Salta al contenuto principale
tharros

Tharros e Cabuderra a buciacas sbuidas: su Giudice Sportivo fait is contus po is bregùngias de domìnigu passau

Is allenadoris ddu arrepitint fatu fatu: «Seus feti andendi a giogai a bòcia, no depeus andai a fai sa gherra»; atrus, invecias, circant de nci furriai sa chistioi apitzus a su spàssiu, chi iat a depi essi cussu, a su mancu a fueddus, chi contat de prus po chini giogat in custas categorias, po spreviu, duncas, e non po traballu. Su domìnigu, peròu, is cosas a bortas si faint prus legias e marigosas de cussu chi mancai unu arribat a pentzai, poita sutzedit chi calincunu, in campu, nci bessit aforas de conca, e inzandus nd'aproillant dannus e bregungias: in s'ùrtimu gerronada, su noi de friàrgiu, po nd'arremonai una, nci funt stetius certidus in duas partidas: cussa tra Tharros de Aristanis e Cabuterra, in su Girone B de Primu Categoria, e cussa tra Pula e Atletico Settimo, in su Girone A de sa Seconda Categoria, funt acabadas prima de s'ora.
Diaici tocat a su Giudice Sportivo torrai a ponni a postu is cosas.

Tharros e Cabuderra abarrant a buca asciuta, chentza puntus in buciaca, e cumprendi poita no est meda traballosu: a pustis de su gol de su duus a unu, difatis, cussus de su Cabuderra funt andaus a fai festa pròpriu ananti a sa panchina de is aristanesus, chi no ant gradessiu sa cosa po nudda; s'allenadori, Maurizio Nulchis, de su febi chi teniat, est brintau in campu e at scutu unu buciconi in mesu a is piturras de unu giogadori de su Cabuderra; nd'est bessiu aforas unu budrellu mannu meda, cun is giogadoris de is duas scuadras chi si funt pigaus a pari, a trassa de macus, e s'arbitru a cussu puntu no at potziu fai atru chi firmai su giogu, mancai ci fessint atrus dexi minutus. In sa partida tra Pula e Atletico Settimo, invecias, Daniele Puddu at pèrdiu sa conca contras a s'arbitru, chi at tentu feti sa crupa, naraus diaici, de nci ddu bogai a foras de su campu: su giogadori est arribau fintzas a pigai a boxis s'arbitru e fiat acanta de ddu scudi. Pròpriu po custu, su Giudice Sportivo at donau sa bìncida po tres a zero a cussus de su Pula.

In questo articolo
Campionato:
Argomenti:
Stagione:
2019/2020
Tags:
Prima Categoria
Girone B