancu berus, si ddu incumentzu a narai, ca su tempus siat sighendi a andai ainnantis, e sa cosa ballit po mei, est craru, ma puru po totus is personas chi stimu. E tra cussas, est crarus, nci sticu, po ddi narai diaici, bosatrus puru, ca custus artìculus sigheis a ddus ligi, e po custa cosa no potzu fai atru, a su mancu po immoi, chi si torrai gràtzias, po sa passièntzia chi teneis), candu seus ancora in su duamilla e binticuatru, e po essi prus pretzisus puru (ca unu giornalista fait beni su trabballu cosa sua pròpriu candu arrannescit a essi pretzisu, po su chi est possibbilli, est craru, po su chi fait, cumenti si narat, puru, in su chi torrat a contai a is atrus, e a is atras), seu atachendi a scriri custas rigas candu su calendàriu mi narat (e deu creu pròpriu ca no siat brullendi) ca seu scroxendumì (ddi nau diaici, a trassa de poeta prus ca de giornalista) su mengianu de su trinta de su mesi de Idas, e duncas, a fai is contus nci poneus pagu meda: de su chi ndi potzu cumprendi (e megu a brullai, si cumprendit, berus est?) ammancant calincuna cosa cumenti a trintatres oras e cust'annu puru at a essi bellu ca fatu e, mescamente, bellu ca scarèsciu. 
E duncas, de innoi potzu partiri, cun cali lega ia a podi atacai, cun s'artìculu de custa cida? 
De seguru, s'apu giai narau, e medas bortas, ca no sciu mai cali ant a essi is legas chi apa a pigai in s'artìculu chi scriu in sardu (in su sardu chi si fueddat, mescamente, innoi in su Campidanu de mesu, e mescamente in Bidd'e Sorris, chi est sa bidda innoi seu stètiu pàsciu e pesau e innoi m'agatu a bivi, ancora, apustis de giai giai corantacuatru annus); ma cumenti scieis, puru, chi a su mancu eis lìgiu a su mancu unu de is artìculus chi nd'apu bogau aforas po su giàssu de is amigus de su Diàriu Sportivu, mi praxit a incumentzai a atacai fadendi su contu de su tempus chi est passendi, de su tempus chi si seus lassaus a is pabas; mi fait prexei, duncas, giogai cun su tialu de su calendàriu, e ballit po su calendàriu chi manigiaus dònnia dì, po cumprendi a cali puntu de sa cida, de su mesi, de s'annu seus lòmpius, ma apustis, su pròpriu giogu, est craru, fait a ddu fai cun is campionaus de càlciu chi sigheus po su giàssu de su Diàriu Sportivu, e duncas, is campionaus chi pertocant cussu chi estus a podi tzerriai (cumenti fadeus, de su restu) su mundu de is giogadoris diletantis, chi, si ddu torru a arregodai, funt cussus chi ndi cabant in campu no po trabballu, e duncas no po su dinai (no po si ponni in buciaca una barca de arriabis, cumenti si iat a podi narai, chi de su restu est su chi faint is grandus giogadoris, is grandus campionis chi currint impari a is grandus scuadras de sa Sèrie A, o de sa Sèrie B). 

E duncas, si ddu promitu giai de immoi (ainnantis ca totus is chistionis chi apa a pigai in consideru, mancai, mi ddu fetzant scaresci), ca in sa segunda parti de cust'artìculu eus a castiai impari cumenti funt andendi is cosas me is campionaus prus mannus tra totus cussus chi si giogant in s'isula bella e stimmada cosa nosta, ma apu atacai cun is chistionis acapiadas a su mundu de sa bòcia feti candu apai spaciau totus is strollichiminis chi mi intendu, totu badda badda, aintru de sa conca; ca ddu scieis, de su restu (chi eis lìgiu a su mancu unu de is artìculus chi ndi funt bèssius a pillu in custu duamilla e binticuatru), ca mi praxit, e meda puru, diaici meda ca giai giai mi parit de bessiri aforas de conca, cumenti si iat a podi narai e cumenti seu narendusì, de su restu, a mi strollicai unu pagheddeddu, e mancai a pigai in consideru atras legas puru, ainnantis de mi nci ghetai, a fundu 'e susu, me is chistionis acapiadas a is campionaus, a is resultaus de is partidas e, mancai puru, a is ùrtimus cropus chi ndi funt bèssius aforas po su chi pertocat su mercau, ca in su mesi de Idas si torrat a oberri (e sa cosa ballit, est craru, po is scuadras chi currint in su campionau de s'Ecellenza, ma puru po cussas chi currint in su campionau de sa Promotzioni, de sa Primu e de sa Segunda Categoria puru, ca de su restu, deu creu ca ddu scieis beni, ma chi no ddu scieis deu seu innoi pròpriu po custu puru, funt is campionaus chi sigheus, de prus de dexi annus, antzis, funt giai giai po benni a essi cuindixi, po si torrai a acapiai a sa chistioni de su tempus chi passat, e mancu mali, mi megu a solu a solu, torra, ca su tempus sighit a curri po mei puru, e mancu mali ca is cosas sighint a andai ainnantis, concas a su beni. 

