Promotzioni, Lista A: cuatru scuadras currint po ndi cassai su primu postu e sa bìncida de su campionau

E duncas, eia, no mi parrit nemmancu berus, ma apustis chi ddas apu abertadas diaici meda, podeus narai ca puru is festas po su chi pertocat sa Pasca Manna de su duamilla e bintises si ddas seus lassadas a is pabas: e ita si potzu narai de prus de su chi s'apu narau immubagora? Si potzu narai ca po su chi pertocat su contu cosa mia, is festas funt andadas bastanti beni, e de custu ndi torru gràtzias a su Cielu: funt stètias diis bellas, e drucis cumenti a su tzucuru, e no feti poita apu tentu s'ocasioni, e sa possibbilidadi, de mi papai calincunu arrogheddu de ciuculati (bonu meda) o calincunu arrogheddu de "cosas bellas" (cumenti tzerriàt is drucis una tzia de sa bon'anima de mamma mia, e m'est sèmpiri praxu meda, custus modu chi teniat de narai), ma gràtzias puru a is temperaduras, ca parriat, diaderus, de essi in mesu in mesu a su beranu, e fiat ora puru, apustis de is tres mesis de ierru chi at fatu; e mi seu gosau (sceru pròpriu custu fueddu) totu su sobi, e sa basca bella chi at fatu siat su sabudu ainnantis de sa Pasca Manna, e siat sa dì de sa Pasca e fintzas a arribbai a su tempus bellu meda chi at fatu po su lunis de s'angelu, o po su lunis de sa Paschixedda. E intzandus, no m'abarrat atru de fai ca si domandai: e a bosatrus (e a bosatras puru, ca custus artìculus, e megu a chistionai de is artìculus chi pertocant is Novas de su Diàriu Sportivu ddus ligint puru is signoras e is signorinas, e no feti is maschiteddus duncas) cumenti funt andadas is festas? Diis bonas eis passau? Seis arrannèscius a si ndi andai in giru, aforas de is biddas e de is citadis, po su lunis de Paschixedda? O seis de cussus (e tra cussus, chi si praxit mancai de prus diaici po cumenti sonat) chi funt abarraus aintru de sa machina po oras e oras, mancai impari a atras centumila personas? 
A mei, chi pròpriu si depu narai sa beridadi, mi brintat su frius (cumenti si megàt sa bon'anima de mamma mia, po manigiai unu fueddu, unu modu de narai chi m'est sèmpiri praxu meda) feti a pentzai de fai totu cussu trabballu chi serbit po ndi pesai sa dì de sa Paschixedda: su de si ndi scidai chitzi nci podit stai puru, ma est su trumentu ca serbit po arribbai, po lompi me is logus chi mi ndi fait atzicai prus de totu, chi pròpriu si ddu depu narai; e apustis, candu arribbas, no nc'est nemmancu su logu po si setzi, de cantu genti nc'est, ca sa cosa assimbillat, prus o mancu, a su chi sucedit in s'istadi, mescamente in s'isula stimmada cosa nosta, ca si prenit fintzas a cucuru (ca a mei parrit, giai giai, ca totus cussus cristianus apitzus de un'isula piticheddedda, pitichinninnia cumenti a sa nosta, giai giai nemmancu nci capant) de turistas, e dònnia annu, cun totu custa genti, deu no sciu innoi mi ponni, innoi mi cuai. E sa cosa, duncas, eia, ballit po sa dì de sa Paschiexedda, e at a essi po custu motivu, pruschetotu, ca apu scerau, po cust'annu puru, de mi nd'abarrai innoi me is sartus chi nci funt totu a giru a giru de sa bidda mia etotu (de sa bidda innoi bivu, e chi est Bidd'e Sorris, diaici naraus sa cosa in gràtzias de Deus), e cumenti a mei, apu atobiau calincunu antru (e calincuna antra puru), ma fiant pagus, e custu po si narai, po si fai a cumprendi, ca fortzis no dda apu sballiada, a fai sa giogada chi apu fatu. 
E duncas, arriendi e brullendi, seus arribbaus a su segundu giòbia de su mesi de abrili puru (fadendi su contu, e a fai is contus nci poneus pagu meda, ca su primu de su mesi fiat pròpriu su de sa cida passada, chi fiat sa Cida Santa, tra is atras cosas) e 'tendei 'tendei (torra po manigiai unu modu de narai chi apu sèmpiri intendiu de sa bon'anima de mamma mia), no parrit nemmancu berus, custu fini de cida chi nd'at a arribbai immoi nd'at a arrui, giai giai, a sa metadi de su mesi etotu, fadendi su contu ca su sabudu at a essi s'undixi, e su domìnigu, duncas, at a essi su doxi, e duncas, eia, podeus sighiri a andai ainnantis, cun coru selenu, a si scroxai su de cuatru mesis de su duamilla e bintises puru. 
