Seus arribbaus a sighiri is ùrtimas partidas po su chi pertocat sa stagioni de su duamilla e binticincu - duamilla e bintises

E duncas, seus arribbaus giai giai a sa metadi de su mesi de maju, e duncas, eia, giai a sa metadi de su de cincus mesis de custu duamilla e bintises, e si iat a podi narai, ca po sa metadi (torra), is giogus po cust'annu puru funt giai giai fatus, ma po ddu podi narai a forti at a tocai a abertai su mesi de lampadas, chi at a incumentzai tra calincuna cosa cumenti a dexiotu diis a incumentzai de oi; e ita boleis chi siant, de su restu, mi megu a solu a solu, dexiotu diis de si scroxai? (po manigiai unu fueddu chi sceru fatu fatu, isperendi ca nesciunu de bosatrus tengiat calincuna cosa de murrungiai po custu). 

E duncas, eia, atacu diaici, deretu deretu, incumintzendi a fai, po primu cosa (ca de su restu, eia, est una de is primus cosas chi mi benint de fai, de si contai, candu atacu a scriri s'artìculu chi ndi pesu po is Novas de su Diàriu Sportivu, in su sardu chi si fueddat innoi in Bidd'e Sorris, e duncas, eia, in su Campidanu de Mesu), su contu de su tempus chi si seus lassaus a is pabas (cuatru mesis e mesu, a fai beni beni is contus, e a fai is contus acoitaus, e meda puru) e su contu de su tempus chi s'ammancat ainnantis de si nci ghetai, a fundu e susu, in su mesi innoi, 'tendei 'tendei, at a torra a partiri s'istadi, cun totu su chi custu pertocat. 

Po mei s'istadi, po incumentzai, bollit narai su de mi podi pigai unu pagheddeddu de pàsiu, fadendi su contu ca sa stagioni de su trabballu cosa mia (sa parti prus fadiosa de sa stagioni de su trabballu cosa mia, chi pròpriu si depu scriri sa cosa in gràtzia de Deus, e duncas, cun totus is cosas scritas pretzisas) incumentzat a sa fini de su mesi de agustu (cumenti is scuadras torrant a atacai cun sa preparatzioni atletica, concas a sa stagioni nova, po si cumprendi mellus puru; e cumenti torrant a partiri is giogus chi pertocant sa Cupa Italia, me is primus diis de su mesi de cabudanni) e acabbat cumenti si serrant is giogus, e intzandus, apustis de is ùrtimas partidas finalis, apustis de sa stagioni regolari, cumenti est sucedendi, de su restu, pròpriu in custu perìodu, innoi is scuadras sardas chi currint me is campionaus pesaus de sa Federatzioni Italiana de su Giogu de su Càlciu e de is de sa Lega Natzionali de is Diletantis, funt gioghendi is ùrtimas batallas, cun is scuadras chi funt circhendi de ndi cassai s'artziada de categoria, e sa cosa ballit po is de s'Ilva de Sa Maddalena, po su chi pertocat su campionau de s'Ecellenza, passendi de is de su Bonorva e de sa Villacidrese, (sa scuadra, est craru, de Biddacidru), po su chi pertocat sa Promotzioni, e arribbendi a is de s'Antiochense, sa scuadra chi nd'ant pesau in Sant'Antiogu, e gei s'at a cumprendi beni de su nomini, deu creu, arribendi a is de su Fonne, e a is tattaresus de sa Lanteri, po su chi pertocat sa Primu Categoria, e chentza de si ndi scaresci de is scuadras de sa Segunda Categoria (e megu a chistionai de is paulesus de La Salle, de is de sa Monreale de Santu Engiu, de is de su Gulfu Aranci, de is de su Minerva e de is de s'Otana), ca mancai s'apa a arremonai mellus in custu artìculu etotu (ma apustis, apa a depi biri cantu tempus, e mescamente, cantu logu apa a tenni a dispositzioni, e cantu logu m'at a abarrai apustis chi spaciu de scriri totus is cosas chi tengu badda badda in conca e chi mi iat a praxi a s'intregai, est craru). 

