Is resultaus de sa primu giorronada de su campionau de s'Ecellenza regalant giai spantus mannus

In s'artìculu de custa cida po is Novas de su Diàriu Sportivu chistionaus mescamente de is resultaus de is partidas chi pertocant sa primu giorronada de su campionau de s'Ecellenza, ma no feti! In su pratu eis a agatai una biga manna de atras chistionis e de atras legas puru. Tocai feti, intzandus: no s'abarrat atru de fai ca atacai a ligi.


E duncas, atacu a scriri custas rigas candu su tialu de su calendàriu (chi tèngiu sèmpiri asuta de is ogus, mescamente e pruschetotu candu trabballu) mi fait sciri ca, eia, seus lòmpius a su sexi de su mesi de cabudanni: eia, s'acudu a si narai, immoi chi nci seu, ca seu incumintzendi a scriri custas rigas giai de su martis, mancai s'artìculu nd'at a bessiri aforas feti su giòbia (cumenti a dònnia giòbia de s'annu, de su restu, e sa cosa, est craru, ballit puru po is giobias de festa), candu at a essi su dexiotu. 
E fatzu custa cosa po sighiri, in sa manera mellus chi potzu, in sa manera mellus chi arrannèsciu, su dìciu (chi mi praxit de amachiai, e prus mi ddu arrepitu e prus mi brintat in conca, cumenti est giustu) chi narat, duncas, ca "chini tenit su tempus de fai una cosa no iat a depi abertai a s'incras po dda fai". 

E chi pròpriu si depu narai sa beridadi, a su mancu po immoi chi no funt ancora incumentzaus totus is campionaus (cumenti s'apu arremonau me in totus is cidas passadas, difatis, is giogus po su chi pertocat sa Primu Categoria, e po su chi pertocat sa Segunda Categoria puru, ant a torrai a partiri feti in s'ùrtimu fini de cida de custu mesi etotu, e duncas, tra su bintiseti e su bintotu de su mesi de cabudanni), tèngiu cussus duus-tres stiddius de tempus in prus, mescamente su martis. 

E duncas, eia, mi parit craru, seu circhendi de nd'aprofitai (cumenti si iat a podi narai), fadendi su contu pruschetotu, ca is cosas de si torrai a contai, po custa cida puru, no ammancant de seguru. 
E duncas, eus a biri cumenti ant a andai is cosas po su chi pertocat s'artìculu de custa cida, fadendi su contu ca no sciu mai cali lega apa a pigai (e in cali ordini ddas apa a pigai), ma custu dipendit, e meda puru, de totus is cosas chi m'agatu badda badda in conca. 

Si potzu narai, puru, ca mi parit mellus (e chistionu po mei) chi mi pongiu a scriri cust'artìculu (e duncas, est mellus chi mi pongiu, a su mancu po unu pagheddeddu, a nci fuiai aforas una parighedda, a sa sarda, de rigas) poita, desinò, ndi seu seguru, dda ia a acabbai a perdi tempus sighendi una de cussas centumila tontesas (ddi naru diaici) chi nci funt spratas in s'internet, chi cumprendeis su chi si bollu narai. 
E chi no ddu eis cumprèndiu, eia, intzandus nc'aciungu un'antra pariga de fueddus, ma chentza de si fai perdi tropu tempus (ca ddu sciu chi no teneis tempus de perdi cun mei, po s'acapiai pròpriu a sa chistioni chi megu a pigai): a bortas, duncas, mi parit ca custu mundu (su mundu po cumenti ddu bieus e ddu connosceus in su duamilla e binticincu) siat prenu, fintzas a cucuru (chistionu po su chi si podit biri in internet, o po su chi si podit biri a sa televisioni, po chini dda castiat ancora, fadendi su contu ca deu nci dda apu fuiada a prasoni, cumenti si narat, giai de una bella pariga de annus, e de seguru no mi speddiat, ma nemmancu po nudda, chi mi permiteis de manigiai custus fueddus) de tontesas o, chi mi ddu potzu permiti de si ddu narai, siat prenu fintzas a cucuru de cosas pagus futas ca parint pesadas feti (e naru feti) po fai perdi tempus a is personas (po m'acapiai, duncas, torra a su chi fia narendu). 

Eia, ddu tzerriant "intrattenimento" (unu fueddu ca, de su chi lìgiu me in su fueddariu, in sardu si podit furriai, tra is atrus, eia, cun intratenimentu, a trassa de s'italianu etotu duncas. E custu po fai, puru, tra is atras cosas, unu pagheddeddu de grammatica, chi mabi no si fait), est a nai duncas, ca in s'internet est prenu, fintzas a cucuru, de video e de cosas de ligi (de artìculus) ca de seguru no funt diaici futus e intelligentis, ma serbint feti a fai stentai sa genti (po manigiai un antru fueddu chi, tra is atras cosas, apu sèmpiri intèndiu narai innoi in Bidd'e Sorris) aranti de su monitor de su tialu de computer, o ballit aguali (e nci iat a mancai atru puru), aranti a su schermu de su tialu (torra!) de su telefoninu (o telefoneddu, chi si praxit de prus, mancai, cumenti sonat). 

