Is Novas de sa primu dì de s'annu: nci seus po custu duamilla e bintises puru!

E duncas, sa primu cosa chi mi benit de si domandai, in s'interis chi circu unu modu togu po atacai cun su primu artìculu chi nd'at a bessiri aforas in su duamilla e bintises, est: eis passau festas bonas po su chi pertocat su Nadali? Satzaus si seis? Bufau meda eis? Nareus sa beridadi: eis bufau fintzas a si imbriagai, e fintzas a no cumprendi prus nudda, berus est? O eis fatu a bonus? 

Scumitu, peròu (pròpriu cumenti si scumitit apitzus de is partidas de bòcia) ca me is tres diis de festas de su Nadali si seis prenus sa brenti fintzas a s'impossibbili (po manigiai unu modu de narai ca apu sèmpiri intèndiu innoi in bidda mia, chi est Bidd'e Sorris, in su Campidanu de mesu), cumenti est giustu ca siat, fadendi su contu, de su restu, ca su Nadali nd'arribbat una borta a s'annu, e duncas, candu nd'arribbat (apustis chi fais cidas e cidas de sighiu abertendi sa dì de sa festa) mi parit giustu puru su de papai aforas de contu, totu su chi nc'est in sa mesa. 

E si sciit cumenti andant is cosas: su prangiu de sa dì de Nadali iat a podi andai ainanntis po oras e oras e oras de sighiu, e apustis tocat puru a si setzi in sa mesa po sa cena, e apustis de sa dì de Nadali (chi nd'arribbat, est craru, apustis de sa noti de cena, cumenti dda tzerriat sa bon'anima de nonna mia), nc'est puru sa dì de Santu Stefi, innoi si tocat, torra (e gei ddu eis a sciri, mellus de mei puru, cumenti andant is cosas), a papai a trassa de disisperaus (cumenti m'est bèniu de narai, isperendi ca nesciunu nc'abarrit mabi po su fueddu chi apu scerau, po su fueddu chi apu manigiau, ca seu gioghendi unu pagheddu a fai su poeta, anztis, prus de su poeta, in custu artìculu seu gioghendi a fai su scritori comicu prus de su giornalista sportivu, e isperu ca no si dispraxiat tropu cumenti a cosa, cumenti si iat a podi narai), siat po su chi pertocat su prangiu, e siat po su chi pertocat sa cena. E nci iat a mancai atru puru, ca una de is cosas prus togas, e prus bonas, mescamente candu nd'arribbant is festas, est su de si papai totu su beni de Deus chi s'agatat me is negotzius e me is mercaus. 
E po mei puru est stètiu, prus o mancu, sa pròpriu cosa, fadendi su contu, de su restu, ca apu fatu una dieta (cumenti seu costumau a fai de una bella pariga de annus, a narai sa beridadi), chi est incumentzada sa primu cida de su mesi de donniasantu, e chi est sighida fintzas a arribbai, duncas, a su binticuatru a su noti; e si podeis immaginai a solus, su prexu chi nd'apu tentu (ca no seu miga innoi po si strunciai po sa cantidadi de cosa de papai chi si seis cravaus in brenti, isperu chi si cumprendat!), a podi torrai a papai, mancai, un arroghededdu de casu (eia, candu fatzu sa dieta, candu sigu sa dieta, cumenti si iat a podi narai puru, abarru chentza de papai casu e ous, e duncas, totu su chi nd'arribbat de is animabis, e a sa lista nc'aciungu, mancai, puru su mebi, fadendi su contu ca ddu faint, ddu pesant is abis), o un arroghededdu de turroni (ca cumenti eis a sciri mellus de mei puru, e deu finzas a una pariga de annus fait no ddu scia, est fatu, est pesau cun su biancu de is ous e cun su mebi); e fadendi su contu ca candu sigu sa dieta no bufu nemmancu unu stìddiu de caffei (eia, po cincuanta diis fatzu custu giogu, siat ainnantis de su Nadali, e siat, mi parit craru puru, me is cincuanta diis ainnantis de sa Pasca Manna), e de cust'annu apu postu in sa lista de is cosas chi no mi potzu permiti de papai (e de bufai) puru su tè, intzandus si podeis immaginai, a solus, su prexu e su prexei chi nd'apu tentu po su de mi podi, buffai, una tassiscedda de caffei, apustis de su prangiu de sa dì de su Nadali. 
E si potzu narai puru, immoi chi nci seu, ca totus custas diis de festa, s'una avatu de s'atra, mi piagant giai giai a conca, est a narai ca candu acabbant, candu nd'arribbat su bintiseti (ca cust'annu est arrutu de sabudu, e duncas, eia, s'est tocau a fai una mesu festa sa dì puru), mi intendu sbuidu cumenti chi mi nd'essint suciau (manigiu custu fueddu, isperendi chi no si andit tropu a trotu) totus is fortzas, totus is energias, totu sa gana bona de su corpus. 
Ma apustis de una pariga de diis de pasiu (ddas tzerriaus diaici), intzandus tocat a torrai a atacai, cumenti s'apu arremonau, cun is prangius e is cenas po s'ùrtima dì de s'annu (chi mai ammanchit sa festa, e chi mai ammanchit sa cena, cun sa gintilla, cun totu sa cosa de buffai chi seus costumaus a si cravai in brenti po saludai s'annu bèciu, mi benit de ddu narai diaici, e po arriciri, cun coru bonu e selenu, s'annu nou), e diaici eus a fai po cust'annu puru, diaici eus a fai, duncas, po saludai su duamilla e binticincu e po arriciri a bratzus obertus (po manigiai su modu de narai a trassa de s'italianu etotu), est a narai, mellus puru, po imprassai su duamilla e bintises, cumenti chi siat unu pipieddu nasciu de pagu segundus (chi mi permiteis de giogai a fai su poeta, torra, e no feti su giornalista sportivu). 

