In su campionau de s'Ecellenza is de su Tèmpiu e is de sa Nuorese si setzint a su primu postu de sa lista; is de su Guspini e is de s'Alighera a su primu postu in su campionau de sa Promotzioni po su chi pertocat sa Lista A e sa Lista B

E duncas, po custa cida puru seus arribbaus a su giòbia, e cumenti a dònnia giòbia (gei ddu eis a sciri, chi eis lìgiu a su mancu unu de is artìculus chi ndi bogu aforas, e chi ndi bessint po su chi pertocat is Novas de su Diàriu Sportivu) est arribbau su tempus de nci ghetai aforas is trinta-milla cropus a sa tastiera, ddi naraus diaici po su chi pertocat cussas ca, in italianu, tzerriaus "battute", e duncas eia, est arribbau su momentu de ndi pesai s'articulu chi scriu, cun su coru prenu de afroddiu, in sardu campidanesu, in su sardu campidanesu, a su mancu, chi si chistionat innoi in Bidd'e Sorris, chi est sa bidda innoi seu stètiu pàsciu, de babbu miu e de sa bon'anima de mamma mia, e innoi ancora m'agatu. 

E duncas, cumenti a dònnia cida, ainnantis de incarrerai cun is legas chi si pertocant prus de acanta (e chi funt, duncas, cussas acapiadas a su mundu de is giogadoris de bòcia diletantis chi faint parti, est craru, de is rosas de is assòtzous de càlciu chi currint me is campionaus pesaus de is de sa Federatzioni Italia de su Giogu de su Càlciu, e de is de sa Lega Natzionali de is Diletantis), deu creu ca siat giustu (po mei est unu prexei, e unu spàssiu puru) andai a fai su contu de su tempus chi est passendi, de su tempus chi est passau, e duncas, eia, mi eis cumprendiu giai: su tialu de su calendàriu narat (e mi nd'arregodat, duncas) ca seus lòmpius (e giai giai mancu nci creu) a su duus de su mesi de ladàmini, e duncas, eia, sa primu nova chi si depu, chi si potzu donai, est ca si seus lassaus a is pabas puru su de noi mesis de s'annu (chi fiat su mesi de cabudanni) e intzandus, eus incumentzau, giai de una parighedda de oras, a si scroxai su de dexi mesis de s'annu, e no mi parit nemmancu berus, a bortas, de cumenti mi parit ca si nci bobit su tempus. E potzu feti torrai gràtzias a su Cielu, immoi chi nci seu, de m'agatai ancora in saludi (in saludi bona, si iat a podi narai diaici puru) est a narai, duncas, chentza de daboris e chentza de dannus; po oi puru, duncas, nc'est su tanti po si intendi bastanti allirgus, chi cumprendeis su chi si bollu narai, e po custa cida puru, intzandus, potzu pentzai a su trabballu cosa mia, e torru gràtzias a su Cielu, immoi chi nci seu, po su de tenni unu trabballeddu de sighiri. 

E duncas, eia, po su chi pertocat su tempus chi passat, gei apa a acoitai a si contai totu su chi tèngiu in conca: sa cosa de importu prus mannu (e diaici incumentzaus a si incarrerai puru in su mundu de is partidas, e de is resultaus puru, chi pertocant is scuadras sardas, partendi, est craru, de cussas chi currint in su campionau de s'Ecellenza, passendi de is scuadras de sa Promotzioni e fintzas a arribbai, mi parit craru puru, a totus is scuadras chi faint parti de su campionau de sa Primu Categoria, e fintzas a arribbai, duncas, a is scuadras chi currint in su campionau de sa Segunda Categoria) est, duncas, ca po su chi pertocat su campionau de s'Ecellenza si funt giai giogadas tres giorronadas, e duncas, si cumprendit, custu fini de cida chi est arribendindi allestru, e acoitu (cumenti chi fessit unu leporeddu chi currit in mesu a su sartu, chi mi permiteis de manigiai custus fueddus e giogai, a su mancu po unu pagheddeddu, a fai su poeta, e no feti su giornalista sportivu), is sexi scuadras chi currint in su campionau de s'Ecellenza nd'ant a cabai in campu, in truma manna, po giogai sa de cuatru giorronadas po su chi pertocat, mi parit bastanti craru, sa lista de partidas chi ant a balli po s'andada; is scuadras chi currint in su campionau de sa Promotzioni, invècias, funt arribbadas a sa de cincu giorronadas (est a narai, ca sa de cincu giorronadas s'at a giogai pròpriu in custu fini de cida chi est arribendindi); antzis, immoi chi nci seu si potzu narai ca totus is scuadras chi faint parti de sa Lista A, e duncas, totus is scuadras in truma manna, nd'ant a cabai in campu su sabudu (e no su domìnigu, cumenti funt costumadas a fai), chi at a essi su cuatru; e si potzu incumentzai a narai ca su sabudu de sa cida chi at a benni at a tocai, invècias, a is scuadras chi faint parti de sa Lista B, e seus chistionendi, est craru, sèmpiri de su campionau de sa Promotzioni. 
