Ecellenza, festa manna po is de s'Ossese: is biancus-nieddus bìncint su campionau e ndi cassant s'artziada in Sèrie D

E duncas, sigheus a curri concas a sa fini de su mesi de abrili puru, ca atra cosa, de su restu, no podeus fai: atacu diaici po s'artìcuu de custa cida, ma si scoviu, acoitu, ca mi intendu sa conca cumenti chi siat po mi sartai in aria, cumenti si iat a podi narai; mi intendu cumenti chi siat po mi ndi bessiri su fumu de is origas de unu segundu a s'atru, ca funt stètias diis fadiosas, e trumentosas meda, e mi tocat peròu a trabballai, est a narai a scriri apicigau a su tialu de su computer, a su mancu un antru pagheddeddu de oras, po oi puru, e ddu fatzu cun prexei, e mi parrit bastanti craru puru, ca no seu innoi po murrungiai; ma a narai sa beridadi, eia, nci funt diis chi abarrant prus drucis, e diis chi abarrant prus tostadas, unu pagheddeddu prus marigosas, chi si praxit de prus mancai diaici cumenti sonat, ma est una cosa chi depeus pigai in consideru: chi est berus chi sa cida passada apu acoitau, e meda puru, a mi ndi scabulli de totus is cosas chi depia fai po su chi pertocat su trabballu cosa mia, po custa cida invècias m'apa a depi arramangai is manigas, isperendi ca totu potzat andai beni: ca unu scritori, o unu giornalista, (chi est unu fueddu chi cratzat mellus puru po su chi mi pertocat, po su trabballu chi su Cielu m'at regalau), abarrat apicau, po fortza, a s'ispiratzioni, e unu scritori podit feti isperai (o pregai su Cielu, ballit aguali) chi is Musas (cumenti ddas tzerriant is antigus aregus) ddi potzant regalai s'ispiratzioni po s'artìculu de custa cida puru, e immoi eus a biri, de su restu, cumenti ant a andai is cosas e ita totu nd'apa bogai aforas. 
E chi is giogus si faint prus tostaus de su chi mi potzu abertai, est a narai: chi no mi depessint bessiri is fueddus giustus, is fueddus prus togus, po preni s'artìculu de custa cida, intzandus, chi biu mabas e no bonas (cumenti si megàt su babbu de un amigu miu chi tenia a is tempus de is scolas elementaris e medias), apa a atacai, e drabessi puru, a si contai totus is novas prus callentis (o firscas friscas, chi mancai speddiat de prus puru cun sa basca chi est fadendi in custas ùrtimas diis) chi nd'arribbant de su mundu de sa bòcia, de su mundu de su càlciu de is diletantis sardus. 
Est a narai, duncas, ca po cumenti est cuncodrada sa conca mia custu megama (e seu atachendi a scriri cust'artìculu candu seu arribbau a su mercuis, est a narai, a su bintiduus de su de cuatru mesis de s'annu), nc'est su tanti po si narai ca mi parrit mi parrit ca m'apa a strollicai meda ma meda prus pagu de su chi, mancai, mi benit de fai fatu fatu, e deu pentzu puru ca po bosatrus (e po bosatras) chi ligeis custas rigas, custus fueddus, su dannu at a benni a essi pagu meda. 
Ma iat a podi sucedi, puru, ca is fueddus e is cosas de si contai (e intzandus is strollichiminis, e is contus e is contixeddus chi tengu fatu fatu badda badda in conca, e chi eis lìgiu a su mancu unu de is artìculis chi nd'apu bogau aforas in custus ùrtimus duus annus, po is Novas de su Diàriu Sportivu, intzandus scieis, deu creu de podi narai custu, cumenti funtzionant is cosas) mi incumintzint a arribbai in conca in s'interis chi megu a scriri s'artìculu etotu; cumenti sucedit cun s'apetitu: ddu connosceis cussu dìciu chi narat ca, chi tui no tenis apetitu, mancai ti podit movi sa gana de papai pròpriu candu ses papendi? 
E sa pròpriu cosa iat a podi balli po mei e po su trabballu de scritori chi mi tocat a sighiri: mancai immoi mi parrit totu de tenni sa conca sbuida, ma sa luxi, cumenti si narat, si ndi iat a podi allui de unu segundu a s'atru. Chi est cussu chi mi auguru, de su restu. 

