Promotzioni: Lanusè e Uddusò currint a totu coddu concas a sa bìncida de is campionaus

E duncas, e giai giai no mi parit nemmancu berus, seus arribbaus puru (gràtzias a su Cielu, m'acudu a ddu narai) a s'ùrtima cida de su mesi de martzu, antzis, a bolli essi prus pretzisus puru (una cosa ca unu giornalista iat a depi circai de fai, po su chi est possibbili), seus arribbaus a is ùrtimas diis de su mesi, fadendi su contu ca custu lunis chi nd'at a arribbai, at a essi su trintunu, e apustis, de martis, si cumprendit, eus a incumentzai a si scroxai puru su mesi de Abrili (cumenti mi praxit a narai fatu fatu, gioghendi unu pagheddeddu a fai su poeta), chi est su de cuatru mesis de s'annu; e in su mesi de Abrili, cumenti eis a sciri, e a su mancu po su chi pertocat custu duamilla e binticincu, nc'ant a essi is festas de sa Pasca Manna, ca nd'ant a arrui su binti, e ca seu abertendi (a trassa de unu pipieddu ca no biri s'ora de si papai s'ou de ciuculati, chi no peus puru de unu pipiu) de su cincu de su mesi de martzu, chi est stètia sa dì, de su restu, innoi apu incumentzau a fai is esercìtzius acapiaus a sa caresima (su giogu de sa caresima, mi benit de ddu tzerriai diaici fatu fatu), e immoi custu domìnigu chi est arribbendindi at a essi, tra is atras cosas, su de cuatru domìnigu de sa caresima, chi est (sighendi a su mancu cussu chi si narat sa religioni catolica, po chini nci creit, a su mancu, est craru), tra is cincu domìnigus de sa caresima, su prus druci de totus; at a essi poita po su prus su tretu est stètiu fatu (difati, apustis, ant a ammancai feti duus dominigus a sa dì de sa Pasca Manna) ca benit giai giai de narai ca nci dda eus giai fata, ma cumenti imparaus, pròpriu, de is scuadras de bòcia e de is giogadoris de càlciu, mancai tui siast bincendi sa partida, mancai cun su resultau de unu a zeru, o mancai de duus a zeru puru, no podis comentecasiat abasciai sa cuncentratzioni, poita est pròpriu candu ddu fais chi nd'arricis is surras prus mannasa e daborosas; e de su restu nc'est unu dìciu puru, in italianu, ca furriau in sardu sonat diaici: no iast a depi narai de nd'essi cassau su pisitu fintzas a candu no tenis su pisitu cassau aintru de su sacu etotu; e sa pròpriu cosa, duncas, estus a podi narai nosu: no est ca feti chi seus arribbaus a su de cuatru domìnigus de sa Caresima, intzandus podeus fai cumenti chi fessit giai Pasca Manna. Antzis, cumenti si sciit, sa coa est maba a scroxai, ballit mancai po is mobadias, candu, mancai, fais cidas e cidas acorrau in domu, chentza de ndi podi bessiri nemmancu po unu segundu, e candu ses acanta acanta de sanai, e ti torrant, mancai, is fortzas in su corpus, intzandus no arrannèscis prus a mantenni sa passièntzia, mancai no nci potzast ancora bessiri de domu, mancai no potzast torrai a sighiri is fainas chi ti praxint; e duncas, eia, incumentzas a no biri s'ora, cumenti si narat, e duncas, su schinitzu (o su scinitzu, chenza sa acca, cumenti apu sèmpiri intèndiu narai de sa bon'anima de mamma mia) incumentzat a diventai mau de amasedai, chi mi permiteis de manigiai custus fueddus, e chi cumprendeis su chi si bollu narai. 

Ca sa passièntzia acabbat pròpriu, e nemmancu a ddu fai aposta, candu ses po nci lompi a sa tarea, a sa fini de sa faina cosa tua, e ddu scieus beni cumenti andant is cosas. 

E duncas, a su mancu po su chi mi pertocat (de bosatrus ndi sciu pagu e nudda, a nai sa beridadi), m'at a tocai a aguantai, a apoderai po un antru arrogheddeddu de tempus, e isperu chi is fortzas mi potzant bastai, e sa pròpriu cosa ballit po sa saludi. E duncas, pròpriu in custas ùrtimas diis, fia pentzendi a sa trassa chi nd'apu pigau, ddi naru diaici, de incumentzai s'artìculu chi ndi pesu in sardu, e chi ndi bessit a pillu, chi ndi bessit aforas, me is paginas de su Diàriu Sportivu, dònnia, dònnia giòbia (chentza de ndi sartai nemmancu unu, e custu iat a podi essi beni sa pubblicidadi ca si iat a podi fai po is artìculus chi ndi pesu po is Novas), chistionendi de su tempus chi passat, est a nai, de fai su contu, apitzus de su mesi, de su tretu chi eus fatu e chi s'abarrat de fai. 

