Is giogus torrant a partiri apustis de is festas e is ispantus no funt stètius pagus de seguru

E duncas, de su chi ndi potzu cumprendi (e de su chi ndi potzu cumprendi, mescamente, castiendi su tialu de su calendàriu) seus arrannèscius, po custu giru de giostra puru (e ddu naru diaici, si imboddiu sa chistioni diaici, gioghendi, mancai, a fai su poeta prus ca su giornalista), a si lassai a is pabas no feti is festas de su Nadali, no feti is festas acapiadas a sa brintada de s'annu nou (est a nai, duncas, ca seus arrannèscius a saludai su duamilla e binticuatru e a arriciri, cun su coru prenu de isperas, cumenti si fait, de su restu, su duamilla e binticincu, e immoi eus a biri cumenti ant a andai is cosas) e, duncas, si seus lassaus a is pabas puru is festas acapiadas a sa Befana (o a is Tres Reis, chi si praxit de prus cumenti sonat). E duncas, immoi no m'abarrat atru de fai, chistionendi sèmpiri de festas, de abertai su sexi e su dexesseti de custu mesi etotu (seu chistionendi de su mesi de Gennàrgiu, si cumprendit, berus est? E megu unu pagheddeddu a brullai cun bosatrus, ca s'annu nou, a cantu parit, m'at portau, m'at lassau in su coru sa gana de brullai e de arriri unu pagheddeddu, ma unu pagheddeddu feti, cun bosatrus), candu at a partiri su carrasciali in Sardìnnia (no sciu me is atrus logus de Italia, a nai sa beridadi, cumenti funtzionat, ma po su chi pertocat s'isula bella e stimmada cosa nosta, scieus, e beni puru, ca atacaus cun is isfiladas de is maschereddas, cumenti ddas podeus tzerriai, giai de sa noti ainnantis a sa dì de Santu Antoni, ma de custa cosa, deu creu, nd'apa a podi chistionai mellus in s'artìculu de sa cida chi at a benni). E duncas, fadendi su contu ca is festas funt togas, e bellas (ma unu pagheddeddu funt fadiosas puru, a su mancu, a mei pigant diaici, ca candu acabbant mi intendu sbuidu cumenti chi fessi una busta sbuida, chi mi permiteis de fai custu giogu de fueddus, est a nai, duncas, chi mi permiteis de arrapiti, po duas bortas de sighiu, su pròpriu fueddu); e duncas, candu is festas spaciant (e mancu mali, mi megu a solu a solu, chi nd'arribbant, ma mancu mali, puru, ca acabbant...) si benit in conca ca custa vida no est feti a papai panetonis (cumenti m'est beniu de ddus tzerriai, furendindi su fueddu, giai giai, de s'italianu etotu), e ciuculatis, e drucis in cantidadi manna (fintzas a si fai scopiai sa brenti, cumenti si iat a podi narai); e sa vida no est feti a sparai cuetus (o guetus, cumenti si narat innoi in Bidd'e Sorris, cun sa "G" a su postu de sa "C", diaici nd'aprofitu puru po fai unu pagheddeddu de gramatica, chi no si dispraxit, e megu a brullai, si cumprendit berus est?) e trichi-traca, cumenti apu agatau immubagora in su fueddàriu; e no est feti a baddai, a cantai, e a si imbriagai (po chini si ddu podit permiti, fadendi su contu ca deu apu spaciau, deu creu, a su mancu, po custa vida, de bufai binu, e birras, e totu su chi tenit alcool, po segai a crutzu sa chistioni) fintzas a tant'oras de su noti (cumenti mi naràt sèmpiri sa bon'anima de mamma mia; e candu manigiu is fueddus chi mi arrapitiàt issa, mi parit totu de da torrai a intendi. E pigu sa cosa cumenti chi fessit unu regalu de su Cielu: po su fatu ca ndi seu pesendi cussus cuatru arriabeddus chi mi serbint po bivi in custu mundu, po sighiri a bivi in custu mundu macu e totu ghetau a pari, gràtzias a sa limba sarda; e po su fatu ca, candu scriu in sardu, cumenti s'apu narau immubagora, mi intendu su coru prenu, fintzas a cucuru, de scancerius, chi mi nd'arribbant de is arregodus acapiaus a mama mia, chi est cussa, de su restu, ca su sardu mi ddu at imparau). 

E duncas, cumenti spaciant is festas, depeus torrai a is trabballus cosa nosta, a is fainas chi si pertocant, e custa cosa de pentzai feti a su trabballu (a su mancu in domu mia, no sciu de bosatrus) at a andai ainnantis, si ddu potzu narai giai de immoi, fintzas, a su mancu, a s'incumintzu de sa Caresima: est a nai ca nc'at a essi meda de trabballi e, po su chi mi pertocat, a su mancu, apa a sighiri a torrai gràtzias a su Cielu po su de essi, ancora, in saludi bona, est a nai chentza de daboris e chentza de pentzamentus lègius in conca, e po su de tenni unu trabballeddu, chi funt is duas cosas de importu prus mannu, a su mancu a parri miu, a su mancu in dì de oi. 
E duncas, nc'est, diaderus, pagu de murrungiai. 

