Candu una scuadra giogat in domu cosa sua currit prus a forti: andaus a cumprendi ita sucedit in sa conca de is giogadoris

E duncas, seus arribbaus a s'ùrtimu giòbia po su chi pertocat su mesi de ladàmini puru, e chi pròpriu si depu narai sa beridadi, no mi parrit nemmancu berus, e megu a chistionai de cumenti si nci bobat su tempus: e duncas, eia, su de dexi mesis de s'annu est giai giai a is pabas, e tra una pariga de diis nd'at a brintai unu de cussus duus-tres mesis (impari a gennàrgiu e martzu) ca, a su mancu po su chi mi pertocat, est tra is prus fadiosus. Ma de sa cosa, mancai (e megu a chistionai de is trumentus chi mi tocant, chi mi spetant, dònnia annu, in su mesi de donniasantu) nd'eus a chistionai mellus in su benidori. 

Po oi, duncas, no potzu fai atru ca andai a castiai, impari a bosatrus, cumenti funt andendi is cosas po su chi pertocat su tempus, est a narai su clima, chi est una de is legas chi pigu ainnantis de mi nci fuiai, a fundu 'e susu, cumenti si narat innoi in Bidd'e Sorris (chi est sa bidda innoi seu nàsciu e pàsciu, cumenti narat su dìciu), me is chistionis chi pertocant is campionaus de càlciu, e megu a chistionai de is campionaus pesaus de is de sa Federatzioni Italiana de su Giogu de su Càlciu e de is de sa Lega Natzionali de is Diletantis, chi sigheus cun su giàssu de su Diàriu Sportivu, e duncas, po essi prus pretzisus puru, megu a chistionai de su campionau de sa Sèrie C (chi sigheus poita ddoi currint, chi mi permiteis de ddu narai diaici, chi mi permiteis de manigiai custus fueddus, is tattaresus de sa Torres), de su campionau de sa Sèrie D, e mescamente sa Lista G (chi est cussa innoi currint in scuadras sardas, a partiri de is de su Muristeni, passendi po is de su Budoni, is de su Latte Dolce, e fintzas a arribbai a is de sa Cos Sarrabus-Ollastra), po arribbai a is campionaus chi pertocant feti is scuadras sardas (fadendi su contu ca me is campionaus de sa Sèrie C e in su campionau de sa Sèrie D, cumenti eis a sciri beni, cumenti s'eis immaginai a solus, currint is scuadras de is atras regionis puru), e megu a chistionai, intzandus, de su campionau de s'Ecellenza, de cussu de sa Promotzioni, de sa Primu e de sa Segunda Categoria puru (de su campionau de sa de Tres Categorias, invècias, no arrannèsceus a ndi chistionai cumenti, invècias, estus a bolli fai, e mescamente po una chistioni acapiada a su tempus, a duncas a su tempus chi no teneus e chi no si bastat mai. Ca chi fessit po mei, ia a trabballai po su giàssu de su Diàriu Sportivu po calincuna cosa cumenti a corantotu oras a sa dì, ma mi dispraxit ca in una dì nci capant feti binticuatru oras, chi mi permiteis de brullai unu pagheddeddu). 

