Ecellenza: is de sa Ferrini ndi arruint in domu de s'Ossese, ispantus mannus po is de su Muristeni

In dì de oi, a su mancu a su chi narat su calendariu (megu a brullai, ge si cumprendit...) seus arribbaus a sa de binticincu diis in su mesi de Gennàrgiu, ma (cumenti s'apu giai contau me is cidas passadas) mi parit de essi giai biviu binticincu milla diis po su chi pertocat su duamilla e binti-duus, custu po nai che su primu mesi de s'annu, no sciu beni su poita, mi parit diaici longu ca iat a podi no acabbai mai prus, e invecias, arriendi e brullendi, seu arribbau a scriri s'ùrtimu articulu po su chi pertocat, pròpriu, su mesi de Gennàrgiu, e duncas (mi ddu nau a solu a solu) ci dda eus giai fata, e apustis at a brintai Friargiu puru, cun totus is festas de su Carrasciali (mellus: su chi est abarrau de is festas acapiadas a su Carrasciali, poita innoi in Sardìnnia, cumenti scieus beni, po crupa de su Covid, cumenti est sucèdiu in medas atrus logus de su mundu e mescamente de s'Europa, est craru, is atobius tra cristianus e duncas is festas funt stètias sciusciadas e bai circa fintzas a candu eus a depi sighiri diaici), cun is tzippulas e is parafritus de papai, callentis callentis, e is pipius e is pipias in giru in sa bia cun is caroteddas (cussas de su Carrasciali, po essi crarus, e no cussas chi si manigiant e chi seus costumaus a tenni apitzus de sa buca e de su nasu a totu dì e giai a totu noti puru po crupa de s'influèntzia) e is bistireddus totu caboriaus. Parit chi seus chistionendi de unu tempus chi no esistit prus, poita cun custu chi nd'est brintau, pròpriu su dexiaseti de su mesi de Gennàrgiu (chi est sa dì de sa festa de Santu Antoni, chi, cumenti scieis mellus de mei, est cussa innoi si alluint, o mellus, si alluiànt, is foghironis giai in dònnia bidda de sa Sardìnnia) at a essi su segundu carnasciali de sighiu chentza isfiladas, chentza prexius, chentza giogus, chentza brullas, chenza arrisus ma, si ddu apa a arrepiti fintzas a candu tottu custu dannu mannu chi si nd'est pròtziu apitzus no at a essi acabbau, ndi podeis abarrai segurus, depeus sighiri a andai ainnantis cun coru forti e passièntzia manna. Custu, duncas, est su tanti de stròllichiminis ( a su mancu po oi) che nci pongiu sèmpiri me is articulus po is amigus de su Diario Sportivo, scritus in su sardu chi si fueddat in su Campidanu de mesu; duncas podeus andai a castiai calli funt is nobas chi nd'arribbant de su mundu de sa bòcia de is diletantis, cun is giogus chi funt torraus a partiri, apustis de is festas e pruschetotu apustis de is duas cidas chentza spàssiu e chentza partidas, chi funt serbidas po circai de cumbatti su spaniamentu de su Covid, cun medas scuadras chi tenint medas giogadoris, aintru de is rosas cosa insoru, apuntoraus.

E duncas, is giogus funt torraus a partiri, a su mancu (Deu gratzias, si narat in bidda mia...) po is de sa Sèrie D (chi eus a cracullai, si ddu promitu fintzas de oi, in s'articulu de sa cida chi at a benni) e is de s'Ecellenza; po totus is atrus, a partiri de is scuadras chi currint in su campionau de sa Promotzione e de sa Primu Categoria, nc'at a essi de abertai un'antra pariga de diis, est a nai fintzas a domìnigu chi benit, chi at a essi su trinta. A nai sa beridadi, domìnigu passau, est a nai su binti-tres, pariàt chi depessint torrai a cabai in campu puru ses scuadras de sa Promotzione, po ndi recuperai is tres partidas chi ndi funt sartadas, sèmpiri po crupa de su Covid, est craru, me is cidas passadas, ma a contus fatus, no si nd'est potziu fai nudda, poita is cosas funt ancora postas mabi meda, e duncas at a serbiri (du nau torra...chi malli pròpriu no fait, a su coru e pruschetotu a sa conca) unu pagheddu de passientzia. De su chi scieus immoi, duncas, is de sa Promotzione ant a torrai a cabai in campu domìnigu chi benit, e ancora no scieus candu s'ant a recuperai, po diaderus, is partidas chi nci funt ancora de giogai; po custu mengianu si potzu feti nai chi, sèmpiri chi totu andat beni, cras s'ant atobiai in campu, unu aranti de s'atru, is de su Monte Alma de Nujvi, chi si dd'ant a biri contras a is de su Santa Maria de Coghinas, chi at a balli po sa de trexi giorronada de sa Lista E. Po su chi pertocat sa Segunda Categoria, scieus chi is giogus ant a torrai a partiri in su primu domìnigu de su mesi de Friàrgiu (chi no biu s'ora chi ndi lompat, si ddu apu giai nau fortzis???), ma is partidas chi nci funt ancora de recuperai s'ant giogai, chi totu andat beni, est craru (e ddu torraus a repiti...), pròpriu domìnigu chi benit. Prus de abarrai a biri cumenti ant a andai is cosas, po immoi, diaderus, no podeus fai. Si nci podeus ghetai, peròu, apitzus de is nobas chi nd'arribbant de su mundu de s'Ecellenza, e po custa cida boleus chistionai (e arrexonai) pròpriu de su campionau de importu prus mannu chi teneus in Sardìnnia, e feti apustis, eus a chistionai de totus is atras scuadras sardas.