E duncas, si iat a podi narai, puru, ca su mesi de idas si ndi bobat, dònnia annu, cumenti chi duressit feti una cida, diaici mi parit a su mancu, e custa cosa (de su tempus chi si ndi bobat candu fadeus is festas, candu seus in festa, po ddu narai mellus puru) mi parit ca dda intendu de candu seu unu notzenteddu, e diaici funt sighendi a andai ainnantis is cosas, e mi parit de bivi una maghia; mi parit de torrai pipiu, a bortas, e sa cosa no mi dispraxit mancu po nudda, chi pròpriu si ddu depu narai. 
Antzis, deu creu ca siat una de is cosas prus togas, unu de is regalus prus mannus chi nd'arrìciu, dònnia dònnia annu, e megu a chistionai, est craru, de su de mi intendi totu cun sa conca boba boba; at a essi s'aria de s'ierru chi nd'arribbat, at a essi totu s'afròddiu chi si intendeus in su coru, ma custu periodu de s'annu no mi parit diaici lègiu cumenti, mancai, mi parit su mesi de donniasantu, o su mesi de martzu (ca a parri miu, po su chi mi pertocat duncas, funt is mesis prus traballosus de scroxai, funt is mesis prus grais, prus tostaus, prus marigosus de nci cabai). 

E duncas, megamu a si preguntai, a s'incumintzu de custu artìculu etotu: bosatrus spassiaus si seis? Si ddu seis papau su panetoni? E ciucullati? Papau meda nd'eis? 
Isperu ca totu siat andau beni po bosatrus puru, a su mancu, beni cumenti funt andadas is cosas po su chi mi pertocat, e immoi si auguru feti ca is cosas potzant sighiri a andai diaici beni a su mancu fintzas a sa dì de sa Befana, chi est sa dì innoi serraus totus is festas (e chi si depu narai sa beridadi, chi si depu contai cumenti andant is cosas in domu mia, chi cumprendeis su chi si bollu narai, si potzu scoviai feti ca po mei sa festa de sa Befana, giai giai, no est mai esistia, ddi naru diaici, fadendi su contu ca fatzu is annus, cumenti si narat in sardu, pròpriu sa dì ainnantis, est a narai, su cincu de su mesi de gennàrgiu, e duncas sa dì de sa Befana est una festa chi in domu s'est sèmpiri sartada, chi cumprendeis su chi seu circhendi de si narai). 

E duncas, chi si depu narai sa beridadi, chi si depu contai cumenti funt andendi is cosas, intzandus si potzu narai ca (cumenti eis a sciri giai chi eis lìgiu a su mancu unu de totus is artìculus chi pertocant is Novas de su Diàriu Sportivu, e duncas, eia, is artìculus chi ndi scriu, chi ndi pesu in sardu), cumenti scieis, is Novas ndi bessint aforas, ndi bessint a pillu dònnia dònnia giòbia, dònnia cida, dònnia mesi, chentza de ndi sartai nemmancu unu, mancai siat dì de festa. 
E cust'annu, duncas (si ndi seis acataus?), siat sa dì de su Nadali e siat sa primu dì de s'annu nou ndi funt arrutus de giòbia, e duncas, cumenti podeis biri a solus cun is ogus de bosatrus, agatais s'artìculu de ligi; sèmpiri chi ndi teneis gana, sèmpiri chi is ogus si funtzionant ancora (ca candu unu buffat meda, mancai, ddi podit fitnzas benni dabori de conca, e iat a podi tenni strobbus fintzas a ligi, e si cumprendit, e ddu cumprendu deu po primu). 

