Is scuadras sardas currint concas a su Nadali: is ùrtimus centu e otanta minudus de giogai po su chi pertocat su duamilla e binticincu

E duncas, chi no seu sballiendimì (ma mi parit de podi narai ca nou, ca no seu svarionendi, po manigiai unu fueddu chi apu sèmpiri intèndiu narai, mescamente candu fia unu piciocheddu, innoi in Bidd'e Sorris, ca est su logu innoi seu stètiu pàsciu e crèsciu), seus arrannèscius a si lassai a is pabas sa primu festa de su mesi de idas, e seu chistionendi, est craru, de cussa chi nd'est arruta custu lunis passau, chi fiat s'otu, e chi est cussa, po sa cresia e po chini sighit is fainas de is catolicus-cristianus, innoi arregodaus s'Immacolata Concezione, cumenti si narat in italianu: duncas, eia, cumenti eis a sciri beni, sa Madonna, chi est sa mamma de Gesù Cristu, at tentu su fillu apustis chi at biu, e chistionau cun un angelu, chi ddi at narau ca iat a essi benida a essi sa mamma de su fillu de Deus. E duncas, eia, s'otu de su mesi de idas est sa primu ocasioni innoi podeus fai festa o, a su mancu, incumentzai a tastai su sabori druci chi is festas tenint, su tastu druci chi is festas si lassant in su coru, e no feti in sa buca. E s'otu de su mesi de idas est sa dì innoi, cumenti seus costumaus a fai, sighendi sa traditzioni, pesaus su presepiu, po chini ddu fait, e est sa dì, puru, innoi si cuncodrant is matas cun totus is apicajonis chi pertocant su Nadali: e duncas, luxis e luxixeddas de dònnia calidadi e genia, po incumentzai, e bocias, e bociteddas, e fintzas frocus e frochiteddus. 
Giai pesau ddu eis su presepiu in domu? Giai cuncodrada dda eis sa mata po su Nadali? E duncas, giai satzendusì puru seis? 
Ca sa genti in custu perìodu, diaici mi benit de pentzai, incumentzat a ndi bessiri, giai giai, aforas de conca, cun totus is regalus chi nci funt de comperai e cun totus is drucis, e sa cosa de papai, chi s'acucat in conca de comperai, ca parit giai giai ca is disìgius no spacint mai. 
Mi benit de narai custu: no seus in ùnicus, in custu mundu, a ndi bessiri aforas de conca po su tialu de panetoni (chi mi permiteis de manigiai custus fueddus, a su mancu; est a narai, ca isperu ca is fueddus chi apu scerau no si andint a trotus), fadendi su contu ca una pariga de annus fait seu stètiu in Perù, e m'est capitau de m'agatai in Lima a sa fini de su mesi de agustu, e ita depestis biri? Nci fiant giai totus is negotzius, megu a chistionai mescamente de is supermercaus (cumenti ddus tzerriaus a trassa de is ingresus etotu), ca fiant prenus de panetonis, ma pròpriu, muntonis e muntonis de panetonis, ca de su chi apu potziu cumprendi, is peruvianus bessint aforas po su panetoni cumenti a nosu, chi no de prus puru, chi est possibbili puru feti a pentzai a una cosa diaici. 
E duncas, si lassu papai totus is drucis chi boleis, e de su restu su mesi de idas est togu po custu fatu puru: po sa cantidadi manna de cosa de papai ca si nci cravaus in brenti. E megu a brullai, gei s'at a cumprendi, berus est? Po su chi mi pertocat, invècias, apa a depi fai, apa a depi sighiri sa dieta chi fatzu dònnia annu, de una bella pariga de annus, a narai sa beridadi, e chi durat po duus mesis, prus o mancu, ainnantis chi nd'arribbit sa festa de su Nadali; eia, est a narai, duncas, ca a mei m'at a tocai a abertai, a tenni passièntzia po un'antra pariga de cidas (feti duas, a fai is contus) ainnantis de mi podi permiti de mi papai, mancai, feti una fita de "cosa bella" (po manigiai unu fueddu chi apu sèmpiri intèndiu narai de sa bon'anima de una tzia de sa bon'anima de mamma mia), de cosa druci, e duncas, eia, apa a depi abertai a su mengianu de su Nadali po mi podi permiti de mi papai sa fita de panetoni chi mi tocat. E sèmpiri chi su Cielu at a bolli custu beni po mei. 
Ca ddu scieis, de su restu, cumenti andant is cosas (e de sa cosa si ndi chistionu fatu fatu, e a cantu parit ddu seu torrendi a fai in custu artìculu etotu): oi ses sanu cumenti a unu pisci, o po ddu narai mellus puru, oi ti intendis sanu cumenti a unu pisci, e mancai cras dda acabas totu sciasciau in unu letu de unu uspidali, cun sa conca prena fintzas a cucuru de pentzamentus lègius. 