E custu po chistionai (cumenti fatzu dònnia, dònnia, dònnia cida po atacai cun s'artìculu chi ndi pesu in sardu) de su tempus chi passat. 

Po su chi pertocat su tempus chi est fadendi (est a nai chi nc'est basca, o frius, chi proit tropu, o chi no proit giai nudda) si potzu narai ca in s'interis chi seu scriendi custas rigas (chi apu incumentzau a scriri su mercuis, candu ndi teneus ancora s'otu, mancai s'artìculu nd'at a bessiri a pillu feti cras, chi at a essi giòbia, e mescamente, su segundu giòbia de su mesi) nc'est unu bellu sobiteddu, mancai s'aria siat bella frisca (e nci iat a mancai atru puru, fadendi su contu ca, comentecasiat, seus arribbaus a sa metadi de su primu mesi de s'ierru; e ita s'abetastus de agatai, po su chi pertocat su clima, sa basca chi fait in s'istadi? Bai ca no, e nci iat a mancai cuss'arrori puru, cumenti si iat a podi narai). 

E in custu mesi de Gennàrgiu, chi mi parit giai longu cumenti unu trenu (cumenti si megàt fatu fatu babbu miu, ca de su restu trabballàt apitzus de is trenus...), e ancora est nudda, poita nd'eus a chistionai mellus (de cantu si parit longu su mesi de Gennàrgiu), mancai, in s'ùrtima cida (chi apa a tenni sa bona sorti de nc'arribbai in saludi, e duncas, cumenti si narat, chi su Cielu at a bolli custu beni po mei puru, e po bosatrus, est craru) nc'ant a essi, contendi puru su de cras, est a nai su de su noi, cuatrus giòbias in totu, ancora de si scroxai (chentza de contai, duncas, su giobia passau, chi si seus lassaus giai a is pabas, ca su tempus sighit a curri, cumenti si naru fatu fatu, cumenti chi fessit unu leporeddu in mesu in mesu a su sartu). 

E duncas, no podeus fai atru ca s'arramangai is manigas (cumenti apu sèmpiri intèndiu narai fintzas de candu fia unu pipieddu) e, mancai siat una cosa mala e fadiosa, e tostada meda, si cumbenit, a su mancu mi parit de ddu podi narai diaici, a torrai a atacai cun is trabballus. 
Chi est cussu, de su restu, chi ant fatu is scuadras de bòcia chi currint me is campionaus pesaus de sa Federatzioni Italiana de su Giogu de su Càlciu, e de is de sa Lega Natzionali de is Diletantis, chi apustis de giai cuindixi diis de pàsiu (is giogadoris puru, fortzis prus de is allenadoris, tenint a bisòngiu de si nd'abarrai unu pagheddeddu assèbiaus, ddi naraus diaici, mancai si potzat narai, puru, ca is giogadoris no stacant mai cun is allenamentus, nemmancu asuta de is festas). 

E duncas, po una borta (ma no si dda pigheis a fitziu, ma peròu, cumenti mi narànt candu fia piticheddu), est benendumì sa gana de mi nci fuiai acoitu, de mi nci fuiai a fundu 'e susu (cumenti si narat in Bidd'e Sorris) me is chistionis acapiadas a su mundu de sa bòcia, e duncas, a is resultaus de is partidas chi si funt giogadas in custu fini de cida passau. 

E duncas, po custa cida (ma po custa cida feti! Si ddu torru a arrapiti, diaici si cumprendit beni) ia a podi atacai allestru cun is chistionis acapiadas a sa bòcia, e po una borta ndi ia a podi sartai totus is strollìchiminis chi fatu fatu (po no narai "giai sèmpiri") nci sticu in mesu a is contus acapiaus a is partidas de bòcia. 
E duncas, po custa cida, a cantu parit no tèngiu nudda de mi strollicai (si imboddiu diaici sa cosa, mancai sonit unu pagheddu mabi), mancai in conca tèngia prus de una lega, a si narai sa beridadi, chi ndi iat a podi bessiri aforas, chi ndi iat a podi arrui apitzus de custa pagina bianca chi tèngiu asuta de su nasu e de is ogus. 
Ca cumenti s'arrapitu fatu fatu, no sciu mai de su chi apa a chistionai (no sciu mai de is legas chi apa a pigai in consideru) ainnantis de mi ponni a ddas scriri. 

E duncas, chi seis de acòrdiu cun mei, andaus a castiai unu pagheddeddu cumenti funt andadas is cosas me in s'ùrtimu fini de cida de partidas, e bieus unu pagheddu ita totu est sucèdiu, de bonu e de malu, partendi, pròpriu (sèmpiri chi seis de acòrdiu), cun su campionau de s'Ecellenza, chi est cussu de importu prus mannu tra totus cussus chi si giogant in s'isula bella e stimada cosa nosta. 

