In Sèrie D incuminzant is murrungius po is retrocessionis; trintunu scuadras prontas a batallai, nc'est puru su Budoni

Po imoi seus feti chistionendi de una bidea, est a nai unu de is modus chi funt aproillaus in conca a is de sa Lega Natzionali de is Diletantis po aderetzai e arrangiai is cosas, pruschetotu po cussu chi pertocat is promotzionis e is retrocessionis, ma is primus murrungius no funt trighendi a nd'arribai.

Sa cida passada, difatis, in s'ùrtimu Consillu Diretivu Federali, ant pigau sa decisioni, nd'eus giai chistionau, de sciusciai totus is campionaus po cussu chi pertocat sa stagioni de su duamilla e dexianoi \ duamilla e binti, pighendi po bonas, est pròpriu custa sa cosa de importu mannu, is listas po cumenti funt bessidas aforas apustis de is partidas giogadas fintzas a su primu domìnigu de su mesi de Martzu.
Agoa, scieus beni cumenti funt andadas is cosas: su mundu de sa bòcia frimu, cumenti a totu su restu de is atividadis e de is fainas in Italia e in Europa.

Imoi, candu mancant feti una pariga de diis po spacciai puru su mesi de Maju, nc'est de incumentzai a pentzai a su benidori.

Torrai a partiri, po is diletantis, no at a essi fàcili, po una chistioni de dinai, pruschetotu, poita is daboris de sa crisi de s'economia, apustis de su Coronavirus, s'ant a fai intendi puru po totus is presidentis de is scuadras. Sa timoria est chi ant a essi medas cussus chi no ant a podi sighiri a spendi po su sport cumenti ant fatu fintzas a oi.

Su Guvernu, peròu, cun su ministru Vincenzo Spadafora in primu fila, at giai fatu sciri chi nc'ant a essi agiudus po totus.

In s'interis, nc'at a essi de cumprendi cumenti cuncodrai is gironis: chi po is promotzionis nc'est pagu de acciungi, a su mancu po sa Sèrie D, cun is primas noi scuadras, una po dònnia gironi, chi ant atziai in Sèrie C, cun prexu mannu, su pròpriu no si podit nai po is retrocessionis in su campionau de Eccellenza, chi iant a depi essi cuatru po dònnia gironi.

Cumenti sucediu in Francia, ci funt giai is primus scuadras, po imoi ndi contaus trintunu, e tra is atras nc'est puru su Budoni de su presidenti Riccardo Bua, chi funt giai prontas a batallai e ant pesau una truma chi si tzerriat "Serie D, Salviamoci": de su restu, si cumprendit, cun otu partidas ancora de giogai, chentza contai cussas de is play-out, fiat pòtziu diaderus sutzedi de totu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020