E duncas, eia, po incumentzai mi tocat a fai su contu (mi tocat narau in su sensu ca est sa cosa chi fatzu sèmpiri, ainnantis de atacai a chistionai de partidas e de resultaus; e ddu fatzu sèmpiri a trassa de unu ritu, cumenti chi fessit unu ritu, po ddu narai mellus puru, e duncas eia, est po custu chi apu scritu: mi tocat, cumenti chi fessit un obbrigu) de su tempus chi est passendi, e duncas, de su tretu chi eus fatu fintzas a immoi, po su chi pertocat custu duamilla e bintises, e po fai is contus de su chi s'at a abertai me is cidas chi ant a benni (o, po ddu narai mellus, po fai su contu de sa cidixedda chi s'ammancat po serrai is contus cun su mesi de abrili puru, fadendi su contu ca in dì de oi ammancat feti otu diis e apustis nd'at a brintai, deretu deretu, su mesi de maju. E candu fatzu su contu, impari a bosatrus, de su tempus chi megat a passai, intzandus eia, mi parrit diaderus chi su tempus po cust'annu puru siat bobendusì). 

E parteus, pròpriu, de is contus chi podeus fai apitzus de is campionaus chi sigheus cun su giàssu (o po su giàssu, ballit aguali) de su Diàriu Sportivu. E duncas, eia, candu fadeus su contu de su tempus chi est passau (chi est giai passau, po ddu narai diaici puru) intzandus si depu narai, mi parit bastanti craru, ca, 'tendei 'tendei (cumenti si megàt sa bon'anima de mamma mia), custu domìnigu chi nd'at a arribbai (e chi at a essi su bintises) s'ant a giogai is ùrtimas partidas (e duncas, eia, eis cumprendiu beni, is ùrtimus noranta minudus de sa stagioni) e po su chi pertocat su duamilla e binticincu e sa primu parti de su duamilla e bintises, is giogus ant a essi, cumenti si narat, bellus ca fatus, bellus ca spaciaus. 

E boleis scumiti (cumenti si narat, chi cumprendeis su chi seu circhendi de si contai) ca sa conca mi increscit diaici meda poita seu arribbendi a sa fini (giai giai arribendi a sa fini, chi pròpriu depu manigiai is fueddus pretzisus) de sa stagioni, e duncas, mancai, mi intendu unu pagheddeddu fadiau? 
Ca su de depi scriri totu custu muntoni de rigas, dònnia dònnia cida, po noi mesis de sighiu, a sa fini pigat a conca: su trabballu cosa mia, e gràtzias a su Cielu, no at a essi fadiosu po su chi pertocat su cropus (pentzu a totus is massajus chi mancai nci funt innoi in bidda mia etotu, chi est Bidd'e Sorris, in su Campidanu de mesu, e chi abarrant a totu dì fuiaus in su sartu, siat candu nc'est basca e siat candu proit e fait frius, e cussu si chi est unu trabballu fadiosu meda), ma podeis abarrai segurus de su fatu ca su de depi abarrai sètziu aranti de su tialu de su schermu de su tialu de computer, mi cancarat (e meda puru) siat is ogus e siat sa conca. 

E in custu perìodu, intzandus, nc'est de chistionai de totus is scuadras chi funt arrannèscias a ndi cassai sa bìncida de su campionau, cun totus is intervistas chi ndi depeus pesai, cun is ciaciarradas chi fadeus duncas, cun is allenadoris. E po incumentzai a chistionai de bòcias puru, po custa cida si potzu narai ca teneus su nomini de sa scuadra, de sa primu scuadra, po ddu narai mellus, chi at serrau sa cursa po ndi cassai su primu postu de sa lista in totu su mundu de sa Primu Categoria, e megu a chistionai de is de su Macumer, in sa Lista C (mancai, peròu, is scuadras chi currint me is cuatru listas chi pertocant sa Primu Categoria tengant ancora tres giorronadas de giogai, e duncas, eia, is scuadras de sa Primu Categoria ant a essi is ùrtimas a serrai cun sa stagioni regolari, cumenti seus costumaus a dda tzerriai); ma po su chi pertocat su mundu de sa Segunda Categoria puru, ndi funt arribbendi giai is primus nominis de is scuadras chi ant serrau totus is giogus po su chi pertocat sa bìncida finali (cumenti si iat a podi tzerriai, a trassa de cumenti si narat in italianu etotu): e duncas, custa cida est tocau, est spetau a is nugoresus de su Santu Predu a fai sa festa, apustis chi nd'ant cassau is ùrtimus puntixeddus chi ddis ammancànt, gràtzias a sa bìncida, toga meda, chi nd'ant pesau in sa partida contras a is de s'Orane, e chi s'est serrada cun su resultau de noi a unu po is meris de domu. 

E duncas, eia, in custu fini de cida chi est arribendindi no nc'at a essi feti sa festa po su binticincu de abrili (chi nd'at a arrui de sabudu), ma s'ant a giogai is ùrtimus noranta minudus po su chi pertocat is campionaus de s'Ecellenza, de sa Promotzioni, e de sa Segunda Categoria puru, cumenti s'apu giai arremonau de su restu. 

