Chi su mundu de sa bòcia at a scerai de si firmai, at a essi in bona cumpangia

Chi (e candu) su mundu de sa bòcia at a scerai diaderus de si firmai, at a essi de sicuru in bona cumpangia: nci funt stetias, difati, atras Federatzionis chi po cust'annu ant detzidiu de ndi studai is giogus, prima de s'ora, po crupa de cussu tiau de Coronavirus; chi depessit sutzedi sa pròpriu cosa po su calciu, duncas, no at a essi unu spantu diaici mannu. Est craru, est una chistioni, custa, chi ballit pruschetotu po is diletantis, poita a cantu parit sa Sèrie A una bia po ndi bessiri aforas de custu dannu mannu, in d-unu modu o in d-un antru, d'at a depi agatai, poita, no si ddu depeus scaresci, seus sèmpiri chistionendi de sa de tres siendas prus mannas chi nci funt in dii de oi in Italia.

Su binti-ses de su mesi de Martzu sa "Federatzioni Italiana de Pallacanestro", po boxi de su presidenti Gianni Petrucci, at serrau totus is giogus, a su mancu cussus chi ballint po is torneus regionalis, partendi de sa "Sèrie C Gold" fintzas a nd'arribai a is campionaus de is piciocheddus.
In d-unu primu tempus abarràt peròu ancora oberta, e totu custu fintzas a su ses de su mesi de Abrili, sa possibilidadi de sighiri cun in campionaus de is professionistas. Ma cun d-una noba bessida aforas su seti de su mesi de Abrili, sa FIP detzidit de serrai puru is chistionis po is campionaus de sa Sèrie A e de sa Sèrie B.

Is de sa "Federatzione Italiana de rugby", cun su presidenti Alfredo Gavazzi, ant fatu ancora mellus, est a nai, prus a lestru a pigai is detzisionis: su cenabara bintiseti de su mesi de Martzu, difatis, est aproillada aforas sa noba chi comunicat chi totus is giogus po s'annu duamilla e dexianoi \ duamilla e binti funt stetius sciusciaus: nisciunu chi bincit, nisciunu chi perdit, una cosa chi ballit po dònnia categoria, de is mannus de sa Sèrie A fintzas a s'ùrtimu pipiu chi giocat po spassiu in calincuna bidda sperdia. A si biri mellus, duncas, po sa stagioni duamilla e binti \ duamilla e bintunu, chistioni custa chi ballit puru po su mundu de sa Pallavolo, chi at frimau e sciusciau totus is giogus in dònnia campionau, cumenti si ligit in d-una noba bessida aforas su otu de su mesi de Abrili.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020