Is scuadras sardas faint su tifu po is de s'Ilva de Sa Maddalena, ca domìnigu ant a circai de ndi cassai s'artziada in Sèrie D

E duncas, seus sighendi a annadai (mi benit de ddu narai diaici) in su mesi de lampadas, fadendi su contu (e custa iat a podi essi, giai, sa primu nova bona chi si dongu po oi), ca custu fini de cida chi est arribendindi, allestru cumenti chi fessit unu leporeddu chi si scapat a curri in su sartu, nd'at a arrui su trexi e su catodixi, e duncas, 'tendei 'tendei, si iat a podi narai, puru, ca sa primu metadi de su mesi est bella ca scroxiada (cumenti mi praxit a narai), e immoi no s'abarrat atru de fai ca acabbai cun su trabballu chi si tocat po custu mesi etotu, est a narai, duncas, po is atrus dexennoi diis chi ammancant, a partiri pròpriu de oi, po serrai, puru, su de ses mesis de s'annu. E is cosas funt sighendi a andai beni, a su mancu po su chi mi pertocat (e mi auguru chi sa pròpriu cosa potzat balli po bosatrus, est craru; po bosatrus ca custus artìculus ddus ligeis, dònnia dònnia cida, chentza de ndi sartai nemmancu una): no tengu daboris, nè arroris de mi ndi scabulli de pitzus, e nè dannus: e candu fatzu su contu de cumenti mi funt andendi is cosas, mi intendu, dònnia dònnia dònnia borta, cumenti chi fessi basau de sa bona sorti (cumenti si iat a podi narai), poita seu su primu chi abarrat a  totu dì a pentzai ca, eia, in custa vida is cosas iant a podi andai meda ma meda peus de cumenti funt andendi a mei: e custu no bollit narai ca no nc'est nudda ca iat a podi andai mellus de cumenti est andendi (antzis, in custa vida, deu creu de podi narai custu puru, nc'est sèmpiri calincuna cosa chi podit andai mellus, chi si podit cuncodrai mellus, o aparixai); ma de su restu, nareus ca su de no essi serrau in un aposentu de un uspidali (po nd'arremonai unu; po arremonai unu de cussus logus ca, candu ddoi brintas, intzandus cumprendis cantu podit essi marigosa sa vida, chi mi cumprendeis po su chi seu circhendi de si narai), o su de no essi serrau in prasoni (ca a bortas bastat pagu meda po dda acabbai prenu fintzas a su coddu de arroris, e de trumentus; sa istoria de Beniaminu Zuncheddu, de su restu, dda connosceis totu, berus est? E megu a chistionai de cussu poberu omini ca at fatu calincuna cosa cumenti a binti annus, chi no de prus, serrau in prasoni chentza de ndi tenni nesciuna crupa), mi parint novas bastanti bonas po custa cida puru, e duncas, mi permitint de podi sighiri a trabballai, ddi naru diaici, concas a su benidori, cun su coru prenu de isperas. E diaderus, isperu ca sa pròpriu cosa si potzat narai de bostrus puru. 

E duncas, est andendi totu beni chi pentzaus chi seus a su mesi de lampadas, a dexi diis de s'incumintzu de s'istadi, in unu de is logus (a su mancu a parri miu) prus bellus, e prus togus chi nci funt in custu mundu (e seu chistionendi de sa Sardìnnia, si cumprendit bastanti beni, berus est?); mancai, su de bivi innoi in Sardìnnia bollit narai, puru, ca depis fai sacrìficius (mescamente po su chi pertocat su trabballu, chi benit a essi pagu, e candu nc'est, mancai, benit pagau mabi puru), peròu su de si podi gosai su sobi, su callenti, su mari (a chini praxit) e totus is logus bonus chi ddoi funt (ballit siat po is logus de monti, ma in custa isula nci funt unu muntoni de logus togus de biri, mancai siant in logu de sartu etotu), intzandus, po mei est una cosa chi no dda pagat su dinai, cumenti si iat a podi narai. E duncas, mancai sa basca meda no mi praxiat, e mancai no mi praxiant nemmancu is logus de mari candu si impeddant de genti (po ddu narai a trassa de cumenti si narat innoi in Bidd'e Sorris etotu, e chi est unu modu de narai chi apu sèmpiri intèndiu e chi m'est sèmpiri praxiu meda, chi pròpriu si depu narai sa beridadi), no arrannèsciu a pentzai de mi nd'abarrai atesu de custus logus, mescamente immoi chi no tengu prus disìgius; est a narai ca, po su chi mi pertocat, in custus ùrtimus cincu annus apu fatu totus is viàgius chi bisamu de fai (chi bisamu de fai de candu fia unu piciocheddu) e duncas, immoi, no depu fai atru ca mi nd'abarrai assèbiau, po su chi fait, po su chi apa a arrannèsci, in s'isula stimmada cosa mia. 
