Giogus torra obertus po sa cursa a su primu postu in sa Lista B de su campionau de sa Promotzioni

E duncas, atacu a scriri custas rigas su giòbia (in su calendàriu ddoi est scritu ca oi est su doxi de su mesi de Idas, e deu no potzu fai atru ca nci crei, e megu a brullai, si cumprendit berus est?), mancai s'artìculu chi ndi seu pesendi (chi seu incumintzendi a pesai, po ddu narai mellus puru) in dì de oi at a bessiri a pillui (cumenti si narat innoi in Bidd'e Sorris, a su mancu, in su Campidanu de mesu, e cumenti apu sèmpiri intèndiu narai, tra is atrus, e is atras, de sa bon'anima de mamma mia) feti sa cida chi at a benni. 

E duncas, sigu a andai ainnantis pighendi po bonu su dìciu chi naràt ca "chini tenit su tempus po fai una cosa no iat a depi abertai a s'incras po dda fai". 
E diaderus, fadendi su contu ca in custus ùrtimus mesis apu arremonau custu dìciu fatu fatu meda, mi parit de podi narai ca est bèniu a essi su modu mellus chi tèngiu, chi apu agatau, po sighiri su trabballu cosa mia. 

E duncas, si ia a podi narai, puru, po incumentzai (fadendi su contu ca tèngiu una biga manna de logu de preni cun is fueddus cosa mia, po custa cida puru), ca mi intendu beni (e torru gràtzias a su Cielu po tenni sa gana bona de podi sighiri is fainas chi mi pertocant) e seu trabballendi beni, est a nai ca arrannèsciu a limpiai sa conca (ddi naru diaici) de totus is cosas chi no nci brintant nudda cun su trabballu cosa mia e duncas cun is artìculus chi ndi depu pesai po is amigus de su Diàriu Sportivu. 
E candu tèngiu sa conca sboida de totus is tontesas chi no serbint, e chi custu mundu parit, giai giai, chi mi ddas scudit a pitzus a dònnia ora de sa dì e a dònnia ora de su noti, sèmpiri chi cumprendeis su chi si bollu narai. Est a nai ca mi parit mi parit, a bortas, ca custu mundu ndi boghit aforas una cantidadi manna de tontesas, e de porcherias, e nosu ominis, ma sa chistioni ballit po is femineddas puru, est craru, ddas sigheus puru, de cantu seus scimproteddus, a bortas, diaici mi parit, a su mancu, de podi imboddiai sa chistioni, e manigiu custus fueddus po giogai unu pagheddeddu a fai su poeta, e no feti su giornalista, est craru. 
Intzandus su resultau, su guadàngiu chi ndi tèngiu, a abarrai cuncentrau (cumenti si iat a podi narai, pighendi po bonu su chi apu lìgiu pròpriu immubagora in su fueddariu pesau de Rubattu), est cussu de acoitai, e meda puru, cun su trabballu cosa mia. Chi invècias abarru a perdi su tempus (su tempus chi nemmancu tèngiu, si iat a podi narai diaici puru) avatu a cussu tialu de Facebook, po nd'arremonai unu, intzandus po fai unu trabballu chi mi ndi iat a pigai tres oras, nci pongiu ses oras. E custa cosa de tenni sa conca lìmpia, ballit, tra is atras cosas, po is partidas de bòcia, e duncas, est una letzioni, dda tzerriu diaici, chi torrat bona, chi benit a essi bona puru po is giogadoris: candu ndi cabas in campu, custu est su chi domandant is allenadoris a is piciocus cosa insoru, a su mancu, de su chi mi contant issus etotu, iast a depi circai de pentzai feti a sa partida, feti a su chi ses fadendi; e invècias, mescamente candu sbàllias, est poita, mancai, "ses pentzendi a cras", cumenti si megat babbu miu. 

E duncas, torrendi a nosu, e a su chi si fia narendisì ainnantis, segumenti apu fatu unu trabballu bonu, e apu acoitau (prus de su chi podia bisai, a si narai sa beridadi) a acabbai totu su chi depia fai po custa cida, duncas potzu incumentzai a pentzai a is fainas po sa cida chi at a benni, fadendi su contu, de su restu, ca a is portas (cumenti si iat a podi narai, furendindi sa trassa de cumenti si narat in italianu etotu) ddoi est giai un antru fini de cida, e no mi parit berus, si ddu naru diaderus, de cumenti si nci bobat su tempus a bortas, de cumenti mi parit chi su tempus si ndi bobit, po ddu narai mellus puru. 