E nd'aprofitu, immoi chi nci seu, po mandai is saludus, isperendi ca ndi potzat sanai chitzi de su mabi chi ddi ant agatau, a un'amiga stimmada cosa mia (chi ligit sèmpiri is Novas de su Diàriu Sportivu), chi de s'atra dì (eia, de s'otu de su mesi de Idas, po torrai a sa chistioni chi apu pigau ainnantis) est ricoverada, cumenti si iat a podi narai a trassa de cumenti si narat in italianu etotu, in s'uspidali de Nugoro. 

E duncas, po torrai a nosu, megamu a si domandai: fatu festa manna eis custu lunis passau? 
A mei, cumenti si ia giai narau, de su restu, m'est tocau a trabballai, e ddu apu fatu chentza de murrungiai nemmancu po unu pagheddeddu, nemmancu po unu mesi segundu, est craru: torru gràtzias a Deus po su trabballeddu chi tengu de calincuna cosa cumenti a cuindixi annus, unu trabballeddu chi mi permitit de bivi in custu mundu macu meda e, immoi chi nci seus, immoi chi ammancant feti cuindixi diis a su Nadali, fait a ddu narai, unu trabballeddu chi mi permitit, tra is atras cosas, de podi fai calincunu arregalleddu a is personas chi stimu e chi bollu beni. 
E duncas, eia, si fia narendu ca custu lunis apu dèpiu trabballai po si torrai a contai, in italianu, cumenti funt andadas is cosas me is campionaus chi sigheus (deu impari a is collegas cosa mia, est craru) po su giàssu de su Diàriu Sportivu, fadendi su contu ca is scuadras de s'Ecellenza, de sa Promotzioni, de sa Primu e de sa Segunda Categoria ndi funt cabadas in campu po giogai un'antra giorronada de partidas, candu ammancant feti duas giorronadas po custu duamilla e binticincu, e apustis, eia, est craru, nd'eus a torrai a chistionai in su duamilla e bintises. 

Chi pròpriu si depu narai sa beridadi, po su chi mi pertocat m'est tocau a trabballai giai de su domìnigu a su mengianu chitzi: e de su restu, candu su sabudu ndi cabant in campu is scuadras de sa Promotzioni (cumenti eis a sciri giai, e chi no ddu scieis deu seu innoi pròpriu po custu puru, una cida tocat a is scuadras de sa lista A, e una cida tocat a is scuadras de sa Lista B, po dònnia mesi fintzas a arribbai a su mesi de martzu), seu costumau a mi ndi scidai chitzi meda su domìnigu (giai giai prus chitzi de is atras diis puru, fadendi su contu ca tengu sa tialu de svèglia, po ddu narai a trassa de s'italianu etotu, chi s'alluit, chi sonat dònnia, dònnia dì a is ses mancu dexi minudus), e est una cosa chi no mi dispraxit po nudda a si narai sa beridadi: mi capitat fatu fatu meda de scriri candu su sobi est giai giai po si ndi pesai, cun su cielu chi torrat a pigai luxi, apustis de su noti, e de su scuru (e su de biri sa luxi chi pintat su cielu mi andat meda, mi fait beni a su coru, chi pròpriu depu giogai a fai su poeta e no feti su giornalista sportivu, chi mi ddu permiteis, a su mancu), e fadendi su contu ca su trabballu chi ndi depu pesai su domìnigu no est diaici meda, candu seu fortunau, candu seu basau de sa bona sorti (cumenti si iat a podi narai, e cumenti m'est bènniu de narai, sighendi a giogai a fai su poeta, prus ca su giornalista sportivu), intzandus mi sucedit ca a is otu e mesu (de su mengianu seu chistionendi, e deu creu ca si cumprendat, ca sa cosa siat bastanti crara) apu giai acabbau de fai su chi depu, e duncas, eia, apustis de un'ora e mesu – duas de trabballu, mi potzu sighiri a gosai su domìnigu. 
E su de podi trabballai unu pagheddeddu su domìnigu, m'agiudat a mi scroxai su lunis (ca est sa diis peus po su chi pertocat su trabballu cosa mia) chentza de sunfriri tropu, chentza de mi ingolli prus de su tanti: ca su lunis, si cumprendit, est sa dì prus carriga de novas, e si cumprendit, fadendi su contu ca est sa dì avatu a cussa innoi ndi cabant in campu totus is scuadras de bòcia. 
E duncas, si ia a podi narai ca is cosas custa cida no mi funt andadas mabi, mancai no apu potziu fai festa cumenti, invècias, in medas ant fatu. 
In prus nc'est de narai ca tenia sa pisitedda (eia, de una pariga de mesis benit a m'agatai, in domu cosa mia etotu, una pisitedda totu niedda e cun is ogus luxentis ca parint duas perdas de oru. E benit a m'agatai, mescamente, po sa cosa de papai chi ddi dongiu, e po sa possibbilidadi chi tenit de si nd'abarrai dromida chentza de arriscai chi calincunu cani si nci dda papit, e chentza de arriscai de si ndi buscai calincunu dannu mannu, ca po is pisitus ballit cumenti po is ominis puru: oi nci ses, cras bai e circa, mancai is pisitus, de su chi seus costumaus a narai, e a pentzai, tengiant seti vidas, e no feti una cumenti invecias est tocau a is cristianus, e fati arriri custa cosa, e de su restu dda seu narendi po arriri) mesu sconcia, mesu apuntorada, ma gràtzias a su Cielu, a Deus e a su veterinariu chi ddat sighida (e a totus is feminas in bidda chi ddi ant fatu sa mexina de s'ogu), mi parit ca immoi stait torra beni. 
E custa est sa cosa chi auguru a bosatrus puru: de s'agatai in saludi, po oi puru, po custa cida puru, ca candu benit a mancai sa saludi, intzandus nd'arribbant is dannus mannus, e gei si cumprendit cumenti andant is cosas; e a bortas bastat a sciri ca calincunu chi connosceus stait mabi, po si intendi mabi nosu puru, chi cumprendeis su chi seu circhendi de si narai. E a bortas bastat mancai feti ca su pisiteddu chi teneus in domu, o su cani, s'apuntorint, mancai puru po una mesu tontesa, po si intendi su coru prenu de tristura. 
Eia, diaici si pigat custa vida, a prangi e a arriri, e diaderus, deu no potzu fai atru ca si torrai a augurai ca is cosas si potzant andai beni, a su mancu po custus ùrtimus binti diis chi s'amancant po serrai su duamilla e binticincu. E de su duamilla e bintises, eia, eus a biri, candu nd'at a arribbai s'ora, de ita totu nd'at a bessiri aforas, cumenti si iat a podi narai. 