E diaderus, s'istadi mi parrit unu de is periodus (ddi naru diaici), de is stagionis prus drucis chi nci funt: at a essi ca su trabballu cosa mia, su trabballu chi ndi depu pesai, dònnia cida, po is amigus de su giàssu de su Diàriu Sportivu, benit a essi unu pagheddeddu prus pagu (prus pagu de su chi depu fai candu nci funt de sighiri is campionaus, e si cumprendit), fadendi su contu ca sa stagioni de is giogadoris, e de is allenadoris (e duncas, eia, sa stagioni de is assòtzius de bòcia diletantis chi currint me is campionaus pesaus de sa Federatzioni Italiana de su Giogu de su Càlciu) est bella ca spaciada, e duncas, po immoi, nc'at a essi feti de sighiri, cumenti fadeus dònnia annu, totu su chi sucedit in sa fentana de su mercau (ddi naru diaici, furendindi sa trassa, e is fueddus, de s'italianu etotu), cun tosus is scuadras chi immoi, a partiti pròpriu de custas diis, funt gai trabballendi po cuncodrai is rosas cosa insoru concas a sa stagioni chi at a benni (e de sa cosa, mancai, apa a acudi a si ndi chistionai in custu artìculu etotu); e duncas, eia, in custu perìodu tengu sa possibbilidadi (e gràtzias a su Cielu, mi benit de narai), de mi pasiai unu pagheddeddu, ca mabi no fait de seguru, mancai su trabballu cosa mia siat, feti, su de scriri a totu dì cun sa tialu de sa tastiera. E duncas, eia, a s'acabbada su trabballu cosa mia benit a essi, po chini ddu castiat de aforas, su de abarrai a cracai butoneddus po oras e oras de sighiu, e si podit narai, puru, ca no est, de seguru, sa faina prus trumentosa chi mi podiat capitai de sighiri in custa vida, (antzis, mi benit de pentzai ca a custu giru ndi seu arrutu in peis, chi fatzu su contu, mescamente, ca nonnu miu, su babbu de sa bon'anima de mamma mia, po si cumprendi mellus, trabballàt in su sartu, fadiat su massaju, o fiat unu massaju, po ddu narai mellus puru, e ddu sciu beni de cantu podit essi dificili, e trumentosu, su trabballu in su sartu, su de depi sighiri is campus prenus a canciofas e a trigu; babbu miu, invècias, trabballàt me is ferrovias (fadiat su caputrenu, o fiat unu caputrenu, chi si praxit mancai de prus diaici cumenti sonat), e una de is cosas prus lègias de su trabballu cosa sua fiat cussa de si ndi depi scidai dònnia dì, po andai a trabballai, est craru, a un'ora diversa de sa dì ainnantis, e custu bollit narai, intzandus, chi fadiat is turnus. E invècias a mei m'est tocau unu trabballu unu pagheddeddu prus druci: no tengu nesciunu chi mi obbrigat a incumentzai su trabballu a un'ora, o a un'antra, ma bastat feti ca su trabballu chi depu fai siat fatu beni, siat fatu in sa gràtzia de Deus; est craru, ma peròu, ca seu deu su chi decidit a ita ora depu atacai, e chi pròpriu si ddu depu narai, no mi dispraxit custa cosa. Est craru, mancai apa a guadangiai unu pagheddeddu prus pagu de su chi guadangiat unu capu-trenu, o unu massaju, ma tengu puru unu bellu pagheddeddu (ddi naru diaici), de tempus scapiu de su trabballu, chi potzu manigiai po studiai, po passillai e mi gosai sa nadura e, mescamente, po torrai a pentzai a totus is cosas chi studiu e chi ligu (po su prus, sigu chistionis acapiadas a sa filosofia, cumenti s'apu giai arremonau una bella biga de bortas, e cumenti, duncas, eis a sciri giai). 