E duncas, sa prima duda chi mi benit de si fai est: eis passau unu Natali bonu? Satzaus si seis? E apitzus de is regalus ita mi podeis contai? Seis abarraus cuntentus de totu su chi eis arrìciu? 
E duncas, a mei mi iat a fai prexei, po diaderus, benni a sciri cumenti si funt andadas is cosas, ma a sa fini, e gei ddu cumprendeis a solus, deu creu, no est una cosa chi mi benit a beni a fai: ia a podi telefonai (pròpriu cumenti fatzu cun is allenadoris e is giogadoris de bòcia, e custu ddu fatzu dònnia dònnia cida chi su Cielu m'arregalat, e dònnia cida in cussus noi mesis chi pertocant sa stagioni de is campionaus de càlciu, ca cumenti scieis, torrant a incumentzai in su mesi de Cabudanni, mancu a ddu fai aposta, e si serrant candu est giai giai po nd'arribbai torra s'istadi, est a nai, a sa fini de su mesi de Maju) a totus is personas (e funt sèmpiri de prus, e de custu no potzu che essi prexau) ca ligint custus artìculus, po cumprendi chi custas festas (sa primu parti de is festas, po ddu narai mellus, ca immoi s'ammancat sa segunda e sa parti finali puru, chi nd'at arribbai, cumenti si cumprendit beni, feti su ses de su mesi de Gennàrgiu, cun sa festa chi tzerriaus, sighendi su chi s'at imparau sa cresia, sa dì de is tres reis, o de sa Befana, chi si praxit de prus cumenti sonat) s'ant lassau su coru prenu, fintzas a cucuru, de paxi, de prexus, mancai de saludi e, po su chi pertocat sa brenti, de cosas bellas de papai. 

E, est craru, mi iat a praxi, e meda puru, su de benni a sciri chi eis domandau calincuna cosa de particulari (cumenti si iat a podi narai, e cumenti apu agatau pròpriu immoi immoi in su fueddariu, de su restu), o chi si nd'est arribbau, invècias, e deu creu chi andit sèmpiri beni, calincuna cosa diaici bella ca, mancai, nemmancu dda bisastis. E duncas, no potzu fai atru (fadendi su contu ca a mei tocat a scriri, e a bosatrus si tocat feti a ligi, e naru feti ma mi ndi rendu contu ca su de su ligi, e mescamente su de su ligi calincuna cosa scrita in sardu, benit a essi una cosa fadiosa meda, pruschetotu po chini no est costumau a ligi, e a ligi artìculus in sardu. Ma est pròpriu po custu motivu  ca seus trabballendi po su bandu IMPRENTAS po su duamilla e bintincincu puru, ca si torru a arregodai, est su bandu ca is de sa Regioni Autonoma de Sardìnnia funt pesendindi de una bella pariga de annus, ant a essi calincuna cosa cumenti a cincu o ses annus, e ddu faint, mescamente, pròpriu po circai de agiudai is personas a no si ndi scaresci de sa lingua sarda e, mancai puru, po circai de agiudai is personas a fai esercìtziu, cumenti si iat a podi narai, cun sa limba sarda. E deu circu de fai sa parti mia, si cumprendit. E totus custus strollichiminis chi nci sticu me is artìculus chi ndi pesu in sardu, totus is strollichiminis, diaici mi praxit a ddus tzerriai a su mancu, chi nci pongiu tra una nova chi pertocat su mundu de sa bòcia e un'antra, serbint, custa a su mancu est s'ispera cosa mia, a ndi cassai s'atentzioni, puru, de totus cussas personas, e chistionu mescamente de is femineddas, chi mancai no funt acapiadas a strintu cun is fainas de su mundu de is diletantis sardus; ca sciu, peròu, chi nci funt personas chi tenint a gradessu, e meda puru, su de podi ligi un artìculu pesau in lingua sarda) ca si contai cumenti mi funt andadas is cosas, ma chentza de si ndi furai, mancai, su tempus chi nemmancu teneis. 
E duncas, si promitu chi nc'apa a ponni pagu meda, est a nai, duncas, ca no m'apa a strollicai prus de su tanti chi serbit. 
E duncas, torrendi a mei, e a is festas de su Nadali, chi po cust'annu puru seu arrannèsciu a mi ddas lassai a is pabas chentza tropus dannus, chentza tropus arroris (e ddu megu a narai po arriri, si cumprendit, berus est?), si potzu contai ca funt stètias festas bonas e prenas de pàsiu, prus ca de spàssiu; po sa primu borta in totu sa vida mia apu scerau de abarrai a solu (chi est una cosa chi in custa vida podit capitai, e de su restu capitat), est a nai ca apu papau a solu siat po sa dì de sa Cena (est a nai sa cena de sa noti de su binticuatru, e candu pentzu a su modu de narai chi teneus, a sa "noti de sa Cena", duncas, mi torrat in conca s'arregodu de sa bon'anima de nonna mia, ca si cumbidàt in domu sua dònnia dònnia annu) e siat po sa dì de su Nadali, e siat puru po su pràngiu de Santu Stefi. E a nai sa beridadi, apu papau meda, ma meda prus pagu de su chi mi podia abertai, ca ddu apu cumprèndiu cumenti funtzionat: abertaus su Nadali po diis e diis, po cidas e cidas de sighiu, si iat a podi narai, mellus, bisendi e pentzendi a totu su chi s'eus a carvai in brenti (a ghetai in brenti, po ddu narai in manera pagu pagu prus druci e prus galanti), ma poi, a su mancu po su chi mi pertocat, e custu ballit mescamente po mei (e de seguru no po bosatrus, e ddu nau po arriri, si cumprendit, berus est?) candu nd'arribbant is diis de sa festa, mi bastat pagu po perdi s'apetitu (e immoi chi nci seu, si ddu scòviu puru: narant ca is ominis, ma sa cosa ballit puru po is femineddas, e nci iat a mancai atru puru, perdant s'apetitu candu, mancai, si innamorant...e no potzu aciungi mancu mesu fueddu, po immoi!). 
E duncas, diaici m'est sucèdiu, po cust'annu puru: po cidas e cidas apu pentzau a cumenti cuncodrai sa cena de su binticuatru e su pràngiu e sa cena de su binticincu, ma a sa fini, de totu su chi pentzamu (e chi mancai disigiamu) de mi papai seu arrannèsciu a sarvai (est a nai: a papai) calincunu arangiu, po si fai a cumprendi cumenti dda apu acabbada, e mi ndi megu a arriri a solu a solu, chi no ddu eis cumprèndiu. 

