Su Latte Dolce si ndi pigat is tres puntus contras a is de s'Afragolese: is tataresus imoi bobant cun noi puntus in buciaca

Cussu de su ses de su mesi de Idas est stetiu un'atru domìnigu de importu mannu meda po su campionau de sa Sèrie D e po duas de is scuadras sardas chi currint in su Girone G: seus chistionendi, mescamente, de is de su Latte Dolce de Tatari, e de is de sa Torres, chi funt cabaus in campu po recuperai is partidas contras a is de s'Afragolese e contras a is de su Vis Artena, chi si depiant giogai, in d-unu primu tempus, sighendi a su chi narat su calendariu, sa primu dì de su mesi de Donniasantu, ma su spaniamentu de su virus e totus is dannus chi est fadendi, puru po su chi pertocat is assòtzius sportivus, est strobendi e ghetendi a fundu 'e susu su mundu de sa bòcia in totu Italia, e de su restu ge dhu scieus beni cumenti funt andendi e funt andadas is cosas de su mesi de Martzu fintzas a oi.

E duncas is piciocus sighius de mister Stefano Udassi ant aciapau sa secunda bincida de sighiu, in domu, apustis de cussa pinnigada in sa batalla contras a is de sa Vis Artena, gràtzias a su duus a unu chi nd'est bessiu aforas agoa de is noranta minutus de sa partida. Is primus a fai su gol funt stetius pròpriu is strangius, chi a su de dexiaseti minutu ant agatau su prexiu cun Sogno, chi s'est fatu agatai scidu e prontu po cravai in fundu a sa porta de Urbietis sa bòcia donada de Energe, chi nd'at aprofitau de unu sbàgliu pròpriu de su portieri de is de domu.
A mitadi de su segundu tempus mister Udassi scerat de ponni in campu is giogadoris cun su 4-2-3-1 (cuatru-duus-tres-unu), e is cosas si torrant a ponni apostu allestru po is biancus-brau, chi nd'ingollint su gol de s'unu a unu, seus a su de binti-seti minutu, cun d'unu tiru bellu forti de Roberti, cun su portieri allenu Caputo chi no ci podit fai pròpriu nudda po cassai sa bòcia, scuta de atesu meda. Is tataresus si ghetant a s'atacu po circai de binci sa partida, cun su gol chi ballit po su duus a unu finali chi nd'arribat candu mancant feti otu minutus a is tres frùscius de s'arbitru: totu partit de una bidea de Stefano Guberti chi, cun d'una giogada de campioni, arregalat sa bòcia a Konè chi, cun su pei mancosu, frigat Caputo e aciapat su de tres gol de sighiu me is ùrtimus duus domìnigus. Si serrat invecias po zero a zero sa batalla tra is de sa Torres e is de su Vis Artena: po is arrubius-brau nd'arribat su primu puntu in custu campionau.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020