E po su chi mi pertocat, po su chi pertocat cust'annu nou, eia, is cosas funt andendi bastanti beni, ma a sa fini tocat a pentzai, puru, a totu su chi est sucedendi, me in custas ùrtimas diis, e in custas ùrtimas oras, in giru in su mundu e, mescamente, po su chi pertocat sa guerra chi nd'ant pesau contras a is de s'Iran is Istadus Unidos (cumenti seus costumaus a ddus tzerriai) impari a is de Israele. E candu arribbu a chistionai de  custas cosas, mi benit totu de torrai gràtzias a su Cielu po su fatu ca, po su trabballu cosa mia, depu sighiri (feti) is giogus de is scuadras de càlciu chi currint me is campionaus de is diletantis e chi ndi benint pesaus de is de sa Federatzioni Italiana de su Giogu de su Càlciu e de is de sa Lega Natzionali de is Diletantis, e sèmpiri po su chi pertocat sa Sardìnnia; ma a sa fini, su de depi sighiri is campionaus de bòcia e, duncas, su mundu de giogadoris e de allenadoris, e de is scuadras chi currint me is campionaus, intzandus custu no bollit narai, peròu, ca mi depu serrai is ogus (ca mi depu, o mi potzu, tupai is ogus, po ddu narai mellus puru) e mi potzu permiti sa fortuna (iat a essi unu lussu, cumenti si iat a podi narai, chi sigheis, a su mancu, su chi seu circhendi de si scoviai) de no pentzai a totus is dannus chi nci funt, e chi sighint a sucediri, in custu mundu ca a bortas mi parrit macu meda e totu ghetau a pari. 
E duncas, eia, ddu eis a sciri mellus de mei puru, deu pentzu, de custa gherra noba chi funt cumbatendi in su mundu in dì de oi, e chi andat a s'aciungi a sa gherra chi megant a sighiri a ndi pesai in Ucraina, e contras a is de sa Russia; e mancai asuta de sa Pasca (ddi naru diaici, diaici m'est bèssiu, isperendi ca nesciunu tengat calincuna cosa de murrungiai) estus a depi essi totus prus bonus, e prus selenus (est cussu chi s'arrecumandant de fai, a su mancu, is preidis e su papa puru) e invècias, a cantu parrit, de su chi ndi potzu e ndi podeus cumprendi, funt sighendi a sparai bombas e totu sa cantidadi manna meda de cosas chi tenint de sparai, e funt sighendi a ndi sciusciai a terra domus, iscolas e fintzas uspidalis (cumenti sucedit dònnia, dònnia borta cun is gherras, de su restu) e, mi parit bastanti craru, funt sighendi a bociri sa genti: is sordaus si bocint pari pari tra de issus, e si cumprendit, ma a sa fini si morint puru cussus ca, mancai, cun sa tialu de sa gherra no nci brintant nudda, e megu a chistionai, po su prus, e mescamente, de is pipius, de is pipias, de is becius e de is becias, e de is feminas, partendi de is mammas, e si cumprendit. 
E in prus, a cantu parrit, de su chi m'at fatu sciri pròpriu custu mengianu (e apu torrau a atacai cun su trabballu cosa mia su mengianu de su martis, apustis de sa Paschixedda) unu amigu miu, intzandus, e sèmpiri po crupa de sa gherra, nci iant a podi essi strobbus po su chi pertocat su carburanti (cumenti si iat a podi narai, furendindi su fueddu de s'italianu etotu), fadendi su contu ca s'Iran tenit su controllu de su chi tzerriant (e tzerriaus) streto di Hormuz, chi est su logu innoi passant is navis chi trasportant, chi tragant su tialu, su dimmoniu de su petroliu de is zonas de s'Arabia innoi ddu piscant (e ddu piscant de asuta de terra, e gei si cumprendit, e gei ddu eis a sciri mellus de mei puru) po ddu portai in totus is atras zonas de su mundu (e si ddu apu giai narau, berus est, ca custu mundu a bortas mi parit, mi donat sa bidea de essi totu mabi postu, totu mabi cumbinau, cumenti narant innoi in bidda cosa mia etotu); e a cantu parrit, in dì de oi, pròpriu po crupa de sa gherra, nci iant a podi essi logus, o zonas, o istadus, ca iant a podi abarrai chentza de petroliu, cun totu su chi custu cumportat (o iat a depi cumportai, po ddu narai mellus puru), e tra custus logus nci iant a podi essi zonas innoi in Italia puru, e sa timoria prus manna est, e nd'arribbat, po su chi pertocat is aereuportus, innoi iat a podi benni a mancai su tialu de carburanti po is aereus. E sa nova ndi bessit pròpriu immoi, candu ammancant prus pagu de noranta diis (setantacincu, prus o mancu, a bolli essi prus pretzisus) ainanntis chi ndi brintit s'istadi puru; e si cumprendit, in s'istadi sa genti est costumada (e sa cosa ballit, mescamente, po custus ùrtimus binti-trint'annus) a si ndi andai in giru de una parti a s'atra, e sèmpiri