Salta al contenuto principale
brigata veleno siligo

Luciano Pinna e s'amori po su Siligo: «Mi seu ghetau cun totu su coru in custa stòria»

Custu dominigu is cosas no funt andadas beni po su Siligo: is piciocus de Luciano Pinna ant sbàtiu is murrus apitzus a su Putumajore, chi at bintu sa partida po duus a unu; po sa de tres bortas in tres mesis, duncas, Delizos e cumpàngius abarrant a buca asciuta, ma no nc'est abisòngiu de “tzerriai agitòriu”, poita in classifica is birdis – grogus funt sempri postus beni meda, cun su de tres postu in buciaca e s'afròddiu chi no amancat de sicuru. S'allenadori scòviat is arrexonis chi, apustis de is annus passaus in Ittiri e in Sassari, avatu a is piciocheddus de su Cus, d'ant potau a scerai sa scuadra de Giuseppe Casu.


Mister Pinna sciit beni chi traballai cun sa scuadra de sa bidda de babu a mama tua, innui ses cresciu, est meda prus difìtzili: sa genti, aici parit, no tenit passiéntzia cun cussus de domu:
«Innoi m'agatu beni, cussus de su Siligo fiant cichendumì a perda furriada de una pariga de annus ma apu sempri tentu atras bideas in conca, po custu apu trigau a nai de eja — contat s'allenadori, chi in sa vida fait s'abogau —. Cust'annu invécias mi dda seu intèndia e mi seu ghetau in custa stòria cun totu su coru: funt amigus, si connosceus de candu seus pipius, seu siguru chi no nc'ant a essi brigas o strùncius nimancu chi eus a perdi calincuna partida, po imoi no nc'est nudda de si chesciai».

Su Siligo teniat, de su duamilla e unu, po prus de cuindixi annus, una crica de tifosus sempri avatu: cussus de sa “Brigata Veleno” fadiant budrellu po milli e de biri fiant togus meda .
«Ddus connòsciu de meda tempus,. Cust'annu perou sa crica s'est sciusciada, est unu pecau mannu po nosus, poita donànt una grandu manu de agiudu a totus is giogadoris. Eus a circai de ndi fai de mancu. Po sorti bona is personas chi benint a su campu a castiai is partidas no amancant, ma nosu bolleus chi siant dònnia dominigu sempri de prus».

In questo articolo
Squadre:
Allenatori:
Campionato:
Argomenti:
Stagione:
2019/2020
Tags:
Prima Categoria
Girone D