E m'est bènniu in conca, tra is atras cosas, a nci pentzai beni, ca me is scolas elementaris puru (no sciu po bosatrus, ma sa cosa ballit, de seguru, po mei e po totus is cumpangeddus, e is cumpangeddas, chi tenia a s'època), candu si fadiant fai is compitus me in su cuadernu (ma balliat puru po is maistus, candu spiegànt sa letzioni de sa dì a sa lavagna), sa primu cosa chi si tocat a scriri, mellus: sa primu cosa chi si poniant a fai, fiat cussa, est craru, de scriri su nomini de sa bidda e, mescamente (innoi si bollu!) sa data de sa dì, est a nai, est craru, su numero de sa dì, de su mesi, e de s'annu. E custu, mi parit de ddu podi narai chentza timi de mi sballiai, balliat po dònnia, dònnia, dònnia dì de s'annu. 
E diaici, a cantu parit, de su chi ndi potzu cumprendi, a su mancu, seu sighendi a fai, chi est berus (cumenti est berus, e chi no nci credeis podeis andai a castiai, a ligi, mellus ancora cumenti sonat su fueddu, totus is artìculus chi nd'apu pesau in custus ùrtimus duus-tres annus, po cumprendi mellus de ita si seu chistionendi). 

E immoi chi nci seu, nc'agiungiu custa cosa, puru: est una lega chi apu pigau cun un amigu stimau cosa mia e duncas, si iat a podi narai diaici, m'est abarrada prantada in conca: su periodu chi nd'arribbat, chi nc'est ainnantis de sa Pasca, e sa Pasca Manna etotu, a su mancu po is catolicus-cristianus, est dedicau, mi parit de ddu podi narai diaici, a sa paxi: sa paxi me in su coru de dònnia persona, po incumentzai (e sa caresima e is esercìtzius e is dietas chi fadeus in s'interis chi abertaus sa Pasca Manna e chi pertocant, duncas, est craru, sa caresima, si iant a depi agiudai a abarrai selenus, po su chi fait), po arribbai, duncas, a sa paxi in su mundu. 
E no sciu cumenti dda pentzais, ma su de arrannèsci a agatai unu segundu de paxi (mancai feti unu segundu) aintru de una dì, a bortas, benit a essi fadiosu meda, fadendi su contu de su mundu macu innoi s'agataus a bivi, e fadendi su contu de totus is dannus e is arroris chi si ndi podint arrui in pitzus (ca a bortas parit, giai giai, de bivi aintru de unu budrellu, chi mi permiteis de manigiai custu fueddu), e chi, de su restu, si depeus scroxai; po no chistionai poi de sa paxi in su mundu, fadendi su contu ca in dì de oi (eia, mancai sa dì de sa Pasca Manna si siat acostendi sèmpiri de prus) nci funt, a su mancu, duas gherras mannas, e no abarru innoi a si contai una cosa chi, a su mancu a parri miu, connosceis beni chi no mellus de mei, a su mancu cantu su chi ndi potzu sciri deu: sa cosa chi potzu aciungi, immoi chi nci seu (e cun custu dda serru puru, si ddu promitu) est ca candu nci funt gherras, cussus chi pagant su contu prus sabiu (po ddu narai a sa moda de s'italianu etotu) no funt feti is sordaus (ca in dì de oi, mi benit de narai custu puru, faint sa gherra, e duncas su mestieri de su sordau, po su trabballu, e duncas, eia, eis cumprèndiu beni, po su dinai ca ndi incasciant), ma a pagai su contu prus caru, prus sàbiu, funt cussus chi mancai no nci brintant nudda: e megu a pentzai, megu a chistionai de is pipius, mancai (fadendi su contu ca is bombas ca is sordaus si scudint, is unus cun is atrus, mancai de is aereus etotu, candu nd'arruint ferrint innoi ferrint, cumenti si iat a podi narai, chi cumprendeis su chi si bollu narai); e duncas, eia, cumenti sucedit fatu fatu (e cumenti intendeus fatu fatu) podit capitai ca una bomba scuta de un aereu potzat ferri apitzus de una scola, o fintzas apitzus de un uspidali, o de una domu; e candu sucedint custas cosas, custus arroris mannus, unu si iat a podi giai giai domandai chi nc'est stètiu calincunu sbàlliu (unu sbàlliu chi no est de pagu contu, mi parit de cumprendi) o chi est stètiu fatu aposta, pighendi sa mira, cumenti si iat a podi narai. 