E po su chi pertocat su tempus chi est fadendi, est incumintzendi a fai una bella basca, chi est berus ca oi nci fiant, a su megama a su mancu, calincuna cosa cumenti a binticuatru-binticincu gradus, ca no benint a essi pagus: e sa brulla (custa cosa dda tengu badda badda in conca de una bella pariga de cidas) iat a podi essi ca, eia, ndi studaus is tialus de conditzionadoris (e megu a chistionai de cussas machinas chi manigiaus po callentai s'aria, o po dda sfridai, ballit aguali) po s'aria callenti cumenti acabat s'ierru, e ddus atacaus acoitu po fai friscura cumenti ndi brintat su beranu; est a narai, duncas, ca cussus tialus de conditzionadoris abarrant atacaus a totu annu, cun cussu chi custu pertocat po sa tialu de s'energia chi manigiaus po bivi in custu mundu macu meda e totu ghetau a pari. 
Ca sighint a narai (e megu a chistionai de is grandus dotoris chi faint is contus de su tanti de energia chi manigiaus e, mescamente, faint is contus de su tanti de energia chi s'abarrat, ancora, de manigiai) ca s'energia iat a podi no bastai po totus (fadendi su contu ca seus giai giai po benni a essi otu miliardus e prus de cristianus in custu mundu, in custu pianeta), e iat a podi no bastai po sèmpiri. E bai e circa ita nd'at a essi de nosu, mi megu a solu a solu.

Ma deu a sa fini ia a depi pentzai feti a is chistionis acapiadas a su mundu de sa bòcia, e no de seguru a cussa chi tzerriaus "crisi energetica", ma apustis mi arrepitu fatu fatu ca no est ca feti poita sigu is campionaus de bocia de is diletantis, intzandus mi depu tupai is ogus, is origas (e sa buca) e no pentzai, no arremonai totus is problemas chi, mancai, ndi bessint aforas; e chi no funt problemas, o dannus, o arroris, eia, nci iant a podi essi cosas bellas, e togas, de torrai a contai, mancai no nd'arribbint de is campus innoi si giogant is partidas de càlciu. 

E fia narendusì, po torrai a nosu, ca est incumintzendi a fai basca, e sa cosa si fait intendi, e ballit, mescamente, po is giogadoris de bòcia, ca incumentzant a essi stracus (cumenti mi intendu stracu deu). 
E duncas, eia, sa cosa ballit po mei e po is giogadoris puru: tocat a aguantai, a su mancu un antru pagheddeddu, e apustis, sèmpiri chi su Cielu at a bolli custu beni po mei, po nosu, nd'at a arribbai puru su momentu innoi s'eus a podi pasiai, a su mancu po unu pagheddeddu. 

E duncas, chi seis de acòrdiu cun mei, deu ia a incumentzai a si chistionai de cumenti funt andadas is cosas me in su campionau de s'Ecellenza, cun is de s'Ossese chi funt arrannèscius (custa, est craru, est stètia una de is novas de importu prus mannu chi ndi funt bessidas aforas in custas diis) a ndi cassai sa bìncida finali e, duncas, s'artziada in su campionau de sa Sèrie D, chi est una de is cosas prus togas chi nci podint essi po una scuadra de bòcia, e megu a chistionai, est craru, de sa possibbilidadi de podi giogai cun is scuadras de is atras regionis de Italia puru, e no feti contras a is scuadras sardas, chi mi sigheis po su chi seu circhendi de si narai. 
E candu ses unu giogadori, mancai piticheddu de edadi, intzandus una de is cosas prus togas, e si cumprendit, benint a essi is trasfertas, po manigiai unu fueddu chi seus costumaus a manigiai in italianu etotu. 

Ma torraus a nosu, e a is de s'Ossese, ca funt arrannèscius a ndi cassai sa bìncida de su campionau de s'Ecellenza apustis de annus e annus de sighiu innoi nci ant provau, in totus is modus, si iat a podi narai diaici puru, ma chentza de nc'arrannesci. 
Ma cumenti si narat, chi tui ndi bolis cassai unu bisu, intzandus sa cosa mellus chi podis fai est cussa de sighiri a nci provai, fintzas a candu no nc'arrannescis. 
E duncas, eia, sa istoria de is de s'Ossese iat a podi balli po sa vida cosa nosta de dònnia dì: iast a podi fadiai, iast a podi depi trumentai, e meda prus de su chi mancai t'abertas, de su chi mancai ti imaginas, po arrannèsci a ndi cassai su chi bisas, ma a sa fini, chi arrannèscis a nci crei, mancai puru candu is cosas ti andant mabi, intzandus totus is isfortzus chi fais, totu su trabballu, totu su sudori chi ndi bogas aforas, iant a podi donai is frutus, is resultaus chi ses abertendi mancai de dexi annus. 
Ca sa vida (e su giogu de sa bòcia puru) est una chistioni de passientzia e de fortza (mescamente sa chi tzerriaus volontadi, o fortza de volontadi, chi arrannèsceis a mi sighiri po su chi seu circhendi de si narai). 

