Is scuadras sardas funt giai lòmpias a sa metadi de sa lista de partidas de sa torrada e nosu incumentzaus a fai is contus

E duncas, candu calincunu (o calincuna, ca andat beni aguali, e nci iat a mancai atru puru, gei si cumprendit, berus est?), mescamente in custas ùrtimas oras, in custas ùrtimas diis, mi domandat: e intzandus, cumenti andaus? Deu no potzu fai atru ca ddis arraspundi: eia, totu beni; seus arribbaus a sa metadi de su mesi de Friàrgiu puru, ca abarrat, cumenti scieis beni chentza de s'agiudu cosa mia (e nci iat a mancai atru puru), su prus piticheddu, su prus crutzu, po ddu narai mellus puru, tra totus cussus chi ddoi funt aintru de s'annu, e nci seu arribbau, chistionu po mei, est craru, ma isperu chi sa pròpriu cosa potzat balli po bosatrus puru, chentza de dannus, de arroris, de mobadias, e giai giai chentza de pentzamentus lègius in conca. 

E duncas, eia, si iat a podi narai ca candu no nci funt daboris, sa vida iat a podi essi giai giai una festa; e de su restu, ita abarru innoi a si ddu nai deu? Candu nd'arribbant is daboris (si depeus arregodai, fatu fatu meda, ca seus stichius, ballit po s'anima cosa nosta, si imboddiu sa chistioni diaici, aintru de una domu de petza, cun totu su chi custu pertocat po sa chistioni de is dannus e de is daboris; m'est bèniu de ddu narai diaici, gioghendi unu pagheddeddu a fai su poeta, prus ca su giornalista, ca est una cosa chi mi praxit fintzas a m'amachiai, est a nai ca mi praxit meda meda, custu de podi giogai unu pagheddeddu cun is fueddus e cun is legas chi ndi bogu e nci ghetu me is artìculus chi ndi pesu in sardu, sèmpiri chi sa cosa no si dispraxat tropu), intzandus sa vida cosa nosta pigat totu un antru tastu; e is cosas chi, mancai, ainnantis chi nd'arribbessint is daboris e is dannus, si pariant giai giai chentza de nesciunu importu (chi cumprendeis su chi si bollu narai), intzandus apustis chi, mancai no ddas podeus prus fai, benint a essi sa cosa prus pretziosa chi nci potzat essi; e de su restu, ddu connosceis beni, bosatrus puru, cussu dìciu chi narat ca "cumprendis cantu podit essi de importu una cosa feti candu no dda podis prus gosai". E po no dda acabbai diaici, po no dda acabbai, duncas, cumenti a cussus chi cumprendit cantu podit essi de importu sa dieta candu a fai sa dieta no serbit prus a nudda, po no fai a trassa de cussus chi cumprendit cantu bolint beni a una persona feti candu cussa persona no nc'est prus, e po no fai a trassa de cussus chi cumprendit cantu potzat fai beni, po nd'arremonai una, a si fai una passiladda, feti candu tenint is cambas cancaradas, duncas at a essi po custu, mi megu a solu a solu, ca po custa cida puru, po primu cosa, ainnantis de mi ponni a chistionai de partidas, de resultaus e de bòcias e de gol (cumenti seu costumau a fai dònnia dònnia giòbia de s'annu, chentza de ndi sartai nemmancu unu, chi est bèniu a essi su "slogan", cumenti si megant is ingresus, su dìciu prus togu chi pertocat is artìculus chi ndi bogu aforas e ndi pesu, in sardu, in su sardu chi si fueddat innoi in su Campidanu de mesu, e mescamente in Bidd'e Sorris) mi iat a praxi, e mi praxit, cumenti seu fadendi, de su restu, a torrai totus is gràtzias a su Cielu, eia, po su fatu ca su tempus est sighendi a andai ainnantis po mei puru, e apustis de essi nau custu, torru gràtzias a su Cielu, po su fatu (po si intendi cun su coru prenu de prexu, mi benit de ddu narai diaici, a bortas bastat pagu meda) ca no seu serrau aintru de s'aposentu de un uspidali. Ca cumenti si fia narendi ainnantis, seus fatus de petza, e sa petza, a bortas, benit a essi moddi meda, chi bastat pagu, po s'agatai prenus de daboris; e sa pròpriu cosa si iat a podi narai po is ossus puru, ca a bortas bastat pagu po dda acabbai, de unu segundu a s'atru, totu sciasciaus in terra, cumenti m'est bèniu de narai. Ca oi ses allirgus a tipu su mengianu de sa Pasca Manna, e s'incras t'agatas, invècias, totu prangi prangi. 