E duncas, is sexi scuadras de s'Ecellenza funt stètias is ùrtimas a torrai in campu apustis de is festas, fadendi su contu ca sa de dexesseti giorronadas (chi ballit, puru, tra is atras cosas, po sa primu bessida de sa lista de partidas de sa torrada, cumenti ddas tzerriaus) s'est giogada pròpriu custu lunis passau, chi fiat, cumenti scieis beni (cumenti s'apu narau giai, de su restu), sa dì de sa Befana. 

E duncas, is de su Muristeni nd'ant depiu cabai (ddi naru diaici, gioghendi unu pagheddeddu a fai su poeta, cumenti mi praxit a fai dònnia dònnia tanti, de su restu) su segundu unconi marigosu (cumenti seus costumaus a narai, pighendindi is trassas de s'italianu etotu, furendindi su modu de narai de s'italianu etotu, duncas), fadendi su contu chi ant pèrdiu sa partida in domu de is de su Taloro de Gavoi. 
E duncas, is arrùbius-brau, chi ant passau is festas cun feti catodixi puntus in buciaca, e chi fiant arrimaus (ddi naru diaici) me is ùrtimus postus de sa lista, funt arrannèscius a binci, cun su resultau togu meda de duus a zeru, contras a una de is scuadras prus fortis (e prus tostadas, si iat a podi narai diaici puru) chi ddoi funt in totu sa Sardìnnia in dì de oi. E custu ita si fait pentzai? 
Is allenadoris (sa chistioni ballit, est craru, siat po cussus chi sighint is grandus scuadras me is campionaus de sa Sèrie D e de s'Ecellenza, ma ballit puru po cussus chi trabballant impari a is assòtzius chi currint me is campionaus de sa Promotzioni, de sa Primu Categoria e de sa Segunda puru, mi parit craru), de su restu, mi ddu arrapitint fatu fatu: no ti podis dromiri nemmancu po mesu segundu, nemmancu candu giogas cun sa scuadra ùrtima in sa lista, poita bastat diaderus pagu po ndi buscai una surra. 
E duncas, su chi is allenadoris m'arrapitint fatu fatu (e deu creu, mi parit bastanti craru, ca siat sa pròpriu cosa chi narant, chi arrapitint a is giogadoris cosa insoru) est ca, in su giogu de su càlciu, a su mancu, depis tenni grandu arraspetu de totus, poita, desinò, nc'est s'arriscu, e mannu puru, de fai calincuna figura lègia meda (cumenti si iat a podi narai, a trassa de cumenti si narat in italianu etotu). 
E duncas, mancai is de su Taloro s'agatessint me is ùrtimus postus de sa lista, e mancai, cumenti s'apu contau giai, de su restu, in unu de is ùrtimus artìculus chi ndi funt bèssius a pillu in su duamilla e binticuatru (e sèmpiri me is paginas de su giàssu de is amigus de su Diàriu Sportivu, mi parit bastanti craru, berus est?), nd'apant sciusciau s'acapiu cun s'allenadori chi teniant po totu sa primu parti de sa stagioni (e seus chistionendi de Antoniu Marinu), funt arrannèscius a ndi cassai is tres puntus. E si iat a podi narai, puru, ca is de su Taloro Gavoi funt sa "bestia niedda" (po furai sa trassa de s'italianu etotu, chi mi permiteis de ddu narai diaici), e duncas, sa scuadra prus tostada, a su mancu fintzas a oi, ca is de su Muristeni ant agatau cust'annu, fadendi su contu ca puru in sa primu partida de sa stagioni noba, is de su Taloro de Gavoi fiant arrannèscius a ndi cassai unu puntu de oru, in sa partida chi si fiat giogada in domu de is campidanesus. E duncas, is de su Taloro, mancai siant fadiendi, e meda puru, e mancai s'agatint in acua lègias e no (diaici) bonas, cumenti mancai isperànt a s'incumintzu de s'annu, funt arrannèscius a ndi cassai cuatru puntus, apitzus de is ses puntus chi ddoi fiant badda badda in su pratu, po ddu narai diaici, contras a una de is scuadras (seu chistionendi sèmpiri de is de su Muristeni, si cumprendit, berus est?) chi, impari a is de su Budune, impari a is de su Tèmpiu, e chentza de si ndi scaresci de is de s'Ossese, funt currendi po ndi cassai sa bìncida de su campionau de s'Ecellenza e, duncas, funt currendi po ndi cassai s'artziada in su campionau de sa Sèrie D. 

