Is novas prus callentis acapiadas a is cropus de su mercau de is scuadras sardas

E duncas, atacu a scriri is fueddus po s'artìculu de custa cida candu seu lòmpiu a su bintunu de su mesi de agustu: eia, mi nd'acatu deu puru, a solu a solu (ca a fai is contus nci poneus pagu meda, cumenti si narat fatu fatu e cumenti mi praxit a s'arrapiti, de su restu) ca custas rigas ant a bessiri aforas feti su cincu de su mesi de Cabudanni (tra prus de duas cidas, duncas), ma cumenti narat su dìciu, chini tenit su tempus no depit abertai a cras a fai is cosas chi iat a podi fai oi, chi est su chi seu circhendi de fai deu, de su restu. 

E duncas, mi pòngiu a fai su trabballu chi mi pertocat cun gana bona, e mescamente cun sa calma e sa passièntzia chi serbint po abarrai sètzius aranti de su tialu de su computer po una bella parighedda de oras, m'arramangu is manigas e circu, aintru de sa conchitedda cosa mia, calincuna cosa de si podi contai, chi bengiat a essi de importu po bosatrus e, mescamente, puru po totus cussas personas chi no funt acapidadas a strintu cun is fainas de is scuadras chi currint me is campionaus chi sa Federatzioni Italiana de su Giogu de su Càlciu ndi pesat dònnia annu po su spàssiu de totu sa truma de giogadoris diletantis chi nci funt in dì de oi in Sardìnnia, chentza de si ndi scaresci, peròu, de totus is allenadoris e de totus is tifosus chi, a sa fini, funt cussus chi andant a si gosai is partidas, dònnia dònnia dominigu, mancai fetzat basca meda, e puru candu proit o fait frius. 

E duncas, po cust'annu puru, nci seus! 
Est a nai ca is giogus, cumenti eis a sciri, e chi no ddu scieis deu seu innoi pròpriu po custu, funt torraus a partiri po su chi pertocat sa stagioni de su duamilla e binticuatru – duamilla e binticincu, e is tempus, totus trobeddaus e ghetaus apari chi si seus dèpius bivi me is annus passaus, mescamente tra su duamilla e binti e su duamilla e bintiduus, candu si nd'est protziu in conca cussu tialu de arrori mannu chi est stètiu su Covid, funt bellus ca scarescius. 

Eia, est berus, chi si ddu arregodais, eus fatu mesis e mesis chi no sciestus, chi no podestus sciri ita ndi podiat bessiri aforas sa dì avatu: balliàt po is butegas e is negotzius, chi no sciiant chi podiant abarrai obertus po duas diis de sighiu (e a nci pentzai immoi parit, diaderus, una cosa aforas de conca, una brulla lègia e marigosa), po nd'arremonai una, e balliàt puru, e torraus a nosu, cun is campionaus de bòcia, chi mancai partiant puru, ma durànt pagu meda, cincu cidas e su spàssiu fiat giai bellu ca spaciau. 
Tempus lègius, s'est tocau a bivi, mi benit de narai diaici, mancai peròu si podiat sucedi de peus puru: ita ndi sciu, calincuna cosa cumenti unu terremotu, unu disastru mannu cumenti iat a podi essi sa pesti, cun muntonis e muntonis de motus, e invècias, in unu modu o in s'atru, mancai totu trisia trisia e pista pista (cumenti naràt sèmpiri sa bon'anima de mamma mia), seus arrannèscius a andai ainnantis. Chi est sa cosa de importu prus mannu, megu a chistionai, duncas, de sa fortza chi serbit po sighiri a caminai in un arrastu, mancai is cosas siant tostadas, e trabballosas. 

Mi benit de pentzai a totus cussus giogadoris chi, mancai si ingollant, e si strupiant, mabi puru, a segunda de su dannu chi ndi tenint, no perdint s'ispera, e sighint a trabballai po ndi sanai e po torrai a giogai, mancai cun prus gana de su chi teniant ainnantis. E nosu, de su restu, eus fatu su pròpriu, apustis de totus cussus mesis chi eus fatu acorraus me is aposentus de domu, apustis de totus cussus mesis, e funt stètius longus, e tostaus de scroxai, innoi no sciestus ita ndi podiat abarrai de sa vida cosa nosta (nci fiat calicunu puru, tra is atrus, ca si megàt, giai giai dònnia dì, ca sa vida de sa genti no iat a essi stètia prus sa pròpria, ca si depestus costumai, e allestru puru, a bivi in un'antra manera), ma de su chi ndi potzu cumprendi, a sa fini (e funt passaus giai prus de duus annus de s'incumentzu de totu cussu trumentu), ndi seus bessius beni de una de is epocas prus fadiosas e marigosas chi si seus dèpius bivi me is ùrtimus cincuant'annus. 