E duncas, de sa istoria de s'Ossese teneus unu muntoni de cosas de imparai, chi mi permiteis de cuncodrai sa cosa diaici. Est a narai ca de sa istoria chi pertocat una scuadra de bòcia de diletantis, estus a podi pigai una surra (una cantidadi manna meda, si cumprendit ca su fueddu ddu apu manigiau in custu sentidu) de letzionis chi podint balli, e meda puru, po sa vida cosa nosta. 

E duncas, eia, megamu a si narai, a si contai ca is de s'Ossese funt a su mancu de dexi annus chi funt circhendi de ndi cassai sa bìncida de su campionau: e dònnia annu parrit chi siat sa stagioni giusta, est a narai ca is dirigentis arrannèscint a ndi pesai una rosa forti, cun una biga de giogadoris de esperièntzia, ma apustis, e si cumprendit, s'ùrtimu fueddu spetat a su campu: e no sèmpiri, in campu, bincit sa scuadra prus forti, cun is giogadoris prus togus e prus bravus, mescamente poita su càlciu est unu giogu (bella iscoberta chi as fatu, s'at a megai calincunu de bosatrus, berus est?), e duncas, cumenti a totus is giogus, tocat a fai su contu ca is cosas ti podint andai beni meda (est a narai, duncas, ca iast a podi benni a essi basau de sa bona sorti, de sa fortuna), ma ti iant a podi andai mabi, ma mabi cumenti nemmancu t'abertàst (candu un'annada, una stagioni andat a trota, de su restu, nc'est pagu de fai. Antzis, s'ùnica cosa chi podis fai candu is cosas benint a essi unu disisperu, est cussa de tenni passièntzia e circai de sumportai. E sa cosa ballit unu pagheddeddu po totus: po is massajus chi trabballant in su sartu candu su tempus est malu, o candu fait sicagna e no proit mancu a ddu pregai; ballit po is piciocheddus chi andant a iscola, e ballit, duncas, unu pagheddeddu po totus. Ca nci funt annus prus bonus de is atrus, su suci de sa chistioni benit a essi pròpriu custu). 

E duncas, is de s'Ossese, me is ùrtimus annus, ant serrau sèmpiri is giogus me is primus postus de sa lista, e in custus ùrtimus annus ddis est capitau, puru, de tenni sa possibbilidadi de giogai is partidas finalis (cussas chi tzerriaus, a trassa de is ingresus etotu, play-off) contras a is scuadras chi nd'arribbant a su segundu postu me is campionaus de s'Ecellenza chi ndi pesant me is atras regionis de s'Italia etotu, ma a sa fini, a contus fatus, no nci dda iant mai fata. Cust'annu invècias, sa musica est stètia unu pagheddu diversa, a su mancu po su chi pertocat is biancus-nieddus de is de s'Ossese, mancai is cosas, a s'incumintzu de sa stagioni, fadessint pentzai a un'antru campionau tostau e marigosu, chi mi permiteis de manigiai custus fueddus e chi si cumprendit su chi si bollu narai. E iat a bastai a fai duus contus po cumprendi ita seu circhendi de si narai: is cosas, mescamente me is primus giorronadas, no ddis funt andadas beni, cun tres puntus chi ndi funt arribbaus me is primus tres bessidas, cun is tres partidas chi si funt serradas cun su resultau siddau in paridadi, partendi duncas de sa isfida contras a is de s'Ilva de Sa Maddalena (chi est sa scuadra chi est arrannèscia a ndi cassai su segundu postu de sa lista, e chi immoi, eia, at a depi giogai is partidas finalis po circai de ndi cassai s'artziada in su campionau de sa Sèrie D), passendi de is partidas chi is de s'Ossese ant giogau contras a is de s'Igresias, e apustis, passendi de sa partida chi ant giogau contras a is de s'Atleticu de Uri (custas duas partidas chi s'apu arremonau immubagora si funt serradas, totu e duas, cun su resultau siddau in su zeru a zeru, chi mi permiteis de cuncodrai sa chistioni cun custus fueddus); e duncas, eia, si potzu narai, po incumentzai, ca sa primu isfida chi is de s'Ossese funt arrannèscius a binci est stètia sa de cuatru partidas, chi ant giogau, in domu cosa insoru, contras a is de su Tortolì, candu su campionau fiat incumentzau giai giai de unu mesi. 
E apustis de sa primu bìncida, ndi funt arribbaus atrus duus puntixeddus (feti atrus duus puntixeddus, diaici si cumprendit mellus puru, deu creu), me is duas partidas chi ant giogau contras a is de su Taloro de Gavoi e contras a is de su Tèmpiu. 
In prus, sa stagioni parriat, torra, trota meda, chi pentzaus, chi fadeus su contu ca is biancus-nieddus nd'ant sciusciau s'acapiu chi teniant cun s'allenadori chi at incumentzau su campionau (e megu a chistionai de Giacomu Demartis) e intzandus, cumenti capitat de su restu fatu fatu a is scuadras de bòcia, ant scerau de donai is crais me is manus de Carlu Cotroneo (po circai de ndi scidai sa scuadra, ddi naru diaici), chi a sa fini est cussu chi nd'at cassau sa fita prus druci de sa truta, est bastanti craru, fadendi su contu ca est tocau, est spetau a issu a fai sa festa. 