E duncas, mi parit craru, po no abarrai totu sa dì, po no abarrai totu sa primu dì de s'annu, po ddu narai mellus puru, aranti de su tialu de computer, in s'interis ca totus is atrus papant, bufant, giogant a cartas e, mescamente, scexiant apustis de una de is imbriagheras prus mannas de s'annu (ca seus costumaus a bufai meda po saludai s'annu bèciu, po si ndi scaresci, mancai, de totus is dannus e de totus is arroris chi si ndi funt protzius apitzus, o po fai festa po totus is cosas bonas chi eus arrìciu, a trassa de regalus etotu), intzandus, megamu a si narai, apu dèpiu atacai a scriri cust'artìculu una pariga de diis fait, sighendi su dìciu (e mi parit unu modu togu meda, una manera toga meda, po ddu nai diaici puru, de incumentzai s'annu nou) ca narat ca "chini tenit su tempus po fai una cosa no iat a depi abertai a s'incras po dda fai". 
E prus dda scriu, custa frasia, e prus mi brintat in conca. 
E no mi parit una cosa lègia, chi pròpriu si depu narai sa beridadi; antzis, custa cosa de atacai cun su trabballu, custa cosa de scriri is artìculus una pariga de diis ainnantis de candu ndi depint bessiri, est donendumì una manu de agiudu manna meda, e si cumprendit, berus? 
Ca su de podi pretziri su trabballu, su de ddu podi pesai chentza de pressi, mi parit ca mi agiudit a mi fadiai prus pagu de su chi mi sucedit, mancai, candu depu fai totu de cursa, totu de pressi; candu ndi depu pesai su trabballu totu paris, chi si cumprendit mellus mancai diaici. 
E duncas, mi benit totu de si domandai: immoi chi su duamilla e bintises est brintau, ita idea si ndi seis fatus po su chi pertocat su duamilla e binticincu? Est stètiu un annu bonu o mau? Eis prantu meda? O est stètiu prus su spàssiu e su prexu, chi nd'eis tentu, de is lagrimas e de is disprexeis? 

Po su chi mi pertocat, si potzu narai (e seu acanta acanta de dda serrai, cun totu custu muntoni de strollichiminis chi nc'apu stichiu in s'artìculu de custa cida puru; e mi permitu de nci ponni totus custus contus, totus custus contixeddus feti, e si naru feti, me is artìculus chi ndi pesu in sardu, ca po su chi pertocat s'italianu, po su chi pertocat is artìculus chi ndi pesu in italianu, po ddu narai mellus puru, chistionu feti, e si naru feti, de bòcias, de resultaus, de partidas e de giogadoris, chentza de si ndi scaresci de is allenadoris, e mi parit bastanti craru puru) ca fintzas a Pasca, me is cuatru mesis chi ddoi fiant ainnantis de sa Pasca Manna (e megu a chistionai po su chi pertocat su duamilla e binticincu, est a narai, duncas, s'annu passau: si cumprendit, berus est?), po ddu narai mellus puru, s'annu mi pariat bonu e facili de amasedai (cumenti m'est bèniu de narai), ma de sa primu dì de su mesi de maju is cosas si funt fatas unu pagheddeddu prus marigosas. 
E no si bollu narai, no si seu narendi ca su duamilla e binticincu siat stètiu un annu mau, po caridadi, ma de seguru no est stètiu facili a ddu scroxai, ca tocat a fai su contu (chentza de si ndi scaresci mai, mi benit de ddu narai diaici) ca in custa vida ndi iant a podi arribbai puru is daboris, ca cumenti si sciit (cumenti eis giai cumprèndiu bosatrus puru), funt maus de scroxai. 

