Nd'arribbat giai sa basca ma is partidas no ammancant: is de su Muristeni giogant po ndi cassai sa Sèrie D; is de su Pèifugas contras a is moguresus de sa Frecia Parte Montis po s'artziada in Promotzioni

E duncas, a cantu parit, nci dda eus fata (e nci dda eus fata po diaderus!): chi su tialu de calendàriu no est contendumì brullas, difatis, custu artìculu nd'at a bessiri aforas su bintinoi de su mesi de maju, chi at a essi de giòbia (e sèmpiri chi su Cielu at a bollu custu beni po mei). 

E cumenti scieis, is artìculus chi ndi pesu in sardu, in su sardu chi si fueddat innoi in su Campoidanu de mesu, a su mancu, e chi andant a fai parti de is Novas de su Diàriu Sportivu, ndi bessint sèmpiri, e feti, si iat a podi narai, su giòbia. Dònnia giòbia de su mesi, po totus is doxi mesis chi ddoi funt in un annu, chentza de ndi sartai mai nemmancu unu, mancai siat dì de festa. Podeis abarrai segurus, duncas, de brintai in su giàssu cosa nosta (ca po su giàssu no est nemmancu su miu, e mi parit craru puru, poita deu a sa fini nci scriu e basta, e de seguru no seu deu su merì de sa barraca, cumenti si iat a podi narai, e megu a ddu narai po arriri, unu pagheddu, a su mancu, e si cumprendit, berus est?) e de agatai calincuna cosa cumenti a trintamila corpus donaus a sa tastiera, chi bosatrus, peròu, bieis candu funt giai postus, beni beni, in cust'artìculu, in dònnia fueddu, duncas (chi cumprendeis su chi megu a si narai). 

E me is artìculus chi ndi pesu in sardu, e chi ndi bessint aforas dònnia giòbia, podeis agatai, est craru, totus is novas chi nd'arribbant de is campus innoi si giogant is partidas de is campionaus de is diletantis (e chi pertocant, duncas, is scuadras de bòcia chi currint me is campionaus pesaus de is de sa Federatzioni Italiana de su Giogu de su Càlciu, e chi nci funt spratas in totu s'isula cosa nosta; e duncas, eia, po ddu narai mellus, de totus is assòtzius de bòcia chi nci funt, giai giai, in dònnia biddixedda de sa Sardìnnia); ma me is artìculus chi ndi pesu in sardu e chi ndi bessint dònnia giòbia, nci agatais, puru, unu cantu de contus, de contixeddus (cumenti mi praxit a ddus tzerriai) e unu pagheddeddu de strollichiminis puru (ca funt sa cosa chi mi fait amachiai de prus, de su prexu e de s'afròddiu, chi pròpriu si ddu depu narai). 

E duncas, incumentzaus unu pagheddu, immoi chi nci seus, e tanti po incarrerai cun is legas, a cumprendi ita totu nc'est in sa pingiada, po su chi pertocat is novas de custa cida. Sèmpiri chi mi permiteis de coxinai sa chistioni diaici, sèmpiri chi mi permiteis de giogai unu pagheddeddu a fai su poeta, duncas, e no feti su giornalista. E duncas, candu mi megu ca giogu a fai su poeta, est craru, megu a narai ca mi benit, mancai, de giogai cun is fueddus, e pruschetotu cun is metaforas, cumenti apu fatu immubagora de su restu. Ma chi eis lìgiu a su mancu unu de is artìculus chi ndi funt bessius, in custus ùrtimus doxi-trexi mesis, scieis beni, e beni meda, de su restu, cumenti mi pigat sa cosa.  
E mi fait a prexei a si nd'arregodai ca, eia, no sceru mai is legas chi sigu, chi pigu, ainanntis de mi ponni a ddas scriri, ma mi benint in conca in su momentu, chi cumprendeis su chi si bollu narai. 
E a narai sa beridadi, si potzu contai custu puru, immoi chi nci seu: duncas fatu fatu m'acucant in conca (mi benint in conca, si iat a podi narai diaici puru) legas e chistionis ca mi iat a praxi a s'intregai, a nci stichiri me in s'artìculu de su giòbia, e mescamente mi benint in conca candu mi fatzu sa passillada, a su merì, candu ndi cabat su sobi, apustis chi mi ndi scabullu e serru cun su trabballu cosa mia. 
Eia, cumenti s'apu arremonau giai atras bortas (chi no megu a mi sballiai, e mi parit de podi narai ca no mi seu sballiendi), mi fatzu una passillada dònnia, dònnia, dònnia dì ca su Cielu m'arregalat (e gràtzias a Deus, ca sighint a nc'essi diis bonas po mei puru; e de su restu, mi megu a solu a solu, su trabballu no m'amancat, gei si cumprendit, e sa saludi no m'amancat etotu, e duncas, si iat a podi narai ca potzu sighiri a andai ainnantis in sa bia cosa mia cun su coru selenu), e in s'interis chi passillu, eia, si cumprendit, mi benint in conca una surra (una surra manna meda, chi pròpriu si depu narai cumenti funt cuncodradas is cosas) de bideas, e de legas, e de arraxonamentus chi ndi iant a podi acabbai aintru de s'artìculu de su giòbia. Ma sucedit puru (e mi sucedit fatu fatu, chi pròpriu si depu narai sa beridadi) ca de totu cussu muntoni mannu de bideas chi mi benint in conca (chi m'agatu in conca, cumenti chi fessint un arregalu de is musas, po arremonai is antigus Grecus, o Aregus, ca pentzànt ca is bideas, e mescamente is bideas chi pertocant sa poesia, nd'arribbessint de is musas, chi funt, duncas, is diosas de s'ispiratzioni, e mescamente de s'ispiratzioni poetica, cumenti si iat a podi tzerriai, furendindi sa trassa a s'italianu etotu), a sa fini mi nd'abarrat pagu e nudda; est a narai, eia, ca candu mi pongiu a scriri, a sa fini (po noranta bortas apitzus de centu) mi benint in conca atrus centumila strollichiminis, atru centumila contixeddus. 

