Eccellenza: festa manna in domu de is de su Budoni po sa bìncida de su campionau e sa torrada in Sèrie D

E duncas, atacu cun s'artìculu de custa cida cun is chistionis chi pertocant sa bòcia, e custu bollit narai ca, a su mancu po una borta, apa a sartai is strollichiminis chi mi praxit (fintzas a m'amachiai, e chi eis lìgiu unu de is artìculus chi nd'apu giai bogau aforas cust'annu, est a nai duncas po is primus tres mesis de su duamilla e binticincu, po is Novas de su Diàriu Sportivu, scieis giai de ita seu chistionendi) a nci stichiri tra is resultaus de is partidas e totus is novas chi nd'arribbant de is campus innoi si giogant is garas de is diletantis sardus. 

E custu no bollit narai ca, mancai, m'apa a strollicai unu pagheddeddu (m'at a benni sa gana de mi strollicai unu pagheddeddu, mancai, po ddu narai diaici puru) in sa segunda parti de custu artìculu etotu, ca cumenti s'arrapitu fatu fatu (cumenti si scriu fatu fatu, po ddu narai mellus puru), no sciu mai cali legas apa a pigai, duncas, ainanntis de mi ponni a ddu fai, e duncas no sciu ita totu nd'at a bessiri aforas custa cida. 

E duncas, eia, mi iat a praxi a arraxonai apitzus de su tempus chi ndi passat, cumenti fatzu dònnia cida, a su mancu, fadendi su contu, pruschetotu, ca seus arribbaus a s'ùrtima cida (iat a fai a dda tzerriai diaici) de sa caresima, e duncas, eia, cumenti eis a sciri beni (e mellus de mei puru, ma peròu deu seu abertendi custa Pasca Manna a trassa de unu pipiddu chi no biri s'ora de oberri s'ou de ciuculati), custu domìnigu chi est giai giai po nd'arribbai, at a essi cussu de is Pramas, cumenti si tzerriat, cumenti ddu tzerriaus, mellus, a trassa de is catolicus-cristianus. 

Ma de totu custu, mancai, nd'apa a chistionai torra apustis chi serru cun is novas acapiadas cun su mundu de sa bòcia ca, cumenti s'apu narau, e cumenti s'apu promìtiu, funt sa cosa de importu, a su mancu po custu artìculu, a su mancu po oi. 

E duncas, atacu acoitu (e allestru puru) narendusì ca eia, in Sardìnnia teneus giai su nomini de sa primu scuadra chi nd'at cassau sa bìncida de su campionau, e duncas, seus chistionendi (e deu creu chi medas de bosatrus ddu sciant giai, fadendi su contu ca seus arraxonendi apitzus de una nova chi nd'est bessida aforas su trinta de su mesi de martzu e duncas, fait a ddi narai diaici puru, nd'est bessida aforas, nd'est arribbada s'ùrtimu domìnigu de su mesi de martzu) de is de su Budoni (Budune a trassa de su sardu logudoresu, e Budunu, diaici si iat a podi scriri, sighendi su gadduresu. Ma deu chi seu campidanesu, est a nai chi bivu in Bidd'e Sorris, in su Campidanu de mesu, e fueddu su campidanesu, apa a sighiri a ddu scriri Budoni, andat beni?), chi ant cassau su primu postu de sa lista po su chi pertocat su campionau de s'Ecellenza, chi est su prus mannu (cussu de importu prus mannu, po ddu narai mellus puru) tra totus cussus chi si giogant in s'isula cosa nosta bella e stimmada. 

E duncas, sa primu cosa chi podeus fai est cussa de andai a castiai is numerus chi is de su Budoni nd'ant pesau in custus seti mesis de sa stagioni, chi at a acabbai feti in su mesi de Abrili, ma peròu, e custu bollit narai, duncas, ca is numerus chi s'apa a donai in custu artìculu iant a podi essi deversus a sa serrada de is giogus. Duncas, in s'ùrtima bessida de su mesi de martzu (si iat a podi atacai diaici etotu), chi fiat sa de bintotu giorronadas, is de su Budoni ant bintu, cun su resultau de unu a zeru, in domu de is de su Crabonaxa, invècias is de su Muristeni, chi s'agatant a su segundu postu de sa lista, si funt dèpius acuntentai, cumenti si narat, de unu puntixeddu feti, chi nd'est arribbau in sa partida chi is biancus-asullus ant giogau, in domu cosa insoru etotu, contras a is de s'Ossese, e chi s'est serrada (si ddu naru po essi pretzisu, ca su de essi pretzisu benit a essi una de is cosas chi unu giornalista iat a depi circai de essi, e de fai, candu fait su trabballu cosa sua, e gei si cumprendit) cun su resultau de unu a unu. 