E in s'interis chi totus custas scuadras currint, ancora, mancai sa basca chi est fadendi, po ndi cassai s'artziada de sa categoria (seus chistionendi, intzandus, mi parrit craru, de totus is scuadras chi ant serrau sa stagioni cosa insoru a su segundu postu de sa lista) ddoi funt puru is scuadras chi ant serrau (o chi funt serrendi) is giogus po ndi cassai sa sarvesa, e pròpriu de custu, mancai, apa a partiri po custa cida. 
Ma ainnantis de si nci fuiai, a fundu 'e susu, cumenti si narat innoi in Bidd'e Sorris etotu, mi tocat, mi spetat a si fai su contu de su tempus chi est fadendi puru, ca est sa cosa chi fatzu dònnia cida. E duncas, eia, po is ùrtimas partidas de sa stagioni de su duamilla e binticincu – duamilla e bintises est fadendi una bella basca, ca est sa cosa, de su restu, ca s'abertaus chi fetzat in su beranu, ca mi benit totu de pentzai: bai e circa cumenti ant a fai is giogadoris a curri, ancora, apustis de noi mesis de campionaus, cun custa basca chi est fadendi; ma a sa fini is giogadoris, mancai nosu de su Diàriu Sportivu chistionaus de is diletantis (chi funt cussus chi ndi cabant in campu po si spreviai, po si spàssiai, e no de seguru po su dinai, e po trabballu, cumenti faint, invècias, is grandus campionis de sa Sèrie A), gei funt allenaus po beni de is allenadoris cosa insoru, e duncas, eia, seu seguru ca nci dda ant a fai a serrai is giogus po custa stagioni puru chentza de si morri de sa basca (e megu a brullai, si cumprendit, berus est?). 

E duncas, immoi chi seus arribbaus a custu puntu de sa storia, andu a si contai, po su chi acudu (po su chi apa a acudi, po ddu narai diaici puru), unu pagheddu de novas friscas friscas (ca sa friscura incumentzat a arrachedi, a speddiai, berus est?) chi nd'arribbant de is campus innoi si funt gioghendi is partidas finalis, e custu bollit narai ca po custa cida no s'apa a fai sa conca a acua cun totus is contus, e is contixeddus, e is strollichiminis chi tengu badda badda in mesu a is crobeddus (po ddu narai diaici, cumenti m'est bèssiu, e diaici apa a lassai sa cosa), mancai is novas chi nd'arribbant de su restu de su mundu no ammanchint, e no siant pròpriu tra is prus drucis chi podestus bisai de intendi, partendi de is gherras chi nci funt ancora in custu mundu (in custu mundu chi mi parrit macu e totu ghetau apari, po ddu narai diaici) e chi ancora no spaciant, e chi ancora no acabbant (e giai giai mi parrit ca a calincunu ddi praxiat, e meda puru, custa cosa de ndi pesai is gherras), e fintzas a nd'arribbai a una de is novas chi seu intendendu fatu fatu, mescamente in custas ùrtimas diis, e chi pertocat unu virus nou ca, a cantu parrit, est impentzamentendu, giai, metadi de su mundu, ca immoi si nd'acataus ca funt passaus feti cuatru annus (antzis, funt passaus prus pagu de cuatru annus, a bolli essi pretzisus) de candu est acabbada cussa pesti lègia ca seus costumaus a tzerriai Covid, e me is giornalis funt torrendi a chistionai de un antru virus, ca po immoi no est fadendi dannus (est a narai, ca no est fadendi mortus, mancai nci siat una persona chi stait, giai, mabi meda), e chi si tzerriat, de su chi ndi potzu cumprendi, "Hantavirus"; ma po custa cida no si nd'apa a chistionai nemmancu po mesu segundu de custa cosa, e no s'apa a chistionai nemmancu po mesu segundu de sa crisi chi nci iat a podi essi, chi ndi iat a podi bessiri aforas, e sèmpiri chi sa gherra chi funt fadendi contras a is de s'Iran sighit a andai ainnantis (cumenti parrit chi depat sucedi, ca de si ponni de acòrdiu po dda acabbai, a cantu parrit, ancora no nc'est su tanti), po su chi pertocat su carburanti de nci ghetai aintru de is aereus (ddi naru diaici), ca, cumenti si funt narendi e arrepitendi giai de una bella pariga de cidas (sa cantzoni, ddi naru diaici, cumenti naràt babbu miu, est andendi ainnantis de sa Cida Santa de Pasca), iat a podi no bastai po totus, e si ddu megant a narai, duncas, pròpriu immoi chi est torrendu s'istadi, e si cumprendit, in s'istadi si praxit (e chistionu po mei puru) a si nd'andai a biri atrus logus (si praxit a si nd'andai a travessu, cumenti si iat a podi narai), mancai deu apa giai decìdiu ca de cust'annu, e bai e circa po cant'annus m'at a tocai, m'at a spetai custa cosa, mi nd'apa a abarrai bellu e chietu in s'isula cosa mia, ca tra is atras cosas mi praxit fintzas a m'amachiai (e no potzu narai ca seu bivendi in unu logu lègiu, e megu a chistionai de s'isula, est craru, ma a sa fini a mei praxit puru su Campidanu de Mesu, mancai siat, po su prus, unu logu innoi ndi pesant trigu e canciofas, e duncas, su chi si podit biri benit a essi pagu poèticu, po ddu narai diaici. Ma a sa fini, est cussu chi tengu totu a giru a giru, e custu m'aguantu e mi gosu, po serrai sa chistioni diaici); e duncas, eia, nc'est s'arriscu ca su carburanti no potzat bastai po totus, po totus is aereus chi si movint immoi in s'istadi, ma de sa cosa, mancai, nd'eus a chistionai mellus in su benidori. 