E duncas, de su tempus chi est passendi (e de sa primu festa chi si seus lassaus a is pabas) gei si nd'apu chistionau po custa cida puru; po su tempus chi est fadendi, de su chi narant is dotoris chi sighint is previsionis de su tempu, su frius mau chi at fatu me is diis passadas iat a depi essi acabbau, a su mancu po unu pagheddeddu, e immoi at a fai torra calincuna atra dì de bella basca, cun is temperaduras chi ant a arribbai a tocai calincuna cosa cumenti a dexannoi-binti gradus puru, ca no funt pagus, custu est seguru, fadendi su contu ca s'agataus in su mesi de idas, e fadendi su contu ca tra undixi diis (seu atachendi a scriri custu artìculu giai de su mèrcuis, chi est su dexi, e custu po sighiri su dìciu chi narat ca "chini tenit su tempus po fai una cosa no iat a depi abertai a s'incras po dda fai) nd'at a brintai puru s'ierru. Chi su Cielu at a bolli custu beni po mei, e po bosatrus (e bosatras) puru. 

E duncas, deu creu de essi spaciau, giai, po custa cida a su mancu, de mi strollicai impari a bosatrus, e apu giai acabbau (e fiat ora puru, s'at a megai calincunu) de si ndi furai su tempus chi mancai no teneis, cun is contus e is contixeddus chi tèngiu badda badda in conca. 

E duncas, e sèmpiri chi seis de acòrdiu cun mei, si podeus fuiai a fundu 'e susu (cumenti funt costumaus a narai innoi in Bidd'e Sorris etotu, e est unu modu de narai chi m'est sèmpiri sonau beni, chi m'est sèmpiri praxiu meda) me is chistionis, me is novas chi pertocant su mundu de sa bòcia, de su càlciu de is assòtzius de diletantis chi s'agatant innoi in Sardìnnia, e chi est sa lega de importu prus mannu po su giàssu de su Diàriu Sportivu. 

E duncas, po m'acapiai a totu su chi s'apu ghetau a pari (po arremonai torra sa bon'anima de mamma mia, ca manigiàt fatu fatu custus fueddus) fintzas a immoi, si potzu narai, po incumentzai, ca eia, nc'ant a essi una bella passada (cumenti si narat), una biga manna de partidas po custu sabudu puru, chi at a essi su de su trexi (de su mesi de idas, si cumprendit, berus?), fadendi su contu ca in campu nd'ant a cabai totus is scuadras de sa Promotzioni chi currint in sa Lista A, cun noi partidas in totu, e chi ant a balli po sa de cuindixi giorronadas, e seu chistionendi de sa lista de s'andada, e mi parit craru puru. 
E duncas, eia, eis agatai totus is novas giai de is otu e mesu de su domìnigu, chi su Cielu at a bolli custu beni po mei, est a narai, chi su Cielu m'at a donai sa saludi e sa gana bella po sighiri is fainas chi mi pertocant. 
E duncas, immoi chi nci seus, immoi chi ddus apu arremonaus, podeus andai a castiai, e sèmpiri chi seis de acòrdiu cun mei, cumenti funt postas is cosas in sa Lista A, e cali funt is partidas chi s'ant a giogai in sa giorronada chi nd'at a arrui de sabudu, cumenti s'apu giai scoviau. 