E duncas, seus po lompi a sa metadi de su mesi de Idas, e fintzas a oi si podit narai, puru, ca is cosas funt andendi beni, mancai ndi siat arribbendi su frius, su frischetu, chi si praxit de prus cumenti sonat, ma nci iat a mancai atru puru: s'ùrtima parti de s'atonzu est sa prus frida, ma apustis, cumenti ndi brintat s'ierru, is temperaduras s'ant a fai unu pagheddeddu prus drucis, a su mancu custu est cussu chi sucedit giai giai dònnia annu, e tra is atras cosas, est cussu chi narant (cussu chi funt incumintzendi a narai, mellus puru) is grandus dotoris chi sighint is fainas chi pertocant su tempus, e duncas, is chi, a sa fini, ndi pesant cussas chi, a trassa de s'italianu, estus a podi tzerriai "previsionis de su tempus". E duncas, in custu fini de cida passau, su tempus mau nd'at fatu sartai puru una pariga de partidas, mescamente me is biddas chi s'agatant in zona de montagna: is de su Fonne, po nd'arremonai una, no funt arrannèscius a ndi cabai in campu, o po ddu narai mellus puru, no ant tentu sa possibbilidadi de giogai sa partida, in domu cosa insoru etotu, contras a is de sa Sanverese, po crupa de totu sa nì chi nd'est cabada de su Cielu su fini de cida passau (e seu chistionendi de cussu de s'otu de su mesi de Idas, mi parit craru). 

E custu, duncas, po si chistionai unu pagheddeddu (cumenti seu costumau a fai dònnia dònnia dònnia cida, a s'incumentzu de s'artìculu chi pesu in su sardu chi si chistionat in su Campidanu de mesu, e gei ddu eis a sciri, a su mancu chi eis lìgiu unu pagheddeddu de is rigas chi seu boghendindi aforas cust'annu) de su tempus chi est fadendi. E pigu sa cosa cumenti chi fessit unu ritu. 
E de su restu, chistionaus de su tempus, e si praxit a chistionai de su tempus, poita est de su tempus ca dipendit sa vida cosa nosta e, ddi naru diaici, fintzas s'umori. Po su chi mi pertocat, candu abarru diis e diis de sighiu chentza de biri su sobi, intzandus mi benit sa tristura, cumenti si iat a podi narai; e po bona sorti cosa mia, po fortuna, mi megu a solu a solu, ca bivu (ca tèngiu sa possibbilidadi, po ddu narai mellus puru, de podi bivi) in un'isula chi s'agatat in mesu in mesu a su mari Mediterraneu, fadendi su contu ca in Sardìnnia po noi-dexi mesis a s'annu su tempus est bonu e is temperaduras funt sèmpiri bellas artas, chi cumprendeis su chi seu circhendi de si narai; ma de su restu, e ddu apu cumprendiu beni, deu no seu fatu, no ia mai a arrannèsci a abarrai a titirigai (cumenti si megàt sa bon'anima de mamma mia, e custu fueddu, chi ndi lompit de "titia", chi est su modu chi teneus po murrungiai candu teneus frius, m'est sèmpiri praxu meda meda meda) in una citadi de su nord de su continenti (cumenti iant a podi essi Milano, o Torino, po nd'arremonai duas), mancai po totu su dinai de su mundu. 

