S'Italia andat conca a is festas prus marigosas de is ùrtimus setant'annus; is allenamentus de is giogadoris no ant a torrai a partiri nemancu in su mesi de Idas

Mancant feti una pariga de oras po sa bessida de su DPCM nou, cussu de su mesi de Idas, cun totu s'Italia chi abetat de cumprendi cumenti ant a podi andai is festas, sèmpiri chi, in custu duamilla e binti totu ghetau apari, nci siat diaderus sa possibbilidadi de s'atobiai totus impari, cumenti fadestus me is annus passaus, po sa nott'e cena, est a nai su binticuatru a merì, e po sa dì de Paschixedha, est a nai su binticincu, e po sa dì avatu, est a nai su bintises, e po su trintunu puru.

Is primus novas chi funt incumintzendi a aproillai, pruschetotu me is giornalis, no funt allìrgas ne drucis: a cantu parit, me is diis de festa no eus a podi bessì aforas de su comunu innoi biveus; sa primu dì de s'annu nou, invècias, eus a podi bessì de is aposentus feti de is seti de su mengianu, intamis de is cincu, cumenti sutzedit in dì de oi.
Dhu torraus a arrepiti: po imoi funt feti boxis, e scieus beni puru chi no serbit a nudha a prangi ainnantis de s'essi segaus sa conca, ma chi pentzaus a su mundu de sa bòcia de is diletantis, est craru chi, a su mancu po su mesi de Idas, at a essi meda, meda difìcili chi is cosas potzant torrai a partiri: ballit po is partidas de is campionaus, de siguru, ma ballit puru po is allenamentus in truma, chi funt sa cosa de importu prus mannu po podi torrai a curri avatu a unu palloi, su domìnigu, in campu.

Cun totu s'Italia torra serrada in domu, si cumprendit chi eus a depi abetai a su mancu a su mesi de Gennàrgiu e, duncas, a s'annu nou, su duamilla e bintunu, po biri unu paghedhedhu de luxi, ma po is giogadoris no at a essi facili a si ponni torra in saludi, dhi naraus diaici.
Est pròpriu cussu chi nd'est bessiu a pillu in d'una ciaciarrada a su telèfunu, fata in su mesi de Ladàmini, cun s'allenadori Sergio Cucca, po nd'arremonai unu, chi cust'annu est sighendi is piciocus de su Fonne: chi diaderus ndi arribat s'ierru, no at a essi facili trabballai po cussa chi in italianu tzerriant "preparazione atletica", cun is giogadoris chi arriscant de si strupiai po su tropu frius. Contendi che, de ariseu, is serras de is montis de su Gennargentu funt giai totu biancas po sa nì...

Attività realizzata col contributo della Regione Sardegna. LR 22/2018 art. 22, comma 2. Avviso 2019-2020