E duncas, si depu narai custu puru, immoi chi nci seus, is de su Taloro ant scerau de sighiri cun Massimilianu Pinna in panchina, chi est stètiu s'allenadori, de su restu, chi at guidau sa scuadra me in s'ùrtima bessida, puru, de s'annu bèciu, e po immoi is resultaus funt donendi totus is arrexonis (cumenti mi benit de ddu narai) a is dirigentis de su Taloro, fadendi su contu ca, me is ùrtimas duas partidas, is de su Taloro funt stètius bonus a ndi cassai cuatru puntus (tres ndi funt arribbaus, cumenti megu a si narai, in sa bessida de su ses de Gennàrgiu, e s'atru puntixeddu ddu ant cassau gràtzias a su resultau, de importu mannu meda, de unu a unu, chi nd'est arribbau a sa fini de sa partida, toga e tostada meda, ca is arrùbius brau ant giogau, fiat su bintiduus de su mesi de Idas, in domu cosa insoru, contras a una scuadra forti meda cumenti est cussa de sa Nuorese. 
E duncas, su de donai is crais de sa scuadra a un antru allenadori, at portau bona sorti a is de su Taloro, ca immoi s'agatant cun calincuna cosa cumenti a dexesseti puntus in buciaca (chi funt su pròpriu tanti de puntus, po si cumprendi mellus, chi tenint is de s'Alghero, est a nai sa scuadra prus manna tra cussas chi ddoi funt in dì de oi in s'Alighera). 
E immoi eus a biri cumenti ant a sighiri a andai is cosas, e megu a chistionai, est craru, sèmpiri de is de su Taloro de Gavoi, chi immoi (est a nai me in sa isfida chi s'at a giogai custu fini de cida chi est arribendindi allestru allestru) si dda ant a depi biri contras a is de su Crabònia, cun sa partida chi s'at a giogai in domu de is minerarius etotu, cumenti seus costumaus a ddus tzerriai. 

Ma torraus a is de su Muristeni, chi ant dèpiu incasciai (mancai no siat mai una cosa bella su de perdi una partida) sa segunda bussinada de s'annu, a su mancu po su chi pertocat su campionau, e immoi s'agatant a su segundu postu de sa lista, cun trintotu puntus in totu allogaus in buciaca, chi funt (a fai is contus, de su restu, nci poneus pagu meda) unu in mancu de is puntus chi tenint allogaus in buciaca is de su Budune, chi s'agatant, est craru, a su primu postu de sa lista, cun trintanoi puntus. 

Is de su Budune, duncas, ndi funt torraus in campu, apustis de is vacàntzas, cun su corteddu tra is dentis (cumenti si iat a podi narai, e cumenti seus narendi, de su restu), fadendi su contu ca nd'ant sciusciau a terra (mi benit de ddu narai diaici) is de su Crabònia (chi eus giai arremonau, tra is atras cosas), cun su resultau de ses a unu, aranti de is tifosus cosa insoru etotu (e eis a podi cumprendi, a solus, su spàssiu chi nd'ant tentu is tifosus de sa scuadra bianca-asulla, cumenti ddus podeus tzerriai, de is caboris de is camiseddas chi manigiant po ndi cabai in campu, e mescamente po is partidas chi giogant in domu cosa insoru). 
E duncas, si cumprendit beni custu puru, nc'est su tanti po pentzai, a su mancu in dì de oi, ca sa isfida tra is de su Budune e is de su Muristeni, chi ballit, est craru, po ndi cassai su primu postu de sa lista, iat a podi andai ainnantis fintzas a s'ùrtimu segundu de sa stagioni. Stagioni chi, a su mancu po is de s'Ecellenza, at a acabbai, cumenti mi parit chi s'apu giai narau, sa cida ainnantis de sa PascaManna. 

E duncas, cumenti si narat, eus a biri cumenti ant a andai is cosas. 
Fadendi su contu, in prus, ca is de su Budune e is de su Muristeni no funt currendi a solus; no si ndi podeus scaresci, duncas (no mi ndi potzu scaresci deu po primu, chi bollu fai beni su trabballu chi mi pertocat), ca a su de tres postus in sa lista agataus is biancus-nieddus de s'Ossese (sa scuadra chi nd'ant pesau in Ossi, si cumprendit, berus est?), chi pròpriu in sa bessida de custu lunis passau, funt stètius bonus a binci, cun su resultau de unu a zeru, in domu de is casteddaius de sa Ferrini. 
E duncas, fait a narai custu puru, immoi chi nci seu, is de s'Ossese tenint in buciaca calincuna cosa cumenti a trintases puntus, chi funt (gei nc'arribbais a solus, berus est?) duus in mancu de is chi tenint in dì de oi is de su Muristeni, e tres in mancu de is chi tenint is de su Budune. A su de cuatru postus, peròu, agataus puru is de su Tèmpiu, cun is caboniscus (cumenti seus costumaus a ddus tzerriai, fadendi su contu ca in su disegnu, in su istema de sa scuadra, tenint pintau pròpriu unu cabonischeddu) ca tenint trintacincu puntus allogaus in buciaca, e chi funt tres in mancu de is chi tenint is de su Muristeni, e cuatru in mancu de is chi tenint is primus de sa classi, is primus de sa lista de is de su Budune. 

