"Candu un allenadori no acudit a si papai su panetoni": su dìciu chi cratzat mellus po s'artìculu de Santu Stefi

E duncas, no mi parit nemmancu berus, fadendi su contu de cantu apu abertau is festas cust'annu, a trassa, pròpriu, e giai giai, de pipieddu, de notzenteddu (cumenti si iat a podi narai, puru), ma seus arribbaus, po su chi pertocat su duamilla e binticuatru puru, a su Nadali, chi est una de is diis prus drucis chi ddoi funt de si bivi, e ballit po totus, est craru, po is prus piticheddus, chi si bivint sa festa cun prexu e cun ispantu mannu, e puru po is prus matucheddus, tocat a ddu narai, ca a bortas torrant a essi notzenteddus, mescamente candu diventant bècius (po giogai unu pagheddeddu cun is fueddus, ma cun is istorias de sa vida puru). 

E fadendi su contu ca custu artìculu, chi tra is atras cosas benit a essi s'ùrtimu po su chi pertocat no feti su mesi de Idas ma po su chi pertocat totu s'annu (e po si torrai a intendi, o mellus, a si ligi, eus a depi abertai sa segunda dì de su mesi de Gennàrgiu de su duamilla e binticincu, chi cumenti podeis cumprendi e imaginai a solus, est a nai, chentza de s'agiudu cosa mia, at a essi, torra, de giòbia), ndi bessit a pillu (cumenti si narat innoi in Bidd'e Sorris, a su mancu) sa dì avatu de cussa de su Nadali, est a nai, duncas, sa dì de Santu Stefi, mi benit unu pagheddeddu de si domandai: cumenti funt sighendi a andai is fainas acapiadas a is festas? Papau beni eis? Ca su de su papai, a cantu parit, de su chi mi parit de ndi podi cumprendi, benit a essi una de is cosas chi si faint bessiri aforas de conca, po ddu narai diaici; su de papai beni benit a essi unu de is prexus prus mannus chi agataus in custa vida (chi cumprendeis su chi si bollu narai); e fadendi su contu ca po calincuna cosa cumenti a coranta diis, ainnantis de su Nadali etotu, deu fatzu cussa chi si iat a podi tzerriai "dieta" (est a nai, duncas, po segai a crutzu sa chistioni, ca po coranta diis, e fatzu su pròpriu giogu ainnantis de is festas po sa Pasca Manna, funt prus is cosas chi no potzu papai de cussas chi nci potzu inguti e cabai in brenti) intzandus speddiat a mei puru su de mi podi papai, mancai, cun prexu mannu, unu arroghededdu de ciuculati, cumenti ddu tzerriaus, a sa sarda, furendindi su fueddu de s'italianu etotu, o una fita de cussu chi seus costumaus a tzerriai panetoni. 

E duncas, po incumentzai, isperu chi is cosas siant andendi beni po bosatrus puru, cumenti funt andendi beni po mei, est a nai ca giai po su fatu de no tenni daboris, o strobus, o dannus de mi scroxai, po mei est bastanti po mi intendi basau de sa bona sorti. 

E duncas, si naru custu puru: sa cida ainnantis de su Natali est benida a m'agatai sa sorri de sa bon'anima de mamma mia (ca iat a essi tzia mia, est craru, berus?), ca m'at donau, m'at regalau, po ddu narai mellus puru, unu cartoncinu de augurius, scritu a pinna de issa etotu: e su chi nci fiat scritu m'est abarrau prantau in conca, e si cumprendit, chi ndi seu chistionendi cun bosatrus puru. E duncas, tzia mia m'at augurau ca totu su chi apu disigiau sa noti de su Nadali, potzat benni a essi realidadi. 
Eia, sa cosa toga de bisai a ogus obertus (mi benit de tzerriai sa cosa diaici) est pròpriu custa, e a cantu parit, is diis chi ddoi funt ainnantis de su Nadali, e totus is diis chi sighint, funt, a su mancu is antigus dda pentzant diaici, diis magicas, mi benit de ddas tzerriai diaici. No feti po is disigius chi unu nci scudit concas a su Cielu, po giogai unu pagheddeddu a fai su poeta, sèmpiri chi mi ddu permiteis.

Eis a connosci, e mellus de mei puru, de su restu, sa stòria acapiada a su chi tzerriaus "Babbo Natale", in italianu: e duncas est de candu seus pitichinninnius, ca si imparant ca bastat a scriri una lìteredda a Babbo Natale e apustis issu si portat, in domu cosa nosta, totu su chi eus disigiau. 
Togu diaici, berus est? 
Tui bolis una cosa, mancai una cosa chi costat cara cumenti a su fogu, scriis su bisu, su disìgiu cosa tua apitzus de unu arrogu de paperi, e cumenti po maghia, cumenti si iat a podi narai, e cumenti si narat, Babbo Natale ti dda fait agatai asuta de sa mata sa dì de su Nadali. 
Eia, su giogu est togu fintzas a candu durat, si iat a podi narai diaici, ca cumenti benis a essi unu pagheddeddu prus matucheddu, intzandus sucedit (sucedit a totus, deu creu...) ca babbu e mamma tua, o a bortas est fintzas unu fradi, o una sorri, ti ndi sciusciant a terra (cumenti si iat a podi narai) su giogu e su bisu, e ti scoviant ca, a narai sa beridadi, Babbo Natale no esistit, e cussus chi a sa fini ti faint is regalus funt cussus de sa famìllia cosa tua etotu. 
E andat beni a su pròpriu, mi parit craru puru. 