E duncas, eia, cumenti s'apu giai narau una bella pariga de bortas (ma ddu torru a arrapiti po oi puru, a bortas no nci siant, tra cussus chi benint innoi po ligi custu artìculu, personas ca no sciint cumenti funt cuncodradas is cosas, e iant a podi no cumprendi ita totu seu strechendi a pari, cumenti si megàt sa bon'anima de mamma mia), nci sticu unu pagheddeddu de strollichiminis (e si naru feti unu pagheddeddu, circhendi duncas de no mi fai pigai tropu sa manu) po circai de manigiai unu cantu de fueddus diversus de su chi ia a fai chi depessi abarrai innoi a si contai feti de resultaus, de gol e de partidas. Ca a sa fini est una cosa chi no mi dispraxit, no ia a bolli ca calincunu de bosatrus cumprendessit allu po cibudda (cumenti si narat, a trassa de s'italianu etotu; e chi si depu narai sa beridadi, immoi chi nci seu, custu est unu dìciu chi m'est sèmpiri praxu meda, fintzas de candu seu unu pipieddu piticu), fadendi su contu ca su de sighiri is fainas e is contus chi nd'arribbant de su mundu de is giogadoris e de is allenadoris diletantis est bèniu a essi su trabballu cosa mia, e duncas ddu megu a fai de calincuna cosa cumenti a cuindixi annus (e mi benit de narai, duncas, ca su tempus parit ca siat bobendusì. Ca sa vida, chi nci pentzu, mi parit unu bisu chi durat feti su tanti de una cascalla, feti po cincu segundus. E si domandu torra scusa chi seu gioghendi a fai su poeta, prus ca su giornalista); e chi pròpriu si depu narai sa beridadi, ia a acoitai (e meda puru) a si scriri, a si chistionai feti de partidas e de resultaus, e invècias abarru innoi a mi spremi is crobeddus (cumenti si iat a podi narai) circhendi de nci stichiri, puru, calincuna lega de importu, chi ndi potzat cassai s'atentzioni, custa est sa ispera mia a su mancu, de is personas (de totus cussas personas, po ddu narai mellus puru) ca mancai no funt acapiadas a istrintu cun su mundu de is giogadoris de bòcia diletantis sardus (ma ballit puru po is allenadoris, e mi parit bastanti craru), ma chi, mancai, tenint su prexei (tenint aggradessu, cumenti si iat a podi narai, mellus puru po cumenti sonat), de fai unu pagheddeddu de esercìtziu ligendi un artìculu scritu in sardu, fadendi su contu ca in dì de oi, po su chi pertocat is sardus chi bivint in s'isula, no funt medas is chi scint ligi e mescamente scriri in limba (cumenti si iat a podi narai), e cussus puru chi dda sciint chistionai (e chi dda chistionant in su fetianu) no funt diaici medas, cumenti, mancai, podiat essi cincuanta o sessanta annus fait, chi cumprendeis su chi seu circhendi de si narai. 
E de su restu (e cun custu dda serru), est pròpriu po custu motivu ca is de sa Regione de Sardìgnia (e megu a chistionai, pruschetotu, de s'Assessorau a sa Cultura e a sa Lìngua Sarda) funt pesendindi su bandu IMPRENTAS, chi circat, duncas, pròpriu de sarvai sa lìngua cosa nosta ca, chi is cosas sighint a andai diaici (diaici mabi, e si cumprendit, berus est?) arriscat de podi sparessi de su mundu. 
Ca cumenti si megàt Darwin, de su restu (e deu pentzu ca scieis beni de chini seu chistionendi: de cussu grandu dotori chi nd'at pesau sa storia de dònnia gènia de animabis e de matas e de prantas chi nci funt in custu mundu; e nd'at pesau, puru, sa storia de s'omini), chi una lìngua no dda chistionant in su logu innoi cussa lìngua est nàscia (cumenti iat a podi essi, duncas, po sa lingua sarda innoi in Sardìnnia), intzandus sa lìngua si morit e sparessit, po sèmpiri, de custu mundu. 
E iat a essi unu pecau, una lastima manna meda, e deu creu ca si cumprendat, ci su sardu depessit sparessi po sèmpiri de custu mundu. 