E duncas, is cosas po su chi pertocat sa segunda giorronada de is partidas chi ballint po sa torrada si funt postas mabi giai de is ùrtimas diis de sa cida passada: est a nai chi seus arribbaus a su sabudu e giai si sciiat chi, apitzus de noi partidas, cuatru no s'iant a essi giogadas: seus chistionendi de is batallas tra is de su Bosa e is de s'Ilvamaddalena, tra is de sa Nuorese de Nùgoro e is de su Taloro de Gavoi, tra is medio-campidanesus de sa Villacidrese de BiddaCidru e is de su Castiadas e, una pariga de oras ainnantis de su domìnigu, s'est aciunta puru sa partida tra is de su Gùspini e is de s'Idolo, sa scuadra de Arthana. Sa de dexianoi giorronadas si depiàt giogai, in unu primu tempus, sa dì de sa Befana, est a nai su ses de su mesi de Gennàrgiu, ma sa dì puru, pròpriu cumenti est sucèdiu domìnigu passau, nci fiant cuatru partidas chi nd'iant a essi sartadas. Immoi is de su Cumitau Regionali ant a depi agatai una dì bona po fai recuperai is partidas: scieus giai chi su noi de su mesi de Friàrgiu ant a cabai in campu is de su Castiadas, chi si d'ant a depi biri contras a is de su Bosa, e is de s'Ilvamaddalena, chi ant a depi giogai contras a is de s'Ossese. In custa dì, fortzis, s'iant a podi recuperai puru duas de is cuatru partidas chi funt sartadas, torra, s'atra dì. Nc'est de aciungi puru, po cumprendi totus is contus chi tocat a fai po ndi pesai is giorronadas, chi is de su Castiadas ant a depi giogai sa partida finali po sa Copa Italia, contras a is de s'Ossese, chi si depiàt giogai, in unu primu tempus, su bintises de su mesi de Gennàrgiu ma immoi est stètia posta po su sexi de su mesi de Friàrgiu. Is scuadras, duncas, funt circhendi de andai ainnantis cun is giogus mancai is strobus donaus de is giogadoris apuntoraus: is de su Castiadas, po nd'arremonai una, no funt potzius cabai in campu poita teniant tres piciocheddus cun s'influèntzia, una cosa, custa, chi at fatu inchietai, e meda puru, su presidenti de is de sa Villacidrese, Marrocu, poita is campidanesus chi boliant giogai mancai tenessint cuatru giogadoris de sa rosa cosa insoru acorraus in domu, sèmpiri, est craru, po crupa de su Covid. Duncas, spetat a su bonu coru (mellus: a su giudìsciu) de is allenadoris e mescamente de is presidentis, fai andai ainnantis is giorronadas, poita sighendi diaici no si sciri chi, e candu, su campionau s'at a podi acabbai, ma preferru lassai a perdi, a su mancu po oi, totu custa biga de pentzamentus lègius.

De seguru, su chi podeus fai immoi est andai a castiai cumenti funt andadas is cincus partidas chi si funt giogadas s'atra dì, est a nai su bintitres, de domìnigu. Su campionau de s'Ecellenza, duncas, s'est fatu abertai, e meda puru, cun is giogus chi funt torraus a partiri cuindixi diis prus a tradu de su chi depiant, a pustis de is festas. Sa partida de importu prus mannu fiat, est craru, cussa tra is casteddadius de sa Ferrini e is meris de domu de s'Ossese, cun is piciocus sighius de mister Sebastiano Pinna chi ndi boddint sa terza bussinada de sighiu, est a nai sa terza pardida perdia me is ùrtimas tres bessidas fatas. Su gol chi ballit po is tres puntus est stètiu fatu de Zinellu, chi giocat cumenti a difensori e est unu de is picciocheddus prus giòvunus chi nci funt in sa rosa dei biancus-nieddus, ma is allenus no funt abarraus de seguru a castiai giogai is atrus: mescamente in su primu tempus, is casteddaius ant fatu una partida bona e toga meda, cun Usai chi, po pagu, no at cassau su gol chi podiat balli po s'unu a zeru, ma su portieri Cherchi, de is meris de domu, at sarvau sa porta cosa sua. Apustis, torra Usai at scutu sa bòcia apitzus a su palu. De s'atra parti de su campu, est a nai in s'area de sa Ferrini, Sabino no arrannescit a binci sa batalla contras a Galasso, chi cassat sa bòcia scuta de su giogadori de domu. In su segundu tempus, sa partida abarrat oberta fintzas a is ùrtimus minudus de giogu, ma nci pentzat Zinellu, cumenti eus giai arremonau, a stampai sa porta de Galasso, apustis de sa grandu giogada de Dettori.