E duncas, eia, fadendi su contu ca in custas ùrtimas duas-tres cidas, chi pròpriu si depu narai sa beridadi, mi seu strollicau fortzis prus de su chi mi spetàt (e megu a chistionai, est craru, de is artìculus chi ndi pesu po is Novas e chi ndi bessint aforas dònnia dònnia giòbia), intzandus po oi andaus a castiai feti cumenti funt andendi is cosas po su chi pertocat su clima (cumenti s'apu arremonau immubagora, de su restu): e duncas, eia, fait a sighiri a narai ca su tempus megat a essi bonu (megat a fai a bonu, chi mi permiteis de ddu narai diaici puru), fadendi su contu ca sa temperadura massima sighit a nci spundi (chi est unu de cussus fueddus chi mi funt sèmpiriu praxius fintzas a m'amachiai) fintzas a bintitres-binticuatru gradus (est a narai, duncas, ca a su mengianu e a su megama nc'est ancora una bella basca, unu bellu callenti, e fait ancora prexei, ddi naru diaici, a abarrai a maigas crutzas, mescamente chi ses in foras, e mescamente chi depis trabballai); po su chi pertocat is temperaduras minimas, invècias, funt incumintzendi a ndi cabai fintzas a doxi-undixi gradus; est a narai duncas ca est incumintzendi a fai una bella friscura, e mescamente apustis chi ndi cabat su sobi e scurigat, e mescamente me is primus oras de su mengianeddu, fadendi su contu ca arrachedit de si imbussai cun una giaca; ma no nc'est nudda de si spantai, e nci iat a mancai atru puru, fadendi su contu ca s'atonzu est brintau de calincuna cosa cumenti a trinta diis fait, e duncas chi fadeus su contu ca fintzas a una pariga de cidas fait festus giai giai po si scallai de sa basca (cumenti si narat), fadendi su contu ca seus arrannèscius a si lassai a is pabas una de is istadis prus bascosas de totu sa storia de s'omini in custa terra, intzandus mi benit a narai ca eus a podi sumportai unu pagheddeddu de friscura puru, antzis, fortzis mi speddiat puru, chi pròpriu si ddu depu narai, e megu a chistionai de mei, e si cumprendit, poita po su chi pertocat bosatrus no ddu sciu e no ddu potzu benni a sciri. 
Po su chi pertocat custu fini de cida chi est arribendindi, nci iat a depi essi unu bellu sobi (e custa benit a essi una cosa bona meda po is giogadoris chi nd'ant a depi cabai in campu po giogai is partidas) e si iat a podi narai ca custas funt is cunditzionis (po ndi furai su fueddu de s'italianu etotu) prus togas po giogai a bòcia: no nc'est nè tropu basca ma nemmancu diaici frius cumenti at a fai, mancai, in s'ierru; e in prus, no ponit bentu (e megu a chistionai de is previsionis, manigendi su modu de narai chi apu sèmpiri intèndiu innoi in bidda; ca candu sa genti chistionat de is previsionis de su tempus, si megat: at postu, chentza de su sogetu; at postu acua, at postu bentu, at postu nì po custu sabudu. E custu ddu megu a narai po si fai un esèmpiu, diaici fadeus unu pagheddeddu de grammatica, ca mabi no s'at a fai). 

E megamu a si narai ca po custu fini de cida is temperaduras minimas nd'ant a cabai fintzas a undixi gradus (po su chi pertocat su cenabara) e fintzas a noi gradus (e incumentzant a essi pagus, berus est?) po su chi pertocat su sabudu e su domìnigu; ma su frius deu no ddu timu (est a narai ca fortzis timu de prus sa basca manna), fadendi su contu ca po cust'annu puru apun giai pigau unu bellu pagheddeddu de linna (unu bellu tanti de linna, si iat a podi narai diaici puru, ca fortzis sonat mellus), e su de fai su fogu est una de is cosas chi mi praxint de prus, fintzas a m'amachiai; e nc'est su tanti po crei, po pentzai ca in custa vida, po su chi m'abarrat de bivi, po su tempus chi su Cielu m'at regalai, no apa a abarrai mai prus chentza de su fogu. 

E duncas, eia, deu seu seguru ca nci dda apa a fai (e nci dda eus a fai, ddi naru diaici chi in sa truma nci pongiu, nc'aciungu bosatrus puru) a nci lompi a sa primu dì de su mesi de donniasantu, chi at a essi (cumenti eis a sciri giai, e cumenti s'apu giai narau), de domìnigu; e duncas, eia, su mesi de dònniasantu s'at a oberri, at a incumentzai cun una bella passada de partidas, po su prexu de totus is tifosus e de totus is piciocus chi ndi cabant in campu po curri avatu de sa bòcia. 

