Is de su Cos e is de s'IlvaMaddalena ndi torrant a cabai in su campionau de s'Ecellenza

Atacu a scriri custas rigas, chi ant a andai a fai parti de s'artìculu chi nd'at a bessiri su cuindixi de maju, de giòbia, cumenti a sèmpiri, cumenti a dònnia cida, candu seu arribbau (pighendi po bonu su tialu de calendàriu ca tèngiu asuta de su nasu) a su megama de su trexi, sighendi su dìciu chi narat ca, eia, chini tenit su tempus po fai una cosa no iat a depi abertai a s'incras po dda fai. 

E duncas, fadendi su contu ca is giogus de is campionaus si funt serraus su cuatru de su mesi de maju (po su chi pertocat sa chi podeus tzerriai stagioni regolari), e fadendi su contu ca po cust'annu, po custa stagioni (chi est cussa de su duamilla e binticuatru – duamilla e binticincu, mi parit bastanti craru, ma chi bollu essi pretzisu in su trabballu cosa mia, in su trabballu chi fatzu, nci depu stichiri custas cosas puru) abarrant feti de sighiri is partidas finalis (cussas chi, a sa moda de is ingresus, a trassa de cumenti si narat in ingresu, seus costumaus a tzerriai play-off e play-out), chi funt incumentzadas, tra is atras cosas, pròpriu sa cida passada (e tra pagu apa a andai a si contai cumenti funt postas is cosas, mi parit craru puru), a su mancu po su chi pertocat su mundu de sa Primu Categoria (e duncas, eia, si potzu narai ca is campionaus de sa Primu e de sa Segunda Categoria si funt serraus, est a narai ca funt acabaus su cuatru de su mesi de maju, invècias su campionau de sa Promotzioni s'est serrau sa cida ainnantis, est a nai su bintiseti de su mesi de Abrili), e duncas, custu bollit narai ca tèngiu prus pagu artìculus de ndi pesai in italianu, e custu bollit narai, duncas, ca mi potzu ponni a scriri, po su prus, is artìculus in sardu campidanesu chi ndi bessint aforas po is Novas de su Diàriu Sportivu (cumenti seus costumaus a ddas tzerriai de unu bellu arroghededdu de tempus; ant a essi prus o mancu cuatru o cincu annus chi sigheus a andai ainnantis cun custa faina, de su restu); e custu bollit narai chi mi dda potzu pigai cun unu stìddiu in prus de calma de su chi fatzu, mancai me is atrus mesis, mancai, peròu, su trabballu de fai no ammanchit. 
E gei ddu eis a podi cumprendi asolus. 

E duncas, andu a si chistionai, po incumentzai, pròpriu de cumenti funt cuncodradas is cosas po su chi pertocat su trabballu cosa mia, e po su chi pertocat su trabballu chi m'ammancat ancora de fai, e chi apa a depi fai me is cuindixi diis chi abarrant (prus o mancu) de si scroxai po su mesi de maju puru. 

E duncas, me is ùrtimus tres giòbias chi nci funt (chi nc'ant a essi de bivi, chi su Cielu at a bolli custu beni po mei puru), apa a sighiri (si ddu promitu giai de immoi, mancai deu no potza sciri, cumenti s'arrapitu fatu fatu, de su restu, cali arrastu apa a sighiri, cali legas apa a pigai, ainnantis de mi ponni a ddas scriri. Ca in sa conca mia, eia, ddoi funt una biga de bideas, una biga manna meda de contus chi mi iat a praxi a si intregai, ma a sa fini est una cosa chi no decidu ainnantis de mi ponni a dda fai, ma feti in su momentu, a segunda, duncas, de su chi mi passat in conca) is ùrtimas partidas de sa stagioni, chi est cussu chi apa a fai po s'artìculu de custa cida puru, fadendi su contu ca is giogus po is scuadras de sa Segunda e de sa Primu Categoria ant a andai ainnantis fintzas a sa fini de su mesi (e fintzas a is primus diis de su mesi de Lampadas puru, a segunda de cumenti si ponint is cosas); fadendi su contu ca is scuadras chi ant serrau su campionau de sa Primu Categoria a su segundu postu s'ant a depi atobiai tra de issas (cuatru scuadras in totu), e cussa chi at a binci su tanti de partidas prus mannu at a tenni, intzandus, sa possibbilidadi de benni piscada torra po su campionau de sa Promotzioni de s'annu chi at a benni. 