Ma si podiat capitai meda ma meda de peus, si ddu apu giai scritu, de su restu: e pentzu a totus cussus poberus disisperaus chi, mancai in dì de oi puru, s'agatant asuta de is bombas, e duncas, est a nai, in mesu in mesu a calincuna de cussa guerras (o gherras, chi si praxit de prus scritu diaici) chi s'omini, a trassa de s'animabi prus tontu e prus istupidu chi s'agat in sa faci de sa terra, sighit a fai, mancai totus is làgrimas, e su sàngui, chi nc'eus giai fuiau in terra in custus ùrtimus milli annus. Cumenti chi s'omini no apat ancora imparau sa letzioni. 

Ma torraus a nosu, e lassaus a perdi totu custus pentzamentus lègius. 
Gràtzias a su Cielu, gràtzias a Deus (o gràtzias a su chi boleis bosatrus, po mei no cambiat pròpriu ca nudda, e megu a si ddu narai brullendi) po cust'annu puru is giogus funt torraus a partiri. E megamu a narai, duncas, ca parint bellus ca scarèscius is tempus innoi no sciestus innoi fai s'ou, m'est bèssiu de si ddu narai diaici: su giogu de su càlciu, duncas, a su mancu in sa vida mia (e custu andat ainnantis de unu bellu muntoni de annus, ant a essi prus de trinta de seguru), est una de is cosas seguras chi ddoi funt in un annu: cumenti apustis de s'istadi ndi brintat s'atonzu (e mancu malli, mi benit de narai, fadendi su contu ca candu ddoi est basca meda, candu fait basca meda, mi intendu totu acallellau, cumenti chi sa conchitedda cosa mia podessit scopiai de unu segundu a s'atru), e cumenti apustis de s'atonzu ndi brintat s'ierru, diaici, podeis abarrai segurus de su fatu ca in su mesi de Cabudanni ant a torrai a incumentzai is giogus chi pertocant is campionaus de bòcia. E mancu mali, mi megu a solu a solu. 

E duncas, po cust'annu puru nci dda eus fata: custu domìnigu passau, difatis, is scuadras sardas chi currint me is campionaus de s'Ecellenza e de sa Promotzioni funt torra cabadas in campu (apustis de is vacantzas de s'istadi, e apustis de totus is cropus de mercau chi nci funt stètius) po cussu chi podeus tzerriai, a trassa de s'italianu etotu, su primu turnu de sa Copa Italia. 

A nai sa beridadi, nci funt stètias scuadras, tra is trintaduus assòtzius chi faint parti de sa lista de sa Promotzioni, chi funt cabadas in campu ariseu a su megama puru (chi fiat su cuatru de su mesi de Cabudanni), e nc'ant a essi, est craru, atras partidas in su domìnigu chi est arribbendindi tra pagu, est a nai cussu de s'otu de su mesi de Cabudanni, cun is campionaus (chistionu mescamente de cussu de s'Ecellenza e de cussu de sa Promotzioni) chi ant a torrai a partiri, cun cussa chi est sa primu giorronada, su dominigu de su cuindixi, sèmpiri de custu mesi etotu. 

S'apu giai nau chi apu atacau a scriri custas rigas su bintunu de su mesi de agustu (cuindixi diis ainanntis de sa data innoi ant a bessiri): mi seu agatau unu pagheddeddu de tempus scapiu de is trumentus e de is dannus e duncas mi seu postu a trabballai, isperendi, mancai, de mi nci podi ghetai in logu de mari po sa cida chi at a benni, chi at a essi s'ùrtima de vacantza chi apa a tenni, ainnantis de s'incumintzu de totus is giogus. 

E ddu sciu chi megu a si ghetai a pari sa conca cun custa cosa de is datas e de su tempus, ma si megu a arrapiti torra custa cosa po si fai a cumprendi, est craru, ca segumenti apu incumentzau a scriri custas rigas su bintunu de su mesi de agustu, no si potzu chistionai, est craru, de is resultaus de is partidas chi ndi funt bèssius aforas me is ùrtimas oras; candu s'àrticulu at a bessiri aforas, duncas, is partidas ant a essi bella ca spaciadas, e chi boleis sciri cumenti funt andadas is cosas, custu est pagu ma seguru, cumenti est seguru chi su sobi si ndi pesat dònnia dònnia dì, no depeis fai atru ca andai a castiai, e mellus ancora a ligi, totus is artìculus chi ddoi funt spratus in su giàssu de su Diàriu Sportivu, e chi scrieus e pesaus in italianu, est craru. 