Andat beni, a su mancu, candu sighis a arriciri is regalus (a mei, po si fai un esèmpiu, babbu e mamma mia m'ant sèmpiri tratau beni meda, po su chi pertocat is regalus de su Nadali, e de custu ddis torru totus is gràtzias), ca in custu mundu, macu meda e totu ghetau a pari, nci funt puru personas (e tra custas personas nci funt, est craru, una biga de pipius e de pipias) chi no tenint nemmancu un arrogu de pani de si ponni in buca (e de si nci ghetai in brenti), o nci funt logus, e ballit aguali, chi mancai funt totus ghetaus a pari, de is gherras, po incumentzai, o de is arroris chi sa Nadura fait dònnia dònnia tanti (po crupa pruschetotu de su tempus malu), innoi, mi parit craru puru, nc'est pagu gana de fai festa. 

E duncas, mi megu a solu a solu, po incumentzai cun s'artìculu de custa cida, si iat a podi fai custu giogu: torrai gràtzias a su Cielu feti puru po su fatu chi teneus sa possibbilidadi de fai festa. 

Deu seu stètiu su primu, mancai (si narat diaici, ma de seguru no seu stètiu s'unicu, in custu mundu) chi at biviu diis de festa unu pagheddeddu lègias, e marigosas, ddi naru diaici, mescamente candu sa bon'anima de mamma mia no si intendiat meda beni po su chi pertocat sa saludi, ca si cumprendit: cumenti narant is bècius (ca funt is prus sabius, est craru) candu ammancat sa saludi, intzandus incumentzant is arroris. 
E duncas, po primu cosa, si iat a podi fai su giogu de torrai gràtzias a su Cielu de essi bastanti sanus po tenni sa gana bona de fai is festas, chi no cun sa famìllia cosa nosta etotu, mancai a solus puru, chentza de nesciuna bregùngia. 

E torrendi a su chi si fia narendi ainnantis, apitzus de is bisus, de is disìgius chi circaus de ndi bogai aforas me is diis, me is cidas chi ddoi funt ainnantis de su Nadali (isperendi ca calincunu si potzat regalai su chi bisaus e disigiaus, duncas), iat a essi una cosa toga meda, a su mancu a parri miu, ca totu su chi eis pèdiu a su Cielu, mi benit de ddu narai diaici, ca totu su chi eis disigiau cust'annu, mancai giai me is notis chi ddoi funt ainnantis de sa noti de su Nadali, totus is isperas chi teneis in su coru, potzant benni a essi realidadi. 
Est cussu ca m'at augurau tzia mia, e est cussu ca, po incumentzai (e no si podit incumentzai un artìculu chi ndi bessit aforas su bintises de su mesi de Idas chentza de fai is augurius de bona sorti a totus is chi ligint custas rigas e a totus cussus chi sighint su giàssu de su Diàriu Sportivu, mi parit craru), torru a augurai a bosatrus puru. 
Ca estus a depi tenni sa fortza, mi benit de ddu narai diaici, de disigiai, de bisai is cosas: ma poi, apustis, tocat a tenni sa fortza, puru, po circai de curri avatu a is cosas chi eus bisau e disigiau. Ca at a essi berus, puru, ca fatu fatu (e ita cosa toga chi benit a essi, candu sucedit!) is cosas, is regalus, po ddu narai mellus puru, si nd'arruint in conca giai giai cumenti chi nd'arribbessint de su cielu, ma a bortas tocat a sudai, a trabballai, e meda puru, po essi bonus, e prontus, a ddus arriciri candu arribbat s'ora. 

E po custa cida mi parit mi parit ca apu spaciau is strollichiminis (e no s'at a parri nemmancu berus, mi benit de narai diaici, a trassa de brulla, fadendi su contu de cantu seu costumau a mi strollicai, pruschetotu me is artìculus chi ndi pesu in sardu, ca po is artìculus chi ndi pesu in italianu, invècias, no tèngiu su tempus po abarrai a scriri custus contus e custus contixeddus, ca depu pentzai, feti, e si naru feti, a scriri de bòcias, de resultaus, e de partidas), e fadendi su contu ca scriu po unu giàssu chi sighit is partidas de is scuadras diletantis de bòcia chi ddoi funt spratas in totu s'isula, mi tocat sèmpiri a si torrai a contai, puru, e no feti totus is cosas chi tèngiu badda badda in conca, ma mi tocat a chistionai, puru, megamu a si narai, de is novas prus callentis chi ndi lompint de is campus de càlciu. 