E duncas, is cosas po su chi pertocat sa lista funt bastanti craras (mi parit de ddu podi narai diaici): is de su Budunu tenint, a su mancu cun bintotu giorronadas fatas a is pabas (seu incumintzendi a atacai a scriri cust'artìculu su duus de su mesi de Abrili, ma custas rigas, custu artìculu, intzandus, nd'at a bessiri aforas feti su dexi, candu s'at a essi giogada puru sa lista de partidas chi ballint po sa de bintonoi bessidas), dexi puntus in prus de is chi tenint is de su Muristeni, candu, cumenti scieis, po acabbai sa stagioni ammancant feti duas partidas, e duncas, cussa chi s'at a giogai (chi s'est giogada, po ddu narai mellus) su ses (sèmpiri de su mesi de Abrili) e cussa chi s'at a giogai su trexi (chi at a essi custu domìnigu chi at a benni). 

E duncas, eia, is giogus po ndi cassai su primu postu funt bellus ca serraus, e duncas, fadendi su contu ca a binci praxit a totus (ballit, est craru, po is grandus scuadras chi currint me in su campionau de sa Sèrie A, ma sa chistioni ballit, mi parit craru puru, po totus is scuadras de is diletantis, partendi de cussas chi currint in su campionau de s'Ecellenza, e fintzas, mancai, a arribbai a is scuadras de sa Segunda Categoria, e de sa de Tres Categorias puru), intzandus no s'abarrat atru ca fai is cumplimentus (cumenti si iat a depi fai, de su restu, in su mundu de su sport) a sa scuadra chi at bintu e, duncas, a sa scuadra chi est arrannèscia a si lassai a is pabas totus is aversàrius. 

E duncas, si potzu incumentzai a contai ca is de su Budoni ndi torrant a artziai in Sèrie D (su de giogai in Sèrie D, est sa porta, dda tzerriu diaici, chi ddoi est tra su mundu de is giogadoris diletantis e su mundu de is giogadoris professioneris, chi cumprendeis su chi si bollu narai, ma deu creu chi siat bastanti craru) apustis de feti un annu: est a nai, duncas, ca ndi fiant cabaus a sa fini de su campionau de su duamilla e bintitres – duamilla e binticuatru, ma funt stètius bonus (cumenti si iat a podi narai) a ndi pesai sa conca acoitu. 
Chi est su chi una scuadra (ma sa chistioni ballit po is personas puru, e po totu su chi si sucedit in sa vida cosa nosta de dònnia dì) iat a depi fai, apustis chi ndi pigat una surra, o nd'arruit, cumenti est sucèdiu, de su restu, a is de su Budoni etotu. 
E duncas, eia, is biancus-asullus nc'ant postu trescentus sessantacincu diis (chi no calincuna cosa in mancu puru) a si torrai a pigai su chi iant pèrdiu. E diaderus, mi praxit, mi fait prexei ca custa nova ndi siat bessendi aforas duas cidas ainanntis a sa Pasca Manna, e mancai, in sa segunda parti de s'artìculu, eus a chistionai, mellus (e sèmpiri po su chi m'at a essi possibbili fai) de su chi bolit narai su fueddu resurretzione, no feti po is cristianus-catolicus, est craru, ca custa cosa de torrai a partiri candu nd'arruis, de ti torrai a strantaxai apustis de candu ti sciascias in terra, su de torrai a binci apustis de un'annada trota e lègia meda, ellus, est una chistioni chi pertocat (chi iat a podi pertocai, si ddu naru diaici, chi fortzis cratazat mellus puru) totus is ominis e totus is feminas, mancai cussas puru chi no funt acapiadas a strintu cun is chistionis de sa crèsia, o de sa storia de Gesù Cristu. 

E mancu mali, mi megu a solu a solu, ca a s'incumintzu de custu artìcolu, s'apu narau ca no m'apa a essi strollicau, a su mancu po sa primu parti de totu custu muntoni de rigas chi ndi seu pesendi, po oi puru. 
E invècias, a su mancu diaici mi parit de cumprendi, no nci dda potzu pròpriu fai chentza de mi strollicai a su mancu po unu pagheddeddu. 