E passièntzia a pabiadas, serbit (cumenti mi praxit a m'arrapiti fatu fatu, mancai a solu a solu) in custa vida, po sumportai totus is cosas chi, a bortas, andant trotas e no deretas cumenti, invècias, bisàst. 
E duncas, eia, diaici apu fatu: apu circau de no mi fai pigai de su disisperu candu is cosas no andant beni (chi est sa pròpriu cosa, de su restu, ca m'arrapitint, fatu fatu, is allenadoris chi intendu po ndi pesai is ciaciarradas, is intervistas, candu mancai mi contant de is fainas chi pertocant is scuadras chi sighint, is scuadras cosa insoru; ca podit sucedi, in una stagioni, ca una scuadra potzat arribbai a perdi unu bellu cantu de partidas, s'una avatu de s'atra; e sa cosa chi tocat a fai, candu is cosas no andant beni, est cussa de sighiri a trabballai, de sighiri a curri concas a su benidori, isperendi ca is tempus lègius ndi potzant acabbai acoitu), apu circau de sumportai (ca mi parit siat s'arti de importu prus mannu po si bivi custa vida chentza de ndi bessiri aforas de conca, po bivi custa vida chentza de s'amachiai), de assachitai (po ddu narai a sa sorresa, po manigiai unu fueddu ca, a su mancu innoi in Bidd'e Sorris, iat a torrai giai giai aguali a su fueddu ca in italianu sonat "resilienza", chi cumprendeis su chi seu cirhendi de narai); e a contus fatus, eia, custu duamilla e binticincu m'at donau de fai, ma est berus puru ca nci funt stètous periodus drucis cumenti a su tzucuru, cumenti si iat a podi narai, fadendi su contu, po si nd'arremonai una, e cun custa cosa serru po diaderus, ca de su mesi de friargiu at incumentzau a benni a m'agatai una pisitedda, bellixedda bellixedda e totu niedda, ca m'at prenu su coru de afròddiu e de prexu, ca no nc'est nudda de mellus de is animabis po artziai s'umori de una persona, a su mancu, cun mei is cosas funtzionant diaici, e gràtzias a Deus, mi megu a solu a solu); e immoi no depu (no depeus, chi a sa truma nci pongiu bosatrus puru) fai atru ca incumentzai a mi bivi, cun su coru prenu de isperas bonas, custu duamilla e bintises: ca potzat essi un annu prenu fintzas a cururu de cosas togas, de cosas bonas, po bosatrus puru (e no feti po mei, mi parit craru); chi nci potzat essi sèmpiri sa luxi, sa passioni, sa gana bella po sighiri is fainas chi si pertocant. 
E cun custu, po oi, e po diaderus, dda serru cun is strollichiminis, e andaus a chistionai unu pagheddeddu de càlciu puru, e de bòcias, chi iat a depi essi sa lega de importu prus manna po su giàssu de su Diàriu Sportivu. 

E duncas, torru a atacai cun custas rigas, e cun custu artìculu, candu ammancant feti una parighedda de oras a serrai s'annu, e duncas, ammancant feti una pariga de orixeddas po acabbai cun custu duamilla e binticincu puru; e duncas, apustis de s'essi satzaus a trassa de prochiteddus po totus is diis de is festas de su Nadali, e ainnantis de si setzi torra in sa mesa po si satzai po is festas de s'ùrtima cena de s'annu ( e po su prangiu, e sa cena, de sa primu dì de su duamilla e bintises) si iat a podi (si iat a depi? Po ddu narai mellus puru) fai su gioghiteddu (eia, pigu sa cosa a trassa de giogu) de andai a torrai a pentzai a totus custus ùrtimus doxi mesis: cumenti si funt andadas is cosas? Cumenti s'est andau cust'annu? Totu beni? O, mancai, funt prus is cosas chi funt andadas a trotas de cussas chi funt andadas deretas? Po su chi mi pertocat, si ddu contu, e fatzu acoitu, immoi chi nci seu, is cosas funt andadas beni meda po is primus tres mesis, est a narai de su mesi de gennàrgiu e fintzas a nc'arribbai a su mesi de martzu; nareus puru, ca fintzas a Pasca custu duamilla e binticincu mi pariat bonu e druci cumenti a su tzucuru, ma apustis ddu scieis beni, e ddu cumprendeis beni a solus puru, deu creu, de cumenti andant is cosas: depis fai su contu, intzandus, ca ndi potzant proi (ddi naru diaici, gioghendi unu pagheddeddu a fai su poeta, prus ca su giornalista sportivu cumenti mi iat a pertocai) arroris, e arroris mannus puru, de unu segundu a s'atru; e difatis, a su mancu po su chi mi pertocat, cumenti nd'est brintau su mesi de maju, intzandus ndi funt brintaus is trumentus e is daboris puru. E no seu innoi po murrungiai, custu est pagu ma seguru, ma su chi si bollu narai, su chi seu circhendi de si narai, est ca po su chi mi pertocat s'annu est stètiu prenu de arroris, mescamente candu ndi brintànt is mesis, est a nai, me is primus diis de su mesi; no si potzu narai, duncas, ca custu duamilla e binticincu siat stètiu unu dabori mannu e chentza fini (ca nci funt stètius momentus drucis cumenti a su tzucuru); ma nc'est de narai, si potzu narai (chi fortzis sonat mellus puru) ca m'est tocau a m'arramangai is mànigas (cumenti apu sèmpiri intèndiu narai innoi in bidda, e cumenti si narat a trassa de s'italianu etotu, de su restu) po mi ndi scabulli de totus is arroris chi apu agatau in sa bia cosa mia, ma potzu narai, eia, ca nci dda apu fata (giai giai fata) a nci lompi a s'annu nou. E isperu ca is cosas potzant andai beni, chi no mellus puru, de cumenti funt andadas in su duamilla e binticincu, e custa cosa ballit po mei, ma ballit (custu est s'augùriu chi si fatzu, a su mancu) pruschetotu, e mescamente, po bosatrus puru, ca custus artìculus ddus lìgeis, e seis sa cosa de importu prus mannu po su giàssu de su Diàriu Sportivu, e duncas, eia, po su trabballu cosa nosta; ca chentza de bosatrus ca ligeis custus artìculus, e si sigheis dì po dì, intzandus, eia, chentza de bosatrus su trabballu cosa nosta no iat a esisti, o no iat a tenni nesciunu sentidu, chi pròpriu si ddu depu narai. 