E in prus nc'at a essi de sighiri totus is partidas chi pertocant sa cursa po ndi cassai sa sarvesa; custu bollit narai, duncas, ca is cosas de si torrai a contai no ant a mancai de seguru. 
E po su chi mi pertocat, incumentzu a si ddu narai, e mancai su tanti de artìculus chi nd'apa a depi pesai in italianu at a essi sèmpiri prus pagu (a su mancu po su chi pertocat sa storia, sa cronaca de is partidas, po manigiai su fueddu prus togu), su trabballu chi apa a depi fai, po su chi pertocat su sardu, no at a mancai de seguru. E duncas, cumenti mi capitat de fai, de una pariga de annus, in su mesi de maju, apa a tenni giai giai su tempus, feti (e si naru feti!) po dromiri, papai e scriri; no apa a tenni su tempus po fai atru, chi ndi bogaus cussa ora, ora e mesu de passillada chi mi fatzu dònnia dònnia merì (chi m'arregalu, po manigiai unu fueddu chi mi parit prus futu puru), e mai ammanchit sa passilladedda, fadendi su contu (e immoi nci sticu puru su primu strollichimini de s'artìculu, ca de su restu scieis beni cumenti seu fatu e cumenti andant is cosas me is artìculus chi ndi pesu in sardu, mescamente chi nd'eis lìgiu a su mancu un antru tra totus cussus chi nc'apu bogau aforas in custus ùrtimus mesis, in custus ùrtimus annus) ca po is antigus aregus puru su de passillai, e intzandus su de si podi fai una passillada, beniat a essi unu de is esercìtzius de importu prus mannu in sa vida de una persona, fadendi su contu ca fiat una cosa chi consillànt de fai po si mantenni in bona saludi, chi cumprendeis su chi bollu narai; e is antigus aregus consillànt de si fai una passillada (una passillada dònnia, dònnia dì) siat a is giòvuneddus, a is piciocus in edadi de iscola (po si cumprendi mellus) ma puru a sa genti prus matuca de edadi, e fintzas po is bècius. E sa passillada fiat un esercìtziu de importu diaici mannu (a trassa de is allenamentus po unu giogadori de bòcia, diaici arrannèsceus, mancai, a si cumprendit mellus puru) ca no nci brintat nudda cun sa ginnastica chi fadiant dònnia dì: ca una cosa, e si cumprendit beni, funt is esercìtzius de ginnastica, e un'antra cosa benit a essi su de passillai. 
E duncas, eia, in custus dexesseti diis chi ammancant po serrai su mesi de maju puru, apa a tenni sa possibbilidadi, e su tempus, feti po papai, po scriri is artìculus chi ndi pesu po su trabballu cosa mia etotu (chi est su chi seu fadendi pròpriu immoi, tra is atras cosas, e mi parit craru puru), po ligi calincuna paginedda bona de calincunu libbru bonu, ainnantis de mi nci crocai, e a sa fini, eia, eis cumprèndiu beni, no apa a tenni su tempus po fai atru. E custa cosa at a balli po is diis chi andant de su lunis, e fintzas a su cenabara; e de su sabudu e de su domìnigu, immoi ca sa parti prus manna de is partidas funt acabbadas, no si ndi chistionu, e custu bollit narai ca isperu de mi podi pigai calincuna orixedda de pàsiu puru, ca desinò (cumenti m'arrapitu fatu fatu, est a nai giai dònnia dì) su perìgulu de ndi bessiri aforas de conca, cun totu custas oras de trabballu, est mannu meda. 
E si ddu naru deu ca po trabballu (e gei si cumprendit) abarru a totu dì (giai a totu dì, po essi prus santzerus puru) crachendi is butoneddus de custa tialu de tastiera, aranti de su computer; e duncas, eia, si naru custa cosa poita, po su prus de is bortas, mi intendu basau de sa bona sorti (cumenti si iat a podi narai, a trassa de cumenti si narat in italianu etotu), chi feti fatzu su contu de totus is trabballus lègius e fadiosus chi nci funt de sighiri, mescamente in dì de oi (ma sa cosa ballit puru, est craru, po totus is tempus passaus), in custu mundu macu e totu ghetau a pari, cumenti mi benit de narai. 

