In Sardìnnia est tempus de Copa Italia: bincint is de s'Ossese, de su Castiadas, de su Gùspini e de su Ilartzi; prexu mannu puru in domu de su Poltu Ridundu

E diaici seus arribbaus puru a is ùrtimas oras de su mesi de Agustu, e no si parit mancu berus, poita su tempus, de candu est incumentzada s'istadi, su bintunu de su mesi de Làmpadas, si nd'est bobau, e dhu scieus cumenti andant is cosas: candu unu est spàssiendusì o gosendusì su pasiu brintat, dhi naraus diaici, in d-un antru mundu, chenza penzamentus legius in conca, o strobus donaus de su trabballu, po nd'arremonai unu; candu nd'arribbat s'istadi, intzandus, est cumenti brintai in d-unu bisu: is cosas si parint prus drucis, is diis funt prus allirgas, is piciochedhus abarrant in giru me is bias e me is pratzas fintzas a su noti, e s'intendint is pipiedhus arriendi a totu dì, chi est una cosa chi fait beni a su coru, a cussu de is mannus puru, est craru. De crasi, peròu, ndi brintat su mesi de Cabudanni, chi est unu de cussus de importu prus mannus, a su mancui innoi in Sardìnnia: me is atrus annus passaus, candu su tialu de Covid no iat ancora ghetau a fundu e susu is fidas de sa genti de totu su mundu, in custus trinta diis chi ant a benni, giai in dònnia bidha de s'isula nci fiant festas, e cumbidus. Sa festa est (mellus: assimbillada), unu paghedhu, cumenti su giogu de sa bòcia: serbit, tra is atras cosas, a fai atobiai is cristianus fra de issus, ballit po cussus chi bivint in sa pròpriu bidha e ballit puru, mescamente, po cussus chi ndi lompint de is atras bidhas allenas; is festas peròu, cumenti medas atras fainas, funt stètias sciusciadas, est a nai chi no si podint prus fai, poita sa timoria po su spaniamentu de sa mobadia no est spaciada, mancai sa genti tengiat is punturas po su vacinu fatas de diora, e tocat a aturai atentus, e scidus, pruschetotu po no arriscai de fai un atru atonzu (iat a essi su segundu de sighiu, apustis de cussu de su duamilla e binti) tupaus in domu, chenza podi bessiri, cun totus is bar e is atras atividadis serradas. A nai sa beridadi, is festas funt sa cosa chi incumentzat a mi spedhiai de prus: po totu sa fida mia, po prus de corant'annus duncas, apu abetau is diis de sa festa de Sant'Arega, in Deximumannu, cun s'afrodhiu de unu pipiedhu, e puru immoi de mannu, mancai is tempus de is giogus s'iant acabbaus de unu bellu arrogu de tempus, s'afrodhiu est sèmpiri su pròpriu. Nc'est pagu de fai, is festas mi pigant beni beni meda, est craru, a su coru, a sa brenti e a sa conca: mi torrant a donai allirghia, prexius e fintzas gana de bivi. Cussus cincu diis de festa fiant, e no megu a brullai, is prus togus de totu s'annu, prus togus de sa dì de Pascamanna, prus togus de sa primu dì de s'annu nou, prus togus fintzas de sa dì innoi fatzu is annus. De su chi si sciri e si intendit in dì de oi, peròu, e podeis cumprendi beni cantu mi dispraxiat, po Sant'Arega e totus is atras festas chi festus costumaus a si bivi in su Campidanu de mesu (partendi de Santa Maria in Uta, arribbendi a Santa Maria de Serramanna, passendi po Santu Basibi in Deximaputzu e Santa Vida in Bidd'e Sorris) ant a essi torra tempus lègius: fortzis nc'at a essi sa possibbilidadi de cuncodrai calincuna processioni, e custu bolit nai chi nc'at a essi festa feti po is atividadis chi pertocant sa cresia e sa religioni e duncas is santus, ma nc'ant a essi pagu festas me is barracas, me is locandas, me is tzilleris, cumenti festus costumaus a fai fintzas a su duamilla e binti, e nc'at a essi pagu spàssiu po is prus pitichedhus, est a nai nudha giogus, nudha giostras. De su restu, dhu scieus giai de candu est incumentzau totu custu budrellu lègiu acapiau a su tialu de virus, chi sa vida cosa nosta no podiat essi prus sa pròpria; is de su Guvernu, de su restu, ant