E duncas, eia, immoi s'at a tocai (si spetat, cumenti si narat) a fai sa festa po totus is santus e po totus is mortus; e no sciu cumenti si pigat custa festa, ma a mei, est craru, mi ponit unu pagheddeddu de tristura (o de tristesa, cumenti si iat a podi narai puru; e duncas, eia, teneus duus fueddus po chistionai de sa pròpriu cosa; antzis, a narai sa beridadi ia a podi manigiai puru su fueddu "amargura", chi no apu mai intendiu, a si narai sa beridadi, ma ddu apu agatau in su fueddàriu; e su fueddàriu mi consillat ca ia a podi manigiai puru su fueddu "anneu", chi torrat e chi ballit sèmpiri po chistionai de sa tristura. E diaici eus fatu unu pagheddeddu de grammatica puru, ca mabi no at a fai de seguru), ma est una amargura druci, chi mi permiteis de ddu narai diaici, poita, a sa fini, su de biri su campusantu totu cuncodrau, cun una biga manna de froris, benit a essi una de cussas cosas chi faint beni a su coru (e no feti a is ogus); mancai peròu in campusantu sa genti ddoi andat, po su prus, a prangi po sa genti chi no nc'est prus. 
E duncas, po su chi mi pertocat, m'at a tocai a fai unu giru, ddi naraus diaici, de is amigus chi no nci funt prus, chi no s'agatant prus in custu mundu, e chentza de mi ndi scaresci, e nci iat a mancai atru puru, de sa bon'anima de mamma mia, de is ajajus cosa mia, mancai su de andai a ddus agatai in campusantu siat una cosa chi fatzu giai gioai dònnia cida (a su mancu me is cidas innoi seu in bidda), e no feti duncas po sa dì de is mortus. 
E duncas, apa a circai de mi bivi is festas chi nd'ant a arrui custu fini de cida cun su coru lèbiu, circhendi de nd'agatai totu su bonu de dònnia segundu ca su Cielu m'at a regalai; ca de su restu, e sa cosa andat ainnantis diaici de candu seu unu pipiu, in custas diis (e megu a chistionai de is ùrtimas diis de su mesi de ladàmini) mi parrit ca nci siat una bella luxi, ddi naru diaici, chi cumprendeis su chi seu circhendi de si contai. 
Duncas, in custas ùrtimas diis de su mesi de ladàmini, est cumenti chi su mundu siat prenu de una poesia druci e marigosa in su pròpriu tempus; e sa vida etotu (po serrai sa chistioni a trassa de cumenti iat a podi fai unu poeta, prus ca unu giornalista sportivu) benit a essi una chistioni druci e marigosa in su pròpriu tempus. 
E s'ùrtimu pensu, po oi, ddu ollu fai po unu piciocu chi no connòscia, ma chi fiat unu collega de s'amigu miu chi bivit a Milanu, e chi trabballat ingunis, e chi m'at contau su chi est sucèdiu: e duncas, eia, po si fai a cumprendi de cantu sa vida est tonta, e marigosa, a bortas, si potzu contai ca custu piciocu, ca teniat feti trintatres annus, fiat torrendi a domu sua, a Milano, impari a sa pivella, e depiànt pigai unu trenu de Verona, apustis de nd'essi lompius de Venezia, innoi fiant po si fai una passillada; e duncas su trenu chi depiant pigai, mancai fessit una coincidèntzia (diaici tzerriaus is trenus chi partint, chi iant a depi partiri apustis, e feti apustis, chi nd'arribbat un antru), candu funt arribbaus a su binàriu fiat giai movendusì, est a narai ca fiat giai partiu; e duncas custu piciocu at pentzau beni (ddi naru diaici mancai sa pentzada chi at tentu, sa bidea chi at tentu, no siat stètia bona meda) de si ponni a curri po circai de frimai su trenu etotu, e fiat batendi e pistendi cun is manus apitzus de is imbirdis de is fentaneddas de su trenu, candu (ddu scieis beni e fortzis mellus de mei puru cantu podit essi tonta sa vida, si ddu torru a arrapiti) est lisciau e, no nc'eis a crei, est arrutu asuta de is arrodas de su trenu chi ddu ant totu trebau, aranti de sa picioca cosa sua etotu; e duncas funt arrannèscius a ddu portai a s'uspidali, ma stadiat mabi meda e duncas no nc'est stètiu nudda ca is dotoris ant potziu fai po ddi sarvai sa vida, cumenti si narat. E paxi a s'anima sua. Chi est s'ùnica cosa de futu chi mi benit de narai.
E duncas, eia, seu contendusì totu custu po arraxonai apitzus a su fatu ca seus apicaus a custa fida cun unu filixeddu de oru (cumenti narant is sàbius), e nci bollit pagu e nudda po segai custu filu; e candu sucedint cosas diaici chistionaus de disgràtzias, e candu sucedint cosas diaici, intzandus si nd'arregodaus de cantu seus piticheddus, de cantu balleus nudda, est a narai zeru, aranti a sa morti. 
E sa pròpriu cosa dda cumprendeus candu nd'arribbat, mancai, su tempus malu, e ddu cumprendeus candu su tempus malu fait dannus, cumenti est fadendi, de su restu, innoi in Italia e in atras partis de s'Europa puru (e mancu malli ca, a cantu parrit a su mancu, e a su mancu po immoi, innoi in Sardìnnia no at fatu arroris). 
E fortzis in custas ùrtimas diis de su mesi de ladàmini, estus a podi pentzai (cuncodru su verbu diaici, chi no si dispraxit tropu) a totus is personas ca, sciadadas, no funt prus in custu mundu, ma estus a depi torrai gràtzias (mancai in sa dì innoi fadeus sa festa po totus is santus) po essi ancora in peis, e in saludi, chentza de si ndi scaresci de totus cussas persdonas ca in dì de oi funt serradas (depint abarrai serradas, po ddu narai mellus puru) me is aposentus de is uspidalis; chi potzant tenni sa passièntzia de sumportai su chi si depint bivi, est a narai, sa mobadia, diaici cumenti su Cielu potzat donai a mei etotu sa passièntzia po sumportai totus is diis chi abarrant unu pagheddeddu trotas, totus is diis innoi is cosas chi ndi pesu no mi bessint pròpriu deretas, po totus cussas diis (e no funt pagus aintru de un annu, e si cumprendit, torra, de cumenti andat sa vida: a bortas beni meda, atras bortas unu pagheddeddu peus) innoi mi parrit, giai giai, ca custu mundu mi bollat trebai cun is peis (cumenti naràstus de piciocheddus piticus; cumenti apu sèmpiri intèndiu narai innoi in Bidd'e Sorris, a su mancu), e a bortas parrit pròpriu chi nc'arrannèsciat puru, a mi trebai cun is peis. 

