In Germània is scuadras sighint cun is allenamentus e pentzant giai a candu torrai in campu po is partidas, in Italia ancora totu frimu

Cun totu su mundu de is giogadoris diletantis ancora e sèmpiri apicuau a is detzisionis de su Guvernu, de sa Protetzioni Civili e, a ùrtimu, de sa Lega Natzionali (ma nc'est de aciungi ca prus passant is diis e prus pagu possibilidadis de torrai in campu ddoi abarrant, pruchetotu chi pentzaus chi in Inghilterra, po nd'arremonai una, is campionaus de is diletantis funt stetius sciusciaus giai de diora) s'unica cosa de fai, in dii de oi, est a castiai ita est sutzedendi in Sèrie A, no feti in Italia, mancai, ma puru me is atrus logus.

Pesaus totu custu discursu no tanti po sciri candu ant a torrai a incumentzai is partidas (chi est comentecasiat una cosa de importu po totus is sportivus, pruschetotu in custa diis de corantena, ca unu fait drabessi a s'arrosci) ma po cumprendi puru candu, e cumenti, at a torrai a si fai una cursa in su satu, in calincuna bia sperdia in mesu a unu padenti, o in s'anei de su mari. Est una chistioni, custa, est craru, chi ballit po sa genti normali, est a nai po cussus chi no faint sport e allenamentus po traballu, ma po saludi e spassiu.
Apustis de trintotu diis de corantena, cun is cosas chi iant a depi sighiri diaici fintzas a su mancu a su tres de su mesi de Maju, est una duda chi si parit legìtima.

Oi incumentzaus sa nosta passillada tra is nobas partendi de cussu chi est sutzedendi in Germània: cumenti eus giai scritu in custas paginas etotu, is scuadras de sa Bundesliga funt giai torradas in campu po is allenamentus de calincuna cosa cumenti a dexi diis, cun s'obbligu, est craru, de arrispetai is arregulas po no fai spaniai su virus.
Su bintitres de su mesi de Abrili, est a nai fra una cida, sa "Deutsche Fussball Liga" (chi ballit po sa nosta Federatzioni Italiana Giogu Calciu) s'at atobiai po detzidi una data po torrai a fai partiri su campionau, chi po imoi at a abarrai firmu a su mancus fintzas a su trinta de su mesi de Abrili.
A cantu parit, in Germània ant a essi is primus, in totu Europa, a torrai in campu po giogai is partidas.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020


Davide Onnis