E po cust'annu, eia, apu scerau de mi nd'abarrai a solu, est a nai chentza m'atobiai cun is parentis cosa mia, partendi de babbu miu, e fintzas a arribbai a tzia mia e a sorresta mia: e, diaderus, custa est stètia sa primu borta in totu sa vida cosa mia chi apu fatu custu giogu po totus is tres diis de sa festa (est a nai: po su binticuatru, po su binticincu e po su bintises puru, mancai su bintises a merì seu andau a agatai sa truma de amigus chi tèngiu de is tempus de is scolas superioris); e duncas, po segai a crutzu sa cosa, si podit narai ca, mancai apa papau a solu e mancai sia abarrau a solu po oras e oras e oras (po su prus apu passau su tempus meditendi, cumenti si iat a podi narai furendindi su fueddu de s'italianu etotu, e preghendi puru), mi seu agatau cun su coru prenu de afròddiu, de paxi, e de serenidadi, cumenti si iat a podi narai, puru, ca po su chi mi pertocat funt is cosas mellus, is sentidus prus bonus, po ddu narai mellus puru, chi nci podint essi in custa vida. 

E si potzu narai, puru (e mancai nemmancu nc'eis a crei) ca est stètiu unu de is Nadalis prus bonus e prus drucis tra cussus chi apu tentu sa possibbilidadi de mi bivi in custa vida. E nareus ca su de passai is festas a solu mi fiat giai mesu capitau a is tempus de cussa pesti maba e lègia chi est stètia su Covid (e gei si ddu eis a arregodai, berus est?), ma po cust'annu apu scerau deu de mi nd'abarrai a sighiri is fainas cosa mia, cumenti si iat a podi narai, chentza de m'atobiai cun nemus. E si potzu narai, torra, ca eia, is cosas mi funt andadas beni meda. Apu arriciu, e seu seguru de su chi seu scoviendusì, de su chi seu contendusì, meda ma meda de prus de su chi podia bisai, e meda ma meda de prus de cussu chi mi podemu abertai de custu Nadali: de su restu, narant ca is festas de su Nadali (ma sa cosa iat a depi balli po su perìodu de trexi diis chi partit, chi incumentzat sa noti de su binticuatru de su mesi de Idas e si serrat, est a nai ca spaciat, ca acabbat pròpriu sa noti de su ses de su mesi de Gennàrgiu, chi eus arremonau giai, de su restu) funt prenus de maghia, cumenti si iat a podi narai, e deu si potzu scoviai ca, po cust'annu puru, seu abarrau a buca oberta po totu su bonu chi nd'apu arrìciu. E diaderus, candu mi capitant custas cosas (e immoi andu a si scoviai, puru, ita m'at portau Babbu Nadali, cumenti si narat), no potzu fai atru ca torrai gràtzias a su Cielu po totu su chi m'arregalat, a partiri de sa saludi (chi est sa primu cosa de sa lista, ca chentza de sa saludi, si cumprendit e deu creu chi sa cosa potzat balli po bosatrus puru, su spàssiu benit a essi pagu meda, e is giogus puru, benint a essi pagus meda), fintzas a arribbai a is amigus e is amigas chi ancora tèngiu a su costau cosa mia, e chi funt una de is cosas de importu prus mannas tra totus is cosas chi tèngiu, e chi mi nd'arribbant in custa vida. E mancai is amigus e is amigas e is parentis siant sa cosa de importu prus manna (ddu torru a arrapiti) de su mundu e de sa vida cosa mia, si potzu narai, puru, immoi chi nci seu (ma de su restu deu creu ca ddu eis cumprèndiu beni meda cumenti funtzionat in sa conchitedda cosa mia), ca arrannèsciu (e candu fia piticheddu de edadi, est a nai, candu fia unu piciocheddu de, mancai, binti o binticincu annus, su de abarrai a solu fiat una cosa aforas de conca, una cosa de macus, po ddu narai diaici puru) a abarrai a solu po oras e oras, e diis e diis de sighiu, chentza de mi fai pigai de su disisperu cumenti, mancai, mi sucediàt candu fia unu piciocheddu, cumenti s'apu narau immubagora. 
E duncas, in unu mundu innoi s'atobiaus, po su prus, gràtzias a cussu tialu de cellulari, chi teneus a totu dì, e a totu noti puru, me is manus e cravau asuta de is ogus (chi cumprendeis su chi si bollu narai), mi parit unu miraculu su de podi gosai de sa castiada bona chi, mancai, ti podit arregalai una persona chi, mancai, ancora no connoscis. E in unu mundu innoi s'atobiaus giai giai feti gràtzias a cussu tialu de WhatsApp (ca deu mancu manigiu, chi si depu narai sa beridadi) mi parit unu spantu mannu meda, unu miraculu, giai giai mi benit a ddu tzerriai diaici, su de podi atobiai una persona diaici, po una gràtzia de Deus e de su Cielu, chentza de si ponni de acòrdiu. E mancu mali, mi benit de ddu narai diaici puru, ca nci funt personas chi ndi brintant in sa vida cosa nosta de unu momentu a s'atru, e no podis mai sciri de innoi ndi lompint, e sa cosa prus toga est pròpriu custa, mi parit de podi narai: ca no ti ddu abertas, ca no sciis mai, ainnantis chi is cosas sucedant, mi parit craru, de cali furrungoneddu ndi potzat bessiri aforas sa persona chi ti podit fai bessiri aforas de conca feti cun una castiada bona, cun una castiada a "ogus drucis", mi benit de dda tzerriai diaici. Eia, in unu mundu innoi s'atobiaus (e si connosceus, e si poneus impari puru, chi cumprendeis su chi si bollu narai) gràtzias a cussu tialu de Facebook, mi parit unu bisu su de podi connosci una persona cumenti si fadiat me is tempus passaus. 

E duncas, mi intendu su coru prenu de prexu, e mi parit de podi narai, e cun custu dda acabbu po oi puru, ca s'amori est una de is fortzas prus mannas tra totus cussas chi pertocant sa vida de s'omini (ma est craru ca sa pròpriu cosa si potzat narai puru po is femineddas, e mi parit bastanti craru, berus est?), ca ti parit giai giai de essi diaici lèbiu, e cun su coru diaici prenu de tzùcuru (ddi nau diaici) ca ti parit, giai giai, chi potzast pigai su bobidu (eia, a trassa de pilloneddu, a trassa de crucueu) de unu segundu a s'atru. 