E duncas, chi seis de acòrdiu, po custa cida atacu diaici. 
Ainnantis s'apu arremonau su panetoni, ca est unu de is drucis de importu prus mannu po su chi pertocat sa traditzioni italiana, est a nai, ca su panetoni est unu de cussus drucis chi si papant feti in custu perìodu e chi duncas funt acapiaus, a strintu meda, cun sa festa de su Nadali. E immoi, no nc'eis a crei (custu de su restu est su giogu chi fatzu fatu fatu: megu a narai, su de ammesturai is chistionis chi nd'arribbant de su mundu de is scuadras de bòcias sardas, cun is cosas chi, mancai, capitant in sa vida cosa nosta de dònnia dì; e chi fatzu custu giogu, chi sigu a fai custu giogu est, mescamente, po circai de ndi cassai s'atentzioni, puru, de totus cussas personas chi no funt acapiadas a strintu cun is chistionis chi nd'arribbant de su mundu de sa bòcia), ma in su mundu de is allenadoris (po su chi pertocat is allenadoris, po ddu narai mellus puru) nc'est una fràsia, unu dìciu chi arremonaus fatu fatu e chi pertocat, duncas, pròpriu su panetoni. E immoi andaus a cumprendi, impari est craru, su motivu. 

Duncas, s'apu narau ca su panetoni est su druci chi incumentzaus a papai me is diis ainnantis de su Nadali (po no chistionai de sa dì de su Nadali: e mai ammanchit su panetoni, mi benit de narai diaici, me is mesas cosa nostas), mancai nci siant personas diaici gulosas, chi incumentzant a papai su panetoni giai de su mesi de Donniasantu. Ma custa est un'antra chistioni ancora, e mancai de sa gulosia de sa genti nd'eus a chistionai torra, e mellus, me is diis de sa Caresima. (e megu a brullai, ma nemmancu diaici meda!).

E duncas, s'apu narau puru, me in totus is cidas passadas, ca su trabballu de s'allenadori est unu de is prus fadiosus chi ddoi funt in su mundu de sa bòcia: ca no est facili su de ponni de acòrdiu una truma manna de giogadoris, chi podit arribbai fintzas a binti – binticincu personas; e mescamente no est facili su de fai giogai beni una scuadra, e chi mancai sa scuadra giogat beni, custu no est bastanti, ca una de is cosas chi benint a essi de importu mannu in su giogu de sa bòcia benint a essi is puntus chi arrannèscis a ndi cassai me is partidas. Ca podit sucedi, cumenti sucedit, de su restu, ca tui potzas fai su giogu prus togu, e prus spassiosu de totus, ma chi poi a sa fini no arrannescis a binci is partidas, intzandus nd'arribbant is daboris. 
E custu bollit narai, puru, ca po binci is partidas, fatu fatu po no narai sèmpiri, serbit puru unu pagheddeddu, unu stìddiu (cumenti si iat a podi narai), de bona sorti. Ca chentza de sa bona sorti, no arribbas pròpriu de nesciuna parti, cumenti si narat a trassa de s'italianu etotu. 
E in su giogu de sa bòcia (deu chi nci trabballu, in custu mundu, cumenti a giornalista, est craru, de calincuna cosa cumenti a cuindixi annus, apu imparau a cumprendi cumenti andant is cosas) podit sucedi de totu, cumenti podit sucedi de totu in sa vida cosa nosta, de su restu (po torrai cun su giogu chi megamu a si narai ainnantis, de cumprendi cantu cosas ballant po su giogu de sa bòcia e po sa vida cosa nosta puru). 

E duncas, mancai tui siast partiu cun una rosa toga meda, e cun una bidea de giogu toga meda in conca, podit sucedi (cumenti sucedit, de su restu) ca is cosas, is partidas, po ddu narai mellus, potzant andai mabi meda, poita mancai calincunu giogadori de importu dda acabbat strupiau apustis de una pariga de minudus, o podit capitai, puru (cumenti sucedit) ca unu giogadori, mancai su prus giòvuneddu chi s'allenadori fait cabai in campui, fatzat unu sbàlliu, cumenti si narat. E duncas, mancai, podit sucèdiri de perdi una partida chi fiast gioghendi beni meda, poita unu giogadori de sa scuadra cosa tua no est arrannèsciu a abarrai cuncentrau. E cumenti naraus fatu fatu, candu is cosas andant mabi, su primu a pagai su contu, cumenti si narat, est pròpriu s'allenadori. Ca si ndi pigat sa crupa prus manna. 

