In Samugheo su calciu est una cosa de importu mannu, Roberto Cadeddu: «Candu traballas impari a is piciocheddus giòvunus serbit passièntzia»

Samugheo est connota in totu sa Sardìnnia po is festas de su Crannovali, po is fainas cun su pani e is tapetus e po su binu bonu chi faint cun s'àxina chi crescit in cussus logus.
In Samugheo ddoi est puru una crica de genti chi traballant po is piciocus de sa bidda: Gianluigi Deias, su presidenti, impari a Peppino Tatti, su vice-presidenti, e a totus is atrus chi donant una manu de agiudu in sa sotziedadi, funt apoderendi in peis sa scolla de calciu, chi po imoi tenit in totu 150 giogadoris. Is piciocheddus de is “Giovanissimi”, po ndi contai una, s'annu passau ant bintu sa “Coppa Provinciale” de sa Figc de Aristanis; nci funt puru is “Allievi”, sighius da Luca Murgia; is prus matucus giogant invècias in sa “Juniores”, cun s'allenadori Angelo Puggioni, e in sa primu scuadra de is mannus, torra cun mister Roberto Cadeddu, po su segundu annu de sighiu.

«Is cosas funt andendi beni meda — contat Roberto Cadeddu —, nareus chi totu custu, a bortas, si parit unu bisu. Potzu traballai cun is mannus, sciendu perou chi teneus una scolla de calciu a is pabasa, cun allenadoris bravus chi sighint is piciocus in totu cussu chi serbit. De una pariga de annus nc'est puru un'àcapiu cun “Cagliari Football Academy” (sa scolla de calciu de su Casteddu ndr): faint un'atòbiu una borta a su mesi e si donant una bella manu de agiudu po cumprendi cumenti andai a innantis cun custa stòria in d-una bidda pitica cumenti a Samugheo».
Cadeddu tenit sempri un'ogu po is giogadoris prus giòvanus. «Nci funt stetius domìnigus chi eus incumintzau sa partida cun otu “fuori-quota” in campu, totu paris. Seu prexau po cumenti is piciocus m'ascutant e mi sighint ma sciu puru chi candu ses piticheddu sa conca est cussa chi est (arrit); po cussu nau chi serbit passièntzia». Apustis aciungit: «Fortzis m'iat a praxi a binci prus partidas de sighiu».

Mancu nau, fatu: sa primu scuadra de su Samugheo est bincendi, dònnia domìnigu, de su bintiseti de su mesi de donniasantu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020