E duncas, apu fatu is festas de Nadali cun custu sentidu in conca, in su coru e in sa brenti puru (po serrai sa chistioni) e po immoi no potzu fai atru ca isperai ca po bosatrus puru si potzat narai sa pròpriu cosa chi ballit po mei: est a nai, ca nci siat unu bellu tanti de saludi po bosatrus, e unu bellu tanti de amori, puru, e unu bellu tanti de prexus. Ca dònnia unu de nosu, est craru, agatat su prexu cosa sua me is fainas chi sighit (o chi disigiat); e po calincunu su prexu ndi iat a podi arribbai impari a unu bellu tanti de dinai, impari a una bella machina noba, gràtzias, mancai, a unu trabballu nou; gràtzias, mancai, a un regalu de importu, cumenti iat a podi essi una collana de oru; o gràtzias, mancai, a sa nàscida de unu pipiu, o una pipia (cumenti est sucèdiu, de su restu, a un amigu stimmau meda chi tèngiu, ancora, a su costau, de is tempus de s'universidadi, e chi est bèniu a essi babbu po sa segunda borta in sa vida sua, e pròpriu su bintitres de custu mesi etotu, e podeis fai su contu, a solus, de cantu prexu nd'at ai potziu tenni po custu Nadali). 
Duncas, no potzu fai atru ca isperai chi po bosatrus puru (e ballit po totus) is regalus siant stètius bonus. E immoi chi teneus su Nadali a is pabas, no depeus fai atru ca circai de si lassai a is pabas s'annu bèciu, est a nai custu duamilla e binticuatru chi est arribbendi a sa fini (e mancu mali, ddu nau torra!), e duncas no depeus fai atru ca arriciri, in su modu mellus chi podeus, s'annu nou, est a nai, su duamilla e binticincu. 

E pròpriu me in custas ùrtimas oras, in custas ùrtimas diis, apu fatu su giogu, cun duus-tres amigus, de fai is contus (is contus finalis, si iant a podi tzerriai diaici puru, chi cumprendeis su chi si bollu narai) de cumenti si funt andadas is cosas cust'annu (chi a sa fini, e parit una brulla, ma brulla invècias no est, est sa pròpriu cosa chi fatzu cun is allenadoris e cun is giogadoris de is scuadras de diletantis sardus, candu ddus intendu a su telefunu po ndi pesai is ciaciarradas e, duncas, cussas chi tzerriaus "intervistas", furendindi su fueddu de s'italianu etotu, e gei si cumprendit. E duncas, po si ddu narai mellus puru, candu mi intendu a su telefunu cun is allenadoris, no fadeus atru, de su restu, ca chistionai de cumenti ddis funt andendi is cosas): e duncas, chistionu po mei, potzu narai ca custu duamilla e binticuatru no est stètiu lègiu, antzis, ia a podi narai, fintzas, chi est stètiu bonu meda e bellu druci, e no est una cosa chi sucedit sèmpiri, (gei ddu eis cumprèndiu bosatrus puru cantu podit essi trota e marigosa a bortas sa vida), fadendi su contu, a su mancu po su chi mi pertocat, est craru, ca su duamilla e bintiduus fiat giai giai po mi sperdi. E de su duamilla e bintiduus funt passaus duus annus, ca a fai is contus nci poneus pagu meda, cumenti mi praxit a arrapiti fatu fatu fatu meda, e torru gràtzias a su Cielu, po su fatu ca su tempus est sighendi a passai po mei puru, e po su fatu, puru ca, a su mancu po oi, no seu serrau aintru de s'aposentu de unu uspidali, e nemmancu in una presoni, e nemmancu serrau aintru de unu de cussus logus innoi si serrant is macus, e chi, a sa sarda podeus tzerriai manicòmiu, a trassa de s'italianu etotu, o "domus de is macus", puru, sighendi su chi est consillendumì su fueddariu). 



E duncas, apustis chi s'apu fatu sa conca a àcua (cumenti si megàt, de su restu, sa bon'anima de mamma mia, e mi parit totu de dda torrai a intendi, e mi parit, diaderus, unu de cussus miraculus, unu de is regalus chi su Cielu fatu fatu mi fait, e megu a chistionai, gei si cumprendit, berus est, de custa cosa chi candu scriu is artìculus in sardu mi parit totu de torrai a intendi sa boxi de mamma mia. Chi est stètia issa, tra is atras cosas, chi m'at imparau a fueddai in sardu), cun totu custa surra manna meda de strollichiminis, deu pentzu ca siat arribbada s'ora (e mancu mali! S'at a megai calincunu de bosatrus) de andai a castiai cumenti funt cuncodradas is cosas po su chi pertocat is campionaus de bòcia de su mundu de is diletantis, chi ant a torrai a incumentzai, torrai a partiri, apustis de is festas, pròpriu custu fini de cida chi nd'est arribbendi, allestru e acoitu cumenti chi fessit unu leporeddu chi currit in mesu a su sartu (e custu ddu nau, est craru, po giogai a fai unu pagheddeddu su poeta puru e no feti su giornalista sportivu, e megu a brullai, ma unu pagheddeddu feti, si cumprendit berus est?). 