E duncas, torraus a nosu (e fiat ora, s'at a megai calincunu, e deu si domandu iscusa chi, mancai, si ndi seu furendi su tempus chi mancai no teneis), in su mundu de sa bòcia nc'est unu dìciu, togu meda, e chi cratzat beni beni cun su Nadali, e chi narat, prus o mancu, ca cussu allenadori no est stètiu bonu (o fortunau, chi si praxit de prus) a papai su panetoni. Est a nai, puru, ballit aguali, ca fatu fatu ddoi funt allenadoris ca no arribbant a sa metadi de su campionau, e duncas, depint lassai sa scuadra ainnantis de is festas de su Nadali. E duncas, est craru, nci funt allenadoris ca no arrannèscint a papai su panetoni impari a is giogadoris cosa insoru. 
Fadendi su contu, duncas, ca po Nadali is campionaus arribbant giai giai a sa metadi, e apustis de sa metadi de sa stagioni, si podint fai is primus contus, e cumprendi chi is cosas funt andendi beni (e intzandus no abarrat atru de fai ca sighiri in su pròpriu arrastu po sa segunda parti de sa stagioni puru), o chi is cosas funt andendi mabi, o peus de su chi is dirigentis s'abertànt; e duncas, sa primu cosa ca un assòtziu fait, candu is cosas andant mabi, est cussa de donai is crais de sa scuadra, de sa rosa, a un antru allenadori. 
E duncas, sa primu cosa ca is scuadras de càlciu faint (e ballit po cussas de is diletantis ma puru po cussas de is professioneris) est cussa de nci bogai (ddi naru diaici, mancai siat pagu simpaticu) s'allenadori chi teniant. 

E no nc'eis a crei, ma in custas ùrtimas cidas, nci funt stètias a su mancu tres scuadras chi ant scerau de cambiai s'allenadori chi teniant; e duncas, si iat a podi narai diaici (e nci seu lòmpiu, e fiat ora!), nci funt stètius a su mancu tres allenadoris, de importu mannu, chi no ant acutu a papai su panetoni. 

E duncas, torrendi a nosu, sa primu nova chi si bollu intregai, po oi, est cussa chi est arribbada po ùrtima (e si domandu iscusa po su giogu de fueddus chi m'est bèssiu aforas), e est cussa chi pertocat is de su Taloro de Gavoi, ca me is diis passadas (po bolli essi pretzisus, chi est cussu chi iat a depi fai unu giornalista bonu, sa nova est bessida a pillu, a su mancu me is paginas de su giàssu de su Diàriu Sportivu, de martis, su dexesseti de su mesi de Idas, est a nai noi diis fait) ant fatu sciri a totus (a incumentzai de is tifosus cosa insoru, est craru) chi iant decìdiu de nci bogai a s'allenadori chi fiat sighendi sa scuadra, e seus chistionendi de Antoniu Marinu. 

Cumenti megamu a si contai ainnantis, e cumenti s'apu contau atras bortas puru, candu is cosas no andant beni, su primu chi depit pagai su contu, mancai siat marigosu (o sabiu meda, chi si praxit de prus diaici cumenti sonat) est pròpriu s'allenadori, ca si pigat totu su bonu (est a nai is cumplimentus) candu, mancai, nc'arrannescit a ndi cassai sa bìncida de unu campionau, o ballit aguali, a ndi cassai sa sarvesa (ca po una scuadra pitichinninnia, ddi naraus diaici, benit a essi giai giai cumenti su de binci unu campionau, est craru e si cumprendit puru), ma peròu, s'allenadori est su primu chi depit sciacuai is paiolus (cumenti narant is muradoris, is maistus de muru, candu acabbant cun su trabballu cosa insoru) e limpiai su logu candu is cosas no andant beni. 