E cun custa cosa dda serru, ca po oi iat a podi bastai diaici cun is chistionis marigosas e cun is disprexeis. 
E candu nc'atapu (cumenti naràt sa bon'anima de mamma mia, de su restu) a chistionai de cosas diaici tristas, intzandus mi benit totu a pentzai ca, eia, su de depi chistionai de partidas, de resultaus, e de bòcias, diaici mi parit, a su mancu, est una bella fortuna; mancai custu no bollat narai, intzandus, ca mi depu tupai is origas, e tupai is ogus, po no intendi e po no biri totus is arroris, e is dannus, chi ndi bessint aforas in custu mundu, giai giai dònnia dì. 
Ma fadendi su contu ca custus artìculus, cumenti s'apu giai arremonau de su restu, bessint aforas in unu giàssu chi sighit is chistionis acapiadas a su mundu de sa bòcia de is diletantis, deu creu ca siat arribbada s'ora (e sciu puru ca calincunu de bosatrus no fiat abertendi atru, berus est?) de andai a castiai, unu pagheddeddu, cali funt is novas de importu prus mannu chi ndi funt arribbadas apustis de s'ùrtima giorronada de is campionaus. 
E chi seis de acòrdiu, deu ia a andai a castiai cumenti funt cuncodradas is cosas me is duas listas de su campionau de sa Promotzioni, fadendi su contu ca ammancant feti cincu giorronadas po acabbai sa stagioni e duncas, eia, deu ia a andai a castiai sa situatzioni, pruschetotu po su chi pertocat sa cursa po su primu postu, e duncas, sa cursa concas a s'artziada in su campionau de s'Ecellenza, ca est incumintzendi a si imbuddidai. 

E su campionau de s'Ecellenza est cussu prus mannu tra totus cussus chi si giogant in Sardìnnia, mi fait prexei a ddu arregodai, mancai, po totus cussas personas chi no funt acabiadas a strintu cun su giogu de sa bòcia e cun su mundu de is diletantis, po ddu narai diaici. E custu bollit narai, mi parit craru puru, ca su de arribbai a giogai in su campionau de s'Ecellenza est unu bisu po totus is piciocheddus ca in dì de oi currint avatu de una bòcia; mancai is piciocus, est craru, bisint de arribbai, mancai, a giogai me is grandus campionaus de is professioneris, cumenti podit essi su de sa Sèrie A. 

Ma in custa vida, a bortas, tocat a sonnai, a bisai is cosas a pagu a pagu, eia, pròpriu cumenti un allenadori chi pentzat a una partida a sa borta, cumenti cussus allenadoris ca mi contant ca, eia, sa partida de importu prus mannu est sèmpiri cussa chi depint giogai su domìnigu avatu, e custu bollit narai ca no iast a depi pentzai a su benidori, prus de su chi serbit, a su mancu, ma circai de fai unu passu a sa borta, chi cumprendeis su chi si bollu narai. E duncas, eia, est pròpriu po custu chi megu a si narai ca su de giogai in su campionau de s'Ecellenza, po unu piciocheddu, po unu de cussus piciocheddus chi mancai ant fatu annus e annus gioghendi me in sa Segunda Categoria, o in su campionau de sa Primu, benit a essi unu bisu. 
Ca tra su campionau de s'Ecellenza, e si cumprendit, e giai ddu eis a cumprendi bosatrus puru a solus chentza de s'agiudu cosa mia, e is atrus campionaus, pruschetotu chistionu de is campionaus prus pitichinninnius, nc'est una bella diferèntzia, a partiri de sa calidadi de su giogu chi is scuadras arrannescint a ndi bogai aforas, a partiri da sa calidadi de is giogadoris chi ddoi funt, e fintzas a arribbai, est craru, a s'impignu, ddi nau diaici, chi serbit po sighiri is allenamentus ca, si cumprendit, fadendi su contu de totu su chi s'apu narau, benint a essi meda ma meda prus fadiosus de su chi podint essi, mancai, is allenamentus chi ndi iast a podi pesai cun una scuadra chi currit in su campionau de sa de Tres Categorias, chi cumprendeis su chi si bollu narai. 