po chini si ddu podit permiti, ma a fai is contus, seus arribbaus a su duamilla e bintises, innoi, de su chi narant is grandus dotoris chi sighint sa faina, s'agatant calincuna cosa cumenti a tres-cuatru miliardus de turistas in custu mundu, fadendi su contu ca seus arribbendi a essi calincuna cosa cumenti a otu miliardus de animas, e de seguru no funt pagus, e de seguru una festa diaici manna, ddi naru diaici, no s'est mai bida in custu mundu; est a narai ca nd'eus pesau sa festa prus manna de totus is tempus, cun prus de otu miliardus de invitaus, de cumbidaus, po manigiai unu fueddu chi cratzat mellus puru, e si cumprendit, apustis chi fais sa festa nc'est de torrai a aparixai is cosas, est a narai, ca nc'at a essi de puliri su logu e de torrai a ponni is cosas in su postu cosa insoru, e at a essi sa parti de sa festa prus fadiosa, e si cumprendit. 

E duncas, torrendi a nosu, su carburanti po is aereus iat a podi essi prus pagu de su chi ddoi fiat in totus custus annus passaus, e duncas, eia, eus a biri chi nc'at a essi sa possibilidadi po totus, de si ndi andai in vacantza, fadendi su contu ca nosu chi biveus in un'isula seus acapiaus a is navis, e is meris de is navis (ddus tzerriu diaici) funt incumintzendi a narai, puru, ca su prètziu de su billetu po artziai in sa navi iat a podi essi meda ma meda prus artu de su chi sucediat, de su chi costat in custus ùrtimus annus. E duncas, eia, ddu funt incumintzendi a tzerriai "lockdown energeticu", po torrai a manigiai unu fueddu chi s'at fatu benni gana maba (maba meda) in totus is annus passaus, e megu a chistionai de cussus duus-tres annus chi eus fatu, giai giai acorraus po cidas e cidas e mesis e mesis de sighiu, aintru de is domus, de is aposentus, po crupa de su Covid; e a custu giru, invècias, cussus chi s'ant a podi spostai, de unu logu a s'atru, iant a podi essi feti is arricus, e is atrus s'ant a depi arrangiai a passai s'istadi in su logu etotu innoi bivint. E po mei chi bivu in s'isula prus toga e prus bona e prus bella chi nc'est (chi nci iat a podi essi, po ddu narai mellus puru) in custu mundu, giai giai no nci iant a essi strobbus, o dannus tropus mannus (e de su restu apu giai fatu su contu, e megu a narai ca ia giai fatu custu contu una bella pariga de mesis ainnantis chi nd'arribessit sa gherra nova, ddi naru diaici, de mi nd'abarrai assebiau, po su chi at a fai, in s'isula cosa mia bella e stimmada), chi no fessit ca nci iant a podi essi strobbus, e dannus mannus, po s'energia chi manigiaus, mancai, po allui is tialus de conditzionadoris de s'aria (cumenti ddus estus a podi tzerriai), ca funt is machinas chi manigiaus po fai unu pagheddeddu de friscura (deu no ddus tengu, peròu; est a narai ca sa friscura dda agatu in sa cantinedda chi tengu in domu etotu) e chi immoi parrint sa cosa de importu prus mannu po podi sumportai totu sa basca, e su callenti, chi est fadendu me in custus ùrtimus annus in s'istadi. E eus a biri cumenti ant a andai is cosas. 

Po immoi, invècias, e cun custu strollichimini dda apa a acabbai, po oi puru, de si fai sa conca a acua (cumenti si megàt sa bon'anima de mamma mia etotu, apustis chi, mancai, fadiat oras e oras chistionendi, mancai a su telefunu, cun is amigas cosa sua), no m'abarrat atru de fai ca andai a castiai, impari a bosatrus, cumenti funt andendi is cosas po su chi pertocat is temperaduras, e is previsionis: e de su restu, s'apu giai narau, chi no megu a mi sballiai (e mi parrit mi parrit de podi narai ca, eia, no mi seu sballiendi), ca in custas ùrtimas tress diis at fatu bella basca (fortzis giai tropu puru, sighendi su chi m'at narau s'amigu cosa mia etotu), ca nci fiat unu bellu sobi, e apustis de totus is mesis chi at fatu in s'ierru totu proi-proi (po ddu narai a sa sorresa, e megu a chistionai de sa manera de arrapiti po duas bortas su fueddu, est a narai su verbu, po ddu fai bessiri cun su tempus a su gerundiu, chi cumprendeis, a su mancu, su chi seu circhendi de si contai), apustis de totus cussas dì de acua ca parestus de bivi in Scozia, o in Olanda (o comentecasiat in unu de cussus logus innoi abarrat a totu dì pruendi, po si cumprendi mellus puru, po cidas e cidas de sighiu), intzandus, una bella dì (una bella pariga de diis, po ddu narai mellus puru) asciuta fiat cussu chi nci serbiat, e chistionu mescamente po mei. 