E cumenti festus narendi ainnantis, in su giogu de sa bòcia no bastat, po fai prexaus is dirigentis e is tifosus, a giogai beni, e a fai spassiai sa genti chi benit a biri is partidas, ma a sa fini, una de is cosas chi contant de prus (o fortzis est pròpriu sa cosa chi contat de prus) funt is puntus ca arrannèscis a ndi cassai. E duncas, fadendi is contus, in domu de is de su Taloro de Gavoi is cosas funt andendi unu pagheddeddu a trotas, fadendi su contu ca is arrùbius-brau, ca cumenti scieis beni (e fortzis mellus de mei puru, ma chi no ddu scieis deu seu innoi pròpriu po si ddu torrai a arregodai) currint in su campionau de s'Ecellenza, chi est su prus mannu, su prus matucheddu, cussu de importu prus mannu tra totus cussus chi si giogant in Sardìnnia, tenint allogaus in buciaca calincuna cosa cumenti a trexi puntus, cun feti tres scuadras a is pabas, e seus chistionendi, duncas, de is casteddaius de sa Ferrini (e issus puru una pariga de cidas fait ant dèpiu circai un antru allenadori, fadendi su contu ca cussu chi teniànt, po calincuna cosa cumenti a ses annus, e chi fiat Sebastianu Pinna, at decìdiu de serrai s'acapiu chi ddoi fiat in peis, cun sa sociedadi; cumenti s'apu contau giai, de su restu, me is cidas passadas), chi tenint undixi puntus allogaus in buciaca (est a nai, duncas, ca a fai is contus nci poneus pagu meda, duus in mancu de is chi tenint is de su Taloro de Gavoi), cumenti undixi funt is puntus chi tenint allogaus in buciaca is de su Cràbonia (e si cumprendit, seu fadendi custus contus candu nc'est ancora da giogai s'ùrtima giorronada de partidas, ainnantis de is festas de su Nadali; ma cumenti s'apu giai contau ainnantis, seu circhendi de ndi pesai custu artìculu ainanntis chi nd'arribbit sa festa de Santu Stefi, chi at a essi de giòbia, po circai de no abarrai totu sa dì innoi aranti de su computer, e si promitu giai de immoi ca, mancai, eus a fai mellus is contus de cumenti funt andendi is cosas po su chi pertocat su campionau de s'Ecellenza me in su primu artìculu chi nd'at a bessiri su duus de su mesi de Gennàrgiu, candu eus a essi, chi su Cielu at a bolli custu beni po mei e po bosatrus puru, est craru, giai in su duamilla e binticincu), e a s'ùrtimu postu de sa lista agataus, invècias, is de su Barisardo (chi est una de is duas scuadras chi ddoi funt in Barì). 

E duncas, torrendi a is de su Taloro, is arrubius-brau ant bintu feti po tres bortas: sa primu bìncida nd'est arribbada a sa de cuatru bessidas, in domu cosa insoru, contras a is de su Calanzanos, in sa partida chi si fiat giogada su ses de su mesi de Ladàmini (est a nai, duncas, in su primu fini de cida de su mesi de Ladàmini) e chi s'est serrada cun su resultau de tres a duus po is meris de domu. Sa segunda bìncida est arribbada a sa fini de su mesi de Ladàmini etotu, in sa bessida, in sa partida de su bintiseti, contras a is de s'Alighera, in domu allena (in domu cosa insoru, duncas), cun su resultau de unu a zeru (po is allenus, est craru, berus est?) e apustis, sa de tres bìncidas nd'est arribbada in sa primu bessida de su mesi de Idas, in sa partida chi s'est giogada sa primu dì de su mesi (sa primu dì de custu mesi etotu, si iat a podi narai puru), e pròpriu contras a is de su Barisardo, cun su resultau de unu a zeru (sèmpiri po is allenus, est craru). 
Is de su Taloro, sigheus a castiai unu pagheddeddu de numerus, po cumprendi mellus cumenti funt andadas is cosas in custa prima metadi de sa stagioni (ca is numerus fabas no ndi contant, cumenti si iat a podi narai), ant serrau po cuatru bortas sa partida cun su resultau siddau in paridadi, cumenti si iat a podi narai. In sa primu bessida, is de su Taloro de Gavoi funt arrannèscius a ndi pinnigai, a ndi ingolli unu bellu puntixeddu (unu puntu de oru, si iat a podi narai diaici) in domu de is de su Muristeni, ca funt una de is scuadras prus fortis, e prus cumpatas, chi ddoi funt cust'annu in su campionau de s'Ecellenza, fadendi su contu ca in dì de oi s'assòtziu de su presidenti Marcu Carboni, sighiu, tra is atras cosas, de un allenadori giòvuneddu, ma bravu meda, cumenti est Marcellu Angheleddu, s'agatant a su primu postu de sa lista e si funt gioghendi sa bìncida de su campionau impari a is de su Budune, po incumentzai, ma chentza de si ndi scaresci de is de su Tèmpiu e de is de s'Ossese de Ossi puru. 
E duncas, sa partida, chi est bàllia po sa primu bessida de su campionau de su duamilla e binticuatru – duamilla e binticincu, s'est serrada cun su resultau de unu a unu. E duncas, a sa de duas bessidas (cussa de su bintiduus de su mesi de Cabudanni, po si cumprendi mellus puru), is de su Taloro si funt dèpius acuntentai de unu puntixeddu in sa partida chi ant giogau in domu cosa insoru etotu, a su campu comunali "Maristiai", contras a is de su Cràbonia, chi eus arremonau pròpriu ainnantis, cun su resultau de zeru a zeru. In sa bessida apustis, sa de tres de su campionau, chi s'est giogada su bintotu de su mesi de Cabudanni, invècias, is de su Taloro funt stètius bonus a ndi cassai unu puntixeddu in sa isfida contras a is de su Santu Tiadoru - Poltu Ridundu, cun sa partida chi s'est serrada cun su resultau de unu a unu. Su dexesseti de su mesi de Donniasantu, invècias, is de su Taloro nd'ant cassau unu puntixeddu in sa partida chi ant giogau (fiat sa de dexi bessidas de s'annu) in domu de is de su Crabonaxa, cun su resultau, torra, de unu a unu. 