Po immoi, torrendi a nosu, si potzu feti narai ca su tempus at a essi bonu, a su mancu fintzas a custu domìnigu, ma s'ùnica cosa est ca nc'at a essi unu pagheddeddu de bentu forti (de su chi apu lìgiu, a su mancu, immoi immoi, me is previsionis de su tempus), ma seus costumaus a sumportai su bentu forti puru, e de su restu, cust'annu gei at acutu a ndi fai, de diis de bentu forti, e duncas, nd'eus a depi sumportai un'antra pariga. 

Ma torraus a nosu. E parteus, chi seis de acòrdiu, cun su chi est sucèdiu in sa Sèrie D, chi est su campionau prus matucheddu chi sigheus me in su giàssu de su Diàriu Sportivu, ma chentza de si ndi scaresi de sa Sèrie C, innoi currit sa Torres, cun is arrùbius – brau chi funt gioghendi pròpriu is duas partidas finalis po circai de ndi cassai sa sarvesa, e po immoi is cosas ddis funt andendi beni, fadendi su contu ca ant bintu sa primu partida (in sa bessida chi ballit po s'andada, po essi prus crarus puru) in domu de is de su Bra, cun su resultau de unu a zeru, e immoi ant a depi circai de no perdi in sa partida de sa torrada, chi s'at a giogai a su "Vanni Sanna", in Tattari, pròpriu custu sabudu chi at a benni, chi nd'at a arribbai tra una pariga de diis. 

E duncas, eia, deu ia a partiri cun is scuadras sardas chi currint in su campionau de sa Sèrie D, e no parrit berus (si imboddiu sa chistioni diaici, chi mi permiteis de manigiai custus fueddus e de giogai a fai unu pagheddeddu su poeta, e no feti su giornalista sportivu), ma nci funt duas scuadras, sardas, una de su nord, e megu a chistionai de is de s'Olbia Terranova, e una de su sud, e megu a chistionai de is de su Muristeni (chi funt, tra is atras cosas, bixinus de domu, fadendi su contu ca tra sa bidda cosa mia, sa bidda innoi bivu, po ddu narai mellus puru, chi est Bidd'e Sorris, e Muristeni nc'ant a essi seti-otu chilometrus de tretu de fai), funt bivendi storias, e duncas, eia, situatzionis diversas: is primus, 'tendei 'tendei (cumenti si megàt sa bon'anima de mamma mia), mancai siant a su primu annu, a sa primu stagioni in unu campionau de importu cumenti est sa Sèrie D, ant serrau sa stagioni regolari a su de tres postus in sa lista, cun calincuna cosa cumenti a cincuantatres puntus in buciaca (eia, sa scuadra sighida de Angheleddu est stètia sa prus forti, e megaus a chistionai, est craru, de is scuadras sardas, e deu creu ca si cumprendat bastanti beni) e immoi si funt gherrendi s'artziada in su campionau de sa Sèrie C (innoi, eia, iant a podi agatai is de sa Torres, chi est cussu chi isperaus totus, de su restu. Ca no podeus fai atru ca fai su tifu po totus is scuadras de s'isula chi currint me is campionaus natzionalis, est a narai, duncas, me is campionaus pesaus cun is scuadras de is atras regionis, fadendi su contu, apustis, ca is chi giogant in sa Sèrie C funt, giai giai, giogadoris professioneris, cun totu custu chi sa cosa cumportat, e mi parrit bastanti craru puru): po primu cosa, ant depiu binci sa batalla contras a is de su Flaminia, sa scuadra chi nd'at cassau su de cuatru postus in sa lista, cun cincuantunu puntus (chi benint a essi, est craru, duus in mancu de is chi tenint is campidanesus); e duncas, eia, acudu a si narai, po incumentzai, ca sa partida, sa isfida chi s'est giogada custu fini de cida passau s'est serrada cun su resultau, de importu mannu meda po is muristenesus, de tres a tres; e gràtzias a custu resultau, intzandus, is de su Muristeni tenint, immoi, sa possibbilidadi de si giogai sa partida finali, chi at a balli, 'tendei 'tendei, po ndi artziai in Sèrie C. E immoi, scieus giai ca is de su Muristeni si dda ant a depi biri contras a is de su Trastevere, chi at bintu sa partida cosa sua contras a is de s'Albalonga, cun su resultau, sicu e tundu tundu (cumenti si iat a podi narai) de duus a zeru. Po is de s'Olbia, invècias, nc'est sa segunda cabada de categoria de sighiu (chi mi permiteis de manigiai custu fueddu), fadendi su contu ca s'annu passau is biancus ndi funt cabaus de sa Sèrie C in su campionau de sa Sèrie D, e immoi ant a depi giogai in su campionau de s'Ecellenza (ma sèmpiri chi s'assòtziu no at a fai sa domanda po benni torra piscau po curri torra in su campionau de sa Sèrie D, ma in dì de oi no si sciit, no si cumprendit beni ita totu nd'at a bessiri aforas, fadendi su contu ca is meris de sa scuadra tenint calincunu strobbu. E de sa cosa, mancai, si nd'apa a chistionai mellus in totus is mesis de s'istadi, ca su tempus, de su restu, no s'at a mancai de seguru). 