E custu no bollit narai, ma peròu, ca una scuadra chi currit in su campionau de sa de Tres Categorias, o in su campionau de sa Segunda Categoria, no depat fadiai po s'allenai, ca ddoi est trabballu bellu de fai in dònnia categoria, chi cumprendeis su chi si bollu narai. 
E duncas, podeus partiri andendi a castiai, impari, e sèmpiri chi ndi teneis gana, est craru (e megu a brullai, si cumprendit, berus est?) su chi est sucèdiu in s'ùrtima giorronada in sa Lista A, innoi a su primu postu de sa lista agataus, sèmpiri e ancora (cumenti si iat a podi narai, fadendi su contu ca sa cosa andat ainnantis giai de una bella parighedda de cidas, chi pròpriu depeus narai sa beridadi e chi pròpriu depu essi pretzisu, cumenti unu giornalista iat a depi essi candu fait su trabballu cosa sua, de su restu), is de su Lanusè, ca in dì de oi, apustis duncas de bintinoi giorronadas fatas, tenint in buciaca calincuna cosa cumenti a sessantatres puntus, e no funt pagus de seguru. E duncas, is de su Lanusè funt arrannèscius a binci in domu de is de s'Atleticu de Casteddu. E su de binci aforas de domu, si cumprendit, no est mai una cosa facili, e nc'arribbais bosatrus puru, deu creu, fadendi feti su contu ca po lompi in Casteddu is giogadoris de su Lanusè ant dèpiu fai una bella parighedda de chilometrus, e unu bellu arrogu de strada, cumenti si iat a podi narai, e custu bollit narai, duncas, e gei si cumprendit, deu creu, ca su viàgiu chi fais ti iad a podi fadiai, a su mancu unu pagheddeddu, e in prus, candu andas a giogai in domu allena, cumenti mi praxit a narai, intzandus ti iast a podi agatai una biga de tifosus de sa scuadra aversària chi andant a su campu, e si cumprendit, mi parit bastanti craru, po fai su tifu po is piciocus cosa insoru, e duncas, si cumprendit, abarrant po noranta minudus, chi no calincuna cosa de prus puru, a fai su tifu, est craru, contras, e si ddu torru a arrapiti, contras a sa scuadra aversària. E si cumprendit cantu custa cosa podit essi de importu po sa conca, e si cumprendit beni, ddu iat a cumprendi unu pipiu puru, cumenti si narat: chi tenis aranti calincuna cosa cumenti a duuscentus personas chi faint su tifu po tui, est a nai ca ti donant sa fortza po curri prus a forti de su chi iast a fai, intzandus is cosas ti benint prus facilis. Ma chi aranti de tui nci funt duuscentus, anztis, fadeus trescentus personas puru, diaici si cumprendit mellus sa chistioni chi seu pighendi,ca ti pigant a tzèrrius, a fueddus maus, intzandus is cambas ti iant a podi bessiri moddis a trassa de sa spruma etotu, chi cumprendeis su chi si bollu narai; ca candu tenis una timoria in conca, eia, ddu eis a sciri mellus de mei cumenti andant is cosas, intzandus sa timoria t'ammoddiat is cambas, e sa conca no girat prus cumenti iat a podi fai, e intzandus nc'est s'arriscu de sballiai calincuna cosa. E in su giogu de sa bòcia, est craru, bastat a sballiai pagu pagu, bastat a sballiai puru e feti unu passagiu, cumenti si narat a trassa de s'italianu etotu, e su dannu est bellu ca fatu. 
Ca custa cosa de is sbàllius, po sighiri a mi strollicai unu pagheddeddu impari a bosatrus, ca de su restu ddu scieis cumenti mi pigat, est una de is cosas chi mi praxit a fai de prus in custa vida, o, mescamente, po su chi pertocat is artìculus chi ndi pesu in sardu, ballit siat po una partida de bòcia, ma ballit, puru e pruschetotu, po sa vida cosa nosta etotu. 
E at a essi po cussu ca unu de is esercìtzius chi is antigus sabius teniant in consideru mannu, ballit po is de sa Grecia antiga, e ballit puru po is antigus sabius cinesus, fiat cussu de imparai a is piciocus a aguantai, a abarrai selenus puru candu sa situatzioni benit a essi difìcili meda, chi cumprendeis su chi si bollu narai. 
Ca unu iat a depi abarrai cun su sangui fridu, cumenti si iat a podi narai, a trassa de cumenti si narat in italianu etotu, puru candu su mondu totu a giru est pighendi fogu, chi mi permiteis de manigiai custa metafora. 
E sa pròpriu cosa, duncas, iat a depi balli po is partidas, ca in su giogu de sà bocia, cumenti mi narant, cumenti m'arripitint fatu fatu is allenadoris chi intendu po ndi pesai is ciaciarradas aintru de sa cida, bincit sa scuadra chi fait prus pagus sbàllius de is aversàrius. 
E apitzus de custa cosa, mancai, nc'apa a torrai apitzus tra unu pagheddu. 
Ca de su restu, candu mi pòngiu a scriri, e sa cosa ballit mescamente po is artìculus chi ndi pesu in sardu, no sciu mai cali arrastu apa a sighiri, cali lega apa a pigai, cali arraxonamentu m'apa a ponni a scroxai, ainnantis de mi ponni a ddu fai. 

