Coronavirus, Damiano Tommasi studat is afroddius: «Torrai a giogai su cincu de abrili? Una cosa foras de conca»

E duncas, nci funt stètius is primus duus motus po crupa de cussu tiau de CoronaVirus in Sardìnnia puru: unu piciocu de Casteddu de corantaduus annus, chi fiat in s'uspidali de su duus de su mesi de martzu e chi si fiat buscau su mabi torrendindi de una fiera de Rimini, e unu in Tattari, in s'uspidali “Santissima Annunziata”, innui comentesisiat fiat giai sighiu de is dotoris, de binti diis, po atras arrexionis. Intra de totus is cosas chi si podint nai e pentzai in dii de oi, depeus partiri, po fortza, de cussas prus lègias e prus grais, cun totu s'arrispetu chi seus bonus a ndi tirai aforas de su coru. Po su restu, ndi bessiri de custu dannu mannu iat a podi essi prus traballosu de cussu chi mancai parriat me is primu tempus, e fortzis at a serbiri unu stiddiu de passièntzia in prus, chistioi chi ballit puru po is giogadoris de bòcia, est craru, ma po cumprendi mellus cumenti funt andendi is chistionis a pitzus de su spaniamentu de sa mobodia si tocat abertai un antra pariga de diis.

Po imui podeus feti sighiri is noas chi nd'arribant de sa Protezione Civile: in Sardìnnia, a cantu parit, funt otantacuatru cussus chi tenint in corpu su virus; tres ndi funt aproillaus aforas a pustis de is esaminis fatus pròpriu ariseu a dotoris e infermeris de s'uspidali Brotzu de Casteddu; a Tattari invècias nd'ant agatau atrus bintises. In totu faint trintatres, feti in d-una dii, po centu e seti apuntoraus de candu est incumentzau su carràxu. Po cumenti funt cuncodradas is cosas oi, parit diaderus dificili chi is campionaus potzant torrai a partiri su cincu de abrili, sighendi is fuedus de Damiano Tommasi, su presidenti de s'AssoCalciatori, chi at scoviau a Fabio Fazio in d-una ciaciarrada a “Che tempo che fa”: «Cussus de sa Formula Uno — contat Tommasi — funt giai narendi chi is cursas chi depiant partiri a sa fini de su mesi de maju fortzis no s'ant a fai; in su mundu de sa bòcia, invècias, calincunu creit chi eus a podi giogai torra de su cincu de abrili, ma sa cosa, est craru, est foras de conca».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

Davide Onnis