E duncas, eia, megamu a si narai, torrendi a nosu, ca po atrus tres giòbias s'apa a chistionai, beni meda, po su chi apa a arrannèsci, a su mancu, de totus is novas chi nd'arribbant siat de is campus innoi si giogant is ùrtimas partidas de sa stagioni (fadendi su contu ca is de su Muristeni puru, e mancai nc'apa a torrai apitzus de sa chistioni in cust'artìculu etotu, funt incumintzendi a giogai is partidas finalis po ndi cassai s'artziada in su campionau de sa Sèrie D, e immoi si dda ant a depi biri contras a is scuadras chi nd'arribbant de is atras regionis de Italia etotu, apustis de essi bintu sa partida, de importu mannu meda, contras a is de su Tèmpiu, e custa cosa est sucèdia pròpriu domìnigu passau, e po custu ca megu a si narai, duncas, ca chi apa a tenni s'ocasioni, su tempus e sa gana bella de ddu fai, de sa cosa si nd'apa a chistionai, mellus, tra pagu), e in prus, eus a incumentzai a sighiri totus is movimentus, ddus tzerriu diaici (diaici m'est bèniu de ddus tzerriai, a su mancu) de mercau chi ndi funt bessendi a pillu in custas ùrtimas oras, ca ddu scieis cumenti andant is cosas po su chi pertocat su mundu de sa bòcia: cumenti acabbant una stagioni, is dirigentis incumentzant a trabballai po cuncodrai sa rosa, e duncas sa scuadra cosa insoru, po sa stagioni chi nd'at a arribbai avatu. 

E duncas, eia, no si eis a spantai prus de su tanti, chi si naru ca nci funt giai is primus scuadras chi funt scerendi is allenadoris nous, ca est sa primu cosa chi si fait: po primu cosa, intzandus, sceras un allenadori chi potzat essi bonu po sa bidea de giogu chi tenis in conca, e feti apustis incumentzas a circai is giogadoris chi potzant andai beni po su giogu chi s'alleandori (e is dirigentis) bolint donai a sa scuadra; e po custa chistioni puru funt incumintzendi a arribbai is primus novas friscas friscas (o callentis callentis, chi si praxit de prus). 

E cumenti at a brintai su mesi de Lampadas, invècias, me is artìculus chi ndi pesu in sardu (e chi nd'ant a bessiri dònnia, dònnia giòbia, cumenti scieis giai, de su restu) eus a chistionai (apa a chistionai, chi si praxit de prus cumenti sonat sa cosa, fadendi su contu ca custus artìculus ddus scriu deu, e bosatrus seis is chi andant a ddus ligi, e megu a brullai, si cumprendit?) de totus is scuadras chi nd'ant cassau sa bìncida de su campionau e, duncas, su primu postu de sa lista. 
E si potzu narai, puru, immoi chi nci seu, ca me is primus duus artìculus chi nd'ant a bessiri in su mesi de Lampadas (chi est su mesi innoi ddoi est sa festa po Santu Juanne, po si cumprendit mellus, e est su mesi innoi ndi torrat a brintai puru s'istadi, e cun s'istadi, ndi torrat a arribbai puru sa basca manna e lègia), eus a chistionai de is de su Lanusè e de is de su Uddusò, chi funt stètias is duas scuadras chi, de sa Promotzioni, ndi funt artziadas (e sa cosa est frisca frisca, gei si cumprendit puru) in su campionau de s'Ecellenza; e apustis apa a sighiri a si chistionai de is scuadras de sa Primu Categoria chi funt stètias bonas a ndi cassai su primu postu de sa lista me is campionaus cosa insoru, e duncas, s'artziada in su campionau de sa Promotzioni. 
Ca custu de giogai in una categoria prus arta, e si cumprendit beni, est su bisu de dònnia giogadori, e fintzas de is allenadoris: prus artzias de categoria e prus is giogus benint a essi togus, dificilis ma spassiosus puru; e su bisu de dònnia piciocheddu chi currit avatu a una bòcia, e si cumprendit, est po primu cosa cussu de nci lompi a giogai, mancai, cun un assòtziu de s'Ecellenza, fadendi su contu ca su campionau de s'Ecellenza est su prus matucheddu, su de importu prus mannu, tra totus cussus chi si giogant in s'isula cosa nosta (ma sa pròpriu cosa ballit po is atras regionis de Italia, e si cumprendit beni, berus est?); ma candu ndi lompis a giogai in su campionau de s'Ecellenza, ca po unu giogadori iat a podi essi unu bisu mannu, intzandus totu su chi circas de fai (mescamente chi ses giòvuneddu, e mescamente chi ses unu giogadori forti) est su de nd'artziai in su campionau de sa Sèrie D, chi benit a essi sa porta, diaici m'est bèniu de dda tzerriai, tra su mundu de is giogadoris (e de is allenadoris) diletantis e su mundu de is giogadoris professioneris, chi funt is grandus campionis chi bieus dònnia domìnigu a sa televisioni, chi currint in su campionau de sa Sèrie A e chi si ponint in busciaca barcas e barcas de dinai po fai su chi faint, est a narai po curri avatu de una bòcia. 