E duncas, torrendi a nosu, fia narendusì, fia contendusì de sa partida de importu mannu ca is de su Lanusè ant bintu in domu de is de s'Atleticu de Casteddu, cun su resultau, bellu tundu tundu, de duus a zeru: e custu no bollit narai, duncas, ca po is de su Lanusè su de ndi cassai is tres puntus siat bèniu a essi una passillada, cumenti si narat fatu fatu (a trassa de cumenti si narat in italianu etotu), e duncas, mancai tra is duas scuadra nci fessint, e nci siant, in dì de oi puru, calincuna cosa cumenti a bintiseti puntus de diferèntzia (ainnantis de sa partida, mi parit craru, is puntus de diferèntzia fiant binticuatru), custu no bollit narai (antzis!) ca is de s'Atleticu de Casteddu no apant circau de giogai sa partida cosa insoru, fadendi su contu (est una de cussas cosas ca is allenadoris m'arrepitint giai giai dònnia cida) ca is scuadras chi currint po ndi cassai sa sarvesa ndi cabant in campu cun su corteddu tra is dentis, cumenti si iat a podi narai (a trassa de s'italianu etotu); est a nai ca dònnia scuadra tenit is arraxonis, is motivus cosa sua po curri e po batallai po noranta minudus, e antzis, prus t'acostas a s'acabbu de sa stagioni, e prus is partidas benint a essi tostadas, mescamente, duncas, contras a cussas scuadras chi circant de ndi cassai calincunu puntixeddu po podi giogai in sa pròpriu categoria in s'annu chi at a benni puru, eia, duncas, po ndi cassai sa chi tzerriaus sarvesa. 
Ca cumenti naràt Sun Tzu, chi est su chi at scritu "S'arti de sa Gherra", unu de is libbrus de importu prus mannu po su chi pertocat is strategias, is pranus po ndi pesai is batallas in gherra, ma no feti, est craru: candu tui t'agatas a cumbati contras a unu nemigu, o a giogai contras a una scuadra, chi no tenit prus nudda de perdi, intzandus podis abarrai seguru ca s'aversàriu cosa tua at a cumbati fintzas a sa morti. E si cumprendit. 
E duncas, sa nova prus druci po is de su Lanusè nd'est arribbada de su campu de giogu de is de su Tortolì, ca depiànt giogai, in domu cosa insoru, a su Cumunali Frà Locci, diaici ddu ant tzerriau, contras a is de su Ceraxius, ca eia, funt una de cussas scuadras chi funt circhendi de ndi cassai is ùrtimus puntus chi serbint po tenni sa seguresa, dda tzerriu diaici, de podi giogai in su campionau de sa Promotzioni puru in sa stagioni chi at a benni (e chi at a essi sa de su duamilla e binticuatru – duamilla e binticincu, gei si cumprendit beni, berus est?). 
E duncas, is de su Ceraxius, chi funt sighius de un allenadori de importu mannu meda, cumenti est Franco Giordano, fadendi su contu ca at allenau scuadras chi ant giogau fintzas in su campionau de sa Sèrie D, e po annus e annus e annus at sighiu scuadras me in su campionau de s'Ecellenza, funt arrannèscius a ndi cassai unu bellu puntixeddu. E nemmancu a ddu fai aposta, si iat a podi narai, puru, ca Francu Giordano me is annus passaus fiat s'allenadori, pròpriu, de is de su Lanusè, e si iat a podi narai, duncas, chi at donau una bella manu de agiudu a sa scuadra bècia cosa sua. E custu bollit narai, puru e mescamente (po torrai a s'apicai a sa chistioni chi apu pigau ainnantis) ca su giogu de sa bòcia benit a essi togu meda pròpriu poita no podis mai sciri cumenti ant a andai is cosas, fadendi su contu, duncas, ca is de su Ceraxius in dì de oi tenint calincuna cosa cumenti a trintases puntus, chi funt calincuna cosa cumenti dexiotu puntus in mancu de is chi tenint is de su Tortolì. 

E duncas, apustis de sa de doxi giorronadas de sa lista de partidas chi ballint po sa torrada, is de su Lanusè tenint calincuna cosa cumenti a noi puntus in prus de su chi tenint is arrùbius-brau de su Tortolì, e si cumprendit, no funt pagus, fadendi su contu ca in su pratu ddoi funt, feti (e naru feti po modu de narai, ca pagus no funt de seguru) cuindixi puntus; e custu iat a bolli narai, puru, ca is de su Lanusè, chi is cosas depessint abarrai diaici cumenti funt cuncodradas in dì de oi, ndi iant a podi cassai sa bìncida de su campionau giai sa cida ainnantis de sa Pasca Manna, o su sabudu de Pasca Manna etotu, chi iat a essi sa cida ainnantis de s'ùrtima partida, fadendi su contu ca is giogus ant a acabbai su bintiseti de su mesi de Abrili, e sa Pasca Manna at a essi, nd'at a arrui, cumenti scieis, su binti de su mesi de Abrili. 

