Promotzioni: is de s'Alighera funt currendi a solus po ndi cassai s'artziada de categoria; a is atras scuadras abarrant feti is pimpirillas

E duncas, a cantu parit, seus arribbendi a sa metadi de su mesi de donniasantu puru, e custu po atacai cun s'artìculu de custa cida fadendi su contu, po incumentzai, de su tretu chi eus giai fatu, e de su tretu chi s'ammancat ancora de fai, po nci lompi, a su mancu, a sa dì de Natali: cumenti eis a sciri giai (e chi no si ddu arregodais, intzandus deu seu innoi pròpriu po fai custu trabballu puru), nc'ant a essi partidas dònnia, dònnia fini de cida, fintzas a arribbai a su bintunu de su mesi de Idas, innoi s'ant a giogai is ùrtimas partidas po su chi pertocat custu duamilla e binticincu e, apustis de is festas, is giogus ant a torrai a partiri su cuatru e su cincu de su mesi de gennàrgiu, candu eus a essi, giai, in su duamilla e bintises. 

E duncas, tocat a fai unu passu a sa borta, cumenti iant a podi narai is allenadoris, ca candu ddus intendu po is ciaciarradas chi ndi pesaus dònnia cida, mi scoviant ca sa cosa mellus chi si podit fai, est su de pentzai a una partida a sa borta, e custu po circai de mantenni sa conca lìmpia, ddi naru diaici (isperendi chi si cumprendat su chi seu circhendi de si narai) de totus is pentzamentus (e chistionaus mescamente de is pentzamentus lègius, cumenti ddus tzerriant, a su mancu, cumenti ddus apu sèmpiri intèndiu narai innoi in sa bidda mia, e seu chistionendi de Bidd'e Sorris); e duncas, fadendi su contu ca is consillus chi ballint po su mundu de sa bòcia, est a narai, duncas, is consillus ca is allenadoris donant a is giogadoris cosa insoru, iant a podi balli, puru, po sa vida ca si depeus scroxai, ddi naru diaici (isperendi ca su fueddu no si sonit tropu mabi, fadendi su contu ca a bortas mi capitat de giogai a fai su poeta, prus ca su giornalista sportivu), apa a sighiri cust'arrastu deu puru. 

E intzandus, custu bollit narai ca apa a circai de no nci pentzai a cantu ammancat a su Nadali, a su mancu fintzas a candu s'eus agatai ancora in su mesi de donniasantu. Ca mi parit ariseu, de su restu, candu est incumentzau, e immoi su fini e cida chi at a benni at a essi cussu de su sexi. 
E duncas, eia, oi (chi est lunis, e seu atachendi a scriri s'artìculu chi ballit po is novas de su DiàriuSportivu chi nd'at a bessiri feti de giòbia, cumenti a dònnia giòbia de su restu) mi intendu unu pagheddeddu stracu, e ddu sciu beni cumenti mi pigat su mesi de donniasantu, ma fra una pariga de mes'oras apa a serrai cun totu sa barraca de su trabballu cosa mia (ddi nau diaici, sèmpiri po giogai unu pagheddeddu a fai su poeta) e m'apa a podi pasiai, a su mancu unu pagheddeddu, ainnantis de torrai a atacai cun is fainas, e is storias, acapiadas a is campionaus de càlciu de is assòtzius diletantis chi sigheus cun su giàssu de su Diàriu Sportivu, e seus chistionendi de is campionaus de s'Ecellenza, de sa Promotzioni, de sa Primu e de sa Segunda Categoria, chentza de si ndi scaresci, est craru (e nci iat a mancai atru, cumenti si iat a podi narai) de is de sa Sèrie D (o mellus: de is scuadras sardas chi currint me in su campionau de sa Sèrie D) e de sa Torres, chi currit in su campionau de sa Sèrie C. 

