Is scuadras de sa Prima Categoria currint po sa Promozione: Bittese – Paulese e Tempio – Ozierese is partidas de importu mannu

Is tifosus de calciu depint abertai atras cincu diis: a pustis de is festas, imoi difatis amancat feti de salludai su duamilla e dexianoi e imprassai s'annu nou, sa bòcia at a torrai a curri, impari a totus is giogadoris, su cincu de gennàrgiu.

Is scuadras de sa Prima Categoria bisant su sartidu in Promozione: in su Girone A cussus de su Crabonaxa, cun mister Piccarreta chi est fadendi unu traballu bonu meda, funt primus cun trinta sesi puntus in buciaca, ma s'Atletico Cagliari abarrat apicigau cun trintacuatru puntus.
Su Cannonau Jerzu invècias depit torrai a partiri prus a forti, a pustis de s'unu a unu bodditu in domu de s'Atletico de Lotzorai in s'urtima partida de s'annu bèciu.

In su Girone B sa Tharros est sa scuadra prus forti, a su mancu po imoi, cun trintunu puntus e una biga de giogadoris bravus, cumenti Alex Tomasi, po nd'arremonai unu, chi at fatu giai ses gol; cussus de su Cabuderra perou sighint a curri cun bintinoi puntus e a cantu parit tenint sa gana de si dda gherrai fintzas a s'urtimu; Fermassenti e Sadali abarrant scidas, cun is ogus obertus, po nd'aprofitai a bortas chi calincunu innantis imbrùchinit.

In su Girone C, Paulese e Bittese sighint a curri impari, a bratzetu, cun trinta tres puntus: imoi nc'est sa partida de importu mannu meda, cun is duas scuadras una contras a s'atra, po su domìnigu prus callenti de totus. Avatu ddoi est s'Abbasanta, chi at perdiu sa partida in domu de s'Ovodda e a pustis nd'at arregotu sceti unu puntu in s'urtima partida contras a su Benetutti. Is piciocus de Lello Floris si dda depint biri cun s'Ollolai.

In su Girone D, Ozierese e Porto Cervo castiant totus is atrus de su primu postu de sa lista, cun trintatres puntus, chi arribant a pustis de dexi bincidas e tres paris; po su Tempio at a essi unu domìnigu traballosu meda, cun sa partita contras a sa scuadra de mister Filippo Fele, in domu: is tifosus no bint giai s'ora. Is piciocus de Giuseppe Spano, invècias, ant a giogai contras a su Badesi, su de cuatru in sa lista.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020