E duncas, deu ia a partiri, sèmpiri chi seis de acòrdiu cun mei, a castiai cumenti funt cuncodradas is cosas po su chi pertocat su campionau de s'Ecellenza, ca, cumenti s'arregodu fatu fatu (e ddu fatzu immoi puru, ca tanti nci pongiu pagu meda, e si cumprendit), est cussu prus matucheddu, est a narai, mellus puru, cussu de importu prus mannu tra totus cussus chi is de sa Federatzioni Italiana de su Giogu de su Càlciu e is de sa Lega Natzionali de is Diletantis ndi pesant in Sardìnnia. 
E duncas, is sexi scuadras chi currint in su campionau ant a cabai torra in campu su ses de su mesi de Gennàrgiu, po sa primu bessida ('tendei 'tendei, cumenti apu sèmpiri intèndiu narai de sa bon'anima de mamma mia) de custu duamilla e binticincu (e nd'aprofitu, immoi chi nci seu, fadendi su contu ca seu sighendi a scriri is rigas, is fueddus de custu artìculu candu seu arribbau a su duus de su mesi de Gennàrgiu, a sa segunda die de s'annu nou, po s'augurai ca cust'annu potzat essi bellu prenu, prenu fintzas a cucuru, si iat a podi narai diaici puru, de satisfatzionis, de prexus e de saludi), chi s'at a giogai, mi parit bastanti craru, sa dì de sa Befana (o de is tres reis, cumenti seus costumaus a dda tzerriai, puru). 