E duncas, torrendi a s'istadi, mi parrit diaderus unu periodu druci cumenti a su tzucuru: ant a essi is arrondibis chi nci funt boba boba in su cielu e chi mi prenint su coru de prexu, ant a essi ca in giru ddoi funt, giai, trumas e trumas de piciocheddus (e de piciocheddas) chi si andant a passillai e a si spassiai, e mi fait beni a s'umori su de ddus biri totus allirgus, cumenti funt. E duncas, eia, po su chi mi pertocat (diaici dda serru de mi strollicai cun bosatrus) nc'est su tanti po sighiri a andai ainnantis e a biri cumenti ant a andai is cosas po su chi pertocat custas duas-tres cidas chi nci funt de scroxai po su mesi de lampadas, e potzu isperai ca totu sigat a andai concas a su beni. E custu, eia, po si contai cumenti mi intendu (e diaderus, isperu chi sa pròpriu cosa chi ballit po mei potzat balli po bosatrus puru), e po fai, mescamente, su contu de su tempus chi est passendi, de su tempus chi si seus lassendi a is pabas: e no mi parrit nemmancu berus, ma giai giai si seus scroxaus (sigu a manigiai custu fueddu, e isperu ca nesciunu de bosatrus tengiat calincuna cosa de murrungiai) sa primu metadi de su duamilla e bintises. E chi pentzu ca seus po brintai in su mesi de treulas mi parrit ca po cust'annu est sighendi a andai bastanti beni, mancai is arroris in custu mundu (tra gherras e totu sa genti chi stait mabi, po unu motivu o po un antru) no ammanchint mai, custu est pagu ma seguru. Ma po oi no si nd'apa a chistionai, e ddu lassaus po fatu (cumenti si megàt un amigu cosa mia), e no si bollu fai sa conca a acua prus de su chi serbit, e duncas, eia, si iat a podi narai, puru, ca dda seu po acabbai cun is strollichiminis chi nci sticu, chi nci ghetu me is artìculus, ainnantis de mi ponni a chistionai de is legas chi pertocant su mundu de sa bòcia de is scuadras diletantis (e fiat ora puru, s'at a megai calincunu de bosatrus, berus est?). 

E duncas, su chi m'abarrat de fai, po serrai cun is strollichiminis, est andai a castiai, impari a bosatrus etotu, cumenti funt andendi is cosas po su chi pertocat is temperaduras e duncas, eia, po su chi pertocat su tempus: podeus narai ca est incumintzendi a fai una bella basca, mescamente me is oras de su megama, fadendi su contu ca su mengianeddu, e a su merì, apustis chi ndi cabat su sobi, nc'est ancora una bella friscuredda (e custu si permitit de podi dromiri, berus est?), ca mabi no fait, antzis, si iat a podi narai ca fait prexei meda. E me is diis chi nd'ant a arribbai immoi, nc'ant a essi diis bellas bascosas, cun calincuna cosa cumenti a trintunu-trintaduus gradus, mancai in sa dì de su giòbia nci iat a podi essi unu bellu bentu fridu, e duncas, is temperaduras no iant a depi arribbai nemmancu a trinta gradus, ma apustis, in su fini de cida, nc'ant a essi torra trintunu gradus, e custu, est craru, ballit po is oras prus callentis. E duncas, po custa cida mi parrit mi parrit de podi lassai is cosas diaici: e si nd'arregodu ca chi mi strollicu (diaici meda) ainnantis de mi nci ghetai a fundu 'e susu me is chistionis chi pertocant, e chi nd'arribbant de su mundu de is diletantis, est feti po ndi cassai, custa est s'ispera cosa mia a su mancu, s'atentzioni, mancai, de totus cussas personas chi no funt acapiadas a istrintu cun is chistionis acapiadas a is campionaus de càlciu chi si giogant innoi in s'isula (e megu a chistionai sèmpiri, est craru, de is campionaus pesaus de is de sa Federatzioni Italiana de su Giogu de su Càlciu e de is de sa Lega Natzionali de is Diletantis), e megu a pentzai, pruschetotu e mescamente, a totus is femineddas chi, mancai, sighint su giàssu de su Diàriu Sportivu (chentza peròu de ndi bessiri aforas de conca po su giogu de sa bòcia) e chi, mancai, tenint aggradessu su de podi fai unu pagheddeddu de esercìtziu, mancai feti ligendi custas rigas, mancai feti ligendi custu artìculu. 

E duncas, arribbaus a custu puntu, deu creu ca podeus atacai cun totus is novas chi pertocant su mundu de su càlciu de is diletantis sardus. 
