Salta al contenuto principale
silanus festeggiamenti

Un atonzu druci meda po is scuadras sardas de bòcia: is giogus sighint a andai ainnantis

Seus arribbaus, po diaderus, a is ùrtimas diis de su mesi de Ladàmini puru: scriu custus fueddus in s'interis chi su cieu est prenu de nuis, mannas meda e scuras scuras, chi parit diaderus chi ndi potzat arrui unu mari de acua de unu momentu a s'atru, ma cumenti si narat, tocat a ddu lassai proi, e s'at a cumbenni incumentzai a si ponni su coru in paxi, poita is diis callentis, cun su sobi bellu, funt spaciadas, aici a su mancu parit. S'atonzu est una stagioni druci, a su mancu po mei: mi spedhiat, e meda puru, abarrai totu su merì aranti de su fogu, allutu aintru de sa forredha, mancai in s'interis chi lìgiu unu bellu libru e papu calincuna castangia, o mellus ancora, calincuna aniada, de cussas chi crescint me is mattas chi s'agatant innoi in su Campidanu de mesu. Dònnia tanti mi pongiu a castiai is tialus de is previsionis de su tempus, po circai de cumprendi candu nd'at a brintai su frius mau e duncas is primus unconis de ierru de nci cabai, de nci inguti: no ddu timu de seguru, est craru, ma naraus chi mi praxit de ammachiai candu incumentzant a nd'arribbai is istracias, sa luxi chi faint is lampus e is sonus de is tronus; mi praxit de ammachiai intendi cussas chi mi benit de tzerriai is "boxis de sa natura", e dònnia stagioni, aici mi praxit a pentzai, a su mancu, tenit sa sua: su beranu s'arregalat is scrillitus de is arrondibis, po nd'arremonai una, s'atonzu parit prus chietu, e custu mi praxit: mi intendu a trassa de unu pipiu, candu abarru alluau a castiai, cun su coru prenu fintzas a cucuru de ispantus, is carrogheddas chi bobant in su cieu, e is follas grogas chi nd'arruint de is matas e nd'arribbant in terra, totu badda badda, lèbias in s'aria. Si nau sa beridadi: deu pentzu chi dònnia dì tengiat aintru, in totus is binti-cuatru oras, una cantidadi manna de poesia chi s'iat a podi agiudai a mantenni allirgu su coru, ma a bortas seus nosu etotu chi no arresceus a biri, a si ndi acatai de totus is cosas bellas, meravìgliosas, chi teneus mancai acanta de is peis, o de is ogus. E diaici, po custa cida, mi praxit incumentzai custu articulu cun unu auguriu po bosatrus: a bortas iat a essi una cosa bona torrai a castiau su mundu cun is ogus de is pipius, cun cussa simplesa chi tenint is piciocheddus prus piticus, chi funt bonus a si cummovi aranti, puru, a cosas chi po is mannus no tenint (prus) nesciunu importu. E duncas si auguru chi potziais tenni su coru prenu de bellesa, e chi sa bellesa ndi potzat brintai, aintru de is bostas vidas, de dònnia stampu, fintzas de cussus prus piticus, de dònnia fueddhu, de dònnia allampada chi su mundu, e duncas is atrus cristianus, si arregalant. Si auguru chi dònnia segundu de sa dì potzat essi prenu fintzas a cucuru de prexius, de oru, de amori, de passioni, de giogus e de arrisus. De su restu, is motivus chi s'agiudant a castiai a su benidori cun ogus bonus e drucis e cun su coru prenu de isperas no mancant de seguru: po nd'arremonai una, fortzis iat a bastai a pentzai chi s'annu passau, de custus tempus etotu, totu s'Italia fiat stètia torra ghetada a pari (a fundu de susu, ddi naraus in bidda mia) de su tialu de Covid, cun totus is atividadis, a partiri pròpriu de is scolas, torra serradas, fintzas a su beranu. Sa pròpriu fini fiat tocada, si dhu arregodaus beni meda, a totus is giogus e duncas a totus is campionaus de bòcia de is diletantis sardus, chi no funt prus torraus a partiri. A nai sa beridadi, in su mesi de Abrili, nci funt stetias otus scuadras de s'Ecelenza chi funt torradas a partiri po si giogai s'artziada in su campionau de Sèrie D, cun su campionau, piticu meda, chi fiat stètiu bintu de is de s'Atletico de Uri. Cust'annu, e seus meda cuntentus, is cosas si parint chi funt andendi mellus meda, e po ddu nai si bastat