E duncas, eia, dda apu acabbada (e custa borta po diaderus) de mi strollicai e de si fai sa conca a acua cun totus custus contixeddus. 
E duncas, eia, immoi si podeus fuiai a fundu 'e susu me is chistionis chi pertocant is campionaus de càlciu pesaus de is de sa Federatzioni Italiana de su Giogu de su Càlciu e de is de sa Lega Natzionali de is Diletantis, e po oi s'apa a chistionai de cumenti funt andendi is cosas, de cumenti funt andadas is cosas me in custus primus tres mesis de campionaus, fadendi su giogu de si castiai a is pabas, fadendi su giogu de andai a castiai cumenti funt cuncodradas is cosas me is campionaus chi si giogant innoi in s'isula stimmada cosa nosta, e seu chistionendi de is campionaus de is diletantis, mi parit craru puru, partendi de is de s'Ecellenza, passendi de is de sa Promotzioni e de sa Primu Categoria, e fintzas a arribbai (e nci iat a mancai puru) a is campionaus (a is otu listas, po essi prus pretzisu puru, cumenti unu giornalista iat a depi essi, de su restu, chi bolit fai beni su trabballu cosa sua, chi bolit fai su trabballu cosa sua in gràtzia de Deus, cumenti si iat a podi narai puru) de sa Segunda Categoria. 

E duncas, chi seis de acòrdiu cun mei, e fadendi su contu ca seu de diora meda ca no si ndi chistionu, deu ia a partiri andendi a castiai cumenti funt cuncodradas is cosas in sa lista de s'Ecellenza. 
E duncas, a su primu postu, cun bintotu puntus in busciaca, agataus tres scuadras: is de sa Monteponi de Bidd'e Cresia, is de s'Ilva de Sa Maddalena e is de sa Nuorese; custas tres scuadras (a fai is contus nci poneus pagu meda, est a narai ca acoitaus) ant bintu calincuna cosa cumenti a otu partidas, nd'ant serrau cuatru cun su resultau siddau in paridadi e ant pèrdiu (eia, sa cosa ballit po totus e tres is scuadras) po tres bortas. 
A su segundu postu, invècias, cun bintiseti puntus (eia, unu in mancu de is puntus chi tenint allogaus is primus scuadras de sa classi, is primus scuadras de sa lista, chi si praxit de prus cumenti sonat diaici) agataus is de su Tèmpiu; cun bintises puntus, chi ballint po su de tres postus in sa lista, agataus is de s'Atleticu de Uri; cun binticincu puntus (tres in mancu de is chi tenint is primus scuadras de sa lista, chi s'au arremonau immubagora de su restu), invècias, a su de cuatru postus, agataus is de su Lanusè e is de s'Ossese; is de su Crabònia, invècias, tenint bintunu puntus, chi ndi funt arribbaus gràtzias a ses partidas bintas e a is tres partidas chi ant serrau cun su resultau de paridadi. Cun dexennoi puntus agataus is de su Calanzanos, e cun unu puntixeddu in mancu (est a nai, dexiotu) agataus is de su Tortolì. 
Po su chi pertocat, invècias, is ùrtimus postus de sa lista (e duncas, po su chi pertocat sa batalla po no ndi cabai de categoria, e duncas, po ndi cassai sa sarvesa e po tenni sa possibbilidadi de curri, in su campionau de su duamilla e bintises – duamilla e bintiseti, torra in su campionau de s'Ecellenza), agataus is de su Crabonaxa e is de su Taloro de Gavoi cun sexi puntus in totu; cun catodixi puntus agataus is de su Santa Teresa; cun doxi puntus agataus is casteddaius de sa Ferrini, impari a is de su Uddusò, po serrai is contus, e po serrai sa lista, cun is de su Cuartu de Sant'Aleni, ca s'agatant a s'ùrtimu postu cun feti dexi puntixeddus allogaus in buciaca, chi ndi funt arribbaus gràtzias a duas partidas bintas e a cuatru partidas chi si funt serradas cun su resultau in paridadi. 

