Salta al contenuto principale
arzachena bomber

Is de sa Sèrie D lompint a sa de dexi giorronada: prexu mannu po is de s'Altzaghena, nudha de fai po is de su Crabònia chi nd'arruint in domu de su Nocerina

In su duamilla e bintunu, e de su restu dhu sciestus beni, eus a depi fai torra (ma iat a essi mellus a scriri "ancora", e bai circa po cantu tempus, a nai sa beridadi, ca in dì de oi su benidori si parit sèmpiri prus trumentosu) is contus cun su tiau de virus e, pruschetotu, cun totus is obbrigus e is cosas e is fainas chi no si podint fai, a su mancu po immoi; pentzaus, po nd'arremonai una, a giogai a bòcia cun is cumpangius e is amigus, mescamente chi ses unu de is chi tzerriant "diletantis", est a nai cussus chi currint avatu a una bòcia feti po spassiu e no po su dinai, cumenti mancai faint is professionistas.

Is de sa Sèrie D, peròu, cun is scuadras sardas chi currint in su Girone G, sighint a andai ainnantis cun is giorronadas e de custu obeus chistionai, po su primu articulu de s'annu nou po is "Novas de Diario" in sardu campidanesu.

Sa prima nova de importu mannu nd'arribat de is de su Murera: is grogus-brau, difatis, funt batallendi contras a su spaniamentu de su Covid, chi est ponendi a "fundu e susu" (aici si narat) sa rosa de giogadoris; nudha de fai, intzandus, (pighendi po bonas is règulas de sighiri pesadas de is de su Guvernu e de su Cumitau Tecnicu Scientificu me is mesis passaus), po is partidas contras a is de su Latina e contras a is de su Vis Artena: sa prima si depiat giogai pròpriu ariseu merì, su ses de su mesi de Gennàrgiu, sa dì de sa befana, o de paschinunti (sa pasca de is tre Gurrèis); se secunda si depiat giogai, invècias, domìnigu chi benit, su dexi.

Funt stetius pròpriu is de su Murera a bogai aforas sa nova, candu si ndi funt acataus de tenni ses giogadoris apuntoraus e puru unu dirigenti: nc'est de nai puru, e seus prexaus meda po custu, chi is mobadius staint beni e no tenint e no funt sunfrendi de daboris o trumentus tropu mannus.

Is strobus, po is de su Murera, funt lompius apustis de is partidas in domu de is de su Savoia e de s'Afragolese, chi si funt giogadas su binti e su binti-tres de su mesi de Idas de su duamilla e binti; in d'unu primu tempus, unu giogadori si nd'est acatau de stai mabi, ma gràtzias a is esamis fatus a totu sa scuadra (cun s'agiudu de su FederLab), is grogus-brau ant cumprendiu ca su dannu fiat prus mannu de cussu chi si timiat, ma nc'est de aciungi puru ca is giogadoris chi funt abarraus sanus funt sighendi cun is allenamentus in truma.
Me is diis chi ant a benni, sa LND at a decidi candu s'ant a podi recuperai is partidas. S'afroddiu prus mannu, si cumprendit, est po sa batalla contras a is de su Latina, chi s'agatant  me is primus postus de sa lista.