Is scuadras de sa Primu e de sa Segunda Categoria puru (e mancai, chi m'at a abarrai unu stìddiu de tempus si nd'apa a chistionai mellus in custu artìculu etotu, desinò nd'apa a chistionai, custu est pagu ma seguru, in s'artìculu chi at a bessiri sa cida chi benit, sèmpiri chi su Cielu at a bolli custu beni po mei) ndi funt cabadas in campu custu fini de cida passau (est a narai, duncas, eia, si cumprendit, po s'ùrtimu fini de cida de su mesi de cabudanni) po giogai sa primu giorronada. 

E duncas, si potzu aciungi feti custu immoi chi nci seu e apustis, cun is strollichiminis, a su mancu po custa cida, si iat a podi narai ca eus acabbau: e duncas, cumenti scieis beni (chi, a su mancu, eis lìgiu a su mancu unu de is artìculus scritus, pesaus in sardu chi nd'apu bogau aforas in totus custus ùrtimus mesis) andaus a castiai, impari, cumenti funt andendi is cosas po su chi pertocat su tempus (e no megu a chistionai prus de su tempus chi passat, ma de su tempus chi est fadendi), cumenti faint is grandus dotoris chi sighint cussas chi tzerriaus "previsionis de su tempus": e duncas, seus brintaus in manera uficiali in s'atonzu (e giai de unu bellu tanti de diis, fadendi su contu ca s'equinotziu, po ndi furai su fueddu de s'italianu etotu, nd'est arrutu, ddi naru diaici isperendi ca no si dispraxiat tropu cumenti a cosa, su lunis de su bintiduus) e is temperaduras, no mi parit nemmancu berus (fadendi su contu ca in s'istadi eus acutu a si scallai po beni, e gei si ddu eis a arregodai prus de mei puru) si funt abasciadas, e meda puru. Custu bollit narai ca chi po is primus partidas chi si funt giogadas in custa stagioni (est a narai, mellus, po sa stagioni de su duamilla e binticincu – duamilla e bintises), e megu a chistionai de is partidas de sa Cupa Italia (siat po su chi pertocat s'Ecellenza e siat po su chi pertocat, mescamente, is scuadras chi currint in su campionau de sa Promotzioni), e chi si funt giogadas me is primus duas cidas de su mesi de cabudanni etotu, nci fiant calincuna cosa cumenti a coranta gradus (a su mancu, a is cuatru de su megama, chi est s'ora innoi incumentzant is partidas, e is cosas ant a andai ainnantis diaici, a su mancu fintzas a candu no cambiat s'oràriu, cumenti seus costumaus a narai, in italianu puru), immoi is megamas funt medas ma medas prus friscus, e duncas, eia, benit mellus puru, e chistionu po is piciocus chi ndi cabant in campu (chi ndi depint cabai in campu, po ddu narai mellus puru) a curri avatu de sa bocia, e nc'est meda ma meda prus friscu (po no narai frius) apustis chi ndi cabat su sobi, e duncas a su noti. E po mei est una cosa toga e bona meda, fadendi su contu ca s'istadi mi praxit, nareus, po is primus sessanta-setanta diis, ma me is ùrtimus binti diis mi intendu, dònnia dònnia annu, cumenti chi fessi unu pisci budditu, chi cumprendeis su chi si bollu narai, e dda acabbu, dònnia dònnia annu, dònnia dònnia istadi, chentza nemmancu unu stìddiu de fortzas in cropus, e duncas, chentza nemmancu una pimpirilla de energias, chi cumprendeis su chi si bollu narai, su chi seu circhendi de si narai. E duncas, seu passau de mi scallai de sa basca (cumenti si iat a podi narai e cumenti intendu narai in bidda mia etotu) a mi depi imbussai po no tenni frius a su noti. E andat beni diaici. Me is ùrtimas diis, a su mancu po su chi pertocat su Campidanu de mesu, nd'est arruta puru unu pagheddeddu de acua, ma me is giornalis seu incumentzendi a ligi ca s'acua chi teneus est, torra (parit una cantzoni giai intendia, berus est?) pagu meda, ca parit ca no potzat bastai nemmancu po lompi, po nc'arribbai a su Nadali (e po lompi a su Nadali ammancant calincuna cosa cumenti a noranta diis, calincunu in mancu puru); e duncas, su chi tocat a fai (cumenti fadiant is antigus, de su restu) est cussa de isperai, de pregai su cielu chi potzat torrai a proi, in cantidadi ma chentza de fai dannus, e chitzi puru, e mancai acoitu. 