Po s'artìculu in sardu de custa cida, duncas, depu circai de pentzai a calincuna cosa de importu de scriri (cumenti si naru fatu fatu, no sciu mai cali legas apa a pigai in consideru ainnantis de mi ponni a ddu fai), e mi benit in conca ca in s'artìculu chi est bèssiu sa cida passada (s'artìculu chi nd'est bessiu aforas s'ùrtimu giòbia de su mesi de agustu, po essi prus pretzisus) apu incumintzau a castiai, impari a bosatrus, si cumprendit, cumenti funt cuncodradas is listas de cust'annu, est a nai mellus, duncas, cali funt is scuadras chi ant a curri in dònnia lista tra totus cussas chi sigheus po totus is amigus de su Diàriu Sportivu, partendi de is scuadras de s'Ecellenza (chi eus arremonau, de su restu, in s'artìculu chi est bèssiu a pillu, cumenti si narat, a su mancu cumenti si narat me in bidda mia, chi est Bidd'e Sorris), passendi duncas de is trintaduas scuadras chi ant a curri po su campionau de sa Promotzioni, e fintzas a arribbai, est craru, a is scuadras chi ant a fai parti de su mundu, ddu tzerriu diaici, de sa Primu Categoria, chentza de si ndi scaresci, peròu, de totu su muntoni de scuadras, spratas in totu sa Sardìnnia, chi currint in su campionau de sa Segunda Categoria. 

E duncas, sèmpiri chi seis de acòrdiu, deu ia a sighiri a andai ainnantis cun su trabballu cosa mia (mancai sa basca, e mancai sia disigendi, si ddu naru craru e tundu, de mi nci ghetai in logu de mari, fadendi su contu ca po cust'annu, cun s'istadi chi est, tra is atras cosas, giai giai po spaciai, de mari no nd'apu biu nemmancu unu segundu ancora, ma apa a tenni sa possibbilidadi, est cussu chi isperu, a su mancu, de mi ndi prandi sa cida chi at a benni), e duncas, chi seis de acòrdiu cun mei, andaus a biri cali (e de innoi ndi lompint) funt is scuadras chi eus agatai me is duas listas de sa Promotzioni, partendi, est craru, de sa Lista A, chi est cussa chi pertocat sa zona sud de s'isula stimmada cosa nosta (sa Lista B, invecias, si cumprendit, e s'at a cumprendi mellus candu eus a andai a castiai totus is scuadras chi ddoi funt, est cussa chi pertocat sa parti nord de s'isula). 

E duncas, po custa cida seu arrannèsciu, cumenti eis potziu biri a solus, a no nci stichiri nemmancu unu de cussus strollichiminis chi nci sticu dònnia, dònnia borta, e duncas, no si fatzu perdi su tempus chi mancai nemmancu teneis de perdi. O, a su mancu, nci seu arrannèsciu fintzas a immoi, ma s'artìculu de su restu at a sighiri ancora po un antru bellu pagheddu, e duncas no potzu sciri cumenti ant a andai is cosas. 
Ma torraus a nosu. 

Po su chi pertocat sa Lista A, intzandus, agataus is de s'Arborea, is casteddaius de s'Atleticu, is de s'Atleticu de Masainas (chi ant bintu su campionau de sa Primu Categoria, in sa Lista B, pròpriu s'annu passau, cun una cursa toga meda, cumenti s'apu torrau a arregodai in unu artìculu chi est bèssiu pròpriu una pariga de cidas fait), is de su Lanusè (chi s'annu passau curriant in su campionau de s'Ecellenza, ma cumenti podeis cumprendi asolus, ndi funt cabaus de categoria, cumenti si narat), is de su Càlciu Pirri, is de su Tortolì, is de su Castiadas (chi ant serrau sa stagioni de su duamilla e bintitres – duamilla e binticuatru a su segundu postu in sa lista, a is pabas de is de su Muristeni), is de su Cus de Casteddu (chi est sa scuadra chi ndi pesant, dònnia dònnia annu, is de s'Universidadi), is de su Gùspini, is de s'Idolo (sa scuadra chi nd'ant pesau, giai de unu bellu arrogu de tempus, in Arthana), is de s'Orrolese, is de su Sant'Aleni de Cuartu, is de Ceraxius, is de su Terraba Frantziscu Bellu, is aristanesis de sa Tharros (ca s'annu passau, chi si ddu arregodais, desinò nci pentzu deu, curriant in su campionau de s'Ecellenza), is de s'Uda (chi invecias funt friscus friscus in su campionau de sa Promotzioni, fadendi su contu, cumenti apu scritu, tra is atras cosas, in unu de is ùrtimus artìculus chi ndi funt bèssius aforas po is novas in sardu, chi ndi funt artziaus pròpriu cust'annu, apustis de essi bintu su campionau cosa insoru, est a nai cussu de sa Primu Categoria, in sa Lista A, po essi prus pretzisus ancora), is de sa Villacidrese, sa scuadra de Biddacidru (torra, un'antra scuadra chi nd'est cabada in Promotzioni apustis de essi fatu una bella pariga de annus, pariga a sa sarda, est craru, in su campionau de s'Ecellenza), e is de su Bidda Matzràxia (chi in s'interis, est a nai in totus custus ùrtimus annus, funt benius a essi una de is scuadras prus stimadas in totu su mundu de sa Promotzioni, e duncas, in su mundu de su càlciu de s'isula). 