E duncas, si potzu narai, 'tendei 'tendei, ca po custa cida puru apu spaciau is contus, is contixeddus e is strollichiminis chi tenia badda badda in conca, e immoi, eia, si potzu chistionai unu pagheddeddu de bòcias, de partidas e de resultaus puru (e fiat ora, s'at a megai calincunu de bosatrus, berus est?), circhendi de fai su giogu chi seu costumau a fai, e chi est cussu de circai, e de agatai, calincuna letzioni de importu, tra totus is novas chi nd'arribbant de is campus innoi si giogant is partidas, e chi potzat balli po sa vida cosa nosta de dònnia dì.
E duncas, deu ia a incumentzai cun sa lega acapiada a is partidas e a is resultaus chi ndi funt pesendi is de sa Torres, andendi a biri, po primu cosa, cumenti funt postus in sa lista de sa Sèrie C (chi est una cosa chi no castiu, chi no sigu fatu fatu, a su mancu po su chi pertocat is Novas chi ndi bessint aforas su giòbia e chi ndi pesu, chi scriu in su sardu chi si fueddat innoi in su Campidanu de mesu). 
E duncas, eia, is tattaresus in dì de oi, s'agatant a su de cuatru postus in sa lista B de su campionau de sa Sèrie C, e tenint allogaus in buciaca calincuna cosa cumenti a dexiotu puntus, chi funt su pròpriu tanti de puntus chi tenint is de su Vado Football Club (diaici si tzerriat sa scuadra, chi est de sa Liguria, po essi pretzisus cumenti iat a depi essi unu giornalista candu bollit fai beni su trabballu cosa sua); e duncas, eia, is de sa Torres in dì de oi tenint undixi puntus in mancu de is chi tenint is primus de sa lista, e megaus a chistionai de is de su Spezia Calcio, ma funt a cincu puntus (ddi naru diaici) de is segundus de sa classi (chi mi permiteis de manigiai custu fueddu), chi funt is de su Ravenna Football Club. Eia, eis lìgiu beni: torra cun su nomini de sa scuadra chi abarrat po metadi in italianu e po s'atra metadi in ingresu; e chi pròpriu si ddu depu narai fait unu pagheddeddu de spantu su de benni a biri ca s'ingresu est brintau in sa vida cosa nosta, e duncas fintzas me is nominis de is scuadras; e duncas no nc'est nudda de mabi a chistionai s'ingresu puru, impari a s'italianu; peròu benit a essi una cosa trista, a su mancu a mei parrit diaici, a mei parrit de podi narai diaici, su de chistionai, mancai, prus s'ingresu (fadendi su contu ca, mi parrit bastanti craru, nosu no seus ingresus), de su sardu, chi est invècias sa lingua chi chistionant (o chistionànt, cun su verbus a su passau) is sardus e duncas, eia, sa genti chi bivit, cumenti a mei etotu, in s'isula de Sardìnnia. 

E duncas, torrendi a nosu e a su campionau chi ndi funt pesendi is de sa Torres, in dì de oi, apustis de calincuna cosa cumenti a undixi partidas giai giogadas (si ia a depi arregodai ca su campionau de sa Sèrie D est su chi incumentzat prus chitzi, impari a su campionau de sa Sèrie A e de sa Sèrie B, fadendi su contu ca is campionaus regionalis sardus, e megu a chistionai mescamente de su campionau de s'Ecellenza e de su campionau de sa Promotzioni, funt arribbaus a sa de seti giorronadas e immoi, in custu fini de cida chi s'at a fai brintai in su mesi de donniasantu, ant a depi gogai sa de otu partidas), is arrùbius-brau tenint feti cuatru puntus in mancu de is chi tenint is de su Grosseto, chi s'agatant a su de tres postus in sa lista. 