E duncas, no m'abarrat atru de fai, ca sighiri a castiai, impari a bosatrus, cumenti funt andendi is cosas me is campionaus de bòcia chi sigheus cun su giàssu de su Diàriu Sportivu; e custu mengianu, in s'interis chi ndi fia pesendi is artìculus in italianu, m'est bèniu in conca chi mi iat a essi praxiu, po s'artìculu de custa cida, a fai su contu de cantu ammancat po serrai is giogus. 
E duncas, sigumenti no sciu mai cali arrastu apa a sighiri po ndi pesai is artìculus in sardu, ainnantis de mi ponni a scriri, deu creu ca potzat essi una cosa toga, e de importu, su de incumentzai a chistionai de bòcias, de partidas e de resultaus, cun una pariga (pariga a sa sarda, si cumprendit) de contus apitzus de sa stagioni de su duamilla e binticuatru – duamilla e binticincu, e apustis, chi mi nd'apa a arregodai, apa a depi agatai su modu de si chistionai, a su mancu pagu pagu (cumenti fatzu dònnia cida de su restu) de su tempus chi est fadendi (e no feti de su tempus chi, gràtzias a Deus, est sighendi a andai ainnantis, po mei e po bosatrus puru, po bosatrus chi custus fueddus ddus ligeis, est craru). 

E duncas, incumentzu a andai a castiai cumenti funt cuncodradas is cosas po su chi pertocat su campionau de sa Sèrie C, chi est su prus mannu tra totus cussus chi sigheus in su giàssu de su Diàriu Sportivu, e ddu sigheus, mescamente, poita ddoi currint is de sa Torres, chi funt s'ùnica scuadra sarda in cussa lista, ddi naru diaici (e invècias, cumenti eis a sciri, fintzas a s'annu passau, a su mancu, e de una bella parighedda de annus, ddoi curriant puru is de s'Olbia, ca ndi funt cabaus in su campionau de sa Sèrie D pròpriu s'annu passau, est a nai a s'acabbu de su campionau de su duamilla e bintitres – duamilla e binticuatru). 
E duncas, po su chi pertocat sa Lista B (ca est cussa innoi agataus is arrùbius – brau de sa Torres, ma sa chistioni ballit aguali po is atras listas chi pertocant, sèmpiri, est craru, su campionau de sa Sèrie C), funt arribbaus a giogai sa de seti giorronadas (po su chi pertocat sa lista de partidas de sa torrada, est craru, berus?), cun is giogus chi s'ant a serrai su bintiseti de su mesi de Abrili, chi at a essi, po si cumprendi mellus a pari, sa cida avatu de su domìnigu de Pasca. 
E mi parit una mesu tontesa (si ddu naru brullendi, est craru) custu de abarrai innoi a pentzai a cantu ant a acabbai is giogus, fadendi su contu ca in dì de oi seus lòmpius feti (e giai giai nemmancu) a sa metadi de su mesi de friàrgiu, e custu bollit narai, duncas (a fai is contus nci poneus pagu, ma pagu meda) ca po serrai is campionaus ammancant calincuna cosa cumenti a duus mesis. 
E immoi chi nci seus, e fadendi su contu ca de su campionau de sa Sèrie C, a su mancu po su chi pertocat is artìculus chi ndi pesu in sardu, ndi chistionu giai giai pagu e nudda, andaus a castiai cumenti funt postas is cosas me in sa lista: is de sa Torres ('tendei 'tendei, cumenti si narat in bidda cosa mia candu benis a sciri de una cosa chi, mancai, fait ispantus, cumenti si iat a podi narai, e isperu chi si cumprendat su chi si bollu narai) s'agatant, in dì de oi, a su de tres postus de sa lista, cun cincuanta puntus fatus, chi ndi funt arribbaus gràtzias a catodixi partidas bintas e a otu partidas chi ant serrau cun su resultau siddau in paridadi (cumenti si iat a podi narai e cumenti, de su restu, m'est bèniu de si narai). E duncas, cincuanta puntus funt unu in mancu de is chi tenint is de sa Ternana, chi s'agatant a su segundu postu de sa lista, cun is de sa Virtus Entella, chi funt cumandendi su campionau, cumenti si iat a podi narai, chi tenint, in dì de oi, allogaus in buciaca, calincuna cosa cumenti a cincuantaseti puntus, seti in prus de su chi tenint allogaus a su callenti is de sa Torres. Ma nc'est de narai puru (e si ddu naru acoitu, ainnantis chi mi ndi bessat aforas de sa conca) ca is de sa Ternana tenint una partida in mancu de cussas chi ant giogau is de sa Torres e is de sa Virtus Entella, e duncas is cosas iant a podi mudai tra una pariga de diis. E, po serrai sa chistioni acapiada a su mundu de is scuadras de sa Sèrie C, a su mancu po sa lista chi pertocat is de sa Torres, si potzu feti narai ca is tattaresus tenint duus puntus in prus (cincuanta contras a corantotu) de is chi tenint is de sa Vis Pesaro, chi in dì de oi, est craru, s'agatant a su de cuatru postus de sa lista. E duncas, po su chi pertocat sa de otu giorronadas (e cun custu dda serru po diaderus) is de sa Torres ant a depi andai a giogai in domu de is de s'Arezzo, e duncas in Toscana (chi no seu sballiendi cun sa tialu de sa geografia italiana, e megu a brullai, gei si cumprendit, berus est?), cun is aversàrius chi s'agatant, in dì de oi, a su de ses postus in sa lista, cun coranta puntus allogaus in buciaca, e chi funt, nc'arribbais a solus a fai is contus, ndi seu giai giai seguru, dexi in mancu deis chi tenint is de sa Torres. E si naru puru ca in sa partida de s'andada iant bintu is toscanus, cun su resultau tundu tundu de duus a zeru, e si cumprendit, ca in su giogu de sa bòcia, cumenti sucedit in sa vida etotu, de su restu, sa cosa de importu prus mannu, sa cosa prus toga, est cussa de arrannèsci a ndi torrai a artziai sa conca apustis chi nd'arruis, o apustis chi perdis una partida, est craru. 