E duncas, preferru, mancai, a essi unu pagheddeddu prus poburu (chistionu mescamente de su dinai chi incasciu, chi arrannèsciu a incasciai cun su trabballu cosa mia, si cumprendit, berus est?) de is chi, mancai, bivint, e trabballant, me is grandus citadis de su nord de s'Italia, ma, mancai, cun su coru allirgu po su de podi biri su cielu, su sobi, sa luna; e po su de podi bivi in unu logu innoi sa temperadura no ndi cabat giai giai mai asuta de is zeru gradus, a su mancu innoi in Campidanu, est craru. E duncas, si domandu giai iscusa chi si ndi seu furendi su tempus chi mancai no teneis, ma custu de abarrai a ciaciarrai unu pagheddeddu cun bosatrus ainnantis de mi nci ghetai, a fundu 'e susu, me is chistionis chi pertocant su mundu de sa bòcia de is diletantis, m'agiudat siat a no m'arrosci prus de su tanti chi iat a serbiri. Eia, si potzu narai ca no est facili, po sa conchitedda mia, su de depi abarrai a arrexonai apitzus, feti, e si naru feti, de is resultaus de is partidas chi si giogant, in totu s'isula, dònnia fini de cida, po noi mesis de sighiu, po is campionaus chi ndi pesant is de sa Federatzioni Italiana de su Giogu de su Càlciu, impari a is de sa Lega Natzionali de is Diletantis. 
Eia, megamu a si narai, duncas, ca a bortas, su de depi chistionai sèmpiri de sa pròpriu cosa (est a nai de gol, de partidas bintas o de partidas pèrdias) mi pigat unu pagheddeddu a dabori de conca (chi cumprendeis su chi si bollu narai), e sa cosa ballit, mescamente, po is artìculus chi ndi pesu in italianu. Po is artìculus chi ndi pesu in sardu, invècias, no potzu mai sciri, ainnantis de mi ponni a ddu fai, cali lega (cali legas, mellus puru) apa a sighiri. Ma chi abarru innoi a ciaciarrai cun bosatrus, mancai feti de su tempus chi passat, o de su tempus chi megat a fai, mi donat sa possibbilidadi (bella cumenti s'oru, cumenti si iat a podi narai) de manigiai una pariga de fueddus in prus de is chi ia a usai po si torrai a contai, feti (e naru: feti) is resultaus de is partidas e is storias acapiadas a is giogadoris de is scuadras de bòcia de diletantis chi s'agatant in dì de oi in Sardìnnia. 
E chi pròpriu si depu narai sa beridadi (cumenti seu fadendu, de su restu), lunis passau (est a nai su noi de su mesi de Idas) is de sa Regioni (chi a sa fini funt cussus chi ant ofiu, chi nd'ant pesau su progetu chi si tzerriat IMPRENTAS, e chi pertocat, duncas, sa lingua sarda e is artìculus chi ndi bessint a pillu me is giornalis chi s'agatant in internet, tra is atras cosas) nd'ant pesau un atobiu, una cunferèntzia oberta, cumenti dda ant tzerriada issus etotu, po fai is contus apitzus de su stadu de saludi (ddi naru diaici, gioghendi, torra, a fai unu pagheddeddu su poeta prus ca su giornalista) de sa lingua sarda. 
E duncas, una de is cosas chi ndi funt bessidas aforas (chi ndi funt bessidas a pillu, chi si praxit de prus diaici cumenti sonat), tra totus cussas chi ant narau is dotoris chi ant chistionau a sa cunferèntzia, est ca tocat a circai de fai de totu po torrai a fai chistionai su sardu a is personas chi bivint in cust'isula; e iat a tocai a circai de ammanniai, po ddu narai diaici, sa cantidadi de personas, su numeru de personas chi chistionant, o chi ligint, su sardu. E duncas, seghendi sa cosa a crutzu, po no si fai perdi tropu tempus, sa ispera mia, candu ndi pesu custus artìculus (e mescamente candu abarru innoi a mi strollicai cun bosatrus) est cussa de ndi cassai s'atentzioni, puru, de totus cussas personas (e pentzu, mancai, a is femineddas prus ca a is ominis, ca gei si sciit, de su restu, ca su giogu de sa bòcia est una faina chi sighint, po su prus, is maschiteddus, mancai nci siat prus de una picioca chi bessit aforas de conca, cumenti si narat, po su càlciu, a trassa de is maschiteddus etotu) chi no funt acapiadas a strintu cun is fainas chi pertocant is scuadras sardas. 

E duncas, est po custu chi, mancai, abarru innoi a mi strollicai unu pagheddeddu cun bosatrus; ma apustis chi acabbu, apustis chi mi lìmpiu unu pagheddeddu sa conca de totus is cosas chi ddoi tèngiu badda badda, intzandus su chi fatzu est de si chistionai, puru, de bòcias. Chi est cussu, de su restu, chi apa a fai oi puru. 
Ma ainnantis de atacai, si domandu feti una cosa: cuncodraus si seis po su Nadali? 
Cuncodrada dda eis sa mata? 
Pesau ddu eis su presepiu? 
E cun is regalus cumenti seis postus? 

E de su restu, diaici mi praxit a pentzai, a su mancu, ca candu nd'arribbat su mesi de Idas sa cosa de importu prus manna chi teneus in conca, e sa cosa ballit po is giòvunus, est craru, ma puru po is prus matucus, funt is festas acapiadas a su Nadali. 
E giai giai nci seus po cust'annu puru, mi megu a solu a solu. 

E immoi chi nci seu, andaus a fai is contus de su chi at a sucedi po su chi pertocat is campionaus de bòcia: e duncas, apustis de is partidas chi si funt giogadas su cuindixi, nc'at a essi feti un'antra giorronada, sa de su bintiduus de su mesi de Idas, chi est s'ùrtima de su duamilla e binticuatru, e s'ùrtima, est craru puru, ainnantis de su Nadali. Apustis de is partidas chi s'ant a giogai su bintiduus, duncas, is giogadoris, e is allenadoris puru, s'ant a podi pigai unu pagheddeddu de pàsiu, e a torrai in campu at a essi feti in s'annu nou, est a nai, in su duamilla e binticincu, a partiri de su cincu de su mesi de Gennàrgiu, eia, sa dì ainnantis de sa Befana. 