E duncas, su mesi de donniasantu at a essi bellu e tostau de matziai, cumenti si iat a podi narai, ma seu seguru ca, cun s'agiudu de su Cielu (po ddu narai diaici, ca a bortas mi parit ca chentza de sa Gràtzia de Deus s'omini no iat a podi fai nemmancu unu passu in custu mundu macu e totu atrotoxau), eus arrannesci a nd'arribbai puru a su trinta (e seu chistionendi, est craru, sèmpiri de su mesi de donniasantu, si cumprendit?), chi, nemmancu a ddu fai aposta, at a essi de domìnigu: depu feti mantenni sa calma, e sa passièntzia, e chi calincuna cosa depessit andai mabi (est a narai, chi mi ndi scaresciu calincuna cosa in calincunu artìculu, cumenti m'est sucèdiu de su restu custu mengianu etotu, candu mi ndi seu scaresciu de scriri sa istoria de sa partida tra is de su Siligo e is de su Lauras), o depessit andai a trota (po manigiai atrus fueddus puru), intzandus mi praxit a pentzai ca eis a tenni piedadi de mei, e de is collegas cosa mia puru; sa cosa mellus chi podeis fai, candu bieis chi, mancai, ammancat calincuna cosa me is artìculus chi ndi pesaus (e megu a chistionai, immoi, pruschetotu de totus is artìculus chi ndi pesaus in italianu) est cussa de si scriri, de si ddu fai sciri, e nous eus a aparixai, eus a aderetzai is cosas chi mancai no funt stetias pesadas cun totu s'atentzioni chi serbit. Ca de su restu, mi megu a solu a solu, aintru de sa conca tèngiu feti unu crobeddu (e no tres) e duncas a bortas nci iat a podi essi calincunu sbàlliu. 

E mancu mali chi seus chistionendi de sbàllius piticus, est a narai, ca no nc'est nesciunu chi arriscat de nci perdi sa vida po crupa de is erroris (e de is arroris) chi fatzu, ca mancu mali ca no seu unu dotori chi, mancai, abarrat a totu dì operendi is personas, ca cussus eia ca funt erroris (e arroris) mannus. 

E duncas, cumenti fatzu dònnia cida, no m'abarrat atru de fai ca chistionai, ma unu pagheddeddu feti (po no arriscai de si fai sa conca a acua, e po no arriscai de si ndi furai su tempus chi mancai nemmancu teneis), de su tempus chi est fadendi (fadendi su contu ca, cumenti unu ritu, de su tempus chi est passau, de su tempus chi est passendi nd'apu giai chistionau, a su mancu po custa cida): e duncas, eia, a cantu parit custu fini de cida passau nd'est arribbau su frius, cun is temperaduras minimas chi ant tocau is ses-seti gradus, e at ghetau puru unu bellu tantixeddu de acua, e duncas, eia, si iat a podi narai ca est arribendi su tempus po fai su fogu, e po allui is istufas. E cumenti si megat Herman Hesse, ca est stètiu unu de is poetas, de is scritoris de importu prus mannu chi ant tentu in Germania, a su mancu a sa fini de su milli e otucentus e fintzas a arribai a sa metadi de su milli e noicentus, "deu no timu de passai is meris longus de s'atonzu e de s'ierru aranti de sa stufa", ca de su restu tèngiu sèmpiri calincuna cosa de bellu de studiai, cumenti si iat a podi narai, calincuna cosa de bellu de ligi po nci passai su tempus; e nc'est de narai puru ca su fogu (su de ddu fai, po incumentzai) mi andat meda meda meda; e pròpriu in custas ùrtimas diis megamu a pentzai, tra mei e mei etotu (e mi praxit fintzas a m'amachiai, custa cosa de passai is oras arraxonendi apitzus de is cosas mia etotu, e mancu mali, mi megu immoi, ca tèngiu unu pagheddeddu de tempus, puru, po pentzai a is cosas mia, a is circas chi sigu, e chi funt una de is cosas de importu prus mannu po sa vida cosa mia), ca seu fortunau, a arrannèsci a sarvai una parighedda de oras, dònnia dì, po donai a papai a s'anima cosa mia puru; e cun custu bollu narai, pruschetotu, ca eia, nci funt esercìtzius ca fatzu dònnia dì, e chi serbint po s'anima, po sa conca: su de mi podi fai una passillada po spreviai candu acabbu, candu serru cun su trabballu; su de podi ligi calincunu lìbbru (mancai is libbrus de filosofia), su de podi tenni a su mancu una mes'oredda po podi torrai a pentzai a totus is cosas chi ligu (chi mi cumprendeis po su chi si bollu narai), e mancu mali, e gràtzias a su Cielu, chi tèngiu puru sa possibilidadi de fai unu pagheddeddu de yoga (mancai un'orixedda), candu mi ndi pesu, dònnia dònnia mengianu. 

E duncas, eia, torrendi a su tempus chi est fadendi, nc'at a essi calincuna dì de sobi, est a narai ca aintru de sa dì at a sighiri a fai calincuna cosa cumenti a bintitres gradus, e no funt pagus de seguru (fadendi su contu ca s'atonzu est brintau giai giai duus mesis fait, e fadendi su contu ca si nd'ammancat un antru mesi feti ainnantis chi nd'arribit s'ierru), e custa mi parit una fortuna manna (e chistionu, duncas, eia, eis cumprendiu beni, de su de podi bivi in Sardìnnia), una de cussas fortunas ca, cumenti si iat a podi narai, no ddas pagat su dinai. 