Ma sigheus cun is contus e is contixeddus chi pertocant is de su Budoni. 
E duncas, si potzu narai, puru, immoi chi nci seu (e immoi chi nci seus, diaici a sa truma nc'aciungiu bosatrus puru) ca is de su Budoni ant bintu su primu campionau de s'Ecellenza in totu sa storia cosa insoru. 
E cumenti est possibili, s'at a acudi a narai calincunu de bosatrus, chi ainnantis, in custu artìculu etotu, as narau chi ant giai giogau in su campionau de sa Sèrie D? 
E duncas, e intzandus, sa arrespusta est facili, prus facili de su chi si potzat crei e pentzai; totus is atras bortas chi funt arrannèscius a ndi cassai s'artziada in sa Sèrie D, ddu ant fatu bincendi is partidas finalis, cussas chi, a sa moda de is ingresus, seus costumaus a tzerriai play-off, e chi funt, cumenti si contu fatu fatu (e si ddu torru a contai puru, a bortas nci siat personas, tra totus cussas chi ligint custu artìculu, chi mancai no connoscint is regulas acapiadas a su campionau de s'Ecellenza, o de sa Promotzioni, e deu seu innoi pròpriu po custu puru, mi megu a solu a solu), is partidas chi giogant, fra de issas, est craru, totu is scuadras chi acabbant sa stagioni a su segundu postu. 
E po su chi pertocat su campionau de s'Ecellenza, duncas, is partidas funt pesadas tra is scuadras chi nd'arribbant a su segundu postu me is atrus campionaus chi ddoi funt, chi ndi pesant me is atras regionis de s'Italia. 

E duncas, po cust'annu, in sa cursa po ndi cassai su segundu postu, e megu a chistionai de su campionau de s'Ecellenza sarda, ddoi funt, a su mancu in dì de oi, feti duas scuadras: e seu chistionendi de is de su Muristeni, chi s'apu arremonau ainnantis puru, e de is de su Tèmpiu, cun is campidanesus chi tenint feti unu puntixeddu in prus de is cabonischeddus, e immoi eus a biri cumenti s'ant a serrai is cosas, cumenti at a andai sa batalla (e manigiu custu fueddu mancai no mi praxiat prus de tanti, ma mancu mali ca seu chistionendi de partidas de bòcias, e no de gherras, e duncas, fadeus finta ca potzat andai beni diaici puru). 

E duncas, a su mancu de su chi ant contau is giornalistas chi ant sighiu sa cursa de is sexi scuadras de s'Ecellenza, su de cust'annu (megu a chistionai, est craru, de sa stagioni de su duamilla e binticuatru – duamilla e binticincu) est stètiu unu de is campionaus prus tostaus, e prus togus, de is ùrtimus dexi-doxi annus (e custu, ddu torru a narai, est su chi ant narau is giornalistas, prus matucheddus de mei e cun una esperièntzia prus manna a is pabas de sa chi potzu tenni deu, fadendi su contu ca eia, fatzu custu trabballu de su duamilla e undixi, si iat a podi narai, ma mescamente candu apu incumentzau, e po is primus cincu-ses annus, deu sighia feti is campionaus de sa Segunda Categoria, de sa Primu Categoria, e de sa Promotzioni, e duncas, de su mundu de s'Ecellenza, cumenti si iat a podi narai, ndi sciia pagu e nudda), fadendi su contu ca is de sa Lega Natzionali de is Diletantis nd'ant bogau s'obbrigu, cumenti si tzerriat (cumenti ddu tzerriaus, po ddu narai mellus), de nci ponni in campu is piciocheddus piticheddus de edadi (cussus ca in italianu tzerriaus "fuori quota"), e apustis si iat a podi narai, puru, ca po sa cursa po ndi cassai su primu postu de sa lista ddoi fiant a su mancu atras tres scuadras (chi no de prus puru) ca in s'istadi iant cuncodrau is rosas cosa insoru cun sa bidea, crara crara (chentza timorias e chentza su bisòngiu de si cuai, duncas) de binci su campionau e de arribbai prus in artu de totus is atras aversàrias, e seus chistionendi de is de su Muristeni, de is de su Tèmpiu (chi, de su restu apu arremonau pròpriu immubagora), e de is de s'Ossese puru. 

E duncas, a fai is contus me is buciacas de is de su Budoni nci poneus pagu meda, cumenti si iat a podi narai, is tres puntus de importu prus mannu, cumenti s'apu mesu scoviau ainnantis in custu artìculu etotu, ndi funt arribbaus gràtzias a s'unu a zeru chi nd'ant pesau in sa partida chi ant giogau in domu de is de su Crabonaxa: a fai su gol chi at regalau a is biancus-asullus s'artziada in su campionau de sa Sèrie D est stètiu Blas Tapparello, unu de is giogadoris prus fortis chi ddoi funt in su campionau de s'Ecellenza, e chi est nàsciu in Argentina e chi est fadendi a biri a totus is tifosus totu cussu de bonu chi sciit fai cun sa bòcia me is peis, de candu est arribbau a giogai innoi in Sardìnnia, una pariga de annus fait. 