E duncas, eia, si iat a podi narai, puru, ca is cosas a is de sa Torres no ddis funt andendi mabi, antzis, e po du cumprendi mellus puru podeus andai a castiai is numerus chi nd'ant pesau: e duncas, apitzus de undixi partidas chi ant giai giogau, is piciocus sighius de Greco (chi est, mi parrit bastanti craru, s'allenadori de is tattaresus) ant bintu po cincu bortas, e po tres bortas funt arrannèscius a serrai sa partida cun su resultau siddau in paridadi; e de su restu (po serrai sa chistioni) tres funt, puru, is partidas chi ant pèrdiu, a su mancu fintzas a immoi. 

E chi seis de acòrdiu cun mei (e feti chi seis de acòrdiu cun mei) podeus andai a castiai, mellus puru de cumenti eus fatu, cumenti ddis funt andadas is cosas in custus primus tres mesis de giogus: e duncas, po su chi pertocat su tanti de gol chi ant fatu e chi ant incasciau, trexi funt cussus chi ant fatu a is aversàrius, e doxi funt cussus chi nd'ant dèpiu incasciau, chi nd'ant ingotu, chi nd'ant bodditu. 
De is cincus partidas chi ant bintu, si potzu narai ca is de sa Torres ant cassau is tres puntus me is isfidas chi ant giogau in domu cosa insoru, e duncas in Tattari: sa primu partida chi ant bintu est arribbada a sa segunda bessida, contras a is de sa Sambenedettese, cun su resultau de unu a zeru; sa segunda partida chi ant bintu s'est giogada su trexi de su mesi de Cabudanni (chi fiat sa dì innoi funt torraus a partiri is giogus de s'Ecellenza e de sa Promotzioni puru, tra is atras cosas), e chi balliàt po sa de cuatru giorronadas, contras a is allenus de s'Ostiamare (una de is scuadras chi nd'arribbant de su Laziu); sa giorronada apustis, chi fiat su sexi, e duncas, eia, megaus a chistionai de una partida chi s'est giogada aintru de sa cida (chi fessit po is giogadoris, po is allenadoris e po is tifosus puru, is scuadras iant a giogai a bòcia mancai dònnia dì, cumenti sucedit giai giai a is grandus scuadras chi currint in su campionau de sa Sèrie A, chi est cussu prus mannu, su de importu prus mannu tra totus cussus chi si giogant innoi in Italia), is de sa Torres funt arrannèscius a binci torra (po sa segunda borta de sighiu, chi est una cosa chi no ddis est prus capitada, a su mancu fintzas a immoi), cun su resultau de duus a unu, contras a is de sa Pianese. A sa de seti giorronadas, chi nd'est arruta (ddi naru diaici) su bintiseti de su mesi de Cabudanni, is de sa Torres si funt dèpius acuntentai de ndi cassai e de si ponni in buciaca feti unu puntixeddu, fadendi su contu (e a fai is contus nci poneus pagu meda) ca sa partida contras a is de su Vado Football Club 1913 s'est serrada cun su resultau de zeru a zeru. E is de sa Torres funt stètius bonus a binci in sa partida chi balliat po sa de noi giorronadas, e chi s'est giogada s'undixi de su mesi de ladàmini, cun su resultau de duus a unu, contras a sa scuadra de s'Atalanta (e no seus chistionendi de sa scuadra manna, chi cumenti eis a sciri beni currit in su campionau de sa Sèrie A e giogat puru is partidas chi ballint po sa Cupa UEFA Conference League; e innoi puru teneus su nomini amesturau a is fueddus ingresus, po torrai a s'apicai a su chi s'apu narau ainanntis), e seus chistionendi duncas, e mescamente, de sa scuadra pesada cun is giogadoris de s'Atalanta chi no tenint, peròu, prus de bintitres annus (eia, seus chistionendi, duncas, de sa scuadra ca, in ingresu, e torra s'ingresu, tzerriaus Under 23); e in s'ùrtima partida chi ant giogau, est a narai in s'ùrtima bessida, is de sa Torres funt arrannèscius a binci puru contras a is de su Guidonia Montecello 1937; e fait a narai, puru, duncas, ca sa parti prus manna de puntus is de sa Torres dda ant cassada me is partidas chi ant giogau in domu, fadendi su contu ca, apitzus de is cincus partidas chi ant giogau in domu allena, nd'ant pèrdiu tres e po duas bortas feti funt arrannèscius a torrai agoa, in Tattari, cun unu puntixeddu in buciaca. 
E si iat a podi narai, po serrai sa chistioni acapiada a is de sa Torres, ca cust'annu is cosas no ddis funt andendi mabi, antzis; nareus ca in domu si faint balli, e meda puru, ma immoi iant a depi circai de ndi pesai calincunu puntixeddu puru me is partidas chi giogant aforas de s'isula, e sèmpiri chi bollint sighiri a curri po ndi cassai is primus postus de sa lista e duncas, eia, po abarrai a su passu de is scuadras prus fortis chi ddoi funt in su campionau de sa Sèrie C. Ma chi fadeus su contu ca is de sa Torres s'annu passau fiant giai giai po ndi cassai sa cabada de categoria (fadendi su contu ca sa scuadra arrùbia – brau at serrau sa stagioni a su de dexesseti postus in sa lista, cun trintases puntus allogaus in buciaca, cun sa sarvesa chi est arribbada feti apustis de is duas partidas ca is tattaresus ant giogau, a sa metadi de su mesi de maju, contras a is de su Bra) immoi eus a biri ita totu ant a essi bonus a ndi bogai aforas cust'annu. 