E custas duas cidas de pàsiu ant a balli po totus is scuadras, a partiri, duncas, de cussas chi currint in su campionau de s'Ecellenza (chi est su prus matucheddu, cussu de importu prus mannu tra cussus chi sigheus cun su giàssu de su Diàriu Sportivu, e de su restu benit a essi su prus mannu tra totus cussus chi si giogant in s'isula), passendi po su campionau de sa Promotzioni e de sa Primu Categoria, e fintzas a arribbai a is scuadras chi currint in su campionau de sa Segunda Categoria, ca, a s'imbressi de su chi fia sucèdiu s'annu passau, ant a fai festa, e pàsiu, pruschetotu, a sa moda de is atras scuadras (fadendi su contu, chi si ddu arregodais, e chi no si ddu arregodais deu seu innoi pròpriu po custu puru, ca s'annu passau, est a nai in sa stagioni de su duamilla e bintitres – duamilla e binticuatru, is scuadras de sa Segunda Categoria ndi fiant cabadas in campu puru s'ùrtimu fini de cida de su mesi de Idas, chi s'annu passau, chi no mi megu a sballiai, fiat su trinta). 

E duncas, torrendi a nosu, e a su chi mi pertocat mescamente po su contu de is artìculus in sardu chi nd'ant a bessiri me is cidas chi ant a benni (e po su progetu de su duamilla e binticuatru seus giai giai po arribbai a s'acabbu), ndi depu pesai feti un'antra pariga, partendi de su chi seu scriendi immoi, e chi at a bessiri a pillu (cumenti s'apu giai arremonau, de su restu), su dexennoi, e po sa chistioni chi apu pigau ainnantis, a s'incumentzu de custu artìculu etotu, depu incumentzai a pentzai, a fai su contu, duncas, ca s'ùrtimu giòbia de s'annu at a essi su de su bintises, chi est sa dì de Santu Stefi, cumenti dda tzerriaus, sighendi su chi narat, chi contat sa cresia. 
E duncas, chi no bollu abarrai totu sa dì de Santu Stefi a cracai is butoneddus de sa tialu de tastiera po ndi pesai s'artìculu in sardu, intzandus, fortzis fortzis, iat a essi mellus chi mi dongiu de fai fintzas de oi (mancai a su bintises ammanchint ancora duas cidas), diaici, mancai, apa a tenni sa possibbilidadi de mi pasiai deu puru, impari a totus is atrus. 

E apa a depi fai su contu, puru, ca su primu giòbia de s'annu (e chi at a essi sa dì, duncas, innoi nd'apa a depi bogai aforas su primu artìculu po su chi pertocat su duamilla e binticincu) at a essi su duus de su mesi de Gennàrgiu, e duncas, chi seu diaderus un omini futu, cumenti mi praxit a pentzai dònnia dònnia tanti, ia a depi circai de fai su trabballu chi mi pertocat, mancai, una pariga de diis ainnantis, ainanntis chi nd'arribbit s'ora, si iat a podi narai diaici. E custu, est craru, chi bollu circai de avitai de abarrai apicau, arresciu cun is fainas chi pertocant su trabballu miu sa dì de Nadali (o sa dì avatu, ballit aguali) o sa primu dì de s'annu. Chi est una cosa chi ia a podi fai puru (e ddu ia a fai, mancai, cun prexei, ca su de tenni unu trabballu, unu trabballeddu, po ddu narai mellus, chi mi permitit de podi bivi in custu mundu macu e totu ghetau a pari, mi parit unu de is regalus prus mannus chi m'at fatu su Cielu in custus corant'annus, e prus, de vida), e mi iat a fai prexei puru a ddu fai (est a nai ca no ndi ia a fai un arrori diaici mannu), fadendi su contu ca seu costumau a trabballai, fintzas sa dì de sa metadi de Augustu. Ma po sa dì de Nadali, e po sa primu dì de s'annu, mancai, mi iat a praxi a mi gosai totu su bonu chi custa vida m'arregalat, mancai, atesu de su tialu de computer, po ddu narai a sa moda de is ingresus, chi est sa tiualu de machina chi manigiu po trabballai. 