Po su chi pertocat s'Ecellenza, invècias, chi est su campionau de importu prus mannu tra totus cussus chi si giogant in Sardìnnia, si potzu contai ca is de s'Ilva de Sa Maddalena ant bintu is duas partidas chi ant dèpiu giogai contras a is de su Tèmpiu: sa isfida chi est ballia po s'andada s'est serrada cun su resultau de unu a zeru po is maddaleninus, e immoi, sa segunda partida puru s'est serrada cun sa bìncida de is de s'Ilva, chi nd'ant pesau tres gol (chentza de ndi boddiri nemmancu unu), cun Animobono, De Cenco e Alvarez. E custu, duncas, po su chi pertocat sa partida po ndi cassai s'artziada in su campionau de sa Sèrie D, ma immoi is de s'Ilva ant a depi giogai atras duas isfidas, contras a is de su Viarègiu, cun sa partida de s'andada chi s'at a giogai in Toscana su binticuatru de custu mesi etotu (su binticuatru de su mesi de maju, duncas) e sa partida chi at a balli po sa torrada s'at a giogai a sa fini de custu mesi etotu, e duncas, eia, su trintunu. 

Po su chi pertocat sa batalla po ndi cassai sa sarvesa e, duncas, po tenni sa possibbilidadi de giogai po un antru annu puru in su campionau de s'Ecellenza, sa bona sorti at basau is de su Santa Teresa, (Lungone, cumenti si narat in sardu), chi ant bintu, po duas bortas, contras a is de su Uddusò, chi ndi torrant a cabai, invècias, in su campionau de sa Promotzioni apustis de feti un annu: sa primu partida (si ddu contu po benni a essi prus pretzisu puru, cumenti iat a depi essi unu giornalista candu, a su mancu, bollit fai beni su trabballu cosa sua) s'est serrada cun su resultau de tres a unu po is de su Lungone, chi ant bintu sa partida de sa torrada puru cun su resultau de unu a zeru. E custu, duncas, po su chi pertocat is ùrtimas partidas po su chi pertocat s'Ecellenza. 