fatu calincuna cosa cumenti a cincu-ses mesis de sighiu, narendi chi is tempus fiant mudendi, e po sèmpiri. Sa cosa chi donat su scrafìngiu prus mannu, peròu, dhi naraus diaici, est biri is grandus campionis de sa Sèrie A chi currint avatu a sa bòcia e is stadius prenus de cristianus a dhu sus castiai, ma is pratzas e is bias sbuidas me is diis de festa. Su chi podeus isperai, a su mancu po oi, chi est s'ùrtima dì de su mesi de Agustu, est chi, cumenti ballit po su giogu de sa bòcia, nci potzant essi chitzi nobas bonas po su chi pertocat is festas me is biddas. Calincuna cosa, a nai sa beridadi, est torrendi a nasciri, a su mancu in Sardìnnia, apustis de totus custus tempus scurus e grais: sa cida passada, difatis, seu andau a Ollolai po sa festa de Santu Bartoli e m'est prantu su coru de prexu a biri una bidda intera, partendi de is pipiedhus prus pitichedhedhus fintzas a arribai a is becius allirgus e arzillus, totus in pari in sa pratza de sa cresia, chenza carotedhas in sa buca e in su nasu, e cun is caras e is ogus drucis drucis po s'arrisu. S'ispera cosa mia est de torrai a biri chitzi, in dònnia bidha, is festas me is pratzas e me is bias, diaici cumenti eus a torrai (mellus: seus torrendi) a biri is partidas de bòcia, poita sa genti tenit bisòngiu, e meda puru, de torrai a si spreviai, a si spàssiai cumenti festus costumaus a fai, poita sa cosa de papai e de bufai no bastant po bivi beni, po bivi cumenti deus cumandat, diaici si narat in bidha mia, ma serbint puru, e meda, is ocasionis po is atobius. Po imoi, intzandus, si depeus acuntentai, po modu de nai, de is partidas de bòcia de is de s'Eccellenza, chi dominigu passau, est a nai su binti-noi de su mesi de Agustu, funt torraus in campu po giogai is primus noranta minudus de sa Copa Italia e, duncas, de sa stagioni noba, chi est cussa de su duamilla e bintunu \ duamilla e binti-duus, chi isperaus potzat essi prus fortunada de cussa chi si seus lassaus a is pabas. Su mundu de sa bòcia torrat a partiri, intzandus, e apustis de totus custu fuedhus no podeus fai atru che si nci ghetai aintru a is chistionis de importu prus mannu po nosu de su Diario Sportivo. Sa primu bessida po su chi pertocat sa Copa Italia, dhu megastus a acinnai ainnantis, at regalau is primus prexus a totus is tifosus, partendi pròpriu de is de su Castiadas, chi funt stètius is primus a torrai in campu, de sabadu, su bint-otu de su mesi de Agustu, impari pròpriu a is arthanesus de s'Idolo, cun is meris de domu chi ant bintu sa partida po tres a zeru e, diaici, tenint giai sa metadi de su trabballu fatu, pentzendi a sa partida de sa torrada, est craru, poita is de s'Idolo, po sighiri a curri in sa Copa, iant a depi binci con prus de tres gol. Su primu gol de sa partida nd'arribbat a su de trinta-ses minudu in su primu tempus, gràtzias a sa giogada de Villa, su giogadori chi nd'est aproillau in domu de is niedhus-birdis apustis de sa stagioni, toga meda, impari a is de su Budune. Su segundu gol nd'arribbat feti in su segundu tempus, apustis de otu minudus de giogu, cun Marongiu chi no arrannescit a cassai sa bòcia scuta de su cumpangiu cosa sua atotu, Stochino, e arregalat su gol a is ollastinus de domu. Me is ùrtimus minudus de sa partida, intzandus, nc'est puru su de tres gol po is de su Castiadas, cun Santoro chi serrat diaici is contus. Si cumprendit beni, diaici, totu s'afrodhiu de s'allenadori de is niedhus-birdis de su Castiadas, Virgilio Perra, chi si gosat sa partida toga meda pesada de is piciocus cosa sua, mancai in campu no nci fessint is ùrtimus giogadoris arribbaus in custa fentana de su mercau, cumenti is brasilianus Zuchi e Brondani, po su chi pertocat sa difesa, su centrucampista Guseynov e Scioni, chi s'est ingotu in s'ùrtimu minudu ainnantis de sa partida. Tra is