E duncas, eia, a su primu postu de sa lista agataus is de su Gùspini, sighius de un allenadori forti, mancai siat ancora giòvuneddu meda (fadendi su contu ca at acabbau, se pagus annus, de ndi cabai in campu po giogai is partidas), cumenti est Dessì, cun is campidanesus chi tenint in buciaca, allogaus a su callenti, calincuna cosa cumenti a trintacuatru puntus, chi funt tres in prus (feti tres in prus, si iat a podi narai diaici) de is chi tenint allogaus is biancus-birdis de su Castiadas. E pròpriu is de su Gùspini e is de su Castiadas si funt atobiaus, is unus aranti de is atrus, in sa partida chi s'est giogada custu domìnigu passau, cun is de su Guspini chi funt arrannèscius a binci, a s'ùrtimu minudu (antzis, a s'ùrtimu segundu); e gràtzias pròpriu a is tres puntus chi nd'ant ingotu, immoi is campidanesus si funt lassaus a is pabas sa scuadra sighida de Bebo Antinori. Po is de su Gùspini, funt stètius seti diis, mancai dexi, de importu mannu, fadendi su contu ca sa cida passada, candu fiat su tres (eia, mercuis passau, duncas, si iat a podi narai diaici puru) funt arrannèscius a binci sa partida contras a is de sa Tharros, chi ndi fiat sartada una pariga de cidas fait po crupa de su tempus malu; e duncas is de su Gùspini nd'ant cassau calincuna cosa cumenti a ses puntus in cincu diis, ca schifu no faint, custu est pagu ma seguru, e si cumprendit. 