E duncas, eia, mi praxit a mi strollicai, a su mancu unu pagheteddu, ainnantis de mi nci fuiai a fundu e susu (cumenti apu sèmpiri intèndiu narai innoi in Bidd'e Sorris, e mescamente candu fia unu piciocheddu, de is atrus piciocheddus etotu) me is chistionis chi pertocant is assòtzius de bòcia: e immoi chi nci seu, andaus a castiai, impari, ita totu est sucèdiu me in custu ùrtimu fini de cida, tanti po incumentzai a cumprendi cali funt is cosas chi (si ddu torru a arrapiti torra) funt buddendi in sa pingiada (cumenti si iat a podi narai, chi mi permiteis de giogai a fai su poeta feti po un antru pagheddeddu). 

E duncas, eia, mancai is campionaus si siant serraus a s'incumintzu de custu mesi etotu (fiat su cuatru de su mesi de maju, de su restu, candu si funt giogadas is ùrtimas partidas po su chi pertocat su mundu de sa Primu Categoria e de sa Segunda Categoria) nci funt ancora una pariga (una bella pariga, po ddu narai a sa sarda, ca cun custu fueddu megaus a chistionai, est craru, prus de duas scuadras; e fait arriri, unu pagheddeddu, ca in Sardìnnia, e duncas, in sardu, candu naraus una pariga, boleus narai puru tres o cuatru, e no feti duus cumenti, invècias, sucedit cun s'italianu) de scuadras chi funt sighendi a curri, in campu, mancai sa basca manna chi est fadendi in custas ùrtimas cidas. 
E de seguru no benit a essi una cosa facili, po unu giogadori, e si cumprendit, su de curri avatu de sa bòcia e de is aversàrius candu nci funt trinta, o mancai puru trintacincu gradus. 

E duncas, eia, domìnigu passau (e apustis si nd'apa a chistionai mellus puru, ca po immoi seu circhendu de si donai una bidea de totus is chistionis chi nci funt in su pratu) is de su Muristeni ant giogau sa primu partida chi ballit po is play-off (po ndi furai unu fueddu chi nd'arribbat, deretu deretu, de sa lìngua ingresa), ca funt, duncas, is isfidas finalis ca is scuadras chi acabbant sa stagioni (e chi, duncas, serrant su campionau) a su segundu postu de sa lista, giogant tra de issas. 
E duncas, eia, is de su Muristeni si dda funt dèpia biri contras a is latzialis de sa Maccarese, e po immoi (po incumentzai) si potzu narai ca is cosas no ddis funt andadas mabi, antzis, ddis funt andadas beni meda, fadendi su contu ca funt arrannèscius a ndi cassai sa bìncida, cun su resultau de unu a zeru. 
E candu fia pentzendi a totus is cosas chi nci funt badda badda in su pratu (chi mi permiteis de manigiai custus fueddus, e chi cumprendeis, est craru, su chi seu circhendi de si narai), m'est bèniu in conca (tra is atras centumila cosas) ca apu incumentzau a trabballai po su giàssu de is amigus de su Diàriu Sportivu candu is de sa Kosmoto de Muristeni (sa scuadra, a s'epoca, si tzerriàt pròpriu diaici) curriant in su campionau de sa Primu Categoria, e chi iant bintu puru, a sa fini de is giogus (cumenti si iat a podi narai). 

