Su giogu de sa bòcia in Sardìnnia andat ainnantis, ma sa festa cust'annu est po pagu genti

Una dì, in s'interis chi festus ciaciarrendi impari, po ndi pesai un articulu po su Diario Sportivo, un allenadori, arraxonendi apitzus de totus is dannus chi si nd'at portau su tialu de su Covid in custus ùrtimus cuìndixi mesis, m'at contau: «Is cosas chi fintzas a ariseu si pariant una brulla, in dì de oi funt benias a essi costumus». E pròpriu de custus fuedhus bollu partiri po is Novas de custa cida, ponendinci, mancai, unu paghedhu de filosofia in mesu a totus is chistionis chi pertocant, cumenti a sèmpiri, su mundu de sa bòcia in Sardìnnia e, mescamente, su mundu de is diletantis. Fortzis, a nai sa beridadi, chi calincunu s'iat a essi nau, mancai s'annu passau etotu, chi is cristianus, in giai totu su mundu, d'iant a essi acabbada a pediri, giai giai in genugu, de podi arrespirai s'ària chentza de tenni sa carotedha apitzus de su nasu e de sa buca, fortzis estus potziu pentzai a una barzelleta, est a nai a unu de cussus contixedhus chi si contant tanti po arriri. De su restu, est una cosa chi apu sèmpiri intendiu de is becius de sa bidda mia: «At a arribbai sa dì — narant sèmpiri — chi s'ant a fai pagai puru s'ària chi respiraus», e in su duamilla e binti (ma ballit puru po su duamilla e bintunu, a cantu parit) no seus lòmpius atesu meda de cussa fini lègia (dhi naraus diaici) chi is becius tenint sèmpiri boba boba, e badda badda, aintru de sa conca. Seus arribbaus giai a su puntu de depi spendi su dinai po arrespirai, mancai no po pagai s'aria, cumenti si narat, ma po podi comprai is carotedhas (chi, a sa fini, si permitint de nci podi bessiri aforas de domu, est a nai a passillai in sa bia, o me is pratzas, poita, d'eus cumprendiu beni, chentza carotedha no si podit fai giai nudha); seus arribbaus a su puntu, fortzis chentza mancu de si nd'acatai, de depi spendi su dinai po fai is esamis, ainnantis de partiri po calincunu logu, po nd'arremonai unu o, po abarrai prus acanta a is chistionis chi seus costumaus a manigiai in su Diario Sportivo, is giogadoris depint fai is esamis ainnantis de dònnia partida chi depint giogai, e custu, dònnia, dònnia, dònnia cida. Est facili cumprendi, duncas, su muntoni de dinai chi serbit po bivi in dì de oi: sa cosa de importu prus mannu (ballit po nd'artziai apitzus de un aereu, de una navi, ma ballit puru po ndi podi cabai in campu a curri avatu a unu palloni su domìnigu) parit essi cussa de ammostai, in dònnia segundu de sa dì, chi seus sanus, est a nai, chi no ndi eus boditu su tialu de su virus de su Covid, chi giai giai est beniu a essi sa mobadia de importu prus mannu, poita est de s'annu passau chi, giai giai, no chistionaus de atru. Dhu torraus a arrepiti, po essi prus crarus: fintzas a s'annu passau, su mundu de su giogu de su càlciu fiat obertu po totus: mannus e piticus, maschitedhus e feminedhas; is cosas chi serbiànt fiant: gana de curri avatu a sa bòcia, afrodhiu, gana de si spassiai, passiòni. Ma me is ùrtimus doxi mesis, is cosas funt cambiadas, e in giogu est brintau, cumenti eus giai nau, su dinai. De is primus contus chi ant fatu (e chi funt bessendi aforas pròpriu in custas diis), una scuadra chi currit in su campionau de Sèrie C, cumenti ant fatu is de s'Olbia, po arremonai s'ùnica scuadra sarda chi dhoi currit, ant spèndiu, feti in esamis, calincuna cosa cumenti a centu sessanta-cincu milla euro. Sa chistioni no est meda diversa po su chi pertocat is ses scuadras chi currint in su campionau de sa Sèrie D: seus chistionendi de is de su Crabònia, de is de su Lanusè, de is de s'Altzaghena, de is de sa Torres, de is tataresus de su Latte Dolce e de is de su Murera, chi ant spendiu calincuna cosa cumenti a corantunu milla euro, feti po fai is esamis a is giogadoris ainnantis de dònnia partida. Est craru, castiendi custus numerus, (e cun custu brintaus in sa chistioni chi obeus pigai oi), chi medas scuadras de su campionau de s'Eccellenza ant scerau de no torrai a partiri cun is giogus, est a nai ca ant scerau de abarrai frimas e castiai is atras otu curri e si gherrai s'artziada in su campionau de Sèrie D. Tropu, difati, su