E duncas, eia, po norantanoi diis apitzus de centu (chi cumprendeis su chi seu circhendi de si narai), arrannèsciu a abarrai atesu (atesu meda, si iat a podi narai, mellus puru) de totu cussa biga de tontesas, ma nci funt diis innoi mi fatzu cassai (ddu naru diaici) e duncas, eia, a mei puru capitat de abarrai totu alluau, totu allollonau a castiai cosas chi no tenint nesciunu sentidu (chentza de nesciunu sensu, si iat a podi narai diaici, po manigiai unu fueddu diversu). E sa cosa prus lègia de totus (e ddu scieus cumenti andant custas cosas) est ca candu ses apicau a cussu tialu de internet, candu navigas (diaici cumenti seus costumaus a ddi narai) intzandus su tempus parit ca no nci passat, ma a nai sa beridadi si nci bobat chentza chi nemmancu si nd'acataus. 
A tui parit, duncas, ca funt passaus feti cincu minudus, e invècias, chi fais beni is contus, arriscas de abarrai apicau, e apicigau, a totus cussas tontesas po oras e oras e oras de sighiu, e candu mancai ti ndi scidas (eia, a trassa de cussus chi si dromint e incumentzant a sonnai, o a bisai, po manigiai un antru fueddu cun su pròpriu sentidu) ti nd'acatas (e custa est sa cosa peus, a su mancu a parri miu, est craru) ca nc'as fuiau totu su tempus, mancai unu merì interu, o una noti intera, chentza de dromiri nemmancu po cincu minudus, avatu de is tontesas peus chi s'omini nd'at pesau in custus ùrtimu binti-trint'annus, e sa cosa peus est candu ti nd'acatas, tui etotu, ca fortzis (e naru fortzis, ma megu a brullai, unu pagheddeddu, e si cumprendit) podiast usai, e imperai totu cussa biga de tempus po fai atru e, mancai, nci depeus aciungi custu puru, atras cosas prus futas (meda prus futas). 
Ca a fai, a ndi pesai o a sighiri una cosa chi bèngiat a essi prus futa de una tontesa, si cumprendit, nci poneus pagu meda. 

E deu no ddu sciu poita is personas abarrant a totu dì apicadas a custas tontesas: mi benit de narai ca nci funt personas ca po trabballu ndi pesant centumila fesserias, poita a sa fini nc'est genti (e no funt pagus, de su chi mi parit de cumprendi) chi abarrant apicigaus a is schermus de su computer e de is telefoninus po oras e oras, dònnia dònnia dì; e duncas, chi nc'est genti chi castiat, e chi sighiri, custas tontesas, duncas si cumprendit, nci funt unu muntoni de personas (e no parit berus) ca po trabballu ndi pesant, pròpriu, custu muntoni mannu cumenti unu monti de sciollorius. 
E candu m'agatu deu puru a abarrai apicigau po oras e oras a su schermu de su computer, sighendi cosas chi no tenint nesciunu sensu (s'ùnicu sensu chi tenint est cussu de ti fai abarrai apicigau a su schermu de su computer o de su telefoninu, poita, a sa fini, in conca, custu est pagu ma seguru, no ti ponint nudda de bonu, nudda de futu), mi benit fintzas su febi. E si cumprendit: su febi contras a mei etotu.
Ca s'unica cosa chi parit siat de importu, in custu mundu (a bortas mi parit pròpriu diaici) est cussa, eia, de ti fai perdi su tempus. Ca a bortas no scieus totu cumenti si passai is diis, no scieus totu cumenti nci passai (o nci fuiai, ballit aguali, su tempus), e duncas in internet (cumenti seus costumaus a ddu tzerriai) agataus una surra manna de modus po nci fuiai su tempus. Depeus feti scerai sa tontesa chi si fait prus arriri, mancai, tra totus cussas chi nci funt. 

E duncas, torrendi a mei, eia, deu creu ca po cumenti seu fatu, po cumenti seu circhendi de ndi pesai e de cuncodrai sa vida cosa mia, est mellus meda (ma meda, e si domandu iscusa po su giogu de fueddus chi m'est bèssiu aforas) chi mi pongiu a trabballai (cumenti seu fadendi immoi de su restu); est a narai, duncas, ca est meda, ma meda mellus chi abarru innoi a scriri po is artìculus chi ndi pesu po su giàssu de su Diàriu Sportivu, e chi funt, eia, gei si cumprendit bastanti beni, deu creu, su trabballu cosa mia; e prus de mi nd'abarrai allollonau, e alluau innoi aranti de su schermu de su computer po oras e oras, preferru (ia a depi preferri, a su mancu) a mi ligi calincuna pagina de calincunu libbru bonu, o preferru fintzas a mi fai una passillada. 