E duncas, su chi potzu aciungi apitzus de su chi s'apu giai narau fintzas a immoi, su chi si potzu narai po serrai sa lega chi pertocat is de sa Torres, est ca ant bintu s'ùrtima partida, est a narai cussa chi ant giogau contras a is de su Guidonia, mancai tenessint una bella pariga de giogadoris, de importu mannu puru, tra is atras cosas, mesu strupiaus: e seus chistionendi de Di Stefano, chi est unu de is atacantis prus fortis chi tenint in sa rosa de cust'annu, e de Kebbe, chi est, invècias, unu difensori. 

E duncas, eia, is de sa Torres, gràtzias a custa bìncida, funt arrannèscius a si lassai a is pabas sa surra, e megu a chistionai de sa partida chi ant pèrdiu sa cida ainnantis, in domu de is de sa Reggiana. 
E deu no sciu poita una scuadra arrannèscit a curri prus a forti me is partidas chi giogat in domu: at a essi ca no nc'est su viàgiu de fai po andai a giogai in domu allena; e fadendi su contu ca in su campionau de sa Sèrie C currint scuadras chi nd'arribbant de dònnia regioni, intzandus nc'arribbais bosatrus puru a cumprendi ca su viàgiu no benit a essi facìli e antzis, iat a podi essi fadiosu e trumentosu meda. Mancai, si iat a podi narai custa cosa puru immoi chi nci seus, is cosas fadiosas in custa vida benint a essi atras, e de seguru su de depi viagiai po andai a giogai a bòcia no benit a essi un arrori, o unu dannu diaici mannu cumenti invècias iat a podi essi cussu de depi viagiai po trabballu o peus puru, po una visita cun su dotori.
E no sciu chi a fai sa diferèntzia tra is partidas chi giogas in domu cosa tua e cussas chi depis giogai in domu allena siat su tifu ca ti nd'arribbat de is tifosus cosa tua, ca candu giogas in domu, mancai, ndi cabant a su campu in truma manna, e sa pròpriu cosa no si podit narai, invècias, po is partidas chi giogas in domu allena, mancai nci siat sèmpiri calincunu tifosu (chi benit a essi machillotu meda, e si cumprendit ca serbit passioni po sighiri sa scuadra de su coru cosa tua, mancai feti po fai su tifu) chi arrannèscit a sighiri sa scuadra puru me is trasfertas (po furai su fueddu de cumenti si narat in italianu etotu), mancai totus is strobbus ca nci funt de sumportai.