E si cumprendit ca su bisu prus mannu po unu giogadori (su bisu prus mannu de totus, si iat a podi narai diaici) est cussu, mancai, de lompi a giogai in una de is grandus scuadras chi ddoi funt in su campionau italianu de sa Sèrie A, e fadendi su contu de su dinai (de sa barca de dinai, de su muntoni de dinai, po ddu narai mellus puru e po si cumprendi mellus a pari) ca si ponit in buciaca unu giogadori, su de tenni unu fillu chi giogat in su campionau de sa Sèrie A (o mancai de sa Sèrie B puru) est su bisu, puru, de is babbus e de is mammas, e si cumprendit cumenti andant is cosas, e no depu aciungi, deu creu, nemmancu unu mesu fueddu. 

E mancai, su pecau prus mannu est pròpriu custu, e immoi pigaus custu arraxonamentu puru, immoi chi nci seus (ca tanti su logu e su tempus no m'ammancant de seguru): sa cosa de importu prus mannu po unu piciocheddu, po unu piciocheddu piticu de edadi, e duncas, po unu piciocheddu giòvunu, est cussa de si spassiai, mescamente candu ses feti unu notzenteddu; ma podit capitai, podit sucedi, cumenti sucedit, de su restu, ca is babbus e is mammas si fatzant pigai de s'afròddiu, prus de su tanti chi tocat a is fillus; est a nai ca, a bortas, funt prus is mammas e is babbus chi si faint pigai de s'afròddiu, e mancai abarrant totu a bisai sa carrièra de su fillu cosa insoru, e ddu bisant, mancai, a giogai in una grandu scuadra, cun una surra manna de dinai allogau in banca. Ma fadendi custu giogu (est a nai, fadendi custus bisus) is babbus e is mammas si ndi scarescint ca, in cuss'edadi mescamente, sa cosa de importu prus manna po is piciocheddus est su spàssiu; e iant a depi tenni sa possibbilidadi de ndi cabai in campu cun su coru selenu, est a nai chentza de pentzamentus lègius. 
E invècias, ita sucedit? 
Ca is babbus e is mammas faint is cosas peus: si dda pigant contras a is allenadoris, candu no faint giogai is fillus cosa insoru, si dda pigant fintzas cun is arbìtrus de is partidas (e tocat a s'arregodai ca is arbìtrus chi sighint is partidas de is campionaus de is giòvuneddus funt giòvunus cantu is giogadoris etotu, mi parit craru), e abarrant po noranta minudus (chi no de prus puru) a ddus pigai a fueddus maus; e sa cosa peus est chi is babbus (e is mammas cumenti si cumportant? Si dda pongiu diaici, a trassa de brulla, mancai brulla no siat) arribbant giai giai (podeis bogai su giai giai, e mi dispraxit meda) a si pigai a pari is unus cun is atrus, de su febi chi tenint in corpus candu, mancai, sa partida chi est gioghendi su fillu no est andendi beni cumenti, invècias, si podiant abertai. E custa, fortzis, est una de is cosas peus chi nci funt in su mundu de sa bòcia in dì de oi; e fortzis est po cussu (a su mancu, issu mi dda at sèmpiri contada diaici sa cosa) ca babbu miu at preferriu, po su beni cosa mia, a mi fai abarrai atesu de su mundu de sa bòcia, poita mi naràt sèmpiri (e megu a chistionai sèmpiri de babbu miu, si cumprendit, berus est?) ca cuss'ambienti no ddi praxiat. 
E immoi su fillu (e seu chistionendi de mei etotu, si cumprendit, berus est?), mancu a ddu fai aposta, ca parit una brulla, po trabballu depit sighiri su mundu de is giogadoris diletantis, e po serrai sa chistioni si potzu narai ca nci funt personas in gratzias de Deus, personas futas (cumenti si narat in bidda mia etotu, chi est Bidd'e Sorris) chi trabballant, chi allenant sa scuadra pentzendi feti a su beni de is pipius, e no, custu est pagu ma seguru, pentzendi a su muntoni de dinai ca cussu piciocheddu iat a podi gudangiai gràtzias a su giogu de sa bòcia. 

Ca su giogu de sa bòcia de is diletantis iat a depi tenni una funtzioni sotziali (cumenti m'est bèniu de dda tzerriai, a trassa de cumenti si narat in italianu etotu), est a nai ca su mundu de su càlciu iat a depi essi su logu, ddi naru diaici, innoi is pipius (ma sa cosa ballit puru po is femineddas, mi parit craru puru, e duncas, po is pipias) imparant a bivi, imparant a giogai tra de issus, imparant a sighiri is regulas, ma mescamente, iat a depi essi su logu innoi is pipius imparant a binci, cun totu s'arrispetu chi nci bolit po is aversàrius, e imparant a perdi puru (chi est una de is letzionis de importu prus mannu), e imparant, duncas, a si ndi torrai a strantaxai, acoitu, apustis chi nd'arruint. 