E duncas, si podit narai, candu ammancant feti (e naru feti po modu de narai, poita a nai sa beridadi funt una biga manna de partidas, po manigiai unu fueddu, biga, chi apu sèmpiri intèndiu narai innoi in Bidd'e Sorris, mescamente de is massajus) cuindixi partidas po acabbai su campionau de su duamilla e binticuatru – duamilla e binticincu, ca po immoi ddoi funt cuatru scuadras chi funt currendi po ndi cassai sa bìncida de su campionau e duncas, po ndi cassai s'artziada in su campionau de sa Sèrie D, e custu, duncas, po su prexu mannu de totus is tifosus. 

Serru is chistionis acapiadas a is scuadras de s'Ecellenza narendusì ca, eia, a su de cincu postus in sa lista agataus is grogus-arrùbius de su Calanzanos, chi funt arrannèscius a binci sa partida in domu de is de s'Alghero etotu (chi eus arremonau ainanntis), cun su resultau de unu a zeru, ma fadendi beni is contus, is de su Calanzanos, chi in dì de oi tenint, allogaus in buciaca, calincuna cosa cumenti a bintinoi puntus, iant a depi recuperai calincuna cosa cumenti a dexi puntus a is de su Budune, e calincuna cosa cumenti a noi puntus a is de su Muristeni, cun su de tres postus in sa lista chi s'agatat a seti puntus. E duncas, a su mancu po su chi ndi podeus cumprendi in dì de oi, at a essi una cosa difìcili meda ca is de su Calanzanos potzant curri po ndi cassai sa bìncida de su campionau, ma mancai ndi iant a podi cassai unu postu po is partidas finalis (e chi, a trassa de is ingresus, seus costumaus a tzerriau, innoi in Sardìnnia puru, innoi in Italia puru, play-off). 

E serru (immoi po diaderus) is chistionis acapiadas a su mundu de s'Ecellenza (e apustis, cumenti acabbu cun is contixeddus apitzus de su campionau de s'Ecellenza, deu creu chi apa a andai a castiai, impari a bosatrus, sèmpiri chi seis de acòrdiu, cumenti funt postas is cosas me is duas listas chi pertocant su campionau de sa Promotzioni) cun una nova chi nd'arribbat de su mercau de is giogadoris (cumenti seus costumaus a ddu tzerriai). 

E custa nova chi megu a si donai immoi est bella frisca frisca (o fadendi su contu de su frischetu chi est fadendi in custas diis, si iat a podi narai, puru, e fortzis sonat mellus, ca sa nova est bella callenti callenti), fadendi su contu chi est bessida a pillu feti me in custas ùrtimas oras. 
E duncas, is de su Muristeni ant fatu a sciri a totu de essi agatau (de ai agatau, chi si praxit de prus cumenti sonat) s'acapiu cun David Edoardo Suazo, ca, si cumprendit beni meda de su sangunau etotu, est su fillu de David Suazo, ca, si ddu eis a arregodai mellus de mei puru, est stètiu unu giogadori de su Casteddu (forti meda, fait a ddu narai, e prus de totu, candu curriat in campu, fiat prus lestru de unu guetu). 
Su piciocu, duncas, est nàsciu in Casteddu (in s'interis chi su babbu ndi pesat muntonis e muntonis de gol cun sa camisedda arrùbia-brau) in su duamilla e cincu, e in dì de oi tenit, duncas, bint'annus. S'annu passau (fait a narai custu puru) Suazo at giogau impari a is de su Chisola, una scuadra chi currit in su campionau de sa Sèrie D, e chi at saludau, tra is atras cosas, fadendi unu gol in s'ùrtima partida chi iat giogau s'annu passau etotu. Suazo Junior (cumenti ddu estus a podi tzerriai, gioghendi a fai unu pagheddeddu is ingresus, ma desinò sa cosa iat a bessiri cumenti: su fillu de David Suazo, a sa sarda) ndi torrat in s'isula (est a nai, ca torrat a giogai in Sardìnnia) apustis de essi serrau s'aventura, s'esperièntzia (cumenti si iat a podi narai, puru) cun is de su Casteddu, innoi iat giogau in sa scuadra de is piciocus piticus, e apustis iat giogau puru impari a is casteddaius de sa Ferrini, chi eus giai arremonau, tra is atras cosas. 
Me is ùrtimus annus, invècias, su fillu de Suazo iat tentu s'ocasioni de giogai una parighedda de partidas impari a is de su Ceraxius. 
E immoi chi ddus eus arremonaus, nc'est una nova, chi pertocat su mercau, e chi pertocat, duncas, pròpriu is casteddaius de sa Ferrini, chi ant fatu a sciri a totus de ai agatau s'acapiu, est a nai, s'acòrdiu, cun Pierre Anahel Bile Jama, unu piciocu chi nd'arribbat de su Camerun (innoi est nàsciu, est craru, in su duamilla e tres) e chi me is ùrtimus annus at agatau una scuadra innoi giogai in Svizzera. E duncas, is casteddaius de sa Ferrini, chi in dì de oi s'agatant a s'ùrtimu postu de sa lista, in cumpangia, pròpriu, de is de su Barì, funt circhendi de aderetzai is cosas pighendi calincunu giogadori nou chi potzat agiudai a s'allenadori, Bebo Antinori, e sa scuadra, est craru, a ndi bogai is peis aforas de s'ùrtimu postu de sa lista (m'est bèniu de ddu narai diaici, e diaici ddu lassu). 