Is temperaduras de su restu ndi funt artziendi fintzas a arribbai a binticuatru e fintzas a binticincu gradus, e po immoi si stait beni meda, est a narai, duncas, ca no seus morrendusì de su frius (una cosa chi innoi in Sardìnnia, chi sucedit, e candu sucedit, andat ainnantis po duas-tres cidas feti) e no seus nemmancu morendusì de sa basca, cumenti si narat. E gei eus a acudi, po cust'annu puru, ddi naru diaici, a si sicai po totus is tres mesis de s'istadi, e unu pagheddeddu seu incumintzendi a nci pentzai (ma feti unu pagheddeddu), fadendi su contu, mescamente, ca iat a essi una cosa de macus, una cosa de tontus, su de si fai pigai de sa timoria, o de is pentzamentus, po sa basca chi at a fai e chi eus a tenni in s'istadi, candu seus ancora in su beranu. E immoi, cumenti s'apu narau pròpriu me is artìculus chi ndi funt bèssius aforas, chi ndi funt bessius a pillu me is cidas passadas, est arribbau su momentu de si gosai custus megamas chi est fadendi, chi abarrant selenus, e drucis, e is cosas, deu isperu, ant a andai ainnantis diaici fintzas a sa fini de su mesi de maju. 

E po immoi, duncas, e megu a chistionai mescamente de su trabballu chi depu sighiri cun su Diàriu Sportivu, no podeus fai atru, intzandus, ca pentzai a is ùrtimas tres giorronadas (eia, eis cumprendiu beni: ammancant is ùrtimas tres giorronadas ancora de giogai ainnantis de ndi serrai is giogus) chi pertocant, a su mancu, is campionaus de sa Promotzioni e de sa Primu Categoria, chentza de si ndi scaresci, duncas, de su campionau de s'Ecellenza, chi s'at a serrai, ma sa cosa ballit po is atrus duus puru, a sa fini de custu mesi etotu (e benimindi prexu, ddu naru po mei, est craru, ma puru po totus is giogadoris chi funt currendi avatu de sa bòcia, e de is aversàrius, de calincuna cosa cumenti a noi mesis, chi fadeus su contu ca ant incumentzau cun sa preparatzioni atletica, cumenti seus costumaus a dda tzerriai, candu fiant arribbaus a sa metadi de su mesi de agustu, cumenti faint dònnia, dònnia annu de su restu), est a narai, duncas, in su fini de cida de su binticincu (chi nd'at a arrui de sabudu) e de su bintises (chi at a essi, invècias, de domìnigu). 

E duncas, apustis de custas ùrtimas tres giorronadas, ant a incumentzai is partidas finalis, cussas chi tzerriaus "partidas de is play-off" (po ddu narai a trassa de is ingresus), e chi funt is partidas chi s'ant a depi giogai tra totus is scuadras chi nd'ant a arribbai a su segundu postu de sa lista (e sa cosa, eia, ballit, torra, po dònnia campionau chi sigheus: e duncas, si cumprendit bastanti beni deu creu, nc'ant a essi partidas finalis siat po is scuadras chi currint in su campionau de s'Ecellenza, ma puru po is scuadras de sa Promotzioni, de sa Primu Categoria e de sa Segunda Categoria); ma chi pròpriu si depu narai is cosas po cumenti funt, intzandus, si potzu narai ca po su chi pertocat s'Ecellenza is partidas finalis ant a pertocai is cuatru scuadras chi ant a arribbai a is pabas de sa primu de sa lista, e sa pròpriu cosa at a sucedi, at a balli (chi si praxit de prus custu fueddu po cumenti cratzat) po su campionau de sa Promotzioni (est a narai, cun atras otu scuadras chi ant a curri po is partidas finalis, cuatru chi nd'ant a arribbai de sa Lista A e atras cuatru chi nd'ant a arribbai de sa Lista B). 