E po custa cida puru, mi parit de podi cumprendi custu e de podi narai su chi seu narendusì, e gràtzias a Deus (o a is musas, po arremonai, torra, is antigus aregus), unu bellu tanti de strollichiminis mi nc'est bèssiu aforas. 

E chi nci pòngiu, chi nci sticu in mesu custus strollichiminis, tra totus is novas chi nd'arribbant de is campus de giogu, ddu fatzu, po primu cosa, mo no m'arrosci tropu de scriri feti (e si naru: feti) de bòcias, de resultaus de partidas e de gol; ma ddu fatzu puru, mescamente (cumenti s'apu giai narau una bella biga de bortas, ma a si ddu torrai a arrapiti no mi costat nudda, cumenti si narat) po circai de manigiai calincunu fueddu in prus de is chi ia a manigiai chi depessi abarrai innoi feti a si chistionai de bòcias, chi est una cosa chi mabi no fait de seguru, mescamente chi fadeus su contu ca is personas chi sciint chistionai su sardu funt sèmpiri prus pagus, po no chistionai de is personas, pagus meda, chi ddu sciint scriri e ddu scint ligi chentza de nci perdi sa conca. 

E totu su chi mi potzu augurai (e cun custu da serru po diaderus, a su mancu po oi, a su mancu po s'artìculu de custa cida) est chi su trabballu cosa mia potzat serbiri a calincuna cosa, potzat serbiri, duncas, a avitare chi su sardu sparessat po sèmpiri, chi est s'arriscu, de su restu, chi teneus, pendi-pendi (po manigiai unu fueddu chi apu sèmpiri intèndiu narai de sa bon'anima de mamma mia), apitzus de sa conca, chi cumprendeis su chi si megu a narai, e chi mi permiteis de manigiai custu fueddu, a trassa de poeta, prus ca de giornalista. 

