Su Ceraxus arruit torra; Sotgiu ci creit sempri: « Fintzas a imoi no eus agatau una scuadra chi s'at postu asuta in su giogu»

Cussus de su Ceraxus funt is ùrtimus de sa lista, ma tenint gana de si dda gherrai fintzas a s'ùrtimu bessida, chi at a essi su dexaseti de su mesi de Maju: po imoi is piciocus de Giuseppe Sotgiu depint feti sighiri a traballai a forti, circhendi de sindi bogai de conca totus is pentzamentus lègius; chi bolint abarrai po un'atru annu in Promozione, difatis, ant a serbiri coru mannu meda e, pruschetotu, puntus, poita is dexi chi ant allogau fintzas a oi no ant a abastai de sicgru.
A pustis de is partidas de domìnigu passau, su Seulo, chi at pèrdiu po unu a zero contras a s'Andromeda de Sriugus Donigalla, est sempri atesu duus puntus; cussus de sa scuadra de Arrolì invecias, chi nd'ant pigau unu bellu puntu in sa bessida in domu de sa Monteponi de Bidd'e Cresia, bolant a dexiotu, tres puntus in mancu de s'Arborea.

In domu de su Ceraxus boliant torrai a binci, a pustis de su duus a unu boddidu contras a cussu de su Cuartu Sant'Aleni, ma sa partida contras a su Bidda Matzràxia est andada mali, tres a duus po is piciocus de mister Titti Podda.
Giuseppe Sotgiu, s'allenadori de is arrùbius, chi ndi lompit in Primu Scuadra a pustis de tres annus de traballu impari a is Allievi Regionali, contat: «Fintzas a imoi no eus agatau una scuadra chi s'at postu asuta in su giogu; custa est sa cosa chi prus de totu m'agiudat a sighiri a andai ainnantis. Contras a cussus de su Cuartu Sant'Aleni nd'eus arregortu cussu chi meda bortas si nc est fuiu; arriciri is aprètzius de is atrus no abastat prus, imoi serbint is puntus».
Sotgiu aciungit: «Chi nc'arrannesceus a lompi a sa partida de is play-out, po nosu iat a essi cumenti a binci su campionau. Seus traballendi po fai cresci, in pressi, is piciocheddus chi teneus in sa scuadra; totu est andendi beni po imui, sa gana no s'amancat, nì aintru de sa cida po is allenamentus, nì su domìnigu po sa partida. Deu creu chi seus prus fortis de su chi narant is dexi puntus chi nd eus arregortu fintzas a imoi».

Attività realizzata col contributo della Regione Sardegna. LR 22/2018 art. 22, comma 2. Avviso 2019-2020