dinai chi serbit, in dì de oi, po curri in d'unu campionau de su mundu de is diletantis. Pròpriu po custu, is de su Guvernu, in su mesi de Maju, ant fatu sciri chi nc'ant a essi calincuna cosa cumenti a un millioni e cincucentu milla euro de agiudus in dinai po totus is assotzius de s'Eccellenza. Custa est una nova de importu mannu po totus is scuadras, poita si cumprendit beni chi, chentza custu agiudu, iat a essi tostau meda andai ainnantis. Sa segurèsa de tenni custu dinai (poita scieus beni cumenti andant custas cosas e pruschetotu su tempus chi is de su Guvernu nci ponint po ndi pesai custas decisionis) peròu, no nci fiat, a su mancu no nci fiat in su mesi de Marzu, candu is scuadras (no feti cussas sardas, ma balliàt po totus cussas de is atras regionis in Italia puru) depiànt decidi chi torrai a cabai in campu in su mesi de Abrili, o abertai a sa stagioni chi at a benni po torrai a partiri (est a nai cussa chi at a balli po su duamilla e bintunu \ duamilla e binti-duus). Scieus beni, intzandus, cumenti funt andadas is cosas: de dexiotu scuadras chi in su mesi de Cabudanni de su duamilla e binti funt partidas in su campionau de s'Eccellenza, ndi funt abarradas, a sa fini, feti otu: is de s'Ossese, is de su Poltu Ridundu, is de su Castiadas, is de sa Nuorese, is de su Gùspini, is de s'Atletico Uri, is de sa San Marco de Assèmini e is de su Bosa. In totu, prus o mancu, nci funt (chi fadeus su contu de binti-binticincu giogadoris po dònnia rosa de dònnia scuadra) calincuna cosa cumenti a duus-centus giogadoris chi currint avatu a sa bòcia in su campionau de s'Eccellenza, candu in su mesi de Cabudanni fiant calincuna cosa cumenti a cuatru-centus giogadoris. Po custu, a su mancu diaici si parit, naraus, in dì de oi, chi su giogu de sa bòcia est acabbau a essi una faina feti po is giogadoris prus fortunaus, o, po dhu nai mellus, prus fortis. Poita, si cumprendit beni su motivu, is otu scuadras ant fatu de totu po circai de ndi pesai is scuadras prus fortis, e is de sa Lega Natzionale de is Diletantis dhu s'ant acuntentaus, allonghiendi su tempus de cussa chi si tzerriat "fentana de su mercau", est a nai su perìudu innoi is giogadoris podint andai de una scuadra a un'antra. Me is atrus annus, est a nai candu su Covid no fiat ancora arribbau aintru de is vidas nostas po dha sas ghetai a fundu e susu, cumenti si narat in bidha mia, sa fentana de su mercau si oberriàt in s'istadi, apustis de s'acabbu de is campionaus, fintzas a is ùrtimas diis de su mesi de Agustu, e poi, torra, a metadi de su mesi de Idas, dexi diis ainnantis de su Natali, fintzas a sa metadi ( o a is ùrtimas diis), prus o mancu, de su mesi de Gennàrgiu. Po sa stagioni de su duamilla e binti \ duamilla e bintunu, e mescamente po is otu scuadras chi ant decidiu de torrai in campu po acabbai de giogai su campionau de s'Eccellenza, is de sa LND ant decidiu de lassai obertu su mercau fintzas a su binti-seti de su mesi de Abrili. Si cumprendit, diaici, chi po is tifosus de custas otu scuadras nci funt stètius spantus mannus: fortzis no si funt mai bidas totus custa scuadras prenas, fintzas a cucuru, de grandus campionis e de giogadoris fortis; is scuadras de s'Eccellenza, intzandus, funt arrannescias a fai atobiai totus is giogadoris sardus prus bravus (ballit puru po cussus chi giogànt me is campionaus de Promozione, de Primu e de Segunda Categoria), cumenti sucedit, boleus fai un esèmpiu, cun is scuadras natzionalis po is giogus de is Mondialis o po is giogus de is Europeus.

Custus ùrtimus (seus chistionendi, est craru, de is giogus de is natzionalis europeas), dhu arregodaus, s'annu passau ndi funt sartaus, cumenti est sucèdiu a is olimpiadis, de su restu, ma s'ant a fai, s'ant a recuperai in s'istadi de su duamilla e bintunu, cun is partidas chi s'ant a giogai in Italia, in Roma; in Baku, chi est sa capitali de s'Aberzaigian; in San Pietroburgo, in Russia; in Copenaghen, chi est sa capitali de sa Danimarca; in Amsterdam, in Olanda; in Bucarest, in Romania; in Londra; in Glasgow, in Scozia; in Siviglia, po su chi pertocat sa Spagna; in Monaco, in Germània; e in Budapest, chi est sa capitali de s'Ungheria.