E duncas, immoi chi nci seu arribbau a custu puntu de s'artìculu, deu creu ca sa cosa mellus chi potzu fai est cusssa de si contai unu pagheddeddu de novas (unu pagheddeddu feti! E megu a brullai, fadendi su contu ca nci nd'est in cantidadi manna, e mai ammanchint! E si promitu, giai de immoi, ca s'apa a prandi, cun totus is cosas chi tèngiu de si torrai a contai) chi nd'arribbant, deretas deretas (cumenti si iat a podi narai, e cumenti megu a narai, de su restu), de is ùrtimas partidas chi si funt giogadas custu domìnigu passau. 
E deu creu ca sa cosa mellus siat partiri cun is novas acapiadas a is scuadras sardas chi s'agatant in su campionau de sa Sèrie D e chi fiant circhendi de ndi cassai sa sarvesa, e megu a chistionai, duncas, de is de su Cos Sarrabus – Ollastra e de is de s'Ilvamaddalena. E duncas, is primus, chi funt stètius sighius, po cust'annu puru, de un allenadori forti e bravu cumenti est Frantziscu Loi, ant pèrdiu sa partida in domu de is de s'Atleticu Lodigiani, chi s'est giogada in Roma pròpriu custu domìnigu passau, cun su resultau de 1 a o, e duncas s'assòtziu ollastrinu ndi torrat a cabai in su campionau de s'Ecellenza, apustis de ses annus passaus in su campionau de sa Sèrie D (e tocat a narai, e ddu naru po totus cussus chi, mancai, no ddu sciint o no si ddu arregodant, ca po tres annus is de su Cos si tzerriant Muravera, est a narai, duncas, ca apustis de tres annus ant mudau su nomini de s'assòtziu, chi immoi, deu creu custu, at a abarrai Cos). 
Iat a fai a narai, puru, ca is de sa Costa Orientali Sarda – Sarrabus Ollastra (custu est su nomini cumpletu de sa scuadra) si funt agataus a bivi una stagioni fadiosa meda, e totu ghetada apari, e prena de arroris, chi arrannèsceis a cumprendi su chi megu a si narai. Is grogus-brau funt arrannèscius, peròu, a ndi cassai sa possibbilidadi de si giogai sa sarvesa me in s'ùrtima partida (cussa ca, a trassa de is ingresus, seus costumaus a tzerriai play-out), ma is de s'Atleticu Lodigiani ant bintu sa de tres partidas puru, apustis de essi bintu is duas isfidas chi si funt giogadas me is giorronadas de su campionau. 
Is de su Cos Sarrabus – Ollastra cust'annu funt partius peus de su chi pentzànt de fai, fadendi su contu (e a fai is contus acoitaus, e meda puru) ca funt arrannèscius a ndi cassai feti duus puntixeddus me is primus undixi bessidas (e si cumprendit: funt pagus). E custu bollit narai ca is de su Cos si funt agataus a annadai in acua lègias giai de su mesi de Donniasantu. Duncas, is dirigentis de s'assòtziu, a cussu puntu ant circau de donai un'aderetzada a is cosas (cumenti si narat, cun su fueddu chi nd'arribbat, deretu deretu, de su verbu aderetzai, e deu creu chi si cumprendat, ma a fai unu pagheddeddu de grammatica, puru, no si fait mabi de seguru, e po serrai apu fatu sa rima!) e ant donau is crais de sa scuadra a Sebastianu Pinna, e is cosas pariant che fessint andendi concas a su beni (chi mi permiteis de manigiai custus fueddus, a trassa de poeta), fadendi su contu ca cun Pinna sètziu in sa panchina, is de su Cos funt arrannèscius a ndi cassai calincuna cosa cumenti a cuatru partidas bintas totu de sighiu, est a narai, una avatu de s'atra. Me me is seti partidas chi is de sa Cos ant giogau apustis, is piciocus sighius de Sebastianu Pinna funt stètius bonus (est a narai ca funt arrannèscius) a ndi cassai otu puntus, ma me is oras ainnantis de sa partida contras a is de su Guidonia, is dirigentis de s'assòtziu ant decìdiu de nci bogai a Pinna (e bai e circa poita...) po donai is crais de sa scuadra a Antoniu Carta (ca fiat, de su restu, su vice allenadori de Frantziscu Loi, e duncas, eia, ant agatau s'alleandori nou in domu cosa insoru etotu, cumenti si iat a podi narai), ma apustis de una pariga de giorronadas, in sa scuadra est torrau Frantziscu Loi. 
E si iat a podi narai, a custu puntu de sa istoria, ca is de su Cos ddas ant provadas totus (cumenti si narat), ma calincunu iat a podi pentzai, puru, ca is dirigentis no teniànt pròpriu is bideas diaici craras, a su mancu po cust'annu, e a su mancu po su chi pertocat s'allenadori. 
Duncas, cun Loi torra in sa panchina, ndi funt arribbaus calincuna cosa cumenti a cuatru partidas bìntas, prus una partida chi s'est serrada cun su resultau in paridadi (e chi no si ddu arregodais, nci pentzu deu: su campu innoi is de sa Cos giogant is partidas in domu est su de Is Arranas de Tertenia); e po su chi pertocat is isfidas chi ant giogau in domu cosa insoru is cosas ddis funt andadas bastanti beni, sa pròpriu cosa, e mi dispraxit meda, no si podit narai po su chi pertocat is partidas in domu allena, fadendi su contu ca is de su Cos nd'ant cassau feti duus puntixeddus in cincu giorronadas. 
E duncas, eia, is de su Cos ant serrau sa stagioni (sa stagioni regulari, cumenti seus costumaus a tzerriai, a trassa de cumenti si narat in italianu etotu, is noi mesis de su campionau) cun trintatres puntus in buciaca, chi ddis ant donau sa possibbilidadi, duncas, de giogai s'ùrtima partita. 
Sa nova prus lègia chi nd'arribbat po su mundu de su càlciu sardu e chi, cust'annu, funt stètias tres is scuadras chi ndi funt cabadas de sa Sèrie D torra in Ecellenza, e custa cosa no at a fai prexei a is de su Tortolì e a is de su Sant'Aleni, ca pròpriu custu domìnigu chi at a benni s'ant a agatai, torra, is unus contras a is atrus, po si giogai s'ùrtima partida de s'annu (cussa ca, a trassa de is ingresus, tzerriaus play-off), po decìdiri cali de is duas scuadras s'at a agatai a su primu postu de sa lista de is assotzius chi ant a abertai de cumprendi chi nc'at a essi su tanti po essi piscaus torra in su campionau de s'Ecellenza po s'annu duamilla e binticincu – duamilla e bintises. 
E de cussu chi podeus cumprendi in dì de oi, duncas, fadendi su contu ca de sa Sèrie D nd'ant a cabai in Ecellenza tres scuadras (cumenti s'apu arremonau pròpriu immubagora), is cosas si faint meda ma meda dificilis po is de su Tortolì e po is de su Sant'Aleni, ca iant a podi abarrai arrescius (ddi nau diaici), in su campionau de sa Promotzioni. 