E duncas, podeus andai ainnantis, andendi a fai su pròpriu giogu chi eus fatu immoi, cun totus is dexiotu scadras chi ddoi funt in sa Lista B, e seus chistionendi, sèmpiri, est craru, de su campionau de sa Promotzioni. E duncas, parteus cun is de s'Abbasanta (chi s'annu passau nd'ant cassau sa sarvesa, gei si ddu eis a arregodai a solus, desinò nci seu deu chi fatzu custu trabballu pròpriu po si arregodai is cosas), e sigheus cun is de s'Atleticu de Bono (chi funt stètius torraus a piscai, po furriai su fueddu in italianu chi sonat cumenti a "ripescati"), chi ant serrau sa stagioni de s'annu passau gioghendusì is partidas finalis (cussas chi, a trassa de is ingresus etotu, seus costumaus a tzerriai play-off), contras, pròpriu, a is de su Casteddusardu (chi funt stètius piscaus, issus puru, po curri in su campionau de sa Promotzioni) e impari a is de su Tonara (chi funt stètius piscaus torra, apustis chi ant serrau sa stagioni a su segundu postu, a is pabas, pròpriu, de is de s'Atleticu de Masainas, chi eus arremonau ainnantis, in custu artìculu etotu); sigheus duncas cun is de s'Altzaghena (chi ant serrau su campionau de su duamilla e bintitres – duamilla e binticuatru a su primu postu, apustis chi ndi funt cabaus de sa Sèrie D), is de su Bonorva, is de su Bosa (chi funt un'antra de cussas scuadras chi ndi funt depias cabai de categoria, apustis de 'tant'annus chi s'agatant a curri in su campionau de s'Ecellenza), is de su Uddusò (chi ant bintu, a manu bascias, cumenti si narat in italianu, su campionau de sa Primu Categoria de s'annu passau, po su chi pertocat sa Lista C a su mancu), is de su Coghinas, is tattaresus de sa Lanteri, is de su Logusantu, is de sa Macumerese, is de s'Ovodda, is de su Sennaru, is de sa Montalbo de Thiniscole, is de su Istintinu, is de su Tuttavista de Garteddì e is de s'Usinese (chi cust'istadi ant dèpiu saludai s'allenadori chi tèniant s'annu passau, seus chistionendi de Giuliano Robbi, unu de is amigus prus mannus chi su Diàriu Sportivu at tentu in totus custus annus, chi potzat essi in Cielu impari a is santus!). 

E duncas, torru a atacai a scriri in custu artìculu candu su calendàriu narat ca seus arribbaus a su bintiduus de su mesi de agustu, e duncas, cumenti podeis cumprendi a solus (ca a fai su contu nci poneus pagu pagu tempus), cust'artìculu ddu apu pesau in duas diis: a nai sa beridadi fia giai giai pentzendi de mi pigai una dì de pàsiu, po giogai pagu pagu a fai cussu chi si ndi andat in vacantza, a trassa de totus is atrus, ca innoi in Bidd'e Sorris, ma pentzu ca no siat feti una chistioni chi ballit innoi in bidda mia, is butegas, e is negotzius po prus de sa metadi (po no nai giai totus) funt ancora bellus ca serraus, cumenti est giustu puru, ca sa genti tenit su bisòngiu de si spreviai, dònnia tanti, po torrai a recuperai is energias chi spendis (ddi nau diaici, isperendi ca si cumprendat su chi bollu narai) aintru de un annu, pruschetotu po crupa de su trabballu e de totus is cosas chi ddoi funt de atendi. 