Ma po su chi pertocat su campionau de sa Promotzioni puru, is scuadras funt sparendi is ùrtimus cropus, chi mi permiteis de ddu narai diaici. 
E duncas, deu ia a partiri, è sèmpiri chi seis de acordiu cun mei, andendi a castiai cumenti funt acabadas is partidas po su chi pertocat sa sarvesa, est a narai, is partidas finalis ca seus costumaus a tzerriai, a sa moda de is ingresus, play-out. 
Po sa Lista A, intzandus, si funt agataus, is unus contras a is atrus, is de s'Ovodda, chi funt allenaus, a su mancu po su chi pertocat sa segunda parti de custa stagioni, de Sandru Crisci (fadendi su contu ca po sa primu metadi de s'annu, est a narai, fintzas a su mesi de idas, e fintzas a su Nadali, is de s'Ovodda fiant sighius de Manuel Moro), e is de su Càlciu Pirri: intzandus, si potzu narai puru, immoi chi nci seu, ca is duas scuadras iant serrau sa stagioni regolari, est a narai, mellus puru, su campionau, a su de catodixi postus in sa lista (po su chi pertocat is pirresus) cun trinta puntus in totu, cumenti trinta puntus teniànt is de s'Ovodda etotu. E duncas, eia, sa primu partida, chi s'est giogada in domu de is barbaricinus, s'est serrada cun su resultau de zeru a zeru, ma a sa torrada is de s'Ovodda nd'ant cassau sa bìncida de sa partida, me is ùrtimus minudus de giogu, gràtzias a su gol pesau de Gabriele Vacca, unu giòvuneddu (ddi naru diaici) nàsciu in su duamilla e noi (chi no tenit nemmancu bint'annus, duncas, a fai beni is contus) chi at intzertau sa giogada, no naru de sa vida, ma de s'annu eia, custu est pagu ma seguru, cun su gol chi at permitiu a sa scuadra cosa sua de ndi cassai sa possibbilidadi de curri po un antru annu (est a narai, duncas, po sa stagioni de su duamilla e binticincu – duamilla e bintises) torra in su campionau de sa Promotzioni, mancai cust'annu is cosas ddis siant andadas unu pagheddu a trotu. Po is de su Càlciu Pirri, chi nd'ant buscau su gol candu ammancàt feti unu minudu po sa fini, po s'acabbu de sa partida, abarrat totu si disprexei de ndi depi cabai in Primu Categoria, apustis de una bella pariga de annus de candu ndi iant cassau s'artziada de categoria cun Busanca (chi est unu de is allenadoris cun s'esperièntzia prus manna chi s'agatant in dì de oi in Sardìnnia) sètziu in sa panchina cosa insoru. A is pirresus, duncas, no funt bastadas is cuatru partidas chi ant bintu (po calincuna cosa cumenti a doxi puntus) e, in prus, is dexiotu partidas (e no funt pagus de seguru) chi ant serrau cun su resultau siddau in paridadi, e chistionaus, est craru, de sa stagioni regulari. E custu po su chi pertocat, cumenti s'apu arremonau immubagora, sa Lista A (o po ddu narai mellus puru: is play-out de sa Lista A). 
In sa Lista B, invècias, e megu a chistionai, mi parit bastanti craru, sèmpiri de su campionau de sa Promozioni, sa partida chi est bàllia po ndi cassai sa sarvesa s'est giogada (cumenti eis a sciri giai beni, ma chi no ddu scieis, o chi si ddu seis giai scarèsciu, intzandus spetat a mei a si ddu torrai a arregodai) tra is de su Li Punti e is de su Istintinu, sa scuadra sighida de su presidenti Angelu Schiaffino. A sa fini de is centu e otanta minudus, a fai sa festa po sa sarvesa funt stètius is de su Li Punti, ca iant serrau sa stagioni regolari cun calincuna cosa cumenti a coranta puntus in buciaca (a narai sa beridadi, is puntus iant a essi corantunu, ma unu puntixeddu ammancat de su contu poita is de sa Federatzioni ant postu una penalidadi a s'assòtziu tattaresu, po unu dannu chi ndi fiat bèssiu aforas, me is annus passaus, cun unu giogadori de sa scuadra, Andrea Fusco, po chistionis de dinai ca su giogadori no iat ancora arrìciu); is de su Istintinu, invècias, ant serrau sa stagioni regolari cun trintanoi puntus in totu in buciaca. 

E duncas, siat sa primu partida e siat sa segunda partida, est a narai, mellus puru, sa partida de s'andada e sa paritda de sa torrada, si funt serradas cun su resultau, bonu e togu meda, de cuatru a duus po is de su Li Punti. E apitzus de sa chistioni, deu creu ca potzat essi una cosa de importu su de si intregai is fueddus chi m'at regalau Alessandru Cherchi, unu de is giogadoris cun s'esperièntzia prus manna chi s'agatant, in dì de oi, in sa rosa de is tattaresus, e seu seguru ca, tra is atras cosas, eus agatai calincuna lega de importu e nd'eus a arraxonai mellus impari. Boleis scumiti? 