E duncas, apustis de s'essi fatu sa conca a acua (cumenti si megàt sa bon'anima de mamma mia, e si depu scoviai, puru, ca custu modu de narai m'est sèmpiri praxu meda meda meda), deu creu chi podeus incumentzai, puru, (e fiat ora, s'at a megai calincunu de bosatrus), a chistionai unu pagheddeddu de bòcias, de partidas, de resultaus e, mancai, de totus cussas scuadras chi funt fadendi is ispantus prus mannus. 
E duncas, me is ùrtimas duas-tres cidas (chi no megu a mi sbàlliai, ma mi parit pròpriou de no mi sbàlliai po nudda, chi mi permiteis de fai custu giogu de fueddus, cumenti si narat a trassa de s'italianu etotu) mi seu cuncentrau (cumenti si narat, furendindi su fueddu de s'italianu etotu) apitzus de is storias de is allenadoris, ca funt is chi intendeus fatu fatu po ndi pesai is ciaciarradas, e duncas is intervistas, chi apustis bessint a pillu in su giàssu de su Diariu Sportivu. 
E duncas, si contu custa cosa puru, diaici cumprendeis cumenti andat, cumenti funtzionat (po ddu narai mellus puru) su trabballu cosa mia: e duncas, intendeus is allenadoris, dònnia dònnia cida, poita funt cussus, est craru, ca sciint, mellus de totus, cumenti andant is cosas me is scuadas chi sighint (chi cumprendeis su chi si bollu narai); s'allenadori, duncas, est cussu chi sciit cumenti staint is giogadoris, est cussu chi podit cumprendi, prus de totus is atrus, chi sa scuadra est arrannescendi a ndi bogai totu su mellus chi podit (po ddu narai diaici, e isperu chi si cumprendat su chi tèngiu in conca) o chi nci funt strobbus e dannus de aderetzai. 
E po torrai a sa chistioni chi apu pigau in consideru pròpriu sa cida passada, tocat a narai puru ca in su mundu de is diletantis (ma deu creu chi si potzat narai, chi potzat balli sa pròpriu cosa puru po su mundu de is giogadoris professioneris, e mi parit craru puru) est prenu fintzas a cucuru (po ddu narai diaici) de personas chi funt iscaramanticus, cumenti si iat a podi narai e cumenti si narat, de su restu. 
E bosatrus no nc'eis a crei, ma prus de una borta (si iat a podi narai: po unu bellu tanti de bortas) m'est sucèdiu chi un allenadori timat a chistionai cun mei, e duncas cun unu giornalista, po sa paura chi s'intervista potzat portai maba sorti; e bai e circa ita totu si passat, si currit in sa conca cosa de bosatrus, ca po pagu sciu ita totu tèngiu deu in conca. 
E deu, de su restu, no potzu fai atru ca rispetai totus cussas personas chi, mancai, timint a fai un'intervista, e chi pentzant, mancai, ca apustis de s'intervista sa scuadra cosa insoru potzat perdi totus is partidas. Eia, ddu sciu chi parit una cosa aforas de conca, una cosa de macus, cumenti si narat, ma a sa fini no funt pagus is allenadoris (po no chistionai de is giogadoris) chi creint e chi sighint sa scaramanzia. 
Ma apustis, nci funt personas, puru, ca a custas cosas nemmancu nci pentzant. E duncas, torru a m'acapiai a su chi m'est sucèdiu una pariga de cidas fait, candu apu circau de intendi a su telefunu a Oscar Kevin Foddai, unu piciocu giòvunu, chi giogat in atacu po sa scuadra de su Bonorva, e chi est fadendu ispantus mannus, a cropus de gol, cumenti si iat a podi narai. E duncas, candu ddu apu intèndiu, sa primu borta, po circai de ndi pesai sa ciaciarrada, m'at scoviau (est stètiu onestu, custu tocat a ddu narai) ca no si dda intendiat, poita s'ùrtima borta chi iat chistionau cun unu giornalista (e de seguru su giornalista no fia deu...) is cosas ddi funt andadas mabi meda; e duncas, de una stagioni de oru, chi fiat fadendi, s'est agatau a bivi una stagioni prena de arroris. E duncas, Foddai m'at ispiegau ca issu preferrit, e meda puru, a si nd'abarrai citiu, e a fai chistionai is gol. E de gol Foddai, chi est nàsciu du tres de su mesi de Friàrgiu de su duamilla, e chi in dì de oi, a fai is contus nci poneus pagu meda, tenit calincuna cosa cumenti a binticuatru annus, nd'at giai pesau tres; e duus funt stètius de importu mannu (grais cumenti a s'oru, si iat a podi narai diaici, a trassa de cumenti si narat in italianu etotu), fadendi su contu chi funt serbius po ndi cassai is tres puntus chi ddoi fiant, badda badda in su pratu, in sa isfida contras a is primus de sa classi de is de su Uddusò. 
E duncas, Foddai m'at scoviau, puru, chi iat a preferri, mancai, a chistionai a sa fini de sa stagioni, ma no immoi, e custu, si ddu torru a arrapiti, feti po una chistioni chi pertocat sa iscaramanzia. E duncas si iat a podi narai ca sa iscaramanzia no est una cosa chi pertocat feti is bècius, cumenti podeis cumprendi a solus, fadendi su contu ca, cumenti s'apu narau pròpriu immubagora, Foddai est unu piciocheddu de binticuatru annus, ma a sa fini potzu essi de acòrdiu cun issu (mancai su trabballu cosa mia siat, tra is atras cosas, su de intendi, e de ndi pesai is intervistas, cun is giogadoris e is allenadoris). E duncas, apustis chi apu serrau su telefunu e acabbau sa telefonada cun Foddai (chi, nd'aprofitu, ddu saludu meda meda meda e ddi torru gràtzias, comentecasiat, po s'onestadi chi at tentu cun mei, po s'onestadi chi m'at regalau), mi seu dèpiu ponni a circai calincunu, in domu de is de su Bonorva etotu, ca tenessit sa gana, ma pruschetotu su coràgiu, cumenti si iat a podi narai e cumenti m'est bèniu de narai, de chistionai cun mei unu pagheddeddu de bòcias e de resultaus. E duncas, po contu de is de su Bonorva, su chi at acetau de chistionai cun mei est stètiu Pablo Gutierrez, chi est unu giogadori chi ndi lompit de s'Argentina e chi giogat innoi in s'isula, innoi in Sardìnnia giai de una bella pariga de annus. E duncas, fadendi su contu ca Gutierrez est nàsciu, est a nai ca est arribbau in custu mundu (cumenti si iat a podi narai, gioghendi a fai su poeta) su catodixi de su mesi de Abrili de su milli e noicentus otantaduus, e duncas est unu de is giogadoris prus matucheddus chi ddoi funt in dì de oi in sa rosa de su Bonorva, e chi tenit a is pabas, si cumprendit, s'esperièntiza prus manna tra totus is cumpàngius cosa sua, est tocau a issu a chistionai cun mei. E sa primu cosa chi m'at narau, e m'at fatu arriri meda meda, chi pròpriu si depu narai sa beridadi, chi pròpriu si ddu depu scoviai, est ca essendi giai matucu, giai bèciu, no timit prus a sa iscaramantzia. Cumenti chi sa iscaramantzia fessit una cosa chi ballit feti po is giòvunus, e no, duncas, po is bècius. 