Ca su de abarrai oras e oras aranti de su computer, po trabballu, eia, apustis de unu pagheddu pigat a conca (e a brenti puru); e custu bollit narai ca apustis de cuatru, cincu o fintzas ses oras chi fais aranti de su schermu, intzandus ti iast a podi intendi stracu e unu pagheddeddu nervosu puru. E est pròpriu candu seu stracu, o candu mancai no tèngiu prus trabballu de sighiri, ca est prus facili a nc'arrui in una de cussas centumila tontesas chi nci funt in s'internet e chi s'apu giai arremonau. 
E sa cosa peus (a su mancu a parri miu) est ca, in s'interis chi sa metadi de is personas chi bivint in custu mundu si nd'abarrant allollonaus cun su telefoneddu me is manus (o mancai, ballit aguali, cun su nuncu, o su bruncu, chi si praxit de prus, e is ogus apicigaus a su schermu), eia, in s'interis chi nosu decideus de passai sa vida cosa nosta in custa manera chi mi parit siat pagu futa, in su restu de su mundu nci funt personas ca mancai funt morendi de fami, o morendi, ballit aguali, po crupa de calincuna gherra stupida. Ma a narai sa beridadi, gherras futas deu no ndi connòsciu e no apu mai crètiu ca una gherra potzat essi futa. E cun su fueddu futa, innoi in Bidd'e Sorris a su mancu, tzerriaus una cosa chi est fata, mancai, in gràtzia de Deus.

E m'eis a iscusai chi si nd'apu fatu perdi totu custu tempus (e m'eis a iscusai chi s'apu fatu perdi su tempus chi mancai no teneis nemmancu, cumenti s'arrapitu fatu fatu), ma tenìa custa cosa, cumenti si narat, atzia e caba (cumenti si megàt fatu fatu sa bon'anima de mamma mia) fadendi su contu ca, eia, a mei est sucèdiu pròpriu ariseu (ca fiat lunis) de nci perdi una biga de tempus, cumenti s'apu arremonau ainnantis etotu, de su restu, sighendi cosas chi mi pertocant pagu, e chi nemmancu mi praxint, a narai sa beridadi. 

E intzandus, eus a biri cumenti m'ant a andai is cosas in sa dì de oi e apustis, e mescamente, in totus is diis chi ant a sighiri e chi ammancant a su fini de cida de su binti e de su bintinu, innoi nc'ant a essi is partidas chi ant a balli po sa segunda giorronada de is campionaus de s'Ecellenza e de sa Promotzioni puru. 

E si contu custu po incarrerai (e fiat ora puru, s'at a megai calincunu de bosatrus) cun is chistionis chi si pertocant prus de acanta, fadendi su contu ca custu artìculu, s'artìculu chi teneis asuta de is ogus, ndi bessit aforas in unu giàssu chi sighit is fainas de su mundu de is giogadoris, de is allenadoris e duncas de is scuadras de bòcia de is diletantis sardus chi currint, ddu eis a sciri giai, me is campionaus pesaus de is de sa Federatzioni Italiana de su Giogu de su Càlciu, de is de sa Lega Natzionali de is Diletantis e, puru e pruschetotu, de is de su Cumitau Regionali; e nosu chistionaus de su Cumitau Regionali de sa Sardìnnia, mi parit bastanti craru puru. 

E duncas, nci ia podi aciungi custa cosa puru, immoi chi nci seu: est de annus e annus chi megaus a chistionai de su giogu de sa bòcia, de su giogu de su càlciu (chi si praxit de prus diaici, mancai, po cumenti sonat) cumenti chi siat una de is cosas de importu prus mannu po sa genti e, mescamente po is piciocheddus prus piticheddus de edadi, chi s'agatant, mancai, a bivi me is biddas prus piticheddas chi nci funt in dì de oi in Sardìnnia. 

E duncas, eia, po m'acapiai torra a su chi apu scritu fintzas a immoi (diaici no mi pigais po macu, e diaici su strollichimini chi nd'apu bogau aforas a calincuna cosa at a serbiri, mi megu a solu a solu), su giogu de sa bòcia (ma sa chistioni ballit aguali, est craru, e nci iat a mancai atru puru, po totus is atrus sport), po nd'arremonai unu, donat una bella manu de agiudu a is piciocheddus (ma a is piciocus prus mannus puru) a nci passai su tempus (a si spreviai, po manigiai unu fueddu chi m'est sèmpiri praxiu) in una manera chi potzat essi sana, chi seis arrannèscendi a mi sighiri po su chi seu circhendi de si narai. 