E immoi eus a biri cumenti ant a andai is cosas, no feti po sa cursa po su primu postu, ma puru po sa cursa concas a su segundu e a su de tres postus de sa lista: is duas scuadras chi ant a arribbai a is pabas de sa primu de sa classi, duncas, ant a depi giogai atras duas partidas (sa segunda de sa Lista A contras a sa scuadra in su de tres postus de sa lista in sa Lista B, e a s'imbressi, sa scuadra chi at a serrai sa stagioni a su segundu postu in sa Lista B si dda at a depi biri contas a sa scuadra chi est arribbada a su de tres postus in sa Lista A). 

E immoi chi nci seus, duncas, andaus a castiai cumenti est cuncodrada sa cursa concas a is play-off (po manigiai unu fueddu ingresu, chi torrat pròpriu po chistionai de is ùrtimas partidas chi si giogant a s'acabbu de sa stagioni), partendi, duncas, de sa Lista A etotu. E duncas, torrendi a is resultaus chi ndi funt bèssius aforas in sa de doxi giorronadas de sa lista de partidas chi ballint po sa torrada, s'apu giai contau de sa bìncida, toga meda, chi nd'ant cassau is de su Lanusè, e de s'unu a unu chi nd'ant cassau is de su Ceraxius, in domu de is de su Tortolì. 
E pròpriu de is de su Tortolì torru a incumentzai cun is arraxonamentus (e po custa cida no eis a podi narai ca no seu chistionendi de bòcias e de resultaus, e custu bollit narai, si ddu incumentzu a arremonai giai de oi, ca sa cida chi at a benni, e duncas po su chi at a pertocai s'artìculu chi nd'at a bessiri aforas po su primu giòbia de su mesi, nc'ant a essi, mancai, unu paghiteddu de strollichiminis in prus de is chi nc'apu postu, chi nc'apu stichiu in s'artìculu de custa cida, e mancai eus a fai unu pagheddeddu de gramatica, puru, andendi a arraxonai apitzus de duus fueddus chi no connoscia e chi m'at fatu connosci un amigu miu, pròpriu una pariga de cidas fait): is piciocus sighius de Tore Mereu (chi est fadendu s'allenadori de calincuna cosa cumenti a dexi annus, chi no de prus puru) tenint allogaus in buciaca calincuna cosa cumenti a cincuantacuatru puntus, e fadendi su contu (cumenti s'apu giai narau, de su restu) ca is de su Lanusè ndi tenint noi in prus, is arrùbius-brau immoi si depint castiai a is pabas (pròpriu cumenti si narat in italianu etotu), poita a cuatru puntus (est a nai, mellus: cun cuatru puntus in mancu de is chi tenint is de su Tortolì etotu) agataus is de su Cuartu de Sant'Aleni, ca immoi, e custu de una pariga de giorronadas, funt sighius de un allenadori togu meda, cun una bella atza, mi praxit a ddi narai diaici, chi est Andrea Loi, e chi deu apu intèndiu e apu tentu su prexu de intervistai, po una bella pariga de bortas, candu sighiat sa scuadra de su Pirri, e duncas, me is tempus innoi ndi iat cassau s'artziada (cun sa bìncida de su campionau) de sa Primu Categoria a sa Promotzioni. 
E duncas, eia, is de su Sant'Aleni si funt dèpius acuntentai feti de unu puntixeddu in sa partida chi ant giogau in domu de is de s'Arborea, e chi s'est serrada cun su resultau de duus a duus; e si potzu contai puru, sèmpiri po su chi pertocat is cuartesus, ca me is ùrtimas ses giorronadas (contendi, duncas, puru s'ùrtima, chi s'est giogada custu fini de cida passau) funt arrannèscius a ndi cassai calincuna cosa cumenti a seti puntus apitzus de is dexiotu chi ddoi fiant in su pratu (chi mi permiteis de manigiai custu fueddu, e chi cumprendeis su chi seu circhendi de si narai): e duncas, ant serrau in paridadi (po essi prus crarus e po essi prus pretzisus, ca est cussu ca iat a depi fai unu giornalista, de su restu, chi bolit fai beni su trabballu cosa sua) sa partida chi iant giogau in domu cosa insoru etotu, contras a is de s'Atleticu de Masainas, cun su resultau, torra, de duus a duus (cun sa partida chi s'est giogada a sa metadi de su mesi de Friàrgiu etotu, est a nai, duncas, su cuindixi), e in sa partida apustis funt andaus a binci in domu de is de su Ceraxius (chi eus arremonau pròpriu ainnantis etotu, in custu artìculu), cun su resultau de unu a zeru. In sa primu bessida de su mesi de martzu, invècias, is de su Cuartu nd'ant ingotu una surra, mi benit de ddu narai diaici, de is de s'Uda, chi ant bintu sa partida cun su resultau de unu a zeru (duncas, si potzu coxinai sa cosa diaici, sa surra no est stètia manna meda, ma sa cosa prus marigosa de nci inguti, est craru, est ca is de su Sant'Aleni ndi funt bèssius de su campu a buca sbuida, est a nai chentza de nemmancu unu mesu puntixeddu). 
In sa partida chi s'est giogada, invècias, s'otu de su mesi de martzu (eia, fiat sa festa de sa femina, tra is atras cosas, cumenti scieis beni), is biancus-birdis funt arrannèscius a ndi cassai unu bellu puntixeddu (unu puntixeddu de oru, si iat a podi narai diaici puru) in sa partida chi iant giogau in domu de is de sa Villacidrese de Biddaxidru, e sa cida apustis ant bintu sa partida, de importu mannu meda, e si cumprendit, cun su resultau tundu tundu (cumenti si narat fatu fatu) de duus a zeru, pròpriu contras a is de su Tortolì. E duncas, is de su Sant'Aleni immoi s'agatant a su de tres postus de sa lista, e chi is giogus depessint acabbai oi (chi est giòbia), intzandus ndi iant a cassai sa brintada (ddi nau diaici, isperendi chi si cumprendat) po is duas partidas finalis. Ma depeus peròu fai su contu ca a sa fini de sa stagioni ammancant ancora cincu partidas (contendu cussa chi s'at a giogai custu fini de cida chi est giai giai po nd'arribbai, e gratzias a Deus, nc'agiungu deu), e tocat a fai su contu ca is de su Cuartu tenint cincuanta puntus, cumenti funt cincuanta puntus cussus chi tenint, allogaus in buciaca, is de sa Villacidrese, chentza de si ndi scaresci ca puru is de su Gùspini tenint cincuanta puntus. E custu bollit narai, duncas, ca in dì de oi nci funt a su mancu tres scuadras chi funt currendi po ndi cassai s'ùrtimu postu chi abarrat po tenni sa possibbilidadi de si giogai s'artziada in su campionau de s'Ecellenza me is duas partidas chi s'ant a giogai apustis de s'acabbu de sa stagioni etotu. Ma no si podeus scaresci, pròpriu no, ca cun corantanoi puntus ddoi funt puru is de su Cus de Casteddu (sa scuadra pesada de s'universidadi), e mancu a ddu fai aposta, pròpriu in custu fini de cida chi est arribbendindi, is de su Sant'Aleni ant a depi arriciri sa visita, cumenti si narat, a trassa de s'italianu etotu, de is de su Cus, po una de is partidas de importu prus mannu, e si cumprendit, chi s'ant a giogai in sa de trexi giorronadas. 
Invècias, po su chi pertocat is atras duas scuadras chi currint po ndi cassai su de tres postus in salista, si potzu feti narai, po immoi, ca is de sa Villacidrese de Biddaxidru, apustis de essi bintu sa partida chi ant giogau sa cida passada (est a nai, mellus, domìnigu passau) in domu cosa insoru etotu, contras a s'Uda (e chi s'est serrada cun su resultau, bellu e togu meda, de cincu a zeru) immoi ant a depi andai a giogai contras a is de s'Idolo, sa scuadra de Arthana sighida de Simone Podda, cun is arthanesus chi funt currendi po ndi cassai sa sarvesa, est a nai, duncas, est craru, sa possibbilidadi de giogai po s'annu chi at a benni puru (po sa stagioni chi at a benni, po ddu narai mellus), torra in su campionau de sa Promotzioni. 