E invècias is scuadras de sa Primu Categoria ant a depi giogai po is giorronadas de su campionau fintzas a su dexi de su mesi de maju, e feti apustis ant a podi incumentzai cun is partidas finalis. Chentza de si ndi scaresci de is partidas chi is ùrtimas scuadras de sa lista ant a depi fai, ant a depi giogai po circai de ndi cassai sa sarvesa. E de custa cosa, mancai, si nd'apa a podi chistionai me is artìculus chi ant a bessiri immoi in su benidori. 

Po immoi si potzu feti narai ca, eia, po su chi pertocat su campionau de s'Ecellenza, a su primu postu de sa lista agataus ancora is de s'Ossese, cun cincuantatres puntus in totu; e cun unu puntixeddu in mancu de is chi tenint is primus de sa lista, est a narai cun cincuantaduus puntus in totu, agataus is de s'Ilvamaddalena. Cun tres puntus in mancu de is chi tenint is de Sa Maddalena, intzandus agataus is de sa Nuorese, cun corantanoi puntus, e chi funt sa de tres scudras, ddi naraus diaici, ca podit curri po ndi cassai sa bìncida finali, est a narai, duncas, sa bìncida de su campionau, fadendi su contu ca is de su Tèmpiu tenint allogaus in buciaca calincuna cosa cumenti a corantatres puntus (e chi funt, a fai is contus nci poneus pagu meda de su restu, dexi in mancu, tundus tundus, de is chi tenint is de s'Ossese, chi s'apu arremonau immubagora de su restu); e serraus sa chistioni acapiada a sa cursa po ndi cassai su primu postu cun is de su Lanusè e cun is de s'Atleticu de Uri, chi tenint coranta puntus in totu in buciaca, e s'agatant, in dì de oi, apustis de calincuna cosa cumenti a bintiseti partidas giogadas, a su de cincu postus in sa lista. 

E immoi chi nci seus, fadendi su contu ca seu de una parighedda de cidas chi no si ndi chistionu (chi no megu a mi sballiai, e mi parrit pròpriu de podi narai ca no seu svarionendi), andaus a castiai cumenti funt cuncodradas is cosas me is duas listas de sa Promotzioni, apustis de is partidas chi si funt giogadas pròpriu in custu fini de cida passau (eia, is scuadras de sa Promotzioni, impari a is scuadras de s'Ecellenza, ndi funt cabadas in campu su sabudu ainnantis de sa Pasca Manna). E pròpriu su campionau de sa Promotzioni, e chistionu mescamente de sa Lista A (fadendi su contu ca su campionau de sa Promotzioni, cumenti eis a sciri giai beni, e chi no ddu scieis intzandus deu seu innoi po fai custu trabballu puru, est stètiu pretziu in duas listas), est benendu a essi su prus spàssiosu, fadendi su contu ca is de s'Alighera, chi currint in sa Lista B (e megu a chistionai sèmpiri de su campionau de sa Promotzioni, si cumprendit, berus est?), ant giai serrau is giogus po ndi cassai su primu postu de sa lista (e intzandus puru sa bincida de su campionau e duncas si funt giai postus in buciaca s'artziada in su campionau de s'Ecellenza po sa stagioni chi at a benni, e chi at a essi cussa de su duamilla e bintises – duamilla e bintiseti). 

E duncas, chi seis de acòrdiu cun mei, sa cosa prus toga chi podeus fai, arribbaus a custu puntu de s'artìculu, est cussa de andai a castiai, impari, pròpriu cumenti funt cuncodradas is cosas in sa Lista A po su chi pertocat sa cursa concas a su primu postu, apustis chi si funt giogadas is partidas de sa de trintunu giorronadas.

E duncas, in su sabudu ainnantis a sa dì de sa Pasca Manna nc'est stètiu una de is ùrtimas isfidas deretas (ddas tzerriaus diaici, e megu a chistionai de cussas partidas chi si giogant tra duas scuadras chi funt currendi po ndi cassai su pròpriu traguardu,chi cumprendeis su chi seu circhendi de si narai, cumenti iant a podi essi, mancai, duas scuadras chi currint po ndi cassai su primu postu de sa lista o, ballit aguali, po ndi cassai sa sarvesa) in sa cursa concas a sa bìncida de su torneu, cun is de su Castiadas chi funt arrannèscius a binci, e beni puru, contras a is de su Guspini, cun su resultau, togu e tundu tundu (cumenti si iat a podi narai, furendindi sa trassa de s'italianu etotu), de cincu a zeru; e gràtzias a custus tres puntus, intzandus, is piciocus sighius de Bebu Antinori nd'ant cassau pròpriu is aversàrius, e megaus a chistionai, est craru, de is gùspinesus, a su segundu postu in sa lista, cun calincuna cosa cumenti a setanta puntus allogaus in buciaca. A su primu postu de sa lista, immoi, candu ammancant, si ddu torru a arregodai, feti tres partidas po serrai sa stagioni (po serrai sa stagioni regulari, po ddu narai mellus puru e po essi pretzisus cumenti unu giornalista iat a depi essi chi bolit fai beni su trabballu cosa sua), ddoi funt torra is de su Terraba Frantziscu Bellu; e si naru torra poita (e si cumprendit, deu creu) is terrabesus ant fatu una bella pariga de cidas (pariga a sa sarda, e si cumprendit ca funt stètias prus de duas, de seguru) a su primu postu, e immoi ant a fai de totu, e si cumprendit, po nc'abarrai fintzas a sa fini, e duncas fintzas a su bintises de su mesi de abrili (su bintises de custu mesi etotu, duncas), ca at a essi sa dì innoi ant a acabbai is campionaus (a su mancu, is campionaus de s'Ecellenza, de sa Promotzioni e de sa Segunda Categoria puru). 