E duncas, sigheus a castiai cumenti funt cuncodradas is cosas me in sa lista A: a su segundu postu agataus is biancu-birdis de su Castiadas, chi de su restu s'apu arremonau pròpriu immubagora, cun trintunu puntus in buciaca, e chi funt feti unu in prus de is chi tenint is cidresus de sa Villacidrese. A su de cuatru postus, invècias, agataus is de su Terraba Frantziscu Bellu, ca in s'ùrtima partida chi ant giogau ndi funt arrutus, cun su resultau de duus a unu, in domu de is de su Cannonau de Jerzu, ca funt una de cussas scuadras ca me is ùrtimas cidas ant scerau de ndi scuncodrai s'acapiu chi teniànt cun s'allenadori bèciu (e chi fiat Andrea Piccarreta, chi si ddu arregodais, e desinò deu seu innoi po fai custu trabballu puru, e nci iat a mancai atru puru), po circai de aderetzai sa stagioni. E duncas, eia, po Piras nd'est arribbada sa primu partida bìnta de candu est lòmpiu in sa panchina de is ollastrinus. Totu beni po is de s'Arborea puru, ca funt arrannèscius a binci, in domu cosa insoru etotu, contras a is de sa Baunese, cun su resultau, tundu tundu e togu meda, de cuatru a zeru; e nemmancu a ddu fai aposta (chi eis lìgiu s'artìculu chi nd'apu pesau e nd'apu fatu bessiri sa cida passada, sèmpiri po is Novas de su Diàriu Sportivu, innoi apu chistionau de totus cussus allenadoris ca, po cust'annu puru, no nci dda ant fata a lompi a sa dì de su Nadali setzius in sa panchina de sa scuadra cosa insoru), apustis de custa surra ca is de sa Baunese nd'ant bodditu in domu de is de s'Arborea, est arribbada sa nova, sa comunicatzioni, de parti de is de sa Baunese etotu, ca mister Mario Masia at scerau de fai is bagàglius, de pinnigai is bagàglius, cumenti si iat a podi narai, mellus puru, e si ndi andai, lassendi is crais de sa scuadra in atras manus. 
Totu beni po is de su Ceraxius puru, ca in su merì de su sabudu funt arrannèscius a binci sa partida de importu mannu chi ant giogau, in domu cosa insoru, contras a is de s'Atleticu Casteddu, cun su resultau togu e bellu tundu de tres a unu. Cun bintitres puntus allogaus, chi funt su pròpriu tanti de puntus chi s'agatant in buciaca is de su Ceraxius, agataus is de su Samugheo, chi peròu ant serrau sa partida, in domu cosa insoru, contras a is de su Pirri, cun su resultau de zeru a zeru, est a narai, duncas, chentza de ndi boddiri nemmancu mesu gol de sa porta cosa insoru, ma chentza de arrannèsci a ndi fai nemmancu unu in sa porta de is aversàrius. 
E immoi chi nci seus, sigheus (e mancai, acabaus puru, e megu a brullai, si cumprendti, berus est?) de castiai cumenti funt postas is cosas me in sa Lista A, apustis de catodixi partidas giogadas: is de su Vecchio Borgo Sant'Elia de Casteddu sighint a binci, beni meda: in s'ùrtima bessida, difati, ant bintu contra a is de su Cus de Casteddu, po una partida de importu mannu meda, fadendi su contu, tra is atras cosas, ca is duas scuadras nd'arribbant de sa pròpriu citadi, po su chi estus a podi tzerriai, a sa moda de is ingresus, a trassa de is ingresus etotu, derby. Is de su Vecchio Borgo Sant'Elia de Casteddu tenint, in dì de oi, allogaus in buciaca, calincuna cosa cumenti a bintiduus puntus, unu in prus (feti unu in prus, si iat a podi scriri diaici puru) de is chi tenint allogaus, e pesaus, fintzas a immoi, is de sa Tharros, chi in s'ùrtima bessida nd'ant scutu, in faci a is de sa Freccia Parte Montis de Mògoro, cincu bussinadas (contras a s'ùnicu goiteddu chi funt arrannèscius a ndi cassai, a ndi pesai is de sa Frecia Parte Montis). Tra is bìncidas de importu prus mannu, agataus, custu est pagu ma seguru, cussa chi nd'ant cassau is de s'Uda, in sa partida chi ant giogau, in domu insoru, contras a is de s'Ovodda; is campidanesus puru, me in custas ùrtimas diis, ant scerau de scuncodrai s'acapiu chi teniànt cun Titti Podda, po donai is crais de sa scuadra cosa insoru a un allenadori de esperièntzia, mancai siat ancora giovuneddu, cumenti est Toniu Madau. E duncas, eia, deu creu ca sa cosa mellus chi potzu fai, arribbau a custu puntu de sa chistioni, a custu puntu de sa lega, siat sighiri s'arrastu chi apu incumentzau a fai sa cida passada, candu, chi si ddu arregodais (e desinò deu seu innoi po fai custu giogu puru, chi cumprendeis su chi seu circhendi de si narai), s'apu chistionau (s'apu incumentzau a chistionai, po ddu narai mellus puru) de totus cussus allenadoris ca cust'annu no funt stètius bonus a abarrai in sa scuadra chi fiant sighendi fintzas a sa dì de su Nadali, est a narai, eia, ca benint bogaus ainnantis, e duncas, cumenti si narat, megu a chistionai de candu un allenadori no arribbat a papai su panetoni, cumenti si iat a podi narai e cumenti s'apu narau sa cida passada etotu. 

E duncas, eia, po custa cida nc'at a essi feti, a su mancu po custa lega, de serrai sa chistioni, de serrai is chistionis chi funt abarradas ancora obertas. E duncas, custa lega ndi iat essi depia bessiri in s'artìculu de sa cida passada (est a narai, eia, cussu chi nd'est bèssiu a pillu su tres de su mesi de idas etotu) ma a sa fini no apu acutu, siat po su chi pertocat su tempus e, mescamente, po su chi pertocat su logu chi tèngiu de preni, dònnia cida, cun is fueddus cosa mia. Ma a sa fini, fadendi su contu ca nd'arribbat unu giòbia dònnia dònnia cida, nc'est pagu de si fai pigai de su disisperu, e duncas, su chi no apu acutu a si contai sa cida passada, si ddu arremonu a custa bessida, cumenti m'est bèniu de narai, e isperu chi si potzat cumprendi su chi tèngiu badda badda in conca. 