E duncas, immoi chi nci seu, andu a si contai, andu a si chistionai de cumenti funt andendi is cosas in domu de is de su Crabònia chi, de su restu, s'apu arremonau pròpriu immubagora. 
E duncas, podeus narai, po incumentzai, ca chi in dì de oi a su primu postu po su chi pertocat sa lista de su campionau de s'Ecellenza agataus tres scuadras, est gràtzias, puru, a is de su Crabònia, ca in s'ùrtima partida po custu duamilla e binticincu (prenu fintzas a cucuru de ispantus) funt arrannèscius a binci (e duncas a firmai sa cursa) contras a is de s'Ilva de Sa Maddalena, cun su resultau de duus a zeru; e duncas, chini nd'at aprofitau, e acoitu puru, funt stètius, est craru, is de sa Monteponi de Bidd'e Cresia e is de sa Nuorese, chi nd'ant cassau torra su primu postu de sa lista. Sa scuadra sighida de Gratzianu Mannu est sighendi a ndi pesai cosas togas medas po su chi pertocat is partidas chi funt gioghendi in domu, fadendi su contu ca apitzus de is seti partidas chi ant giogau aranti de is tifosus cosa insoru, ddi naru diaici (is primus partidas de s'annu, a narai sa beridadi, ddas ant giogadas in su campu sportivu de is de su Narcao, ma apustis funt torraus a giogai, e a curri, in su campu de Crabònia etotu, e seus chistionendi, est craru, de su Zoboli) nd'ant bintu cuatru, e po tres bortas funt arrannèscius a ndi cassai unu puntixeddu. 
Is biancus-asullus, duncas, serrant s'annu cun bintunu puntus in totu allogaus in buciaca, cun cincu puntus in mancu de is chi tenint is de s'Atleticu de Uri (ca s'agatant, si ddu torru a arregodai, a su de cincu postus in sa lista, chi est s'ùrtimu bonu po ndi cassai sa possibbilidadi de giogai is play-off, po ddu narai a trassa de is ingresus, e duncas, is partidas finalis chi serbint po ndi artziai de categoria), e cun seti puntus in prus de is chi tenint in buciaca is de sa Polisportiva de Santa Teresa, chi tenint feti tres scuadras a is pabas. 
E duncas, immoi chi nci seu, andu a si intregai is fueddus chi s'at regalau pròpriu Gratzianu Mannu, s'allenadori de is de su Crabònia, ca cumenti si naru fatu fatu, chini mellus de un allenadori podit sciri (e podit contai) cumenti funt andendi is cosas in domu sua, e duncas, cumenti funt andendi is cosas in sa scuadra chi sighit? 
«Sa cosa de importu prus mannu po nosu fiat cussu de ndi pesai, de ndi cassai sa cantidadi prus manna de puntus, po circai de arribbai a sa sarvesa acoitu, e allestru. Custu est unu campionau strambu meda, chi nci pentzais beni, fadendi su contu ca is scuadras chi s'agatant me in sa parti prus bàscia de sa lista, a su mancu po su chi pertocat s'ùrtima bessida, ant bintu giai totus. Custu bollit narai, pruschetotu, ca no podis abasciai sa cuncentratzioni, s'atentzioni, nemmancu po unu segundu; custu bollit narai, puru, cumenti arrapitu fatu fatu meda a is piciocus cosa mia, ca depis curri a totu coddu, a centu chilometrus a s'ora, mancai, me is allenamentus chi ndi pesaus aintru de sa cida; est s'ùnica manerà chi connòsciu, de su restu, po giogai beni su domìnigu; chi tui trabballas beni aintru de sa cida, intzandus is cosas benint a essi prus facilis candu ndi cabas in campu po is partidas. Po su chi pertocat sa partida chi eus giogau contras a is de s'Ilva de Sa Maddalena, si potzu narai ca is piciocus cosa mia ant fatu totu su chi eus provau aintru de sa cida; sciestus beni ca po ndi cassai calincunu puntixeddu, contras a una scuadra forti cumenti est cussa de s'Ilva, s'ùnica cosa chi podestus fai fiat cussa de curri a totu coddu, meda prus de issus, e cun s'atentzioni chi serbit po custas partidas, ca ddu scieis mellus de mei puru, cumenti andant is cosas: ti bastat a fai, mancai, feti e puru unu mesu sbàlliu e t'agatas frigau. Apustis chi nd'eus cassau, chi nd'eus pesau su primu gol, intzandus no eus abasciau sa guàrdia, cumenti si iat a podi narai e cumenti si narat a trassa de s'italianu etotu. Custu bollit narai, intzandus, ca eus sighiu a giogai cumenti chi festus ancora cun su resultau siddau in su zeru a zeru; nc'est de narai, puru, ca seus stètius bravus meda a ndi cassai su segundu gol puru, ma nc'est de narai ca festus acanta acanta po ndi pesai su de tres gol». 