E duncas, cun Gutierrez nd'eus pesau sa ciaciarrada apustis ca is de su Bonorva funt arrannèscius a binci sa partida, de importu mannu meda, chi ant giogau in domu cosa insoru etotu, contras a is primus de sa classi de su Uddusò (chi eus arremonau ainnantis puru). Custa duncas est stètia una de is partidas de importu prus mannu chi si funt giogadas in sa de catodixi giorronadas, a su mancu po su chi pertocat sa Lista B de su campionau de sa Promotzioni. E sa partida fiat de importu mannu po una biga de motivus: po primu cosa, po si ddu narai acoitu, is de su Uddusò, me is primus trexi partidas, no iant mai pèrdiu nemmancu una borta; e duncas, su tres a duus chi ant dèpiu inguti, chi nc'ant dèpiu cabai, a s'acabbu de sa partida contras a su Bonorva, est bàlliu po sa primu partida pèrdia de s'annu, a su mancu po su chi pertocat su campionau. E is de su Bonorva, duncas, funt arrannèscius a torrai a oberri is giogus po su chi pertocat sa cursa concas a su primu postu de sa lista e, duncas, concas a sa bìncida de su campionau e a su sàrtidu, cumenti si narat, in su campionau de s'Ecellenza. E duncas, immoi chi nci seus (e sèmpiri chi seis de acòrdiu cun mei, e ddu seu narendi po brullai, est craru, ma mi fait prexei, custa cosa de giogai, giai giai, a si domandai su permissu), apustis de m'essi strollicau prus de su tanti chi, mancai, mi pertocàt, podeus andai a castiai, impari, ita totu nd'est bèssiu aforas in sa ciaciarrada chi eus fatu cun Gutierrez. 

