Salta al contenuto principale
nuorese esultanza
Sibilia scoviat: «Torrai a partiri cun is partidas de s'Eccellenza iat a essi una cosa bona»

Su mundu de sa bòcia de is diletantis circat de artziai sa boxi: serbint arrespustas craras po su chi pertocat s'acabbu de is campionaus

E duncas, nci seus arrutus torra. Arrutus torra in su disisperu e in su disprexeri, cun sa Sardinnia chi est stétia pintada de cabori de arangiu, naraus diaici, sighendi su gioghitedhu pesau de is de su Guvernu, chi funt sèmpiri sighendi a cumbatti su spaniamentu de su virus e, cida po cida, faint sciri a sa genti cumenti funt andendi is cosas apitzus a sa chistioni (is tres caboris, arrubiu, cabori de arangiu e grogu serbint pròpriu a custu) e, est craru, faint sciri, de cida in cida, calli funt is cosas chi si podint (ancora) fai e mescamente cussas chi no si podint prus fai. Is règulas nobas, intzandus, funt brintadas in sa vida de sa genti domìnigu passau, su binticuatru de su mesi de Gennàrgiu, e ant a balli po calincuna cosa cumenti a cuindixi diis, sèmpiri de cussu chi si cumprendit in dì de oi. Sa Sardinnia, dhu boleus arregodai, me is cidas passadas fiat pintada de cabori grogu, ma a nai sa beridadi, castiendi is numerus de is apuntoraus, si cumprendiàt chi giai is cosas no fiant andendi beni cumenti invècias podestus bisai, e duncas est bastau pagu meda po ndi torrai a cabai in s'inferru, dhu tzerriaus diaici.

In s'urtimu DPCM, bessiu aforas propriu me is ùrtimas diis, nci funt feti duas nobas de importu: sa prima, cumenti eus contau, pertocat sa Sardinnia, sa secunda sa Lombardia, chi benit pintada a cabori de arangiu (ainnantis fiat pintada a cabori arrubiu). A nai sa beridadi, si parit totu una brulla: in s'interis chi is personas funt perdendi su trabballu e pruschetotu sa saludi (su de abarrai acorraus in domu iat a podi essi peus meda, seus chistionendi, est craru, de is dannus a sa conca e a su corpus, de cussu chi iat a podi fai sa mobodia e duncas su Covid) sigheus a abarrai apicaus a custu gioghitedhu de is caboris, cun su Ministru de sa Saludi, Roberto Speranza chi est circhendi de ndi studai su perigulu de su Covid, impari, sèmpiri, a is de su Cumitau Tennicu Scientificu, chi ndi boddint is numerus e apustis dhoi arrexionant apitzus.

Su chi podeus fai imoi, est a cumprendi cumenti ant a andai is cosas: a su chi in italianu tzerriaus "coprifuoco" seus costumaus beni; apustis de is dexi de su noti is pratzas e is rugas funt e abarrant sbuidas, ca no si bint prus mancu is canis a passillu, e no si biri mancu prus unu cristianu. Totu custu fintzas a is cincu de su mengianu, candu is portas de is domus si torrant a oberri e sa genti podit torrai a bessiri, ma sèmpiri cun s'obbrigu de si imbussai sa buca e su nasu cun sa carotedda.
Sa nova de importu prus mannu pertocat torra is viàgius e is spostamentus: no si podit prus bessiri aforas de sa bidda o de su comunu innui biveus, ma abarrat sa possibbilidadi de ci bessiri po is chi trabballant o po is chi tenint bisòngiu de andai a che su dotori o, peus, a s'uspidali.
Po su restu, sighit a balli su chi balliat me is tempus de is festas de Paschixedha: podeus sighiri a andai a agatai is de domu,ma feti is chi bivint in sa pròpriu bidha nosta, e feti po una borta a sa dì, e feti in duas personas. Is chi bivint in d'una bidda chi no tenit prus de cincu milla personas, invècias, si podint spostai in d'unu tretu de trinta kilometrus, ma no podint lompi nè brintai me is grandus citadis, est a nai me is "capoluogo de provincia" (diaici dhi naraus in italianu), cumenti Castedhu, po nd'arremonai unu.
Sa noba prus legia pertocat su chi tzerriaus bar e is logus innui si papat: no ant a podi arriciri sa genti, ma ant a podi fai feti su chi si tzerriat "servizio da asporto", e feti de is cincu de su mengianu a is ses de su merì. Is museus funt torra serraus (funt duraus obertus po prus pagu de cuindixi diis), cumenti sighint a abarrai serradas is palestras, is piscinas, is teatrus e is cinemas. Abarrant proibidas is fains e is atividadis sportivas chi si faint in truma manna e, mescamente, cussas chi si faint s'unu acanta de s'atru; pròpriu po custu is chi giogant a tennis e padel, cumenti si ligit in su giassu de su "Dipartimentu de su Sport", ant a podi sighiri cun su spàssiu, ma feti chi abarrant in foras e no serraus aintru, po nd'arremonai una, de una palestra. Is chi andant a curri in bicicreta o andant a curri a pei, podint lompi fintzas a is bidas allenas, ma feti chi, a sa fini de su giru, ndi torrant in domu cosa insoru o in su logu de innoi ndi funt partius. A nai sa beridadi, si parit una brulla, torra, chi unu ndi potzat bessiri de sa bidha cosa sua po andai a giogai a padel in citadi, ma no potzat bessiri de sa bidha cosa sua po andai, in sa pròpria citadi, a agatai sa mama.