E a custu puntu, sighit a curri concas a su primu postu de sa lista puru sa Villacidrese (sa scuadra chi nd'ant pesau in Biddacidru giai de una bella pariga de annus, fadendi su contu ca su presidenti in dì de oi est Mateu Marrocu, chi est su fillu de sa persona chi at tentu is crais de sa scuadra me is manus po una biga de annus, candu is cidresus, ddus tzerriaus diaici, a trassa de sa moda sorresa, curriant in su campionau de sa Sèrie D, me is annus otanta e noranta, po si cumprendi mellus puru), chi nd'at cassau is tres puntus chi ddoi fiant in su pratu in sa isfida contras a is de su Tonara, chi s'agatant, invècias, a s'ùrtimu postu de sa lista cun feti bintunu puntus; is cidresus, invècias, tenint allogaus in buciaca calincuna cosa cumenti a sessantanoi puntus, e chi ndi funt arribbaus gràtzias a bintunu partidas bintas (e no funt pagus, fadendi su contu ca is de su Guspini e is de su Terraba nd'ant bintu bintiddus, e is de su Castiadas feti, po modu de narai, binti). 
E duncas, immoi chi nci seus, podeus narai, puru (diaici incumentzaus a fai is contus in buciaca puru a cussas scuadras chi funt currendi, e cumbatendi, chi mi permiteis de manigiai custu fueddu, po ndi cassai sa sarvesa e duncas sa possibbilidadi de giogai in su campionau de sa Promotzioni puru po s'annu chi at a benni, e sèmpiri chi su Cielu at a bolli custu beni po nosu, est craru) ca is de su Tonara funt giai cun unu pei in su campionau de sa Primu Categoria, fadendi su contu ca sa zona-play out (chi est su modu chi manigiaus po chistionai de is scuadras chi ant a podi giogai is partidas finalis po ndi cassai sa sarvesa, fadendi su contu ca is ùrtimas tres scuadras nd'ant a cabai deretas deretas, cumenti si iat a podi narai, in su campionau de sa Primu Categoria, e invècias is scuadras chi ant a serrai sa stagioni regulari cun tres e cuatru scuadras a is pabas, ant a tenni sa possibbilidadi de giogai s'una contra a s'atra e chini at a binci, intzandus nd'at a cassai sa sarvesa) est atesu de otu puntus, est a narai, mellus, ca is de s'Ovodda (ca in dì de oi s'agatant a su de cuìndixi postus in sa lista, cun calincuna cosa cumenti a bintinoi puntus in totu allogaus in buciaca) tenint otu puntus in prus de cussus chi tenint is ùrtimus de sa lista, cun tres partidas chi nci funt ancora de giogai e duncas, noi puntus in su pratu (chi mi permiteis de imboddiai sa chistioni diaici, prus a trassa de poeta, fortzis, ca de giornalista sportivu). 

E duncas, eia, po is de s'Ovodda cussa chi si seus lassaus a is pabas est stètia una giorronada bona meda, fadendi su contu ca funt arrannèscius a binci cun su resultau de tres a unu contras a is de s'Uda (chi funt arribbaus a si giogai custa partida cun sa sarvesa giai posta a su callenti in buciaca, e podeis cumprendi a solus totu s'afròddiu chi ddoi est in domu de is campidanesus, chi funt stètius sighius de Madau). 