E si megu a contai custa cosa po si fai a cumprendi ca, eia, in custus cuindixi annus su presidenti de s'assòtziu, chi est Marcu Carboni, at fatu unu trabballu mannu cumenti unu monti (cumenti si iat a podi narai, e cumenti m'est bèniu de narai, de su restu); est stètiu unu de is primus presidentis chi apu connotu. S'apu giai narau, de su restu, ca apu incumentzau a scriri artìculus po su Diàriu Sportivu candu fiat su mesi de Donniasantu de su duamilla e undixi; e duncas, eia, is de sa Kosmoto de Muristeni funt stetias una de is primus scuadrixeddas chi apu potziu sighiri, fadendi su contu, in prus, cumenti calincunu de bosatrus at a sciri, e at a cumprendi beni, ca sa bidda innoi bivu (chi est Bidd'e Sorris) est atesu de Muristeni po calincuna cosa cumenti a seti-otu chilometrus, e duncas, eia, si iat a podi narai ca is duas biddas funt s'una a su costau de s'atra. 
E duncas, eia, sa primu cosa chi mi benit in conca est ca Marcu Carboni at fatu a biri a totus, in totus custus annus, canta passioni tenit, in su coru cosa sua, po sa scuadra, po s'assòtziu chi sighit. E fadendi su contu ca ddu apu connotu a is tempus de sa Primu Categoria (candu s'allenadori de s'assòtziu fiat Marco Cossa, po si cumprendi mellus a pari e po narai totus is cosas cumenti funt), si podit narai ca sciu beni de ita seu chistionendisì; mescamente in dì de oi, candu funt currendi po ndi cassai s'artziada in su campionau de sa Sèrie D, ca po una bidda cumenti a Muristeni iat a essi una cosa de importu mannu meda, e si cumprendit, ca candu curris in su campionau de sa Sèrie D, depis fai su contu ca una cida eia e una cida nou (dònnia duas cidas, duncas, cumenti si iat a podi narai mellus puru) nd'arribbant in bidda cosa tua, po giogai sa partida, una scuadra allena, cun totu s'afròddiu chi custa cosa arregalat a sa genti de su logu. E si cumprendit beni, ca nci iat a podi essi calincunu chi nci guadangiat puru calincuna cosa, apitzus de is partidas e de is trasfertas de is scuadras allenas. 

E duncas, immoi is de su Muristeni ant a depi giogai, difatis, sa partida chi at a balli po sa torrada, contras a is de sa Maccarese etotu, in domu cosa insoru (innoi in su Campidanu de mesu); e si cumprendit giai (e si cumprendit beni, duncas) ca a su campu ddoi at a andai una surra manna de genti, chi est berus ca is tifosus, e duncas is personas chi bivint in sa bidda, sighiant sa scuadra, in trumas mannas, giai a is tempus de sa Promotzioni, e sa pròpriu cosa ant fatu in totus custus annus chi is biancus-asullus ant fatu in su campionau de s'Ecellenza. E duncas, po custu domìnigu chi at a benni, podeus pentzai ca nc'at a essi unu bellu budrellu (e ddu naraus cun bonesa, chentza de bolli ofendi nesciunu cun is fueddus, est craru, berus?) in su campu, cun is giogadoris de domu chi ant a tenni a su mancu unu motivu in prus (eia, megu a chistionai de sa bella figura, cumenti si narat, chi ant a bolli fai aranti de is tifosus cosa insoru) po circai de ndi pesai una partida de importu. E duncas, eia, mi praxit a arremonai torra su presidenti de s'assòtziu, Marcu Carboni, chi at sighiu sa scuadra cun sa passioni chi unu babbu tenit po is fillus, e naru diaderus: e deu pentzu (po torrai unu pagheddeddu, ma unu pagheddeddu feti, a mi strollicai cun bosatrus) ca candu nc'est sa passioni, candu tui fais una cosa cun passioni, intzandus is resultaus no trigant a nd'arribbai. 
E deu si auguru, immoi chi nci seu (e est s'augùriu chi fatzu a mei puru, chi pròpriu si ddu depu narai) de tenni, po su chi pertocat is fainas cosa de bosatrus, sa pròpriu passaioni (su pròpriu tanti de passioni, po ddu narai mellus puru) ca tenit in su coru Marcu Carboni, ca, diaderus, andat pigau cumenti a esèmpiu, chi cumprendeis su chi si megu a narai. 

E duncas, is de su Muristeni no funt stètius is ùnicus a ndi cabai in campu custu domìnigu passau, fadendi su contu ca po su chi pertocat is partidas finalis de sa Primu Categoria (eia, megu a chistionai de is partidas chi ballint po s'artziada de categoria, e duncas, po s'artziada in Promotzioni) nci funt stètias atras duas isfidas, partendi de cussa chi s'est giogada tra is de sa Frecia Parte Montis (s'assòtziu chi nd'ant pesau in Moguru, deu creu ca ddu scieis giai, ma chi nc'est calincunu ca no ddu sciit, deu seu innoi pròpriu po custu), chi est sa scuadra (acudu a si ddu narai) sighida de Giancarlu Boi, e is ollastrinus de sa Baunese, sighius de Masia; e duncas, acudu a si narai custu puru, is de sa Frecia Parte Montis nd'ant serrau sa stagioni regulari (su campionau, duncas) a su segundu postu in sa Lista B (a is pabas, duncas, de is de su Samugheo; e s'apa a chistionai de sa bìncida chi nd'ant cassau is piciocus sighius de Giorgiu Ferraro in unu de is artìculus chi nd'ant a bessiri in s'istadi); is de sa Baunese, invècias, nd'ant cassau su segundu postu in sa Lista A (a is pabas de is de su Cannonau de Jerzu; e po su chi pertocat is biancus-birdis puru, nd'eus a torrai a chistionai me is cidas chi ant a benni, e sèmpiri me is artìculus chi ballint po is Novas). 