E intzandus, sa nova chi at pertocau is de s'Uda (o po ddu narai mellus: sa decisioni chi ant pigau is de s'Uda apitzus de s'acapiu chi teniant cun Titti Podda) nd'est bessida aforas su binticuatru de su mesi de donniasantu, chi fiat de lunis. E in cussa cida (est a narai, me is ùrtimas seti diis de su mesi de donniasantu), cumenti s'apu arremonau in s'artìculu de sa cida passada, ndi funt sartadas una pariga de panchinas, cumenti si iat a podi narai, a trassa de s'italianu, e su telefunu de su capu cosa mia (eia, megu a chistionai, duncas, de sa persona chi sighit su trabballu cosa mia po su giàssu de su Diàriu Sportivu; sa persona chi mi narat chi depu intendi po ndi pesai is intervistas, e sa persona chi ligit totu su chi scriu ainnantis chi ndi bessat in su giassu) fiat giai giai po pigai fogu (de su chi m'at contau issu etotu) de sa cantidadi manna meda de telefonadas chi fiat arricendi in cussas oras; su capu miu, de su restu, sighit su mundu de su càlciu de is diletantis de annus e annus, e duncas issu sciit totu, ainnantis chi is cosas sucedant puru (e megu a brullai); est a narai ca fadendi su contu ca tenit una biga de amigus chi faint is dirigentis me is assòtzius de bòcia, intzandus est cun issu chi, mancai, chistionant, po cumprendi cali siat sa bia mellus de sighiri (e seu chistionendi, chi no si sonat craru, de totus is movimentus, cumenti si iant a podi tzerriai, a trassa de cumenti naraus in italianu, ca is scuadras faint candu depint comperai calincunu giogadori nou, o candu depint circai un antru allenadori). 
E duncas, eia, si potzu narai ca no sucedit dònnia cida chi nci siant tres allenadoris chi ndi benint bogaus de una scuadra; e custu bollit narai, puru, ca candu un assòtziu ndi bogat un allenadori, intzandus ndi depit circai, e drabessi e acoitu puru, un antru ca ndi potzat pigai su postu. 

E duncas, po torrai a nosu, e po torrai a su chi fia narendusì ainnantis, is de s'Uda ant scerau de nci bogai, de saludai (po ddu narai in manera prus druci puru, e su mesi de idas est su mesi prus druci de totus, e duncas, eia, tocat a nosu puru a essi prus drucis de su chi seus, mancai, in su fetianu, partendi, pròpriu, de is fueddus chi si ndi bessint aforas de sa buca) a Titti Podda apustis de sa partida ca is biancus-birdis iant pèrdiu, in domu cosa insoru, contras a is de su Terraba Frantziscu Bellu, ca in dì de oi funt una de is scuadras prus fortis, est a narai, una de is scuadras chi funt currendi prus a forti, a su mancu po su chi pertocat sa Lista A, mancai, cumenti s'apu giai arremonau, de su restu, apant pèrdiu s'ùrtima partida chi si funt agataus a giogai custu fini de cida passau, in domu de is de su Cannonau de Jerzu (eia, un'antra de cussas scuadras chi at mudau s'allenadori pròpriu me is ùrtimas cidas; e custu bollit narai, pruschetotu, ca a bortas custa giogada donat is resultaus ca is dirigentis s'abertant). 