E duncas, apu decìdiu, mi parit craru puru, de mi ponni a trabballai po un'antra parighedda de oras custu mengianu puru, a su mancu fintzas a candu no acabbu de ndi pesai is trinta milla corpus a sa tastiera (diaici seu costumau a furriai in sardu su fueddu "battute", cumenti naraus in italianu) chi serbint po preni is artìculus chi ndi bessint aforas dònnia dònnia giòbia (chentza mancu de ndi sartai unu!); e mancai, mi ddu naru a solu, po mi fai fortza, po mi fai coràgiu, sa cida chi benit apa a arrannesci a mi nci fuiai po una parighedda de diis in logu de mari puru, ca chi si depu narai sa beridadi (e chi mi potzu strollicai unu pagheddeddu cun bosatrus, ca ddu scies de su restu ca est una cosa ca mi praxit meda meda a fai, e mi praxit fintzas a m'amachiai, diaici serru sa chistioni cun una rima pura, po giogai a fai su poeta!), mi intendu unu paghededdu fadiau, ma de su restu, cumenti si narat, eus a biri ita totu at a sucedi in su benidori. 

E duncas, s'apu promìtiu, e custu giai de s'artìculu chi est bessiu aforas sa cida passada (su bintinoi de su mesi de agustu, po essi prus pretzisus), chi s'apa a essi chistionau de totus is cropus (ddus tzerriaus diaici, a trassa de s'italianu etotu) chi is assòtzius sardus ant fatu (ant sparau, po sighiri cun sa metàfora) in custus mesis de istadi, ca si sciit: candu is giogas si frimant, intzandus is assòtzius, e is chi tzerriaus diretoris sportivus, incumentzant a trabballai po circai de mellorai, de cuncodrai is rosas de is scuadras cosa insoru po sa stagioni noba, e duncas, in totus custus tres mesis (partendi de su de Lampadas, passendi, est craru, de su de Treulas, fintzas a arribbai, duncas, a su de Agustu) est stètiu totu unu murigu (unu murighìngiu, po manigiai unu fueddu chi m'est sèmpiri praxiu e chi apu sèmpiri intèndiu narai de sa bon'anima de mamma mia) de giogadoris chi lassant una scuadra (sa scuadra innoi, mancai, ant giogau po annus e annus e annus) po andai a giogai cun un antru assòtziu, una cosa ca in su giogu de su càlciu sucedit dònnia dònnia annu, e no nc'est nudda de si spantai, antzis, de su giogu de su càlciu (diaici mi strollicu unu pagheddeddu, e isperu ca no bengiat a essi unu dannu po nesciunu de bosatrus) estus a depi imparai, mancai, ca totu, in custa vida, iat a podi mudai de unu momentu a s'atru: ca oi nci seus, teneus unu trabballu, una famìllia, una domu, ma mancai de cras is cosas iant a podi essi diversas, e cumenti unu giogadori (o un allenadori, ballit de prus puru, chi boleis, feti fadendi su contu ca ddoi funt prus allenadoris, in giru, ca scuadras de allenai, a su mancu po su chi pertocat sa Sardìnnia e su mundu de is diletantis) depit fai su contu ca iat a podi lassai sa scuadra sua a sa fini de s'annu, su pròpriu estus a depi fai nosu cun totus is cosas chi teneus acanta de su coru, cun totus is cosas, duncas, ca funt prus de importu po sa vida cosa nosta. 
Ma podeus pentzai a sa chistioni, puru, cumenti chi sa vida si donessit, fatu fatu meda (prus de cussu chi mancai arrannesceus a pentzai), sa possibbilidadi de mellorai: su dannu est chi, mancai, nemmancu si ndi rendeus contu, de candu si passat su trenu giustu aranti (cumenti si narat, puru e mescamente, in italianu) chi si iat a podi agiudai a mellorai (cun su trabballu, po nd'arremonai unu), e fadeus a tipu is tzurpus, ca no biint, sciadaus, poita tenint dannus mannus a is ogus. 

E duncas, est cussu chi sucedit fatu fatu, in su giogu de su càlciu: ca unu piciocheddu, mancai unu piciocheddu piticu de edadi, lassit sa scuadra innoi est crèsciu, innoi at sèmpiri giogau, fintzas de candu fiat unu pipieddu, unu notzenteddu, po ddu nai cun atrus fueddus, po andai a giogai, mancai, cun un assòtziu de importu prus mannu, chi currit, mancai, in su campionau de s'Ecellenza (chi est su campionau prus mannu, cumenti eis a sciri beni e giai giai mellus de mei, tra totus cussus chi si giogant Sardìnnia, tra cussus, est craru, pesaus de sa Federatzioni Italiana de su Giogu de su Càlciu), o, mancai puru, adderetura in su campionau de sa Sèrie D. 