E duncas, eia, po custa cida dda acabbu innoi de si fai sa conca a acua (eia, torrendi a m'acapiai a s'ùrtima lega chi nd'apu bogau aforas, e megu a brullai, unu pagheddeddu, si cumprendit berus?) e si nci ghetaus a fundu 'e susu, (cumenti si narat, de su restu, innoi in Bidd'e Sorris etotu) me is chistionis acapiadas a istrintu cun is scuadras sardas de bòcia chi faint parti de su mundu de is diletantis. 
E incumentzaus, e atacaus, immoi chi nci seus, cun is scuadras de s'Ecellenza, e duncas, eia, chi seis de acòrdiu cun mei, podeus andai a castiai cumenti funt cuncodradas is cosas me in sa lista, apustis de sa de tres giorronadas, chi est cussa, cumenti s'apu arremonau ainnantis etotu, chi s'est giogada custu domìnigu passau. E duncas, a su primu postu de sa lista agataus duas scuadras, e seus chistionendi de is de su Tèmpiu, sighius, po cust'annu, torra de Giusepi Cantara, e is de sa Nuorese: is duas scuadras tenint seti puntus in totu, apustis de essi bintu duas partidas e apustis, est craru, de nd'essi serrada una cun su resultau siddau in paridadi. 
A su segundu postu de sa lista, invècias, agataus atras duas scuadras, e seus chistionendi de is de su Crabonaxa e de is de su Tortolì, cun is ollastrinus chi funt fadendi a biri cosas togas meda, fadendi su contu ca fintzas a s'annu passau curriant in su campionau de sa Promotzioni, ma de su chi seus biendi, de su chi eus potziu biri fintzas a immoi, parint ca currant in su campionau de s'Ecellenza de una biga de annus, po cumenti funt gioghendi, a su mancu. Cun cincu puntus, invècias, chi ballint po su de tres postus in sa lista, agataus tres scuadras: seus chistionendi, duncas, de is de s'Ilvamaddalena, de is de su Lanusè e de is de s'Igrèsias. Cun cuatru puntus agataus is de su Crabònia e is de s'Atletico de Uri, cun is grogus-arrubius chi ndi funt cabaus, in su campionau de s'Ecellenza (e si cumprendit, berus est?) pròpriu cust'annu apustis de una bella parighedda de annus chi ant fatu in su campionau de sa Sèrie D, e nc'est de narai (podeus narai, chi si praxit prus diaici po cumenti sonat sa fràsia) ca is de s'Uri no funt andendi beni cumenti, mancai, si podiant abertai, fadendi su contu ca fintzas a oi ant bintu feti una partida, nd'ant pèrdiu una e nd'ant serrau un'antra cun su resultau siddau in paridadi. E duncas, eia, is de s'Atleticu de Uri s'agatant, in dì de oi, a calincuna cosa cumenti a tres puntus de is duas scuadras chi s'agatant a su primu postu de sa lista, e immoi eus a biri cumenti ant a sighiri a andai is cosas. Cun tres puntus in buciaca, agataus is de s'Ossese e is de su Calanzanos, cun feti duus puntixeddus in buciaca, invècias, nci funt is de su Sant'Aleni de Cuartu e is de su Taloro de Gavoi; e serraus sa chistioni cun is de su Santa Teresa, sighius de Celestinu Ciarolu, chi tenint feti unu puntixeddu in buciaca, cumenti is casteddaius de sa Ferrini e cumenti is de su Uddusò, chi ndi funt artziaus pròpriu cust'annu in su campionau de s'Ecellenza, apustis de essi bintu (apustis de essi arrannèscius a binci, chi si praxit mancai de prus diaici po cumenti sonat sa fràsia) su campionau de sa Promotzioni, in sa Lista B (po benni a essi prus pretzisus puru, cumenti iat a depi fai unu giornalista, e sèmpiri chi bollit fai beni, in gràtzias de Deus, su trabballu cosa sua). 