«In custas ùrtimas duas bessidas chi tenestus de giogai is cosas si funt andadas beni meda – m'at scoviau Alessandru Cherchi, chi at fatu calincuna cosa cumenti a sescentus partidas in totu sa carrièra cosa sua, cun is de sa Torres in Sèrie C1, in Sèrie C2 cun is de su Val di Sangro e Isola Liri, in Ecellenza impari a is de sa Torres, de su Progetu Sant'Elia, de su Taloro de Gavoi, de su Ploaghe, de su Istintinu e de su Gùspini, chentza de si ndi scaresi de su campionau chi at fatu impari a sa scuadra de sa bidda cosa sua, de sa bidda innoi est nàsciu, e megaus a chistionai de Sorso e de s'Atleticu de Sorso, e, a ùrtimu, eia, dda at acabbada a giogai cun sa camisedda de su Li Punti in pitzus – fadendi su contu ca sesu stètius abbilisi a ndi pesai otu gol in totu, tra sa primu partida e cussa chi s'est giogada sa cida avatu, e chi est bàllia, est craru, po sa torrada. In sa primu partida, chi eus giogau in domu allena, est a narai, mellus, in domu de is aversàrius cosa nosta, seus stètius basaus de sa bona sorti, fadendi su contu ca nd'eus cassau su gol de s'unu a zeru apustis de, feti, cuatru minudus de giogu. Apustis, is aversàrius cosa nosta, e megu a chistionai de is de su Istintinu, mi parrit bastanti craru, nd'ant cassau su gol de s'unu a unu, apustis de unu tiru scutu de sa bandierina; ma po fortuna est arribbau, apustis de atru cincu minudus, su gol cosa mia puru. Deu creu ca su Li Punti apat giogau mellus de su Istintinu, e sa cosa ballit siat po sa partida de s'andada e siat po sa partida de sa torrada. E de su restu, sciestus de tenni is cartas bonas po fai una partida bona e toga; sciestus su chi podeus donai in campu, scieus su chi arrannèsceus a fai chi giogaus cun sa conca sboida de totus is pentzamentus lègius. E deu creu, chi pròpriu si ddu depu narai, ca su Li Punti, est a narai sa scuadra cosa mia, no si minesciàt de giogai is play-out, e custu bollit narai, mi parrit bastanti craru, ca si minescestus, po totu su chi eus fatu a biri cust'annu, de ndi cassai sa sarvesa chentza de depi giogai atrus centu e otanta minudus. Po su chi pertocat sa partida chi eus giogau a s'andada, in domu de is de su Istintinu, sa chistioni parriat bella ca serrada, apustis chi nd'eus cassau su gol de su cuatru a unu; festus selenus, ma apustis s'arbìtru de sa partida at fatu unu sbàlliu e no si nd'est acatau, po ddu narai mellus puru, ca a binti minudus de sa fini de sa partida, e cun sa bòcia e su giogu frimus, unu difensori de is de su Istintinu at donau unu buciconi e apustis si nc'est ghetau a terra; e duncas su guardalinee at tzerriau s'arbìtru chi at decìdiu de nci bogai de su campu su giogadori cosa nosta, e megu a chistionai de Zichi, e in prus at donau unu tiru de is undixi metrus a is aversàrius. Duncas seus abarraus cun feti dexi ominis in campu e eus serrau sa isfida cun feti noi ominis, fadendi su contu ca Peana puru nd'at cassau duus cartellineddus grogus e duncas at acabbau sa partida ainnantis de s'ora, e si cumprendit cumenti andant is cosas, e cumenti andant is regulas, pruschetotu, in su giogu de sa bòcia. Duncas issus, e megu a chistionai de is de su Istintu, ant incumentzau a atacai concas a sa porta cosa nosta, e nosu, invècias, eus tentu s'ocasioni, manna cumenti a una domu, cumenti si narat, po ndi pesai puru su gol de su cincu a duus, ma su portieri cosa insoru at fatu una giogada chi deu naru chi est stètia a foras de conca, est a narai, toga meda, e at sarvau su resultau. Chi festus arrannèscius a ndi cassai cussu gol puru, sa partida de sa torrada iat a essi stètia una passillada, e invècias s'est tocau a cumbati, a curri puru in sa partida de sa torrada, ca gràtzias a su Cielu, s'at portau a ndi pesai atrus cuatru gol». 

E duncas, is chistionis de importu prus mannu, tra totus cussas chi nd'at bogau aforas Alessandru Cherchi, mi parrit ca funt una pariga: sa primu est acapiada a is arbìtrus, ca tenint de fai, fortzis, sa parti prus trabballosa in una partida; candu sbàlliant, difatis, e podit sucedi, fadendi su contu ca funt ominis issus puru (e is ominis sbàlliant, ca sa perfetzioni spetat feti a Deus, cumenti si iat a podi narai), arriscant de si ndi pigai is fueddus malus de totus is giogadoris chi nci funt in campu, po no chistionai de is fueddus malus chi ndi ingollint de is tifosus; e si cumprendit, no benit a essi una cosa facili, custu est pagu ma seguru, su de depi arbitrai una partida, mancai una partida de importu mannu, cun trinta-coranta personas, in campu, chi giai giai ti donant una surra (ti iant a bolli donai una surra, po ddu narai mellus puru) po dònnia decisioni trota chi pigas; e si cumprendit, no est una cosa facìli su de abarrai selenus, ca po sighiri una partida, e megaus a chistionai sèmpiri de is arbìtrus, mi parrit bastanti craru, iast a depi tenni sa conca sbuida de is pentzamentus, e invècias fatu fatu s'arbìtru tenit sa conca prena fintzas a cucuru de timorias. 
E invècias, ita sucedit? Ca a bortas is arbìtrus ndi pigant, ndi boddint sa parti peus: nci funt arbitrus chi benint fintzas arropaus, de is tifosus, de is dirigentis e fintzas de is giogadoris in campu, e diaderus, est una de cussas cosas chi no si cumprendit, e chistionu, est craru, de su fatu ca no si cumprendit cumenti in una partida de bòcia tra diletantis si potzat arribbai a pigai a bussinadas, e fintzas a pinnigosus, un'antra persona, poita mancai no at donau unu tiru de is undixi metrus, o poita, mancai, no at donau unu gol chi invècias parriat bonu. E potzu cumprendi puru ca sa tensioni, in campu, potzat essi arta meda, e mescamente candu ti giogas una stagioni intera, cumenti, de su restu, est sucèdiu a is de su Li Punti e a is de su Istintinu. E fortzis est totu custa tensioni chi nc'est, apustis de noi mesis de campionau, e apustis de noi mesis de allenamentus, (allenamentus fintzas po tres-cuatru bortas a sa cida), chi portat is giogadoris in campu (e a bortas puru is giogadoris sètzius in sa panchina, po no chistionai de is allenadoris) a fai custas tontesas, est a narai a ponni is manus in pitzus a s'arbìtru, o, peus puru, a si ponni is manus in pitzus is unus cun is atrus, ca si ndi intendint, diaderus, de dònnia cabori. 