E duncas, a su primu postu de sa lista, cun trintotu puntus giai allogaus in buciaca, agataus is campidanesus de su Muristeni, chi funt stètius bonus a ndi cassai giai doxi partidas bintas apitzus de cuindixi bessidas, cun duas partidas chi si funt serradas cun su resultau de paridadi e apustis de essi pèrdiu, a su mancu fintzas a oi, feti una partida, e seu chistionendi de cussa chi si fiat giogada sa primu dì de su mesi de Idas, est a nai, duncas, duus mesis fait, in domu cosa insoru etotu, contras a is grogus-arrùbius de is de su Calanzanos, cun su resultau de unu a zeru. Tocat a narai (si iat a podi narai, puru, immoi chi nci seus) ca is de su Muristeni funt sighendi a curri a totu coddu (cumenti si narat, cumenti apu sèmpiri intèndiu narai in Bidd'e Sorris, a su mancu, chi est sa bidda innoi m'ant pasciu e cresciu e innoi ancora m'agatu), fadendi su contu ca apustis de nd'essi arrutus in sa isfida contras a is de su Calanzanos, nd'ant strantaxau, e impressi puru, sa conca, gràtzias a is tres puntus prenus (e grais cumenti a s'oru, cumenti si iat a podi narai puru) chi funt stètius bonus a ndi cassai in sa partida chi ant giogau in domu de is de s'Ossese de Ossi, cun su resultau de unu a zeru; e in sa partida apustis, cussa chi ant giogau in domu cosa insoru (est a nai a su campu comunali chi ddoi est in Muristeni etotu), contras a is casteddaius de sa Ferrini, ant bintu cun su resultau, bellu e tundu tundu (cumenti si iat a podi narai), de tres a zeru, e ant serrau su duamilla e binticuatru (est a nai, in sa partida chi s'est giogada su bintiduus de su mesi de Idas, in domu de is de s'Alghero, sa scuadra chi nd'ant pesau in s'Alighera, gei si cumprendit bastanti beni deu creu) cun sa bìncida, toga meda, chi nd'est arribbada gràtzias a su resultau de cuatru a zeru. E immoi is de su Muristeni ant a depi torrai sa visita, cumeni si iat a podi narai, de is de su Taloro de Gavoi, po sa primu bessida de cussa chi tzerriaus "lista de partidas de sa torrada". E duncas, si iat a podi serrai sa chistioni acapiada a is de su Muristeni (ca funt is primus de sa classi, in dì de oi), narendi ca pròpriu in sa primu partida de su campionau de su duamilla e binticuatru – duamilla e binticincu, is biancus-asullus (cumenti ddus tzerriaus po su cabori de is camisas chi si ponint inpitzus, chi manigiant po giogai is partidas, e mescamente is partidas in domu cosa insoru) si fiant dèpius acuntentai, cumenti si narat, de unu puntixeddu feti, cun is aversàrius chi ndi iant cassau su gol de s'unu a unu giai giai me is ùrtimus minudus, e cumenti s'eis a arregodai asolus, e chi no si ddu arregodais deu seu innoi pròpriu po custu, is campidanesus nci iant fuiau a s'abiga, cumenti si narat, unu tiru de is undixi metrus pròpriu me is ùrtimus segundus de sa partida. 