Sa primu partida de su duamilla e bintunu, intzandus, est stetia cussa de is tataresus de su Latte Dolce, chi funt cabaus in campu, in domu cosa insoru, contras a is de su Cassino, martis passau, est a nai su cincu de su mesi de Gennàrgiu. Is piciocus sighius de mister Stefano Udassi nd'iant ingotu duas bellas bussinadas me is ùrtimas duas partidas de s'annu beciu: in d'unu primu tempus nd'est arribau su zero a unu contras a is de su Latina; apustis nd'est protziu su tres a duus contras a is de su Crabònia. Su primu gol de is de domu nd'arribat a su de bintitres minutus, candu Scotto cassat sa bòcia de conca, agoa de su passagiu fatu de Bianchi, ma su portieri de is strangius, Della Pietra, andat a sbatiri, e a forti puru, pròpriu contras a Scotto, cun is duus giogadoris chi abarrant crocaus in terra po is daboris, po calincuna cosa cumenti a tres minutus. Su tiru de is undixi metrus tocat a Cabeccia, chi stampat sa porta de is strangius. Cuindixi minutus prus a tradu, is de su Cassino si torrant a strantaxiai, gràtzias a su gol fatu de Tribelli, chi donat una bella carvada de pei a sa bòcia, apustis de sa parada de Urbietis chi, in d'unu primu tempus, fiat arrannesciu a cassai su tiru, cun su pei mancosu, de Vitiello. In su secundu tempus sa partida abarrat oberta e spassiosa: Tuccio, unu piciocheddu nasciu in su milli e noicentus noranta-noi, firmat, cun d'una giogada de campioni, sa cursa de Vitiello, chi fiat bolendi conca a sa porta de Urbietis. Is tataresus de su Latte Dolce si ghetant a s'atacu, seus a su de binti-noi minutu, cun Scotto chi piscat beni Palmas: s'atacanti donat una puntada de pei, cun su deretu, a sa bòcia, chi peroù andat a ferri contras a su pau de sa porta de Del Giudice, in s'interis brintau in campu a su postu de Della Pietra. Palmas nci provat torra, una pariga de minutus agoa, ma su cropu de conca cosa sua no donat nisciunu pentzamentu a su portieri de is strangius. Nci provat torra puru Scotto, cun d'unu tiru de atesu meda, ma Lucchese, seus a su de trinta-ses minutus, ndi scabullit is suus cun d'una giogada pròpriu in sa linia de porta. Su Latte Dolce nci provat fintzas a s'urtimu minutu, ma is de su Cassino agguantant e apoderant s'unu a unu fintzas a is tres frùscius de s'arbitru. Po is tataresus, intzandus, nd'arribat feti unu puntu.

Faint grandu festa, invècias, is de s'Altzaghèna, chi in sa partida in domu cosa nsoru, contras a is de su Vis Artena, si ndi pigant is tres puntus chi dhoi fiant in su pratu, gràtzias a sa bìncida po tres a duus. Is biancus-birdis no cabànt in campu de calincuna cosa cumenti a sessanta-duas diis, est a nai duus mesis: s'ùrtima partida po is de sa Costa Smeralda fiat cussa, defatis, contras a is de su Savoia, me is primus diis de su mesi de Donniasantu. Is otu giogadoris apuntoraus, aintru de sa rosa de mister Raffaele Cerbone, ant fatu sartai (de su restu, scieus beni ita nant is regulas) is tres partidas chi si depiant giogai in su mesi de Idas: seus chistionendi de cussas contras a is de sa Nuova Florida, contras a is de su Giugliano e de su Latina.
Nc'est de nai chi is de s'Altzaghèna si funt fatus agatai in saludi e prontus a si dha gherrai, pròpriu cumenti bisàt s'allenadori: totu beni duncas, contendi pruschetotu chi is aversarius funt una de is scuadras prus fortis de su Girone G, poita nd'arribànt a sa partida cun tres bìncidas de sighiu in buciaca e dexi puntus ingotus me is ùrtimas cuatru bessidas. A su de cuindixi minutu, intzandus, is de domu nd'aciapant su primu gol, cun Loi chi donat una bella carvada de pei a sa bòcia, cun su deretu, po una giogada de campioni. Is biancus-birdis sighint a atacai: candu mancant feti tres minutus a s'acabbu de su primu tempus, est a nai a su de corantatres minutu, Kevin Congiu arrannescit a fai su secundu gol e stampat sa porta difèndia de Manni, chi no arrannescit a firmai s'atacanti aversariu. In su secundu tempus, s'Altzaghèna agatat puru su de tres gol, ancora cun Loi, piscau cun d'una grandu bidea da Molino, cun su piciocu de Isili (cun d'una esperièntzia de importu mannu cun sa scuadra de su Casteddu) chi fait a biri a totus cantu est forti cun d'unu antru tiru de campioni. Is strangius, a cussu puntu, circant de nd'artziai sa conca: a su de binti-ses minutu, Sabatini arrannescit a stampai sa porta de Al-Tumi cun d'una cannonada; a su de trinta-cincu minutu, nd'arribat puru su secundu gol po is de su Vis Artena, cun Alonzi che torrat a oberri totus is giogus e sa partida puru, e is de s'Altzaghèna chi depint aguantai e apoderai, in dexi ominis, contras a is atacus de is aversarius, apustis de su cartellineddu arrubiu buscau de Bonacquisti a su de trinta-tres minutu. Me is ùrtimus minutus de sa partida, Ingretolli donat unu pinnigosu a Congiu e lassat is strangius in dexi ominis, cun is de su Vis Artena chi no tenint prus sa fortza po circai su tres a tres. Is smeraldinus imoi depint recuperai tres partidas e iant a podi artziai, diaici, fintzas a is primus postus de sa lista.