giogadoris chi ant giogau mellus, nci funt de seguru Villa, chi eus giai arremonau, Santoru, chi at agatau su gol me is ùrtimus segundus de sa partida, su centrucampista Steri, chi est su crobedhu de sa scuadra (e duncas de su giogu), impari pròpriu a Ruggeri; chenza si ndi scaresci de su capitanu, Carboni, chi sabudu at giogau in difesa, e su portieri Forzati. Is nobas prus drucis nd'arribbant de is piciochedhus prus piticus, partendi de Mattia Melis, nasciu in su duamilla e cuatru, Serra, de su duamilla e duus, Cardia, sèmpiri de su duamilla e duus, e Zedda, su prus "beciu" de is cuatru, dhi naraus diaici, fadendi su contu chi est nasciu in su duamilla e unu. «Chi fadeus su contu chi custa est stètia sa primu bessida de sa stagioni noba — scoviat Virgilio Perra — seu prexau e cuntentu po cumenti ant gigoau sa partida is piciocus cosa mia. Is giogadoris prus giòvunus ant fatu beni meda e po su chi pertocat sa saludi de is cambas e de is prumonis nci seus; cumenti eus a sighiri cun is allenamentus, e cun sa stagioni, is cosas iant a podi andai fintzas mellus de su chi eus biu oi. Cust'annu ci funt feti cincu giogadoris chi ant giogau in su Castiadas de s'annu passau, po su restu sa scuadra è totu noba e pròpriu po custu sciu chi nc'est ancora meda de trabballai, ma podeus nai puru chi sa bia chi eus pigau est cussa bona, aici mi parit a su mancu». Perra est prontu po si dha gherrai in su campionau puru, apustis de sa primu bìncida boddita in sa Copa. «Chenza presumèntzia, e cun totu s'umilesa chi tengiu, potzu nai chi curreus po binci su campionau e duncas po acabbai sa stagioni cun su primu postu de sa lista in buciaca, e no feti po si sarvai; depu chistionai craru, cun onestadi: sa scuadra mia est forti e no sumportu cussus allenadoris chi chistionant de sarvesa candu podint contai apitzus de grandus campionis. Mancani chenza essi spendiu una barca de dinai, seus arrannèscius a su pròpriu a ndi pesai una rosa bella forti, ma imoi eus a depi essi prus abbilis de is atrus, in campu e no feti cun is fuedhus». Is scuadras fortis chi ant a curri po su primu postu de sa lista no ammancant de seguru: «Pentzu po primu a is castedhaius de sa Ferrini, po is giogadoris chi ant pigau in custa fentana de su mercau e puru po totus is giogadoris fortis chi dhoi teniant giai in sa rosa de s'annu passau; apustis nci pongiu is de sa Nuorese, po sa stòria chi tenint a is pabas: seus sèmpiri chistionendi, de su restu, de una de is scuadras prus becias e togas chi s'agatant in Sardìnnia in dì de oi. Is de sa Nuorese ant pigau giogadoris fortis po cuncodrai mellus sa rosa e ant a essi una scuadra tostada de binci. Eus a depi aturai atentus, tra is atrus, a cussus de s'Ossese puru, poita me is ùrtimus annus ant fatu beni meda e poita, pruschetotu, funt arrannescius a apoderai in sa scuadra totus is giogadoris chi teniant giai, cosa chi andat ainnantis, a nai sa beridadi, de una bella pariga de annus. Po sa cursa conca a sa Sèrie D no si podeus peròu scaresci de is de su Ilartzi, ma puru is de sa Villacidrese (sa scuadra de Biddaxidru ndr) ant fatu unu trabballu mannu meda in su mercau de custa istadi e ant a fai a timi totus is atras scuadras, custu est pagu ma est seguru». Po su chi pertocat is atras partidas, chi si funt giogadas su domìnigu merì, nd'arribbat sa primu bincida de sa stagioni noba po is de su Poltu Ridundu puru, chi in domu cosa insoru ant fatu duus gol a is strangius de s'Ilvamaddalena: apustis de doxi minudus de giogu, is piciocus sighius de mister Simone Marini aciapant su primu gol gràtzias a sa giogada de Ruzzittu, chi sparat sa bòcia a is pabas de Manis cun d-unu tiru forti e bellu meda. A sa mes'ora de giogu, sèmpiri s'atacanti ex Torres e Altzaghena si guadangiat unu tiru de is undixi metrus, ma nci penzat Pala