E duncas, torrendi a su campionau de s'Ecellenza, e a sa lista de partidas chi s'ant a giogai custu fini de cida, sigu a si contai, sigu a si narai ca a su segundu postu de sa lista, cun trintases puntus allogaus a su callenti in buciaca (cumenti ia a podi narai chi mi permiteis de giogai pagu pagu a fai su poeta), agataus is de su Budune, ca in custas primas cuindixi bessidas funt stètius abbilis a ndi cassai undixi partidas bintas (po trintatres puntus in totu, ca a fai is contus nci poneus pagu meda), e po tres bortas ant serrau sa isfida cun su resultau siddau in paridadi; si iat a podi narai, puru, ca is de su Budune ant pèrdiu, a su mancu fintzas a oi, est a nai chi nci funt arrutus a terra feti po duas bortas. E duncas, a fai is contus nci poneus pagu meda, is de su Budune s'agatant, a su mancu in dì de, cun duus puntus in mancu de is chi tenint allogaus is de su Muristeni, e nc'est de abarrai segurus de su fatu ca po sa bìncida de su campionau (e duncas po s'artziada in su campionau de sa Sèrie D, chi est su prèmiu, m'est bèssiu de ddu tzerriai diaici, po chini ndi cassat su primu postu a sa fini de sa stagioni, e gei si cumprendit), ant a curri is de su Muristeni e is de su Buduni, e custa cosa iat a podi sighiri a andai ainnantis fintzas a s'ùrtimu segundu de su campionau (e si arregodu puru, immoi chi nci seu, ca su campionau de s'Ecellenza s'at a serrai su trexi de su mesi de Aprili, est a nai sa cida ainnantis de sa Pasca Manna e, custu est pagu ma seguru, mi pigat unu pagheddeddu a conca su de pentzai giai a sa Pasca Manna candu seus arribbaus, feti, po immoi, a sa segunda dì de s'annu. E megu unu pagheddeddu a brullai, gei si cumprendit). 
Ma impari a is de su Muristeni e a is de su Budune, a su de tres postus de sa lista agataus is biancus-nieddus de s'Ossese, chi eus arremonau immubagora etotu, e chi tenint, allogaus in buciaca, calincuna cosa cumenti a trintatres puntus, chi ndi funt arribbaus gràtzias a undixi partidas bintas. Is de s'Ossese, duncas (castiendi is numerus chi nd'ant pesau, mi parit craru) funt stètius is ùnicus chi no ant mai serrau, a su mancu fintzas a oi, nemmancu po una borta, nemmancu po una partida, si cumprendit, cun su resultau siddau in paridadi. E tocat a narai, duncas, ca is de s'Ossese ant pèrdiu cuatru partidas fintzas a oi: a sa de tres bessidas (cussa chi si fiat giogada su bintotu de su mesi de Cabudanni, po si cumprendi mellus), in domu cosa insoru etotu (est a nai a su campu comunali "Walter Frau") contras a is de su Grupu Sportivu de Bidd'e Cresia, cun su resultau de unu a zeru; in domu de is de su Budune etotu (chi eus arremonau immubagora etotu), cun su resultau de duus a zeru, in sa partida chi si fiat giogada su ses de su mesi de Ladàmini, e apustis ant pèrdiu, fiat a sa de seti bessidas de s'annu (est a nai sa partida chi si fiat giogada su bintiseti, sèmpiri de su mesi de Ladàmini) contras a is de su Crabonaxa, cun su resultau de duus a unu. Immoi, duncas, is de su Budune ant a depi arriciri sa visita (cumenti si iat a podi narai, e cumenti seu narendu, de su restu) de is de su Crabònia (cun sa partida de s'andada, si ddu arregodu, ca si fiat serrada cun su resultau de unu a zeru po is segundus de sa lista; e immoi nc'est de crei, puru, est craru, ca is de su Crabònia ant a circai, ant a fai de totu, po ddis torrai sa furria, cumenti si iat a podi narai, e duncas, po circai de ndi cassai a su mancu unu puntixeddu: e eus a biri, intzandus, cumenti ant a andai is cosas). 