a fai su contu de is partidas chi ndi funt sartadas fintzas a oi: is de s'Ecelenza funt arribbaus a sa de otu giorronadas, e po imoi s'ùnica partida chi no s'est giogada candu si depiàt, est cussa tra is campidanesus de su Muristeni e is de s'Arbus, poita is meris de domu fiant in corrotu, e no de seguru po crupa de su Covid. Is de s'Ecelenza, in s'interis, ant acutu a giogai, chenza strobbus o trumentus, is partidas chi pertocant sa Copa Italia puru, e imoi funt arribaus a is semi-finalis, est a nai a is duas partidas chi si depint giogai ainnantis de sa partida finali. In Promotzione puru is cosas funt andendi beni, e ndi seus prexaus, si cumprendit: is scuadras de is tres listas ant acutu a giogai, fintzas a oi, cincu giorronadas de partidas; is ùnicus chi ant tentu strobbus, nd'eus giai chistionau, de su restu, me is cidas passadas, funt stètius is de su Bidda Matzràxia, cun su sindigu chi at serrau totus is atividadis e postu sa bidda in cussa chi podeus tzerriai "zona arrubia", po circai de firmai su spaniamentu de sa mobadia, e apustis de cuindixi diis is cosas parint torradas a sa normalidade. Sa cosa de importu prus mannu, duncas, est chi is giogadoris de su Bidda Matzraxia no si ndi funt pigaus sa mobadia e no ant impestau is giogadoris de is scuadras aversarias. Pròpriu ariseu a merì, intzandus, is arrubius-brau ant giogau sa partida contras a is de sa Fermassenti de Santu Giuanni Suèrgiu, chi fiat sa primu chi nd'est sartada, e ant bintu cun su resultau de cuatru a zeru. Imoi is de su Bidda Matzràxia ant a depi giogai sa partida contras a is casteddaius de s'Atletico. Po su chi pertocat sa Primu Categoria, invecias, si funt giogadas is partidas chi ballint po is primus cincus giorronadas de sa stagioni noba, est a nai cussa de su duamilla e bintunu \ duamilla e binti-duus, e po imoi funt sartadas feti otu partidas: in sa Lista A seus chistionendi de sa partida tra is de su Domunoas e is de su Pula, poita is meris de domu no ant acutu a si fai agatai prontus, contendi chi ndi funt stètius piscaus de su campionau de sa Segunda Categoria (po tupai su stampu lassau de is de sa Gioventù de Samassi, chi ant tentu strobbus mannus e no funt stètius bonus a partiri cun is giogus), chi est partiu feti in su mesi de Ladàmini, est a nai su primu domìnigu, su tres. S'atra partida chi nd'est sartada in sa Lista A est cussa tra is de su Pirri e is campidanesus de sa Virtus de Santu Sparau, po unu strobbu tentu de s'arbitru, chi no est potziu arribbai a su campu. Po su chi pertocat sa Lista B, seus sèmpiri chistionendi de is giogus de sa Primu Categoria, est craru, nd'est sartada, po immoi, feti sa partida tra is de sa Monreale de Santu 'Engiu e is de su Seùi Arcuerì, poita, est una cantzoni giai intendia, is meris de domu no fiant ancora prontus, contendi chi, cumenti is de su Domunoas etotu, ndi funt stètius piscaus de sa Segunda Categoria, po tupai su stampu in sa lista de is scuadras lassau sbuidu de is de su Gerrei, chi ndi funt bessius a foras de is giogus una pariga de diis ainnantis de s'incumentzu de is campionaus. Po su chi pertocat sa Lista C, ndi funt giai sartadas tres partidas: is de su Tuttavista funt depiur abarrai frimus poita teniant medas giogadoris in assètiu (cussu chi in italianu si tzerriat "quarantena preventiva), est a nai tupaus in domu chenza podi biri nesciunu, ma feti po seguresa e no poita fiant apuntoraus. E duncas is de su Tuttavista, sa scuadra de Gartèddi, ant depiu sartai is partidas contras a is de su Cardedu e contras a is de s'Orane. Nudda de fai puru po sa partida tra is de su Jerzu e is de s'Ulassai, ma feti po crupa de su tempus malu. Po su chi pertocat sa Lista D si funt giogadas totus is partidas, po su prexu mannu nostu e mescamente de totus is scuadras chi currint in sa batalla po ndi artziai in Promotzione. In sa Lista E, chi est s'ùrtima de sa Primu Categoria, funt sartadas