E acudu a si narai, puru, ca is de s'Idolo tenint in buciaca, a su mancu in dì de oi, calincuna cosa cumenti a bintises puntus, chi funt su pròpriu tanti de puntus, de su restu, de is chi tenint is de s'Orrolese; e siat is de s'Idolo, e duncas siat is de s'Orrolese tenint a is pabas feti duas scuadras, is de su Biddamatrzaxia, chi s'agatant a s'ùrtimu postu de sa lista, cun feti catodixi puntus, e is de s'Atleticu de Masainas, cun binticincu, est a nai, feti unu in mancu de is chi tenint is de s'Idolo e is biancus-arrùbius de Arrolli. Is de su Gùspini, invècias, e cun custu spaciaus, a su mancu po custa cida, is contixeddus acapiaus a sa Lista A de su campionau de sa Promotzioni, ant a depi arriciri sa visita (diaici si narat) de is de s'Atleticu de Casteddu: is piciocus sighius de Cristian Dessì, e chi podint contai apitzus, tra is atrus, de unu giogadori forti e cun s'esperièntzia manna meda cumenti est Alessio Figos, nd'arribbant a sa isfida de custu domìnigu apustis de nc'essi arrutus in domu de is de s'Atleticu de Masainas etotu (chi eus arremonau pròpriu immubagora) cun su resultau de duus a unu, e immoi ant a circai de nd'artziai acoitu, e allestru, sa conca, ca est s'ùnica cosa chi si podit fai, in su giogu de sa bòcia, ma puru in sa vida de dònnia dì, apustis chi nc'arruis a terra. 
E immoi chi nci seu, tèngiu giustu giustu su tempus (e pruschetotu su logu) po si scriri, e po andai a castiai, impari a bosatrus, cumenti funt cuncodradas is cosas po su chi pertocat sa Lista B, e megu a chistionai, sèmpiri, mi parit craru puru, de su campionau de sa Promotzioni. 