E duncas, su chi podeus fai, arribbaus a custu puntu, est su de andai a castiai, impari, e si cumprendit, cumenti funt cuncodradas is cosas po sa giorronada chi at a benni, est a narai, po sa de cuatru giorronadas, chi s'at a giogai pròpriu custu domìnigu, chi at a essi su cincu de su mesi. E duncas, eia, is de su Lanusè ant a depi arriciri sa visita (ddi naraus diaici, a trassa de cumenti si narat in italianu etotu, de su restu) de is cuartesus de su Sant'Aleni; is de su Crabònia, invècias, ant a arriciri sa visita de is de su Uddusò, po una de is partidas prus de importu de totu sa giorronada. Is de su Calanzanos, invècias, s'ant a agatai faci a faci (po ddu narai diaici, mancai) contras a is de su Taloro de Gavoi; is de s'Atleticu de Uri, invècias, ant a circai de ndi cassai sa segunda partida bìnta in custu campionau, andendi a giogai contras a is casteddaius de sa Ferrini, in domu allena, duncas; po is de s'Ilvamaddalena nc'at a essi unu muntoni de tretu de fai, fadendi su contu chi ant a depi giogai in domu de is de s'Igrèsias, e duncas, si cumprendit, nd'ant a depi cabai de s'isula de Sa Maddalena e fintzas a arribbai in su Sulcis, po una de is trasfertas, ddas tzerriaus diaici, a trassa de s'italianu etotu, prus longas e prus fadiosas chi nci funt. Is de s'Ossese, invècias, ant a depi arriciri, in domu cosa insoru etotu, is de su Tortolì; is de su Santa Teresa si dda ant a depi biri contras a is allenus de sa Nuorese e una de is partidas prus togas, serraus pròpriu cun custa nova, at a essi cussa chi s'at a giogai tra is de su Crabonaxa e is de su Tèmpiu. 

E duncas, e sèmpiri chi seis de acòrdiu cun mei, podeus andai a fai su pròpriu giogu, est a narai, is pròprius contus, po su chi pertocat is scuadras de sa Promotzioni, partendi, est craru, de cussas chi faint parti de sa Lista A. E duncas, apustis de cuatru giorronadas (est a narai, duncas, cun cuatru giorronadas giai giogadas, e bellas ca scarescias, cumenti si iat a podi narai, puru), a su primu postu de sa lista agataus is de su Guspini, sighius de Cristian Dessì, ca in dì de oi funt s'ùnica scuadra (e chistionu, est craru, sèmpiri e feti de sa Lista A de su campionau de sa Promotzioni) chi est arrannèscia a binci totus is partidas, est a narai, chentza de ndi perdi nemmancu una, e chentza de nd'essi serrau in paridadi nemmancu una. E duncas, is biancus-arrùbius podint castiai totus is aversàrius de su primu postu de sa lista, cun doxi puntus giai allogaus in buciaca (e no funt pagus de seguru) e cun calincuna cosa cumenti a dexi gol fatus (prus de duus a partida, a fai is contus nci poneus pagu meda) e cun unu gol feti a is pabas (est a narai, mellus, ca, eia, cumenti eis a podi cumprendi, me is primus trecentus e sessanta minudus de giogu ant incasciau, nd'ant bodditu feti unu gol, in sa primu partida chi ant giogau, contras a is casteddaius de su Vecchio Borgo de Sant'Elia). Po su restu, eia, is de su Guspini funt abarraus chentza de ndi buscai nemmancu unu gol me is partidas chi ant giogau in domu de is de s'Uda (e chi s'est serrada cun su resultau de tres a zeru) e in domu de is de su Cannonau de Jerzu puru (cun sa partida chi s'est serrada, torra, cun su resultau de tres a zeru). In s'ùrtima bessida, invècias, e seus chistionendi de sa partida chi s'est giogada pròpriu custu domìnigu passau, is de su Guspini ant bintu, in domu cosa insoru etotu, cun su resultau de duus a zeru, contras a is de su Ceraxius. E duncas, sigheus a andai ainnantis, e duncas, eia, sigheus a castiai cumenti funt cuncodradas is cosas in sa Lista A: a su segundu postu nci funt duas scuadras, e seus chistionendi de is de su Terraba Frantziscu Bellu (ca funt partius cun su pei deretu, chi mi permiteis de manigiai custus fueddus, a trassa de cumenti si narat in italianu etotu, de su restu) e is de su Castiadas puru, chi tenint allogaus dexi puntus; a su de tres postus in sa lista agataus is de su Cannonau de Jerzu, cun is biancus-birdis, sighius po cust'annu puru de Andrea Piccarreta, chi tenint noi puntus tundus tundus giai allogaus in su callenti; cun otu puntus, a su de cuatru postus in sa lista, agataus is aristanesus de sa Tharros, cun seti is de su Samugheo, chi s'agatant a su de cincu postus in sa lista impari, pròpriu, a is cidresus de sa Villacidrese; cun ses puntus agataus, duncas, is de su Ceraxius e is de su Pirri; cun cuatru puntus is de s'Arborea, is casteddaius de su Vecchio Borgo de Sant'Elia, e is de s'Uda (chi eus giai arremonau, tra is atras cosas); cun tres puntus nci funt is barbaricinus de s'Ovodda e is ollastrinus de sa Baunese; cun feti duus puntixeddus allogaus in buciaca agataus is de su Tonara  e is de su Cus de Casteddu; e me is ùrtimus postus ddoi funt is de sa Frecia Parte Montis e is de s'Atleticu de Casteddu. 

