Su Murera nci provat in dònnia manera, ma su Giugliano si difendit cun is ungas e cun is dentis: sa partida acabat cun su resultau de zero a zero

Nudha de fai po sa segunda bìncida de sighiu de su Murera, chi in sa batalla de ariseu, in domu cosa insoru, contras a is campanus de su Giugliano, chi balliàt po su recùperu de sa partida de sa de cincu giorronada, no est arrannesciu a fai nemancu unu gol a is strangius, cun su resultau chi est abarrau frimu, sidhau po totus is noranta minutus de giogu, in su zero a zero.
Mister Fracesco Loi no nc'at potziu mandai in campu, tra is atrus, Geroni, Angheleddu, Demartis e Nuvoli puru, chi funt depius abarrai a castiai is cumpangius.
Sa partida incumentzat a si callentai a su de doxi minutu, candu su portieri de is grogus-brau, Vandelli, at cassau sa bòcia chi fiat arribendi de is partis de Orefice, apustis de unu bellu passagiu de Di Dato. Su Murera peròu respùndit allestru cun Virdis, chi piscat beni Satta, chi s'agatat diaici sa bòcia in mesu a is peis pròpriu aranti a Mola, ma su tiru acabat a in altu de sa traversa: unu pecau mannu, poita Satta fiat acanta meda de sa porta de is strangius.

Su Murera sighit a si ghetai in atacu: nci provant Kadi, piscau beni de Satta, ma sa mira no est bona; no andat mellus a Satta, seus a su de dexiaseti minutu, chi no arrannescit a stampai sa porta difendia de Mola. Su Murera sighit a atacai a conca bascia: a su de dexi-otu minutu, Satta, sèmpiri issu, sfundat in sa zona de dereta e regalat una bòcia de oru, dha tzerriaus diaici, a Kujabi, chi arrannescit a dhi donai unu bellu corpu de conca, ma sa bòcia ndi bessit a foras, de pagu.
Su Murera sighit a nci crei: nci provant Nurchi, serrau beni de is difensoris de su Giugliano, e apustis tocat a Legal che solu solu aranti a Mola no arrannescit, de conca, a agatai su gol de s'unu a zero. In campu parit chi nci siant feti is de su Murera, chi sighint a atacai cun Vignati, Satta, e mescamente cun Virdis, ma Mola respundit de campioni e salvat is cumpangius cosa sua. Su primu tempus si serrat diaici cun su resultau de zero a zero.

In su segundu tempus is cosas sighint a andai ainnantis cumenti est sutzediu me is primus coranta-cincu minutus de giogu: a su de trinta-tres minutu, Nurchi ndi piscat Virdis cun d'unu passagiu bellu meda, s'atacanti de is de domu tirat sa bòcia chenza ci pentzai mancu unu segundu, ma pigat in prenu sa traversa de sa porta difendia da Mola.
Is de su Giugliano arrannescint a si fai biri in aranti me is ùrtimus minutus de giogu cun Antonio Orefice, ma Legal ndi studat totus is afrodius de is campanus.
Po su Murera, duncas, po su chi s'est biu, est unu zero a zero marigosu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020