E duncas (torra!), si potzu narai, po incumentzai, ca is ùnicus ca in dì de oi funt ancora gioghendi, e duncas, is ùnicus chi ndi funt ancora cabendi in campu po curri avatu a sa bòcia (e a is aversàrius) funt is de s'Ilva de Sa Maddalena, cumenti s'apu narau, cumenti s'apu contau, de su restu, in s'artìculu chi nd'est bessiu aforas sa cida passada, fadendi su contu ca is de s'Ilva de Sa Maddalena funt arribbaus a si giogai sa partida finali (a narai sa beridadi, is partidas funt duas: una chi ballit po s'andada, e una chi ballit po sa torrada) contras a is de sa Pietralunghese, e immoi bisant de ndi cassai s'artziada in su campionau de sa Sèrie D, e impari a issus sighint a bisai, sighint a sonnai s'artziada de sa categoria totus is scuadras chi funt arribbadas a su primu postu de sa lista de is scuadras chi iant a podi essi torra piscadas (ddi naraus diaici po chistionai de su chi in italianu tzerriaus "ripescaggio", diaici mancai si cumprendit mellus puru su chi seu circhendi de si contai), e duncas, po su chi pertocat sa Promozioni seus chistionendi de is de sa Villacidrese de Biddacidru; po su chi pertocat sa Primu Categoria seus chistionendi de is de s'Antiochense de Sant'Antiogu (est craru e si cumprendit beni de su nomini etotu, berus est?) e po su chi pertocat sa Segunda Categoria, seus chistionendi de is de su Golfu Aranci; benit a essi bastanti craru, mi benit de narai diaici, ca chi is de s'Ilva de Sa Maddalena ndi depessint cassai s'artziada de categoria (e nosu seus giai fadendi su tifu po issus, cumenti si depit fai), intzandus nci iat a essi unu postu sbuidu po su chi pertocat su campionau de s'Ecellenza (cun is de sa Villacidrese chi s'ant a fai agatai prontus e scidus), e duncas sa pròpriu cosa at a sucedi po su chi pertocat su campionau de sa Promotzioni e de sa Primu Categoria puru. 
E duncas, is de s'Ilva de Sa Maddalena, custu dominigu passau, ant giogau s'ùrtima partida po custa stagioni (e seus chistionendi, est craru, de sa stagioni de su duamilla e binticincu – duamilla e bintises) in domu cosa insoru, est a narai, duncas, a su campu "Zichina"; sa partida s'est serrada, m'acudu a si ddu narai, cun su resultau de unu a unu, e immoi is maddaleninus, sighius de Favarin, ant a depi circai de ndi cassai sa bìncida in sa partida de sa torrada; e chi is cosas depessint abarrai siddadas in su resultau de paridadi, intzandus si iant a depi giogai cussus ca tzerriaus "tempus suplementaris" (pighendindi sa trassa, e furendindi is fueddus de cumenti si narat in italianu etotu), e in prus, chi is cosas depessint ancora abarrai siddadas in su resultau de paridadi, nci iant a essi is tirus de is undixi metrus. Is meris de domu de s'Ilva de Sa Maddalena, peròu, nd'ant ingotu su gol de is aversàrius apustis de feti seti minudus de giogu, cun Locchi chi nd'at pesau su puntu de s'unu a zeru. Is de s'Ilva, peròu, no si funt fatus pigai de su disisperu (chi est cussu chi estus a depi fai totus candu is cosas no andant cumenti bisastus, e no feti po su chi pertocat una partida de bòcia, ma po su chi pertocat sa vida cosa nosta e duncas, eia, po totu su chi pertocat sa vida chi si depeus scroxai dònnia dì, chi mi permiteis de manigiai custu fueddu chi mi praxit, diaderus, fintzas a m'amachiai) e ant incumentzau a atacai (a totu coddu, si iat a podi narai a sa sorresa; est a narai, cumenti chistionant innoi in Bidd'e Sorris, chi est su logu innou seu stètiu nàsciu e pàsciu) concas a sa porta de is aversàrius. Su gol po is de s'Ilva de Sa Maddalena nd'arribbat feti a su de undixi minudus de giogu in su segundu tempus, cun De Cenco chi arrannèscit a donai unu bellu corpu de conca a sa bòcia, scuta in mesu de Piassi. 