E duncas, eia, est cussu chi est sucèdiu, est cussu chi s'at contau Cherchi apitzus de sa primu partida chi is de su Li Punti ant giogau contras a is de su Istintinu, e chi pròpriu si depu narai cumenti dda pentzu, mi benit mabi a crei ca nci siant giogadoris ca faint sa finta de nd'essi ingotu una bussinada, o unu pinnigosu, e si nci ghetant a terra po circai de frigai, ddi naru diaici, s'arbìtru, chi est pròpriu su chi est sucèdiu, de su restu, a parri de Cherchi. E duncas, diaderus, mi parrint cosas aforas de conca, e invècias in su giogu de sa bòcia, e fintzas me is campionaus de is diletantis (e no feti in cussus de is professionistas, innoi, mancai, girat una barca de dinai e innoi is giogadoris ndi cabant in campu giai giai, si iat a podi narai diaici, prus po trabballu ca po su spàssiu chi ndi tenint), funt cosas chi sucedint dònnia domìnigu. 
Ma po serrai sa chistioni, si naru custu puru: chi giai su trabballu de s'arbìtru, su trabballu chi depit fai s'arbìtru, po ddu narai mellus puru, no benit a essi una cosa facìli (e deu creu chi sa cosa si cumprendat bastanti beni, po totu su chi s'apu contau fintzas a immoi), in prus si point puru (cumenti si iat a podi narai) is giogadoris, ca circant de imbrolliai, ddi naru diaici, po ndi cassai, mancai, feti puru unu tiru de is undixi metrus. E mi benit totu de pentzai, e mi benit de si narai, e cun custu dda serru innoi, ca chi custu mundu est unu logu totu ghetau a pari, ddi naru diaici, est crupa cosa nosta, est crupa de cumenti si cumportaus. E su modu chi teneus, mancai, de si cumportai in campu, in s'interis chi giogaus una partida, benit a essi su sprigu, ddi naru diaici, de su modu de si cumportai chi teneus in sa vida de dònnia dì. E mancu mali ca deu seu su primu ca scriu, me is artìculus cosa mia, me is artìculus chi ndi pesu po su giàssu de su Diàriu Sportivu, ca su giogu de sa bòcia benit a essi una chistioni de importu mannu, po is piciocus chi bivint, mancai, me is biddas prus pitichinninnias, poita iat a podi essi (cumenti benit a essi po su prus de is bortas) una iscola de vida, cumenti si iat a podi narai: su giogu de sa bòcia ti iat a depi imparai (iat a depi imparai, mescamente a is piciocheddus prus giòvuneddus) a no imbrolliai, po incumentzai, e invècias bieus, fatu fatu (prus de su chi si iat a speddiai, a narai sa beridadi) piciocheddus chi si nci ghetant a terra mancai no apant pigau nesciunu corpu, e in prus bieus, chi est fortzis sa cosa peus puru, babbus (e fintzas mammas) chi pigant a fueddus malus is arbìtrus (e sa cosa benit a essi prus lègia candu custa cosa sucedit me is partidas de is piciocheddus prus piticheddus de edadi). Eia, custa est sa parti mobadia, ddi naru diaici, de su giogu de su càlciu, sa parti chi no s'estus a bolli contai, ma chi fatu fatu nd'aproillat aforas. 
E cun custa butada dda serru diaderus, serru diaici sa chistioni, e sigu a si intregai is fueddus chi m'at regalau Cherchi in s'ùrtima ciaciarrada chi nd'eus pesau impari. 

