In Sardìnnia sa "Fase 1" at a sighiri a su mancu fintzas a su bintises de su mesi de Abrili; in Sèrie A calincunu ghetat is primu dudas

E duncas, Pasca Manna puru si dda s'eus lassada a is pabasa, mancai serraus aintru de domu. A oi, su cuindixi de su mesi de Abrili, funt passaus prus de trinta diis de s'incumintzu de cussa chi tzerriaus  "corantena" e ancora no si bidi sa luxi in totu custu carraxu e in totu custu scuriu.

In s'interis, su guvernadore de sa Sardìnnia, Christian Solinas, at fatu sciri a totus is sardus ca is règulas po agiudai a cumbati su spaniamentu de su Coronavirus ant a balli, chenza nisciunu arrangiu apitzus de cantu scritu me is antrus comunicaus, a su mancu fintzas a su binti-ses de su mesi de Abrili, ma nc'est giai calincuni chi timit ca totu custu at a bandai a innantis a su mancu fintzas a su tres de su mesi de Maju. Poi s'at a biri ita at a sutzedi.

Cussu chi parit craru è chi is dudodus, est a nai totu cussus chi  no isperant prus de torrai a partiri a giogai, funt sèmpiri de prus puru in sa Sèrie A, e no feti in Lega Pro e tra is diletantis.
Me is ùrtimas oras, difati, funt benidas a pillu is boxis de Massimo Cellino, chi imoi est su presidenti de su Brèscia, ma totus is sardus ddu connoscint e si ddu arregodant poita est stetiu puru su presidenti de su Casteddu, e de Urbano Cairo, su meri, tra is antrus, de su Torino. Cellino, cun su Brèscia a s'ùrtimu postu de sa lista, cun feti sexi puntus in buciaca e noi puntus prus pagu de cussa chi tzerriant sa "quota salvezza", est a nai su tanti chi, secundu is primu contus, iat a serbiri po abarrai po un antru annu in Sèrie A, at scoviau in d-una ciaciarrada cun is de su "Giornali de Brèscia": «Torru a ripiti: chi sa FIGC at a detzidi de giogai torra, deu no ap'a fai cabai in campu sa scuadra cosa mia. No bollu intrulliai nemus e mi nd'ap'a pigai totus is dannus de custu iscioberu».

Po Cairo, chi pigat po bonas is bideas de Giovanni Rezza, chi est su diretori de su "Dipartimentu po is mobodias infetivas de s'Isituto Superiore di Sanità" e chi est unu de is concas chi faint parti de su cumitau chi est sighendi is cosas apitzus de custu dannu mannu chi si nd'est protziu in conca, is cosas funt craras: «In dii de oi no si podit pentzai de torrai a giogai a sa fini de su mesi de Maju. E deu puru nau chi est unu pecau».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020