E duncas, si potzu narai custu puru, is cosas po s'Uda fiant andendi mabi meda, fadendi su contu (e a fai is contus nci poneus pagu meda) ca cun Titti Podda sètziu in sa panchina, is udesus (chi mi permiteis de ddus tzerriai diaici, a trassa de cumenti si narat innoi in Bidd'e Sorris, a trassa, po ddu narai mellus puru, de cumenti ddus tzerriaus innoi in Bidd'e Sorris etotu) ca Titti Podda iat pèrdiu po cuatru bortas me is ùrtimas cincu partidas (e seus chistionendi, duncas, de su chi est sucèdiu in su mesi de ladàmini e, mescamente, in su mesi de donniasantu), cun unu puntixeddu feti ca is de s'Uda ndi iant cassau a s'acabbada de sa partida chi iant giogau contras a is de su Pirri. Duncas, is biancu-birdis si funt agataus cun calincuna cosa cumenti a undixi puntus apustis de doxi giorronadas giogadas, e si cumprendit beni (ddu cumprendeis beni a solus, chi si praxit de prus cumenti sonat) ca undixi puntus in doxi bessidas funt pagus meda, fadendi su contu ca is de s'Uda si funt agataus cun feti cuatru scuadras a is pabas, e cun s'arriscu, est craru, de ndi cabai de categoria, e duncas, de nci torrai in su campionau de sa Primu Categoria apustis de feti duus annus (fadendi su contu ca s'annu passau is campidanesus ndi iant cassau sa sarvesa, cumenti si narat, me in s'ùrtima partida po su chi pertocant is play-out, chi funt, pròpriu, is partidas finalis, cumenti ddas tzerriant is ingresus, ca serbint pròpriu po abarrai in sa categoria e po ndi cassai sa sarvesa, apustis ca is giogus de su campionau funt bellus ca spaciaus). 
"S'assòtziu de s'Uda fait a sciri a totus – est cussu chi si ligit in su comunicau chi nd'ant bogau aforas is de s'Uda – ca su binticuatru de su mesi de donniasantu nd'eus sciusciau s'acapiu chi tenestus cun totus is personas chi sighiant su trabballu de sa Primu Scuadra, a partiri, pròpriu, de s'allenadori. Boleus torrai gràtzias, cun su coru prenu de sinceridadi, a totu sa truma de personas chi teniant is crais de sa scuadra me is manus, partendi de s'allenadori, Titti Podda, de s'allenadori in segunda (cumenti si iat a podi narai a trassa de cumenti si narat in italianu etotu, gioghendi unu pagheddeddu cun is fueddus, chi mi ddu permiteis, a su mancu ndr) Marco Canè, de Cenzu Ena, de Emanuele Pinna, chi fiat su dotori chi sighiàt sa preparatzioni atletica de is piciocus, e Stefano Urraci, ca fiat s'allenadori de is portieris. A dònnia unu de custus chi eus arremonau immubagora, ddis torraus gràtzias po sa passioni, po sa gana chi nc'ant postu in su trabballu chi ant fatu po s'assòtziu de s'Uda, po sa passièntzia e po sa professionalidadi chi s'ant regalau in totus custus mesis chi ant fatu impari a nosu. Chistionaus de parti de totu su mundu de s'Uda, est a narai, chistionaus de parti de totus is dirigentis e de totus is personas chi s'agatant a trabballai in s'assòtziu e no podeus fai atru ca ddis augurai ca potzant sighiri a ndi cassai resultaus bonus meda in su benidori, po su chi pertocat, est craru, sa carriera cosa insoru". 
Is de s'Uda, intzandus, ant acoitau, e meda puru, a circai un antru allenadori, fadendi su contu ca sa dì avatu, est a narai su martis (chi est berus, e chi si ndi arregodais, ca sa primu nova, apitzus de Titti Podda, ndi fiat bessida a pillu de lunis), chi fiat su binticincu de su mesi de donniasantu (po essi pretzisus, cumenti iat a depi essi dònnia giornalista chi bolit fai beni su trabballu cosa sua); e duncas sa sceda de is dirigentis de s'assòtziu campidanesu est arruta (cumenti si iat a podi narai, cumenti m'est bèniu de narai, a su mancu, a trassa de cumenti si narat in italianu puru, de su restu) apitzus de Toniu Madau, ca de pagu cidas iat scuncodrau cun is de su Sant'Aleni, ca currint in su campionau de s'Ecellenza. 
E est pròpriu berus, cumenti si iat a podi pentzai, ca is istorias chi pertocant is allenadoris parint giai giai a trassa de cussas istorias de amori chi si biint me is film chi donant a sa televisioni: is allenadoris puru, cumenti is innamoraus, si ponint impari a is assotzius, a is dirigentis, a is presidentis, apustis mancai certant e si lassant; e nareus puru ca su chi pertocat is panchinas de is scuadras, mancai seus chistionendi feti (feti po modu de narai) de scuadras de diletantis, est una de is legas de importu prus mannu, una de is legas prus callentis, tra totus cussas chi si capitat de sighiri aintru de una stagioni. 
E duncas, po primu cosa si potzu narai, e m'acudu a ddu fai, ainnantis de mi ndi scaresci (ca sa conca mia est cussa chi est, e apustis chi abarru a totu dì a scriri de bòcias, de resultaus, de partidas, e de giogadoris, intzandus incumentzat a bogai fumu biancu puru, e megu a brullai, ma nemmancu diaici meda), ca a su costau de Toniu Madau, est a narai, po ddu agiudai a sighiri sa scuadra cosa sua me is allenamentus e po is partidas de su campionau puru, nc'at a essi Andrea Manca. Ma deu creu ca nci siat su tanti po cumprendi, mellus de su chi eus fatu fintzas a immoi, cumenti funt andadas is cosas, est a narai, tocat a cumprendi is motivus ca ant portau Toniu Madau a si setzi in sa panchina de is de s'Uda. Duncas, cumenti s'apu giai arremonau, Madau at incumentzau sa stagioni de su duamilla e binticincu – duamilla e bintises in sa panchina de is de su Sant'Aleni, chi ndi funt artziaus pròpriu a sa fini de s'annu passau in su campionau de s'Ecellenza, ma s'acapiu chi teniat cun is cuartesus si nd'est sciusciau una pariga de cidas fait e duncas, sighendi e pighendi po bonas is regulas chi nd'ant pesau is de sa Federatzioni Italiana de su Giogu de su Càlciu, e chi ballint de tres annus a oi, est possibbili, po un allenadori, de andai a trabballai cun un'antra scuadra, sèmpiri chi sa scuadra nova innoi andat s'agatit in un'antra categoria (est a narai, duncas, no in su pròpriu campionau; sa scuadra chi bogat un allenadori, e sa scuadra chi ddu torrat a pigai, provu a si ddu narai diaici puru, mancai si cumprendit mellus puru su chi seu circhendi de si narai, depint curri in duas categorias diferentis), e sèmpiri chi s'allenadori est stètiu bogau de sa primu scuadra ainnantis de sa fini de s'annu, est a narai, duncas, ainnantis de su trintunu de su mesi de idas. E duncas, a fai is contus nci poneus pagu meda, Toniu Madau nd'at sciusciau s'acapiu chi teniat cun is de su Sant'Aleni su bintises de su mesi de ladamini (chi est sa dì, de su restu, innoi sa nova nd'est bessida aforas me is paginas de su Diàriu Sportivu etotu). E duncas, Madau torrat a curri impari a una scuadra in su campionau de sa Promotzioni apustis de duus mesis (chi funt giai giai tres, a fai beni is contus) chi at fatu in su campionau de s'Ecellenza, e nareus puru ca me is ùrtimus annus, e po su chi pertocat su campionau de sa Promotzioni, Madau s'est fatu sèmpiri balli, cumenti si iat a podi narai, e cumenti si narat, de su restu, fadendi su contu ca s'annu passau fiat arrannèsciu a ndi cassai sa sarvesa impari a is de s'Atleticu de Casteddu, una bella pariga de cidas ainnantis de s'acabbu de su campionau, e duncas, eia, cun coru selenu. In su duamilla e bintunu – duamilla e bintiduus iat tentu modu, iat tentu s'ocasioni, sa possibbilidadi, de trabballai impari a is aristanesus de sa Tharros, chi iat lassau a su primu postu de sa lista, cun noi giorronadas de giogai; in su duamilla e dexannoi – duamilla e binti, invècias, Madau ndi iat cassau sa sarvesa impari a is de sa Sigma; s'annu ainnantis, invècias, (e seus chistionendi de s'annu duamilla e dexiotu – duamilla e dexannoi) fiat arribbau me is primus postus de sa lista impari a is de su La Palma, chi est berus ca s'assòtziu de Casteddu fiat arrannèsciu, est a narai, ca iat tentu sa possibbilidadi, de si giogai is ùrtimas partidas (cussas chi a trassa de is ingresus, seus costumaus a tzerriaia play-off) po nd'artziai in su campionau de s'Ecellenza. 
E duncas, po serrai sa lega, sa chistioni e s'artìculu de custa cida puru, si potzu narai ca in sa primu bessida chi Madau at fatu, in sa primu partida chi at sighiu sètziu in sa panchina de is biancus-birdis, is cosas no ddi funt andadas beni meda, fadendi su contu ca sa partida contras a is de sa Tharros (eia, una de is scuadras chi Madau at sighiu in custus ùrtimus annus, cumenti s'apu arremonau immubagora de su restu) s'est serrada cun su resultau, bellu tundu tundu (e grai e tostau de nci inguti) de seti a tres po is meris de domu; ma apustis, in custu fini de cida chi si seus lassaus a is pabas, Madau nd'at cassau sa primu bincida, e de importu mannu meda, de candu est sighendi is fainas de is de s'Uda, gràtzias a su tres a zeru ca is campidanesus nd'ant pesau contras a is de s'Ovodda, ca in dì de oi s'agatant, nemmancu a ddu fai aposta, a s'ùrtimu postu de sa lista, ma is dirigentis de s'assòtziu brabaxinu funt sighendi a andai ainnantis cun s'allenadori chi tenint, de duus annus, e seus chistionendi de Moro. 