Faint festa is de s'Ilartzi puru, chi in domu cosa insoru bincint sa batalla contras a is allenus de s'Arbus, cun mister Falco chi no podit fai cabai in campu una biga manna de giogadoris, tra strupiaus e apuntoraus, ma sa scuadra cosa sua apoderat beni, a su mancu po is primus binti-binticincu minudus de giogu. Is meris de domu aciapant su gol gràtzias a su cropu de conca scutu de Atzei, a binti minudus de sa fini de su primu tempus. In su segundu tempus nci penzat Patteri, candu sa partida est arribbada a su de sessanta minudus, a agatai su segudu gol puru chi serrat totus is giogus.
Prexu mannu, e si cumprendit su poita castiendi is numerus pesaus me is ùrtimus mesis, po is de su Muristeni puru, chi in domu cosa insoru bincint sa partida contras a is strangius de su Poltu Ridundu, cun su resultau de tres a unu; po is piciocus sighius de Manunza est sa de cuatru partidas binta de sighiu. Su primu gol est stètiu fatu de Anedda; ma is de su Poltu Ridundu circant de ndi artziai sa conca, e in pressi puru, cun su tiru scutu de Ruzzittu, chi peròu pigat in prenu sa linna de sa traversa de sa porta de Zanda. Su Muristeni si lassat a is pabas s'atzìchidu e agatat puru su segundu gol cun Fangwa, chi peròu ndi benit sciusciau po "fuori gioco" (diaici si narat in italianu candu unu giogadori incumentzat s'atzioni partedi aranti de totus is atrus giogadoris aversarius). In su segundu tempus sa batalla abarrat oberta: Zanda serrat in faci sa porta a Mulas, chi scudit sa bòcia de unu metru, ma su portieri de is de domu ndi bogat a foras una giogada de campioni. Su Muristeni aciapat su segundu gol puru gràtzia a sa giogada de Ghiani, chi arrannescit a imbriagai totu sa difesa de is allenus e ndi benit crocau in mesu a s'area de un aversariu, cun s'arbitru chi no podit fai atru che donai su tiru de is undixi metrus a is campidanesus; nci pentzat, duncas, pròpriu Ghiani a scudi sa bòcia aintru de sa porta difendia de Melis. Is de su Poltu Ridundu iant a podi torrai a oberri sa chistioni de sa partida cun su tiru de is undixi metrus scutu de Varrucciu, e donau apustis de sa atzioni de Ruzzittu, chi ndi benit sciusciau a terra de un aversàriu, ma Zanda cassat sa bòcia. Nci pentzat Murgia a aciapai su gol de su duus a unu po is strangius, pròpriu me is ùrtimus minudus de giogu, ma Ghiani ponit a postu is cosas po su Muristeni cun su de tres gol de su domìnigu.
Is de su Budune puru sighint a curri a forti meda, cun sa partida binta contras a is Cuartesus de su Sant'Aleni chi ballit po sa de otu bincidas me is ùrtimas undixi bessidas: is allenus giogant cun Tirelli in porta, chi est unu piciocheddu nasciu feti in su duamilla e ses (tenit feti sexi annus, duncas), a su postu de Palumbo, chi no at potziu giogai poita est ancora mesu strupiau. Is meris de domu bobant sèmpiri prus in artu gràtzias a is duus gol pesaus de Villa, s'atacanti argentinu chi nd'est aproillau de is de su Castiadas. Is cuartesus in su segundu tempus circant in dònnia modu de torrai a oberri sa chistioni, ma andant a sbatiri contras a La Gorga, cun su portieri chi serrat sa porta cosa sua e no fait passai mancu unu filu de aria. Nci pentzat duncas Monteiro a cassai su de tres gol de sa partida.