E in s'interis chi ndi seus pesendi totu custu budrellu, is de su mundu de sa bòcia de is diletantis sardus, ita funt pentzendi de fai?
In dì de oi, is unicas scuadras chi funt sighendi a cabai in campu funt cussas chi currint po su campionau de sa Sèrie D: chini bincit su campionau, dhu scieus beni cumenti andant is cosas, ndi artziat in Sèrie C; is ùrtimas de sa lista, invècias, ndi cabant in Eccellenza. Pròpriu po custu, candu mancant feti cuatru diis po fai brintai su mesi de Friàrgiu, nc'est e nc'at a essi de arrexonai, e in pressi puru, apitzus de is modus de fai partiri torra is giogus, a su mancu po su chi pertocat su campionau sardu prus mannu. Po su chi si cumprendit in dì de oi, s'unica bia chi podeus pigai po ndi bessi aforas de custu stampu innui est arrutu su mundu de sa bòcia, est cussu de ndi pesai règulas nobas po su chi tzerriaus "protocollo sanitario" (est a nai totu is règolas chi is assotzius sportivus depint sighiri po agiudai a cumbati su spaniamentu de su virus), poita, dhu eus giai biu, is règulas chi si manigiànt e balliànt de su mesi de Cabudanni fintzas a su mesi de Ladàmini no funt andadas beni, cumenti invècias bisastus. Intzandus abarrat de cumprendi, mescamente, cumenti fai po serrai is campionaus: is giogus iant a podi sighiri fintzas a su trinta de su mesi de Làmpadas e totu bisant chi is scuadras potzant binci is campioaus in campu, e no apustis de is decisionis pigadas de is de sa Lega Natzionale de is Diletantis, aintru a cancu ufìciu.

Scieus giai chi fai partiri torra totu su mundu de is diletantis (seus chistionendi de prus de centus scuadras tra Eccellenza, Promozione, Primu e Secunda Categoria) no at a essi facili e fortzis nc'at a essi calincunu chi s'at a depi acuntentai de castiai is atrus (pentzaus mescamente a is de sa Secunda Categoria). Chi diaderus obeus fai partiri torra is giogus, is assotzius sportivus e is presidentis de is Legas iant a depi arribai a su cincu de su mesi de Martzu (chi est s'urtima dì innui at a balli su DPCM bessiu aforas sa cida passada) cun sa conca prena de bideas craras e togas. Su de torrai a partiri cun su sport in truma manna iat a depi essi una chistioni de importu mannu cantu sa chi pertocat su mundu de sa scola po is piciochedus mannus, chi funt sèmpiri abetendi de si podi atobiai, totus impari, aintru de is aulas, in cussa chi imoi seus costumaus a tzerriai "didattica in presenza". Est craru peròu chi nisciunus, po imoi, podit sciri cumenti ant a essi is cosas in su mesi de Martzu po su chi pertocat su spaniamentu de su virus e, mescamente, su trabballu de is dotoris me is uspidalis (chi est una chistioni de importu mannu po decidi su cabori de is regionis), ma de sicuru est de imoi chi andant circadas is solutzionis.