E duncas, a su primu postu ddoi funt sèmpiri is de su Uddusò, ca tenint calincuna cosa cumenti a sessantacuatru puntus in buciaca e calincuna cosa cumenti a seti puntus in prus de is de s'Usinese, ca apustis chi ant bintu sa partida, de importu manna meda, fortzis una de is partidas de importu prus mannu de sa giorronada, contras a is de su Coghinas, ant torrau a ponni is manus apitzus de su segundu postu. 

E duncas, cumenti m'ant scoviau in custas ùrtimas oras s'allenadori de is arrùbius-brau, Levacovich, e su Diretori Sportivu (ddi naru diaici, a trassa de cumenti si narat in italianu etotu) Sandru Panzali, parit meda ma meda difìcili, in dì de oi a su mancu, ca is de su Uddusò ndi potzant fuiai a s'abiga, cumenti si narat, su vantàgiu chi tenint apitzus de is de s'Usinese etotu (mancai in su giogu de sa bòcia no si potzat narai s'ùrtimu fueddu fintzas a candu is giogus no funt spaciaus. E gei ddu scieis mellus de mei puru, cumenti andant custas cosas). 

E duncas, immoi a is de s'Usinese no abarrat atru de fai ca circai de difendi, po cantu at a essi possibbili, est craru, su segundu postu de sa lista, fadendi su contu ca a is pabas tenint is de su Coghinas, cun cincuantacincu puntus allogaus a su callenti me is buciacas, e is de su Bonorva puru, ca sighint in sa lista cun cincuantatres puntus, ca po immoi ballint peròu, feti, (e naraus feti, poita is de su Bonorva, a narai sa beridadi, fiant partius po curri po ndi cassai su primu postu. Ma si cumprendit, a sa fini sa scuadra chi at a arrannèsci a ndi cassai sa bìncida de su campionau at a essi feti una) po su de cuatru postus in sa lista. 

E me in sa cursa concas a is play-off (m'eis a iscusai chi manigiu custu fueddu in ingresu, cumenti de su restu seus costumaus a fai, po chistionai de is ùrtimas partidas chi s'ant a giogai apustis chi sa stagioni, sa stagioni regulari, si iat a podi narai diaici puru, at a essi bella ca spaciada) nci depeus sighiri a ponni, puru, is de su Logusantu, fadendi su contu ca tenint cincantaduus puntus. 

E immoi chi nci seus, nc'est su tanti po serrai totu is chistionis e, duncas, s'artìculu de custa cida, andendi a castiai impari cali ant a essi is partidas chi ant a depi giogai is scuadras chi s'apu arremonau fintzas a immoi: e duncas, si potzu incumentzai a narai (e custu ddu fatzu diaici si cuncodrais po beni, concas a su fini de cida prenu fintzas a cucuru de partidas, chi est arribbendindi) ca is primus de sa lista de su Uddusò si dda ant a depi biri contras a is de su Istintinu, in domu allena; is de s'Usinese, incècias, ant a depi andai a fai visita a una de is scudras chi est currendi prus a forti me in custus ùrtimus mesis de giogus, e seus chistionendi de s'Ovodda, sighiu de un allenadori giòvunu, ma bravu meda, cumenti est Manuel Moro. Is de su Coghinas ant a circai de strantaxai acoitu sa conca, apustis de sa partida pèrdia sa cida passada (cumenti s'apu giai contau, de su restu, contras a is de s'Usinese etotu), in sa isfida chi ant a giogai in domu cosa insoru contras a is de su CastedduSardu, sighius de Borrotzu. Po is de su Bonorva, invècias, nc'at a essi de giogai sa partida in domu de is de s'Atleticu de Bono de Ciarolu. E serru totu (serru totu po diaderus, immoi) contendusì de sa partida ca is de su LoguSantu de Madeddu ant a depi giogai, in domu, contras a is de su Tonara. 

E po custa cida puru mi parit mi parit ca apu spaciau su logu e su tempus po si scriri in sardu, ma chi su Cielu at a bolli, podeis abarrai segurus ca eis agatai un antru tanti de rigas, e de fueddas, mannu cantu custu chi teneis immoi asuta de is ogus, tra seti diis a partiri de oi, est a nai, duncas, ca si torraus a ligi giòbia chi benit. 
E in s'interis si imprassu a forti!




Attività realizzata col contributo della Regione Sardegna. IMPRENTAS 2024-2025. LR 22/2018 art. 22