Immoi, cumenti ant a acabbai is festas (e seu chistionendi, est craru, po su chi pertocat is vacantzas de is scuadras de bòcia chi s'agatant in Sardìnnia, e chi ant a torrai in campu giai de custu sabudu chi at a arribbai tra pagu, est a narai, duncas, ca a fai is contus nci poneus pagu meda, a partiri de su sabudu chi at a essi su tres de su mesi de gennàrgiu), is de su Crabònia si dda ant a depi biri contras a is de su Tortolì, chi nd'ant a depi cabai po giogai a su Zoboli. Apustis, is piciocus sighius de Mannu si dda ant a depi biri contras a is de su Gavoi, e apustis ancora contras a is de su Taloro, e duncas contras a is de su Sant'Aleni, torra in domu cosa insoru (est a narai, eia, a su Zoboli, si ddu torru a arrapiti, ca mabi no fait), fintzas a arribbai a sa partida contras a is de su Tèmpiu, chi nd'at a arrui (ddi naru diaici) s'otu de su mesi de friàrgiu. 
«Me is primus cuatru giorronadas chi ant a balli po sa lista de partidas de sa torrada eus a giogai contras a is aversàrias prus mannas, e prus fortis, chi teneus in sa cursa concas a sa sarvesa, in sa cursa po ndi cassai sa sarvesa, chi si praxit mancai de prus diaici po cumenti sonat. Eus a circai de ndi bogai aforas, de nci fuiai in campu, cumenti si iat a podi narai puru, totu su bonu chi teneus in su coru, po circai de ndi cassai sa cantidadi prus manna de puntus. Eus a biri, apustis, cumenti ant a andai is cosas a sa de ses giorronadas: est a narai, duncas, ca apustis chi eus a giogai custas cuatru-cincu partidas, eus a fai mellus is contus apitzus de sa situatzioni cosa nosta. Nc'est de narai, nc'est de nc'aciungi, immoi chi nci seu, ca sa partida chi eus a giogai contras a is de su Tèmpiu dda pigu in consideru a parti, chi arrannèsceis a cumprendi ita seu circhendi de si narai: is caboniscus funt una de is scuadras prus fortis chi nci funt cust'annu in su campionau de s'Ecellenza, e si ia podi narai, puru, ca po sa calidadi de sa rosa chi funt stètius bonus a ndi pesai, po sa fortza de is giogadoris chi tenint in sa rosa cosa insoru, po ddu narai mellus puru, intzandus po nosu at a essi una de is partidas prus tostadas e prus dificilis de s'annu, de su campionau e de sa stagioni, duncas. Po immoi, duncas, sigheus a curri po ndi cassai sa sarvesa; no bollu pentzai a nudda de atru, e sa cosa ballit, sa cosa iat a depi balli puru po is piciocus cosa mia. De su restu scieus beni ca su campionau at a essi trabballosu, fadiosu meda; chi arrannèscis a binci contras a is primus de sa lista, cumenti est sucèdiu a nosu, de su restu, t'agatas acoitu me is primus postus; e si iat a podi narai puru, immoi chi nci seus, ca is tres puntus chi nd'eus cassau in sa partida contras a is de s'Ilva de Sa Maddalena si ddus seus minescius, est a narai, duncas, ca no nd'eus furau nudda, custu est pagu ma seguru. E duncas, fia narendusì, ti bastat a binci una partida contras, mancai, a is scuadras chi s'agatant a su primu postu de sa lista, e t'agatas impari a is primus de sa classi, ma chi ndi perdis mancai feti una de partida, cumenti s'est sucèdiu in sa partida chi eus giogau contras a is de Uri, intzandus ti depis castiai a is pabas, e acoitu puru, poita nci ponis pagu meda a t'agatai torra me is ùrtimus postus de sa lista. Immoi chi tèngiu totus is giogadoris sanus, e duncas, tengiu totus is giogadoris chi funt abbilis po ndi cabai in campu, podeus agatai una cantidadi prus manna de giogadas, e de solutzionis, aintru de sa partida etotu. Sa truma de piciocus chi megu a sighiri cust'annu est toga meda, fait a narai custu puru, e totus is giogadoris chi ndi funt cabaus in campu fintzas a oi funt fadendi unu trabballu de importu mannu, e deu seu su primu chi ddis torrat gràtzias, po su chi funt fadendi, po sa seriedadi chi nci ponint, a partiri de is allenamentus chi ndi pesaus aintru de sa cida, e fintzas a arribbai, est craru, a is partidas chi, a sa fini, giogaus su fini de cida. Is piciocus funt amigus tra de issus, est a narai ca tenint un acapiu chi ballit puru aforas de su campu, e custu ddus agiudat a curri prus a forti, e a giogai mellus puru». 