E duncas, torrendi a nosu, est de una bella pariga de diis, chi no de cidas, chi tèngiu sa gana de si chistionai de totus is giogadoris chi ant cambiau scuadra, e fadendi su contu ca is giogus funt torraus a partiri pròpriu custu domìnigu passau (est berus ca apu scritu s'artìculu chi seis ligendi immoi tra su bintunu e su bintiduus de su mesi de agustu, cumenti s'apu giai nau, ma est berus puru ca cust'artìculu at a bessi a pillu feti su cincu de su mesi de Cabudanni), nc'est de crei ca medas de is giogadoris nous, ddus tzerriu diaici, apant giai fatu gol, mancai, cun sa camisedda noba in pitzus. 

E duncas circu de no perdi atru tempus, fadendi su contu ca cust'annu is giogus ant a torrai a partiri prus chitzi de su chi sucediat me is annus passaus, a su mancu po su chi pertocat sa Promotzioni, chi at a torrai a incumentzai su cuindixi de su mesi de Cabudanni, impari a is de s'Ecellenza etotu. 

E mi benit de pentzai (nci sticu s'ùrtimu strollichimini puru, e po custa cida mi potzu intendi pràndiu, cumenti si narat) ca is piciocus chi andant a scola, puru, ant a incumentzai cun is letzionis prima de s'ora, a su mancu, po cumenti fiant costumaus a fai in totus custus annus: e nc'est giai chini est incumintzendi a si lamentai, ca sa basca est ancora meda e duncas no benit a beni a si nd'abarrai, po cincu e fintzas po ses oras de sighiu, in cussus aposentus, ca funt bascosus de timi (cumenti si narat) in s'istadi, e funt frius de si morri (cumenti si narat, torra) in s'ierru. 

Ma calincunu at narau, puru, apitzus de sa chistioni, ca s'Italia est unu de is istadus innoi is vacantzas de is piciocheddus chi andant a scola durant de prus (a su mancu tra totus is istadus chi ddoi funt in Europa), e in prus nc'est de fai su contu ca in un annu, est a nai in cussus noi mesis de letzionis, tocat a fai calincuna cosa cumenti a duuscentus oras de insegnamentu, cumenti a minimu, e duncas s'unica cosa de fai est atacai chitzi. E sa pròpriu cosa, chi mi permiteis de fai custu arraxonamentu, ballit po is scuadras chi currint me is campionaus de bòcia de s'Ecellenza e de sa Promotzioni, chi ant a torrai in campu, a pigai a corpus de pei sa bòcia, mancai nci siat ancora una bella basca (in dì de oi nci funt sèmpiri cussus trintaduus, trintatres, fintzas trintacuatru gradus, po chistionai de sa temperadura massima, cumenti dda tzerriaus), e duncas, si cumprendit, is giogadoris (e mescamente is prus mannus de edadi, si cumprendit beni) iant a podi tenni calincunu strobu, pruschetotu me is primus bessidas, e pruschetotu po su chi pertocat sa strachesa (o su fadiori, chi si praxit de prus cumenti sonat su fueddu). 

E de su restu, candu fait basca, si cumprendit beni, est prus trabballosu curri avatu de una bòcia. 

E duncas, torrendi a nosu, m'est bèniu unu mesu infartu (cumenti si iat a podi narai, brullendi) candu apu scobertu (o scrobertu, cumenti si narat innoi in Bidd'e Sorris) ca su trabballu cosa mia at a torrai a incumentzai (po cu chi pertocat is campionaus, po su chi pertocat su sighiri is giorronadas de is campionaus, po ddu narai mellus puru) pròpriu su cuindixi de su mesi de Cabudanni, ma a sa fini (e cun custu strollichimini serru sa chistioni, ma po diaderus, si ddu giuru!) mi intendu cumenti candu fia unu piciocheddu, e andammu a is scolas medias (cumenti ddas tzerriaus), e duncas, candu arribbàt custu perìodu (is diis chi nd'arribbant apustis de sa metadi de agustu funt sèmpiri unu pagheddeddu prus friscas, e cumenti ndi torrat su friscu mi parit ca mi torrit su sangui in su corpus, cumenti si narat) mi intendia carrigu, est a nai prenu de fortzas e de gana bella, po torrai a atacai cun totus is fainas chi pertocant unu scienti. Ma si depu narai, puru, ca sa gana bella de trabballai, mancai, ti nd'arribbat candu ses ancora in vacantza (tropu facili diaici, si iat a podi megai calincunu de bosatrus), e invècias, candu is vacantzas funt spaciadas, torrat a arribbai sa gana de si nd'abarrai chentza de fai nudda, mancai spratus in logu de mari (o de montagna, chi si praxit de prus), asuta de su sobi e cun is peis in s'acua. 