Ma sa cosa de importu prus mannu, po su chi pertocat is de s'Ossese, est ca, mancai sa stagioni paressit trota meda (cun cincus puntus in mancu de is primus de sa lista, apustis de is primus cincu giorronadas chi ant giogau), funt arrannèscius a ndi cassai is tres puntus de importu prus mannu in totu su campionau (cussus chi funt bàllius, a sa fini, pròpriu po ndi cassai sa seguresa de sa bìncida finali) in sa partida chi ant giogau, in domu cosa insoru etotu, contras a is de sa Ferrini de Casteddu, e custa cosa est sucedia pròpriu custu domìnigu passau. 
E si podeis immaginai, beni meda, deu creu, totu su prexu chi nd'ant tentu is giogadoris, po incumentzai (ca cumenti s'apu arremonau ainnantis, in custu artìculu etotu, a sa fini funt cussus chi ndi cabant in campu po curri avatu de sa bòcia, e po curri avatu de is aversàrius puru), is de sa sociedadi (ca funt trabballendi po ndi cassai custu resultau de calincuna cosa cumenti a dexi annus, e no funt pagus, e nci bollit coru forti, e gana bella de andai ainnantis puru candu is acuas si faint lègias), e fintzas a arribbai a is tifosus (e seus chistionendi de una bidda chi fait calincuna cosa cumenti a cincu milla animas), ca si funt agataus cun su coru prenu fintzas a cucuru de afròddiu. Ma is tres puntus chi is de s'Ossese nd'ant cassau in sa partida chi ant giogau contras a is casteddaius de sa Ferrini no iant a essi bastaus po serrai is giogus po sa cursa po su primu postu de sa lista, chi is de s'Ilva de Sa Maddalena no fessint arrutus in domu de is de su Crabonaxa, fadendi su contu, mescamente, ca is segundus de sa lista nd'arribbànt cun cuatru partidas bintas a is pabas, e duncas, eia, su giogu de sa bòcia sighit a essi diaici togu (su giogu prus togu de su mundu, si narat innoi in Italia, ma no feti innoi in Italia) poita no podis mai sciri cumenti ant a andai is cosas. 

E duncas, po si fai a cumprendi cantu est stètia toga sa stagioni chi nd'ant pesau is biancus-nieddus, mancai a s'incumintzu de su campionau no arrannèscessint a binci, si potzu narai feti ca, po immoi, funt s'ùnica scuadra in sa lista de s'Ecellenza, chi no at pèrdiu ancora nemmancu una partida, e immoi eus a biri cumenti ddis ant a andai is cosas me in sa isfida chi ant a depi giogai custu domìnigu, in domu de is de su Calanzanos. 