Giorronada marigosa meda, invècias, siat po is de sa Baunese, chi ndi funt arrutus in domu cosa insoru cun su cincu a tres scutu in faci de is allenus de s'Arborea, e po is de sa Frecia Parte Montis, diaici si tzerriat sa scuadra chi nd'ant pesau in Mòguru, chi ant pèrdiu sa partida contras a is aristanesus de sa Tharros cun su resultau de duus a unu. Is de sa Baunese e is de sa Frecia Parte Montis immoi tenint feti bintitres puntus, e s'agatant cun feti una scuadra a is pabas (e seu chistionendi, est craru, de is de su Tonara, chi eus giai arremonau ainnantis in custu artìculu etotu de su restu) e is de s'Ovodda funt stesiaus (cumenti s'apu giai narau) de calincuna cosa cumenti a ses puntus. Cun bintinoi puntus, intzandus, agataus puru is de su Calciu Pirri, ca chi is cosas depessint abarrai diaici (e chistionu po su chi pertocat sa lista, e mi parrit bastanti craru, berus est?) intzandus iant a depi giogai sa partida finali contras a is piciocus sighius de Sandru Crisci (e megu a chistionai de s'allenadori de s'Ovodda, chi nd'at pigau su postu in panchina, cumenti si iat a podi narai, una pariga de diis ainnantis de su Nadali, chi fiat de Manuel Moro). 
Cun feti unu puntixeddu in prus (trinta contras a bintinoi) agataus is de su Cannonau de Jerzu, chi ant pèrdiu, cun su resultau de cuatru a unu, pròpriu contras a is terrabesus de sa Frantziscu Bellu, chi s'apu arremonau de su restu in custu artìculu etotu. Tra is de sa Villacidrese, chi s'agatant in dì de oi a su de cuatru postus (cumenti s'apu giai narau, de su restu) e is de s'Arborea, chi sighint a su de cincu postus in sa lista, ddoi est una forada (ddi naru diaici) de calincuna cosa cumenti a dexiotu puntus, e custu po si fai a cumprendi de cumenti funt currendi a forti is scuadras chi ddoi funt me is primus cuatru postus de sa lista. 
Cun corantaseti puntus agataus is de su Ceraxius (e diaici andaus a serrai is chistionis acapiadas a sa lista A de su campionau de sa Promotzioni), chi peròu ant pèrdiu sa partida in domu de is de s'Atleticu de Casteddu, cun is piciocus sighius de Carletu Saba chi tenint in dì de corantaduus puntus in buciaca, chi ndi funt arribbaus gràtzias a doxi partidas bintas, e s'ùrtima de custas partidas bintas est stètia pròpriu cussa chi ant giogau contras a is de su Ceraxius, e chi s'est serrada cun su resultau de tres a zeru po is casteddaius. Is de su Pirri, invècias, fait a narai custu puru, ant serrau in paridadi sa partida po sa de dexesseti bortas, e no funt pagus, e si cumprendit; antzis, si podit narai puru, immoi chi nci seus, ca is de su Pirri funt stètius cussus, in totu sa lista de scuadras, chi ant serrau sa cantidadi prus manna de partidas cun su resultau siddau in paridadi. E cumenti m'at contau s'allenadori cosa insoru, Davidi Meloni, chi sa scuadra at serrau is partidas cun su resultau in paridadi po dexesseti bortas, bolit narai ca po dexesseti bortas, prus is cuatru partidas chi funt arrannèscius a binci, no ant pèrdiu; e su de no perdi is partidas est una de is cosas de importu prus mannu, mescamente candu tenis sa possibbilidadi de sighiri una scuadra prena fintzas a cucuru de giogadoris giòvuneddus, cumenti est, de su restu, cussa de su Pirri. 

E immoi chi nci seu, eia, si potzu narai, puru, ca is de su Pirri ant pèrdiu dexi partidas apitzus de trintunu bessidas. E is pirresus funt a unu puntixeddu feti de sa sarvesa dereta, chi cumprendeis su chi seu circhendi de si narai, fadendi su contu ca is de su Cannonau de Jerzu tenint feti unu puntixeddu in prus de is arrùbius-brau. Is de su Pirri, duncas, si funt acuntentaus de ndi boddiri unu puntixeddu, cun su resultau siddau in su zeru a zeru, cumenti fiat su resultau, de su restu, a s'incumintzu de sa partida etotu, in sa batalla contras a is de su Samugheo, ca tenint otu puntus in prus de is aversàrius e sighint a annadai in acua bonas, cumenti si iat a podi narai (e cumenti seu narendu, de su restu). De s'ùrtima giorronada de partidas ndi funt arribbadas novas bonas meda po is de su Cus de Casteddu puru (sa scuadra chi nd'ant pesau is de s'Universidadi de Casteddu, po essi prus crarus e pretzisus), chi funt arrannèscius a binci contras a is de su Vecchio Borgo Sant'Elia, cun su resultau de unu a zeru; unu goiteddu ca, duncas, est bastau po ndi boddiri totus is tres puntus chi ddoi fiant in su pratu. E immoi is de su Cus de Casteddu s'agatant a su de doxi postus in sa lista, cun trintacincu puntus in totu, e chi funt, a fai is contus nci poneus pagu meda, dexi in mancu de is chi tenint is casteddaius de su Vecchio Borgo Sant'Elia, sighius po cust'annu puru de un allenadori bravu e togu meda cumenti est Miro Murgia. Po is de s'Atleticu de Casteddu puru, intzandus, nd'est arribbada sa seguresa (ddi naru diaici) de nd'essi cassau sa sarvesa po cust'annu puru, e cun tres partidas ancora de giogai ainnantis de serrai sa stagioni, e si cumprendit, est unu resultau bonu meda. 