De importu mannu, po tres puntus grais cumenti a s'oru chi ddoi fiant badda badda, sa partida tra is meris de domu de s'Asseminese e is allenus de su Li Punti, cun is duas scuadras chi funt currendi (e batallendi) po circai de abarrai, po s'annu chi benit puru, a giogai in su campionau de s'Ecellenza, e funt circhendi, duncas, de fai de totu po no ndi torrai a cabai in su campionau de sa Promotzione. Is tataresus ant bintu sa partida cun su resultau de tres a zeru, gràtzias a is gol fatus de Madeddu, apustis de su passagiu bellu meda pesau de Viale, e de Borrotzu, chi cun is suus coranta-tres annus est unu de is giogadoris de esperièntzia prus manna chi nci funt in dì de oi in Sardìnnia. Borrotzu at agatau su gol gràtzias a unu tiru scutu a totu coddu (diaici si narat in Bidd'e Sorris, a su mancu). Su de tres gol portat sa firma de Asara, candu sa partida fiat giai giai po acabbai. Immoi is piciocus sighius de Salis ant a depi binci puru contras a is de s'Arbus e de su Castiadas, chi bolint diaderus abarrai po un antru annu in su campionau prus mannu chi teneus in Sardìnnia.

Apustis de essi bius totus is resultaus de is cincu partidas chi si funt giogadas dominìnigu, podeus puru andai a castiai cumenti funt cuncodradas is cosas me in sa lista.
A su primu postu, cun coranta puntus, nci funt sèmpiri is casteddaius de sa Ferrini, chi in dexianoi bessidas ant acutu a cassai doxi bìncidas e cuatru partidas chi si funt serradas cun su resultau in paridadi; cun trintases puntus agataus is de s'Ilvamaddalena, sa scuadra de Sa Madalena, chi peròu depit ancora giogai duas partidas, cumenti eus arremonau ainnantis: cussa in domu contras a is de s'Ossese e cussa in domu de is de su Bosa. Is de Sa Madalena ant bintu po calincuna cosa cumenti a undixi bortas. Cun trintacincu puntus, est a nai unu in mancu de is chi tenint is de s'Ilva, agataus is de su Taloro de Gavoi, chi peròu depint ancora recuperai una partida, cussa contras a is nùgoresus de sa Nuorese, chi si depiat giogai su ses de su mesi de Gennàrgiu, ma nd'est sartada po is motivus chi totus connosceus, acapiaus a su Covid. Is arrubius-brau ant bintu, fintzas a immoi, est craru, dexi partidas apitzus de dexiotu bessidas. A su de cuatru postus in sa lista aciapaus is grogus-arrubius de su Ilartzi, chi tenint totus is dexianoi partidas giogadas e nd'ant bintu noi (seti funt cussas chi si funt serradas cun su resultau in paridadi); trintacuatru puntus e totus is dexianois partidas fatas po is de su Muristeni de mister Manunza, chi, ddu eus arremonau ainnantis puru, funt fadendi a biri ispantus mannus. Is de s'Ossese sighint cun trintaduus puntus e una partida ancora de giogai: me is primus dexiotu bessidas chi is piciocus de Loriga ant fatu, funt arrannèscius a ndi binci calincuna cosa cumenti a dexi, e feti duas si funt serradas cun su resultau in paridadi. Is de sa Nuorese tenint dexiotu partidas fatas (e duncas una feti de recuperai), cun noi bìncidas e cuatru partidas chi si funt serradas in paridadi, chi ballint po trintunu puntus in totu. A su de otu postus in sa lista agataus is campidanesus de sa Villacidrese de BiddaCidru, dexiotu partidas fatas (e duncas una de recuperai, cussa contras a is de su Castiadas, chi eus giai arremonau ainnantis, e chi si depiàt giogai pròpriu custu domìnigu passau) cun otu partidas bintas fintzas a immoi. Cun bintinoi puntus nci funt puru is cuartesus de su Sant'Aleni, chi ant acutu a giogai totus is partidas; bintotu funt invecias is puntus chi tenint allogaus in buciaca is de su Budune, chi ant bintu po otu bortas apitzus de dexianoi bessidas. Is de s'Arbus sighint cun bintitres puntus; bintiduus puntus invecias funt cussus chi tenint allogaus is de su Bosa, chi peroù ant sartau duas partidas, chi ispereus potzant recuperai chitzi meda. Me is postus prus bascius de sa lista agataus, intzandus, is de su Castiadas, dexiaseti puntus ma duas partidas ancora de giogai, is de s'Idolo, cun sexi puntus (ma una partida de giogai ancora); is de su Poltu Ridundu, cun cuindixi puntus (e totus is partidas fatas), is de su Gùspini, catodixi puntus ma una partida ancora de recuperai, fintzas a arribbai a is de s'Asseminese, chi tenint doxi puntus e totus is partidas giogadas, cumenti a is de su Li Punti de Tattari, chi tenint unu puntu prus pagu de is asseminesus, est a nai undixi puntus.
 

Attività realizzata col contributo della Regione Sardegna. IMPRENTAS 2021-2022. LR 22/2018 art. 22