feti duas partidas, in sa giorronada chi s'est giogada pròpriu custu domìnigu passau: is de su Cus de Tattari (est a nai sa scuadra pesada de s'universidadi) no funt potzius cabai in campu contras a is de s'Ottava po is strobbus chi at tentu s'arbitru; sa partida tra is de su Siligo e is de s'Ulumedu no s'est serrada poita s'arbitru s'est ingotu, in su segundu tempus, cun is duas scuadras chi iant acutu a ndi pesai su resultau de unu a unu. Andaus a castiai puru, giai chi nci seus, cumenti funt postas is cosas me in su campionau de sa Segunda Categoria, chi est stètiu pretziu in otu listas. Po immoi, candu seus arribbaus a sa de cuatru giorronadas, ndi funt sartadas feti tres partidas: in sa Lista C is de La Pineta de Sìnnia no ant giogau sa primu partida de s'annu contras a is de s'Atletico de Seddori, poita ndi funt stètius piscaus de sa de tres Categorias feti una cida ainnantis s'incumentzu de is giogus e intzandus, si cumprendit beni, no fiant prontus. In sa Lista H, invecias, ndi funt sartadas feti is duas partidas de su Laèrru, cun sa bidda chi est stètia posta in "zona arrubia" de su sindigu s'otu de su mesi de Ladàmini, e duncas in assètiu, cun totus is atividadis serradas, po circai de frimai su spaniamentu de su virus. Intzandus is de su Laèrru depint ancora giogai is partidas contras a is de su Lauras e contras a is de s'Atleticu de Sa Madalena, ma funt giai torraus in campu, pròpriu domìnigu passau, contras a is de su Figari. Is cosas, duncas, funt andendi beni meda, ddu torraus a repiti, e po du cumprendi bastat a castiai is numerus acapiaus a sa stagioni de s'annu passau, est a nai cussa de su duamilla e binti \ duamilla e bintunu: in dì de oi, est a nai a sa fini de su mesi de Ladàmini de un annu fait, in Ecelenza iant acutu a giogai seti giorronadas, cun trexi partidas sartadas; in Promotzione iant acutu a giogai cincu giorronadas, cun ses partidas sartadas me is duas listas; in Primu Categoria is cosas fiant postas peus, cun cincu giorronadas giogadas ma cun trintunu partidas chi ndi fiant sartadas, totu po crupa de su tialu de virus. Duncas, chi diaderus si serbiànt nobas po indruciai custas ùrtimas diis de su mesi de Ladàmini, dda sas teneus prontas, e callentis callentis, cumenti a sèmpiri, po bosatrus.

Apustis de essi nau totu custu, e m'eis a scusai po totus custas stròllichentzias (ma ge ddu scieis cantu mi praxit a ammesturai unu pagheddu de cussa chi tzerriu filosofia, impari a is chistionis chi pertocant sa bòcia), m'iat a praxi a sighiri a contai cumenti funt andadas is cosas me in s'ùrtima giorronada de sa Primu Categoria, esta nai cussa chi s'est giogada pròpriu domìnigu passau, est a nai su binti-cuatru de su mesi de Ladàmini. In su primu postu de sa lista A, cun trexi puntus allogaus in buciaca, agataus is carlufortinus de sa Verde Isola, chi peròu funt stètius firmaus de is casteddaius de su Vecchio Borgo de Sant'Elia, sighius de mister Miro Murgia, cun sa partida chi s'est serrada cun su resultau de unu a unu. Impari a is calufortinus, in su primu postu de sa lista nci funt puru is de su Cabuderra, sighius de mister Andrea Loi, chi est fadendi unu trabballu bonu meda. Is biancus-arrubius ant bintu, cun su resultau de duus a zeru, sa partida contras a is de su Domusnoas, gràtzias a is gol fatus de Pinna, in su primu tempus. Pròpriu domìnigu chi benit, is de sa Verde Isola de Carluforti e is de su Cabuderra s'ant atobia apari po sa partida de importu prus mannu de totu sa de ses giorronadas; a su segundu postu de sa lista, cun feti duus puntus in mancu, est a nai cun undixi puntus, s'agatant is de su Cus de Casteddu; a su de cuatru postus, cun dexi puntus, invecias, nci funt is serramannesus de sa Gialeto e is de su Sestu. Po su chi pertocat sa Lista B, invecias, a su primu postu agataus is de sa Francesco Bellu de Terraba, chi tenint giai allogaus doxi puntus, gràtzias a cuatru bìncidas, cun