Podeus narai, duncas, ca is de su Taloro ant serrau, cun su resultau in paridadi, is primus tres partidas de s'annu nou. Po acabbai cun is contus, podeus narai, puru, ca is de su Taloro de Gavoi ant pèrdiu po seti bortas cust'annu: in sa de cincu bessidas, in domu de is biancus-nieddus de s'Ossese (chi apu arremonau immubagora e chi, giai de una bella pariga de annus, funt una de is scuadras prus togas e prus fortis de totu su mundu de s'Ecellenza, fadendi su contu ca arrannèscint a abarrai, fintzas a sa fini, me is primus postus de sa lista, ma no funt arrannèscius ancora a ndi cassai su sartidu in su campionau de sa Sèrie D, mancai feti po unu pilu, cumenti si narat, e immoi eus a biri cumenti ddis ant a andai is cosas cust'annu), cun sa partida chi s'est serrada cun su resultau de duus a zeru; sa cida apustis (est a nai su dexennoi de su mesi de Ladamini), is de su Taloro funt arrutus, in domu cosa insoru etotu, contras a is de sa Ferrini de Casteddu, chi eus arremonau pròpriu immubagora. In sa de otu bessidas, chi s'est giogada su tres de su mesi de Dònniassantu, is de su Taloro ndi funt arrutus, torra, in domu cosa insoru (po su disisperu de totus is tifosus, e si cumprendit su dannu a su coru ca ndi podit arriciri sa genti chi andat a su campu po sighiri sa partida), in sa isfida chi ant giogau contras a is tattaresus de su Li Punti (chi s'agatant a curri in su campionau de s'Ecellenza giai de una bella pariga de annus, e manigiaus su fueddu "pariga" a sa sarda, est craru). In sa de noi bessidas (chi s'est giogada su dexi de su mesi de Donniassantu), invècias, is de su Taloro nd'ant cassau un'antra bella surra (cumenti si iat a podi narai, mancai nesciunu in campu si siat pigau a corpus, si siat pigau a pari, cumenti si podit narai, e nci iat a mancai atru puru!, nc'aciungiu deu) de is de sa Monteponi de Bidd'e Cresia, chi nd'ant cassau is tres puntus cun su resultau, bellu e tundu tundu tundu, de tres a zeru. Su bintitres de su mesi de Dònniasantu, invècias, is de su Taloro de Gavoi ant pèrdiu torra in domu cosa insoru (de seguru no ant tentu bona sorti me is partidas chi ant giogau cust'annu aranti de is tifosus cosa insoru), contras a is de su Budune etotu (chi eus arremonau ainnantis, giai giai immubagora, e duncas seu seguru chi s'arregodais giai de issus, e megu a brullai, si cumprendit berus est?), chi funt, si ddu torru a arrapiti, una de is scuadras prus fortis chi ddoi funt cust'annu in su campionau de s'Ecellenza, fadendi su contu, pruschetotu, ca is de su Budune s'annu passau curriànt in su campionau de sa Sèrie D, e ndi funt cabaus cust'annu, torra, in su campionau de s'Ecellenza, e duncas si iat a podi narai ca su disìgiu de is dirigentis, e de is tifosus (po torrai cun sa chistioni de is disìgius chi apu arremonau ainnantis), est cussu, est craru e si cumprendit beni, de ndi torrai a artziai acoitu in su campionau de sa Sèrie D. 

E duncas, torrendi a is de su Taloru (torrendi a is contus chi pertocant is de su Taloro de Gavoi, po ddu narai mellus puru), ant pèrdiu sa partida cun su resultau de duus a zeru. Nudda de fai (est a nai, giorronada trota meda) puru in sa partida chi is de su Taloro ant giogau, in domu cosa insoru (torra cun sa maba sorti aranti de is tifosus cosa insoru!) contras a is caboniscus de is de su Tèmpiu (e ddus tzerriu, ddus tzerriaus caboniscus poita in su istemma, in su simbulu de sa scuadra ddoi est, pròpriu, est craru, unu caboniscu), cun sa isfida chi s'est serrada cun su resultau de duus a zeru po is allenus. E in sa bessida chi s'est giogada su catodixi de su mesi de Idas etotu, is de su Taloro de Gavoi ndi funt arrutus, puru, in domu de su Ilartzi, cun is grogus-arrùbius chi nd'ant cassau is tres puntus chi ddoi fiant badda badda in su pratu (cumenti si iat a podi narai, gioghendi unu pagheddeddu a fai su poeta), gràtzias a su resultau de duus a zeru. 