E poberus, mi benit de pentzai diaici, totus is sardus chi ddoi funt spratus in custu mundu, mancai in logus frius puru (emu agatau, emu atobiau una copia de sardus in Bergen puru, chi est in Norvegia, e si podeis immaginai a solus de su frius chi nc'est ingunis); e potzu cumprendi su chi si depint bivi, e potzu cumprendi puru, a solu a solu, de sa nostalgia chi podint tenni aintru de su coru; e chistionu deu ca no seu mai arrannèsciu, in totu sa vida mia (chi andat ainnantis de calincuna cosa cumenti a corantacuatru annus, giai giai corantacincu, chi pròpriu si depu narai sa beridadi) a abarrai atesu, aforas de s'isula stimmada cosa mia, nareus, po prus de sessanta diis. 

E duncas, eia, po custa cida puru nd'apu bogau unu bellu tanti de strollichiminis e duncas, nc'est su tanti po mi intendi prexau (e prandiu, puru, chi mi permiteis de manigiai custu fueddu, e chi cumprendeis su chi seu circhendi de si narai); e custu bollit narai, mescamente e pruschetotu, ca podeus andai a castiai cumenti funt andadas is cosas in custu ùrtimu fini de cida chi si seus lassaus a is pabas, e chi fiat prenu a cucuru de partidas; e is ispantus (si iat a podi narai diaici) no funt stètius pagus de seguru. 

E immoi andu pròpriu a si contai cali funt stètias is cosas de importu prus mannu chi ndi funt bessidas aforas, e chistionu, est craru, sèmpiri de resultaus e de partidas, si cumprendit, berus est? 
E arribbau a custu puntu de sa chistioni, deu ia a partiri (sèmpiri chi bosatrus seis de acòrdiu cun mei, e megu a brullai, unu pagheddeddu feti, si cumprendit) andendi torra a pigai in consideru, cumenti si iat a podi narai (e cumenti m'est bèniu de narai, de su restu) is cosas chi m'at scoviau sa cida passada Simoni Deliperi: si ddu apu giai narau, ca est stètia (ca nd'est bessida aforas, po ddu narai mellus puru) una ciaciarrada toga meda, chi m'at regalau perdas de sabiesa, de sabidura (cumenti si iat a podi narai, puru); e cumenti s'arrapitu fatu fatu, de su restu, mi praxit a fai custu giogu: est a narai, a fai su contu ca is cosas chi mi contant is allenadoris, apitzus de is scuadras chi sighint, e apitzus de is partidas chi giogant, potzant balli (potzant essi de importu, fait a ddu narai diaici puru) po sa vida, po is arroris chi si depeus scroxai in sa vida de dònnia dì. 
E duncas, eia, su de mi torrai a apicai (ddi naru diaici) a is fueddus de Simoni Deliperi, m'at a permiti, m'at a donai s'ocasioni (po ddu narai mellus puru) de andai a castiai, impari a bosatrus, cumenti funt cuncodradas is cosas me is duas listas de su campionau de sa Promotzioni, partendi pròpriu de sa Lista B, chi est cussa, tra is atras cosas, innoi currint is de su Ilartzi. E duncas, eia, Simoni Deliperi m'at regalau is fueddus cosa sua una pariga de diis ainnantis de sa partida cun is de s'Alighera, e chi sa cida passada, mi parit bastanti craru puru (e megu a brullai), no podestus sciri cumenti iant a essi acabbadas is cosas, immoi, a giogus fatus (cumenti si iat a podi narai), podeus ligi is fueddus de Simoni Deliperi cun un atru sentidu, chi mi cumprendeis su chi si bollu narai, fadendi su contu (m'acudu a si ddu narai acoitu) ca is de s'Alighera funt arrannèscius a binci cun su resultau, togu e tundu tundu, de cuatru a zeru, e nd'ant cassau sa de dexi bìncidas me is primus dexi bessidas de su campionau de sa stagioni de su duamilla e binticincu – duamilla e bintises. 