feti una partida perdia fintzas a immoi. Is terrabesus ant bintu s'ùrtima partida contras a is de sa Don Bosco de Gùspini e domìnigu chi benit ant a depi andai a giogai contras a is de su Seui, in domu cosa insoru. A su segundu postu nci funt is grogus-arrubius de sa Libertas de Barumini, cun is piciocus sighius de mister Marco Piga chi ant bintu sa partida de domìnigu passau, in domu de is de s'Isili, cun su resultau de cuatru a tres. Impari a is baruminesus nci funt is de sa Freccia Parte Montis, sa scuadra de Mòguru, chi in s'ùrtima bessida, cussa de domìnigu passau, est craru, funt arrannescius a binci, po unu a zeru, contras a is de su Meana. Po is mògoresus, immoi, nd'at arribbai sa partida, torra in domu, contras a is gùspinesus de sa Don Bosco, chi eus giai arremonau. Po su chi pertocat sa Lista C, est craru meda, castiendi a is numerus, cumenti is de su Barì funt, a su mancu fintzas a immoi, sa scuadra chi est currendi de prus: is piciocus sighius de mister Cavasin, chi est un allenadori de esperièntzia manna meda, fadendi su contu chi at trabballau, fintzas a pagus annus fait, cun is scuadras de sa Sèrie A, tenint giai cuindixi puntus allogaus in buciaca, ant bintu totus is cincu partidas chi ant fatu e tenint calicuna cosa cumenti a cincu puntus in prus de is de s'Orane, chi teint peròu una partida ancora de giogai, cumenti eus nau ainnantis, contras a is de su Tuttavista de Gartellì. Domìnigu passau, is biancus-asullus ant bintu cun su resultau de tres a zeru in domu de is de su Tertenia e tenint calincuna cosa cumenti a bintunu gol fatus, in totu, in custas primus cincu bessidas, e nd'ant ingotu feti duus. In sa giorronada chi at a benni, is de su Barì si dda ant a depi biri contras a is de sa Bunese de Baunei; is de s'Orani, invècias, ant a depi andai in domu de is de s'Ollolai. Andaus a castiai puru cumenti funt postas is cosas po su chi pertocat sa Lista D: a su primu postu nci funt sèmpiri is de su San Nicola de Otieri, mancai is piciocus sighius de mister Alfio Sannio apant pèrdiu s'ùrtima batalla, in sa bessida de domìnigu passau, contras a is de s'Atletico de Bono. A su segundu postu de sa lista, cun otu puntus, nc'est una truma manna de cuatru scuadras: impari a is de s'Atletico de Bono, chi eus arremonau pròpriu immoi, nci funt is de su Urtei, chi nd'arribbant friscus friscus de su duus a duus pesau in domu in sa batalla contras a is de su Patada. Cun otu puntus, e duncas seus chistionendi sèmpiri de su de duus postus in sa lista, nci funt puru is de su Bòrore, chi peròu no funt arrannescius a binci in sa partida de domìnigu passau contras a is arrubius-brau de su Putumajore, chi s'est serrada, duncas, cun su resultau de duus a duus. Prexu mannu, invecias, in domu de is de sa San Marco de Crabas, chi ant bintu contras a is de su Belchìdda cun su resultau de duus a unu. Serraus is chistionis po custa cida andendi a castiai cumenti funt andendi is cosas, mellus, is giogus, me in sa Lista E. A su primu postu, nci funt sèmpiri is de su Sennori, sighius de mister Massimiliano Nieddu, chi tenint trexi puntus allogaus in buciaca; in s'ùrtima partida, Usai e is cumpàngius si funt depius acuntentai de unu puntixeddu, in sa batalla, a foras de domu, contras a is de su Sprint de Itiri Cannèdu. Impari a is sennoresus, nci funt, seus chistionendi sèmpiri po su chi pertocat su primu postu de sa lista, is tattaresus de su Cus, chi pròpriu ariseu a merì ant bintu sa partida contras a is de s'Ottava, e duncas ant cassaus is sennoresus. Domìnigu chi benit, mancu a ddu fai aposta, nc'at a essi sa partida, chi est cussa de importu prus mannu de totu sa giorronada, est craru, pròpriu tra is de su Sennori e is de su Cus Tattari.


Attività realizzata col contributo della Regione Sardegna. IMPRENTAS 2020-2021. LR 22/2018 art. 22

 

In questo articolo
Campionato:
Argomenti:
Stagione:
2021/2022
Tags:
Prima Categoria