Ma, torrendi a nosu, est mellus, fortzis, chi mi pongiu a acabbai su chi depu acabbai, e duncas, s'artìculu po custa cida, e duncas, cumenti s'apu narau giai milli bortas (chi no de prus puru), est mellus chi mi pongiu a chistionai de totu cussu chi est sucèdiu, de importu, si cumprendit, in su mercau de is scuadras sardas, partendi, mancai, de cussas de s'Ecellenza. 

Est unu bisu, mescamente po is giogadoris prus giòvuneddus, su de podi curri cun una scuadra chi giogat in su campionau de importu prus mannu tra totus cussus chi ddoi funt in Sardìnnia, ma est unu prexu mannu, mancai ballit po is giogadoris prus matucheddus de edadi, ndi podi cabai de categoria (cumenti si narat) e sighiri a giogai po donai una manu de agiudu a una scuadra chi, mancai, currit in su campionau de sa Promotzioni, o, ballit aguali, in su campionau de sa Primu Categoria. 

E duncas, no podeus fai atru  (e fiat ora puru, s'at a megali calincunu de bosatrus) ca si nci fuiai a fundu 'e susu, cumenti si narat innoi in Bidd'e Sorris, me is chistionis acapiadas, e chi duncas pertocant, cun is novas chi nd'arribbant (mellus: chi ndi funt arribbadas, in totus custus mesis) de su mercau. 

E duncas, chi seis de acòrdiu, podeus partiri de is de su Santu Tiadoru – Poltu Ridundu, chi, po incumentzai, ant donau is crais de sa scuadra me is manus de Pasquali Malu (sa primu cosa de fai, o mellus, sa primu cosa chi is diretoris sportivus de is assòtzius faint, difatis, est pròpriu cussa de circai un allenadori chi potzat fai su beni de sa scuadra cosa insoru, est craru; e a s'allenadori tocat su trabballu de importu prus mannu, chi est cussu de ponni de acòrdiu binti-binticincu concas, est a nai, binti-binticincu giogadoris, circhendi de ndi bogai totu is cosas prus togas de dònnia unu); Malu, e chi no si ddu arregodais nci pentzu deu (desinò ita abarru a fai innoi?), s'annu passau (est a nai, est craru, in sa stagioni de su duamilla e bintitres – duamilla e binticuatru) nd'est arribbau in sa panchina (cumenti si narat) de is de su Calanzanos candu sa stagioni fiat bella ca incumentzada (da unu bellu arrogu de tempus, chi pròpriu depeus narai sa beridadi), cun is grogus-arrubius (m'est beniu de ddu narai diaici, isperu chi si cumprendat chi seu chistionendi de su cabori de sa camisedda chi is de su Calanzanos manigiant po ndi cabai in campu)  chi s'agatànt, a s'epoca, in acua lègias (cumenti si narat, cumenti si iat a podi narai candu is cosas no andant beni cumenti, invècias, iast bisau), est a nai a s'ùrtimu postu de sa lista, e comentecasiat est arrannèsciu a su pròpriu, mancai totus is strobbus, a ndi cassai sa sarvesa, e candu sucedint cosas diaici chistionaus de miraculu sportivu, fadendi su contu ca is de su Calanzanos ant aciapau sa sarvesa pròpriu me is ùrtimus noranta minudus de su campionau, cumenti chi fessit unu film a trassa de cussus chi donant a sa televisioni. 