Is otu scuadras de s'Eccellenza, intzandus, ant potziu trabballai po duus mesis, po circai de ndi pigai is giogadoris prus fortis e, ndi seus segurus, custus giogadoris tenint una fortuna manna meda, po tenni sa possibbilidadi de ndi cabai in campu, poita funt medas is piciochedhus chi iant a bolli fai sa pròpriu cosa ma no podint, a su mancu po imoi, e s'ant a depi acuntentai de giogai a cussu chi tzerriant "calcetto" (est a nai su giogu de sa bòcia in cincu contras a cincu), o de giogai in giru, mancai me is pratzas o me is bias, cumenti si fadiàt me is tempus passaus, candu bastànt cuatru perdas e una bòcia fata de stràcius po nci passai unu megama de sprèviu e de allirghia cun is amigus. Intzandus, po is tifosus de is otu scuadras chi currint in su campionau de s'Eccellenza, dhu festus giai narendi, no funt mancaus is ispantus, poita, dhu scieus, is cropus (dhu sus tzerriant diaici) chi is sociedadis sparant in s'interis chi est obertu su mercau funt una de is cosas chi movint s'afrodhiu prus mannu, de annu in annu, me in su coru de totus is chi sighit custu giogu. E duncas, podeus andai a castiai totu cussu chi est sucèdiu, partendi de is de s'Atletico Uri, chi nd'ant pigau Lorenzo Camboni, unu portieri chi iat incumentzau s'annu gioghendi cun is de s'Usinese, in su campionau de sa Promozione; Ricardo Stechina, unu difensori argentinu chi at fatu puru tres gol me is primus cuatru partidas giogadas in su mesi de Cabudanni e in su mesi de Ladàmini de su duamilla e binti, chi nd'est lòmpiu de s'Arbus, scuadra chi currit in su campionau de s'Eccellenza ma chi no est torrada a partiri cun is giogus; Davide Budroni, unu de is giogadoris prus fortis chi s'agatant in Sardìnnia, chi at acutu a fai cincu partidas cun is de s'Oschirese, in su campionau de sa Promozione; Salvatore Pilo, un atacante chi giogàt cun su Taloro de Gavoi, sèmpiri in su campionau de s'Eccellenza. Is de s'Uri ant circau de pigai puru Andrea Usai, un atacanti tra is prus fortis chi nci funt in dì de oi, chi at incumentzau sa stagioni de s'annu passau impari a is de s'Usinese, ma chi, po crupa de is strobus donaus de su trabballu cosa sua, no at potziu sighiri a giogai cun is arrubius-grogus, cumenti iat invècias promitiu in d'unu primu tempus. Puru is de su Bosa, sighius de un allenadori de importu e de esperièntzia cumenti est Salvatore Carboni, ant circau de cuncodrai una scuadra forti po bisai su sartidu in sa Sèrie D: de sa Macomerese nd'est arribbau Davide Soru, unu difensori, Marco Ruggiu, po su centrucampu, e sèmpiri de sa Macomerese, puru Abdelaziz Nachet, un atacanti. De is de s'Ossese, invècias, is de su Bosa nd'ant pigau unu centrucampista forti meda cumenti a Mattia Spano; de is tataresus de su Li Punti, chi currint me in su campionau de s'Eccellenza, nd'est lòmpiu unu de is giogadoris cun prus talentu, seus chistionendi de Alessio Delrio, chi est un atacanti. Is de su Castiadas, chi ant incumentzau sa stagioni de su duamilla e binti \ duamilla e bintunu cun medas strobus, funt stètius cussus chi ant fatu de prus in custa fentana de su mercau, cun sa gana de cassai su primu postu de sa lista, chi d'arregodaus, ballit po s'artziada in Sèrie D. De is de sa Villacidrese, scuadra de su Campidanu de mesu, chi currit in su campionau de sa Promozione e bisàt puru de dhu binci po ndi artziai in Eccellenza, nd'est arribbau unu difensori bravu e forti cumenti a Salvatore Bruno; de is de sa Monteponi de Bidd'e Cresia, invècias, nd'est lòmpiu Giacomo Chessa, chi at fatu, duncas, is primus duus mesis de sa stagioni noba currendi, impari a is cumpàngius, me in su campionau de sa Promozione; sèmpiri de su campionau de sa Promozione, ma custa borta de sa scuadra de su Crabonaxa, chi nd'est artziada apustis de sa bìncida de su campionau de sa Primu Categoria, s'annu passau, nd'est arribbau unu centrucampista abbili meda cumenti a Mirco Carboni. Po su centrucampu, torra de sa Monteponi de Bidd'e Cresia, is