Eia, duncas, seu cunvintu ca nci siant totu una biga manna de modus po perdi su tempus, po nci fuiai su tempus (chi mancai nemmancu teneus...) e, duncas, po nci fuiai sa vida: e pentzu, mancai, a totus cussus piciocus chi abarrant a totu dì in su bar a s'imbriagai, ma no funt de segurus is ùnicus chi nci fuiant su tempus cosa insoru (e duncas sa vida cosa insoru) a s'abiga. 

E a cussu puntu, mi megu a solu a solu, tantu ballit a agatai una faina chi potzat essi prus sana (prus sana de si nd'abarrai setzius a su bar a totu dì): e su giogu de sa bòcia, ita si ddu naru deu, est unu de is modus mellus ca nci funt po nci passai su tempus; e su de si podi torrai a contai totu su chi sucedit me is campus de càlciu chi nci funt spratus in totu s'isula est unu prexei mannu po mei, e ia a podi narai fintzas ca, eia, est su trabballu prus togu chi nc'est in custu mundu. 

E duncas, arribbau a custu pentu, deu creu, giai giai, de podi narai ca po oi, po custa cida puru apu spaciau cun is strollichiminis, ca a bortas mi intendu, eia, a trassa de cussus professoris, de cussus professoris de filosofia, mancai, chi nd'arribbant in s'aula, po fai sa letzioni, e ainnantis de atacai cun is cosas de importu abarrant, mancai, po coranta minudus apitzus de cincuana, o de sessanta puru, a chistionai de atras cosas chi, mancai, nci brintant pagu cun su chi iant a depi narai, o cun su chi is scientis si iant a podi abertai de intendi. 

Ellus, diaici fatzu deu, ca de su restu, chi eis lìgiu a su mancu unu de is artìculus chi ndi funt bèssius aforas po is Novas de su giàssu de su Diàriu Sportivu, eia, scieis beni cumenti mi pigat, e sa cantidadi manna meda de legas, e de chistionis, chi m'agatu badda badda in conca, dònnia dònnia borta chi mi setzu a scriri. 

E duncas, immoi chi mi seu alligerau is crobeddus (po ddu narai diaici, chi mi permiteis duncas de giogai a fai unu pagheddeddu, ma unu pagheddeddu feti, su poeta, prus ca su giornalista sportivu), podeus andai ainnantis, e si promitu chi apa a chistionai feti de bòcias, e de is resultaus de is partidas chi si funt giogadas in custu ùrtimu fini de cida chi si seus lassaus a is pabas. 

Ma ainnantis de atacai, e de incarrerai, si naru feti custa cosa: calincunu (ma feti calincunu, est a narai, duncas, ca no funt in medas chi m'ant fatu custa critica, e mancu mali, e gràtzias a Deus, cumenti si iat a podi narai) pentzat ca cust'artìculu siat longu prus de su tanti, ca po ddu ligi nci bolint dexi minudus (chi no unu cuartu de ora), e m'at fatu sciri ca fortzis iat a essi mellus a du pretziri, mancai, in duus artìculus: eia, est a nai ca, fadendi su contu de totu su chi scriu, dònnia dònnia cida, fortzis de unu (e seu chistionendi de is artìculus), ndi iant a podi bessiri mancai duus (custu est pagu ma seguru), o fintzas tres o cuatru artìculus. Ma si depu narai ca a mei a sa fini mi fait prexei, custa cosa de ndi sforrai (a trassa de paneteri, eia) totu custa cantidadi manna de rigas, e mi fait prexei a ddas stichiri aintru de un artìculu feti, e mi praxit custa cosa de ddas fai bessiri (chistionu de is rigas, si cumprendit, berus est?) su giòbia a su mengianu, cumenti chi fessit un atobiu, un incontru; mi praxit custa cosa ca s'artìculu ndi bessit dònnia giòbia de s'annu, mancai siat festa: eia, po si fai un esèmpiu, cust'annu (e megu a chistionai de su duamilla e binticincu, si cumprendit) sa dì de Nadali nd'at a arrui (no nc'eis a crei...) pròpriu de giòbia, e podeis abarrai segurus ca, sèmpiri chi su Cielu mi lassat sa saludi e sa gana bella de podi sighiri cun su trabballu cosa mia, intzandus, eis a agatai unu muntoneddu de rigas, aguali a cussu chi teneis asuta de is ogus, mancai siat su binticincu de su mesi de Idas, e mancai su binticincu su prus de sa genti no trabballat (ma nci funt cussus chi trabballant, puru, e si cumprendit, me is diis de festa: a trassa de cussus chi trabballant apabas de su banconi de is bar, po ddus arremonai); ma deu apa a essi, est craru, tra cussus chi ant a depi sighiri is fainas acapiadas a su trabballu e sa cosa no mi dispraxit de seguru, est craru; antzis, torru gràtzias a su Cielu de su de tenni unu trabballu ca no est fadiosu meda e chi, a sa fini, si iat a podi narai, puru, ca mi praxit bastanti. 
E duncas, eia, su chi si potzu consillai chi agatais custu artìculu tropu longu po ddu ligi totu paris, de si ddu pretziri mancai in duas o tres bortas: s'artìculu at a abarrai innoi, in su giàssu de is amigus de su Diàriu Sportivu, e bosatrus si ddu podeis ligi candu ndi teneis gana, e candi ndi teneis su tempus, gei si cumprendit. E chi no arrannèsceis a ddu ligi totu in una borta, totu in unu corpu, totu in un'acirrada (eia, cumenti apu sèmpiri intèndiu narai po sa cosa de bufai), totu in un acollada (po manigiai unu fueddu chi m'est sèmpiri praxiu meda e chi apu sèmpiri intèndiu narai innoi in Bidd'e Sorris, ca est su logu innoi seu stètiu pasciu e innoi ancora m'agatu), intzandus deu si consillu de ligi fintzas a innoi acudeis, fintzas a candu ndi teneis gana, e su chi no acudeis a ligi oi, si ddu podeis torrai a castiai a s'incras. 