«Si ddu scoviu chentza de nesciuna bregungia – at sighiu a mi contai Alessandru Cherchi -, chi pròpriu depeus narai sa beridadi, chi pròpriu depeus contai is cosas po cumenti funt andadas, nosu tenestus giai sa sarvesa in buciaca, ddi naru diaici isperendi ca si cumprendat su chi seu circhendi de ndi bogai aforas. Festus currendi beni, torrendi paris paris, ddi naru diaici, cun sa bidea chi tenestus in conca, cun is programas chi s'assòtziu, su presidenti, is dirigentis e fintzas s'allenadori cosa nosta, iant fatu a s'incumintzu de sa stagioni; si festus fatus totus is contus, intzandus, po arrannèsci a serrai sa cursa concas a sa sarvesa chentza de depi trumentai prus de su tanti, fintzas a candu calincunu no at decìdiu de ndi pesai giogus trotus, lègius, chi in su mundu de sa bòcia, a cantu parrit, de su chi ndi potzu cumprendi, sighint a capitai, mancai no siant cosas togas de seguru. Ant donau tres puntus a una scuadra chi, diaici, s'est torrada a strantaxai in sa cursa, in sa batalla po sa sarvesa, ddi naru diaici, e invècias nosu si dda seus depia giogai fintzas a s'ùrtimu minudu de sa stagioni, fintzas a s'ùrtimu minudu de su campionau; e in sa penurtima partida, mancu a ddu fai aposta, nd'eus buscau, nd'eus ingotu su gol de s'unu a unu a su de noranta minudus (in sa partida contras a is tattaresus de su Campanedda ndr), desinò nd'estus potziu cassai sa sarvesa cun noranta minudus ancora de giogai. In s'ùrtima giorronada, invècias, seus stetius bonus a ndi cassai sa bìncida de sa partida e, intzandus, is tres puntus chi ddoi fiant in su pratu, in domu de is de su Logusantu, chi no s'at regalau nudda, mi parrit ca fetzat a ddu narai a boxi arta, e po nosu andat beni diaici, e nci iat a mancai atru puru. Issus, e megu a sighiri a chistionai de is de su Logusantu, funt arrannèscius a ndi pesai una stagioni de importu mannu meda, e si dda funt gherrada fintzas a s'ùrtimu segundu, ca no est una cosa, ma peròu, ca si podit narai po totus is scuadras chi ant fatu parti de sa Lista B, e custa cosa mi dispraxit. Atras scuadras, duncas, ant scerau de si cumportai in manera diversa, ma fortzis est mellus chi no aciungu a sa chistioni nemmancu un antru mesu fueddu. Si seus agataus, duncas, a depi giogai is duas partidas contras a is de su Istintinu giai giai chentza de si ndi acatai, e nci seus arribbaus bellus inchietus, po ddu narai diaici e po no manigiai atrus fueddus, sciendi beni de essi fortis. Po su restu, sa stagioni cosa nosta, s'annada est stètia bona: me is partidas de s'andada eus dèpiu trumentai, mancai, prus de cussu chi si podestus immaginai, ma sciestus puru ca si serbiat unu pagheddeddu de tempus po agatai sa manera mellus de giogai e de ndi cabai in campu, fadendi su contu ca sa rosa de su Li Punti de cust'annu fiat prena, fintzas a cucuru, cumenti si iat a podi narai, de piciocheddus giòvuneddus meda de edadi, nàscius po su prus in su duamilla e cincu, duamilla e ses e duamilla e otu; deu seu unu de is prus matucheddus, chi no su prus matucu de totu sa scuadra, apustis nd'est arribbau puru Zichi, a metadi de s'annu, chi est nàsciu in su milli e noicentus e otantaseti. Cun su tempus, e gràtzias a sa passièntzia duncas, seus arribbaus a is partidas de sa lista de sa torrada e is cosas ant incumentzau a s'andai meda mellu, siat po su chi pertocat sa calidadi de su giogu, e siat po su chi pertocat s'esperièntzia. Po su chi mi pertocat, invècias, ti potzu narai ca duus annus fait emu decìdiu de no giogai prus in custas categoria: apustis de totus is sacrìficius chi apu dèpiu fai in totus custus annus giai giai no nci dda fademu pròpriu prus a sighiri su trabballu cosa mia e, impari, a su pròpriu tempus, a sighiri su giogu de sa bòcia, tra totus is allenamentus chi nci funt de fai e is partidas, ma nc'est de narai, puru, ca is de su Li Punti mi fiant circhendi a su mancu de tres annus; nc'ant provau puru s'annu passau, po giogai in su campionau de s'Ecellenza, e cust'annu ddis apu narau ca ddis podia donai una manu. Mi seu agatau beni, in custas categoria arrannèsciu ancora a mi fai balli bastanti beni, e chi no fessit po s'edadi, fadendi su contu ca tengu corantunu annus, no ia a tenni strobbus a sighiri a andai ainanntis. Po su chi mi pertocat seu currendi a forti, su corpus cosa mia est andendi beni e custu est sucedendi gràtzias, puru, a totu su trabballu chi ant fatu s'allenadori e totus is personas chi trabballant cun issu, e seu chistionendi de Cosimu Salis, est craru, berus?. Nd'apu pesau, fintzas a oi, calincuna cosa cumenti a ses gol e apu giogau, a contus fatus, su prus de is partidas. Seu prexau e custa est sa cosa de importu prus mannu».





Attività realizzata col contributo della Regione Sardegna. IMPRENTAS 2025-2026. LR 22/2018 art. 22