E duncas, pròpriu cumenti eus fatu po is scuadras chi currint in su campionau de s'Ecellenza, andaus a biri, impari, e sèmpiri chi ndi teneis gana, cumenti funt cuncodradas is cosas po sa de cincu giorronadas, chi at a essi cussa chi s'at a giogai custu sabudu, chi at a essi su cuatru. 
E duncas, is primus de sa classi (ddi naraus diaici) de su Guspini ant a depi andai a giogai contras a is ùrtimus de sa lista, e seus chistionendi de is de sa Frecia Parte Montis; is de s'Arborea, invècias, ant a depi arriciri sa visita, in domu cosa insoru, duncas, de is casteddaius de su Cus; is de s'Atleticu de Casteddu, sighius torra de Carletto Saba (chi in s'interis at segau s'acapiu chi teniàt cun is de s'Uda), ant a depi andai a si dda giogai in domu de is de sa Baunese; is de su Pirri ant a circai de ndi cassai calincunu puntu in sa isfida contras a is de su Terraba Franziscu Bellu; at a essi toga meda, nci scumiteus giai, sa partida tra is de su Samugheo e is de su Castiadas; is de su Ceraxius si dda ant a depi biri contras a is campidanesus de s'Uda, e is de su Tonara ant a arriciri, in domu cosa insoru, is de s'Ovodda. Is de su Vecchio Borgo de Sant'Elia ant a arriciri is de su Cannonau de Jerzu, e serraus is contus cun sa partida, de importu mannu, tra duas de is scuadras cun sa storia prus manna a is pabas, tra totus cussas chi currint in sa Lista A de su campionau de sa Promotzioni, e seus chistionendi de is de sa Villacidrese (sa scuadra chi nd'ant pesau in Biddacidru, si cumprendit, berus est?) chi si dda ant a depi biri, in domu cosa insoru, contras a is de sa Tharros. 
E duncas, immoi chi nci seus, andu a si intregai, e mi fait prexei, e meda puru, is fueddus chi s'at regalau sa presidenti (fadendi su contu ca, eia, est una picioca) de su Tonara, chi eus intèndiu pròpriu sa cida passada, a sa fini de sa partida chi is arrùbius-nieddus ant giogau contras a is de su Cus de Casteddu (ma sa partida s'est giogada, a narai sa beridadi, e a bolli essi pretzisus, in domu de is de sa Ferrini). E duncas, eia, po incumentzai si iat a podi narai ca su mundu de su càlciu est sèmpiri stètia una faina chi pertocat, po su prus, is maschiteddus; ma de una bella pariga de annus, a narai sa beridadi, e mancu mali, nc'aciungiu deu, si iat a podi narai diaici puru, is feminas funt incumintzendi a si donai de fai, e no est sa primu borta chi intendeus, custu est pagu ma seguru, de una feminedda chi, mancai, arribbat a fai su presidenti de un assòtziu. 