E po su chi pertocat sa cursa concas a su primu postu, intzandus, ddoi funt, est craru, fadendi su contu de totu su chi s'apu contau fintzas a immoi, e fadendi su contu mescamente de cumenti funt andadas is cosas in s'ùrtima giorronada de partidas, is de su Castiadas puru, sighius de Bebu Antinori, chi ant fatu a biri a totus cantu funt fortis (cantu podint essi fortis, chi si praxit de prus cumenti sonat, cumenti cratzat) gràtzias a is cincu gol chi ant scutu in faci a is de su Guspini, sighius invècias de Christian Dessì. E duncas, in sa giorronada chi s'at a giogai pròpriu custu domìnigu chi est po nd'arribbai, nc'at a essi sa isfida dereta tra is de su Terraba Frantziscu Bellu, chi s'agatant a su primu postu de sa lista, e is de su Guspini, chi ant a circai de strantaxai acoitu sa conca (e chi est sa cosa mellus chi unu podit fai apustis chi nd'arruit, nc'est pagu de nc'aciungi) po si giogai, apustis, totus is cartas chi tenint me is manus me is ùrtimas duas giorronadas (e seu chistionendi de is giorronadas chi ant a arrui su dexennoi de su mesi de abrili e, duncas, apustis, su bintises). 

E duncas, chi is sarrabesus (e megausa  chistionai, est craru, de is de su Castiadas) depessint arrannesci a binci in domu de is de s'Uda, e chi is de su Terraba Frantziscu Bellu depessint abarrai a buca asciuta, o feti cun unu puntixeddu in buciaca, intzandus is de su Castiadas si iant a agatai, torra, a su primu postu de sa lista. «Seus arrannèscius a binci sa partida contras a is primus de sa classi, a is primus de sa lista, e seu prexau meda po cumenti si funt andadas is cosas in campu – at scoviau a is giornalistas s'allenadori de sa scuadra biancu-birdi, e seus chistionendi de Bebu Antinori, chi apustis at sighiu a contai -: Sa scuadra cosa mia at giogau una partida toga meda, de importu mannu; nd'eus pesau una biga manna de ocasionis, ddi naru diaici, po fai su gol e eus lassau pagu ocasionis a is aversàrius cosa nosta; po su chi pertocat su resultau finali, deu potzu narai ca si ddu seus minèscius. Nosu, chistionu po su chi pertocat su Castiadas, est craru, e is de su Guspini teneus is rosas prenas fintzas a cucuru de giogadoris fortis: sa partida chi nd'est bessida aforas est stètia bona e toga meda, e spàssiosa, fait a narai custu puru, e seu prexau po totus is personas chi funt benidas a su campu po castiai sa isfida e po fai su tifu. Immoi nci funt feti tres partidas ancora de giogai po nosu: sa prima at a essi cussa in domu de is de s'Uda, apustis nc'at a essi de pentzai a sa partida contras a is moguresus de sa Frecia Parte Montis e duncas eus a serrai sa stagioni in domu de is de su Cannonau de Jerzu. E si cumprendit: depeus circai de ndi cassai sa cantidadi de puntus prus manna e a sa fini de is giogus eus a fai is contus e eus a castiai innoi seus stètius bonus a arribbai. Seus currendi in cuatru po ndi cassai sa bìncida de su campionau e mi parrit unu bisu, poita su spàssiu chi est benendindi aforas est mannu meda, e chistionu po is tifosus mescamente. Is cuatru scuadras chi s'agatant me is primus cuatru postus funt fortis agualis, e is de sa Villacidrese puru, mancai siant is ùrtimus tra custas cuatru scuadras, podint ancora binci su campionau. In dì de oi peròu a su primu postu ddoi funt is de su Terraba, e is de su Gùspini funt abarraus in artu po cidas e cidas e cidas de sighiu, e si cumprendit, no est una cosa facìli; s'allenadori de is de su Guspini nd'at pesau una stagioni toga meda e ddu bollu imprassai a forti e saludai: ddi fatzu is cumplimentus po su trabballu chi est arrannèsciu a fai impari a is piciocus cosa sua».



Attività realizzata col contributo della Regione Sardegna. IMPRENTAS 2025-2026. LR 22/2018 art. 22