E duncas, eia, ainanntis s'apu promitu chi apa a essi atacau, e drabessi puru, po su chi fait, a si chistionai (e fiat ora puru, s'at a megai calincunu de bosatrus) de cumenti funt andadas is cosas po is scuadras chi currint in su campionau de s'Ecellenza e, immoi chi nci seus, apa a circai de andai a castiai (sèmpiri impari a bosatrus) puru cumenti funt andadas is cosas, apustis de sa primu giorronada de giogus, a is scuadras chi currint me in su campionau de sa Promotzioni puru (isperendi ca su logu chi tèngiu de preni siat bastanti po totus is legas chi mi baddant in conca). 

E duncas, a fai is contus nci poneus pagu meda, po incumentzai si potzu narai (e mi praxit meda custu giogu de rimas chi mi nd'est bèssiu aforas, giai giai chentza de mi nd'acatai, a trassa de poeta etotu, si ddu torru a arrepiti, prus ca a trassa de giornalista) ca po su chi pertocat sa primu giorronada de partidas de sa stagioni de su duamilla e binticincu – duamilla e bintises, nci funt stetias ses bincidas e duas partidas chi si funt serradas cun su resultau siddau in paridadi. Is gol chi is scuadras funt arrannèscias a ndi pesai funt binti in totu, e feti una partida (apustis s'apa a narai puru cali est stètia, po essi prus pretzisus puru, cumenti unu giornalista iat a depi essi) est acabbada, s'est serrada cun su resultau de zeru a zeru. E duncas, apustis de is duas partidas chi funt ballias po sa Cupa Italia (e megu a chistionai, est craru, sèmpiri de su campionau de s'Ecellenza, si cumprendit, berus est?), podeus giai narai cali funt is scuadras chi funt giai currendi a forti, mancai siant passaus feti duuscentus e setanta minudus de giogus (centu-otanta po su chi pertocat sa Cupa, a fai is contus nci poneus pagu meda, de su restu, e noranta, eia, feti noranta, po su chi pertocat sa primu giorronada de su campionau): is de su Tèmpiu, is de sa Nuorese, is de s'Igresias (o Bidd'e Cresia, chi si praxit de prus) e is de su Crabonaxa funt arrannèscius a curri a forti po su chi pertocat is giogus de su campionau puru, cumenti iant fatu, de su restu, me is partidas, me is bessidas de sa Copa Italia. 
E is de su Crabonaxa, intzandus, fait a narai custu puru, funt stètius is ùnicus a essi arrannèscius a binci totu e tres is partidas chi ant giogau fintzas a immoi. 
Is scuadras chi ndi funt artziadas cust'annu in su campionau de s'Ecellenza (fadendi su contu ca s'annu passau curriant po sa Promotzioni), e seus chistionendi mescamente de is de su Lanusè e de is de su Tortolì, funt stètius bonus a ndi cassai is primus tres puntus, pighendi po bonu su dìciu chi narat ca, eia, chini incumentzat beni, cun su pei deretu (cun su pei giustu) intzandus est giai arribbau a sa metadi de su trabballu chi depit fai. Is de s'Ilvamaddalena e is de s'Ossese, invècias, ancora no funt arrannèscius a binci nemmancu una partida, fadendi su contu ca si funt atobiaus, giai, is unus cun is atrus, ma sa bidea chi teneus in conca (ca is tifosus tenint in conca, chi si praxit de prus puru cumenti sonat) est ca is maddaleninus e is biancu-nieddus ant a curri, a sa fini, po ndi cassai su primu postu de sa lista e, duncas, sa bìncida de su campionau, fadendi su contu ca seus chistionendi, sèmpiri, de duas de is scuadras prus fortis (cun is rosas prus fortis, si iat a podi narai mancai diaici puru) tra totus cussas chi currint, e chi s'agatant, me in su campionau de s'Ecellenza de cust'annu. 
S'ùnica partida, tra totus cussas chi si funt giogadas su fini de cida passada, chi est acabbada cun su resultau siddau in su zeru a zeru, est stètia cussa tra is meris de domu de su Sant'Aleni (un'antra de cussas scuadras chi s'annu passau curriàt in su campionau de sa Promotzioni) e is allenus de su Santa Teresa (de su Lungone, intzandus, cumenti si iat a depi narai in sardu), sighius de un allenadori bravu e de esperièntzia cumenti est Celestinu Ciarolu. Duncas, si iat a podi narai, puru, immoi chi nci seus, ca is de su Santa Teresa (sigu a ddus tzerriai diaici) no nd'ant ancora buscau nemmancu unu gol me is primus tres partidas chi ant acutu a giogai fintzas a immoi, mancai si iat a podi narai, puru, ca me is ùrtimus minudus de giogu fiant giai giai acanta de ndi cassai su gol chi iat a essi balliu po sa bìncida de sa partida; is de su Sant'Aleni, invècias, apustis de nd'essi buscau cincu gol (tra sa partida de s'andada e cussa de sa torrada, e megu a chistionai de is bessidas chi pertocant sa Cupa Italia de s'Ecellenza) de sa Ferrini de Casteddu, si funt arregalaus una giorronada de pàsiu, mi benit de ddu narai diaici; una giorronada de pàsiu, a su mancu, po su chi pertocat su portieri cosa insoru, e si cumprendit beni. 