de su Castiadas ant scumitiu apitzus de Sandro Scioni, unu de is piciocus prus fortis chi nci funt in Sardìnnia. De su Barisardo, invècias, cun is ollastinus chi currint me in su campionau de Primu Categoria, e chi fiant, tra is atras cosas, circhendi de binci, nd'est aproillau su centrucampista Nour Eddin Lahrach; de is castedhaius de sa Ferrini, scuadra chi at decìdiu de no sighiri cun su campionau de s'Eccellenza, nd'est arribbau, invècias, Matteo Argiolas. De s'Ilva de La Maddalena, s'atacanti Luca Caboni e de s'Idolo de Arthana, scuadra chi nd'est artziada in Eccellenza, frisca frisca apustis de essi bintu su campionau de sa Promozione de s'annu passau, nd'est arribbau unu de is giogadoris prus espertus chi nci funt in dì de oi in Sardìnnia, seus chistionendi de Marco Nieddu, chi at fatu, in totus custus annus de giogu, muntonis e muntonis de gol. Is de su Guspini ant circau de afortiai sa rosa cosa insoru pighendindi cincu giogadoris: de is castedhaius de sa Ferrini ndi funt arribbaus Federico Boi, unu difensori, e Luca Mudu, sèmpiri po su chi pertocat sa difesa. De sa Monteponi de Bidd'è Cresia, invècias, mister Murru at scerau Paolo Uccheddu, po sa difesa, e po s'atacu is campidanesus nd'ant pigau unu de is giogadoris prus fortis chi nci funt in cussas zonas, seus chistionendi de Samuele Curreli, chi at incumentzau sa stagioni de su duamilla e binti \ duamilla e bintunu in sa rosa de sa Monteponi de Bidd'e Cresia. De is de su Ilartzi, invecias, nd'ant pigau unu centrucampista abbili cumenti a Sefano Demurtas. Is de sa Nuorese puru funt stètius tra is scuadras chi ant pigau prus giogadoris, impari a is de su Castiadas e a is de sa San Marco de Assèmini. Is nùgoresus, difatis, ant pigau su portieri Matteo Trini, chi nd'arribbat de su Budoni, scuadra chi currit in su campionau de Eccellenza ma chi at scerau de no torrai a partiri cun is giogus, a su mancu po cusa stagioni; de su Ilartzi, invècias, ndi funt arribbaus in duus: seus chistionendi de su difensori Gianluca Dessolis e de Daniele Pilosu, chi giogat in atacu. Po su chi pertocat su centrucampu, is de sa Nuorese nd'ant pigau Alessadro Steri, chi at giogau sa primu metadi de su campionau in domu de is de L'Aquila; Andrea Corda, chi at lassau is de su Campobasso po ndi torrai in Sardìnnia; in atacu nd'est arribbau puru Alessandro Manca, chi at incumentzau s'annu gioghendi impari a is de s'Idolo. Sa Nuorese est partida cun cincus puntus asuta de su zeru de recuperai e pròpriu po custu at circau de afortiai sa scuadra in dònnia modu. Puru is de s'Ossese, a nai sa beridadi, no funt abarraus a castiai in sa fentana de su mercau e duncas nd'ant piscau cuatru giogadoris, totus de s'Usinese: seus chistionendi de is difensoris Andrea Zinellu, unu piciochedhu piticu meda ma chi parit giai bravu e forti, e Giuseppe Valenti; po su centrucampu nd'est arribbau Mirko Delrio e, in atacu, unu giogadori tra is prus fortis, cumenti a Domenico Saba. Feti duus, invècias, funt is giogadoris nous in domu de is de su Poltu Ridundu: Danilo Ruzzittu, chi at giogau sa primu metadi de s'annu in Serie D, impari a is de sa Torres; e Alessio Mulas, unu piciocu chi at giogau is primus cincu partidas de cusa stagioni cun su Luogosanto, in su campionau de sa Promozione. Serraus duncas cun is campidanesus de sa San Marco de Assèmini, chi nd'ant pigau calincuna cosa cumenti a seti giogadoris nous: Enrico Galasso, su portieri chi at incumentzau s'annu cun su Ilàrtzi; Jah Abib, de su Muristeni; Pierluigi Porcu, chi at giogau cincu partidas cun is de su Crabònaxia, in su campionau de sa Promozione, Ilia Briukhov; Alessandro Marongiu, unu centrucampista chi nd'est lòmpiu de s'Umass Lowell; Gianluca Podda, chi nd'arribbat de is castedhaius de sa Ferrini, e s'atacati de importu mannu Marcello Mancosu, chi at giogau is primus partidas cun su Ilàrtzi.

Attività realizzata col contributo della Regione Sardegna. IMPRENTAS 2020-2021. LR 22/2018 art. 22