a scudi sa bòcia aintru de sa porta. In su segundu tempus Manis cassat unu tiru de Mulas, perigulosu meda; sa scuadra de s'Ilvamaddalena, invecias, no arrannescit a torrai a oberri sa chistioni de sa partida. Bincint afora de domu puru is biancu-nieddus de s'Ossese, cun Giampaolo Loriga, chi est s'allenadori nou, chi podit incumentzai sa stagioni cun d-una bella bincida, in domu de is tattaresus de su Li Punti de s'allenadori Cosimo Salis. Sa partida s'alluit a su de trinta-ses minudu, candu Madeddu scudit unu bellu tiru cun su pei mancu. Sèmpiri Madeddu, in su segundu tempus de sa partida, andat acanta a su segundu gol, ma Canalis sarvat is suus. Mannu meda su traballu, tra is atras cosas, po s'arbitru, Andrea Pani di Tattari, chi nd'at depiu bogai aforas tres cartellinedhus arrubius: su primu po Luiu, de su Li Punti, e apustis, me is ùrtimus minudus de sa partida, contras a Asara, sèmpiri po is tattaresus, e contras a Gueli, de s'Ossese. Currit a forti meda puru su Ilartzi de s'allenadori Ivan Cirinà, chi fait duus gol in domu de su Bosa, chi at decidiu de sighiri a andai ainnantis cun Tore Carboni. A su de binti-seti minudu de su primu tempus, Chergia fait su gol chi ballit po s'unu a zeru, apustis de sa giogada de Cocco; is de su Bosa circant de torrai a oberri sa partida ma abarrant in dexi ominis in campu po crupa de su cartellinedhu arrubiu bodditu de Maida; apustis, puru Marco Carboni ndi ingollit su cartellinedhu arrubiu, cun is meris de domu chi depint acabbai sa partida cun feti noi giogadoris in campu. Su segundu gol po is strangius nd'arribbat gràtzias a sa giogada de Cossu, unu de is piciochedhus prus piticus chi nci fiant in campu, nasciu in su duamilla e tres. Is de su Ilartzi funt cabaus in campu chenza duus giogadoris tra is prus fortis chi tenint in sa rosa: seus chistionendi de su difensori Gutierrez, e de s'atacanti Doukar, chi at incumentzau tradu cun is allenamentus. Is de su Taloro de Gavoi si depint acuntentai, invecias, de unu paregiu feti, in sa partida de importu mannu contras a is de sa Nuorese: is gol nd'arribbant totus in su segundu tempus, cun s'argentinu Castro chi intzertat sa giogada cun d-unu tiru, de frimu, cun su pei mancu, chi abbruxiat su portieri de is strangius, Congiunti. Is noguresus, sighius cust'annu de Cantara, me is ùrtimus minudus de giogu ndi cassant s'unu a unu gràtzias a sa giogada de Vinci. Is de su Gùspini ndi sciusciant is bisus de s'Arbus: is piciocus sighius de Fabrizio Carracoi ndi faint cuatru, in domu allena, a sa scuadra sighida de Nunzio Falco: su primu gol de sa giorronada nd'arribbat apustis de dexi minudus de giogu gràtzias a Bruno Bravo, chi in s'istadi fiat acanta acanta a s'acapiai pròpriu cun is de s'Arbus. In su segundu tempus, is strangius faint atrus tres gol cun Pedoni e po duas bortas de sighiu cun Luca Floris. Si serrat cun su resultau de unu a unu sa partida, toga meda, tra is castedhaius de sa Ferrini e is campidanesus de su Muristeni: apustis de trinta minudus, D'Agostino aciapat su primu gol, apustis de is duus paus pigaus de Podda e Camba. Is de su Muristeni si faint a biri in atacu cun Fangwa, toga meda sa partida po su piciochedhu chi nd'aproillat de su Murera, ma cassant su gol chi ballit po s'unu a unu feti me is ùrtimus segundus, cun sa giogada de Melis, a tres minudus de sa fini. Si serrat invecias chenza nisciunu gol sa partida tra is meris de domu de s'Asseminese e is cualtesus de su Sant'Aleni: is allenus ant giogau totu su segundu tempus de sa partida cun d-unu omini in prus in campu, poita Scalas nd'at bodhitu su cartellinedhu arrubiu apustis de cincu minudus de giogu, ma Accinelli at sarvau is suus, po su prèxiu de s'allenadori nou de is asseminesus, Luca Suella.

 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22