E m'acudu a si narai puru, immoi chi nci seu, ca in totu sa istoria de s'assòtziu (e chistionu de is de s'Alighera, mi parit craru), no fiant mai arrannèscius a ndi cassai resultaus diaici bonus, cun totu custa biga de partidas bintas, s'una avatu de s'atra, totu de sighiu, cumenti si iat a podi narai, puru. 
E duncas, torraus a is fueddus de Simoni Deliperi, ca mi iat contau ca su de podi torrai a s'atobiai cun Mauru Giorico (chi est su chi sighit is fainas de s'Alighera, e seus chistionendi de unu de is allenadoris prus bravus, prus fortis, e cun s'esperientzia prus manna a is pabas tra totus cussus chi nci funt in dì de oi in Sardìnnia, a su mancu po su chi pertocat su mundu de is scuadras de diletantis), iat a essi stètia una cosa bona meda, e toga. «Is de s'Alighera, custu est craru, e ddu podeis biri a solus, deu creu de podi narai custu, funt fadendi una cursa, e duncas, unu campionau a parti, ca parit ca no tengiant aversàrius in custa cursa; e chi ant a sighiri diaici, intzandus no ant a tenni strobbus po ndi cassai su primu postu de sa lista, e po ndi cassai, duncas, s'artziada in su campionau de s'Ecellenza. Po mei at a essi unu prexei mannu meda su de mi podi atobiai torra cun Giorico: po mei in su mundu de sa bòcia est a trassa de babbu, chi cumprendeis su chi megu a si narai, su chi seu circhendi de si narai, po ddu narai mellus puru. Con issu tèngiu un acapiu mannu meda, e no feti po su chi pertocat su giogu de su càlciu, un acapiu chi ndi bessit aforas de su campu de giogu e de is spolladroxus puru, cumenti si narat, e sèmpiri chi seu arrannescendi a mi fai cumprendi. Tocat a fai su contu, intzandus, ca apu tentu sa fortuna, sa bona sorta de podi essi allenau de issu, est a narai, ca apu tentu sa fortuna manna meda de giogai in una de is scuadras chi at sighiu issu, e apustis apu tentu s'ocasioni, ocasioni de oru, si iat a podi narai diaici puru, de ddu podi agiudai a is tempus de sa Torres, candu issu fiat s'allenadori de sa scuadra tattaresa, si cumprendit de ita seu chistionendi, berus est? Deu apu fatu s'allenadori in segunda, cumenti si narat a trassa de s'italianu etotu, e depu narai, mi parrit craru puru, ca gràtzias a issu apu imparau una biga manna meda de cosas, e ddi torru gràtzias po custu, mi parit craru». 

Cumenti s'apu arremonau ainnantis, Simoni Deliperi m'at contau, m'at scoviau custas cosas me is diis ainnantis de sa partida, e est craru ca issu, po primu, bisàt de ndi cassai calincunu puntixeddu, mancai sa partida fessit dificili meda, fadendi su contu ca is de s'Alighera (e si cumprendit de is numerus chi ndi funt pesendi, chi nd'ant pesau fintzas a oi),no ant ancora pèrdiu nemmancu una partida, e ant sèmpiri bintu candu funt cabaus in campu po is partidas chi ballint po su campionau. 
E duncas, diaici ant fatu domìnigu passau etotu, fadendi su contu ca funt arrannèscius a binci sa partida cun su resultau de cuatru a zeru. Ma is fueddus chi m'at regalau Deliperi ballint ancora, mancai sa partida siat giai bella ca giogada, e bella ca acabbada. 

Ma ainnantis de si contai ita ndi pentzu, andu a si intregai, po primu cosa, totu su chi m'at contau s'allenadori de su Ilartzi. «Su giogu de sa bòcia, e si cumprendit beni, regalat fatu fatu meda, istorias togas: a bortas is partidas prus dificilis funt cussas chi ti donant is emotzionis prus mannas, mancai puru candu sa cosa parit impossibbili, cumenti si iat a podi narai, e cumenti seu narendi, de su restu». 

E sa pròpriu cosa, deu creu, si podit narai de sa vida: nci funt storias ca si faint pentzai ca sa vida, a bortas, siat a trassa de unu miraculu; sucedint cosas chi unu no si iat a abertai mai, chi cumprendeis su chi si bollu narai; nci funt personas chi funt mobadias e chi ndi sanant candu, mancai, is dotoris narànt giai ca no nci fiat prus nudda de fai; nci funt personas chi nd'arribbant a tocai s'inferru (e no su cielu, cumenti si narat) cun unu didu, cumenti nci funt personas ca annadant in acua lègias meda, ma chi arrannescint, e a bortas no si cumprendit nemmancu cumenti apant fatu, a ndi bessiri aforas, giai giai cumenti chi nudda fessit. 

E duncas, eia, is miraculus sucedint in su giogu de sa bòcia, est a narai in una partida de campionau, o de sa Cupa Italia (o de is cupas prus mannas puru), ma mescamente is miraculus nd'arribbant in sa vida de sa genti. Sa parti de importu prus mannu, sa cosa de importu prus mannu, cumenti mi benit a ddu narai, est su de si nd'acatai de is miraculus, ca cumenti m'arrapitu a solu a solu, a bortas teneus is miraculus asuta de is ogus, ma no si nd'acataus, mancai poita seus pentzendi a atru (in sa conca cosa nosta nci funt sèmpiri una biga de pentzamentus, e gei si cumpredit beni cumenti andant is cosas), o mancai, mellus puru po cumenti cratzat sa cosa, no credeus a is miraculus. 