E nc'est de narai, puru, ca nci funt campus chi funt prus callentis (cumenti seus costumaus a narai) de atrus; e mi benit in conca, immoi chi ndi seu arrexonendi impari a bosatrus, ca po su chi pertocat sa Sardìnnia is campus prus callentis funt cussus innoi giogant is partidas is scuadras ollastrinas e is scuadras de sa Barbagia (o Brabagia, cumenti naraus in Bidd'e Sorris); e mi benit in conca su chi m'at contau, de pagu, at a essi una o duas cidas fait, s'allenadori de is de s'Ovodda (ca, po chini no ddu sciit, est una scuadra chi currit in su campionau de sa Promotzioni, in sa Lista B), Giorgiu Ferraro, ca m'at narau ca is scuadras de cussa zona etotu funt costumadas a ndi cassai is puntus chi serbint po sa sarvesa (e duncas, eia, po abarrai po un antru annu in su pròpriu campionau, chentza de ndi cabai de categoria) me is partidas in domu cosa insoru; e deu no sciu chi siat po su budrellu, po su carraxiu chi faint, chi ndi pesant is tifosus, de su primu segundu de sa partida fintzas a candu sa isfida no acabbat, e chi benit a essi unu strobbu mannu po is giogadoris aversàrius; o chi siat poita, candu giogant aranti de is tifosus cosa insoru, is piciocus chi ddoi funt in campu est cumenti chi currant meda ma meda de prus de su chi faint me is partidas chi giogant aforas de domu; cumenti chi candu giogant aranti de is tifosus cosa insoru nci ghettint aforas, in su campu, fintzas a s'ùrtimu stìddiu de sudori, fintzas a s'ùrtimu stìddiu de sangui chi tenint in cropus. 
E duncas, si cumprendit beni su prexu chi nd'ant tentu is tifosus e is giogadoris de is de su Deximu 07, chi est sa scuadra chi nd'ant pesau in Deximumannu calincuna cosa cumenti a bint'annus fait (su zeru e su seti chi tenint, chi nc'ant postu in su nomini de s'assòtziu pertocat pròpriu s'annu innoi est nàscia sa scuadra, ddi naru diaici isperendi ca si potzat cumprendi su chi seu circhendi de si narai), e chi pròpriu in s'ùrtima bessida, in sa partida chi s'est giogada in custu ùrtimu fini de cida passau (e megu a chistionai de su domìnigu chi fiat su binticincu, diaici mancai si cumprendeus a pari mellus puru), funt arrannèscius a binci in domu de is ollastrinus de su Cardedu, a s'ùrtimu segundu de giogu, po su chi pertocat su campionau de sa Primu Categoria. 

E duncas, po torrai a is de sa Torres, est in domu cosa insoru, est a narai a su Vanni Sanna (diaici si tzerriat su campu), ca ant a circai de ndi pesai is partidas, e is resultaus prus togus e prus bonus. 
E est cussu chi ddis auguru, e chi ddis auguraus totus, fadendi su contu ca estus a depi fai su tifu po totus is scuadras sardas chi s'agatant a curri, a giogai contras is scuadras chi nd'arribbant de is atras regionis. 

E si cumprendit, intzandus, totu su prexu chi nd'at tentu s'allenadori de is de sa Torres, e megu a chistionai de Alfonsu Greco, ca at contau a is giornalistas chi iat domandau a is giogadoris cosa sua de nci ghetai su coru in campu, cumenti si narat, fadendi su contu, pruschetotu, ca is de sa Torres tenint una bella pariga de giogadoris ca funt ingotus e no podint curri po is partidas; e sa chistioni de is infortunus (ddi naraus diaici, furendindi sa trassa de cumenti si narat in italianu etotu) benit a essi de importu mannu, e si cumprendit beni: tui podis tenni sa rosa prus toga, pesada cun is giogadoris prus fortis chi ddoi funt in cussa categoria, ma a sa fini chi is giogadoris dda acabbant strupiaus o ingotus e depint sartai unu bellu tanti de partidas, intzandus is cosas benint a essi prus tostadas, prus dificilis. E in su giogu de sa bòcia ballit sa pròpriu cosa chi si tocat a fai in sa vida de dònnia dì: candu is cosas ti andant mabi, candu sa bia innoi ses currendi benit a essi in artziada (cumenti si narat a trassa de s'italianu etotu, chi mi cumprendeis po su chi seu circhendi de si narai) intzandus no podis fai atru ca t'arramangai is manigas e circai de ndi bogai aforas totu sa gana, totu s'afròddiu, totu sa fortza chi tenis. 

E duncas, eia, Greco est abarrau prexau, prexau meda, po sa partida chi funt stètius bonus a ndi pesai is giogadoris cosa sua, e no feti po su chi ant fatu cun is peis, po is giogadas togas meda chi ddis funt bessidas aforas, ma mescamente po sa manera chi ant tentu de cumbati apitzus de dònnia palloni, cumenti si iat a podi narai. E duncas, est totu sa scuadra chi s'est fata balli in una de is partidas prus dificilis ca is tattaresus ant giogau fintzas a oi, a su mancu in custus primus duus – tres mesis de campionau, e no feti unu giogadori, cumenti a bortas podit sucedi: ca nci funt domìnigus innoi, mancai, sa scuadra no arrannèscit a giogai beni cumenti sciit, cumenti podit fai, ma mancai ndi cassat sa bìncida etotu gràtzias a sa giogada de unu giogadori. Contras is de su Guidonia, invècias, is tattaresus si funt fatus balli, e meda puru, chentza de sballiai giai nudda, e chentza de donai sa possibbilidadi e s'ocasioni a is aversàrius de ndi cassai su gol. Po Greco, duncas, cussa chi nd'est arribbada domìnigu est stètia una de is bìncidas prus togas e prus de importu tra totus cussas chi nd'ant cassau fintzas a oi. E de su restu, candu t'agatas a annadai in acuas lègias e no bonas (cumenti mi naràt sèmpiri su babbu de unu cumpàngiu miu chi tenia a is tempus de is scolas elementaris), depis circai de essi forti, meda prus forti de su chi mancai ses in su fetianu, e sa chistioni ballit po mei puru, mancai deu no sia unu giogadori de bòcia, e mancai sa chistioni podit balli po bosatrus puru: nci funt diis trotas, innoi mi parrit ca no mi bessat nudda de bonu tra totus is cosas chi circu de fai, ma est pròpriu in cusatas diis ca teneus sa possibbilidadi de imparai sa cantidadi prus manna de cosas, apiutzus de nosu etotu, po incumentzai (e megu a chistionai de s'abbilidadi chi teneus de aguantai, de sumportai is dannus e is arroris, mancai a solus, mancai chentza de is atrus chi s'agiudant); e est pròpriu candu is cosas si faint dificilis ca, intzandus, teneus sa possibbilidadi de benni a essi ancora prus fortis, o a su mancu, is cosas iant a depi andai diaici. 