E si cumprendit, su de arrannèsci a no nd'arrui nemmancu po una borta benit a essi una cosa dificili meda, fadendi su contu ca in totu sa istoria de su campionau de s'Ecellenza, feti is de sa Nuorese funt arrannèscius, a su mancu fintzas a immoi, a no perdi nemmancu una partida, in sa stagioni de su duamilla e binticuatru – duamilla e binticincu. 
E duncas, eia, fia narendusì ca su prexu mannu est no feti po is giogadoris e po s'allenadori, ma est puru po is dirigentis, partendi de su presidenti, ca a sa fini funt cussus chi depint fai is sacrìficius prus mannus, e si cumprendit, no feti po su chi pertocat su dinai chi nc'est de ponni po ndi pesai una scuadra de bòcia, una rosa chi potzat curri, e binci, in unu campionau dificili cumenti est cussu de s'Ecellenza. E su prus prexau de totus, si iat a podi narai custu puru, benit a essi, pròpriu, su presidenti de s'assòtziu, Carlu Mentasti, ca est stètiu su prus barrosu de totus, ddi naru diaici, fadendi su contu ca no s'est mai arrèndiu, mancai puru candu is cosas no andant beni, o candu su bisu de ndi artziai de categoria si ndi sciusciada, ddi naru diaici, pròpriu a s'ùrtimu. 
In su duamilla e bintunu – duamilla e bintiduus, po si fai un esèmpiu, is de s'Ossese iant serrau sa stagioni, difatis, cun unu puntu in mancu de is chi fiant arrannèscius a ndi cassai, pròpriu (parrit una brulla, e invècias is cosas funt andadas pròpriu diaici), is de s'Ilva de Sa Maddalena (setantatres puntus contras a setantaduus), cun is de s'Ossese ca cuss'annu iant donau is crais de sa scuadra cosa insoru a un allenadori giòvuneddu, ma giai bravu meda, cumenti est Giampieru Loriga. 

In su duamilla e bintitres – duamilla e binticuatru, invècias (e seus chistionendi duncas, est craru, de su campionau chi s'est giogau una pariga de annus fait feti), is de s'Ossese iant pèrdiu sa batalla contras a is de su Terni, cun is allenus chi ndi iant cassau su gol pròpriu a tres minudus de sa fini de sa partida. 
E si cumprendit, candu is cosas ti andant mabi, intzandus ti passat sa gana, mancai, de sighiri a andai ainnantis: ballit po una scuadra de bòcia, ballit po unu trabballu ma ballit, est craru, po totus is fainas chi depeus fai e sighiri, e chi ndi depeus pesai in custa vida chi, a bortas, mi parrit totu machillota. E duncas, eia, si iat a podi narai puru, immoi chi nci seus, ca su presienti de s'assòtziu, Carlu Mentasti, est stètiu su prus barrosu de totus (e chistionu de barrosia in su sentidu bonu de su fueddu; est a narai ca sa barrosia benit a essi sa gana chi tui tenis de sighiri a andai ainnantis puru candu is cosas ti andant mabi. E fortzis custa est sa genia de barrosia prus toga, prus bona chi nci podit essi. Sa capacidadi, s'abbilidadi, sa fortza de no s'arrendi puru candu ti parrit ca su mundu ti ndi potzat arrui apitzus de unu segundu a s'atru). 
E duncas, eia, sa bìncida chi is de s'Ossese nd'ant cassau cust'annu tenit unu tastu druci meda chi fadeus su contu ca is biancus-nieddus si funt agataus a su de otu postus in sa lista, cun calincuna cosa cumenti a ses puntus in mancu de cussus chi teniant is primus de sa lista (e ses puntus in mancu no funt pagus de seguru de recuperai, mescamente candu is scuadras chi tenis aranti in sa lista currint a forti meda e parrit ca no ndi depant arrui mai); e pròpriu in cussu momentu, intzandus, is dirigentis de s'assòtziu, partendi pròpriu de su presidenti, ant pentzau ca sa cosa mellus chi si podessit fai fessit cussa de cambiai s'allenadori; e duncas, eia, sa scumissa chi ant fatu, de donai is crais de sa scuadra a Carlu Cotroneo est stètia toga e bona meda, e is resultaus, immoi, funt asuta de is ogus de totus. 