E duncas, is de su Budoni nd'ant cassau sa de bintiduus partidas bintas in custa stagioni (ma su numeru iat a podi essi prus mannu puru, fadendi su contu ca, candu seu scriendi custu artìculu, ammancant atras duas partidas de giogai), e est, tra is atras cosas, sa de otu partidas chi ant bintu in domu allena (cumenti si iat a podi narai). E duncas, is de su Budoni funt arrannèscius a nci spundi, cumenti si iat a podi narai e cumenti est benendumì de narai, de su restu, fintzas a setantunu puntus, chi funt dexi in prus de is chi tenint in buciaca is de su Muristeni, chi ant serrau in paridadi (cumenti s'apu giai mesu arremonau) sa partida chi ant giogau, in domu cosa insoru etotu, contras a is de s'Ossese, e funt undixi in prus de is chi tenint is de su Tèmpiu, ca po su chi pertocat su contu insoru, funt arrannèscius a binci, cun su resultau de cuatru a unu, contras a is de su Taloro de Gavoi. 

Si iat a podi narai, duncas, a castiai is numerus, ca is de su Budoni ant lassau feti is pimpirillas a is aversàrius (cumenti si narat in italienu etotu), gràtzias, mescamente, a una segunda parti de sa stagioni (in sa lista de partidas chi ballint po sa torrada, cumenti si iat a podi narai, puru) innoi funt arrannèscius a ndi cassai calincuna cosa cumenti a undixi partidas bintas e feti duas partidas serradas cun su resultau in paridadi (e seus chistionendi de is isfidas chi ant giogau contras a is de s'Igrèsias e contras a is de s'Ossi); e po cumprendi cantu funt stètius fortis, e cantu funt arrannèscius a curri a forti, podeus fai su contu ca a sa fini de is partidas de sa lista de s'andada teniant duus puntus in mancu de is chi teniant is de su Muristeni, e duncas, eia, s'agatant a su segundu postu. Ma is piciocus sighius de Angheleddu, peròu, ant pèrdiu sa partida, contras a is de su Taloro de Gavoi, chi ant giogau apustis de is vacantzas po su Nadali e po s'annu nou; e impari a cussa partida, si cumprendit beni, nc'ant pèrdiu puru su primu postu de sa lista. 
E is de su Budoni, una borta chi ddu ant torrau a cassai, no ndi funt prus cabaus, cumenti si iat a podi narai; est a nai chi ant cumandau is giogus (e sa situatzioni in sa lista) fintzas a sa giorronada chi s'est giogada duus domìnigus fait. E ant a serrai sa stagioni a su primu postu, mi parit craru puru, berus est? 

Duncas, una de is partidas de importu prus mannu po sa stagioni de su Budoni est stètia, custu est pagu ma est seguru, cussa chi ant giogau, in domu cosa insoru etotu, contras a is de su Muristeni, a sa de tres bessidas de sa torrada (cumenti si tzerriat, cumenti tzerriaus sa segunda parti de sa stagioni, chi invècias, cumenti eis a sciri beni, est cussa chi tzerriaus de s'andada). 
E duncas, de cussa partida, e duncas, de sa de tres bessidas, is de su Budoni ant tentu sèmpiri ses puntus in prus, ses puntus de vantàgiu (po ddu narai mellus puru), fintzas a arribbai a sa partida chi s'est giogada tres cidas fait, cun is de su Budoni chi ant bintu puru contras a is de su Tèmpiu, ca, diaici, ant pèrdiu dònnia possibbilidadi de ndi cassai su primu postu de sa lista, cun is de su Muristeni ca, invècias, si funt dèpius acuntentai de feti unu puntu, a s'acabbu de sa partida chi ant giogau contras a is de su Kalanzanos. 

E duncas, torrendi cun sa chistioni ca in su mundu de su càlciu sa cosa de importu prus mannu est cussa de si torrai a strantzaxai apustis chi nd'arruis, ma sa cosa ballit, est craru, pò dònnia giogu, po dònnia sport, e ballit, puru, fintzas po sa vida cosa nosta de dònnia dì, is de su Budoni funt arrannèscius a torrai a partiri, prus a forti de cumenti fiant fadendi ainnantis, apustis de essi perdu, po unu pilu (cumenti si narat in italianu puru), sa cursa po su primu postu, in su campionau de su duamilla e bintiduus – duamilla e bintitres, innoi ndi iant cassau calincuna cosa cumenti a otantacincu puntus, chi no funt pagus de seguru, fadendi su contu ca cust'annu ant a podi arribbai, a su màssimu, a setantotu puntus, contras is otantaseti puntus chi is tattaresus ndi iant cassau in trintases partidas. 
E is de su Budoni ndi iant cassau s'artziada in su campionau de sa Sèrie D gràtzias a sa bìncida me is partidas finalis natzionalis, fadendi su contu ca is partidas tra sa segunda scuadra e sa de tres de sa lista de s'Ecellenza sarda fiant stètius cancellaus, cumenti m'est bèniu de ddu narai, fadendi su contu ca tra sa segunda scuadra de sa lista e sa scuadra a su de tres postus ddoi fiat una forada, ddi nau diaici (gioghendi a fai unu pagheddeddu su poeta) de bintotu puntus, ca pagus no funt de seguru. E gei ddu eis a cumprendi bosatrus puru. 