E duncas, m'acudu a si narai, e allestru puru, ca is moguresus funt arrannèscius a binci sa partida cun su resultau de tres a unu e duncas, eia, nd'ant cassau sa possibbilidadi de si giogai sa partida finali, tra una pariga de diis, est a narai, duncas, custu domìnigu chi est arribbendindi. 
E is de sa Frecia Parte Montis, duncas, ant a depi isfidai is de su Santu Giorgiu de Peifugas, chi funt stètius abbilis, e bravus e fortis meda, puru, a bìnci sa partida chi ant giogau contras a is de su Thiesi, cun su resultau de duus a unu. 

E duncas, sighendi a andai ainnantis cun is contus, si potzu narai, puru, ca custu domìnigu passau, si funt giogadas duas partidas po su chi pertocat is partidas finali, cussas chi serbint po nndi cassai sa sarvesa, tra is de s'Isili e is de sa Virtus de Mara Arbarei, e tra is de su Silanos e is de su Putumajore. E seus chistionendi, duncas, de cuatru scuadras chi faint parti, sèmpiri, de su mundu de sa Primu Categoria: is de s'Isili e is de sa Virtus de Mara Arbarei ant giogau (ddi naru diaici) in sa Lista B; is de su Silanos e de su Putumajore curriant, invècias, in sa Lista C. 

E duncas, ainnantis de si contai, mellus de su chi apu fatu immoi, cumenti funt andadas is cosas (po immoi si potzu feti narai, feti arremonai ca is de s'Isili ant bintu sa partida contras a is de sa Virtus de Mara Arbarei cun su resultau, bellu e tundu tundu, de cuatru a duus; is de su Silanos, invècias, ant bintu contras a is de su Putumajore cun su resultau de tres a zeru), potzu sighiri a si contai (e cun custu serru cun is anticipatzionis, cumenti si iat a podi narai, a trassa de cumenti si narat in italianu etotu) ca nci funt stètias (si funt giogadas, duncas) puru duas partidas chi ballint po is isfidas finalis in su mundu de sa Segunda Categoria; e duncas: is de s'Accademia Sulcitana (chi ndi funt arribbaus a su segundu postu de sa Lista A, a is pabas de is de sa Gioventudi de Sarroch) ant bintu, cun su resultau de duus a zeru, contras a is de su BiddaManna Strisàili (chi ant serrau sa stagioni regolari a su segundu postu in sa Lista C, a is pabas de is de su Cardedu). 

E invècias is de su Sorso (Sossu, cumenti si iat a podi narai, e scriri, in turritanu, ma deu no seu turritanu, ma campidanesu, cumenti scieis beni, de su restu, e duncas apa a sighiri a tzerriai s'assòtziu Sorso, cumenti si narat in italianu puru) funt arrannèscius a binci sa partida, de importu mannu, chi ant giogau in domu de is de sa Macumerese, cun su resultau togu meda de tres a unu. 

E duncas, eia, custu est totu su chi est sucèdiu custu domìnigu passau, e immoi, chi seis de acòrdiu, podeus andai a cumprendi, mellus (mellus de su chi eus fatu fintzas a immoi) cumenti funt andadas is cosas. 

In s'interis ca sa dì (seu atachendi a scriri custas rigas candu su calendàriu mi narat ca eia, seus lòmpius a su bintotu de su mesi de maju, chi est de mèrcuis) est benendu a essi bella bascosa (fortzis tropu puru, po su chi mi pertocat, e megu a brullai, si cumprendit? Ca unu pagheddeddu de basca mi speddiat puru, isperendi ca no nd'arribbit su fogu, e s'allupori puru, po crupa de sa tropu basca etotu), mi benit de pentzai ca su fini de cida chi est arribbendindi at a essi cussu innoi ndi brintat (e fiat ora puru, ca custu mesi de Maju m'at ghetau a pari, po beni, sa conca e su coru e su stògumu puru, chi pròpriu si depu narai sa beridadi) su mesi de Lampadas, e feti chi nci pentzu, mi benit sèmpiri de narai sa pròpriu cosa: eia, gei est currendi pagu su tempus! 