E duncas, mi parrit craru, chi is de s'Ilva de Sa Maddalena ant a bolli curri in su campionau de sa Sèrie D, in sa stagioni chi at a benni, ant a depi binci in domu allena, e sa cosa, si cumprendit, no at a essi facili. Nc'est de narai, po incumentzai, ca is de Sa Maddalena nd'ant pesau unu segundu tempus de importu mannu meda in sa partida de sa cida passada chi ant giogau a su Zichina, e funt arribbaus a unu passu feti (ddi naraus diaici, isperendi ca si cumprendat su chi seu circhendi de si contai) de su gol chi iat a essi potziu balli po su duus a unu. E immoi chi nci seus, si potzu contai custa cosa puru: in totus custus ùrtimus annus passaus, nci funt stètias calincuna cosa cumenti a ses scuadras sardas chi funt arrannèscias a ndi artziai in Sèrie D passendi, ddi naru diaici, de is partidas finalis: s'annu passau, po nd'arremonai una, custa fortuna, custa giogada toga meda fiat capitada, fiat arrannèscia (chi si praxit de prus mancai scritu diaici) a is de su Muristenis, sighius de Marcellu Angheleddu, ca in domu allena (est a narai, in domu de is de sa Vianese), po sa primu partida, iant pèrdiu cun su resultau de duus a unu, ma a sa torrada (est a narai: in sa partida de sa torrada, po essi prus pretzisus puru, cumenti unu giornalista iat a depi essi chi bollit fai beni su trabballu cosa sua) is campidanesus fiant arrannèscius a binci cun su resultau, togu meda, de duus a zeru, cun s'ùrtimu gol, cussu chi est bàlliu po s'artziada de sa categoria, chi ndi fiat arribbau feti a su de norantatres minudus, e duncas, candu sa partida fiat arribbada a is minudus finalis, a is minudus de su recuperu, e gràtzias a su tiru scutu de is undixi metrus de Andrea Cocco, cun Pinna chi, invècias, ndi iat cassau su gol de s'unu a zeru. 
Nc'est de narai, puru, immoi chi nci seus, ca is partidas finalis po ndi cassai s'artziada de sa categoria (e megaus a chistionai, est craru, de is scuadras de s'Ecellenza chi curriant po ndi artziai in Sèrie D), tra totus is scuadras chi fiant arribbadas a su segundu postu de sa lista, no si funt giogadas nè in sa stagioni de su duamilla e dexennoi – duamilla e binti, e nemmancu in sa stagioni de su duamilla e binti – duamilla e bintunu, e custu po crupa de su tialu de Covid, cun cussa pesti (dda tzèrriu diaici) chi ndi iat sciusciau (chi si ddu arregodais, desinò seu innoi po fai custu trabballu puru, e nci iat a mancai atru puru) totus is giogus; e no feti is giogus, a narai sa beridadi (e po brullai unu pagheddeddu), fadendi su contu ca sa pròpriu cosa fiat tocada a is scolas (e megu a narai: su de depi abarrai serradas, est craru; e deu creu ca si cumprendat bastanti beni), sa pròpriu cosa fiat tocada a is teatrus, e a una biga de atrus logus e de atras cosas. 
Ma torraus a nosu. 
Po su chi pertocat sa stagioni de su duamilla e bintiduus – duamilla e bintitres sa giogada de ndi cassai s'artziada in Sèrie D bincendi (e passendi, duncas) de is partidas finalis fiat tocada a is de su Budune, sighius, a s'epoca, de un allenadori de esperièntzia manna cumenti est Raffaeli Cerbone: e duncas, eia, is sardus iant bintu sa primu partida in domu de is de s'Ellera, cun su resultau togu meda, e tundu tundu (cumenti si iat a podi narai) de duus a zeru, e in sa partida de sa torrada sa scuadra umbra no fiat arrannèscia a binci, cun su resultau chi fiat abarrau siddau in paridadi, e duncas, gràtzias a s'unu a unu chi ndi iant pesau sa dì , is de su Budune ndi fiant potzius artziai in Sèrie D. 
Po su chi pertocat sa stagioni de su duamilla e dexesseti – duamilla e dexiotu, invècias, is de sa Torres, sighius de Pinu Tortora, fiant arrannèscius a binci sa primu partida, chi iant giogau in domu cosa insoru, a su Vanni Sanna, cun su resultau de unu a zeru, e in sa partida de sa torrada (e torra contras a una scuadra de s'Umbria), is arrùbius-brau fiant stètius bonus a serrai sa isfida cun su resultau in paridadi, de cuatru a cuatru. S'annu ainnantis, e seus chistionendi de sa stagioni de su duamilla e sexi – duamilla e dexesseti, is de su Budune ndi iant cassau sa primu artziada in su campionau de sa Sèrie D in totu sa istoria cosa insoru, e sèmpiri cun Raffaeli Cerboni sètziu in sa panchina cosa insoru, gràtzias a sa bìncida chi ndi iant cassau in sa partida contras a is de su Bozner, ma nc'est de narai, puru, ca is de su Budune iant pèrdiu is partidas finalis (e chistionaus, est craru, sèmpiri de is partidas chi serbint po ndi artziai in su campionau de sa Sèrie D) siat in su duamilla e cincu e siat in su duamilla e seti. 
