Marcello Guerriero est una vida fadendi s'allenadori: «Fintzas a candu calincunu mi circat no apu a smiti mai»

Chistiònai cun Marcello Guerriero est unu prexu mannu meda: de prus de trint'annus, difati, bivit e scriit is stòrias de su calciu in Sardinnia, pruschetotu cun is scuadras ollastrinas, cumenti Perdasdefogu, Castort Tortolì e Escalaplano. Imoi est sighendi cun is piciocus de su Cannonau Jerzu e s'afròddiu est a is steddus, poita is cosas funt andendi mellus de cussu ca pentzàt in s'istadi, ainnantis de incumentzài su campionau.

«Su traballu de s'allenadori — contat —, a nai sa beridadi no est unu traballu ma un'amori, m'amàchiat.
Mi praxit studiai e cumprendi cumenti abarrai a passu cun is tempus e cun totus is cosas noas ca ndi bessint a foras». Agoa aciùngit: «A nai sa beridadi no apu mai giogau a bòcia, mancu candu fia pipiu. Mi praxiat de prusu ligi is librus, e agoa, a pustis, castiai is “videocassetas” de is partidas de is atrus. A mannu apu sighiu cun is cursus. Nareus ca est un amori ca est sempri bìviu impari a mei, mancai mi ddu apa a portai avatu fintzas in sa tumba (arrìt)».

Guerriero at biu cun is ogus suus cumenti funt cambiadas is cosas in su mundu de su càlciu.
«Innoi in Ollastra nci funt stétius grandus giogadoris po medas annus: pentzu a Massimo Melis, Stefano Congiu, Guerriero, Conciatori. Su Tortolì, po ndi nai una, o su Lanusei, ant fatu beni meda, lompendi fintzas a sa Serie D. Su malu est ca po arribai diaici in artu depis po forza lassai a perdi su traballu cun is piciocus prus giòvanus».

Imoi is cosas funt cambiadas: «Ainnantis is pipius giogànt in s'arruga, a totus is oras de sa dii; imoi faint tres oras, candu andat beni, su martis e sa cenabara, me is scolas de calciu. Deu pentzu ca is campus iant a depi abarrai obertus, po totus is chi chi bolint giogai: nc'est abisongiu de torrai a fai spassiai is pipius, poita imoi pentzant feti a su dinai».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020