Apustis Deliperi m'at regalau un'antra perda de sabiesa, candu m'at contau ca is de su Ilartzi, e duncas, issu impari a is piciocus cosa sua, impari a is giogadoris chi sighit (fadendi su contu, est craru, ca issu est s'allenadori), depint pentzai feti, e naraus, diaderus, feti, a is fainas cosa insoru, a is fainas chi ddis pertocant. 
E custu, de su restu, est unu consillu chi iat a podi balli po sa vida cosa nosta, sa vida de dònnia dì, cumenti mi praxit a dda tzerriai. Ca a bortas, mi parit de podi narai custu puru, passaus su tempus a pentzai a su chi funt fadendi (o no funt fadendi, ballit aguali, mi parit craru) is atrus, prus ca pentzai a su chi depeus fai (o no depeus fai) nosu. «Depeus pentzai – at sighiu a mi contai Deliperi – a una partida a sa borta, chi cumprendeis su chi seu circhendi de si narai, ma chentza de si ndi scaresci, peròu, ca su campionau at a essi longu meda, e su bisu cosa nosta est cussu de arrannèsci a ndi cassai sa sarvesa, chentza, mancai, de trumentai tropu. Est craru, is partidas si giogant una a sa borta, e is piciocus cosa mia depint imparai a ndi cabai in campu cun sa conca sbuida de totus is pentzamentus chi no serbint, chi no nci brintant nudda cun sa partida chi megaus a giogai, chi cumprendeis su chi su circhendi de si narai. A su campu, duncas, a sa fini de is giogus, a sa fini de is noranta minudus de giogu, po ddu narai mellus puru, at a tocai a donai su resultau, o, mellus puru, su giudìtziu, sa sentèntzia. Nosu depeus circai de ndi bogai aforas totu su de bonu chi tenus in su coru: sa determinatzioni, po incumentzai, e sa gana de binci, mi parit craru puru. Chistionaus de sa partida chi eus a depi fai contras a is primus de sa lista, contras a is primus de sa classi, e mi parit craru puru ca issus partaint cun prus possibbilidadis de is chi teneus nosu de binci sa partida; ma no iat a essi de seguru sa primu borta ca una scuadra chi s'agatat me is ùrtimus postus de sa lista arrannèscit a firmai sa cursa de una scuadra chi, mancai, s'agatat a is primus postus, o a su primu postu, cumenti is de s'Alighera etotu». 

E duncas, is de su Ilartzi si dda funt giogada, ma custu no est stètiu bastanti po ndi boddiri calincunu puntixeddu. Ma deu creu ca in sa vida, e no feti in su giogu de sa bòcia, in su giogu de su càlciu, sa cosa de importu prus mannu, fortzis, est cussa de nci provai, mancai is cosas siant dificilis; sa cosa chi podeus fai est cussa de si fai agatai prontus po giogai sa partida, sa isfida cosa nosta, ma apustis, e ddu scieus beni, in sa vida, cumenti in su gogu de sa bòcia etotu, is cosas ti podint andai beni meda, o mabi. Ma su giogu abarrat togu etotu, feti poita, mancai, ti donat sa possibilidadi de nci provai; e in s'interis chi nci provas, in s'interis chi ti dda gherras, in s'interis chi ti dda giogas, intzandus ses imparendi calincuna cosa, mancai calincuna apitzus de tui etotu: nci funt personas ca candu s'agatant aranti a isfidas dificilis meda, intzandus scoberrint una biga de cosas, chi mancai no sciiant, apitzus de issus etotu. 

E duncas, arribbaus chi seus a custu puntu de s'artìculu, deu creu ca sa cosa mellus chi si potzat fai siat cussa de andai a castiai, impari, mi parit bastanti craru, cumenti funt cuncodradas is cosas me is duas listas de su campionau de sa Promotzioni, partendi, pròpriu, de is de sa Lista B. 