E custa est stètia, pròpriu, e innoi bolia arribbai, a custu puntu de sa chistioni (e gràtzias a Deus nci dda eus fata, s'at a megai calincunu de bosatrus, berus est?), s'ùrtima partida chi Antoniu Marinu at sighiu setziu in sa panchina de is de su Taloro, cumenti si iat a podi narai (e cumenti megu a narai, de su restu). Is dirigentis, duncas, ant scerau de donai is crais de sa scuadra a su segundu allenadori (vice allenadori, si iat a podi narai diaici, furendindi su fueddu de s'italianu etotu), es eus chistionendi de Massimiliano Pinna, chi s'annu passau (si ddu eis a arregodai de seguru, e chi no si ddu arregodais, intzandus nci pentzu deu) sighiat is fainas de is de su Tuttavista de Gartèlli, una scuadra chi currit in su campionau de sa Promotzioni, in sa Lista B. 
«Sa sociedadi de su Taloro de Gavoi – custus funt is fueddus chi agataus scritus in su comunicau uficiali – fait sciri a totus ca Antoniu Marinu no est prus s'allenadori de sa primu scuadra. Donaus is crais de sa scuadra, po immoi, a Massimiliano Pinna, ma podeus narai, puru, ca is dirigentis funt giai trabballendi po agatai un allenadori chi potzat sighiri sa scuadra po totu sa segunda parti de sa stagioni. Torraus gràtzias a Antoniu Marinu po totu su trabballu chi at fatu cun nosu e po sa scuadra cosa nosta e no podeus fai atru ca ddi augurai totu su mellus, totu su bonu possibbili po sa carrièra cosa sua». 

Est craru ca custu no est su modu mellus po nc'arribbai a una partida de importu mannu cumenti cussa ca is de su Taloro ant a depi giogai (s'arregodu ca ndi seu pesendi cust'artìculu su dexennoi de su mesi de Idas, a tres diis de s'ùrtimu fini de cida, prenu fintzas a cucuru de isfidas, ainnantis de su Nadali, e chi at a essi s'ùrtima bessida po su chi pertocat su duamilla e binticuatru), torra in domu cosa insoru, contras a is de sa Nuorese. 
E in dì de oi, no si sciit ancora chi is dirigentis de su Taloro ant a fai sciri su nomini de s'allenadori nou ainnantis de s'ùrtima partida de s'annu, o chi ant a preferri de abertai a arribbai a s'annu nou, cun cussus cuindixi diis de pàsiu chi iant a podi torrai bonus po scerai s'allenadori cun coru selenu, e cun sa passièntzia, e sa calma, ddi nau deu, chi serbit candu depis pigai una decisioni de importu diaici mannu. 
Fait a narai, puru, immoi chi nci seus, ca est pròpriu in domu cosa insoru ca is de su Taloro funt fadiendi de prus a ndi cassai is puntus, fadendi su contu ca apitzus de ses partidas, e duncas, cun dexiotu puntus in su pratu, funt arrannèscius a ndi cassai feti cuatru. E si cumprendit, duncas, ca candu is cosas andant mabi, su primu a pagai su contu est sèmpiri s'allenadori. E duncas, custu est pagu ma seguru, s'apa a fai sciri cumenti ant a andai is cosas in domu de is arrùbius-brau. 

Un antru allenadori chi no at acutu a papai su panetoni (cumenti si narat, est a nai ca, cumenti s'apu circau de spiegai ainnantis, custu est unu dìciu chi si manigiat candu un allenadori benit bogau de sa sociedadi ainanntis chi nd'arribit su Nadali, e duncas, ainnantis de sa fini de sa primu metadi de sa stagioni, e duncas, ainanntis de sa fini de sa lista de partidas chi ballint po s'andada, cumenti si iat a podi narai), e mi parit chi custa siat sa lega prus bona chi ndi podia cassai po s'artìculu de su bintises de su mesi de Idas (sa dì de Santu Stefi, po essi prus pretzisus puru), e cumenti si naru fatu fatu, cumenti si scoviu fatu fatu, no sciu mai cali arrastu apa a pigai, cali arrastu apa a sighiri po su chi pertocat s'articulu in sardu, ma est a nai, mellus, ca ddu scioberu pròpriu candu seu ponendumì a ddu scriri, e mancai bosatrus no nc'eis a crei. 

Duncas, un'antra scuadra chi at decìdiu de nci bogai s'allenadori chi teniàt est stètia cussa de sa Villacidrese, sa scuadra pesada, e sighida, in Biddacidru, de su presidenti Mateu Marrocu, ca currit in su campionau de sa Promotzioni, e mescamente in sa Lista A. 