E duncas, cumenti s'apu arremonau immubagora, una de is partidas prus togas chi si funt giogadas custu fini de cida passau est stètia cussa tra is de s'Ilvamaddalena e is allenus de s'Ossese: is meris de domu, mescamente me in sa primu mes'oredda, funt arrannèscius a giogai beni meda, cun is de s'Ossese ca, invècias, no funt arrannèscius, giai giai, a arrannèsci a arrespundi, chi cumprendeis su chi seu circhendi de si narai. 
Apustis de cuindixi minudus de giogu (eia, feti cuindixi minudus, si iat a podi narai diaici) Attili nd'at pesau su gol de s'unu a zeru, po is meris de domu (si cumprendit, berus est?); me is primus minudus de su segundu tempus is de s'Ilvamaddalena funt stètius bonus a cassai su segundu gol puru de sa giorronada, cun Piassi chi nc'at scutu sa bòcia a is pabas de su portieri de is aversàrius cun unu tiru togu meda, apustis de su passaàgiu fatu, torra, de Attili. Is piciocus sighius de Demartis, intzandus, a cussu puntu ant circau de ndi strantaxai sa conca e candu ammancànt feti cincu minudus po lompi a su de noranta minudus (e duncas, a sa fini de sa partida) ant torrau a oberri totus is giogus gràtzias a su gol pesau de Di Pietro (ca me is annus passaus giogat, pròpriu, cun sa camisedda de is de s'Ilvamaddalena), cun unu corpu de conca togu meda. A cussu puntu is biancus nieddus si nci funt ghetaus a s'atacu (cumenti si iat a podi narai, e cumenti seu narendi de su restu) e ant agatau su gol chi est bàlliu po su duus a duus gràtzias a sa giogada de Saba, candu fiant passaus giai cincu minudus in prus de is noranta regularis (cumenti m'est bèniu de ddus tzerriai). 
Is de su Tèmpiu, invècias, funt arrannèscius a binci in sa primu partida de su campionau (e in sa primu partida chi ant giogau in domu cosa insoru, a su "Manconi", cumenti seus costumaus a tzerriai su campu cosa insoru), gràtzias a su cuatru unu chi nd'ant pesau in sa isfida contras a is de su Uddusò, ca funt, eia, torra, una de cussas scuadras chi nd'arribbant, deretas deretas, de su campionau de sa Promotzioni (fadendi su contu ca is piciocus sighius de Ferruciu Terrosu, chi si ddu arregodais, e chi no si ddu arregodais, deu seu innoi puru po fai custu trabballu, iant bintu su campionau po su chi pertocat sa Lista B), e custu est sucèdiu pròpriu in sa stagioni de s'annu passau. Is de su Uddusò, a narai sa beridadi, ant giogau una partida de importu, mescamente me is primus minudus, candu funt arribbaus acanta acanta a su gol de s'unu a zeru; gol chi nd'est arribbau, a sa de tres tentas chi ant tentu, cun Faye. Nc'at pentzau Lemiechevsky, peròu, a ponni torra totus is cosas (e megaus a chistionai, mescamente, de su resultau de sa partida, mi parit craru puru) in paridadi; apustis is piciocus sighius de Giusepi Cantara nd'ant cassau su gol de su duus a unu cun su tiru, togu meda (cun su pei mancu, o mancosu, chi si praxit de prus cumenti sonat, mancai, diaici) scutu de Zirolia. In s'interis, is de su Tèmpiu funt abarraus cun feti dexi ominis in campu (contras a is undixi de su Uddusò, mi parit bastanti craru) po crupa de su cartellineddu arrùbiu chi nd'at buscau Solinas (ca a nai sa beridadi nd'at arregotu duus cartellineddus grogus, chi funt bàllius po unu arrùbiu, cumenti narat sa regula, de su restu), ma is caboniscus funt stètius bonus a ndi cassai atrus duus gol: unu pesau, torra, de Lemiechevsky e su segundu cun Dimitrijevic. 
Is de sa Nuorese funt arrannèscius a binci sa partida contras a is meris de domu de sa Ferrini de Casteddu: is piciocus sighius de Claudiu Bonomi nd'ant cassau su primu gol gràtzias a su corpu de conca scutu de Manca, apustis de su passàgiu chi ddat fatu Cocco. Is de sa Ferrini no funt arrannèscius a ndi cassai su gol chi iat a essi bàlliu s'unu a unu, ma antzis nd'ant buscau unu tiru de is undixi metrus, ca Cocco nc'est arrannèsciu a nci spundi a is pabas de su portieri de is casteddaius (chi mi permiteis de manigiai custus fueddus, chi si cumprendit, a su mancu, su chi bollu narai, su chi seu circhendi de si narai). 