E duncas, eia, cumenti s'apu giai narau, a su primu postu agataus is de s'Alighera, cun trinta puntus allogaus a su callenti (cumenti si iat a podi narai, e cumenti m'est bèniu de narai), chi ndi funt arribbaus gràtzias a is dexi partidas bintas me is primus dexi bessidas: e fait a narai, puru, immoi chi nci seus, ca in totu su mundu de is diletantis sardus no nc'est nesciuna scuadra chi est currendi diaici a forti cumenti funt fadendi is piciocus sighius de Giorico. 
Is de s'Usinese, po cumprendi mellus de ita seus chistionendi, e chi in dì de oi s'agatant a su segundu postu de sa lista, tenint binticuatru puntus, chi funt ses in mancu de cussus chi tenint is primus de sa classi; e no funt pagus de seguru, cussus ses puntus ca is piciocus sighius de un allenadori bravu, e d'esperièntzia, cumenti est Pierluigi Scoto, iant a depi recuperai; e no funt pagus pruschetotu chi pentzaus ca is de s'Alighera no ndi funt arrutus nemmancu una borta po immoi, est a narai, ca no ant pèrdiu ancora nemmancu una partida. 
A su de tres postus, invècias, agataus is de su Bonorva, chi tenint bintitres puntus. Custas duas scuadras, chi s'apu arremonau immoi (e chistionu, est craru, mi parit de podi narai diaici, de is de s'Usinese e de is de su Bonorva) ant bintu, e sa cosa ballit po totu e duas, is ùrtimas partidas chi ant giogau: is arrùbius – brau ant bintu cun su resultau, bellu e tundu tundu, de cincu a unu contras a is de su Tuttavista, chi, invècias, s'agatant a s'ùrtimu postu, cun nemmancu unu puntixeddu pesau (est a narai, eia, eis cumprendiu beni, chi s'agatant, in dì de oi, apustis de dexi giorronadas, cun zeru puntus in buciaca); is de su Bonorva, invècias, funt arrannèscius a binci sa partida de importu mannu (una de is partidas de importu prus mannu de sa de dexi giorronadas, po su chi pertocat sa lista de partidas chi ballint po s'andada) contras a is de s'Altzaghena, una de cussas scuadras ca, a su mancu a s'incumintzu de s'annu, a s'incumintzu de sa stagioni de su duamilla e binticincu – duamilla e bintises, pariant tra cussas chi depiant curri po ndi cassai su primu postu. E invècias is de s'Altzaghena in dì de oi s'agatant a su de ses postus in sa lista, cun sexi puntus allogaus in buciaca, a funt (a fai is contus nci poneus pagu meda) catodixi in mancu de is chi tenint is primus de sa classi de s'Alighera. 

E sigheus a andai ainnantis, diaici, in su pròpriu arrastu: is de sa Macumerese s'agatant in dì de oi, apustis de dexi partidas giogadas, a su de cuatru postus in sa lista, cun binti puntus in buciaca, chi nd'arribbant gràtzias a ses partidas bintas, duas partidas chi ant serrau cun su resultau siddau in paridadi, e duas partidas chi ant pèrdiu; custu domìnigu passau is de sa Macumerese nd'ant cassau sa bincida, de importu mannu meda, in domu de is de su Logusantu, sighius de Madeddu, cun su resultau de unu a duus; is de su Logusanto, in dì de oi, s'agatant cun calincuna cosa cumenti a cuindixi puntus allogaus in buciaca. 

