Prastaro sciusciat is fainas cun sa Nuorese a pustis de sa surra bodita contras a su Muristeni

Calincuna cosa s'est arrogada, aici parit, a su mancu, in domu de sa Nuorese, chi domìnigu passau at pèrdiu sa partida, sa de cuatru in custa primu parti de su duamilla e binti, po unu a zero, contras a cussus de sa Kosmoto de Muristeni de mister Nicola Manunza, cun is campidanesos chi sighint in sa lista cun bintiseti puntus, doxi in mancu de is birdi-asullus. Unu dannu mannu meda, chi nd'arribat a pustis de su cuatru a duus scutu a faci a cussus de s'Ossese, su duus de friargiu, e a sa bìncida po duus a unu arregota contras a s'Arbus, in s'ùrtimu bessida de gennàrgiu. A nai sa beridadi, custus ses puntus funt serbius po portai torra unu pagheddu de assebiu in sa conca de is giogadoris, chi me is primus tres partidas de s'annu nou funt abarraus a buca asciuta e buciacas sbuidas, a pustis de s'unu a duus arregotu, in Nùgoro, contras a su Crabònia, a pustis de su cincu a unu scutu de s'Atletico de Uri, in domu cosa sua, e de su tres a duus bodditu in Gavoi.
Sa sotziedadi de su presidenti Maurizio Soddu, gràtzias pruschetotu a su traballu de su direttore sportivu, Stefano Moncelsi, sa cida passada at pigau Andrea Porcheddu, unu centrucampista giòvanu meda, de feti bint'annus, nàsciu su dexanoi de su mesi de Austu in su milli e noicentu norantanoi in Aristanis, chi fiat abarrau chenza de scuadra a pustis de su campionau giogau impari a cussus de s'Alzaghena, in Lega Pro, s'annu passau. Porcheddu, custu a su mancu est cussu chi bisant is tifosus e totus is dirigentis, est unu piciocu chi iat a podi donai una bella manu de agiudu a sa Nuorese in sa batalla po nd'artziai in Serie D, ma imoi is cosas si faint meda prus tostadas: cussus de su Castiadas tenint difatis otu puntus in prus, noi invècias funt is puntus chi amancant po torrai a aciapai su Cràbonia e in mesu, sa de tres in sa lista, nc'est puru s'Ossese. Duncas Antonio Prastaro, chi est stètiu giai s'allenadori de is birdi-asullus dexi annus a oi, salludat a totus e lassat su traballu candu amancant noi partidas po acabai su campionau; sa sotziedadi in s'interis at detzidiu de ponni is crais de sa scuadra me is manus de Gianluca Peddio, chi cust'annu fiat giai su diretori tennicu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020