E immoi chi nci seus, fadendi su contu ca ndi chistionu pagu (po no narai giai giai nudda), po su chi pertocat, a su mancu, is artìculus chi ndi pesu in sardu, e duncas, chi seis de acòrdiu cun mei, andaus a biri cumenti funt cuncodradas is cosas, apustis de sa de ses giorronadas de sa lista de partidas de sa torrada po su chi pertocat sa Serie D. 
Sa primu scuadra sarda chi agataus, chi castiaus sa lista partendi de su primu postu e cabendindi concas a s'ùrtimu, est cussa de is tataresus de su Latte Dolce, chi s'agatant, in dì de oi, a su de dexi postus in sa lista, cun bintinoi puntus, chi ndi funt arribbaus gràtzias a otu partidas bintas e a cincu partidas chi is biancus-brau ant serrau cun su resultau siddau in paridadi (e m'eis a iscusai po is rimas chi mi ndi funt bessidas aforas). 
Po sighiri a chistionai de is scuadras sardas, cun binticuatru puntus, est a nai cincu puntus in mancu de is chi tenint is de su Latte Dolce, agataus is de s'Olbia (chi eus arremonau ainnantis in custu artìculu etotu), chi s'agatant a su de trexi postus in sa lista, apustis de essi bintu po ses bortas, cumenti funt ses is partidas chi ant serrau cun su resultau in paridadi. Cun bintiduus puntus in buciaca (est a nai, a fai is contus nci poneus pagu meda, duus in mancu de is chi tenint is de s'Olbia-Terranova e seti in mancu de is chi tenint allogaus is de su Latte Dolce) agataus is de s'Atletico Uri, chi ndi funt cabaus, in s'interis, a su de cuindixi postus in sa lista (apitzus de dexiotu scuadras in totu), apustis de essi pèrdiu po noi bortas, cun cuatru bìncidas  e dexi puntus chi ndi funt lòmpius, ddi naru diaici, de is dexi partidas chi ant serrau cun su resultau in paridadi. 

E sighendi a chistionai de is scuadras sardas, arribbaus, e si dispraxit meda meda, a s'ùrtimu postu de sa lista, innoi agataus is de s'Ilvamaddalena, cun bintunu puntus, e is de sa Cos Sarrabus-Ollastra, chi tenint bintunu puntus etotu. Is duas scuadras nd'ant pesau, no eis a trigai a ddu crei e a ddu cumprendi, is pròprius numerus: eia, megu a narai, duncas, ca ant bintu su pròpriu tanti de partidas, cincu, e nd'ant cassau ses puntus gràtzias a ses partidas chi si funt serradas cun su resultau in paridadi, e po doxi bortas si funt dèpius arrèndiri a is aversàrius. 