«Sa partida chi eus dèpiu giogai contras a is de su Uddusò – m'at scoviau Gutierrez – fiat, custu est pagu ma seguru, una de cussas de importu prus mannu chi si funt giogadas in sa de catodixi giorronadas, ma no feti po nosu, ma po totus is atras scuadras chi funt currendi po circai de ndi cassai su primu postu de sa lista. Nosu, de su restu, sciestus, e beni puru – custu est su chi at sighiu a mi contai Gutierrez – ca depestus giogai, e isfidai una de is scuadras prus fortis chi ddoi funt cust'annu in totu su mundu de sa Promotzioni, e mescamente po su chi pertocat sa Lista B. Deu seu seguru ca is de su Uddusò ant a abarrai in artu, est a nai me is primus positzionis, fintzas a sa fini de sa stagioni e s'ant a giogai sa bìncida de su campionau, impari, mancai, a un'antra parighedda de scuadras». 

Po cumprendi cantu is de su Uddusò funt fortis, po cumprendi sa calidadi, arta manna, de sa stagioni chi ndi funt pesendi, bastat a narai (iat a bastai a narai, chi si praxit de prus cumenti sonat) ca fintzas a sa dì de sa partida chi ant giogau in domu de is de su Bonorva, no iant ancora pèrdiu nemmancu po una borta. Pròpriu po custu, su de essi arrannèscius a binci cun su resultau de tres a duus, donat ancora prus prexu a is biancus-arrùbius. 
«Issus ndi funt arribbaus a giogai sa partida in domu cosa nosta chentza de nd'essi ancora ingotu nemmancu una partida pèrdia: custu si fait a cumprendi cantu potzat essi dificili, po is atras scuadras, po is scuadras de is aversàrius, ndi cassai mancai puru feti unu puntixeddu candu giogas contras a is primus de sa classi. Est a nai, duncas, ca giogai contras de issus no benit a essi una passillada, custu est pagu ma seguru. Po nosu, peròu, fiat una partida ca no podestus perdi, po primu cosa poita giogastus in domu, aranti de is tifosus cosa nosta etotu, e po segunda cosa, chi is de su Uddusò fessint arrannèscius a ndi cassai sa bincida de sa partida, iant a essi artziaus a trintacuatru puntus, cun otu puntus in prus de nosu. Su de essi arrannèscius a binci sa partida, invècias, s'at permìtiu, po ddu narai diaici, de torrai a oberri is giogus, fadendi su contu ca immoi tra is duas scuadras, est a nai tra de nosu e de issus, ddoi funt feti, e naru feti po modu de narai, duus puntixeddus. Seus stètius bravus, cumenti si narat, e seus arrannèscius a fai a biri a totus cantu seus fortis, cantu podeus giogai beni, po ddu narai mellus puru. Ma de su chi ndi cumprendu (arrit), chentza de cussu stìddiu de bona sorti, chi serbit po binci is partidas e chi eus tentu, tra is atras cosas, no nci dda estus potzia fai». 

E duncas, sighendu pròpriu totu su chi m'at contau Gutierrez in sa ciaciarrada, si potzu narai, puru, ca unu de is giogus chi mi praxit a fai de prus est cussu de cumprendi chi cussu chi mi scoviant is giogadoris, e is allenadoris (ballit aguali) apitzus de is partidas cosa insoru, apitzus de is partidas chi giogant, potzat balli, puru (a trassa de consillu) po sa vida cosa nosta de dònnia dì. E duncas, mi megu a solu a solu (custu, duncas, est su chi tèngiu badda badda in conca immoi), is cosas chi serbint po binci una partida iant a podi balli, puru, po circai de aderetzai is cosas trotas chi si capitant in sa vida cosa nosta. Est a nai ca sa rizeta po binci una partida (sa rizeta de is cosas chi serbint po binci una partida, chi si paxit de prus diaici cumenti sonat) benit a essi giai giai sa pròpria de su chi serbit po circai de si ndi strantaxai, allestru e acoitu, candu nd'arrueus in sa vida cosa nosta de dònnia dì. «Po binci sa partida nc'eus dèpiu ghetai in campu totu su coràgiu chi tenestus in su coru, totu su ispicu, sa faci manna, si iat a podi narai diaici puru; in una partida de importu diaici mannu, duncas, e est craru, su chi a sa fini fait sa diferèntzia funt su chi podeus tzerriai detaglius (po ndi furai su fueddu de s'italianu ndr), is particularis, fintzas cussus prus piticheddus». 