In su duamilla e cuindixi – duamilla e sexi fiant stètius, invècias, is de su Santu Tiadoru a ndi cassai s'artziada in su campionau de sa Sèrie D, cun Tomasu Tatti sètziu in sa panchina cosa insoru, e fiant stètius pròpriu is de su Santu Tiadoru a essi sa primu scuadra sarda a arrannèsci a ndi cassai sa bìncida me is partidas finalis de s'Ecellenza cun is regulas novas (chi funt cussas chi is scuadras sighint in dì de oi puru). 
E duncas, immoi, chi is de s'Ilva de Sa Maddalena bollint essi sa de seti scuadras sardas a nc'artziai in su campionau de sa Sèrie D passendi de is partidas finalis, nd'ant a depi cassai sa bìncida de sa partida, poita chi su resultau depessit abarrai siddau in paridadi torra, mancai cun su resultau de unu a unu, nci iant a essi de giogai is tempus suplementaris e, apustis, nci iant a essi is tirus de is undixi metrus. 

E duncas, podeis abarrai segurus de su fatu ca, eia, s'apa a contai cumenti funt andadas is cosas me in s'artìculu chi nd'at a bessiri sa cida chi at a benni, e sèmpiri chi su Cielu at a bolli custu beni po mei (e po bosatrus puru, ca custus artìculus ddus lìgeis). 
In s'interis, fatzu a is de Sa Maddalena un augùriu mannu meda (mannu cumenti una crèsia, si iat a podi narai diaici), isperendi ca potzant tenni sa gana bona po binci sa partida, e mancai, isperu po issus ca potzant apoderai sa basca chi mancai at a podi fai in Umbria domìnigu chi benit (is previsionis narant ca nc'ant a essi calincuna cosa cumenti a bintinoi - trinta gradus, po su chi pertocat is temperaduras prus artas, est craru) e duncas, sa scuadra sarda iat a depi essi costumada a apoderai e, mescamente, a giogai a bòcia in custas cunditzionis. E in s'interis chi abertaus de biri (e de sciri) cumenti ant a andai is cosas, sa cosa mellus chi si podit fai (sa cosa mellus chi mi benit in conca ca si podit fai) est cussa de andai a castiai, impari (est craru!) cumenti si funt cuncodrendi is scuadras sardas po su chi pertocat sa stagioni de s'annu chi benit, e duncas, eia, seu chistionendi de sa stagioni de su duamilla e bintises – duamilla e bintiseti (e candu mi pongu a fai custus contus apitzus de su tempus chi passat, mi parrit, diaderus, ca su tempus siat bobendusì, cumenti si iat a podi narai). 

Cumenti eis a sciri giai, ma de sa lega ndi podeus arrexionai immoi puru, cumenti acabat sa stagioni, intzandus is dirigentis (e mescamente cussus chi tzerriaus "diretoris sportivus", furendindi sa trassa e is fueddus de s'italianu etotu) incumentzat cun su trabballu cosa insoru po ndi pesai is rosas, e is scuadras, duncas, po su campionau nou. E sa primu cosa chi nc'est de fai, est cussa de circai un allenadori chi potzat pigai me is manus is crais de sa truma de piciocus, de sa scuadra, e chi potzat fai unu trabballu bonu. E duncas, nci funt duas solutzionis (no mi ndi benint in conca atras, chi pròpriu si ddu depiu narai): o sighis a curri, a andai ainnantis, e a trabballai cun s'allenadori chi teniast giai, o desinò, chi calincuna cosa est andada a trotu, o no est andada beni cumenti, mancai, isperàst, intzandus podis circai un allenadori chi potzat torrai paris cun su chi ses circhendi, chi mi permiteis de manigiai custus fueddus. 