Ca mi parit ariseu candu mi seu postu a scriri su primu artìculu in su mesi de Gennàrgiu, e invecias, seus giai arribbaus a su de ses mesis de s'annu, giai giai chentza de si nd'acatai (a su mancu, mi benit de narai diaici, po su chi mi pertocat. Mancai nci siant stètius mesis, e periodus, duncas, longus e fadiosus, cumenti est stètiu, de su restu, su mesi de Martzu, e cumenti est stètiu, arrori mannu, su mesi de Maju puru). 

E duncas, megamu a narai ca immoi chi nd'at a arribbai su mesi de Lampadas, a partiri, duncas, de sa primu dì de su mesi, chi at a essi de domìnigu, sa genti (e si auguru ca in sa truma manna nc'eis a essi bosatrus puru, chi seis ligendi custu artìculu) s'at a fuiai in logu de mari, a pigai su sobi e apustis, no ant a trigai a si nci ghetai in acua, est a narai, in mari puru; e sa cosa at a balli, po incumentzai, po totus is casteddaius (e duncas po totus is amigus chi tèngiu in Casteddu, e chi bivint in citadi), ca, cumenti funt costumaus a fai, de su restu, si nc'ant a fuiai (cumenti si iat a podi narai) a su poetu. Ca est, cumenti eis a sciri giai, su logu de mari po is casteddaius, ma no feti. 

E in s'interis chi chistionu de sa genti chi s'at a fai su bagnu in mari, custu fini de cida chi est arribendindi, deu seu ancora innoi chi depu trumentai cun su trabballu cosa mia, ma candu apa a acabbai de scriri, de ndi pesai custas rigas, custu artìculu, intzandus, eia, e no mi parit nemmancu berus, nc'at a essi unu pagheddeddu de spàssiu, ma pruschetotu, de pàsiu po mei puru, e no biu s'ora, cumenti si narat, fadendi su contu ca apustis de giai noi mesis chi apu fatu, scriendi giai giai dònnia dì po su giàssu de is amigus de su Diàriu Sportivu, eia, incumentzu a mi intendi unu pagheddeddu stracu, cumenti si iat a podi narai, e mi parit totu ca siat incumintzendi a mi bessiri, aforas de sa buca, sa spruma bianca, a trassa de cussu chi sucedit a is cuaddus, ma sa cosa ballit puru po is canis, candu funt fadiaus meda, o candu depint caminai, o curri, peus ancora, asuta de su sobi, candu fait basca meda. 

E duncas, eia, immoi giogu a fai sa finta ca, totu a giru a giru de su logu innoi m'agatu immoi (est craru: seu sètziu aranti de su computer, e si cumprendit beni, deu creu; seu sètziu in una cadira, aranti de una mesa) nci siant una cantidadi manna de tifosus ca faint su tifu po mei, po m'agiudai a fai s'ùrtimu tanti de trabballu chi mi tocat, chentza, mancai, de mi morri apitzus de sa tialu de tastiera. 

E duncas, eia, po oi puru potzu narai ca apu acabbau is strollichiminis e duncas, eia, a partiri de immoi s'apa a chistionai feti (e si naru feti! Si cumprendit?) de partidas e de resultaus e, sèmpiri chi seis de acòrdiu cun mei, mancai, s'apa a intregai (chi apa a tenni su logu e su tempus po ddu fai) calincunu fueddu, chi apa a scerai tra cussus chi m'ant regalau custa cida is allenadoris chi apu intèndiu po ndi pesai is ciaciarradas, is intervistas (cumenti fatzu, de su restu, dònnia dònnia cida, po otu-noi mesis de sighiu). 