E duncas, me is ùrtimas cidas, seus bènnius a sciri (si dda imbòddiu diaici, chi no si dispraxit tropu) ca siat is de s'Ilvamaddalena e siat is de su Cos nd'ant sciusciau is acapius cun is allenadoris chi teniant. 
E parteus, chi seis de acòrdiu, pròpriu cun su chi est sucèdiu in domu de is ollastrinus, chi una pariga de mesis fait iant scerau de donai is crais de sa scuadra a Sebastianu Pinna, chi ndi iat pigau su postu de s'allenadori chi ddoi fiat ainnantis, e seus chistionendi de Frantziscu Loi. 
E duncas, sa nova est bessida a pilu custu sabudu passau etotu, chi fiat s'otu de su mesi de Friàrgiu (diaici no si perdeis aintru de su tialu de su calendàriu, e megu a brullai, si cumprendit berus?), candu ammancànt feti una pariga de oras po s'incumentzu de sa partida chi is de sa Cos Sarrabus – Ollastra ant giogau contras a is de su Guidonia. E duncas, Sebastianu Pinna at acutu a fai, sètziu in sa panchina de sa scuadra groga-brau, calincuna cosa cumenti a undixi partidas. E duncas, si iat a podi narai custu puru, Sebastianu Pinna nd'est lòmpiu candu sa scuadra teniat in busciaca feti duus puntus, ingotus in undixi giorronnadas (est a nai, duncas, duus puntus apitzus de trintatres puntus chi ddoi fiant in su pratu, chi mi permiteis de manigiai custu fueddu e de cuncodrai sa cosa diaici), cun noi partidas pèrdias s'una avatu de s'atra (cun noi partidas pèrdias de sighiu, si iat a podi narai diaici puru, chi si sonat mellus), ma apustis chi Pinna est arribbau a sighiri sa scuadra, ndi funt arribbaus sexi puntus in sexi bessidas (est a nai, a fai is contus nci poneus un àtimu, unu puntu a partida). Sebastianu Pinna at serrau sa storia cosa sua cun us de su Cos Sarrabus Ollastra cun sa partida pèrdia, in domu allena, contras a is de su Cassino, chi s'agatant a su primu postu de sa lista, cun corantases puntus. Is de s'assòtziu ollastrinu ant fatu bessiri unu comunicau, ddu tzerriaus diaici a trassa de s'italianu etotu, innoi ant fatu a sciri, cun pagus fueddus, ca "sa sociedadi, partendi de su presidenti Marcu Nibbio, at scerau de nci bogai de sa scuadra s'allenadori de sa primu scuadra, Sebastianu Pinna". E sa cosa si serrat diaici, chentza nemmancu is fueddus chi, est craru, is sociedadis manigiant, e si cumprendit beni, po torrai gràtzias a s'allenadori apustis de su trabballu chi at fatu. E de custu si podit cumprendi ca, fortzis (e naraus fortzis) calincuna cosa si depit essi arrogada tra s'allenadori e su presidenti. E duncas, si podeus feti imaginai cumenti funt andadas is cosas, fadendi su contu ca in domu de s'assotziu de su Cos ant serrau is bucas (serrau sa buca de is giogadoris e de s'allenadori puru, mi parit craru) e no ant prus chistionau cun is giornalistas, e custa cosa sighit a andai ainnantis fintzas de sa partida chi iant pèrdiu in domu de is de s'Anzio. 
E nemmancu sa bìncida de sa partida chi is de su Cos iant giogau contras a is de Sa Maddalena (unu derby, po imperai unu fueddu ingresu e chi pertocat totus cussas partidas, ddu naru po totus cussas personas, e pentzu mescamente a is femineddas, chi mancai no funt acapiadas a istrintu cun is chistionis de su mundu de sa bòcia) est serbida a mudai sa situatzioni, ddi naru diaici. 