E si iat a podi narai, puru, ca Carlu Cotroneo no est de seguru unu de is ùrtimus arribbaus (e chistionaus po su chi pertocat is allenadoris), fadendi su contu ca duus annus fait fiat arrannèsciu a binci su campionau cun is de s'Ilva de Sa Maddalena, torra, nemmancu po ddu fai aposta, cumenti si narat). 
Su problema prus mannu chi teniant is de s'Ossese, intzandus, fiat pròpriu ca serrant su prus de is partidas cun su resultau siddau in paridadi, e si cumprendit, chi tui bolis binci unu campionau depis incasciai sa cantidadi prus manna de puntus; ma fait a narai, puru, ca is de s'Ossese funt stètius bonus, cumenti s'apu giai arremonau, de su restu, a no nd'arrui nemmancu po una borta. 
Ma torraus a nosu. A sa fini de sa lista de partidas de s'andada, duncas, is de s'Ossese s'agatant a su de ses postus in sa lista, cun binticincu puntus allogaus in buciaca, chi ndi fiant arribbaus gràtzias a dexi partidas chi ant serrau in paridadi e a cincu partidas bintas feti. Is scuadras chi s'agatànt me is primus postus de sa lista, peròu, totu in una borta ant incumentzau a curri prus abellu de su chi, mancai, fiant fadendi in sa primu parti de sa stagioni, e in prus is de s'Ossese ant pentzau beni de circai de refortzai (o rinfortzai, chi si praxit de prus mancai diaici po cumenti sonat su fueddu. Diaici fadeus puru unu pagheddeddu de grammatica, ca mabi no si fait de seguru) sa rosa cosa insoru, sighendi is consillus chi ndi funt arribbaus de s'allenadori (e cumenti s'arrapitu fatu fatu, chini mellus de un allenadori podit sciri cumenti andant is cosas in sa scuadra cosa sua, in sa scuadrqa chi sighit?); e duncas in sa fentana de su mercau de s'ierru (dda tzerriaus diaici, fadendi su contu ca su mercau de is giogadoris abarrat obertu po is tres mesis de s'istadi, est craru, innoi is scuadras ndi pesant is rosas po sa stagioni noba, ma si torrat a oberri puru me is primus diis de su mesi de idas, po donai sa possibbilidadi a is scuadras de arrangiai is cosas chi, mancai, no andant beni, cumenti est sucèdiu, de su restu, pròpriu a is de s'Ossese). 
E duncas ndi funt torraus a domu (ddi naraus diaici, fadendi su contu ca medas giogadoris de cussus chi ndi funt arribbaus a metadi de sa stagioni, a metadi de su campionau, iant giai tentu s'ocasioni de giogai cun sa camisedda biancu-niedda in pitzus) piciocus de importu mannu meda cumenti a Marcos Mainardi, unu giogadori argentinu, impari a un antru giogadori sud-americanu chi est Facundo Maitini, chi at torrau a agatai, in atacu, un antru giogadori forti meda, e seus chistionendi de Tapparello (e siat Maitini e siat Tapparello iant tentu sa possibbilidadi de giogai, impari, in s'Ilva de Sa Maddalena pròpriu s'annu candu s'allenadori fiat Cotroneo. E duncas, eia, Cotroneo sciiat beni meda totu su de bonu ca custus duus giogadoris podiant regalai a sa scuadra cosa insoru). Po su centrucampu, invècias, is de s'Ossese ant fatu sa scumissa, ddi naru diaici, de pigai a Bruno Teliz; po sa difesa, invècias, nd'est arribbau unu giogadori de esperièntzia manna cumenti a Lucas Rodrigues, chi at giogau a su costau cun Diego Di Pietro, unu de is giogadoris prus fortis chi is de s'Ossese iant pigau giai in sa fentana de su mercau in istadi. 

In s'annu nou, duncas (e megu a chistionai de su duamilla e bintises) is de s'Ossese ant incumentzau a binci una biga de partidas (chi fiat, de su restu, pròpriu sa cosa chi no arrannèsciant a fai me in sa primu parti de sa stagioni), e po si cumprendi mellus a pari, si potzu narai ca funt stètius bonus a binci calincuna cosa cumenti a undixi partidas, e nd'ant serrau in paridadi feti cuatru. E duncas, fadendi su contu ca fiant currendi diaici a forti, est craru ca siant arribbaus a ndi cassai, puru, su primu postu de sa lista: e sa cosa est sucèdia apustis de sa de bintiduus giorronadas, cun is biancu-nieddus chi fiant arrannèscius a binci cun su resultau, togu meda e tundu-tundu, de tres a zeru contras a is de su Sant'Aleni; is de s'Ilva de Sa Maddalena, invècias, in s'interis, fiant arrannèscius a ndi cassai is tres puntus gràtzias a su tres a zeru scutu in faci a is de sa Nuorese, ca s'agatànt a su segundu postu de sa lista, cun coranta puntus in totu, ca fiant feti duus in mancu de is chi teniant, intzandus, is de s'Ossese etotu. 
Cussa cassada contras a is de su Sant'Aleni est stètia sa de tres bìncidas de sighiu in unu de is momentus, ddi naru diaici, de importu prus mannu de sa stagioni: fait a narai, duncas, ca is giogus si funt decìdius pròpriu in cussas giorronadas. De sa dì, duncas, is de s'Ossese no ndi funt prus cabaus de su primu postu de sa lista, chi cumprendeis su chi seu circhendi de si narai. E s'ùrtima partida de importu mannu chi is de s'Ossese ant giogau est stètia cussa in domu de is de sa Nuorese, chi at permìtiu, tra is atras cosas, de mantenni unu puntixeddu in prus de is chi teniant is de s'Ilva de Sa Maddalena. 