S'ùrtimu cropu de mercau, a su mancu po su chi pertocat is novas de custa cida, pertocat invècias is tattaresus de su Li Punti, ca pròpriu in s'ùrtima partida chi ant giogau, custu lunis passau, nd'ant fatu cabai in campu su difensori Jonatan Burone, chi ndi lompit de s'Argentina e chi est nàsciu in su milli e noicentus otantaseti, e chi fintzas a su mesi de Idas giogat impari a is de sa Fanum de Orosei, una scuadra chi currit me in su campionau de sa Primu Categoria. 

E ddu sciu (nci sticu unu mesu strollichimini puru, immoi chi nci seu), ca po calincunu, su de intendi su nomini de totus custus giogadoris chi nd'arribbant de foras (cumenti si iat a podi narai), est una cosa unu pagheddu lègia, ca nci funt cussus chi pentzant ca in unu campionau de scuadras sardas nci iant a depi giogai is piciocus, is giogadoris chi teneus in s'isula etotu, e no sa genti de foras, a su mancu, custa cosa iat a balli mescamente po su mundu de is diletantis. 
E nareus puru ca potzu cumprendi sa chistioni, ma feti fintzas a unu certu puntu: est berus chi ddoi funt una biga de giogadoris fortis, chi funt nàscius in Sardìnnia, e chi mancai no agatant una scuadra po giogai (a su mancu: no agatant una scuadra po giogai tra cussas chi currint me is campionaus de importu prus mannu, e seus chistionendi, est craru, de s'Ecellenza e de sa Promotzioni), ma a narai sa beridadi, custa chistioni mi parit ca siat unu pagheddeddu "razzista" (po ndi furai su fueddu de s'italianu etotu, e m'eis a scusai). 
E de su restu (oberru e serru acoitu sa chistioni) mi benit de narai ca su mundu (e no feti su mundu de sa bòcia) est de totus is chi nci bivint apitzus, e mi benit de narai ca is personas (e gràtzias a Deus, nc'aciungu) si podint spostai, e movi, de unu logu a s'atru de su mundu. 
E duncas, deu potzu fai feti is augurius a totus custus piciocus (ma sa cosa ballit, puru, po totus cussus chi nd'arribbant in s'isula cosa nosta, mancai no siant gigoadoris de càlciu): chi potzant fai totu su beni (totu su beni chi arrannescint a fai, si iat a podi serrai sa cosa diaici) po is scuadras cosa insoru, chentza de abarrai innoi a ciaciarrai apitzus de su logu de innoi nd'arribbant. Ca seus totus fillus de Deus, totus agualis aranti a is ogus de Deus, mancai calincunu potzant pentzai, a bortas, chi ddoi siant fillus prus bellus, e prus de importu, de is atrus, chi arrannèsceis a cumprendi su chi seu circhendi de si narai. 

E cun custu serru is chistionis acapiadas a su mundu de s'Ecellenza, e si domandu giai iscusa, mancai, chi si nd'apu furau su tempus, chi mancai no teneis nemmancu, cun is strollichiminis chi m'agatu badda badda in conca. 

E duncas, a narai sa beridadi, mi iat a praxi (e meda puru, gei ddu cumprendeis) a abarrai a ciaciarrai (ma fadendi su contu ca custus fueddus ddus seu scriendi, e no seus chistionendi is unus cun is atrus, si iat a podi manigiai, mellus, deu pentzu, su fueddu "arraxonai"), mancai, de is ispantus chi ndi bessint aforas candu una scuadra pitichinninnia (cumenti si iat a podi narai) ndi cassat sa bìncida e, duncas, is tres puntus prenus, contras a una scuadra meda prus forti, pròpriu cumenti est sucèdiu a is de su Taloro de Gavoi de Massimilianu Pinna (sa istoria de Davide, su pastoreddu, chi ndi iat sciuciau a terra unu giganti cumenti a Golia, cun unu corpu de perda in conca, mi parit chi potzat cratzai beni meda, mi parit chi potzat essi un esèmpiu togu meda po cumprendi su chi podit sucedi in su giogu de sa bòcia, est craru, ma sa cosa iat a podi balli po sa vida puru: ca dònnia tanti sucedint cosas chi parint miraculus, e no estus a depi perdi mai sa fidùcia, ddi naru diaici, in su Cielu, in sa bona sorti e in sa fortza ca dònnia unu de nosu tenit in su coru), ma po oi (po s'artìculu de custa cida, mellus puru), cumenti s'apu giai promitiu de su restu, depeus acudi a andai a castiai, puru, cumenti funt cuncodradas is cosas me is duas listas chi pertocant su campionau de sa Promotzioni. 