E immoi chi nci seus, po serrai, e po diaderus, totus is contus, andaus a biri cumenti funt postas is cosas in sa lista po su chi pertocat sa parti prus bascia, prus callenti: is de s'Uda tenint allogaus in buciaca calincuna cosa cumenti a catodixi puntus, chi ndi funt arribbaus gràtzias a cuatru partidas bintas e duas partidas chi si funt serradas cun su resultau in paridadi; a is pabas de is de s'Uda, agataus is ollastrinus de sa Baunese, chi pròpriu custa cida ant decìdiu de nci bogai a Masia (e de sa cosa, mancai, si nd'apa a chistionai mellus in s'artìculu chi nd'at a bessiri aforas, chi su Cielu at a bolli custu beni, sa cida chi at a brintai tra una pariga de diis); cun dexi puntus, tres in mancu de is chi tenint is de sa Baunese, agataus is de sa Frecia Parte Montis, sa scuadra de Mòguru, chi est sighendi a curri cun Giancarlo Boi setziu in sa panchina, e custa cosa (megu a chistionai de s'acapiu chi nc'est tra s'allenadori e s'assòtziu) sighit a andai ainanntis de una bella pariga de annus, si ddu naru immoi chi nci seus. Cun seti puntus, invècias, ddoi funt is de su Tonara, e in s'ùrtimu postu de sa lista agataus, cumenti s'apu giai arremonau, is de s'Ovodda, cun feti ses puntixeddus allogaus in buciaca.



Attività realizzata col contributo della Regione Sardegna. IMPRENTAS 2024-2025. LR 22/2018 art. 22