E duncas, is biancus-nieddus ant a podi giogai, po sa primu borta in totu sa istoria cosa insoru, in su campionau de sa Sèrie D, gràtzias, puru, a is giogadas pesadas de giogadoris de importu mannu cumenti a Mattia Gueli, Ricardu Fancellu, Paolu Arca, Alessandro Sechi, chi est stètiu su capitanu, e chi at giogau cun is de s'Ossese in totus custus ùrtimus cuindixi annus, fintzas de is tempus de sa Segunda Categoria (e torra: no parrit nemmancu berus, a bortas, de cumenti si ndi bobat su tempus). 

Ma tocat a arremonai puru, immoi chi nci seus, is tifosus, chi ant fatu sèmpiri fortza a is giogadoris in campu: e si cumprendit, candu ddoi funt una biga de personas chi tzerriant po tui, intzandus ti benit de curri prus a forti, e megu a chistionai, mi parrit bastanti craru, de is giogadoris chi, a sa fini, ndi cabant in campu. E no est sa primu borta, de su restu, ca intendeus un allenadori chi narat ca is tifosus benint a essi su de doxi ominis in campu. E is tifosus de s'Ossese, chi si faint tzerriai "Staffete", ant tentu un importu mannu meda in sa bìncida de sa scuadra cosa insoru etotu. 

E custa, duncas, est sa lega de importu po su chi pertocat su campionau de s'Ecellenza, chi benit a essi tra is prus sighius, e si cumprendit beni, poita est su prus mannu tra totus cussus chi si giogant in Sardìnnia. 

E duncas, immoi chi seu arribbau a custu puntu de sa chistioni, no m'abarrat atru de fai ca si contai (acudu feti si ddu arremonai, peròu) de sa batalla po ndi cassai sa possibbilidadi de giogai is partidas finalis, e de sa batalla po no ndi cabai de categoria, e duncas, po ndi cassai sa sarvesa, cumenti si iat a podi narai (e cumenti seu narendusì, de su restu). 

Is de s'Ilva de Sa Maddalena funt giai segurus de depi giogai sa partida finali, tra is scuadras sardas, contras a cussa chi at a binci tra is de sa Nuorese e is de su Tèmpiu, chi funt duas tra is scuadras prus fortis de sa lista, e chi fiant partidas, a su mancu a s'incumintzu de sa stagioni sa bidea fiat cussa, po ndi cassai su primu postu e duncas sa bìncida de su campionau, ma no nci funt arrannèscius. 
Is de sa Ferrini de Casteddu, invècias, apustis de essi pèrdiu, cumenti s'apu giai contau, sa partida contras a is de s'Ossese, ndi cabant torra in su campionau de sa Promotzioni, apustis de calincuna cosa cumenti a undixi annus fatus, de sighiu, in su mundu de s'Ecellenza; e is casteddaius (si potzu narai custu puru, immoi chi nci seu) ndi cabant impari a is de su Sant'Aleni. 
Nc'at a essi de cumprendi, immoi, cali at a essi sa de tres scuadras chi nd'at a depi cabai in su campionau de sa Promotzioni, e, mescamente, sa cosa s'at a cumprendi apustis de sa partida finali, cussa ca is ingresus tzerriant play-out: chi is cosas depessint abarrai cumenti funt cuncodradas in dì de oi (candu ammancat, peròu, ancora noranta minudus de giogai po serrai sa stagioni regolari, cumenti s'apu narau a s'icnumitzu etotu de custu artìculu), is de s'Uddusò si dda iant a depi biri contras a is de su Santa Teresa. Ma is de su Tortolì, chi ant bintu sa isfida de importu mannu meda, in s'ùrtima bessida, pròpriu contras a is de su Uddusò, tenint unu puntixeddu in prus de cussus chi tenint is de su Santa Teresa: is ollastrinus peròu custu domìnigu chi at a benni ant a depi giogai, in domu cosa insoru, contras a is de su Tèmpiu. Is de su Crabonaxa puru no funt ancora segurus de nd'essi cassau sa sarvesa e, mescamente, no funt ancora segurus de no depi giogai sa partida finali po abarrai in su campionau de s'Ecellenza, e in s'ùrtima partida si dda ant a depi biri contras a is meris de domu de s'Igrèsias. 
Totu beni, invècias, po is de su Lanusè, ca pròpriu domìnigu passau, in sa partida chi ant giogau contras a is de s'Igresias, funt arrannèscius a ndi cassai su puntixeddu chi ddis ammancàt po incumentzai a fai sa festa po sa sarvesa.



Attività realizzata col contributo della Regione Sardegna. IMPRENTAS 2025-2026. LR 22/2018 art. 22