Salta al contenuto principale
abbasanta
Is piciocus de mister Lello Floris ant a circai de cassai sa Bittese

S'Abbasanta torrat a partiri cun su puntu pigau in sa partida contras a su Bultei, sa Paulese imoi pentzat a sa batalla contras a s'Ollolai

A pustis de is tres surras arregotas contras a sa Dorgalese, cun sa partida de su duus de friàrgiu chi est acabada po cuatru a unu po is piciocus de mister Sergio Cucca, contras a cussus de sa Paulese, in domu, cun sa primu de sa lista chi at bintu po duus a unu, e a pustis de su cuatru a duus, grai meda, a nai sa beridadi, bodditu contras a su Torpè de bomber Gianluca Siazzu, s'Abbasanta torrat a partiri gratzias a su puntu pinnigau in sa batalla contras a su Bultei, giogada pròpriu domìnigu passau, e chi su dexanoi de gènnargiu fiat acabada tres minudus a innantis de cumenti depiant andai is cosas, cun is duas scuadras acapiadas po unu a unu. Diaici, s'allenadori de is arrubius-nieddus, Lello Floris imoi podit traballai cun sa conca unu pagheddu prus sbuida de pentzamentus, ma is puntus in mancu de sa primu de sa lista Paulese funt undixi, candu mancant feti noi bessidas po acabai su campionau. Is cosas andant mellus pentzendi a sa cursa po is play-off: sa Bittese difati tenit corantases puntus, feti cincu in prus de s'Abbasanta: in s'ùrtimu bessida, cussus de Bitzi si funt depius acuntentai de s'unu a unu, in domu cosa insoru, contras a su Bòrore de mister Tola.

Po sa de otu gerronada, sa Paulese andat a giogai in domu de cussus de s'Ollolai e bisat de si ndi fuiri, conca a sa Promozione, sempri prus atesu de is scuadras chi sighint. Is grogus-brau depint torrai a partiri a pustis de su tres a tres pesau contras a su Benetutti. Sa primu partida de s'annu passau contras a s'Ollolai, invècias, est acabada cun cuatru gol, tundus tundus, po sa Paulese. Po sa Bittese, invècias, nc'at a essi de fai is contus in domu de cussus de s'Aritzo, cincu bìncidas e seti parègius allogaus fintzas a imoi: sa partida de su tres de su mesi de donniassantu de s'annu passau si fiat serrada cun su cincu a unu cuncodrau da Giorgio Olzai, duus gol po issu, Giorgio Calvisi, Fabrizio Sanna e Franco Talanas.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2019/2020
Tags:
Prima Categoria
Girone C