E duncas, is de su Cos, cun Antoniu Carta sètziu in panchina, funt stètius bonus a binci, cun su resultau togu e tundu tundu, de tres a zeru, sa partida chi ant giogau in domu cosa insoru, contras a is de su Guidonia, chi eus arremonau, de su restu, ainnantis in custu artìculu etotu. E sa pròpriu cosa est sucèdia (mi parit de podi narai diaici, chentza timi de mi sballiai) in domu de is de Sa Maddalena, chi ant mudau torra s'allenadori chi est sighendi sa scuadra in custa stagioni totu trobeddada a pari (po ddu narai a sa sorresa). 
E duncas, sa nova est bessida a pilu su cuatru de su mesi de Friàrgiu, apustis de duas diis de sa partida chi is de s'Ilvamaddalena ant giogau e pèrdiu contras a is de su Cynthialbalonga: is de s'assotziu ant decìdiu de nci bogai s'allenadori chi teniant, e seus chistionendi de Massimilianu Fascia, chi fiat, de su restu, su segundu allenadori, fadendi su contu chi at agiudau, in su trabballu cosa sua, a Carlo Cotroneo puru. Duncas, Fascia at acutu a sighiri sa scuadra po dexi bessidas, e nd'est arribbau a su postu (ddi naraus diaici) de Cotroneo, chi s'annu passau fiat stètiu bonu de binci su campionau de s'Ecellenza, ma cust'annu (seus chistionendi de sa stagioni de su duamilla e binticuatru – duamilla e binticincu, si cumprendit beni) nd'at bodditu feti seti puntus me is primus bessidas. E duncas, immoi is crais de sa scuadra funt me is manus de Sandru Acciaro, chi est nàsciu pròpriu in Sa Maddalena e at acutu puru a giogai cun sa scuadra de sa citadi cosa sua. Me is ùrtimus annus, Sandru Acciaro at sighiu sa scuadra fintzas de is tempus de sa Promotzioni, candu iat bintu su campionau cuatru annus fait e, apustis de tres annus, est arrannèsciu a binci, puru, su campionau de s'Ecellenza. 
Su comunicau chi nd'ant bogau aforas is de s'Ilvamaddalena, fait a narai custu puru, est unu pagheddeddu prus druci de su comunicau chi nd'ant pesau (e bogau aforas) is de su Cos, e chi s'apu arremonau pròpriu ainnantis. E duncas, is de s'Ilvamaddalena, po primu cosa "torrant gràtzias, de coru, a Massimilianu Fascia, po totu su trabballu chi at fatu in custas cidas, in custus ùrtimus mesis, fadendi su contu, mescamente, ca s'allenadori at pigau is crais de sa scuadra in manu candu is cosas fiant postas mabi, ma mabi meda. Torraus gràtzias a s'allenadori – est cussu chi, de su restu, podeus ligi in su comunicau – poita at tentu coràgiu meda a pigai sa scuadra in cussas cunditzionis, lègias meda, innoi s'agatàt; e gràtzias a su trabballu chi at fatu est arrannèsciu a guadangiai, a ndi ingolli unu bellu tanti de puntus chi funt stètius de importu mannu po sighiri a curri concas a sa sarvesa. Ma is ùrtimus resultaus, ca no funt stètius pròprius drucis, si iat a podi narai diaici, s'ant portau a pigai custa decisioni – si ligit sèmpiri in su comunicau chi nd'ant pesau is de sa sociedadi de s'Ilvamaddalena -, chi no eus pigau, custu est pagu ma seguru, cun coru lèbiu; est a nai, duncas, ca ndi sciusciai s'acàpiu chi tenestus cun Fascia s'at donau daboris mannus a su coru. E duncas, eus scerau de donai is crais de sa scuadra a un antru leoni nàsciu in s'isula (si bollu arregodai ca su leoni est pròpriu s'animabi chi ddoi est in su simbulu de sa scuadra de s'Ilvamaddalena etotu ndr), e seus chistionendi de Sandru Acciaro, chi est s'allenadori chi, in totu sa storia de sa scuadra cosa nosta, tenit bintus sa cantidadi prus manna de campionaus, impari a s'assòtziu cosa nosta, est craru". 

E duncas, serru is contus chi pertocant is scuadras sardas chi currint me in su campionau de sa Sèrie D, narendusì ca, eia, a is de s'Ilvamaddalena is cosas ddis funt andadas beni meda, chi est berus (cumenti est berus!) chi ant bintu (cun su resultau de duus a zeru) sa partida, de importu mannu, mannu meda po ndi cassai sa sarvesa, chi ant giogau contras a is de su Terracina, in domu cosa insoru etotu, cun sa scuadra sarda chi, immoi, tenit feti unu puntixeddu in mancu de cussus chi tenint is aversàrius e podit sighiri a isperai, e a curri, concas a sa sarvesa, chi iat a essi una cosa de importu manna, e si cumprendit, giai giai cantu su de binci unu campionau, fadendi su contu de cantu est tostau su campionau de sa Sèrie D, e mescamente candu ndi artzias de su campionau de s'Ecellenza (cumenti est tocau, cust'annu, a is de s'Ilvamaddalena), e si cumprendit beni, deu creu. 

E duncas, po serrai is giogus po su chi pertocat su campionau de sa Sèrie D ammancànt, in dì de oi, calincunca cosa cumenti a undixi partidas, cun su campionau chi at a acabbai feti su cuatru de su mesi de Maju (e gei ammancat una dì! S'at a megali calincunu de bosatrus). 

