S'istadi callenti de is assotzius sportivus sardus e s'aggiudu in dinai de su CONI: giai prontus prus de noi-centus mila euro

At a essi, aici parit a su mancu, un'istadi callenti meda po totus is scuadras sardas de bòcia, chi ant a depi torrai a partiri, conca a s'annu chi benit, cun sa stagioni de su duamilla e binti \ duamilla e bintunu; stagioni chi, a nai sa beridadi, s'est obeta giai seti diis fai, mèrcuis passau, su primu de su mesi de Trìulas.
Nc'at a essi de cumprendi, pruschetotu, cantu dannus at fatu, me is buciacas de sa genti, cussu tiau de Coronavirus, chi s'at serrau in domu po calincuna cosa cumenti a noranta diis, chentza podi traballai. De su restu, dhu scieus beni: no ant a essi, duncas, feti is familias a tenni strobus e pentzamentus po su dinai, ma at a essi una chistioni manna e marigosa puru po is presidentis e is dirigentis de is sotziedadis sportivas, che dònnia annu depint fai furriagallus po arrannesci a ndi pesai sa rosa e, a cantu parit, is fainas a custu giru ant a essi prus fadiosas.

Nova bonas, peròu, nd'arribant de is de su Guvernu e de is de su Cumitau Olimpicu Natzionali Italianu de sa Sardìnnia, chi funt prontus a agiudai, cumenti ant promitiu me is mesis passaus, totus is scuadras a si ndi scabulli cun is spesas, cumentzendi de cussas po s'iscrizioni a is campionaus.

Seus chistionendi de calincuna cosa cumenti a noicentus e otanta mila euro po totus is assotzius e po is sociedadis sportivas, chi podint domandai fintzas a tres mila euro a cada unu.
Po cuncodrai totus is domcumentus, impari a is domandas po pediri su dinai, nc'est tempus fintzas a su trinta de su mesi de Trìulas.
Po sa graduatoria, intzandus, tra is atras cosas, s'ant a castiai su numeru de is piciocheddus piticus, est a nai cussus chi no ant ancora fatu dexiotu annus, chi dhoi funt me in s'assotziu, e su numeru de is bìncidas arregotas me is campionaus giovanilis. In prus, s'ant ponni in contu totus is atividadis pesadas po is piciocheddus cun dificultadis. Nc'ant a essi agiudus puru po totus is sotziedadis chi traballant cun omis e femias prus mannas de sessantacincu annus.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020