Is de su Crabonaxa sighint a essi, duncas, tra is scuadras chi staint mellus (ddi naru diaici), cun is tres gol pesaus in sa isfida contras a is de su Taloro chi chistionant craru (cumenti si iat a podi narai): Cannas, apustis de nd'essi pesau tres gol me is duas partida chi funt ballias po sa Cupa Italia (me is isfidas contras a is de su Lanusè) ndi cassat su gol chi ballit po su vantàgiu (o bantàgiu, chi si praxit de prus cumenti sonat, cun sa "b" a su postu de sa "v", diaici fadeus puru unu pagheddeddu de grammatica, chi no fait mabi, custu est pagu ma seguru); is allenus pigant in prenu su palu de sa porta de su portieri de is meris de domu cun su tiru scutu de Caddeo, ma a agatai su gol funt torra is meris de domu de su Crabonaxa, gràtzias a sa giogada pesada de Beugre (po issu puru funt tres, giai, is gol pesaus me in custas primas tres partidas, fadendi su contu , duncas, mi parit bastanti craru, de is duas partidas chi balliànt po sa Cupa Italia). A su de corantacincu minudus de giogu, po su chi pertocat su segundu tempus (e duncas, eia, giai giai a sa fini de sa partida) nd'arribbat puru su de tres gol po is meris de domu, cun Dambros. 

Totu beni, puru, po is de su Bidd'e Cresia, ca apustis de nd'essi cassau sa bìncida me is duas partidas de sa Cupa Italia, contras a is de su Crabònia, funt partius cun su pei bonu (cun su pei deretu) po su chi pertocat su campionau puru, gràtzias a sa segunda bincida de sighiu chi nd'ant pesau in domu cosa insoru (est a narai, duncas, aranti de is tifosus cosa insoru etotu): apustis de feti cincu minudus de giogu, intzandus, Capellino intzertat sa giogada giusta chi ballit po su gol de s'unu a zeru; is de su Bidd'e Cresia sighint a curri a totu coddu (cumenti si narat, e cumenti apu sèmpiri intèndiu narai, a su mancu, innoi in bidda mia, in Bidd'e Sorris, duncas) e po pagu no ndi cassant puru su segundu gol. Su segundu gol nd'arribbat, invècias, candu sa partida est giai giai po spaciai, me is minudus de su recuperu (cumenti si iat a podi narai, e cumenti naraus, a trassa de cumenti si narat in italianu etotu) Salvi Costa serrat is giogus pesendindi sa giogada chi ballit po su duus a zeru. E sigheus, duncas, in custu arrastu etotu, e arribbaus a chistionai de is duas scuadras ollastrinas, Lanusè e Tortolì, chi ndi funt artziadas in su campionau de s'Ecellenza pròpriu cust'annu: is primus gràtzias a sa bìncida de su campionau, po su chi pertocat sa Lista A de sa Promotzioni (gei si ddu eis a arregodai a solus, e desinò deu seu innoi po fai, puru, custu trabballu); is arrùbius-brau, invècias, funt stètius piscaus torra, fadendi su contu ca s'annu passau iant serrau sa stagioni a su segundu postu de sa lista. 