A is pabas de is de sa Macumerese, cun feti tres puntus in mancu de is chi tenint is biancus-asullus, agataus is de su Coghinas, sighius de Congiu, ca in s'ùrtima partida chi ant giogau pròpriu custu domìnigu passau, funt arrannèscius a binci cun su resultau de cincu a unu in domu de is de su Casteddusardu: is dexesseti puntus chi ant acutu a allogai, chi ant acutu a ndi cassai fintzas a oi nd'arribbant gràtzias a cincu partidas bintas, duas partidas chi si funt serradas cun su resultau in paridadi e tocat a fai su contu, eia, immoi chi nci seus, ca is de su Coghinas ant pèrdiu fintzas a immoi tres partidas. 
E duncas, arribbaus a fai is contus in buciaca a is de s'Ozierese, sexi puntus in totu, chi ndi funt arribbaus gràtzias a cincu partidas bintas e a una partida chi s'est serrada cun su resultau in paridadi: in s'ùrtima bessida, is grogus-brau funt arrannèscius a binci in domu de is tattaresus de su Li Punti, cun su resultau, togu meda, de tres a unu; po is de su Li Punti, sighius, cumenti est sucèdiu, de su restu, in totus custus ùrtimus annus, de Salis, is partidas pèrdias funt calincuna cosa cumenti a seti, e no funt pagus de seguru; is asullus tenint in dì de oi (apustis de dexi partidas giogadas) calincuna cosa cumenti a cincu puntus in buciaca, chi ndi funt arribbaus gràtzias a s'ùnica partida chi ant bintu fintzas a immoi, e in prus, is tattaresus funt arrannèscius a ndi cassai atrus duus puntus gràtzias a duas partideddas chi si funt serradas cun su resultau siddau in paridadi. 
E sigheus a andai ainnantis, castiendi cumenti funt cuncodradas is cosas po su chi pertocat sa Lista B de su campionau de sa Promotzioni, cun is de su Bosa, sighius, po cust'annu puru, de un allenadori de importu, e de esperièntzia manna, cumenti est Tore Carboni (fadendi su contu ca me is annus passaus Carboni at giogau cun is scuadras de professioneris, in giru me in totu Italia): duncas is arrùbius-brau tenint, in dì de oi, dexi puntus allogaus, chi ndi funt arribbaus gràtzias a cincu partidas bintas, cun atras cincu partidas chi ant pèrdiu. Sa cosa chi mi benit de narai, a su mancu castiendi is numerus chi nd'ant pesau fintzas a immoi is de su Bosa, est ca no ant ancora serrau una partida in paridadi: in domu de is de su Bosa, duncas, iat a fai a narai custu puru, o bincint, o perdint; eus a biri, immoi, cumenti ant a sighiri a andai is cosas. In s'ùrtima bessida, po serrai sa chistioni chi pertocat is bosanus, is piciocus sighius de Tore Carboni ndi funt arrutus, ddi naru diaici (isperendi chi si potzat cumprendi su chi seu circhendi de si narai, est a narai ca, eia: ant pèrdiu), in domu de is de su Campanedda, cun su resultau de sa partida chi est stètiu de unu a zeru po is tattaresus. 
E pròpriu is tattaresus, intzandus, s'agatant cun catodixi puntus in sa lista (est a narai, eia, unu puntixeddu in mancu de is chi tenint is de su Bosa, a su mancu in dì de oi), e chi ndi funt arribbaus gràtzias a cuatru partidas chi ant bintu, e gràtzias a is duas partidas chi ant serrau cun su resultau in paridadi. Cuatru funt, de su restu, is partidas chi is de su Campanedda ant pèrdiu fintzas a oi. 
Cun catodixi puntus agataus puru is de su Santu Giorgiu de Peifugas, chi custu fini de cida passau, peròu, funt arrutus, aranti de is tifosus cosa insoru etotu (est a narai, duncas, in domu) in sa isfida contras a is de su Istintinu, chi nd'ant cassau is tres puntus gràtzias a su resultau de duus a zeru. Is de su Santu Giorgiu de Peifugas ant bintu po cuatru bortas, e po duas bortas si funt dèpius acuntentai de feti unu puntixeddu, po ddu narai diaici; is piciocus sighius de Piga, chi est unu de is allenadoris prus giovuneddus chi ddoi funt cust'annu, ant pèrdiu, invècias, cuatru partidas fintzas a oi, e a su contu, eia, mi parit bastanti craru, nci depeus ponni puru sa partida chi ant pèrdiu custu domìnigu passau. 
E duncas, fadendi su contu ca ddus eus arremonaus immubagora, arribbaus a chistionai pròpriu de is de su Istintinu: cun cussa de custa cida passau (cumenti s'apu narau immubagora, de su restu) is biancus-asullus nd'ant cassau sa de cuatru partidas bintas in custu campionau e tenint in buciaca calincuna cosa cumenti a doxi puntus; custu bollit narai, puru, ca in custas primas dexi bessidas (e si iat a podi narai ca giai giai sa metadi de sa stagioni est bella ca fata, mancai manchint ancora cincu cidas po arribbai a sa fini de is partidas chi pertocant s'andada) no ant serrau (a su mancu fintzas a oi) nemmancu una partida cun su resultau in paridadi; e duncas, in domu de is de su Istintinu puru (a trassa, pròpriu, de su chi eus narau po is de su Bosa) o bincint o perdint, atras bias non ddi connoscint, chi cumprendeis su chi si bollu narai. 