Po imoi, abarrant in peis is règulas chi is de su Guvernu e de su Cumitau Tennicu Scientificu ant pigau po bonas e chi funt serbidas, e mancu malli, po fai torrai a partiri, in su mesi de Idas, is campionaus de is de sa Sèrie D: nc'est duncas s'òbbrigu de fai is esamis a totus is giogadoris de sa rosa, duas o tres diis ainnantis de sa partida de su campionau, cun s'òbbrigu de abarrai in assetiu a su mancu po cuindixi diis po totus is giogadoris chi nd'ant ingotu sa mobadia e po totus is cumpangius chi dhu s'ant atobiaus e funt abarraus acanta; po is chi invècias funt sanus, is allenamentus podint sighiri a andai ainnantis, ma sèmpiri chi is giogadoris apuntoraus in sa rosa no funt prus de tres. Scieus puru chi is esamis costant una barca de dinai, pròpriu po custu is de sa Lega Natzionale de is Diletantis ant agatau un acòrdiu cun is de su FederLab Italia: una scuadra de sa Sèrie D, chi depit fai cuatru girus de esamis a su mesi a totus is giogadoris e is dirigentis, arribat a spendi fintzas a milli e seti-centu euro, e no funt pagu po is buciacas de una sociedadi de diletantis. Pròpriu po custu, me is diis passadas, su Ministru de su Sport, Vincenzo Spadafora, impari a su capu de su Dipartimentu po su Sport, Giuseppe Pierro, at crariu is cosas: «Ndi seus arrexonendi e seus pentzendi de fai partiri agiudus in dinai po is scuadras chi ant a depi fai is esamis a pagamentu a giogadoris, allenadoris e dirigentis. Chi arrannèsceus a fai is esamis cun is tamponis a totus, fortzis iant a podi torrai a partiri is atrus campionaus puru».
Is sociedadis de diletantis timint giai de no podi tenni totu cussu dinai de spendi (e totu cussa passièntzia po sighiri is chistionis de is apuntoraus) e pròpriu po custu medas scuadras iant a bolli lassai totu frimu, diaici cumenti est imoi. Chi diaderus obeus fai partiri torra is giogus, su Guvernu iat a depi agiudai is assotzius, poita, si cumprendit giai de imoi, nc'ant a essi strobbus e pentzamentus mannus, dònnia cida.

Sa chistioni prus callenti est cussa chi pertocat su tempus chi abarrat po giogai a bòcia, prima chi ndi brintit torra s'istadi: pighendi po bona sa bidea de torrai a partiri cun is allenamentus me is primus diis de su mesi de Martzu, ant a serbiri una bella pariga de cidas po torrai paris cun totus is partidas chi funt sartadas in s'interis de is duus mesis de campionau, cun sa Sèrie D chi no est ancora arrannescia a recuperai totus is giorronadas, mancai is giogadoris de sa Sèrie D siant semi-professionistas; ita at a sucedi, intzandus, candu in campu ant a torrai is diletantis, chi funt totus trabballadoris e studiantis chi bivint po su prus in famillas cun atra genti meda, e custu cumportat un arriscu prus mannu de ndi ingolli su virus. Propriu po custu si cumprendit beni ca nc'at a essi bisongiu de una solutzioni chi potzat incurzai is tempus po serrai is campionaus in campu. Nobas novas apitzus de sa chistioni iant a podi arribai giai de su Consillu de su Diretivu de sa Lega Natzionale de is Diletantis, chi s'at atobiai me is primus diis de su mesi de Friàrgiu.