E duncas, cust'annu funt stètius pròpriu is gadduresus a si lassai totus is scuadras aversàrias a is pabas, e cun una media de puntus (megu a chistionai de sa media matematica, si cumprendit, berus?) chi benit a essi de duus e cincuantacuatru a partida; in su duamilla e bintritres, invècias, is biancus-asullus iant tocau sa media de duus e trintases. 
E po si fai a cumprendi cantu est stètia toga sa stagioni chi funt arrannèscius a ndi pesai is de su Budoni, si potzu feti narai, in prus de su chi apu giai fatu, ca in su duamilla e bintitres, candu iant bintu su campionau, duncas, is de su Latte Dolce fiant arribbaus a una media de puntus chi fiat de duus e corantaduus a partida. 

In sa isfida chi ant a depi giogai contras a is de sa Nuorese (e si sigu a arregodai ca seu pesendindi s'artìculu chi seis ligendi oi, chi est su dexi de su mesi de Abrili, su giòbia de sa cida ainnantis, chi est su tres de Abrili, e custu po sighiri su dìciu chi narat ca, eia, chini tenit su tempus de fai una cosa, no iat a depi abertai a cras a dda fai, e deu creu chi custu est unu dìciu chi ballit sèmpiri, e ballit po unu muntoni de fainas, partendi, duncas, de su trabballu cosa mia), duncas, is de su Budoni iant podi arribbai a binci cuindixi partidas apitzus de cuindixi partidas chi ant giogau in domu cosa insoru, una cosa ca, in totu Italia, funt arrannèscius a ndi cassai feti is de s'Unipomezia, a su mancu fintzas a oi. 

E duncas, e si cumprendit beni puru, candu is cosas ti andant daici beni, su prexu prus mannu est cussu de su presidenti, chi est, mi benit de ddi narai diaici, su babbu de s'assòtziu, cussu chi, a sa fini, si pigat totus is responsabbilidadis, partendi de s'allenadori chi scerat po guidai sa scuadra, fintzas a arribbai a is giogadoris chi, a sa fini, benint a fai parti de sa rosa. 
E mancai su presidenti no trabballit asolu, est cussu ca nci ponit sa faci aranti de is tifosus: est cussu chi si pigat, chi ndi incasciat, chi ndi ingollit is murrùngius de sa genti candu is cosas andant mabi, ma est cussu chi si pigat puru is tzacarrus de is manus (est a nai, duncas, cussus ca in italianu tzerriaus "applausi"), candu is cosas andant beni meda e candu is tifosus funt prexaus a tipu Pasca, cumenti si iat a podi narai (e cumenti mi benit de narai, pruschetotu, fadendi su contu ca po nd'arribbai a sa Pasca Manna ammancant feti dexi diis a partiri de oi). 

E duncas, po torrai a nosu, o, mellus puru, po torrai a is chistionis chi pertocant is de su Budoni, nc'eis arribbai a solus puru (est a narai, chentza de s'agiudu cosa mia, e megu a brullai, si cumprendit berus est?) a cumprendi totu s'afròddiu, totu su prexu chi ponit tenni in su coru su presidenti de s'assòtziu, e seus chistionendi, est craru, de Giovanni Sanna. Chi est berus chi, a sa fini, su trabballu de importu prus mannu benit a essi cussu de s'allenadori (chi est cussu chi pagat po primu su contu candu is cosas no andant beni, e dònnia dònnia annu nci funt sèmpiri una bella pariga, una bella pariga a sa sarda, si cumprendit, de allenadoris chi no arrannèscint a lompi a si papai su panetoni, est a narai, duncas, ca dònnia dònnia annu nci funt una biga de allenadoris chi benint bogaus, a sonu de corru, ainanntis de s'acabbada de sa primu parti de sa stagioni, mancai in su mesi de Idas, chi no me is mesis ainnantis puru, e custu sucedit candu is cosas andant peus meda de su chi podiant pentzai a s'incumintzu etotu de sa stagioni), e duncas, po sa bìncida de su Budoni, tocat a narai ca unu bellu trabballu ddu at fatu Raffale Cerbone, chi est s'allenadori de s'assòtziu, chentza de si ndi scaresi, de su restu, de su trabballu ancora prus mannu (mi benit de ddu narai diaici) ca ant fatu is giogadoris (chi a sa fini funt cussus chi ndi cabant in campo po noi mesis de sighiu, po curri avatu de sa bòcia e, duncas, po curri avatu, e prus a forti, de is aversàrius puru), e duncas, po su Budoni, po incumentzai, si iat a podi arremonai su capitanu, chi est stètiu, in totu sa stagioni de su duamilla e binticuatru – duamilla e binticincu, Marco Farris. 