E duncas, chi seis de acòrdiu, deu ia a partiri andendi a castiai cumenti funt postas is cosas in sa Lista B (sèmpiri de su campionau de sa Promotzioni), fadendi su contu ca is primus de sa lista de su Uddusò, impari a totus is atras dexesseti scuadras chi tenint a is pabas, funt stètius is primus a torrai in campu, custu sabudu passau, est a nai su cuatru de su mesi de Gennàrgiu (e cumenti scieis, de cust'annu, est a nai de sa stagioni de su duamilla e binticuatru – duamilla e binticincu, is de sa Federatzioni Italiana de su Giogu de su Càlciu, impari a is de sa Lega Natzionali de is Diletantis, e cun su trabballu, puru, de sa Federatzioni Italiana de su Giogu de su Càlciu po su chi pertocat sa Sardìnnia, ant decìdiu de fai giogai, una borta a su mesi, is scuadras de sa Promotzioni a su sabudu. E de su restu, ddu scieis cumenti andant is cosas: chi fessit po is giogadoris, po is tifosus e po is allenadoris puru, iant a fai, iant a abarrai a totu dì, a totu cida, in campu a curri avatu de sa bòcia, ca si cumprendit, ca candu tenis una passioni no arrannèscis, giai giai, a pentzai a atru, cumenti sucedit, po fai un esèmpiu, candu ses innamorau, cumenti si narat). 

E duncas, po su chi pertocat s'ùrtima giorronada de sa lista de partidas de s'andada (e chi est stètia sa prima giorronada in s'annu nou, est a nai in su duamilla e binticincu) is ispantus no funt stètius pagus: totu beni, duncas, po is de su Udduso (chi apu arremonau immubagora puru), chi funt stètius bonus (e bravus, tocat a ddu narai) a ndi cassai sa de undixi bincidas in custu campionau, in sa partida contras a is ùrtimus de sa lista, e seus chistionendi, est craru, de is de s'Abbasanta. E duncas, is de su Uddusò, si iat a podi narai custu puru, po mi acapiai torra a su chi apu narau ainanntis, no si funt fatus frigai (mi benit de ddu narai diaici, isperu chi si cumprendat su chi si bollu narai, ca seu manigiendi unu fueddu ca podit tenni atrus significadus, ma candu in sardu naraus "no mi frigas", boleus narai, tra is atras cosas: no mi imbroglias, tra is atras cosas, o, ballit aguali, no apa mai arrui in sa altana chi as cuncodrau po mei), mancai tra is duas scuadras ddoi siant calincuna cosa cumenti a trinta puntus de diferèntzia; est a nai, duncas, ca is primus de sa classi funt abarraus atentus po totus is noranta minudus de sa partida, e funt arrannèscius a binci cun su resultau finali de tres a unu. 

E duncas, po su chi pertocat s'ùrtima giorronada de sa lista de partidas chi ballint po s'andada (cumenti seus costumaus, de su restu, a ddas tzerriai), ddoi fiat puru un'antra isfida de importu mannu meda (fortzis de importu prus mannu, puru, de sa partida de is de su Udduso) e seus chistionendi, est craru, de sa partida tra is de s'Usinese e is de su Bonorva; e si cumprendit, fiat una partida de importu mannu, chi fadeus su contu ca is de su Bonorva s'agatànt a su segundu postu de sa lista (cun trintunu puntus in buciaca) e invècias is meris de domu de s'Usinese teniant trinta puntus allogaus, est a nai unu in mancu de is biancus-arrùbius, e chi balliànt, duncas, po su de tres postus in sa lista. 

E tocat a narai, acoitu, ca nd'est bessida aforas una partida toga meda po totus is tifosus chi funt andaus a su campu po dda castiai e po fai su tifu, fadendi su contu ca apustis de is noranta minudus de giogu is duas scuadras ant fatu ses gol in totu (tres is de su Bonorva e tres is de s'Usinese, gei si cumprendit, berus est?). 

