Is dudas de Sa Lega Pro, dificili andai ainnantis cun is giogus; Ghirelli: «Sa saludi de sa genti benit a su primu postu»

Dhu scieus beni e nd'eus giai arrexonau meda: is scuadras de sa Sèrie C, po nd'arremonai una, no ant a arrannesci mai a si scabbulli cun totus is esamis e is fainas chi s'ant a depi sighiri po torrai a partiri cun is allenamentus e, apustis, cun is partidas.

Po fai is cosas cumenti su Guvernu e su "Cumitau Tennicu Scientificu" s'abetant e pretendint, difatis, serbit dinai de spendi in cantidadi, e cussa chi tzerriant "Lega Pro" tenit, giai de meda, dificultadis in custu sensu, e su tialu de Coronavirus no at fatu atru chi pejorai sa situatzioni (ballit po totus, de su restu, e no feti po is de su sport), chi imoi s'est fata niedda cumenti a sa pixi, diaici si narat. Sa chistioni prus traballosa, a cantu parit, est pruschetotu chi is sotziedadis no ant a arrannesci a mantenniri is giogadoris (prus totus cussus chi dhoi traballant impari), in assètiu, diaici cumenti narant is règulas, po giogai is partidas chenza arriscus de spaniai o de si ndi buscai su mabi.

Serbint logus mannus innoi aculli sa genti e, torrendi a is allenamentus de is giogadoris, unu campu feti arriscat de no bastai: a nai sa beridadi, cun s'arrosa dividia in trumas de cuatru o cincu personas, nd'iant a serbiri a su mancu atrus tres o cuatru, cumeti funt fadendi medas scuadras de sa Bundesliga in Germània, po nd'arremonai una.

In s'interis che is espertus de su Guvernu e is dotoris de sa Federcalcio funt ancora circhendi de aderetzai is arregulas (cussa de oi iat a podi essi sa dii bona), de su "Consìgiu Diretivu" de sa Lega Pro, po buca de su presidenti Francesco Ghirelli, nd'arribant fuedhus marigosus: «Cumprèndeus su disìgiu de is scuadras de is Sèries prus mannas de giogai is partidas chi amancant po acabai is campionaus — si ligit in d-unu comunicau bessiu apustis de s'atobiu de martis passau — ma nosu obeus sighiri a ponni a su primu postu de sa lista sa saludi de sa genti, cumenti eus fatu giai su bintunu de su mesi de Friàrgiu, candu estus detzidiu de firmai totus is giogus. Is sesanta dotoris sotzialis chi sighint is scuadras de sa Sèrie C funt totus d'acòrdiu: po su duamilla e dexianoi \ duamilla e bint no nc'at a essi pru nudda de fai».

Imoi at a tocai a su "Consigiu Federali" cumprendi cumenti arrangiai is cosas.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020