Sa Monteponi de Igrèsias alluit su mercau: nd'arribant Ezeadi, Marci, D'Agostino, Marteddu, Scioni, Ucheddu, Cosa e Loi

Sa stagioni noba est incumentzada feti de otu diis ma sa Monteponi de Igrèsias est currendi giai a forti meda, no in campu avatu a sa bòcia (po cussu nc'at a essi totu su tempus) ma, po imoi, pruschetotu po cussu chi pertocat su mercau.
A cantu parit in su campionau de su duamilla e binti \ duamilla e bintunu, is arrubius-brau ant a provai a si ponni in buciaca su primu postu de sa lista, chi ballit po su sartu in Eccellenza.

Is ùrtimus annus, a nai sa beridadi, no funt stetius pròpriu fortunaus, ma su presidenti Giorgio Ciccu, impari a is atrus dirigentis, est fadendi de totu po pesai una rosa chi, po cussu chi scieus in dii de oi, parit giai tra is prus togas. Sa cida passada, difatis, funt arribadas is nobas chi pertocant Simeon Ezeadi e Angelo Marci, chi nd'aproillant, tot'e duus, de su Gùspini; su secundu est de domu, naraus diaici, e torrat a bistiri sa maglia de is minerarius apustis de una pariga de annus.

De s'Arbus, invècias, ndi lompit s'atacanti Alessio D'Agostino, chi at a regalai totu s'esperièntzia cosa sua a s'allenadori Alessandro Cuccu, torra in sa panchina de sa Monteponi apustis de una stagioni trumentada meda: Cuccu, difati, si dhu arregodaus beni, nd'iat pigau su postu de Marco Cossu ma est stetiu bogau issu puru, apustis de una pariga de giorronadas, po lassai brintai a Nicola Agus.

Su Diretori Sportivu, Carlo Maramarco, no si firmat e agatat puru s'acòrdiu cun su difensori Andrea Marteddu, chi at giogau cun is de su Gùspini fintzas a su mesi de Nadali e, agoa, cun cussus de su Cortoghiana. Unu de is giogadoris prus fortis chi, po s'annu chi benit, ant decidiu de giogai cun sa Monteponi est, de sicuru, Sandro Scioni, unu centrucampista de bintiseti annus, cresciu in Patiolla, chi s'annu passau fiat su capitanu de s'Arbus. Sèmpiri de s'Arbus, nd'arribant puru Paolo Ucheddu, nasciu in su otanta-seti, e Matteo "Momo" Cosa, de su noranta-cincu. Ma is novas no acabant innoi: a totu custa truma manna de genti s'aciungit puru Lorenzo Loi, unu piciocu de Igrèsias chi ndi benit de su Cràbonia

Funt medas puru is giogadoris chi sighint a abarrai in sa rosa po un antru campionau, partendi de bomber Samuele Curreli, su portieri Mattia Biancu, Andrea Garau e Davide Biancu po sa difesa, Daniele Bratzu e Abu Sonko (ex Deximumannu), Giacomo Ariu, Andrea Iesu e is piciocheddus piticus Alessandro Fenu, Antioco Frau e Valerio Virdis.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020