Is de su Lanusè, invecias, si ndi pigant unu puntu de oru in domu de su Gladiator: una partida toga meda po is piciocus de mister Alfonso Greco, chi abarrant scidus e atentus po totus is noranta minutus de giogu, contras a una scuadra chi fait de totu po binci sa partida, chi acabat peròu chenza nisciunu gol ne de una parti ne de s'atra, po su resultau de zero a zero. Is primus chi si ghetant in atacu, seus a su de noi minutu, funt pròpriu is campanus, cun Salla chi donat unu bellu cropu de conca a sa bòcia, apustis de su passagiu fatu de Tripicchio. Is strangius de su Lanusè arrespundint, seus a su de binti minutu, cun Camilli, chi nci provat po duas bortas; nci provat puru Attili, ma su portieri de is de domu, Fusco, arrannescit a cassai sa bòcia. Me is ùrtimus minutus de su primu tempus, su Gladiator si torrat a ghetai a s'atacu cun Falco, po duas bortas, e Maraucci, ma La Gorga serrat beni sa porta e sarvat is suus. Su secundu tempus si oberrit cun sa giogada de campioni de su portieri de su Lanusè, La Gorga, chi bolat po cassai sa bòcia scuta de su crupu de conca sèmpiri de Maraucci, unu de is giogadoris prus perìgulosus in sa scuadra de is aversarius. Sa arrespusta de is de su Lanusè nd'arribat allestru meda: seus a su de sexi minutu, sèmpiri in su secundu tempus, est craru, candu Attili nci provat cun d'unu tiru, da sexi metrus de sa porta, ca su portieri de is aversarius, Fusco, arrannescit a cassai chenza dannus nè atzìchidus. Me is ùrtimus minutus de sa partida, intzandus, is de su Gladiator si nci ghetant a s'atacu, ma su Lanusè ndi pesat unu muru chi no nd'arruit, fintzas a su de noranta minutu.

Giorronada trota e isfortùnada, invècias, po is de su Crabònia, chi ndi buscant duas bellas bussinadas in sa batalla in domu de is de su Nocerina e abarrant diaici a buca asciuta, apustis de su duus a unu chi nd'esti bessiu aforas a sa fini de is noranta minutus de giogu. Sa primu giogada de importu mannu po is minerarius partit de is peis de Fredrich, chi agatat su tempus po donai una bella carvada de pei a sa bòcia, ma Cappa arrannescit a cassai su tiru de s'aversariu, cun is difensoris de domu chi si scabullint in pressi de su perìgulu. Sa Nocerina, e si cumprendit beni, no abarrat de sicuru a castiai is de su Crabònia: a su de binticuatru minutu, Cuomo fait partiri unu tiru forti meda chi Carboni arrannescit a cassai cun d'unu tufu; Cuomo nci provat torra, seus a su de trinta minutu, ma sa bòcia ndi bessit aforas de su campu, mancai de pagu. Nci provat puru Dammaco, sèmpri po is de domu, cun d'una cannonada chi atumbada in sa linna de sa traversa de sa porta difendia de Carboni. Me is ùrtimus minutus de su primu tempus, sa partida si callentada e s'alluidi: Diakitè si ndi fuit, currendi a tipu lèpori, in sa zona de su campu cosa sua, sa bòcia arribat me is partis de Katseris ca peròu no arrannescit a dh'aciapai e a dha scudi conca a sa porta de is de su Crabònia. Funt pròpriu is de sa Nocerina, a su de coranta-ses minutu, a agatai su gol chi ballit po s'unu a zero: Damacco piscat Vecchione chi intzetat su tiru giustu. In su secundu tempus, seus a su de dexiotu minutu, Diakitè stampat torra sa porta de Carboni, chi fiat arrannesciu a cassai su tiru de Donnaruma. Is de domu in s'interis abarrant cun feti dexi ominis in campu, poita Morero si ndi buscat su secundu cartellineddu grogu de sa partida cosa sua. Su Crabònia aciapat su gol de su duus a unu me is ùrtimus minutus de sa batalla, cun Piredda.