Pròpriu cumenti est sucèdiu a Eleonora Porru, chi s'at regalau custus fueddus a sa fini de sa partida chi is arrùbius – nieddus – biancus ant giogau in Casteddu, contras a is de su Cus, chi est sa scuadra chi nd'ant pesau, una bella pariga de annus fait, is de s'universidadi. «Seus bènius innoi in Casteddu po circai de binci sa isfida – s'at contau Eleonora Porru – ma a narai sa beridadi, si andat beni unu puntixeddu puru; bollit narai ca si depeus acuntentai, e duncas, podeus torrai a domu cun su coru selenu, poita in campu is piciocus cosa nosta ant giogau una gara de importu mannu meda, e custa est sa cosa chi si fait prus prexei. In sa rosa de su Tonara – at sighiu a si contai Eleonora Porru – teneus una bella pariga, pariga narau a sa sarda, mi parit craru, de giogadoris chi ant giogau in categorias prus artas, e prus mannas de sa Promotzioni, e s'esperièntzia chi tenint custus giogadoris a is pabas si iat a podi agiudai a curri a forti in custa stagioni. Po su chi pertocat s'allenadori, eus decìdiu de donai is crais de sa scuadra me is manus de un allenadori giòvunu, ma forti meda, cumenti est Andrea Pia. Po su restu, potzu feti narai ca, eia, in sa bidda cosa nosta, in Tonara, sa genti est sèmpiri stètia a su costau de is piciocus de sa scuadra de bòcia, chi cumprendeis su chi seu circhendi de si narai; est de una bella biga de annus chi s'assòtziu est in peis, e nareus, puru, ca in Tonara nc'est una bella istoria po su chi pertocat su càlciu; sa genti de sa bidda sighit sa scuadra dònnia, dònnia domìnigu, siat po is partidas in domu e siat po is partidas aforas de domu, cussas ca giogaus in domu allena, duncas, e si iat a podi narai, puru, ca is tifosus cosa nosta funt costumaus a biri partidas togas, e est cussu chi s'abertant, de su restu: andant a su campu po si spàssiai, e is piciocus chi a sa fini giogant sa partida faint de totu po regalai a is tifosus unu bellu spetàculu, chi cumprendeis su chi si bollu narai. Po su chi pertocat su trabballu cosa mia, su trabballu chi apu decìdiu de fai po s'assòtziu de su Tonara, si potzu feti narai ca, eia, cumenti eis a cumprendi beni, mi ndi furat una biga de tempus; deu depu sighiri, po trabballu, po su trabballu cosa mia, e si cumprendit, un'azienda chi pertocat su turroni, chi mi cumprendeis po su chi si bollu narai, e duncas, eia, su tempus chi tèngiu, scapiu de su trabballu, no est diaici meda, antzis, parit ca no bastit mai po sighiri totu su chi ia a bolli. Ma su mundu de is diletantis est diaici: su tempus chi tui nci ghetas in campu, e sa cosa ballit siat po is piciocus, po is giogadoris, e ballit siat po s'allenadori, ma puru po totus is dirigentis, est craru, ddu depis bogai, mancai, a sa famillìa cosa tua, a totus is atras fainas, a is atras passionis chi mancai tenis, e chi mancai iast a bolli sighiri. Deu tèngiu sa bona sorti de tenni unu pobiddu, a su costau cosa mia, chi m'agiudat, e meda puru, a sighiri totus is fainas chi pertocant su Tonara; no si potzu narai ca su de essi sa presidenti de su Tonara siat unu trabballu po mei, e po nosu, fadendi su contu ca ddu fadeus po si spreviai, po sa passioni chi teneus, in su coru, po su giogu de sa bòcia e po sa scuadra de sa bidda cosa nosta; ddu fadeus poita si praxit, ma eia, est cumenti a tenni un antru trabballu, poita su tempus chi nci depis ponni no est pagu, e si cumprendit puru». 
Apustis, Eleonora Porru s'at contau sa storia cosa sua: no est facili, de seguru, po una femina, su de fait parti de unu mundu ca fintzas a s'atra dì (ddi nau diaici) fiat reservau (m'est bèniu de manigiai custu fueddu, isperendi ca si cumprendat su chi seu circhendi de si narai) feti, o giai feti, a is maschiteddus; sa storia cosa sua, duncas, e est cussu chi s'auguraus, de su restu, iat a podi serbiri po donai sa fortza, sa gana a atras piciocas, a atras feminas, po si nci ghetai in mesu a sa faina de su càlciu. «In custus ùrtimus annus, a narai sa beridadi, is femineddas chi si ponint a giogai a bòcia funt sèmpiri de prus, e custa est una cosa bona, de seguru, e nci iat a mancai atru puru. Is feminas no funt prus, feti is mulleris, is pobiddas, is piciocas de is giogadoris e de is allenadoris, cumenti sucediat fintzas a una pariga de annus fait, ma ant incumentzau a trabballai me is assòtzius, cumenti a dirigentis, o fintzas a arribbai a essi is presidentis. Est una cosa bona: su mundu de sa bòcia no benit a essi prus feti unu giogu po is ominis, ma puru is feminas podint donai una manu de agiudu, cun su sentidu, cun sa passioni ca is feminas tenint in su coru. Po su restu, si potzu narai ca seus trabballendi, dònnia dì, po su beni de is piciocus chi scerant de curri, de giogai cun sa camisedda de su Tonara: teneus una pipiniera toga meda, e mancai, de totus is pipius chi funt incumintzendi a giogai a bòcia pròpriu in custus ùrtimus annus, mancai nc'at a essi puru calincunu ca at a arrannesci a arribbai a giogai me is categorias prus artas, partendi de s'Ecellenza, e mancai arribbendi fintzas a sa Sèrie D, o a calincuna categoria prus arta puru, ca a bisai no si costat nudda. Tonara fait calicuna cosa cumenti a duas milla animas, no est una bidda manna, antzis, ma teneus calincuna cosa cumenti a centu pipius iscritus a sa scola de càlciu cosa nosta, e no funt pagus de seguru, e si cumprendit; a narai sa beridadi in custus ùrtimus annus funt benendi a giogai cun nosu puru is pipius chi bivint me is biddas chi ddoi funt totu a giru a giru de sa nosta, e sa cosa no podit ca si fai prexei; custu bollit narai ca ndi seus pesendi unu trabballu de importu, e sa genti si nd'acatat e si regalat sa fiducia, e po nosu est sa bìncida prus manna. E duncas, ispereus ca is pipius chi giogant cun sa camisedda cosa nosta potzant sighiri a cresci, e mellorai, e bai e circa, mancai calincunu de issus at a bessiri unu giogadori famosu puru». 