Est a nai, duncas, ca si funt atobiadas, s'una aranti a s'atra, duas tra is scuadras prus fortis chi ddoi funt cust'annu in su campionau de sa Promotzioni: e sa partida chi nd'est bessida aforas est stètia toga meda, ca fiat cussu, de su restu, ca totus is tifosu bisànt. E duncas, is de su Bonorva funt arrannèscius a partiri a forti meda, fadendi su contu chi funt stètius bonus a ndi pesai (ddi naru diaici, isperendi chi si sonit beni su fueddu) duus gol me is primus binti minudus de giogu; su primu gol nd'est arribbau apustis de feti dexi minudus, cun Meloni chi at intzertau sa porta (cumenti mi benit de narai, e isperu chi si cumprendat bastanti beni su chi tèngiu in conca e su chi megu a si contai), e apustis, a su de dexiotu minudus de giogu, est arribbau su gol puru de Gutierrez (chi s'apu arremonau pròpriu in unu de is artìculus chi ndi funt bèssius a pillu me is cidas passadas, e chi est unu de is giogadoris de importu prus mannu, e cun s'esperièntzia prus manna me is pabas, tra totus is chi ddoi funt in sa rosa de su Bonorva de cust'annu; cun is de su Bonorva, ca si ddu arregodu torra, funt sighius de un allenadori giòvuneddu, ma bravu meda, cumenti a Micheli Pulina). 

Ma is de s'Usinese no si funt arrèndius, e si cumprendit, fadendi su contu, in prus, ca giogànt sa partida in domu cosa insoru. E duncas, torrendi a nosu, funt arribbaus is gol pesaus de Tedde (chi nc'at spùndiu sa bocia a is pabas de su portieri aversàriu me is ùrtimus minudus de giogu de su primu tempus) e, a su de seti minudus in su segundu tempus, cussu de Saba. E seus chistionendi de duus tra is atacantis prus fortis chi ddoi funt in dì de oi in su mundu de sa Promotzioni, e si cumprendit sa fortuna manna chi ndi tenint is de s'Usinese, a podi fai su contu apitzus (cumenti si iat a podi narai, furendindi sa trassa de s'italianu etotu) de duus campionis de importu diaici mannu, cumenti si iat a podi narai. 

E duncas, torrendi a nosu, e a is chistionis acapiadas a sa lista de sa Promozioni, a su segundu postu, in dì de oi, agataus is de su Coghinas, chi funt sèmpiri sighius de Paulu Congiu: e duncas, is arrùbius – biancu – brau funt arrannèscius a ndi cassai sa de noi bincidas in custu campionau, gràtzias a su tres a duus, togu meda, chi funt arrannèscius a ndi pesai in domu de su Istintinu. E immoi, a fai is contus nci poneus pagu meda, is de su Coghinas s'agatant cun trintaduus puntus in buciaca (chi funt su pròpriu tanti de puntus, gei ddu cumprendeis e gei si ddu arregodaus, chi tenint is de su Bonorva), cun unu puntu in prus de is chi tenint is de s'Usinese, ma chentza de si ndi scaresci de is de su Logusantu, un'antra de cussas scuadras chi funt currendi a forti meda, e chi tenint trintunu puntus (cumenti trintunu funt is puntus chi tenint is arrùbius brau de s'Usinese). 

E duncas, si iat a podi narai custu puru: in dì de oi, po cumenti funt cuncodradas is cosas, ddoi funt a su mancu cincu scuadras chi funt currendi po ndi cassai su primu postu de sa lista (e duncas, s'artziada in su campionau de s'Ecellenza), ma a sa lista, deu creu, nci depeus aciungi, puru, is de s'Atleticu de Bono, chi me is ùrtimas cidas ant scerau de donai is crais de sa scuadra a un allenadori bravu (e de esperièntzia) cumenti est Celestino Ciarolu. 

E duncas, serru contendusì custa cosa: is de su Logusantu ant bintu, in domu cosa insoru etotu, cun su resultau togu meda de duus a unu, sa partida contras a is de s'Altzaghena. Is de s'Atleticu de Bono, invècias, ant bintu sa partida, toga cantu difìcili e tostada, contras a is de su CastedduSardu, chi est sa scuadra sighida de Borrotzu. 

E de cumenti funt andendi is cosas in domu de is de s'Atleticu de Bono nd'apu chistionau, pròpriu, cun Celestino Ciarolu, me in custas diis passadas. Ma su chi m'at contau si ddu apa a scoviai, mancai, sa cida chi benit (est a nai: in s'artìculu chi nd'at a bessiri, chi su Cielu bollit custu beni po mei, giòbia chi bennit, chi at a essi su sexi, sèmpiri de su mesi de Gennàrgiu). 

E duncas, fadendi su contu ca su tempus (e pruschetotu su logu) chi tèngiu po si scriri in sardu est bellu ca spaciau po custa cida puru, si promitu chi eus a torrai a atacai cun is chistionis (partendi, duncas, de cussas chi pertocant sa Lista A de su campionau de sa Promotzioni, fadendi su contu ca po oi no apu acutu, cumenti podeis cumprendi a solus) tra seti diis. 
Po immoi, duncas, si imprassu a forti.



Attività realizzata col contributo della Regione Sardegna. IMPRENTAS 2024-2025. LR 22/2018 art. 22