E mi benit in conca, mancu a ddu fai aposta, su chi mi iat narau unu piciocu una bella pariga de annus fait: e duncas, a parri sù (ma is fueddus fiant de su nonnu cosa sua, po essi prus pretzisus) tra una cosa fata beni meda, e unu dannu, una cosa fata mabi meda, a bortas, po no narai giai sèmpiri, est una chistioni de detaglius. E pròpriu po custu, candu sigheus calincuna faina de importu (e sa cosa ballit, est craru, siat po un allenamentu in truma manna de una scuadra de bòcia, e siat po totu su chi depeus sighiri e ndi depeus pesai aintru de sa giorronada nosta), estus a depi circai de abarrai atentus, e cuncentraus, chentza de si perdi nemmancu una virgula, cumenti si iat a podi narai e cumenti m'est bèniu de narai. E de su restu, in su giogu de sa bòcia, cumenti sucedit in sa vida etotu, depis fai su contu ca is cosas ti potzant andai mabi, o peus de su chi bisas. 

E candu is cosas andant mabi, ita t'abarrat de fai? 
De custu puru, apu tentu s'ocasioni de nd'arraxonai impari a Gutierrez, chi m'at scoviau: «S'ùrtima partida chi eus pèrdiu est stètia cussa chi eus giogau contras a is de su Coghinas (chi est una de cussas scuadras chi currint po ndi cassai su primu postu de sa lista e duncas s'artziada in su campionau de s'Ecellenza ndr), ma immoi podeus narai, puru, ca seus arrannèscius a si lassai a is pabas is tempus lègius. A nai sa beridadi, su strobbu prus mannu nd'arribbàt de su fatu chi no arrannèscestus a binci una bella pariga (una pariga a sa sarda, e si cumprendit puru, berus est? ndr) de partidas s'una avatu de s'antra; est a nai ca, mancai, fadestus ispantus unu domìnigu, ma sa cida avatu no arrannèscestus a ndi cassai totus is puntus chi, mancai, minescestus. Poita, chi depu narai sa beridadi, sa scuadra, su Bonorva, nd'at sèmpiri pesau partidas bonas e togas, ma chentza de sa bona sorti, a bortas benit mabi a ndi cassai is tres puntus. E si cumprendit. Peròu seus arrannèscius a abarrai cun su coru selenu, sighendi a trabballai po circai de ndi bogai aforas, e sa cosa ballit po dònnia, dònnia giogadori chi fait parti de sa rosa, totu su bonu. Duncas eus trabballau, mancai prus a forti de su chi festus fadendi ainnantis, po circai de si fai agatai prontus po is partidas chi depestus giogai apustis. E fait a narai, puru, e mancu mali, ca is cosas si funt andadas beni meda». 

E deu, duncas, po sighiri a fai su giogu chi mi praxit fintzas a m'amachiai (e chi est cussu de cumprendi chi su chi mi scoviant, su chi mi contant is giogadoris, potzat balli, puru, po si ndi spriogai, po si ndi scabulli de is arroris chi si ndi proint apitzus in sa vida cosa nosta de dònnia dì) si potzu feti narai ca su de abarrai selenus, mancai no siat una cosa facili, benit a essi una cosa de importu, puru, candu mancai ti ndi pigas unu puntori malu e lègiu, cantu ti strupias o ti ingollis. Su de mantenni sa passièntzia, duncas, no est una cosa chi ballit, e andat beni, feti po su giogu de sa bòcia, ma benit a essi una de is cosas de importu prus mannu po sighiri a bivi sa vida. 
Su de sighiri a trabballai, mancai prus a forti de su chi fiast fadendi, puru candu, mancai, perdis sa fidùtzia apitzus de tui etotu, benit a essi una cosa de importu mannu meda, candu, mescamente, ti ndi depis strantaxai apustis de nc'essi arrutu. Sa capacidadi, duncas, de abetiai, contras a sa vida etotu, contras a is mobadias, a is dannus, e mancai puru, eia, su de abetiai contras a sa maba sorti, su de abarrai in peis candu, mancai, ti parit ca totu su mundu est arroghendusì in milli arrogus, est cussu chi estus a depi fai. 
E, cumenti una scuadra de bòcia, cumenti unu giogadori de càlciu, estus a depi circai de si fai aturai prontus, in totus cussas bortas chi is cosas no andant deretas, e duncas andant mabi e trotas. Ca is arroris, a bortas, e cun custu serru po oi puru, serbint, cumenti naràt Federicu Nietzsche, tra is atrus, a si fai benni a essi ancora prus fortis de su chi festus ainnantis de nd'arriciri su dannu.






Attività realizzata col contributo della Regione Sardegna - IMPRENTAS 2023-2024. LR 22/2018, art. 22