Ma no si ndi podeus nemmancu scaresci (antzis, m'acoitu a si ddu torrai a contai, poita mi parit una de is chistionis de importu prus mannu chi pertocant sa stagioni de oru, e sa bìncida de su campionau, chi nd'ant cassau is de su Budoni) ca su presidenti Giovanni Sanna est stètiu pròpriu cussu ca, tres annus fait, iat decìdiu, chentza de nci pentzai nemmancu mesu segundu (cumenti si narat candu fais is cosas po sa passioni chi ti intendis aintru de su coru, prus ca po is contus ca una persona si podit fai in conca, o in sa buciaca, chi cumprendeis su chi seu circhendi de si narai), de sarvai sa scuadra, candu s'assòtziu s'agatat in acua lègias meda, fadendi su contu ca ndi fiat po cabai de su campionau de sa Sèrie D in cussu de s'Ecellenza. 

E duncas, Sanna est stètiu su presidenti chi est arrannèsciu a torrai a portai in Sèrie D, apustis de feti un annu, cumenti s'apu contau pròpriu in custu artìculu etotu, is de su Budoni. Eia, si iat a podi narai, duncas, cumenti si narat in bidda mia, de su restu, ca est Bidd'e Sorris, in su Campidanu de mesu, ca is de su Buddusò me in custus ùrtimus tres-cuatru annus, ant fatu s'atzia e caba, si narat pròpriu diaici, tra sa Sèrie D e s'Ecellenza, e si cumprendit si bisu de calincunu tifosu ca est giai giai incumentzendi a isperai ca su Budoni, immoi, a partiri pròpriu de sa stagioni chi at a benni, e chi at a essi cussa, est craru, de su duamilla e binticincu – duamilla e bintises, potzat abarrai in su campionau de sa Sèrie D po unu bellu arrogheddu de tempus. 

E duncas, e si cumprendit, apustis de nd'essi torraus agoa, torra, de sa Sèrie D in su campionau de s'Ecellenza, (e seus chistionendi, est craru, de cussa chi, in italianu, tzerriaus retrocessione, gei si cumprendit, deu creu, berus est?), is de su Budoni nc'ant postu su coru e totu sa gana bella chi teniànt in cropus (e mescamente me is cambas) po ndi torrai a artziai in sa categoria ca minescint de prus, a su mancu, custu est su chi si podit narai (su chi podeus narai, a partiri de nosu giornalistas etotu), chi andaus a castiai, cumenti eus giai fatu, de su restu totus is numerus chi nd'ant pesau cust'annu is de su Budoni. 