E si podit narai custu puru, immoi chi nci seus: gràtzias a Deus innoi in Italia is allenadoris no ammancant de seguru, ca calincunu, me is annus passaus, est arribbau fintzas a narai ca innoi in Italia seus totus allenadoris. E dda pigaus cumenti a una botada, chi serbit po si fai a cumprendi cantu tempus fadeus chistionendi, in su fetianu cosa nosta, de bòcias, de partidas e de resultaus, e cantu si praxit su giogu de sa bòcia, ca abarraus a totu dì arraxonendi apitzus a su chi sucedit me is campus (e sa cosa ballit siat po is partidas chi si giogant in Sèrie A, o in Sèrie B, e siat is partidas chi pertocant is diletantis, e chi funt cussas, de su restu, ca sigheus cun su giàssu de su Diàriu Sportivu). Ma torrendi a nosu, si depu arregodai (ca mabi no fait), ca mancai in Italia seus totus allenadoris (chi prus e chi mancu) po fai s'allenadori de una scuadra, peròu, serbit su patentinu chi ti donant is de sa Federatzioni Italiana de su Giogu de su Càlciu (e su patentinu, eia, serbit puru po allenai in Segunda Categoria, chi est una de is categorias prus pitichinninnias chi nci funt); e duncas, si potzu narai custu puru: nci funt unu bellu muntoni de allenadoris, mancai feti innoi in s'isula cosa nosta bella e stimmada, mancai feti in Sardìnnia, chi tenint totus is cartas bonas po podi sighiri e trabballai cun una scuadra; fortzis nci funt prus allenadoris ca scuadras de allenai (parrit una brulla...), e in prus, si potzu narai custa cosa puru: su de allenai una scuadra de importu fait a prexei a totus, e mi parrit bastanti craru; e duncas, eia, nc'est una isfida, dda tzerriu diaici (isperendi ca si cumprendat su chi seu circhendi de si narai) tra totus is allenadoris, no feti po ndi cassai su primu postu de sa lista (o sa sarvesa in unu campionau) ma, puru, po agatai una panchina libbera, ddi naru diaici. E duncas, arribbaus chi seus a custu puntu de s'artìculu, e sèmpiri chi seis de acòrdiu cun mei, deu creu ca sa cosa mellus chi si podit fai est cussa de andai a castiai, impari, e si cumprendit beni, cumenti funt cuncodradas, in dì de oi (candu seus arribbendi a sa metadi de su mesi de lampadas), is cosas po su chi pertocat is panchinas de is scuadras de s'Ecellenza (ca, si ddu arregodu, est su campionau de importu prus mannu tra totus cussus chi si giogant in Sardìnnia, po su chi pertocat is diletantis; e duncas, eia, si iat a podi narai ca su campionau de s'Ecellenza benit a essi sa Sèrie A po totus is diletantis sardus, ca diaici sa cosa sonat mellus puru), e mancai, chi apa a tenni unu stìddiu de tempus (e de logu de preni cun custas rigas), apa a acudi (est su chi isperu) a si chistionai puru de is primus novas chi nd'arribbant, sèmpiri po su chi pertocat is allenadoris, de su mundu de sa Promotzioni. 
Ma, cumenti a sèmpiri, tocat a fai una cosa a sa borta (e megu a brullai, si cumprendit, berus est?). 

E duncas, po su chi pertocat su campionau de s'Ecellenza, si potzu contai, po incumentzai, ca is de s'Atleticu de Uri ant segau s'acàpiu, ddi naru diaici, chi teniànt cun Massimilianu Paba (chi est stètiu sa guida de is grogus – arrùbius po una bella fita de tempus, calincuna cosa cumenti a seti annus, e no funt pagus, e si cumprendit). E duncas, eia, su mercau de is allenadoris (ddu tzerriu diaici, a trassa de cumenti naraus in italianu etotu) benit a essi giai giai aguali a is istorias de amori chi pertocant is cristianus: oi ses impari, fais unu muntoni de cosas impari, prangis e mancai arris puru, bincis e perdis is partidas e a sa fini, eia, tocat puru a si lassai. "Is de s'Atleticu de Uri – si ligit in unu comunicau chi is de s'assòtziu nd'ant fatu bessiri aforas pròpriu me is cidas passadas – bollint torrai gràtzias, cun totu su coru e cun totu sa sintzillidadi chi si intendint is dì de oi, a s'allenadori Massimilianu Pala, po totu su tretu, po totu su trabballu chi eus fatu impari in custus ùrtimus seti annus. Po nosu, e po s'assòtziu cosa nosta, funt stètius seti annus