E duncas, in sa prima bessida de su campionau, is de su Lanusè ant cassau is tres puntus, de importu mannu meda e grais cumenti a una perda de oru (cumenti si iat a podi narai, sèmpiri chi mi permiteis de giogai unu pagheddeddu a fai su poeta), in sa partida contras a is de s'Atletico de Uri, cun is arrùbius-grogus chi ndi funt cabaus, a sa fini de sa stagioni passada, de sa Sèrie D, innoi curriant giai de una pariga de annus, deretus deretus in su campionau de s'Ecellenza. Is allenus, duncas, sighius de mister Piras in custa stagioni puru, ndi cassant su gol chi ballit po s'unu a zeru gràtzias a sa giogada, a su tiru de frimu (cumenti si iat a podi narai po chistionai de cussa ca in italianu tzerriaus "calcio di punizione"), scutu de Trindade. S'atacanti brasilianu intertat torra sa giogada chi ballit, puru, po su duus a zeru, apustis de calincuna cosa cumenti a trinta minudus de giogu. Totu beni po is de su Tortolì puru (cumenti megamu a s'arremonai ainnantis, de su restu), fadendi su contu ca sa scuadra sighida, e beni meda (fait a ddu narai) de Tori Mereu, at bintu contras a is de su Crabònia, cun su resultau, bellu e tundu tundu, de duus a zeru: sa firma apitzus de is gol est cussa de Lorenzo Cocco, cun is passagius fatus de Sulis e de Nieddu. Is de su Crabònia, invècias, serrant sa partida cun feti dexi ominis in campu, po crupa de su cartellineddu arrùbiu bodditu (ddi naru diaici) de Zazas. E de sa partida tra is de su Sant'Aleni e is de su Santa Teresa si nd'apu giai chistionau, a su mancu po unu pagheddeddu: e duncas si potzu contai ca is duas scuadras si funt depias acuntentai de unu puntu a cada unu, cun su resultau chi est abarrau siddau, po totus is noranta minudus, in su zeru a zeru, cumenti fiat a s'incumintzu duncas, ma fait a narai puru ca is duas scuadras ant fatu de totu po ndi cassai su gol, ma is difesas e is portieris, mescamente, no ant sballiau giai nudda. 

E cun custa ùrtima nova deu creu ca po custa cida puru seus arribbaus a sa fini de s'artìculu, poita su tempus e mescamente su logu chi tèngiu po si scriri (po si scriri in sardu, a su mancu) est giai bellu ca spaciau; e duncas, si incumintzu a narai ca, fadendi su contu de cantu mi seu strollicau custa cida, in s'artìculu chi at a bessiri tra seti diis (est a narai, duncas, su binticincu de su mesi de Cabudanni) eis a agatai, po su chi apa a arrannesci (ca gei ddu scieis cumenti mi pigat, de su restu...), feti (e si naru: feti!) novas chi pertocant su mundu de sa bòcia de is diletantis, fadendi su contu, pruschetotu, ca no apu acutu a si chistionai (no apu acutu a scriri nemmancu mesu bah, cumenti si iat a podi narai) de is scuadras chi currint in su campionau de sa Promotzioni, e mancai at a essi custa sa lega chi apa a pigai, po prima, in s'artìculu de sa cida chi at a benni (e sèmpiri chi su Cielu at a bolli custu beni po mei, e po bosatrus puru, est craru); e apustis nc'at a essi de castiai cumenti funt cuncodradas is cosas po su chi pertocat is calendàrius de is campionaus de sa Primu e de sa Segunda Categoria, chi ndi funt bèssius aforas pròpriu in custas ùrtimas oras. E in prus, incumintzu a si ddu arremonai, eus a depi chistionai puru (ma su tempus po ddu fai beni no s'at a ammancai de seguru) de su Torneu de is Regionis, ca po s'editzioni de su duamilla e bintises s'at a giogai, 'tendei 'tendei (cumenti apu sèmpiri intèndiu narai de sa bon'anima de mamma mia, e duncas, innoi in Bidd'e Sorris) pròpriu innoi in Sardìnnia (s'ùrtima borta est stètia in su duamilla e trexi, chi si ddu arregodais. E desinò, nci pentzu deu a si ddu arregodai). 
Ma fadendi su contu ca is giogus de su Torneu de is Regionis ant a partiri in su mesi de martzu, eia, podeis abarrai segurus de su fatu ca eus a pigai torra sa chistioni, mancai giai a partiri de sa cida chi at a benni. 
Ma po immoi, no potzu fai atru ca si saludai. Si imprassu forti!



Attività realizzata col contributo della Regione Sardegna. IMPRENTAS 2024-2025. LR 22/2018 art. 22