E immoi chi seus arribbaus a custu puntu de sa chistioni, podeus andai a castiai cumenti funt postas, cumenti funt cuncodradas is cosas po su chi pertocat su campionau de s'Ecellenza, ca, cumenti si naru dònnia dònnia borta chi ddu arremonu (diaici no si ddu scarèsceis de seguru), est su prus mannu, su de importu prus mannu (si iat a podi narai diaici puru) tra totus cussus chi ddoi funt, e chi si giogant, in Sardìnnia. 

E duncas, is sexi scuadras ant a torrai in campu custu fini de cida po giogai sa de seti partidas chi ballint po sa lista de sa torrada, cun is giogus chi ant a acabbai feti su trexi de su mesi de Abrili, est a nai una cida ainnantis de is festas po sa Pasca Manna, chi cust'annu nd'at a arrui tradu meda, est a nai su binti de su mesi de Abrili. E immoi chi nci seus, andaus a castiai cumenti funt cuncodradas is cosas me in sa lista: a su primu postu agataus is de su Budune, cun cincuantaduus puntus allogaus a su callenti in buciaca, chi ndi funt arribbaus gràtzias a sexi partidas bintas e a is cuatru partidas chi ant serrau, chi funt stètius bonus, ddi naru diaici, a serrai cun su resultau de paridadi. Is de su Budune, apitzus de bintunu bessidas in totu, ndi funt arrutus feti una borta, a su mancu fintzas a immoi, e immoi eus a biri cumenti ddis ant a andai is cosas me in su benidori, a partiri de sa partida chi ant a depi giogai, custu fini de cida etotu, in domu cosa insoru, contras a is de su Calanzanos. 
E a su segundu postu de sa lista, invècias, agataus is campidanesus de su Muristeni, chi tenint ses puntus in mancu de is chi tenint in dì de oi is primus de sa lista: e duncas, sa scuadra sighida de un allenadori giòvunu cumenti a Marcellu Angheleddu, at bintu catodixi partidas e nd'at serrau tres cun su resultau siddau in paridadi. Is de su Muristeni, peròu, ant pèrdiu po tres bortas. Po su chi pertocat sa su cursa concas a sa Sèrie D, duncas, nci funt puru is de su Tèmpiu, cun corantacincu puntus chi ndi funt arribbaus gràtzias a catodixi partidas bintas e tres partidas chi si funt serradas cun su resultau in paridadi. Eia, a fai is contus nci poneus pagu meda: is de su Muristeni tenint feti unu puntixeddu in prus de is chi tenint is de su Tèmpiu. E a su de cuatru postus in sa lista, agataus is de s'Ossese, chi tenint peròu in buciaca, allogaus a su callenti, feti (si narat po narai, ca no funt pagus de seguru) trintanoi puntus, ca funt peròu trexi in mancu (e sa diferèntzia no est pitica, e gei si cumprendit beni) de is chi tenint in dì de oi is de su Budune. 