de importu mannu meda, chi eus bìviu, ballit po is dirigentis, ma ballit puru po s'allenadori, cun passioni e gana bona de fai, cun sa gana bona de ndi pasai su trabballu in sa manera mellus chi eus potziu. Siat is dirigentis e siat Massimilianu Paba ant fatu a biri, a totu is tifosus, mescamente, totu sa passioni e s'amori chi tenint po custu assòtziu, po custus caboris. Candu Paba at incumentzau a trabballai impari a nosu – si ligiti sèmpiri in su comunicau – sa pipiniera (chi est unu de cussus fueddus chi apu scrobertu pròpriu trabballendi po is Novas de su Diàriu Sportivu, e chi mi praxint fintzas a m'amachiai ndr) de s'Atleticu Uri no fiat ancora diaici manna, cumenti est in dì de oi, e no fiat cumbinada diaici beni, cumenti est in dì de oi. Cun su trabballu de s'allenadori, cun is bideas chi nc'at postu, s'at agiudau a ammanniai sa pipiniera cosa nosta, fintzas a arribbai a essi tra is scuadras, e chistionaus de is scuadras de is piciocheddus piticus, prus fortis, e prus togas, tra totus cussas chi nci funt in dì de oi in Sardìnnia. S'as agiudau fintzas a ndi pesai is scuadras po is femineddas, e duncas, est gràtzias a issu puru, gràtzias a totu su trabballu chi at fatu po nosu, chi is de s'Atleticu de Uri podint curri, e cun prexiu mannu, me is campionaus de bòcia chi pertocant is femineddas Under 15 (est a narai, duncas, sa scuadra de femineddas chi tenint prus pagu de cuindixi annus ndr), Under 17 (sa scuadra pesada cun giogadoris chi tenint prus pagu de dexesseti annus ndr), e puru in su campionau de s'Ecellenza chi pertocat, sèmpiri, is femineddas. Is piciocas cosa nosta si funt fatas balli, e meda puru, in totus is campionaus regionalis, fintzas a arribbai a giogai, cun afròddiu mannu meda, e si cumprendit beni, in su campionau de sa Sèrie C puru, chi pertocat, est craru, sèmpiri is femineddas. E in custa stagioni chi s'est serrada de pagu, e chistionaus, est craru, de sa stagioni de su duamilla e bintises – duamilla e bintiseti, is feminas de s'Atleticu de Uri funt stètias bonas a ndi cassai sa sarvesa e ant a giogai torra in su campionau de sa Sèrie C in sa stagioni chi at a benni puru. Po nosu est stètia un'esperièntzia toga meda, cumenti est stètiu togu meda su de ndi cassai s'artziada de sa categoria, de s'Ecellenza a sa Sèrie D, innoi eus giogau po cuatru annus. Massimilianu Paba fait parti de sa famìllia cosa nosta: s'est fatu balli, at bìviu impari a nosu is momentus prus togus, e puru is momentus prus marigosus, e de su restu, ddu scieis beni cumenti andant is cosas in su giogu de sa bòcia: oi ses prexau cumenti a una pasca, e mancai s'incras ses totu prangi prangi po crupa de una partida pèrdia, o de unu campionau chi est andau mabi. Ma nosu boleus feti torrai gràtzias a s'allenadori, a Massimilianu Paba, po totu su chi at fatu po nosu". 

E immoi, torrendi a su mercau, de su chi ndi scieus in dì de oi, a su mancu, Paba at giai arrìciu s'oferta (dda tzerriu diaici, isperendi ca si cumprendat po su chi seu circhendi de si contai) de is de su Tèmpiu, chi funt pròpriu circhendi un allenadori po sa stagioni chi at a benni. E bai e circa chi sa coja s'at a fai; ma de custa cosa (est a narai, de s'allenadori nou de is de su Tèmpiu) nd'eus a chistionai mellus, mancai, in su benidori. Po oi acudu a si narai feti ca is de s'Atleticu de Uri ant scerau de donai is crais de sa scuadra cosa insoru me is manus de Paulu Congiu, chi me in custus ùrtimus tres annus est stètiu s'allenadori de is de su Coghinas, e nc'est si tanti po narai ca Congiu at fatu unu trabballu bonu meda impari a is biancus-nieddus, fadendi su contu ca in custus campionaus est sèmpiri arribbau me is primus postus, mancai no siat arrannèsciu a ndi cassai s'artziada de categoria, fadendi su contu ca is de su Coghinas currint in su campionau de sa Promotzioni, e diaci ant a fai po su campionau chi at a benni puru.


Attività realizzata col contributo della Regione Sardegna. IMPRENTAS 2025-2026. LR 22/2018 art. 22