E custu, duncas, est cussu chi s'at scoviau Eleonora Porru, e s'ùnica cosa chi potzu aciungi, est ca s'auguraus ca nci potzant essi atras femineddas, cumenti a Eleonora Porru etotu, chi potzant tenni sa gana de donai una manu de agiudu in su mundu de su càlciu: ca is feminas giogant unu ruolu de importu mannu meda, in sa vida, in su mundu, e iant a podi fai beni in su mundu de sa bòcia puru. 

E duncas, arribbaus chi seus a custu puntu de sa chistioni, e de s'artìculu, deu ia a sighiri (sèmpiri chi seis de acòrdiu cun mei, e megu a brullai unu pagheddeddu, si cumprendit, berus est?) andendi a castiai cumenti funt andadas is cosas po su chi pertocat sa Lista B, e seus chistionendi sèmpiri de su campionau de sa Promotzioni. 

E duncas, apustis de cuatru partidas, e de cuatru giorronadas fatas, a su primu postu de sa lista agataus is de s'Alighera, cun doxi puntus in totu, ca in s'ùrtima bessida nd'ant cassau sa bìncida in sa partida chi ant giogau, in domu cosa insoru etotu, contras a is de s'Ozierese de Otieri. A su segundu postu de sa lista, invècias, cun dexi puntus, agataus is de s'Altzaghena, chi in s'ùrtima bessida ant giogau una partida toga meda, e de importu mannu, contras a is meris de domu de s'Atleticu de Bono, cun sa isfida chi s'est serrada cun su resultau de cincu a unu po is allenus. A su de tres postus, agataus is de su Bosa, sighius de Tore Carboni po cust'annu puru, cun s'allenadori chi at scerau de sighiri su trabballu chi est fadendi cun sa scuadra de giai dexi annus; is arrùbius-brau, si ddu eis a arregodai beni e mellus de mei (ma chi no si ddu arregodais, intzandus deu seu innoi pròpriu po custu) ndi funt cabaus pròpriu cust'annu, est a nai, mellus, a sa fini de sa stagioni passada, torra in su campionau de sa Promotzioni, apustis de una bella pariga de annus chi ant fatu in su campionau de s'Ecellenza. E s'allenadori, de su chi seus bènius a sciri (e megu a chistionai sèmpiri de Carboni, gei si cumprendit, berus est?), at scerau de abarrai a trabballai cun is de su Bosa mancai apat tentu, in s'istadi, atras ofertas, est a nai, atras ofertas de atras scuadras, ma at scerau de abarrai innoi fiat, fadendu su contu ca cun is de su Bosa s'agatat beni meda. E duncas, eia, is de su Bosa ant bintu sa de tres partidas de sighiu in custas ùrtimas tres bessidas, gràtzias a su cincu a duus scutu in faci a is tataresus de su Li Punti, e immoi s'agatant a su de tres postus in sa lista cun noi puntus in totu. Cun otu puntus agataus, invècias, is de su Logusantu e is de s'Usinese, cun is duas scuadras chi ant serrau is partidas cosa insoru cun su resultau de paridadi, po unu a unu: is primus, sighius de Madeddu, ant giogau contras a is de su Campanedda, cun sa partida chi est acabbada cun su resultau de unu a unu; po is segundus puru nd'est arribbau su pròpriu resultau, est a nai s'unu a unu, arregotu in domu, in sa partida contras a is de su Casteddusardu. Cun seti puntus, invècias, agataus una truma manna de scuadras, partendi de is de su Coghinas, sighius de Paulu Congiu, e passendi po is de su Bonorva, is de su San Giorgiu de Peifugas, e arribbendi, duncas, a is de su CastedduSardu, chi s'apu arremonau pròpriu immoi. Is de s'Ozierese, chi eus giai arremonau, tra is atras cosas, ant bintu duas partidas apitzus de is primus cuatru bessidas, e s'agatant, duncas, ca a fai is contus nci poneus pagu meda, cun ses puntus in buciaca. Cun cincu puntus agataus is de su Campanedda, cun cuatru puntus is de su Ilartzi, impari a is de su Thiesi. Feti tres puntixeddus, invècias, po is de sa Macumerese e po is de su Istintinu; cun feti unu puntixeddu agataus is de su Li Punti; ancora chentza nemmancu unu puntu, a s'ùrtimu postu de sa lista, duncas, agataus is de su Tuttavista e is de s'Atleticu de Bono. 