Si serrat chentza nisciunu gol, duncas cun su resultau de zero a zero, sa partida tra is de sa Nuova Florida e de sa Torres de Tattari: is scuadras in campu si dha gherrant fintzas a s'ùrtimu minutu, nci ponint totu su coru e s'afroddiu e sa gana po cassai sa bìncida ma a sa fini si depint acuntentai de unu puntixeddu a cada unu. Is primus a si incarai in atacu funt is strangius, cun d'unu tiru de atesu meda de La Vigna; sa arrespusta de is de sa Nuova Florida nd'arribat gràtzias a su tiru scutu de Capparella, ma Bilea sarvat is cumpangius cosa sua. A su de binticincu minutu, nc'est torra sa Torres in atacu, cun Origlio chi nci provat cun d'unu bellu cropu de conca, ma sa bòcia acabat aforas de su campu. Is su segundu tempus, is de domu circant de sfundai sa porta de Frasca cun su portieri, a sa primu partida cun sa scuadra noba e cun sa casaca de is arrubius-brau, chi ndi cassat su tiru forti meda de Capparella. A su de cincu minutu, s'isfortuna manciat su tiru de Origlio, scutu de atesu, cun sa bòcia chi andat a atumbai su pau de sa porta difèndia de su portieri Giordani. Torrat Giordani, apustis de cincu minutus, cassat su tiru scutu de Melli. Sa partida abarrat spassiosa: Elefante nci provat candu seus lompius a su de doxi minutu, ma Frasca si ndi scabullit de su perìgulu cun d'una parada cun is peis; po is de sa Torres, invècias, nci provat La Vigna, ma chenza prexiu nè fortuna. A su de binti-duus minutu, Mascia agatat su gol ma s'arbitru ndi sciusciat totu poita su piciocheddu, a cantu parit, fiat partiu, cumenti si narat in italianu, in "fuorigioco". Is de sa Nuova Florida s'incarant torra de is partis de Frasca cun Elefante, ma su portieri est scidu e cassat su tiru de s'aversariu. A su de trinta-ses minutus, Capparella no arrannescit a cravai sa bòcia a is pabas de Frasca. Candu mancant feti cincu miutus a s'acabbu de sa partida, nci provat torra Ponsat, ma Giordani sarvat is suus, diaici cumenti fait La Vigna, po is de sa Torres, cun d'una giogada de importu mannu meda, pròpriu apitzus a sa linia de sa porta.

Custus, duncas, funt is resultaus de is partidas de is cuadras sardas chi ballint po sa de dexi giorronada: me is atras partidas, s'Afragolese si ndi pigat is tres puntus contras a is de su Nola: is strangius bolant gràtzias a is gol fatus de Energe, a su de noi minutu, e apustis, a su de trintacincu-minutu, cun Puntoriere. Mèrcuis prenu fintzas a cuccuru de prexu po is de su Savoia puru, chi currint a forti in domu de is de su Giugliano, cun su resultau de tres a zero: su primu gol portat sa firma de Orlando, in su secundu tempus, a su de tres minutu; passant feti dexi minutus, seus duncas a su de catodixi minutu, candu Kyeremeteng aciapat su secundu gol puru; nci penzat Esposito, a su de binti e otu minutu, a serrai totus is giogus. Duuas, invècias, is partidas sartadas: eus giai chistionau de sa batalla tra is de su Murera e is de su Latina, ma ballit sa pròpriu chistioni po is de s'Insieme Formia, chi depiant giogai contras a is de su Monterosi. S'ùrtima cosa chi s'abarrat de fai, intzandus, est a castiai sa lista, mescamente po su chi pertocat is scuadras sardas: is de su Murera tenint giai allogaus in buciaca calincuna cosa cumenti a dexiotu puntus, cincu in mancu de is de su Monterosi e feti tres in mancu de is de su Latina Calcio, chi ballint po su de tres postu in sa lista. Is de su Crabònia, invecias, sighint cun trexi puntus, impari e Insieme Formia e Afragolese; dexi funt is puntus ingotus fintzas a imoi de is de s'Altzaghèna, chi funt sa scuadra, peròu, in totu su Girone D, chi at giogau prus pagu partidas. Sèmpiri a dexi puntus, nci funt puru is tattaresus de su Latte Dolce, sighius, cun feti unu puntu in mancu, de is de su Lanusè. Tempus legius, invecias, po is de sa Torres, chi tenint allogaus, fintzas a imoi, feti tres puntus e no ant bintu ancora nemancu una borta.

Attività realizzata col contributo della Regione Sardegna. IMPRENTAS 2020-2021. LR 22/2018 art. 22

In questo articolo
Campionato:
Argomenti:
Stagione:
2020/2021
Tags:
Serie D