E duncas, cun doxi puntus (chi ballint, e parit unu giogu, parit una brulla, po su de doxi postus in sa lista) agataus is de su Thiesi puru, sighius de Gianmario Rassu, chi s'apu arremonau, custu est pagu ma seguru, in una de is cidas ainnantis a custa, chi mi nd'arregodu beni. E duncas, is birdis-nieddus ant acutu a ndi cassai tres partidas bintas, e po tres bortas ant serrau sa partida cun su resultau siddau in paridadi. In s'ùrtima bessida, mancu a ddu fai aposta, is piciocus sighius de Gianmario Rassu, ant serrau sa partida in domu de is de s'Atleticu de Bono cun su resultau de zeru a zeru. 
A is pabas de is de su Thiesi, cun dexi puntus, agataus is de su Casteddusardu: dexi puntus in totu, intzandus, chi ballint po su de catodixi postus in sa lista; is biancus-arrùbius nd'ant cassau noi puntus gràtzias a is tres partidas chi ant bintu fintzas a immoi, e un antru puntixeddu gràtzias a sa partida chi s'est serrada in paridadi (e megu a chistionai de sa de cuatru partidas de sa lista de s'andada, contras a is de s'Usinese, chi s'est giogada su bintotu de su mesi de Cabudanni). Custu bollit narai, puru (ca a fai is contus nci poneus pagu meda), ca is de su Casteddusardu ant pèrdiu ses partidas apitzus de is dexi chi ant giogau fintzas a immoi, fintzas a oi. 
A is pabas de is de su Casteddusardu, agataus is de s'Atleticu de Bono (chi eus arremonau, de su restu, pròpriu immubagora), cun seti puntus allogaus in buciaca, chi ballint po su de cuindixi postus in sa lista; is de su Bono, a su mancu fintzas a immoi, funt arrannèscius a binci feti po duas bortas, e nd'ant cassau un antru puntixeddu gràtias a sa partida chi ant giogau contras a is de su Thiesi, e de sa cosa si nd'apu chistionau immubagora, nemmancu a ddu fai aposta. 
Cun seti puntus, intzandus, ddoi funt is de su Ilartzi puru, sighius, cumenti s'apu giai contau in custu artìculu etotu, de Simoni Deliperi; is grogus-arrùbius, in dì de oi, tenint feti duas scuadras a is pabas, e seus chistionendi de is de su Li Punti e de is de su Tuttavista. 
E immoi chi nci seu (immoi chi nci seus, iat a fai a ddi narai diaici puru) andaus a castiai cali ant a essi is partidas chi s'ant a giogai in custu fini de cida chi est arribendindi (e chi ant a balli po sa de undixi giorronadas de sa lista de partidas de s'andada), allestru meda, e chi at a essi, sèmpiri po fai su contu de su tempus chi est passendi (cumenti fatzu a s'incumintzu etotu de is artìculus chi ndi pesu in sardu, e deu creu ca scieis beni cumenti andant is cosas), su de tres fini de cida de si mesi de donniasantu; est a narai, duncas, ca apustis de custu nd'ant a mancai feti atrus duus, ma de sa cosa nd'eus a chistionai mellus, mancai, in s'artìculu chi nd'at a bessiri aforas giòbia chi at a benni. 
Duncas si potzu narai ca is primus de sa classi de s'Alighera si dda ant a depi biri contras a is de s'Atleticu de Bono: tra is duas scuadras ddoi est una forada, ddi naru diaici (chi cumprendeis su chi tèngiu in conca), de calincuna cosa cumenti a bintitres puntus, e no funt pagus; ma cumenti s'at scoviau (o m'at scoviau, chi a su contu mi nci pongiu feti deu) Simoni Deliperi, no iat a essi de seguru sa primu borta ca una scuadra ca s'agatat me is ùrtimus postus de sa lista, arrannèscit a ponni is bastonis tra is arrodas (cumenti si iat a podi narai, a trassa de cumenti si narat in italianu etotu) a una scuadra chi mancai, cumenti is de s'Alighera etotu, s'agatat a su primu postu (o, ballit aguali, a is primus postus de sa lista); eus a biri, intzandus, cumenti ant a andai is cosas. 
E sighendi a castiai cali ant a essi is paertidas chi s'ant a giogai custu fini de cida chi est arribendindi, po su chi pertocat, sèmpiri, su campionau de sa Promotzioni in sa Lista B, is de s'Altzaghena ant a circai de torrai a partiri contras de is de su Casteddusardu, in domu cosa insoru; po is de su Bosa nc'at a essi sa partida, in domu, contras a is de su Logusantu; po is de su Coghinas, invècias, nc'at a essi de si donai de fai in sa partida contras a is de su Campanedda; una de is partidas prus togas de sa de undixi giorronadas at a essi, de seguru, cussa tra is meris de domu de sa Macumerese e is allenus de s'Usinese; toga meda, ndi seus segurus, at a bessiri sa isfida tra  is de s'Ozierese e is allenus de su Bonorva; po su Istintinu nc'at a essi de giogai sa partida contras a is de su Li Punti, e po sa cursa concas a sa sarvesa, ddoi ant a essi puntus grais cumenti a su prumu in sa isfida tra is de su Thiesi e is de su Santu Giorgiu de Peifugas, po no chistionai de sa isfida tra is de su Tuttavista de Gartellì e is de su Ilartzi.




Attività realizzata col contributo della Regione Sardegna. IMPRENTAS 2024-2025. LR 22/2018 art. 22