Po su chi pertocat sa Promotzioni, invècias, ita si potzu contai? 
Is scuadras chi currint me is duas listas (ellus, cumenti eis a sciri beni su campionau de sa Promotzioni benit pretziu in duus: sa Lista A e sa Lista B) funt arribbadas a sa de seti giorronadas po su chi pertocat sa lista de bessidas de sa torrada (est a nai chi ant a giogai sa de seti giorronnadas pròpriu custu fini de cida chi est arribbendindi), e duncas, is scuadras chi currint in sa Lista A ant a cabai totus de sabudu, invècias is scuadras de sa Lista B ant a giogai is partidas in sa dì de su domìnigu. 
E duncas, is giogus, cumenti scieis (e chi no ddu scieis deu seu innoi pròpriu po si ddu arregodai torra) s'ant a serrai su domìnigu apustis de sa Pasca Manna. E po immoi, a su primu postu de sa Lista A, agataus is de su Tortolì, cun is arrùbius – brau, sighius de un allenadori giòvuneddu, ma bravu e forti meda, cumenti est Tore Mereu, ant bintu calincuna cosa cumenti a undixi partidas s'una avatu de s'atra, ma in s'ùrtima bessida, in s'ùrtima partida chi ant giogau, e seu chistionendi de cussa de sa cida passada, est a nai de su noi de su mesi de Friàrgiu etotu, est craru, si funt dèpius acuntentai de feti unu puntixeddu, apustis de essi serrau sa sfida contras a is de su Castiadas cun su resultau de zeru a zeru. 
A su segundu postu de sa lista, invècias, ddoi funt is de su Lanusè, cun corantacincu puntus in totu (est a nai, eia, duus in mancu feti de is chi tenint is de su Tortolì), gràtzias a trexi partidas bintas e a ses partidas chi ant serrau cun su resultau siddau in paridadi. E duncas, is piciocus sighius de Alberto Piras, pròpriu in s'ùrtima bessida, nd'ant ingotu sa de cuatru partidas perdias de s'annu, fadendi su contu chi nci funt arrutus in domu de is de sa Villacidrese, sa scuadra de Biddaxidru. 
A su de tres postus, invècias (e seu chistionendi sèmpiri de sa Lista A) agataus is de su Sant'Aleni de Cuartu, chi funt stètius bonus a ndi cassai unu puntixeddu in sa partida chi ant giogau in domu de is de s'Idolo, sa scuadra de Arthana sighida de Simoni Podda. E duncas, apustis de su duus a duus chi nd'est bèssiu aforas, is dirigentis de s'assòtziu biancu-birdi (no nc'eis a crei...) ant scerau, ant decìdiu de nci bogai, ddi naru diaici, de sa panchina cosa insoru, s'allenadori chi teniànt, e seus chistionendi, duncas, de Mauriziu Rinino, cun sa nova chi nd'est arribbada pròpriu in su mengianu de su martis, est a nai, duncas, una pariga feti de diis fait. 
Su bisu de is de su Sant'Aleni, e si cumprendit, est cussu de ndi torrai a artziai in pressi, e acoitu, torra in su campionau de s'Ecellenza (de innoi ndi funt cabaus pròpriu s'annu passau), ma no ddu ant a fai cun Rinino sètziu in sa panchina. S'allenadori, chi iat agiudau s'assòtziu in s'ùrtima parti de sa stagioni passada, cumenti at fatu, de su restu, in custas bintitres giorronadas chi si funt giogadas in su campionau de su duamilla e binticuatru – duamilla e binticincu, at dèpiu pinnigai is bagàglius e saludai a totus. Is de sa sociedadi, si cumprendit beni chi andaus a lìgi su comunicau chi nd'ant bogau aforas pròpriu in custas ùrtimas oras, sighint a curri po ndi cassai su primu postu, fadendi su contu chi mancant ancora de giogai calincuna cosa cumenti a undixi partidas, e duncas, a fai is contus nci poneus pagu meda, ddoi funt in su pratu calincuna cosa cumenti a trintatres puntus. «Teneus duncas su coru prenu de isperas bonas fintzas a cucuru – at contau a is giornalistas su presidenti de s'assòtziu, Luca Meloni, poita sa scuadra chi eus cuncodrau in s'istadi est toga e forti meda, e is piciocus cosa nosta sighint a curri totus concas a su pròpriu resultau, chi est cussu de ndi pesai una stagioni de importu, e mancai, de ndi cassai torra s'artziada in su campionau de s'Ecellenza. Sa calidadi de sa rosa cosa nosta est arta meda, e s'ammesturu chi seus arrannèscius a ndi pesai, ddi naru diaici, tra piciocheddus giòvunus e giogadoris cun unu bellu tanti de esperièntzia a is pabas funtzionat, e beni puru, cumenti no apu mai biu in totus custus annus chi apu fatu cumenti a presidenti de su Sant'Elena». 
Po su chi pertocat su nomini de s'alleadori nou, po immoi si potzu narai feti ca (e sa nova nd'est bessida feti su mercuis a su mengianu de custa cida etotu, duncas si iat a podi narai, eia, chi est callenti callenti) sa scuadra est me is manus de Alessandru Accaro, (chi fiat giai su segundu allenadori de s'assòtziu), chi at a tenni sa possibbilidadi de trabballai impari a Mauru Bernardini, chi est su "preparadori atleticu", (po ndi furai sa trassa de cumenti si tzerriat in italianu etotu). 