Is giogadoris chi ant a sighiri a giogai po su Calanzanos, duncas, funt una bella pariga: est a nai ca ddoi funt una bella pariga de piciocus chi ant a sighiri a curri po s'assòtziu cosa insoru, e chi duncas no ant cambiau camisedda; seus chistionendi, mescamente, po essi prus pretzisus, de Luca Melis e Fabriziu Deiana, chi funt is duus portieris, diaici ddus tzerriaus, a trassa de s'italianu etotu, passendi po is difensoris Riccardo Muzzu e Simoni Spanu, is centurcampistas Samuele Saggia (ca pariat depessit andai a giogai cun is de su Tèmpiu, ma a sa fini de is chistionis no si nd'est fatu nudda), Diego Pala e Federico Mastromarino, impari, puru, a is atacantis Danilo Ruzzittu e Daniele Molinu. Tra is giogadoris chi ant scerau de cojai su progetu de is de su Santu Tiadoru – Poltu Ridundu, agataus su difensori, forti meda, a nai sa beridadi, Jorge Nicolas Pandiani, chi ndi lompit de s'Uruguai e est nasciu in su milli e noicentus norantacuatru, cun su giogadori chi s'annu passau at donau una bella manu de agiudu a is de sa Montalbo de Thiniscole, chi currint in su campionau de sa Promotzioni, in sa Lista B, po essi prus pretzisus. Is crais de su centrucampu, invecias, funt me is manus de Francesco Mannoni, chi at giogau, fintzas a s'annu passau, de su duamilla e noi, cun sa camisedda de is de s'Altzaghena (chi s'annu passau, apustis de essi pèrdiu sa possibbilidadi de si iscriri, e duncas de curri in su campionau de sa Sèrie D, po strobbus mannus chi ant percotau is dirigentis, si funt dèpius acuntentai, ddi naraus diaici, de curri in su campionau de sa Primu Categoria, chi, tra is atras cosas, ant bintu gràtzias a una cursa toga meda). Po s'atacu, invècias, is de su Santu Tiadoru – Poltu Ridundu ant agatau s'acòrdiu cun Manuel Ruiu Sanchez, nàsciu in su milli e noicentus norantaseti, chi s'annu passau est arribbau a donai una manu de agiudu, in su mesi de Idas, apustis de su mercau chi si torrat a oberri in s'ierru, pròpriu a is de su Calanzanos, e duncas, si iat a podi narai ca Pasquale Malu sciit beni cantu podit balli su giogadori, fadendi su contu chi est stètiu bonu a ndi pesai calincuna cosa cumenti a cincu gol in totu. De is de su Crabonaxa, invècias, nd'est lòmpiu Alessandro Mauro, unu piciocheddu giòvuneddu meda, fait a narai ca est nàsciu in su duamilla e cincu, chi me is annus passaus at tentu sa possibbilidadi de giogai, de cresci cun sa scuadra de piciocus de su Casteddu. Po su chi pertocat is de su Barì, invècias, sa scuadra chi nd'ant pesau in Barisardo, gràtzias a su trabballu, togu meda, fait a ddu nai, pruschetotu de su presidenti cosa insoru, est a nai Roberto Ibba, funt fadendi unu mercau bonu meda (cumenti si narat), mescamente me is ùrtimas diis: a sa truma de giogadoris chi ant a fai parti de sa rosa de is biancus-asullus, tocat a nc'aciungi puru Emanuele Tosi, nàsciu in su duamilla e bintitres in Genova, chi giogat in atacu, e candu fiat piciocheddu at tentu sa possibbilidadi de giogai (e duncas de cresci) impari a is de sa Spal, de su Bologna e impari a is de su Entella. Me is annus passaus, Tosi at giogau sèmpiri me is campionaus de s'Ecellenza chi ndi pesant in Liguria, cun sa camisedda de is de su Genova Càlciu e impari a is de sa Voltrese Vultur. De sa Sèrbia, invècias, a Barisardo nd'arribbat Marko Jovic, nàsciu in su milli e noicentu norantotu, crèsciu me in sa scuadra de is piciocheddus de s'FK Rad Belgrado, fintzas a arribbai a giogai in sa Super Liga (chi benit a essi sa Sèrie A de is campionaus serbus, chi cumprendeis su chi si bollu narai), e apustis puru in sa Prva Liga (chi benit a essi sa Sèrie B po su chi pertocat is campionaus chi si giogant in Sèrbia). Po su centrucampu, invècias, is de su Barì ant agatau s'acòrdiu cun Andrei Tugui, chi nd'arribbat de sa Romania e est unu giogadori chi est nàsciu in su milli e noicentus norantases e chi, tra is atras cosas, at fatu unu arrogheddeddu de tempus impari a is de sa Roma, in Italia, ma apustis s'est ingotu (est a nai ca s'est strupiau mabi) e duncas no si nd'est fatu prus nudda (e gei ddu cumprendeis a solus cumenti podit essi tonta sa vida a bortas). Fait a narai puru ca is de su Barì ant fatu unu trabballu bonu meda, fadendi su contu chi ant aciapau s'acòrdiu, puru, cun Igor Marcon, Bara, Murgia, Pereyra, Mabo, Mihali, Resce, Adamo, Dimitrijevic, Deronja, Klisura, Firulesko. Is crais de sa scuadra, invècias, funt stètias donadas a Vitoriu De Carlo.


Attività realizzata col contributo della Regione Sardegna - IMPRENTAS 2023-2024. LR 22/2018, art. 22