E duncas, arribbaus a custu puntu de sa chistioni, andu acoitu, e allestru puru, a si intregai is fueddus chi Giovanni Sanna at arregalau a is giornalistas e, duncas, a totus is tifosus de s'assòtziu cosa sua. 
«Su campionau est stètiu tostau e fadiosu meda, ma pròpriu po custu si iat a podi narai ca sa satisfatzioni chi nd'eus tentu, e megu a chistionai, est craru, de su arrannèsci a ndi cassai su primu postu de sa lista e, duncas, sa bìncida de su torneu, est stètia manna meda. Depu narai, peròu, ca is scuadras aversàrias si funt batias, e beni meda, e cun atrìviu, fintzas a s'ùrtimu segundu de giogu; e duncas est gràtzias a is aversàrias chi eus tentu cust'annu, chi su campionau est bèniu a essi diaici spassiosu po totus is tifosus. E immoi no potzu fai atru ca isperai – at sighiu a si contai Giovanni Sanna – ca sa scuadra chi at a arribbai a si giogai is ùrtimas partidas chi nc'ant a essi po ndi cassai s'artziada in su campionau de sa Sèrie D, potzat sighiri a curri a forti, cumenti at fatu in sa cursa contras de nosu etotu. Isperu, duncas, ca impari a nosu, in su campionau de sa Sèrie D chi s'at a giogai s'annu chi benit, nci potzat essi un'antra scuadra sarda, e megu a chistionai, est craru, de una tra is de su Muristeni e is de su Tèmpiu, chi contras de nosu, ma contras a is atras scuadras puru, ant fatu a biri a totus cantu funt fortis. Pròpriu po custu si tocat a ddis fai is cumplimentus. Po su chi si pertocat, po su chi pertocat su Budoni e po su chi pertocat a mei, po incumentzai, mi iat a praxi a dedicai, cumenti si fait apustis chi bincis unu campionau, sa stagioni toga meda chi nd'eus pesau a totus is tifosus chi s'ant sighiu, siat me is partidas chi eus giogau in domu, e siat me is partidas chi seus andai a giogai in domu allena. Mi iat a praxi, duncas, torrai gràtzias, puru, a totus is personas, e no funt stètias pagus, chi m'ant donau una bella manu de agiudu a sighiri is fainas acapiadas a s'assòtziu, e megu a chistionai, est craru, de totus is dirigentis chi ant trabballau po su beni de su Budoni. In prus, mi iat a fai prexei meda su de podi dedicai custa bìncida a totu sa genti chi bivit in Budoni e chi, sa cosa ballit po issus puru cumenti ballit po is giogadoris cosa nosta etotu, si minescint su campionau de sa Sèrie D, cun totu su de bonu chi nd'at a podi arribbai po sa bidda. E in prus, po serrai sa chistioni de is dedicas, mi iat a praxi a torrai gràtzias a nebodedda mia, chi si tzerriat Cecilia, e chi est stètia cussa chi m'at ispirau, ddi nau diaici, po ndi pesai sa rosa, po ndi pesai sa scuadra e po pigai totus is decisionis chi pertocant su Budoni. De su restu, no apu mai tentu dudas de su fatu ca su Budoni podessit binci su campionau e ndi podessit torrai a nd'artziai in Sèrie D apustis de feti un annu: connosciu, e beni puru, e giai de una bella pariga de annus, a Raffaele Cerbone e sciia giai cantu est bravu a fai su trabballu de s'allenadori; e sciia puru ca in sa rosa de su Budoni ddoi fiant grandus personas, e no feti grandus campionis. E immoi eus a torrai a partiri de totus is erroris e is arroris chi eus fatu in s'ùrtimu annu chi eus giogau in Sèrie D, po circai de ndi pesai una stagioni chi potzat essi meda, ma meda prus druci de is ùrtimas chi s'est tocau a bivi. Po su chi mi pertocat, e po su chi pertocat totus is chi faint parti de s'assòtziu, e de sa dirigenza, impari a mei, si iat a praxi a sighiri s'aventura cosa nosta impari a Raffaele Cerbone; po su chi si pertocat no nci funt dudas chi at a essi pròpriu issu a tenni is crais de sa scuadra me is manus, e depeus feti abertai chi si torrit sceda, ma issu comentecasiat, e ddu sciit, fait parti de s'anima de custa scuadra etotu. Po su chi mi pertocat, apu sarvau sa scuadra candu s'agatat in acua lègias, e s'annu apustis sues arrannèscius a ndi artziai torra in su campionau de sa Sèrie D, arrannèscendi a binci is partidas finalis (cussas chi, a trassa de is ingresus, tzerriaus play-off ndr), ma s'annada chi eus fatu est stètia pagu fortunada, e trota meda, e duncas si seus agataus torra a curri in su campionau de s'Ecellenza, e gràtzias a su Cielu seus arrannèscius a ndi cassai su primu postu e duncas sa bìncida de su torneu. Ma po s'annu chi at a benni, po su campionau de su duamilla e binticincu – duamilla e bintises podeus contai apitzus de una truma de giogadoris chi, immoi, si connoscint beni, meda prus beni de is annus passaus, e mi parit craru puru, e custa iat a podi essi una cosa chi si iat a podi agiudai, e meda puru. Eus a torrai a partiri, duncas, de sa truma de giogadoris chi cust'annu ant fatu ispantus mannus, e in s'interis eus a circai de nc'aciungi, a sa rosa, una pariga de giogadoris nous chi si potzant donai una manu a ndi pesai una stagioni, unu campionau de importu. Is scuadras sardas chi currint in su campionau de sa Sèrie D de cust'annu funt cumbatendi, e meda puru, poita no est unu torneu facili, mi parit craru; deu speru chi ndi potzant cassai totus sa sarvesa, est cussu chi mi auguru e chi, mescamente, ddis auguru, ma custu si serbit, pruschetotu, po cumprendi ca, eia, su campionau de sa Sèrie D no est de seguru una passillada, ma antzis, nc'est de sudai, de trumentai, e meda puru, mancai feti po ndi cassai sa sarvesa. Ma potzu narai, giai de immoi, chi nosu eus a fai de totu, totu su possibbili, duncas, est craru, po ndi torrai a pesai un'antra stagioni toga cumenti est stètia toga meda, de su restu, custa chi eus serrau cun custa bìncida de importu mannu». 