E de su restu, nci funt medas giogadoris, in campu, ca arrannescint a giogai mellus puru de su chi faint, candu is tifosus aversàrius ddus pigant a tzerrius o, peus puru, a fueddus malus. Ca cumenti si narat in italianu puru, is giogadoris fortis si biint candu is cosas si ponint mabi e, intzandus, nc'est de nci ghetai su coru in campu; e de su restu, cumenti narat su dìciu, si biit e si cumprendit chi su capitanu de sa navi est abbili candu su mari si inchietat, e no candu su mari est selenu. 
E duncas, eia, est cun sa gana bona, cun su trabballu, a partiri de is allenamentus, cun sa fortza chi tenis aintru de su coru po abarrai in peis, chi arrannèscis a ti lassai a is pabas is periodus prus nieddus. Est sa fidùcia chi tenis apitzus de tui etotu, apitzus de is cosas chi sciis fai, chi ti bessint mellus, ca benit a essi una de is cosas de importu prus mannu, no feti po su chi pertocat su giogu de sa bòcia, ma puru po sa vida chi si depeus scroxai dònnia dì (mancai nci siat calincunu chi narat, puru, ca chentza de sa gràtzia de Deus, in custa vida, no estus a arrannèsci a arribbai de nesciuna parti, e sèmpiri chi arrannèsceis a sighiri su chi seu circhendi de si narai). 

Po Greco, duncas, is piciocus cosa sua ant giogau una partida de importu manna, fortzis una de is partidas prus togas de candu est incumentzada sa stagioni de su duamilla e bintises – duamilla e bintiseti. Micheli Carboni, chi est stètiu su chi nd'at cassau unu de is duus gol chi funt sèrbius po binci sa partida e po ndi cassai is tres puntus, at contau ca, eia, is giogadoris chi ddoi fiant in campu nc'ant postu prus de su centu po centu, cumenti si narat, de su chi teniant. E sa scuadra de is aversàrius, e megu a chistionai de is de su Guidonia, fiat forti meda, e duncas si cumprendit ca su resultau ca is tattaresus nd'ant cassau ballit a trassa de s'oru, cumenti si iat a podi narai. Carboni, de su restu, est unu piciocheddu tra is prus giòvunus tra cussus chi ddoi funt in custa stagioni in sa rosa de is de sa Torres, e est abarrau prexau meda de essi arrannèsciu a donai una bella manu de agiudu a is cumpàngius cosa sua e a sa scuadra cosa sua: Carboni, est craru, fadendu su contu ca est unu de is prus giòvuneddus, fatu fatu meda depit abarrai sètziu in panchina, e brintat in campu feti candu serbit, feti candu s'allenadori pentzat ca potzat essi arribbau su momentu cosa sua; domìnigu invècias, nd'est cabau in campu de su primu minudu, e sa cosa prus toga chi podit sucedi, chi podit capitai a unu giogadori, est cussa de si fai agatai prontu, cun gana bella e in saludi, candu s'allenadori decidit de ti mandai in campu a giogai. E diaici ddi funt andadas is cosas. Unu no si iat a depi arrendi mai, at scoviau Carboni a totus is giornalistas chi ddoi fiant po ndi pesai is intervistas apustis chi est acabbada sa partida; est craru ca candu ti capitat s'ocasioni de fai a biri cantu ballis, intzandus no iast a depi sballiai; e po no sballiai, est craru, serbit a nci ponni totu su coru, totu s'impignu chi podis.


Attività realizzata col contributo della Regione Sardegna. IMPRENTAS 2025-2026. LR 22/2018 art. 22