Ma po su chi mi pertocat, podeus torrai a chistionai (mancai feti po unu pagheddeddu, chentza de si stentai tropu, cumenti si megat sa bon'anima de mamma mia) de is de su Muristeni, ca pròpriu custu domìnigu passau ant bintu sa sfida chi ballit po s'andada e chi pertocat is semifinalis de is partidas finalis (m'eis a iscusai po su giogu de fueddus chi m'est bèssiu, giai giai chentza de mi nd'acatai) po is scuadras de s'Ecellenza, e in su pratu, est craru, ddoi est s'artziada in su campionau de sa Sèrie D, ca po una bidda cumenti a Muristeni, e si cumprendit, iat a podi essi unu bisu mannu, e togu meda. 
E duncas, eia, cumenti s'apu arremonau ainanntis etotu, (in custu artìculu etotu, si cumprendit, berus est?) is de su Muristeni funt arrannèscius a binci, cun su resultau de unu a zeru, in domu de is latzialis de sa W3 Maccarese, gràtzias a su gol pesau de Sanna, apustis de trinta minudus (prus o mancu) de giogu, e gràtzias a su passàgiu, bonu e togu meda, chi ddi at fatu Santoro. 
E duncas, immoi, a is piciocus sighius de Marcellu Angheleddu (ca mancai siat un allenadori tra is prus giòvuneddus tra totus cussus chi nci funt, chi faint parti de su mundu de s'Ecellenza, est giai arrannèscendi a ndi pesai unu trabballu de importu mannu, chi fadeus su contu ca est arribbau a is pabas de is de su Budoni e, impari a is piciocus cosa sua, est craru, est arrannèsciu a binci contras a una scuadra forti cumenti est sa de su Tèmpiu, in sa partida finali po su chi pertocat sa fasi regionali) ddis at a bastai a serrai cun su resultau in paridadi sa partida chi s'at a giogai custu domìnigu chi benit, po ndi cassai sa possibbilidadi de giogai sa partida finali. Chi est cussu, de su restu, chi ddis auguraus totus. 
E po immoi scieus, puru, ca chi is de su Muristeni ant a arribbai a si giogai sa finali, si dda ant a depi biri contras a is de su K Sport Montecchio Gallo, chi nd'arribbant de sa Lista A po su chi pertocat su campionau de s'Ecellenza chi s'est giogau in Emilia Romagna, e is de sa Vianese, chi currint me in su campionau de s'Ecellenza po su chi pertocat sa regioni de is Marche. 
E po immoi, si potzu narai, feti, ca is de sa Vianese ant bintu (cumenti est sucèdiu a is de su Muristeni etotu) cun su resultau de unu a zeru, in domu allena. 
E podeis abarrai segurus de su fatu ca, eia, eis a agatai totus is novas chi pertocant sa partida de su Muristeni (est a narai, est craru, sa chi ant a depi giogai domìnigu chi at a benni), in su giàssu de su Diàriu Sportivu. 

E duncas, apustis de essi serrau sa lega chi pertocat su Muristeni e sa cursa, toga meda, chi funt fadendi concas a su campionau de sa Sèrie D, mi iat a praxi a si chistionai, unu pagheddeddu, de is de su Santu Giorgiu de Pèifugas, ca, de su restu, s'apu arremonau ainnantis, in custu artìculu etotu. 