E duncas, immoi is de su Sant'Aleni ant a circai de si cuncodrai po giogai sa partida contras a is de s'Atleticu de Masainas. In s'interis, is de s'assàtziu biancu-birdi funt sèmpiri circhendi un allenadori nou: me is ùrtimas oras ant trabballau po agatai s'acapiu cun Marcu Cossu e Antonio Prastaro, ma po immoi, a su mancu, no si nd'est fatu ancora nudda. 
E duncas, serru cun s'artìculu de custa cida (est a nai, duncas, eia, ca seus po acabbai, po spaciai is contus e is contixeddus) chistionendusì (antzis, scriendusì, ca fortzis sonat mellus puru...) de cumenti funt cuncodradas is cosas me in sa Lista B de su campionau de sa Promotzioni, e custu bollit narai (si ddu incuminzu a arremonai giai de oi, immoi chi nci seu) ca sa cida chi at a benni apa a sighiri a andai ainnantis (po su chi pertocat s'artìculu in sardu, mi parit craru puru, berus est? E sèmpiri chi su Cielu at a bolli custu beni po mei) cun is contus acapiaus a is campionaus de sa Primu e de sa Segunda Categoria, fadendi su contu ca po custa cida no apu acutu (e no apa a acudi, duncas); e si incumentzu a arremonai puru ca po custa cida no apu chistionau (mancu pagu pagu, cumenti si narat; mancu po unu pagheddeddu, cumenti si iat a podi narai, puru, ca mancai sonat prus druci) de su tempus chi est fadendi, e de custa cosa puru, si ddu promitu, apa a tenni su modu de recuperai su chi no apu tentu su modu (su chi no seu arrannèsciu) de fai custa cida. 
Ma torraus a nosu, duncas: a su primu postu de sa Lista B agataus is de s'Usinese, cun corantaseti puntus in buciaca, chi ndi funt arribbaus gràtzias a catodixi partidas bintas e gràtzias, puru, a is cincus puntixeddus ca is arrùbius-brau nd'ant cassau me is cincu bessidas innoi ant serrau sa partida cun su resultau de paridadi (cumenti ddi naraus); is piciocus sighius de un allenadori giòvuneddu ma bravu meda (e chi est stètiu unu giogadori forti, candu ndi cabàt in campu) cumenti est Giampieru Loriga domìnigu passau no funt arrannèscius a binci sa partida contras a is de su Bosa, cun is allenus, sighius de un antru allenadori forti cumenti est Tore Carboni, chi funt arrannèscius a aguantai, est a nai, duncas, ca sa partida s'est serrada cun su resultau de unu a unu. E immoi is de s'Usinese si dda ant a depi biri contras a is de su Tonara, in domu cosa insoru etotu, e is arrùbius-brau no podint prus sballiai, cumenti si iat a podi narai (e cumenti seu narendi, de su restu), fadendi su contu ca tenint is de su Uddusò e is de su Coghinas apicigaus a is carronis, est a nai cun unu punti in mancu in sa lista (corantaseti contras a corantases). E duncas, is de su Uddusò nd'ant cassau, a su mancu fintzas a oi, calincuna cosa cumenti a trexi partidas bintas, e po seti bortas ndi funt bessius de su campu (ddi naru diaici) cun unu puntixeddu in buciaca, est a nai, duncas, cun sun resultau de sa partida in paridadi. 
Sa pròpriu cosa si iat a podi narai de is de su Coghinas: trexi partidas bintas po issus puru, seti funt is partidas chi si funt serradas cun su resultau in paridadi e tres funt is partidas chi ant pèrdiu. E immoi, in sa giorronada chi at a benni, e chi est giai giai po nd'arribbai, e seus chistionendi, est craru, de sa de seti giorronadas, is de su Uddusò ant a depi andai a giogai in domu de is de sa Montalbo de Thiniscole, chi est una de cussas partidas innoi iat a podi sucedi de totu, mancai is meris de domu sighius de Matzutzi tèngiant calincuna cosa cumenti a trinta puntus in mancu de is chi tenint is de su Uddusò (e no funt pagus); ma in su giogu de sa bòcia, e sa cosa bella deu creu est pròpriu custa, no si podit mai sciri cumenti ant a andai is cosas; antzis, sucedit fatu fatu ca sa scuadra prus pitichedda tra is duas, cussa posta peus in sa lista, arrannèsciat a ndi cassai is tres puntus prenus. E invècias, e cun custu serru po diaderus, is de su Coghinas si dda ant a depi biri, in domu cosa insoru etotu (est a nai, duncas, ca ant a depi arriciri sa visita de is aversàrius) contras a is de su Sennaru, chi in dì de oi tenint sexi puntus allogaus in buciaca e feti una scuadra a is pabas cosa insoru, e seus chistionendi de is de s'Abbasanta. 

E duncas, po custa cida puru, mi parit mi parit, seus arribbaus a sa fini. 
E duncas no m'abarrat atru de fai ca si saludai a totus e s'eus a ligi torra (chi totu andat beni) tra seti diis a partiri de oi; est a nai, duncas, cumenti a sèmpiri, cumenti a dònnia cida, su giòbia chi at a benni. 
Si imprassu a forti!



Attività realizzata col contributo della Regione Sardegna. IMPRENTAS 2024-2025. LR 22/2018 art. 22