E immoi chi seu arribbau a custu puntu de sa chistioni (e pruschetotu, a custu puntu de s'artìculu), apa a circai de si chistionai de cumenti funt postas, de cumenti funt cuncodradas is cosas po su chi pertocat su campionau de sa Promotzioni (po su chi apa a acudi a fai po s'artìculu de custa cida, fadendi su contu ca seu spacendi su logu chi tèngiu po si scriri), partendi, duncas, de sa Lista A (e custu bollit narai, pruschetotu, ca su chi no apa a arrannèsci a si contai oi si ddu apa a sighiri a contai in s'artìculu chi nd'at a bessiri aforas tra seti diis a partiri de oi, e seu chistionendi de su giòbia chi at a benni, e chi nd'at a arrui s'otu, sèmpiri de su mesi de gennàrgiu, est craru puru. E totu custu chi su Cielu at a bolli custu beni po mei, est craru). 

E duncas, megamu a si narai, a su primu postu de sa lista agataus duas scuadras, e megu a chistionai de is de su Castiadas e de is de su Gùspini, chi tenint allogaus in buciaca calincuna cosa cumenti a trintaseti puntus: is biancus-birdis de su Castiadas ant bintu po undixi bortas, e po cuatru bortas ant serrau sa partida cun su resultau siddau in paridadi; is biancus-birdis, si potzu narai custu puru immoi chi nci seu, ant pèrdiu feti una partida fintzas a oi, in custa sexi bessidas. Cun trintaseti puntus, peròu, agataus puru is campidanesus de su Gùspini, chi funt arrannèscius a ndi cassai is tres puntus prenus po doxi bortas (eia, est a narai, mellus, ca is de su Gùspini ant bintu una partida in prus de is chi ant bintu is de su Castiadas), e nd'ant serrau feti una cun su resultau siddau in paridadi. Custu bollit narai, puru, ca in custas primas sexi bessidas, is de su Guspini ndi funt arrutus (est a narai: ant pèrdiu) po tres bortas. A su segundu postu de sa lista, invècias, agataus is de sa Villacidrese (sa scuadra chi nd'ant pesau in Biddacidru, e deu creu ca si cumprendat, e chi immoi est me is manus de su presidenti Marrocu), cun trintases puntus allogaus a su callenti in buciaca, e chi ndi funt arribbaus gràtzias a undixi partidas chi funt arrannèscius a binci in custas prima sexi bessidas (ma tocat a narai, puru, ca is de sa Villacidrese funt arrannèscius a binci ses partidas totu de sighiu, est a narai, s'una avatu de s'antra); is de sa Villacidrese ant serrau po tres bortas sa partida cun su resultau siddau in paridadi e ndi funt arrutus feti duas bortas cust'annu. E duncas, is de sa Villacidrese tenint feti unu puntixeddu in mancu de is chi tenint is de su Castiadas e is de su Guspini. 

A su de tres postus in sa lista, invècias, agataus is de su Terraba Frantziscu Bellu, cun trintacuatru puntus in totu, chi ndi funt arribbaus gràtzias a dexi partidas chi ant bintu e a cuatru partidas chi ant serrau cun su resultau siddau in paridadi. Cun noi puntus in mancu de is chi tenint is terrabesus, agataus is casteddaius de su Vecchio Borgo de Sant'Elia, chi funt una de is scuadras chi funt fadendi a biri is cosas prus togas, mancai ndi siant artziaus in su campionau de sa Promotzioni feti cust'annu, apustis de essi stètius piscaus torra de su campionau de sa Primu Categoria, e si cumprendit, po una scuadra chi nd'arribbat de una categoria prus bascia, de una categoria prus pitichedda, no est facili a arrannèsci a curri diaici a forti giai de sa primu parti de sa stagioni. E duncas, eia, is casteddaius sighius de Miro Murgia tenint binticincu puntus allogaus in buciaca, chi funt su pròpriu tanti chi tenint in buciaca is de s'Arborea de Battoluetotu. Cun bintitres puntus, invècias, agataus tres scuadras: seu chistionendi de is aristanesus de sa Tharros, de is de su Ceraxius e de is de su Samugheo.





Attività realizzata col contributo della Regione Sardegna. IMPRENTAS 2025-2026. LR 22/2018 art. 22