E duncas, sigu a si contai de sa segunda partida puru, chi ballit, sèmpiri (e si cumprendit beni, deu creu) po cussus chi tzerriaus play-out, de su campionau de sa Sèrie D: e megu a si chistionai, mescamente, de sa partida ca is de s'Ilvamaddalena ant giogau in domu de is de su Real Monterotondo, cun is latzialis chi funt arrannèscius a binci cun su resultau de tres a unu; e duncas po is piciocus sighius de Sandru Acciaro no c'est stètiu nudda de fai; in domu de s'Ilva, a narai sa beridadi, fiant pàrtius cun s'afròddiu a cucuru (chi mi permiteis de ddu narai diaici), apustis de essi bintu, a manus bàscias (cumenti si iat a podi narai, a trassa de cumenti si narat in italianu etotu), su campionau de s'Ecellenza po su chi pertocat s'annu sportivu de su duamilla e bintitres – duamilla e binticuatru; is de s'Ilva fiant stètius bonus a cuncodrai una rosa toga meda in su mercau in s'istadi, e sa bidea fiat cussa de si dda depi gherrai, est craru, po ndi cassai sa sarvesa, ma sa ispera fiat cussa de no depi sunfriri diaici meda. Cumenti invècias est sucèdiu, e in prus, custu est su dannu prus mannu, is sacrìficius no funt bastaus nemmancu. E immoi is de s'Ilva s'ant a agatai, torra, in su campionau de s'Ecellenza, ma in dì de oi (su dabori po sa partida pèrdia, in maba manera, contras a is de su Real Monterotondo est ancora friscu) no si sciit ancora (no si podit sciri, chi si praxit de prus cumenti sonat) chini at a essi s'allenadori chi s'at a agatai cun is crais de sa scuadra in busciaca; e bai e circa (in dì de oi no si podit sciri, si ddu naru torra) chi is de s'Ilva ant a sighiri a andai ainnantis cun Sandru Acciaro. E no si sciit ancora (e nci iat a mancai atru puru) cali ant a essi is giogadoris ca is maddaleninus ant a scerai, ant a tzerriai po cuncodrai sa rosa cosa insoru. 

Domìnigu passau, (e cun custa nova si lassaus a is pabas su mundu de sa Sèrie D, e si nd'arregodu, feti, ca impari a is de su Cos e a is de s'Ilva ndi funt torraus a cabai in su campionau de s'Ecellenza puru is de s'Atleticu de Uri) s'est giogada sa isfida, de importu mannu meda, tra is de su Muristeni e is de su Tèmpiu (e sa partida s'est giogada a Macumeri, e si ddu nau po essi prus pretzisu puru) tra is duas scuadras chi ant serrau sa stagioni regolari a su segundu postu (po is campidanesus) e a su de tres postus in sa lista (po su chi pertocat is cabonischeddus). 
E duncas, eia, sa isfida est stètia binta de is piciocus sighius de Angheleddu, cun su resultau de unu a zeru, gràtzias a su gol chi nd'at pesau Sarritzu, a su de bintiduus minudus de giogu in su segundu tempus. 
E immoi is de su Muristeni ant a depi sighiri a curri po ndi cassai s'artziada in su campionau de sa Sèrie D (e po su presidenti Marcu Carboni su prexu e s'afròddiu est mannu meda, e si cumprendit beni, fadendi su contu ca iat pigau sa scuadra a is tempus de sa Primu Categoria, e seus chistionendi de calincuna cosa cumenti a cuindixi annus fait, prus o mancu, e no parit berus, eia, de cumenti si nci bobat su tempus), e immoi si dda ant a depi biri contras a una scuadra de su Lazio (candu seu scriendi custas rigas, no si sciit ancora chi ant a essi is de su Civitavecchia o is de sa Maccarese). 
Si potzu narai, puru, ca sa partida tra is de su Muristeni e is de su Tèmpiu est bènida a essi spàssiosa meda, po su prexu de totu sa genti chi ddoi fiat a su campu po sighiri sa isfida, e is tifosus no fiant pagu, custu est seguru. 

