Gravina scoviat: «Chi sa Sèrie A no torrat a partiri nc'ant a essi dannus po prus de cincu-centus millionis»

Su mundu de sa bòcia sighit at essi sèmpiri sperrau in duus arrogus: de una parti nci funt is de sa Sèrie A, chi no bint pròpriu s'ora de torrai in campu po giogai, pruschetotu po una chistioni de dinai, no dhu podeus cuai. Est cussu chi si cumprendit, a su mancu, de is fueddus de su presidenti de sa Federatzioni Italiana Giogu Calciu, Gabriele Gravina, chi at arregodau a totus ca su Coronavirus, e apustis su chi tzerriaus "lockdown", at fatu arroris mannus meda: «Feti su torrai in campu po is partidas s'at agiudai a si ndi scabulli unu pagheddu de totus is dannus, chi iant a podi essi calincuna cosa cumenti a seti-centus millionis de euro e, de custus, cincu-centus dipendint de su fatu chi si seus depius firmai a mitadi de tretu cun is campionaus».
Agoa aciungit: «Depeus difendi prus de centu milla personas chi trabballant in su mundu de sa bòcia, chentza chistionai de is tesseraus, chi funt calincuna cosa cumenti a unu millioni e mesu. Su còmpitu de sa FIGC est cussu de fai de totu po torrai a fai partiri is giogus, sèmpiri ponendi a su primu postu sa saludi de sa genti».

Nudha de fai, invècias, e dhu scieus beni, po is diletantis.
Imoi at a tocai a cussus de is Comitaus Regionalis decidi cumenti aderetzai is cosas po su chi pertocat is promotzionis e, est sa chistioni prus callenti, apitzus de is retrocessionis.
In Sèrie D, dd'eus contau pròpriu ariseu, is scuadras chi nd'iant depi cabai in Eccelenza funt giai fadendi carraxu e funt prontas a batallai, ma po is atrus campionaus prus piticus, fortzis, iat a podi essi prus facili ponni totus de acordiu.

Giuseppe Baretti, po nd'arremonai unu, chi est su presidenti de is Comitaus Regionalis de sa Lombardia, at scoviau: «Po is diletantis lombardus no nc'ant a essi retrocessionis, po totu su restu de is fainas eus a biri, ma si depeus arregodai chi custa est stetia una stagioni stramba e trota».

Po Gianni Cadoni puru, chi sighit is interessus de su mundu de is diletantis sardus, «sa chistioni de is retrocessionis no est crara, poita seus arrexonendi apitzus de unu fatu istraordinàriu e iant a podi arribai arrespustas istraordinàrias».



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020