E duncas, immoi chi seus arribbaus a custu puntu de s'artìculu, de sa chistioni e de sa lega, deu creu ca sa cosa mellus chi potzu fai est cussa de si intregai is fueddus chi m'at regalau, pròpriu s'atra dì, Salvatore 'Tore' Carboni, chi s'apu giai arremonau e chi est s'allenadori de is de su Bosa, apustis de sa partida ca is piciocus cosa sua ant bintu in domu de is de su Li Punti, chi funt un'antra de cussas scuadras chi ndi funt cabadas de su campionau de s'Ecellenza. E duncas, Carboni m'at contau, tra is atras cosas, de essi abarrau prexau meda po cumenti ant giogau is piciocus cosa sua. «Po sa partida chi eus giogau contras a is de su Li Punti – m'at scoviau Tore Carboni – ndi seus cabaus in campu cun sa conca giusta, chi cumprendeis su chi si bollu narai; cun sa conca sbuida, intzandus, de totus is pentzamentus; eus incumentzau sa partida cun sa cuncentratzioni chi serbit, e potzu narai ca me is primus minudus eus fatu a biri cosas togas, e de importu mannu; eus tentu una ocasioni po fai su primu gol, ma no eus tentu sa bona sorti, e duncas is de su Li Punti funt torraus a partiri e s'ant fatu su gol a su primu tiru chi ant scutu concas a sa porta cosa nosta, cun Zinellu chi at sforrau una giogada toga meda, e candu unu giogadori de sa scuadra aversària intzertat una giogada diaici, intzandus s'ùnica cosa chi podi fai est cussa de ddi fai is cumplimentus. Diaici si seus agataus a depi curri is aversàrius, chi cumprendeis su chi seu circhendi de si narai, fadendi su contu ca, eia, si seus agataus cun unu gol de mancu de is de su Li Punti, ma po bona sorti cosa nosta seus arrannèscius a ndi artziai sa conca acoitu, fadendi su contu, mescamente, ca sa partida dda festus fadendi nosu, chi mi sigheis po su chi si bollu narai. Eus agatau su gol de s'unu a unu una pariga de minudus apustis de su gol de su Li Punti, e ainanntis de sa fini de su primu tempus eus cassau puru su gol chi s'at donau su vantàgiu. In su segundu tempus puru eus giogau beni: a sa segunda atzioni chi eus fatu in atacu seus stètius bonus a ndi cassai puru su de tres gol; sa partida, sa chistioni pariat serrada, mescamente poita seus stètius bonus a ndi cassai puru su de cuatru gol, peròu sa maba sorti s'at postu is bastonis tra is arrodas, cumenti si iat a podi narai, fadendi su contu ca si funt ingotus duus piciocus tra is undixi chi ddoi fiant in campu; e tra is atras cosas, fiant duus piciocus chi giogant unu ruolu de importu mannu po sa scuadra cosa nosta; in prus apu fatu brintai un antu giogadori puru, ma custu puru s'est strupiau apistus de una parighedda de minudus. A cussu puntu ammancat ancora una bella mes'oredda po acabbai sa partida, e duncas, is cosas si funt fatas difìcilis po nosu: is de su Li Punti, in prus, nd'ant cassau puru su segundu gol e po nosu is cosas si funt fatas marigosas, ma gràtzias a Deus seus stètius bonus a aguantai fintzas a su de noranta minudus; antzis, me is minudus de su recuperu nd'eus cassau puru su gol de su cincu a dussu. Duncas, potzu narai de essi prexau: deu creu ca is tres puntus chi nd'eus cassau si ddus seus minèscius; e chi no fessit stètiu po cussus tres giogadoris chi si funt ingotus, chi si funt strupiaus, fortzis is cosas si fiant potzias andai mellus puru».





Attività realizzata col contributo della Regione Sardegna. IMPRENTAS 2024-2025. LR 22/2018 art. 22