E duncas, sigheus a andai ainnantis (sèmpiri chi seis de acòrdiu cun mei) cun is novas chi pertocant is ùrtimas partidas de su campionau de sa Promotzioni. Is de su Sant'Aleni de Cuartu ant dèpiu arriciri sa visita de is de su Tortolì e sa primu partida (sa segunda s'at a giogai pròpriu custu domìnigu chi nd'arribbat) s'est serrada cun su resultau siddau in paridadi, de unu a unu; is meris de domu (si ddu contu po essi su prus pretzisu, po cantu est possibbili) ant agatau su gol po primus, gràtzias a sa giogada de Rotaru, apustis de feti undixi minudus de giogui, ma a su de dexiotu minudus de giogu (sèmpiri in su primu tempus, est craru) is ollastrinus nd'ant cassau su gol chi at torrau a ponni totus is cosas in paridadi, gràtzias a sa giogada de Contu. Immoi po is duas scuadras nc'ant a essi de giogai is ùrtimus noranta minudus de sa stagioni, cun sa scuadra chi at a binci chi nd'at a cassai su primu postu in sa lista (cumenti s'apu giai arremonau) de is scuadras chi ant a abertai de cumprendi chi nc'at a essi su tanti po benni a essi piscadas torra po nd'artziai in su campionau de s'Ecellenza, ma is cosas parint dificilis, a su mancu in dì de oi, fadendi su contu (cumenti s'apu giai narau, de su restu, ainnantis in custu artìculu etotu) ca de sa Sèrie D nd'ant a cabai tres scuadras, e duncas is postus parint spàciaus, de su chi ndi podeus cumprendi in dì de oi. 
Ma no si podit mai sciri cumenti ant a andai is cosas e, mescamente, cumenti ddas ant a pesai is dotoris de sa Lega Natzionali de is Diletantis chi ant a sighiri is chistionis acapiadas a su campionau de s'annu chi at a benni (e seus chistionendi, est craru, de su campionau de su duamilla e binticincu – duamilla e bintises). 
«Su de binci is partidas de is play-off po su chi pertocat su campionau de sa Promotzioni no si donat sa seguresa de nd'artziai in Ecellenza; is regulas, a su mancu po cust'annu, funt custas e nosu nci podeus fai pagu e nudda – s'at scoviau s'alleandori de is cuartesus, Andrea Loi, chi apustis at sighiu a si contai -: est craru ca nosu eus a fai de totu po circai de binci sa partida in domu de is de su Tortolì, e immoi eus a biri cumenti ant a andai is cosas. De seguru nosu eus a fai de totu po arribbai a si giogai s'ùrtima partida de cust'annu me in sa manera mellus chi podeus, ma apustis eus a biri ita totu at a sucediri in campu». 

E sèmpiri po su chi pertocat su mundu de sa Promotzioni, e seu acabbendi su logu e mescamente su tempus chi tèngiu po ndi bogai aforas custu artìculu puru, pròpriu domìnigu passau si funt giogadas is duas partidas chi ballint po is play-out (chi est su fueddu ingresu chi manigiaus, nosu puru ca ingresus no seus, po chistionai de is ùrtimas partidas chi si giogant e chi ballint po ndi cassai sa sarvesa): po sa Lista A, duncas, si funt agatadas, s'una aranti de s'atra (cumenti si narat) po sa segunda borta in seti diis, is de s'Uda e is arthanesus de s'Idolo: e duncas, is arthanesus, sighius de Simoni Podda, fiant arrannèscius a binci sa partida de s'andada cun su resultau de unu a zeru, ma a sa torrada ant pèrdiu cun su resultau de duus a unu, e duncas, custu bollit narai ca is de s'Uda ant a giogai torra in su campionau de sa Promotzioni, po su chi pertocat sa stagioni de s'annu chi at a benni (chi su Cielu at a bolli custu beni po nosu, est craru), e invècias is de s'Idolo ant a depi torrai a partiri de sa Primu Categoria. 
Sa isfida, si naru custu puru immoi chi nci seu, s'est serrada cun su resultau de duus a unu po is meris de domu, ma is primus a nd'essi aciapau su gol (e manigiu unu fueddu, "aciapai", chi m'est sèmpiri praxu e chi apu sèmpiri intèndiu narai innoi in bidda, mescamente candu fia unu pipieddu piticu) a su de sexi minudus in su segundu tempus, gràtzias a sa giogada de Bottegal, ma is de s'Uda funt stètius bonus a si strantaxai (cumenti si iat a podi narai e cumenti mi praxit a narai, de su restu) gràtzias a is gol pesaus de Suella, a su de trintacincu minudus, e cun Ridolfi, a su de coranta minudus. E si ddu podeis immaginai a solus, deu creu, totu su prexu chi nd'ant tentu is de s'Uda, chi nd'ant cassau sa sarvesa apustis de una stagioni bella cantu fadiosa, cumenti si narat. 

E po su chi pertocat sa Lista B, invècias, (e cun custu acabbu, po oi puru) si potzu narai feti ca is de su Tonara ant bintu sa partida de sa torrada, in domu cosa insoru etotu e, duncas, aranti de is tifosus cosa insoru, contras a is de sa Lanteri, cun su resultau finali de duus a zeru, gràtzias a is duus gol chi nd'at pesau Nunez, a su de cincu minudus, in su segundu tempus, e a su de binticincu minudus, cun sa partida de s'andada chi si fiat serrada cun su resultau de unu a zeru po is tataresus.






Attività realizzata col contributo della Regione Sardegna. IMPRENTAS 2024-2025. LR 22/2018 art. 22