E duncas, si iat a podi narai, puru, ca is de su Budoni cust'annu iant pèrdiu feti una partida, a su mancu fintzas a custu fini de cida passau. E seu chistionendi, duncas, de sa batalla (manigiu custu fueddu mancai no mi praxiat prus de su tanti, poita mi fait bènniri in conca storias lègias, mescamente in custu periodu, innoi nci funt a su mancu duas gherras mannas, po ddi narai diaici, ma fadendi su contu ca nosu in su giàssu de su Diàriu Sportivu chistionaus feti de giogus e de partidas, intzandus potzu fai un ecetzioni, cumenti si narat) chi nd'ant dèpiu pesai contras a is de su Tèmpiu etotu (fiat su primu de su mesi de Idas de s'annu passau etotu, e duncas, su primu domìnigu de su mesi de Idas de su duamilla e binticuatru, po ddu narai mellus puru), a sa de doxi giorronadas po su chi pertocat sa lista de s'andada, cumenti seus costumaus a dda tzerriai. 

A narai sa beridadi, is de su Buddusò fiant currendi po ndi cassai un antru traguardu puru (ddi naru diaici, ca su fueddu chi sonat cumenti a tarea, o tenta puru, no mi praxit prus de su tanti, chi pròpriu si ddu depu narai), e seus chistionendi de sa de cuindixi bìncidas, totu de sighiu, est a nai, una avatu de s'atra, po su chi pertocat is partidas chi ant giogau in domu cosa insoru, e duncas, a su "Pasquale Pinna" (diaici, de su restu, ant tzerriau su campu innoi giogant is partidas). 

Ma a sa fini, calincuna cosa est andada a trota (e immoi si ddu potzu contai puru, fadendi su contu ca seu scriendi custas ùrtimas rigas su lunis, chi est su seti de su mesi de Abrili, e duncas, me is oras apustis is partidas chi si funt giogadas custu fini de cida passau, chi fiat cussu de su cincu e de su ses, po si cumprendi mellus puru), chi est berus ca is de su Budoni ant pèrdiu sa partida, chi ant giogau aranti de is tifosus cosa insoru (cumenti si narat), contras a is de sa Nuorese, cun su resultau (si ddu naru po essi prus pretzisu puru, cumenti unu giornalista iat a depi circai de essi, est craru) de tres a cuatru po is allenus. 

Ma is fueddus chi s'at arregalau (chi su presidenti de su Budoni at arregalau a is giornalistas, po ddu narai mellus puru) Gianni Sanna, ballint in dì de oi puru. 
Issu etotu, duncas, s'at scoviau ca «is vàntagius chi nd'eus tentu de giogai in domu cosa nosta, e duncas, aranti de is nostrus tifosus etotu (su chi in italianu seus costumaus a tzerriai "fattore campo" ndr) funt stètius medas. Fait a narai ca cust'annu eus pèrdiu feti una partida in sa lista de s'andada, chi est cussa chi eus giogau contras a is de su Tèmpiu, e chi, de su restu, funt stètius unu de is aversàrius prus tostaus chi eus atobiau, e deu creu ca po du cumprendi bastit a castiai cumenti funt cuncodradas is cosas in sa lista, e bastat a fai su contu de cantus puntus nd'ant bodditu is caboniscus. Ma fadendi su contu ca eus pèrdiu feti cussa dì, e apustis feti contras a is de sa Nuorese, in sa lista de partidas de sa torrada, si podit narai, puru, ca me is partidas atesu de domu, cussas chi eus giogau in domu allena, duncas, seus arrannèscius a si cumportai beni meda, est a nai, a fai a biri a totus su giogu bonu chi ndi scieus pesai. Est craru, duncas, ca su de fai puntus innoi a Budoni est stètia una cosa tostada meda po giai totus is scuadras chi funt benidas a s'agatai, e difatis no totus nci funt arrannèscius, antzis, si iat a podi narai a no nc'est arrannèsciu giai giai nemus. E custu si donat unu prexu mannu in prus, chi mi cumprendeis po su chi si bollu narai».



Attività realizzata col contributo della Regione Sardegna. IMPRENTAS 2024-2025. LR 22/2018 art. 22