Sa Fermassenti de Roberto Concas: una scuadra de piciocus chi bollit curri sempri prus a forti

Chi ses unu piciocu matucu de Santu Giuanni Suèrgiu, o de is biddas acanta, pois scerai de andai a giogai a bòcia cun sa scuadra de sa Fermassenti, una de is prus antigas chi nci funt in Sardìnnia e in sa zona de Carbonia. Su presidenti, Antonio Massenti, impari a Maria Tiralongo e a totus is atras personas chi nci ponint su coru apitzus de custa faina, traballant dònnia dii po donai sa possibillidadi, a mannus e piticus, de passai una pariga de oras in cumpangia, sighius de allenadoris bravus, chi scint beni cussu chi faint. Po cust'annu ddoi est sa Juniores de mister Silvio Di Meglio e di Tore Carta Senette e sa prima scuadra, cun mister Roberto Concas.

Roberto Concas est prexau che una Pasca po cumenti funt andendi is cosas: «Nci funt medas piciocheddus de sa Juniores chi funt giai prontus po giogai in sa scuadra manna, ma deu naru sempri chi serbit passièntzia». Agoa sighit: «Ddoi teneus una biga de giogadoris, cust'annu ndi funt arribaus atrus cuatru o cincu nous, poita seus provendi a essi prus fortis de s'annu passau, ma is partidas funt trinta e serbit s'agiudu de totus, ddu scieus giai chi ant a arribai is dificurtadis, calincunu s'ingollit, atrus tenint strobus in domu o cun su traballu. Po imoi perou, no est facili scerai is piciocus chi depint giogai su domingu, ma nisciunu ndi fait unu dannu candu abarrat in foras».

Sa primu scuadra de sa Fermassenti est currendi a forti, cun bintiduus puntus chi ballint po su de tres postu in classìfica; sa Juniores, invècias, de seti partidas non d'at bintu ancora mancu una, ma a s'acabu de su campionau mancant ancora cuatru mesis e podit sutzedi de totu.
«Traballu impari a Di Meglio — contat Concas — in su pròpiu campu e a sa pròpiu ora: diaici is giogadoris prus giovanus imparant e crescint sighendi s'esempru de is prus mannus. Deu pentzu chi custa siat sa cosa prus bella».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020