E duncas, sa istoria de is de sa Villacidrese est unu pagheddu diferenti de cussa chi s'apu contau immubagora e chi pertocat a is de su Taloro, fessit puru poita su presidenti de sa Villacidrese at fatu bessiri aforas unu comunicau meda, ma meda prus longu de su chi ant fatu bessiri a pillu is de su Gavoi. E is fueddus chi at manigiau Mateu Marrocu mi parint prenus de passioni, ddi naru diaici, prenus de sa passioni chi unu presidenti tenit po s'assòtziu cosa sua; e cun custu no bollu narai, e nci iat a mancai atru puru, ca is de su Taloro de Gavoi no tèngiant sa passioni po s'assòtziu cosa insoru, po s'assòtziu chi sighint, ma su chi si bollu narai, e arribbaus a su puntu prus de importu de sa chistioni chi seu circhendi de pigai in consideru immoi, est chi su de nci bogai un allenadori, mancai seus feti e sèmpiri chistionendi de su giogu de sa bòcia, e duncas, de unu giogu, chi iat a depi essi unu spàssiu, primu de totu, po is piciocus chi ndi cabant in campu, e po is tifosus chi sighint is partidas, benit a essi una cosa marigosa, fadiosa, tostada, po primu po chini ca custa decisioni dda depit pigai, e duncas dda pigat; e seus chistionendi, est craru, de is presidentis de is assòtzius, de is scuadras. 

E duncas, eia, candu chistionaus de su giogu de sa bòcia in su mundu de is diletantis chistionaus, mescamente, de spàssiu, ma a sa fini, chi is resultaus bonus no nd'arribbant, cumenti si iat a podi narai, e si cumprendit beni, intzandus su spàssiu benit a essi pagu pagu meda. E duncas, custus funt is fueddus de Mateu Marrocu: «Mi dispraxit, diaderus, meda meda, e tèngiu su coru prenu de dabori, e si cumprendit, ma si bollu fai sciri ca apu serrau s'acapiu chi tenia, chi sa sociedadi cosa mia teniat, cun s'allenadori de sa primu scuadra, Renatu Incani. Po Renato tèngiu feti fueddus drucis, prenus de stima, de ingranzeu; est sèmpiri stètiu un amigu, cosa mia e de sa scuadra cosa nosta, e is cosas ant a abarrai diaici. Ddu apu tzerriau s'annu passau, candu sa scuadra curriàt in su campionau de s'Ecellenza, poita bolia chi fessit issu a sighiri sa scuadra cosa nosta, unu trabballu ca, ddu cumprendu a solu, no est stètiu facili, ma mancu po nudda, fadendi su contu de totus is strobbus chi eus tentu s'annu passau, e megu a chistionai, est craru, de sa stagioni de su duamilla e bintitres – duamilla e binticuatru. Issu at decìdiu, e ddi torru gràtzias, no potzu fai atru, est craru, de trabballai impari a sa scuada cosa nosta, po una isfida chi fiat tostada meda, e si cumprendit; at fatu su trabballu cosa sua cun sa seriedadi chi at sèmpiri tentu, cun gana bella, cun responsabbilidadi; e pròpriu po su trabballu, mannu meda e de importu, chi at fatu s'annu passau e chi est arrannèsciu a ndi pesai, eus decìdiu de sighiri cun s'acapiu chi tenestus puru po cust'annu, puru po sa stagioni de su duamilla e binticuatru – duamilla e binticincu. Mi dispraxit meda, ma su còmpitu chi tocat a unu presidenti, ddi nau diaici, est cussu de pigai decisionis tostadas e marigosas, ma custu si fait, est craru, po su beni de sa scuadra, po su beni de s'assòtziu. A bortas sucedit ca is cosas no andint beni, beni cumenti, mancai, bisàst a s'incumintzu de s'annu, e duncas s'unica cosa chi podeus fai est su de fai is contus e circai de aderetzai sa situatzioni, po su chi fait, po su chi podeus. E duncas, deu e totus is dirigentis chi trabballant impari a mei in s'assòtziu de sa Villacidrese, no podeus fai atru ca saludai a Renato Incani e ddi torraus gràtzias, custu est pagu ma seguru, po totu su chi at fatu po sa scuadra, po is piciocus de sa rosa cosa nosta. Seus segurus, de su restu, ca custu no est un adiosu, e seus segurus de su fatu chi nc'est su tanti po torrai a agatai un acapiu, un acòrdiu po su benidori, po trabballai torra impari». 

E duncas, Incani at dèpiu lassai sa scuadra apustis de is primus catodixi bessidas, e seu chistionendi, est craru, de sa stagioni de su duamilla e binticuatru – duamilla e binticincu, apustis de nd'essi cassau bintunu puntus (ca no funt pagus, e si cumprendit, chi fadeus su contu de su chi eus narau po su chi pertocat is de su Taloro de Gavoi, e fadendi su contu chi is de sa Villacidrese tenint a is pabas noi scuadras, ma funt stesiaus meda, fintzas tropu, fortzis, po is bisus de is de sa sociedadi, de is primus postus de sa lista), chi ndi funt arribbaus gràtzias a ses partidas bintas e a tres partidas chi si funt serradas cun su resultau in paridadi, cun cincu partidas pèrdias.




Attività realizzata col contributo della Regione Sardegna - IMPRENTAS 2023-2024. LR 22/2018, art. 22




Attività realizzata col contributo della Regione Sardegna - IMPRENTAS 2023-2024. LR 22/2018, art. 22