Su Siniscola chirchende cunfirmas, Pau ponet in su mirinu a su Fertilia: “At a èssere una gherra, chèrgio su matessi ispìritu de domìniga”

Pro bìnchere a sa cabulista Bonorva serbiat, a manera simple, sa partida perfeta: in sas chimbe garas in antis difatis, nemos fiat resessidu in s’impresa de frenare sa cursa fuliosa de sa cabulista, ma a su Siniscola no est bastadu a pònnere sa grinta in campu e sa determinatzione de sas dies mègius; pro incungiare totu serbiat finas, gasi comente acuntesset a s’ispissu in su fùbbalu, agigu de bonasorte, pròpriu cussu elementu chi est fartadu in su desafiu cun s’Usinese. Sos pitzocos allenados dae mister Dario Pau, arribadu in sa panchina de sos baroniesos a pustis de una esperièntzia de bint’annos in sa Bittese, comente giogadore in antis e posca che a tècnicu, sunt ponende a craru megiòrors nodidos, siat dae su ghetu de sa cunditzione atlètica chi dae su ghetu de sa personalidade: sos sete puntos collidos in sas ùrtimas bator garas sunt su datu chi prus acrarit s’istantargiada de unu grupu chi paret apat lassadu a palas unu mamentu malu, sas duas derrutas collidas a inghitzu ant pesadu che una roca subra su morale de s’iscuadra, chi como est prontu a cunfirmare su bonu chi at fatu bìdere in sas ùrtimas essidas finas in sa trasferta cun su Fertilia, penùrtimu in classìfica cun duos puntos, pro una gara chi balet giai meda in sa mirada de sa sarvesa. Como Dario Pau ponet in su mirinu a su Fertilia: “At a èssere una gherra, chèrgio su matessi ispìritu de domìniga”