E duncas, si potzu narai, po incumentzai, ca is de su Santu Giorgiu nd'ant pesau una stagioni toga meda, fadendi su contu ca funt arrannèscius a abarrai apicigaus a is carronis de una scuadra forti cumenti est stètia sa de su Campanedda, fadendi su contu, in prus, ca is duas scuadras ant serrau su campionau a su primu postu, impari, cun calincuna cosa cumenti a setanta puntus. E duncas, eia, is de su Santu Giorgiu funt arrannèscius a giogai, a sforrai (chi mi permiteis de manigiai custu fueddu) duas partidas de importu mannu contras a is de su Thiesi, e chi si funt giogadas, est craru, in custas ùrtimas duas cidas. 
E chini mellus de s'allenadori de is arrùbius-brau, e seu chistionendi, est craru, de Paulu Piga, podit sciri (e si podit contai, duncas) cumenti funt andadas is cosas? 
«Sa partida chi eus giogau custu domìnigu passau est stètia toga, bella cantu fadiosa; e is emotzionis no funt stètias pagus, e si cumprendit, fadendi su contu ca badda badda, in su pratu, ddoi fiat sa possibbilidadi de ndi cassai, e duncas de giogai, sa partida finali, chi at a balli, mancai, est cussu chi bisaus totus, po ndi artziai in su campionau de sa Promotzioni po sa stagioni chi at a benni, mancai ancora no si potzat sciri cumenti ant a cuncodrai is cosas is dotoris de sa Lega Natzionali de is Diletantis; est a narai, duncas, ca eus a depi cumprendi chi su campionau de sa Promotzioni at a essi prètziu, cumenti est sucèdiu in custus ùrtimus annus, de su restu, in duas listas cun dexiotu scuadras a cada una, o chi nd'ant a pesai is listas cun feti sexi scuadras. E chi depessint pesai is listas cun feti sexi scuadras, si cumprendit ca po nosu is isperas de benni a essi piscaus torra iant a essi meda, ma meda prus pagu. E si cumprendit. Immoi si dda eus a depi biri contras a is de sa Frecia Parte Montis, e s'ammancat, duncas, feti un'anta cida de trabballu, a partiri, pròpriu, de is allenamentus chi eus a depi fai. A narai sa beridadi, peròu, sa cida passada eus circau de pentzai pruschetotu a abarrai selenus, est a narai cun sa conca sbuida de totus is pentzamentus, e mescamente is pentzamentus lègius, chi no serbint, e antzis, nemmancu t'agiudant, po ndi cabai in campu. In custas ùrtimas cidas, de su restu, eus tentu una biga de giogadoris chi si funt strupiaus, o ingotus, e duncas eus circau de trabballai po ddis permiti de ndi torrai in campu allestru, sèmpiri po su chi fait, po su chi est stètiu possibbili. No apu pentzau a sa tatica, chi pròpriu si depu narai sa beridadi, ma apu trabballau prus apitzus de sa conca de is giogadoris cosa mia. Me is ùrtimas bessidas apu dèpiu circai de m'arrangiai, est a narai, ca is giogadoris chi podiant cabai in campu no fiant medas, e duncas apu dèpiu domandai a Milia chi si dda intendiàt de giogai aranti a sa difesa, in unu ruolu chi no est su sù, custu est pagu ma seguru, ma chi est su ruolu de Pitruzzello, ca peròu at tentu unu dannu e est dèpiu abarrai a castiai is atrus, chi cumprendeis su chi si bollu narai. Po custa cida, e duncas po sa partida chi eus a depi giogai domìnigu chi at a benni, no sciu cumenti funt cuncodraus is piciocus: depeus fai is contus, e circai de cumprendi cantu de issus staint ancora mabi, e cantus de issus, invècias, tenint sa possibbilidadi de ndi cabai in campu po s'ùrtima partida de sa stagioni. Arribbaus a custu puntu, seus arrannèscendi a curri, ddi naru diaici, feti cun is fortzas chi teneus in conca, e in su coru, chi cumprendeis su chi si bollu narai, prus ca cun is fortzas chi teneus me is cambas e chi, a narai sa beridadi, funt giai giai torradas a nudda, e si cumprendit puru: seus gioghendi de calincuna cosa cumenti a otu-noi mesis de sighiu, e si iat a podi narai, puru, ca is giogadoris no funt màchinas, est a narai, duncas, ca no potzu pretendi chi currant a forti cumenti chi fessit sa primu giorronada de su campionau. E si cumprendit beni, deu creu. Duncas, apa a fai de totu po arregalai a is piciocus cosa mia s'assèbiu chi ddis serbit po giogai, po ndi cabai in campu po custas partidas de importu diaici mannu. E seus arribbaus a si depi giogai custas ùrtimas partidas poita, cumenti eis a sciri beni, eus pèrdiu sa partida finali contras a is de su Campanedda. Ma sciestus puru, duncas, ca su de tenni sa possibbilidadi de giogai duas partidas benit a essi mellus de su de depi giogai una partida feti, cumenti eus dèpiu fai nosu po sa isfida contras a is de su Campanedda. E seus arribbaus a cussa partida, chi pròpriu si ddu depu scoviai, cun unu bellu tanti de dannus, e de strobbus, cumenti si iat a podi narai, puru, fadendi su contu ca Milia, Romero e Ruiu ndi funt cabaus in campu ma no stadiant beni, a su mancu, no stadiant diaici beni cumenti bisastus. Fadendi su contu, duncas, ca po su chi pertocat su primu, e megu a chistionai, est craru, de Milia, est abarrau po calincuna cosa cumenti a duas cidas chentza de s'allenai impari a is cumpàngius cosa sua; e invècias Romero at giogau cun su genugu mesu segau, chi mi cumprendeis po su chi si bollu narai; po arribbai a Ruiu, chi teniàt unu dannu a una coscia. Est craru ca custus tres giogadoris no ant potziu fai su chi funt stètius bonus a fai me is atras cidas, me is mesis passaus; e seus chistionendi de tres giogadoris de importu mannu meda po su chi pertocat su giogu, e duncas sa calidadi de su giogu cosa nosta. Po sa partida chi eus giogau contras a is de su Thiesi, e chistionu mescamente de cussa chi eus giogau domìnigu passau, nci seus arribbaus cun sa gana bella chi serbit; e de su restu, e si cumprendit, custas partidas, po nosu, funt is ùrtimas ocasionis chi s'abarrant po circai de ndi cassai s'artziada in su campionau de sa Promotzioni, e duncas boleus circai de si giogai totus is cartas chi teneus me is manus. Depu narai, duncas, ca seus stètius bravus meda a lassai pagus ocasionis a is aversàrius cosa nosta, pagu e nudda, si iat a podi narai. Invècias, candu seus arribbaus aintru de s'area de rigori cosa insoru, seus stètius bonus, e cun sa bona sorti chi serbit, po ndi cassai is gol. Po su chi pertocat s'ùrtima partida chi immoi si tocat a giogai, si potzu narai ca no connòsciu, est a narai ca no ndi sciu nudda, de is aversàrius chi s'eus agatai aranti, e megu a chistionai de is de sa Frecia Parte Montis; s'ùnica cosa chi si potzu narai, a su mancu po oi, est ca nd'eus a cabai in campu po circai de si giogai sa isfida cun sa conca arta». 




Attività realizzata col contributo della Regione Sardegna. IMPRENTAS 2024-2025. LR 22/2018 art. 22