Su Consiglio Federale de sa FIGC fait is contus: tres possibilidadis in giogu po arrangiai is cosas

Seus feti a sa de tres dii, a pustis de su Decreto Legge bessiu aforas lunis passau, su noi de martzu, chi at firmau totus is giogus, po imoi fintzas a su tres de abrili, ma calincunu est giai fadendi is contus e provendi a cumprendi cumenti iant a podi andai is cosas. Po sa Serie A, sa Serie B, sa Serie C e sa Serie D, is campionaus de importu prus mannu, nd'ant arrexonau pròpriu ariseu in d-unu atobiu de su Consiglio Federale de sa FIGC: a cantu parit, nci funt, badda badda, tres possibilidadis: sa primu bidea est cussa de detzidi sa scuadra chi at a binci su campionau gratzias a is play-off, est a nai cun partidas tra is primu scuadras de sa lista, e, duncas, fadendi a su pròpriu po is retrocessionis, cun is play-out; sa segundu bidea est cussa de pigai po bona sa lista po cumenti s'est cuncodrada a pustis de is bintises gerronadas giogadas; sa de tres bidea est cussa de no fait binci nisciunu, fadendi cumenti chi su campionau de su 2020 no s'iat mai esìstiu. Is ùrtimus duas pentzadas ant a balli feti chi no nc'at a essi sa possibilidadi de giogai atras partidas, iat a essi unu dannu mannu meda, e po imoi est mellus mancu a nci pentzai. S'at a sciri calincuna cosa in prus, est cussu chi isperaus totus, su bintitres de martzu, candu nc'at a essi un antru atobiu de su Consiglio Federale e, mancai, s'ant a cumprendi mellus is cosas a pitzus de su spaniamentu de su Coronavirus. Sa chistioi est unu pagheddu difarenti po s'Eccellenza, sa Promozione, sa Prima e sa Seconda Categoria. In Eccellenza amancant de giogai seti partidas, otu invècias in Promozione e Prima Categoria, feti ses in Seconda. Imoi tocat feti a cumprendi candu s'ant a podi giogai torra is partidas, cun s'Eccellenza chi depiat giai cabai in campu su sabudu de Pasca Manna. Chi diaderus is giogus torrant a partiri su cincu de aprili, Promozione, Prima e Seconda iant a depi recuperai tres partidas, una cosa chi no parit traballosa meda a nai sa beridadi.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020