Po is de s'Ossese, invècias, nc'at a essi de giogai sa partida, de importu mannu meda, in domu de is casteddaius de sa Ferrini, chi tenint feti undixi puntus allogaus in buciaca, a su mancu fintzas a immoi, e s'agatant cun feti una scuadra a is pabas in sa lista (chi cumprendeis su chi si bollu narai...) , e seus chistionendi de is de su Barìsardo, sa scuadra chi nd'ant pesau in Barì. E duncas, in sa partida de s'andada, is de s'Ossese fiant arrannèscius a ndi cassai is tres puntus, gràtzias a su resultau de tres a duus. A su de cuatru postus in sa lista, invècias, agataus is de su Tèmpiu, chi ant a torrai a partiri, po is partidas de s'annu nou (e duncas de custu duamilla e binticincu, e no mi parit nemmancu berus: eia, seus lòmpius, ballit po mei e po bosatrus puru, est craru, a su duamilla e binticincu! E tanti est nudda, mi megu a solu a solu!!!) cun calincuna cosa cumenti a trintaduus puntus in buciaca, chi ndi funt arribbaus gràtzias a dexi partidas bintas e duas partidas chi ant serrau cun su resultau siddau in paridadi, apitzus de cuindixi bessidas in totu. 

E duncas, is caboniscus (cumenti seus costumaus a ddus tzerriai, poita, mi praxit a si ddu arregodai dònnia dònnia dònnia borta chi ndi chistionu, in su disègnu de su sìmbulu de sa scuadra tenint unu caboniscu), a su mancu po su chi pertocat is partidas chi ant giogau in su mesi de Idas, me is cuatru bessidas chi nci funt stètias, ainnantis de su Nadali (chi si seus lassaus a is pabas e chi est bellu ca scaresciu puru), nd'ant cassau (funt stètius bonus a ndi cassai, chi si praxit de prus cumenti sonat) calincuna cosa cumenti a dexi puntus, apitzus de is doxi chi ddoi fiant in totu, badda badda in su pratu, cumenti si iat a podi narai. E duncas, is de su Tèmpiu ant incumenzau s'ùrtimu mesi de s'annu cun sa bìncida, de importu mannu meda, chi nd'ant cassau in domu cosa insoru (est a nai a su campu "Nino Manconi"), e pròpriu contras a is de su Budune, cun su resultau de unu a zeru; sa cida avatu (est a nai in sa partida chi s'est giogada s'otu de su mesi de Idas, pròpriu sa dì de s'Angelu, cumenti seus costumaus a dda tzerriai, chi sigheus, a su mancu, su chi si imparat sa cresia), funt arrannèscius a binci, puru, e sèmpiri cun su pròpriu resultau de unu a zeru, in domu de is arrùbius-brau de su Taloro de Gavoi; su catodixi (sèmpiri de su mesi de Idas), is de su Tèmpiu ant giogau s'ùrtima partida de s'annu (de s'annu bèciu, si cumprendit, e duncas, de su duamillae binticuatru) in domu cosa insoru, contras a is tataresus de su Li Punti, e ant torra bintu cun su resultau de unu a zeru (po sa de tres bortas de sighiu, ca a fai is contus nci poneus pagu meda). E in s'ùrtima bessida, invècias, is de su Tèmpiu funt stètius bonus a ndi cassai feti unu puntixeddu, in domu de is de su Crabonaxa. E immoi, in custu fini de cida chi est a is portas (cumenti si iat a podi narai furendindi sa trassa de s'italianu etotu), is de su Tèmpiu ant a depi giogai una de is partidas prus togas, custu est pagu ma seguru, e de importu prus mannu de sa giorronada, fadendi su contu ca a su "Nino Manconi" nd'ant a arribbai is de sa Nuorese, chi a s'incumintzu de s'annu, a su mancu, fiant in sa lista de is scuadras chi teniant totus is cartas bonas po curri po su primu postu, ma is nugoresus in dì de oi s'agatant a su de seti postus in sa lista, cun bintiduus puntus in totu (chi funt su pròpriu tanti de puntus, si ddu naru acoitu, chi tenint in buciaca is de su Bidd'e Cresia, chi s'apu arremonau ainnantis, de su restu), e chi funt, a fai is contus nci poneus pagu meda, sexi in mancu de is chi tenint is de su Muristeni. 
E duncas (serru s'artìculu de oi cun custa nova), de importu mannu meda at a essi puru sa partida chi is de su Crabonaxa ant a depi giogai, in domu cosa insoru etotu, contras a is de su Ilartzi. 

E immoi, no s'abarrat atru de fai ca su de tenni unu pagheddeddu, unu stìddiu de passientzia po un antra pariga de diis, e apustis eus essi prontus po si nci fuiai, a fundu 'e susu (cumenti si narat in Bidd'e Sorris) po un'antra bella giorronada prena fintzas a cucuru de partidas. Po oi si imprassu a forti e si promitu giai ca, chi su Cielu at a bolli, eis a agatai un antru tanti de rigas, cumenti a is chi eis giai giai acabbau de ligi, tra seti diis, est a nai, cumenti a sèmpiri, su giobia chi at a benni.





Attività realizzata col contributo della Regione Sardegna. IMPRENTAS 2024-2025. LR 22/2018 art. 22