Pròpriu po totu su chi eus nau fintzas a imoi, si cumprendit beni chi candu chistionaus de fai torrai a partiri su mundu de is diletantis, chistionaus mescamente de is de s'Eccellenza, poita est su campionau cun prus pagus scuadras (po sa Primu Categoria, feti po nd'arremonai unu, nci funt cuatru gironis cun dexiotu scuadras s'unu) e poita in Eccellenza is scuadras tenint prus dinai de spendi (e prus personas chi dhoi trabballant) de su chi sucedit e capitat, mancai, in su mundu de sa Secunda Categoria. Su campionau de s'Eccellenza est acapiau a su de sa Sèrie D e abarrat s'ùnicu, tra is totus is atrus de sa Sardinnia, chi tenit partidas, mancai a sa fini de sa stagioni, chi si giogant contras is scuadras de atrus logus e de atras regionis in Italia. Apitzus de sa chistioni, nd'at arrexonau, pròpriu ariseu, su presidenti de sa Lega Natzionale de is Diletantis, Cosimo Sibilia, chi at scoviau: «Torrai a partiri cun is campionaus de s'Eccellenza iat a essi una cosa toga e bona meda; pròpriu po custu, me is ùrtimas diis, totus is Cumitaus Regionalis funt stétius tzerriaus de is de sa LND po arrexonai impari e agatai una bia po torrai a incumentzai cun is partidas. Eus a ascurtai totus is bideas e nd'eus a chistionai, totus impari, in s'atobiu de su Cunsillu Diretivu chi nc'at a essi su cincu de su mesi de Friàrgiu. Chi is de su Guvernu si d'ant a permiti, nosu eus a fai de totu po essi scidus e prontus. At a tocai peròu fai beni totus is contus, poita candu chistionaus de esamis e tamponis depeus chistionai puru de su dinai chi nci bollit po dhu sus fai. Is sociedadis — sighit Sibilia — funt in genugu e sa LND, cun totus is atividadis frimas, no podit agiudai nemus. Is de su Guvernu sighint a promiti ca ant a fai partiri is agiudus in dinai e po imoi no podeus fai atru che sperai chi totu andit po su beni».

Apitzus de sa chistioni, est craru, funt arraxionendindi puru totus is allenadoris de is scuadras de s'Eccellenza, poita su tempus po pigai is decisionis, ndi eus giai chistionau, est sèmpiri prus pagu e iat a tocai a si fai agatai prontus po candu at a acabai sa serrada de su sport, cosa chi, po su chi scieus imoi, no at a sucedi ainnantis de su cincu de su mesi de Martzu, ma at a tocai a biri, in s'interis, cumenti ant a bandai is cosas po su chi pertocat su spaniamentu de su virus, chi at postu torra totu s'Italia a fundu de susu de su mesi de Ladàmini.
Is dexiotu allenadoris de is scuadras de su campionau de bòcia de importu prus mannu chi teneus in Sardinnia ant duncas scerau de partiri a s'atacu e funti domandendi de si ndi scabulli, de si ndi scidai de su sonnu po torrai a pentzai a su benidori chenza abertai po forza is decisionis de is de su Guvernu, chi bai e circa candu nd'ant a arribai. Cun d'una lìtera scrita po su presidenti de su Cumitau Regionali, Gianni Cadoni, po totus is giornalis e is giornalistas sardus e puru po is concas de s'Associazioni de is allenadoris, is allenadoris s'acudint po cumprendi calli funt is bideas apitzus de is tempus po torrai a partiri e mescamente po acabai is campionaus, circhendi pruschetotu, giai de imoi, de no ndi pesai tropus giorronadas aintru de sa cida, poita su giogai dònnia mercuis iat a podi essi unu strobbu po totus cussus piciocus, e funt medas, chi studiant o trabballant e no podint duncas feti pentzai a sa bòcia e a su spàssiu.

«Cumprèndeus beni chi seus totus bivendi tempus legius — si ligit in sa lìtera —, po su chi pertocat sa saludi e po su chi pertocat su trabballu e s'economia. Scieus puru, de su restu, chi pertocat a is presidentis de is scuadras nostras crariri is cosas cun is de sa Federatzione apitzus de is campionaus e de custa stagioni trumentosa meda. Boleus peròu incumentzai a arrexonai apitzus de una pariga de chistionis chi, diaici a su mancu si parit, funt de importu mannu: chi est berus chi depeus arrispetai is decisionis chi pigat su Guvernu, nosu pentzaus puru chi no podeus prus abertai chentza musciai in s'interis chi is cosas andant ainnantis diaici, de unu mesi a s'atru. Chi est berus, aici si parit a su mancu, chi no eus a torrai a partiri cun is allenametus prima de su cincu de su mesi de Martzu, s'iat a praxi peròu arribai a cussa dì cun is bideas craras, sciendu giai cumenti ant a sighiri a andai ainnantis is campionaus. Domandaus duncas, giai de oi, chi potzat partiri un arrexionamentu po circai de cumprendi cumenti aparixai is cosas».



Attività realizzata col contributo della Regione Sardegna. IMPRENTAS 2020-2021. LR 22/2018 art. 22

In questo articolo
Campionato:
Argomenti:
Stagione:
2020/2021
Tags:
Eccellenza